ကျန်းကျဲ့ ရောက်လာခြင်း
Vol. 23 Ch. 257
တစ်ညတာ အနားယူပြီးနောက် နောက်တစ်နေ့ နံနက်တွင် ထန်ထျန်းက ကုရှောင်းရွှယ်အတွက် ဟင်းပွဲကောင်းများ ပြင်ဆင်ပေးကာ သူမ အင်မော်တယ်အဆင့်သို့ အောင်မြင်စွာ တက်လှမ်းနိုင်ခဲ့ခြင်းအတွက် ဂုဏ်ပြုလိုက်သည်။
တကယ်တော့ သူက "ပြင်ဆင်ပေး" ရုံသက်သက်သာ။
ဟင်းတွေကိုတော့ ရှောင်းရွှယ်က ကိုယ်တိုင်ချက်တာဖြစ်ပြီး သူက ပန်းကန်ထဲ လှလှပပ ထည့်ပေးတဲ့ တာဝန်ပဲ ယူခဲ့တာပါ။
ဒါလည်း ပြင်ဆင်ပေးတာပဲ မဟုတ်လား။
ဟင်းလေးမျိုးနဲ့ စွပ်ပြုတ်တစ်ခွက်။ တစ်ခွန်းတည်းနဲ့ အကျဉ်းချုပ်ရရင်
ထင်းမီးနဲ့ချက်တဲ့ ထမင်းက တကယ်ပဲ မွှေးကြိုင်လှပေသည်။
မနက်စာ စားပြီးနောက် လူတိုင်းက သူတို့ အလုပ်ကိစ္စများဖြင့် လုပ်ရန် ပြင်ဆင်ကြတော့သည်။
သို့သော် အပြင်မထွက်ရသေးခင်မှာပင် အပြင်ဘက်၌ ဆူညံသံများ ထွက်ပေါ်လာပြီး လူအုပ်ကြီး ဝိုင်းအုံနေသည့်ပုံစံ ဖြစ်နေသည်။
ခဏအကြာတွင် လီဟုန် အထဲသို့ ပြန်ဝင်လာသည်။
သူ၏ မျက်ခုံးနှစ်ခုကြားတွင် လေးနက်မှုများ အထင်အသား ပေါ်လွင်နေ၏။
"သခင်လေး... နောက်ထပ် စိန်ခေါ်မယ့်သူ ရောက်လာပြန်ပြီ"
လီဟုန်က ပြောလိုက်သည်။
ထန်ထျန်းက အေးအေးဆေးဆေးပင် "ဪ" ဟု ရေရွတ်ကာ "အေးအေးချမ်းချမ်း ရှိနေတာ ရက်အနည်းငယ် ကြာပြီဆိုတော့ တစ်ယောက်ယောက်က ပြင်ဆင်ပြီး လာတာလည်း ဖြစ်နိုင်တာပဲ။"
"ဒီတစ်ခေါက်က ဘယ်လိုလဲ မြေကြီးစာရင်းရဲ့ ထိပ်တန်းလူလား၊ ဒါမှမဟုတ် ကောင်းကင်စာရင်းက လူလား"
ပြီးခဲ့သည့်တစ်ခေါက် မြေကြီးစာရင်း အဆင့်တစ်ရာအတွင်းရှိ ကောင်းကင်အင်မော်တယ် တစ်ဦးကို သူ အနိုင်ယူခဲ့ပြီးနောက်ပိုင်း သူ့ကို လာရောက်စိန်ခေါ်သူများ ရက်အနည်းငယ်ကြာ တိတ်ဆိတ်သွားခဲ့သည်။
ကောင်းကင်အင်မော်တယ် အဆင့်တောင်မှ အရှက်တကွဲ ရှုံးနိမ့်ပြီး ထန်ထျန်း၏ လှိုဏ်ဂူရှေ့မှာ သွေးတွေအန်ကာ ဒူးထောက်ခဲ့ရသည်ကို မြင်ပြီးနောက် အခြားသူများက သူတို့၏ ခွန်အားကို သေချာ ပြန်လည်တွက်ချက်နေကြခြင်း ဖြစ်ပေမည်။
၎င်းအပြင် မြေကြီးစာရင်း ထိပ်တန်းလူများနှင့် ကောင်းကင်စာရင်းဝင် ပါရမီရှင်များက အလွန် နာမည်ကြီးသူများ ဖြစ်ကြသည်။
အကယ်၍ သူတို့ ရှုံးနိမ့်ခဲ့လျှင် သူတို့၏ ဂုဏ်သိက္ခာကို ကြီးမားစွာ ထိခိုက်စေနိုင်သည်။
ထို့ကြောင့် ထန်ထျန်းကို အနိုင်ယူနိုင်မည့် ခိုင်မာသော ယုံကြည်ချက် မရှိဘဲနှင့်တော့ သူတို့ ဇွတ်အတင်း ထွက်လာကြလိမ့်မည် မဟုတ်ပေ။
ယနေ့ တစ်ယောက်ယောက် ရောက်လာသည်ဆိုလျှင်တော့ သေချာပေါက် ပြင်ဆင်လာခြင်း ဖြစ်ရမည်။
"ကောင်းကင်စာရင်းက လူပါပဲ။"
"ဒါ့အပြင် အဆင့်ကလည်း အရမ်းမြင့်တယ်၊ အခု လောလောဆယ် အဆင့် (၁၁) မှာ ရှိနေတဲ့သူပါ"
လီဟုန်က ဆက်ပြောသည်။ "သူ့နာမည်က ဟွမ်ရှစ်ယွီ တဲ့၊ အပြင်လောကမှာတော့ သူ့ကို သခင်လေးယွီ လို့ ခေါ်ကြတယ်။"
"သူ့ရဲ့ ခွန်အားက ဆန်းကြယ်အင်မော်တယ် အဆင့်ကို ကျော်ဖြတ်ထားပြီးပြီ၊ အခုဆိုရင် ဆန်းကြယ်အင်မော်တယ် အလယ်အလတ်အဆင့် လောက် ရှိနေပြီ။ တာအိုကျင့်စဉ် တွေနဲ့ အင်မော်တယ် စွမ်းရည်တွေမှာလည်း အထွတ်အထိပ် ရောက်နေတဲ့သူပါ။"
"ဒါ့အပြင် သူက အဆင့်မနိမ့်တဲ့ ထူးခြားတဲ့ ခန္ဓာ တစ်ခုကိုလည်း ပိုင်ဆိုင်ထားပုံရတယ်၊ သူနဲ့ တိုက်ခိုက်ဖူးတဲ့သူတိုင်းက အဲ့ဒါကို တော်တော်လေး လက်ပေါက်ကပ်တယ်လို့ ပြောကြတယ်"
ထန်ထျန်း ချက်ချင်း စိတ်ဝင်စားသွားသည်။
အားနည်းသူ တွေကို နှိပ်ကွပ်ရတာ ပျော်ဖို့ကောင်းပေမဲ့ များလာရင်တော့ ပျင်းစရာကောင်းလာသည်။
ဆန်းကြယ်အင်မော်တယ် အလယ်အလတ်အဆင့်၊ နက်နဲတဲ့ တာအိုကျင့်စဉ် ၊ နောက်ပြီး ထူးခြားတဲ့ ခန္ဓာ။
ဒီလို ပြိုင်ဘက်မျိုးဆိုရင်တော့ တစ်ဖက်သတ်တော့ ဖြစ်မနေတော့ဘူးပေါ့။
သို့သော် လီဟုန်ကတော့ အနည်းငယ် စိုးရိမ်နေသည့် ပုံစံရှိသည်။
"ဘာဖြစ်လို့လဲ"
ထန်ထျန်းက မေးလိုက်သည်။
လီဟုန်က မျက်မှောင်ကြုတ်ကာ "ကျွန်တော် အတွေးလွန်နေတာလားတော့ မသိဘူး။"
"ဒီ သခင်လေးယွီ ဆိုတဲ့သူက ထျန်းဖူနန်းတော်ထဲက အရမ်း အင်အားကြီးတဲ့ အင်အားစု တစ်ခုကနေ လာတာပါ။"
"တိုက်ပွဲသူတော်စင်မျှော်စင်"
ထန်ထျန်း မျက်ခုံးပင့်လိုက်မိသည်။
ဒီနာမည်ကို သူ မှတ်မိနေသည်။
ပိုင်တိမြို့ မှာတုန်းက ထျန်းဖူနန်းတော်က လူ တစ်ယောက်နဲ့ သူ အဆင်မပြေ ဖြစ်ခဲ့ဖူးသည်။ ထိုသူ ရှိသည့် အင်အားစု မှာ တိုက်ပွဲသူတော်စင်မျှော်စင် ပင် ဖြစ်သည်။
ထို့ပြင် ထျန်းဖူနန်းတော်ကို ရောက်လာပြီးနောက် ပိုင်နိုယီကလည်း သူ့ကို သတိပေးခဲ့ဖူးသည်။ ကျန်းကျဲ့ ဆိုသူက သူ့ကို ပညာပေးရန် နည်းလမ်းရှာနေနိုင်ကြောင်း ပြောခဲ့သည်။
"ဖြစ်နိုင်ခြေ အများဆုံးကတော့ သူပဲပေါ့။"
ထန်ထျန်းက ပြောလိုက်သည်။
မဟုတ်လျှင်တော့ လက်ရှိ အခြေအနေအရ ကောင်းကင်စာရင်း အဆင့် (၁၁) ရှိသူက သူ့ကို ကိုယ်တိုင်ကိုယ်ကျ လာရောက်စိန်ခေါ်ရန် အကြောင်းမရှိပေ။
ဘာလို့လဲဆိုတော့ ထန်ထျန်းက မြေကြီးစာရင်း အဆင့် ၁၀၀ ထဲက လူတစ်ယောက်ကိုပဲ အနိုင်ယူထားသေးတာ ဖြစ်လို့ သူ့ကို အနိုင်ယူလိုက်ရုံနဲ့ နာမည်ကြီးလာမှာ မဟုတ်ပေ။
အကယ်၍ မတော်တဆ ရှုံးနိမ့်သွားခဲ့ရင်တော့ တစ်ခါတည်း အနက်ဆုံးချောက်ထဲကို ပြုတ်ကျသွားနိုင်တာလေ။
"ရပါတယ်၊ လာတာ အချိန်ကိုက်ပဲ။"
"တကယ်လို့ ကျန်းကျဲ့ ဆိုတဲ့ ကောင်သာ ဖြစ်ခဲ့ရင် အဲ့ဒီတုန်းက ရန်ကြွေးကို တစ်ခါတည်း ရှင်းပစ်လို့ရတာပေါ့။"
"သူက ငါ့ကိုကြည့်ပြီး မကျေနပ်ဘူးဆိုတော့ ငါကရော သူ့ကိုကြည့်ပြီး ကျေနပ်နေမယ်လို့ သူ ထင်နေတာလား"
ထန်ထျန်းက ဂရုမစိုက်သလို ပြောလိုက်သည်။
လီဟုန်က သက်ပြင်းအသာချကာ "သူက ဒီအခွင့်အရေးကိုသုံးပြီး တခြား လှည့်ကွက်တွေ ထပ်လုပ်လာမှာကို ကျွန်တော် စိုးရိမ်တာပါ။"
"ထျန်းဖူနန်းတော်က ယေဘုယျအားဖြင့် စည်းကမ်းလိုက်နာကြပေမဲ့ စည်းကမ်းကို ချိုးဖောက်မယ့်သူတွေ အမြဲရှိတာပဲ။"
"အင်အားစု က ပိုပြီး အင်အားကြီးလေ၊ ဒီလိုလူတွေ ရှိဖို့ ပိုသေချာလေပဲ"
ထန်ထျန်းက ခေါင်းခါလျက် မတ်တပ်ထရပ်လိုက်သည်။
"ငါတို့ ဒီလမ်းကို ရွေးချယ်ပြီးကတည်းက ဒီလိုကိစ္စတွေနဲ့ ကြုံတွေ့ရမှာပဲ။"
"အခု မကြုံရရင်လည်း နောက်ပိုင်း ကြုံရမှာပဲလေ။"
"စစ်သည်လာရင် စစ်သူကြီးနဲ့ တားမယ်၊ ရေလာရင် မြေကြီးနဲ့ ပိတ်မယ်။" (ဘာပဲလာလာ ရင်ဆိုင်မယ်)
"သွားကြစို့... ဒီဒဏ္ဍာရီ သခင်လေးယွီ ဆိုတဲ့သူကို သွားတွေ့ကြည့်ရအောင်"
ပြောပြီးနောက် ထန်ထျန်းက အပြင်သို့ ထွက်လာခဲ့သည်။
တစ်ချိန်တည်းမှာပင် ထန်ထျန်း၏ လှိုဏ်ဂူအပြင်ဘက်၌
အနီရောင်ရင့်ရင့် ဝတ်စုံများ ဝတ်ဆင်ထားသည့် လူတစ်စုက ထန်ထျန်း၏ လှိုဏ်ဂူတံခါးရှေ့တွင် ရပ်နေကြသည်။
သူတို့၏ အော်ရာ မှာ အလွန်ပင် ခန့်ညားထည်ဝါပြီး ဖိအားပေးနိုင်စွမ်း အပြည့်ရှိလှသည်။
အခြားတစ်ဖက်တွင်မူ ဝမ့်ယွဲ့လှိုဏ်ဂူမှ တပည့်များစွာ ဝိုင်းအုံကြည့်နေကြသည်။
ထန်ထျန်းကို လာရောက်စိန်ခေါ်သည်ကို ကြည့်ရခြင်းမှာ သူတို့အတွက် ဤနေရာတွင် အကြီးမားဆုံး ဖျော်ဖြေရေး ဖြစ်နေသည်။
"ဒီတစ်ခေါက် လာတာ ဘယ်သူလဲဟ၊ ကြည့်ရတာ အတော်လေး ဟိတ်ဟန် ကြီးမားပုံပဲ"
အသစ်ရောက်လာသည့် တပည့်အချို့က မေးလိုက်ကြသည်။
သို့သော် သူ မေးလိုက်သည့်လူက မျက်နှာပျက်သွားပြီး အသံကျယ်ကျယ် မပြောရန် အချက်ပြလိုက်သည်။
"မင်း ရူးနေတာလား"
"သူတို့ ဝတ်စုံနဲ့ ခါးက တံဆိပ်ပြားတွေကို ကြည့်ဦး"
ထိုတပည့် သေချာ ကြည့်လိုက်ရာ ချက်ချင်း မှင်တက်သွားမိသည်။
"ဟာ... တိုက်ပွဲသူတော်စင်မျှော်စင် လား"
"သူတို့က ထန်ထျန်းကို ဒီလောက်တောင် မကြည့်ရ ဖြစ်နေကြတာလား၊ အုပ်လိုက်ကြီး လာကြတာပဲ။"
"ဒါဆို ထန်ထျန်းကို စိန်ခေါ်မယ့်သူက ဘယ်သူလဲ... ငါ ကြည့်ဦးမယ်။"
"ဘုရားရေ... သခင်လေးယွီ ပါလား"
သူက ထိတ်လန့်တကြား အော်ဟစ်မိသွားပြီး သူ၏ မျက်နှာမှာ မယုံနိုင်စရာ ဖြစ်နေသည်။
အခြားတပည့်များ၏ တုံ့ပြန်မှုမှာလည်း ထိုနည်းတူပင် ဖြစ်သည်။
"သခင်လေးယွီ က ထန်ထျန်းကို လာစိန်ခေါ်တယ် ဟုတ်လား ဒါ ဘာတွေ ဖြစ်နေတာလဲ"
"သူက ကောင်းကင်စာရင်း အဆင့် (၁၁) မှာ ရှိတဲ့ ပါရမီရှင်လေ"
"ဒါက စောလွန်းနေပြီ မဟုတ်ဘူးလား ငါ ထင်ထားတာကတော့ ထန်ထျန်းအနေနဲ့ ကောင်းကင်စာရင်းက လူအချို့ကို အရင် အနိုင်ယူပြီးမှ သူ ထွက်လာလိမ့်မယ်လို့ ထင်ထားတာ။"
"ဘယ်သူသိမှာလဲ၊ ထန်ထျန်း ပြောလိုက်တဲ့ စကားတစ်ခွန်းက သူ့ကို ဒေါသထွက်သွားစေလို့လည်း ဖြစ်မှာပေါ့။"
"ဒီတစ်ခါတော့ သွားပါပြီ၊ နောက်ဆို ကြည့်စရာ ဖျော်ဖြေရေး ရှိတော့မှာ မဟုတ်ဘူး။"
"ထန်ထျန်း ဘယ်လောက်ပဲ သန်မာပါစေ၊ သခင်လေးယွီ ရဲ့ ပြိုင်ဘက်တော့ မဖြစ်နိုင်ဘူးလေ"
လူအများမှာ အမျိုးမျိုး ဝေဖန်ပြောဆိုနေကြသော်လည်း အသံကျယ်ကျယ်တော့ မပြောရဲကြသဖြင့် တီးတိုးတီးတိုးဖြင့်သာ ပြောနေကြသည်။
သခင်လေးယွီ ရောက်လာခြင်းကို သူတို့ အလွန် အံ့သြနေကြသော်လည်း ထန်ထျန်း ဆက်လက် အနိုင်ရလိမ့်မည်ဟု ယူဆသူ တစ်ဦးမျှ မရှိပေ။
လူအုပ်ကြားထဲတွင် ဝမ်ရှို့လည်း ရောက်နေသည်။
တိုက်ပွဲသူတော်စင်မျှော်စင် က လူတွေကို ကြည့်ရင်း သူ၏ နှုတ်ခမ်းထောင့်တွင် အာဃာတ ပြေပျောက်သွားသည့် အပြုံးတစ်ခု ပေါ်လာသည်။
နောက်ဆုံးတော့ ဒီမောက်မာတဲ့ ကောင်ကို နှိမ်နင်းပေးမယ့်သူ ပေါ်လာပြီ။
ဆူညံနေသော အသံများကြားတွင် လှိုဏ်ဂူတံခါးမှာ ဖြည်းညှင်းစွာ ပွင့်လာပြီး ထန်ထျန်း၏ ပုံရိပ်က အပြင်ဘက်သို့ ထွက်ပေါ်လာသည်။
သူ အပြင်သို့ လှမ်းထွက်လိုက်သည်နှင့် တစ်ဖက်တွင် ရှိနေသော ခန့်ညားထည်ဝါလှသည့် လူအုပ်ကြီးကို မြင်လိုက်ရသည်။
ထို့ပြင် လူအုပ်၏ အရှေ့ဆုံးတွင် ရင်းနှီးနေသော ပုံရိပ်တစ်ခုကိုလည်း တွေ့လိုက်ရသည်။
ထိုသူကား ကျန်းကျဲ့ ပင် ဖြစ်သည်။
သူ တကယ်ပဲ ရောက်လာခဲ့သည်။
"ထန်ထျန်း... မတွေ့တာ ကြာပြီနော်"
ကျန်းကျဲ့က စတင် စကားပြောလိုက်သည်။
လူအုပ်ထဲတွင် ရှိနေသော လုရှီမှာ ခဏမျှ ကြောင်အသွားပြီးနောက် မျက်နှာပျက်ပျက်ဖြင့် ပြုံးလိုက်မိသည်။
ကောင်းပါပြီ... ဒီဆရာကတော့ ထျန်းဖူနန်းတော်ထဲမှာ ဘယ်သွားသွား ရင်းနှီးတဲ့သူတွေနဲ့ပဲ တွေ့နေပါလား။
တိုက်ပွဲသူတော်စင်မျှော်စင် က လူတွေကိုတောင် သိနေတာပဲ။
"ဪ... အရှင် ကျန်း ပါလား။"
"ခင်ဗျားက တကယ်ကို ယဉ်ကျေးလွန်းတာပဲ။"
"ငါတို့ ဆက်ဆံရေးက အဲ့ဒီလောက်ကြီး မကောင်းပါဘူး၊ ဒါပေမဲ့ ခင်ဗျားက ငါ့ကို ကြိုဆိုဖို့ ဒီလောက် လူအင်အားကြီးနဲ့ လာလိမ့်မယ်လို့ မထင်ထားဘူး။"
"တကယ်ကိုပဲ ငါ့ကို အားနာစရာကြီး ဖြစ်အောင် လုပ်နေတာပဲ"
ထန်ထျန်းက အနည်းငယ်မျှ စိုးရိမ်ထိတ်လန့်ခြင်း မရှိဘဲ ပြုံးလျက် ပြောလိုက်သည်။
ကျန်းကျဲ့က အေးစက်စွာ နှာခေါင်းရှုံ့လိုက်ပြီး "ထန်ထျန်း... မင်းက ဂုဏ်တက်ပြီး မောက်မာနေတာပဲလို့ ငါ အရင်က ထင်ခဲ့တာ။"
"ဒါပေမဲ့ မင်းက တကယ့်ကို အသိတရားမရှိဘဲ ကြောက်ရွံ့မှု ကင်းမဲ့နေတာပဲ"
"ထျန်းဖူနန်းတော်ကို ရောက်လာတာတောင် ဒီလောက်အထိ မောက်မာရဲသေးတယ်လား"
"ဘယ်သူက မင်းကို ဒီလောက် သတ္တိတွေ ပေးထားတာလဲ"
ထန်ထျန်းက သဘောကျစွာ ပြုံး လိုက်သည်။
"ငါလည်း အေးအေးဆေးဆေး နေချင်တာပဲ၊ ဒါပေမဲ့ ငါ့ရဲ့ ခွန်အားက ခွင့်မပြုလို့ပါ။"
"ဒါနဲ့ ပြောရဦးမယ်... အဲ့ဒီတုန်းက ရှောင်းရွှယ်ကို ခင်ဗျားတို့ တိုက်ပွဲသူတော်စင်မျှော်စင် ဆီ ကြိုပြီး မထည့်လိုက်တာ ငါ တကယ်ပဲ ဝမ်းသာမိတယ်။"
"ခင်ဗျားတို့ရဲ့ စီစဉ်မှုတွေက ကြည့်ရတာ သိပ်ပြီးတော့ အထင်ကြီးစရာ မရှိဘူးပဲ"
ကျန်းကျဲ့၏ မျက်နှာမှာ ချက်ချင်းပင် မည်းမှောင်သွားတော့သည်။