လက်ဉီးမှုရယူ ခြင်း
Vol. 23 Ch. 248
"ခုနက... ဘာဖြစ်သွားတာလဲ"
"ဘုရားရေ... မြေကြီးစာရင်းဝင် ဖန်တာ့ကျီက ထန်ထျန်းရဲ့ တစ်ကွက်တည်းနဲ့တင် အပြတ်အသတ် အနိုင်ပိုင်းခံလိုက်ရတာလား"
ခဏတာ တိတ်ဆိတ်သွားပြီးနောက် လူအုပ်ကြီးမှာ ရုတ်တရက် ဆူညံပွက်လောရိုက်သွားတော့သည်။
ဒါက တကယ်ကို လွန်လွန်းလှသည်။
ဖန်တာ့ကျီက အစစ်အမှန် အင်မော်တယ် အစောပိုင်းအဆင့် ကျင့်ကြံခြင်းရှိရုံသာ ဖြစ်သော်လည်း မြေကြီးစာရင်းသို့ တက်လှမ်းနိုင်သူဖြစ်သဖြင့် အားနည်းသူတစ်ဦးတော့ မဟုတ်ပေ။
ထန်ထျန်းက ပိုသန်မာသည်ထားဦးတော့၊ တစ်ဖက်လူက သူ့ရှေ့တွင် အနည်းငယ်မျှပင် ပြန်မခုခံနိုင်လောက်အောင် ဖြစ်သွားရခြင်းကတော့ မဖြစ်သင့်ပေ။
ဒါက ဘယ်လိုအခြေအနေမျိုးလဲ။
"ဟားဟား... ငါကတော့ ထန်ထျန်းက မြေကြီးစာရင်း အဆင့် ၆၀၀ ကျော်မှာ အဆင့်သတ်မှတ်ခံထားရတာက နည်းနည်းများလွန်းနေတယ်လို့ ထင်နေတာ။"
"ဒါပေမဲ့ အခုကြည့်ရတာတော့ သူက ဒီအဆင့်အတန်းနဲ့ ထိုက်တန်တဲ့ ခွန်အားမျိုးကို အပြည့်အဝ ပိုင်ဆိုင်ထားတာပဲ။"
"ပြီးတော့ ဖြစ်နိုင်တာက သူ့ရဲ့ စွမ်းအားအစစ်အမှန်က ဒီထက်မက ပိုပြီးတော့တောင် ရှိနေနိုင်သေးတယ်"
လူများက တီးတိုးပြော နေကြပြီး သူတို့၏ မျက်နှာပေါ်မှ အမူအရာများမှာလည်း အစ ကလို စပ်စုချင်သည့် ပုံစံမျိုးမှ အလွန်အမင်း ထိတ်လန့်တုန်လှုပ်သည့် ပုံစံသို့ ပြောင်းလဲသွားကြပြီ ဖြစ်သည်။
အပြင်လောကမှ လာသည့် တပည့်သစ်တစ်ယောက်က ဤမျှလောက်အထိ ခွန်အားကြီးမားနိုင်ပါသလား။
လူတိုင်း၏ တုံ့ပြန်မှုများကို ရင်ဆိုင်နေရသော်လည်း ထန်ထျန်းကမူ ထုံးစံအတိုင်းပင် တည်ငြိမ်စွာဖြင့် ထိုင်ခုံပေါ်တွင် ထိုင်လျက် အရက်ကို အေးအေးလူလူ သောက်နေဆဲဖြစ်သည်။
"ငါ့ကို စိန်ခေါ်ချင်တဲ့သူ ရှိသေးလား"
သူက တစ်ဖက်မှ လူတစ်စုကို လှည့်ကြည့်လိုက်သည်။
ထိုအချိန်တွင် ဖန်တာ့ကျီ၏ အဖော်များမှာလည်း အလွန်အမင်း တုန်လှုပ်ခြောက်ခြားနေကြသည်။
သူတို့ ရောက်လာစဉ်က ထန်ထျန်းကို လုံးဝ မျက်စိထဲ ထည့်မထားခဲ့ကြပေ။
အကြောင်းမှာ ရှေးယခင်ကတည်းက အပြင်မှ ထျန်းဖူနန်းတော်သို့ ရောက်လာသည့် တပည့်သစ်တိုင်းသည် အစပိုင်းတွင် ဤမျှလောက်အထိ ထင်ပေါ်ကျော်ကြားနိုင်စွမ်း မရှိခဲ့ကြသောကြောင့် ဖြစ်သည်။
လွန်ခဲ့သော နှစ်ပေါင်း ၂၀ ကျော်က 'နတ်သမီးလင်းလျို့ ' ပင်လျှင် နဂါးတံခါးစမ်းသပ်ပွဲ ပြီးမှသာ လူတိုင်း၏ အာရုံစိုက်မှုကို ရရှိခဲ့ပြီး တစ်ဟုန်ထိုး နာမည်ကြီးလာခဲ့ခြင်း ဖြစ်သည်။
ဒါက ပတ်ဝန်းကျင် အခြေအနေ၏ ကန့်သတ်ချက်ဖြစ်သဖြင့် မည်သူမျှ ရှောင်လွှဲ၍ မရနိုင်သော အချက်ပင်။
သို့သော် ထန်ထျန်းကမူ လူတိုင်း လက်ခံထားသည့် ဤယူဆချက်ကို ဆန့်ကျင်နေပုံရသည်။
ဂိုဏ်းဝင်စမ်းသပ်ပွဲတွင် သူတစ်ယောက်တည်းဖြင့် ထျန်းဖူနန်းတော် တပည့် ရာကျော်ကို ဖယ်ရှားခဲ့ပြီး ယခုအခါတွင်လည်း တစ်ကွက်တည်းဖြင့် မြေကြီးစာရင်းဝင် ဖန်တာ့ကျီကို တိုက်ခိုက်နိုင်စွမ်း လုံးဝ ကုန်ဆုံးသွားအောင် လုပ်လိုက်ပြန်ပြီ။
သူ၏ ခွန်အားမှာ နက်ရှိုင်းလှသော ချောက်ကြီးကဲ့သို့ပင် မည်သူမျှ ခန့်မှန်း၍ မရနိုင်ချေ။
ထန်ထျန်း၏ မေးခွန်းကြောင့် လူတိုင်းမှာ ခေတ္တမျှ ကြောင်အသွားကြပြီး မည်သူမျှ အနိုင်ရမည်ဟု အာမမခံနိုင်တော့သဖြင့် ရှေ့သို့ မထွက်ရဲကြတော့ပေ။
တွေဝေနှောင့်နှေးနေကြသည့် တပည့်များကို ကြည့်ကာ ထန်ထျန်းက အသာလေး သက်ပြင်းချလိုက်သည်။
"ငါက ထျန်းဖူနန်းတော် တပည့်တွေက တစ်ကမ္ဘာလုံးမှာ အထူးချွန်ဆုံး ပါရမီရှင်တွေလို့ ထင်ထားခဲ့တာ။"
"ဒါပေမဲ့ ဒီလောက်ပဲလား"
"စိန်ခေါ်ဖို့ သတ္တိတောင် မရှိဘဲနဲ့ ဘယ်လိုအရည်အချင်းမျိုးနဲ့ ကိုယ့်ကိုယ်ကိုယ် ပါရမီရှင် လို့ ခေါ်နေကြတာလဲ"
သူ၏ စကားလုံးတိုင်းမှာ လှောင်ပြောင်သရော်မှုများဖြင့် ပြည့်နှက်နေသည်။
အားလုံးမှာ မာနကြီးကြသည့် လူငယ်များ ဖြစ်ကြသဖြင့် ထန်ထျန်း၏ စကားကို ကြားသောအခါ ဒေါသမှာ ကြောက်ရွံ့မှုကို ကျော်လွန်သွားတော့သည်။
လူငယ်တစ်ဦးမှာ လူအုပ်ထဲမှ ခုန်ထွက်လာသည်။
သူ၏ အသက်မှာ ဖန်တာ့ကျီထက် ငယ်ပုံရသော်လည်း သူ၏ ကိုယ်ပေါ်မှ အေယ်ရာ မှာမူ ဖန်တာ့ကျီထက် ပို၍ အားကောင်းလှသည်။
"ထန်ထျန်း... မင်း အရမ်း မောက်မာမနေနဲ့"
လူငယ်က ဒေါသတကြီး အော်လိုက်သည်။
ထန်ထျန်းက အေးဆေးစွာ ပြုံးလိုက်ပြီး "မင်းက ဘာတွေ ပြောနေတာလဲ"
"ခုနက တိုက်ပွဲမှာ ငါက အနိုင်ရထားတဲ့သူလေ၊ ငါက မမောက်မာလို့ ဘယ်သူ့ကို မောက်မာခိုင်းရမှာလဲ"
လူငယ်၏ မျက်နှာမှာ ချက်ချင်း ညိုမည်းသွားသည်။
သို့သော် သူ ပြန်ပြောရန် စကားလုံး ရှာမတွေ့ပေ။ အကြောင်းမှာ တစ်ဖက်လူ ပြောနေသည်မှာ အမှန်တရား ဖြစ်နေသောကြောင့် ဖြစ်သည်။
နည်းနည်းတော့ အရှက်မရှိသလို ဖြစ်နေရုံသာ ရှိသည်။
အခြေအနေမဟန်သဖြင့် သူက နှာခေါင်းတစ်ချက် ရှုံ့လိုက်ကာ "မင်းက စီနီယာအစ်ကို ဖန် ကို အနိုင်ယူနိုင်ပေမဲ့ တခြားသူတွေကို အနိုင်ယူနိုင်မယ်လို့ မထင်နဲ့"
"ငါက..."
လူငယ်က သူ့နာမည်ကို မိတ်ဆက်ရန် ပြင်လိုက်သော်လည်း ထန်ထျန်းက လက်မြှောက်ကာ တားလိုက်သည်။
"ငါက ငါ့လက်အောက်မှာ ပထမဆုံး ရှုံးနိမ့်သွားတဲ့သူရဲ့ နာမည်ကိုပဲ မှတ်ထားတတ်တာ။"
"နောက်ကလူတွေရဲ့ နာမည်ကိုတော့ ငါ စိတ်မဝင်စားဘူး"
ထန်ထျန်းက အေးဆေးစွာ ပြောလိုက်သည်။
လူငယ်မှာ ဒေါသထွက်လွန်းသဖြင့် အံကြိတ်ထားရသည်။ ဤလူမှာ တကယ်ကို မောက်မာလွန်းသည်၊ လူကို ဒေါသထွက်အောင်လည်း တကယ် လုပ်နိုင်စွမ်းရှိသည်။
"မင်းက ငါ့ကို အနိုင်ယူနိုင်မယ်လို့ ဒီလောက်တောင် ယုံကြည်မှု ရှိနေတာလား"
သူက ဟိန်းဟောက်လိုက်သည်။ သူ၏ ဒေါသနှင့် ခွန်အားများမှာ အထွတ်အထိပ်သို့ ရောက်ရှိနေပြီး အချိန်မရွေး ပေါက်ကွဲထွက်လာတော့မည့် အနေအထား ဖြစ်နေသည်။
ထန်ထျန်းကမူ ထိုပုံစံအတိုင်းပင် ရှိနေကာ မေးလိုက်သည်။ "အဲ့ဒီတော့... အခု မင်းက ငါ့ကို စိန်ခေါ်မှာလား"
"အပိုတွေ မမေးနဲ့"
လူငယ်က အော်လိုက်သည်။
ထန်ထျန်းက ခေါင်းငြိမ့်ပြကာ "ဒါဆိုရင် အခုပဲ စမလား"
လူငယ်၏ မျက်လုံးများမှာ အေးစက်လှသည်။ "ဒါပေါ့"
ထန်ထျန်း "ငါက မင်းကို တစ်ကွက် အလျော့ပေးဖို့ လိုမလား"
လူငယ် "မလိုဘူး"
ထန်ထျန်း "ဒါဆိုရင် အချိန်တွက် လိုသေးလား"
လူငယ်မှာ ဒေါသကြောင့် ပေါက်ကွဲမတတ် ဖြစ်နေပြီ ဖြစ်သည် "ဒါလည်း မလိုဘူး"
သူက ထန်ထျန်းကို အစိမ်းလိုက် ဝါးစားတော့မည့်အလား စိုက်ကြည့်နေသည်။
သို့သော် သူ၏ စကားဆုံးသွားသည်နှင့် တပြိုင်နက် ကြောက်မက်ဖွယ်ကောင်းသော ဖိအားတစ်ခုမှာ သူ၏ ခန္ဓာကိုယ်ပေါ်သို့ တိုက်ရိုက်ကျရောက်လာတော့သည်။
"ဘုန်းးး"
ထိုဖိအားမှာ ကြီးမားလွန်းလှသဖြင့် လူငယ်မှာ ချက်ချင်း တုံ့ပြန်နိုင်စွမ်း မရှိဘဲ ရှေ့သို့ ခြေလှမ်းကျဲကြီး တစ်လှမ်း တိုးသွားပြီးမှသာ မြေပြင်ပေါ်သို့ မှောက်လျက် မလဲကျသွားအောင် ထိန်းထားနိုင်ခဲ့သည်။
သို့သော် သူသည် အလွန်အမင်း ခံရခက်နေသည်။ သူ၏ ကိုယ်ပေါ်တွင် မမြင်ရသည့် တောင်ကြီးတစ်လုံးကို ထမ်းထားရသကဲ့သို့ ခံစားနေရပြီး အသက်ရှူလိုက်တိုင်း မျက်နှာမှာ ပို၍ နီမြန်းလာကာ ဒူးခေါင်းများနှင့် အခြားသော အဆစ်အမြစ်များဆီမှ "ဂျောက် ဂျောက်" ဟု မြည်သံများ ထွက်ပေါ်လာရာ ကြားရသူများမှာပင် ကြက်သီးထဖွယ် ကောင်းလှသည်။
"ဟမ်... ဒါ ဘာဖြစ်တာလဲ"
ဘေးမှ ကြည့်နေသော လူအချို့မှာ မသိနားမလည် ဖြစ်နေကြသည်။
သို့သော် ဝမ့်ယွဲ့တောင်ထိပ်၏ အထက်ပိုင်းမှ ဆင်းလာကြသော တပည့်များကမူ အခြေအနေကို ရိပ်မိသွားကြသည်။
"ထန်ထျန်း တိုက်ခိုက်လိုက်တာပဲ။"
"သူက ကြောက်စရာကောင်းတဲ့ စွမ်းအားတစ်ခုကို ထိန်းချုပ်ပြီး တစ်ဖက်လူရဲ့ ကိုယ်ပေါ်ကို ဖိချလိုက်တာ။"
"အဲ့ဒါက မမြင်ရတဲ့ ဖိအားပဲ၊ ငါ့ရဲ့ ခန့်မှန်းချက်အရဆိုရင်... ဒါက မြေကြီးသံလိုက်စက်ကွင်း နဲ့ ဆက်စပ်နေနိုင်တယ်"
ပါရမီရှင်များ ဖြစ်ကြသည့်အလျောက် သူတို့က ထန်ထျန်း အသုံးပြုလိုက်သည့် သိုင်းကွက် ကို လျင်မြန်စွာ ခန့်မှန်းနိုင်ကြသည်။
မှန်ပေသည်။ ၎င်းမှာ မြေကြီးသံလိုက်စွမ်းအား (သို့မဟုတ်) ဆွဲငင်အား ပင် ဖြစ်သည်။
လူငယ်က အချိန်တွက် ပေးဖို့ မလိုဘူးဟု ပြောလိုက်သည်နှင့် တပြိုင်နက် ထန်ထျန်းက ထိုသူရှိရာ နေရာ၏ ဆွဲငင်အားကို ချက်ချင်း ပြောင်းလဲပစ်လိုက်ခြင်း ဖြစ်သည်။
အဆ တစ်သောင်းအထိ မြှင့်တင်လိုက်ခြင်းပင်။
ဇာတ်လိုက်ဖြစ်တိုင်း အမြဲတမ်း ခုခံနေရမည်ဟု မည်သူပြောသနည်း။
ဤတစ်ကြိမ်တွင်မူ ထန်ထျန်းက ဦးစွာ တိုက်ခိုက်ရန် ရွေးချယ်ခဲ့သည်။
မြေကြီးသံလိုက်စွမ်းအားက အရောင်မရှိ၊ ပုံသဏ္ဌာန်မရှိဘဲ တာအို လှိုင်းများကိုပင် ရှာဖွေရခက်လှသဖြင့် လောကအနှံ့ လှည့်လည်ရာတွင် လူမသိသူမသိ တိုက်ခိုက်ရန်အတွက် အကောင်းဆုံးသော လျှို့ဝှက်ချက် တစ်ခုပင် ဖြစ်သည်။
သို့သော် ထန်ထျန်းကို အနည်းငယ် အံ့အားသင့်စေသည်မှာ တစ်ဖက်လူက အချိန်မီ တုံ့ပြန်နိုင်ခဲ့ပြီး ဆွဲငင်အား အဆတစ်သောင်းကို တောင့်ခံထားနိုင်ခြင်းပင် ဖြစ်သည်။
ထျန်းဖူနန်းတော်မှ ပါရမီရှင်များမှာလည်း အထိုက်အလျောက်တော့ အသုံးဝင်သေးပုံရသည်။
သို့သော် ကံမကောင်းစွာဖြင့် ထန်ထျန်း၏ ယနေ့ ရည်ရွယ်ချက်မှာ သူ၏ အာဏာကို ပြရန် ဖြစ်သည်။
လက်ထဲမှ အရက်ခွက်ကို ဖြည်းညှင်းစွာ ပွတ်သပ်ရင်း သူက လူငယ်၏ ကိုယ်ပေါ်မှ မြေကြီးသံလိုက်အားကို နောက်ထပ် အဆတစ်သောင်း ထပ်တိုးလိုက်ပြန်သည်။
ဤတစ်ကြိမ်တွင်မူ တစ်ဖက်လူမှာ လုံးဝ တောင့်မခံနိုင်တော့ပေ။
"ဘုန်းးး" ဟူသော အသံကြီးနှင့်အတူ လူငယ်မှာ ဒူးနှစ်ဖက်စလုံး မြေကြီးပေါ်သို့ ကျိုးကျသွားတော့သည်။
အရိုးကျိုးသံ "ခရက်" ဟူသော အသံနှင့်အတူ လရောင်စွမ်းအားဖြင့် သန်မာအောင် ပြုလုပ်ထားသော မြေပြင်မှာပင် သူ၏ ဒူးခေါင်းကြောင့် ကျင်းနှစ်ကျင်း ဖြစ်သွားကာ မြေပြင်တစ်ခုလုံး တုန်ခါသွားတော့သည်။
လူငယ် စုဆောင်းထားသမျှ ဒေါသနှင့် ခွန်အားများမှာ သွေးတစ်လုပ်အဖြစ် ပြောင်းလဲသွားကာ မြေပြင်ပေါ်သို့ ပန်း ထွက်သွားတော့သည်။
လူတိုင်းမှာ နောက်တစ်ကြိမ် ကြောင်အသွားကြပြန်သည်။
ခုနက ဖန်တာ့ကျီ ရှုံးနိမ့်သွားခြင်းက သူတို့ကို အလွန်အမင်း တုန်လှုပ်စေခဲ့လျှင် ယခုတစ်ကြိမ်မှာမူ သူတို့ကို ကြောက်လန့်တုန်ရင်စေခဲ့ပြီ ဖြစ်သည်။
အကယ်၍ ထန်ထျန်းက အခွင့်အရေး မပေးလျှင် တစ်ဖက်လူမှာ တိုက်ခိုက်ဖို့ အခွင့်အရေးတောင် ရမှာ မဟုတ်ပေ။
အချိန်အတော်ကြာပြီးနောက် လူတစ်ဦးက တိုးတိုးလေး ပြော လိုက်သည်။ "ငါ မှတ်မိသလောက်ဆိုရင် ဒီလူငယ်နာမည်က လီဖေး၊ မြေကြီးစာရင်း အဆင့် ၇၄၃ က ကျင့်ကြံသူ ပဲ..."
"အစစ်အမှန် အင်မော်တယ် နှောင်းပိုင်း အဆင့် ပဲ"
လူတိုင်းမှာ ချက်ချင်း ဆွံ့အသွားကြသည်။
"အစစ်အမှန် အင်မော်တယ် နှောင်းပိုင်း အဆင့် ကျင့်ကြံသူ ကို ပြန်ခုခံခွင့်တောင် မရအောင် လုပ်နိုင်တယ်ဆိုရင် ထန်ထျန်းရဲ့ ကျင့်ကြံခြင်းက... ကောင်းကင်အင်မော်တယ် ဖြစ်နေပြီလား"
ထိုလူက ခေါင်းခါရင်း ပြုံးလိုက်သည်။
"ကောင်းကင်အင်မော်တယ် မဟုတ်ရင်တောင် ကောင်းကင်အင်မော်တယ်ရဲ့ တိုက်ခိုက်ရေးစွမ်းအားတော့ ရှိနေမှာ သေချာတယ်။"
"တကယ့်ကို မိစ္ဆာလို ပါရမီရှင်ပဲ၊ သူက လွန်ခဲ့တဲ့ နှစ် ၂၀ ကျော်က လူထက်တောင် ပိုပြီး ကြောက်စရာကောင်းနေသေးတယ်။"
"ထျန်းဖူနန်းတော်မှာတော့ ကမ္ဘာပျက်ဦးမှာပဲ"
လူအုပ်ကြီးမှာ ဆူညံပွက်လောရိုက်နေသော်လည်း ထန်ထျန်းကမူ ထိုအတိုင်းပင် တည်ငြိမ်နေဆဲဖြစ်သည်။
"နောက်တစ်ယောက်"
သူက ကျန်ရှိနေသေးသော စိန်ခေါ်သူများကို စိုက်ကြည့်လိုက်တော့သည်။