လီမိသားစု၏ ခန့်မှန်းတွက်ချက်မှု

လက်ရှိအချိန်၌ ဝမ်မိသားစုသည် ထိပ်တန်းအရေးပေါ် သတိပေးချက် အခြေအနေသို့ ရောက်ရှိနေပြီဟု ဆိုနိုင်ပေသည်။

ဝမ်မိသားစုဝင်များနှင့် တပည့်များအားလုံးသည် ဝမ်အိမ်တော်ခြံဝန်းအတွင်း၌သာ ပုန်းခိုနေကြပြီး ပြင်ပသို့ ခြေတစ်လှမ်းမျှပင် မထွက်ဝံ့ကြချေ။

ထိုအချိန်တွင်...

ဝမ်မိသားစု၏ ပင်မခန်းမဆောင် အပြင်ဘက်၌ လီယန်အန်းသည် ဗလာဟင်းလင်းဖြစ်နေသော တံခါးဝကို ကြည့်ရှုရင်း အံ့အားသင့်မှင်သက်နေပေ၏။

ပထမတန်းစား မိသားစုတစ်ခုအနေဖြင့် ခမ်းနားထည်ဝါမှုနှင့်အခမ်းအနားသည် အလွန် အရေးကြီးကာ မျက်နှာစာနေရာသည် အရာအားလုံးကို ကိုယ်စားပြုသည်။

သို့သော် ဝမ်အိမ်တော်၏ပင်မတံခါးဝတွင် တံခါးစောင့် တစ်ဦးတစ်ယောက်မျှ မရှိသည်မှာ အမှန်တကယ်ကို ထူးဆန်းနေသည်။

"ဒီအဘိုးကြီး လီယန်အန်းက လာရောက်လည်ပတ်တယ်ဆိုတာ ခင်ဗျားတို့ရဲ့ မိသားစုခေါင်းဆောင်ကို သွားပြောပေးပါ..."

သူသည် စိတ်ထဲမှ သံသယများကို ဖိနှိပ်လိုက်ပြီး ခန်းမဆောင် ဝင်ပေါက်ဘက်သို့ လှည့်ကြည့်၍ ကျယ်လောင်စွာ ပြောဆိုလိုက်သည်။

"ဝမ်မိသားစုက ဧည့်သည်လက်ခံဖို့ အဆင်မပြေပါဘူး... လီမိသားစုခေါင်းဆောင်... ကျေးဇူးပြုပြီး ပြန်ပါတော့..."

သူ့ကို ပြန်လည်တုံ့ပြန်လိုက်သော အသံသည် အေးစက်နေပြီး လူများကို မိုင်တစ်ထောင်အကွာတွင် ထားရှိလိုသော အေးစက်သည့် သဘောထား ပါဝင်နေပေ၏။

လီယန်အန်းသည် ဤကဲ့သို့ အေးစက်စွာ ဆက်ဆံခံရခြင်းကို ဂရုမစိုက်ပေ။

သို့သော် တစ်ဖက်လူများ၏ ပုံမှန်မဟုတ်သော အပြုအမူများက ဝမ်မိသားစုအတွင်း၌ မမျှော်လင့်ထားသော အပြောင်းအလဲ တစ်စုံတစ်ရာ ဖြစ်ပျက်ခဲ့ကြောင်း သူ့ကို ပို၍ သေချာသွားစေသည်။

သူ၏အကြည့် အနည်းငယ် ရွေ့လျားသွားကာ ပုံမှန်မဟုတ်သော အငွေ့အသက်တစ်ခုကို ရရှိလိုက်သည်။

လီယန်အန်းသည် နောက်သို့ချာခနဲ လှည့်ထွက်သွားလိုက်၏။

သူသည် လီအိမ်တော်သို့ ပြန်ရောက်သည်နှင့် အဆင့်မြင့် အစည်းအဝေးတစ်ခုကို ချက်ချင်း ခေါ်ယူလိုက်သည်။

ဤအစည်းအဝေးသည် အလွန်ထူးခြားပြီး လီမိသားစု၏ဘိုးဘေးပင်လျှင် တက်ရောက်လာခဲ့သည်။

မည်သို့ပင်ဆိုစေကာမူ အုပ်စိုးသူအရှင် အမွေအနှစ်သည် နာမည်မဲ့မြို့တော် တစ်မြို့လုံးကို တုန်လှုပ်သွားစေခဲ့ပြီး သေရေးရှင်ရေးအတွက် တံခါးပိတ်ကျင့်ကြံနေသော အဘိုးအိုတချို့ကိုပင် နှိုးဆွလိုက်သကဲ့သို့ ဖြစ်သွားစေသည်။

လီမိသားစု၏ဘိုးဘေး လီဝူရွှမ်သည် ထိုအဘိုးအိုများအနက်မှ တစ်ဦးပင်။

ပင်မခန်းမဆောင် အတွင်း၌...

လီမိသားစု၏ အဆင့်မြင့်အဖွဲ့ဝင်များ စုဝေးရောက်ရှိနေကြသည်။

လီမိသားစုဘိုးဘေး လီဝူရွှမ်သည် ပင်မထိုင်ခုံတွင် ထိုင်နေပေ၏။

မိသားစုခေါင်းဆောင် လီယန်အန်းသည် သူ၏ ညာဘက်အောက်နားတွင် ထိုင်နေသည်။

ဘေးတစ်ဖက်တစ်ချက်တွင် အကြီးအကဲများနှင့်အစောင့်အရှောက်များ အသီးသီး ရှိနေကြသည်။

"မိသားစုခေါင်းဆောင်... အခု ခေါ်ယူလိုက်တဲ့ အစည်းအဝေးက အုပ်စိုးသူအရှင်အမွေအနှစ် အငြင်းပွားမှုအတွက် အကြံဉာဏ်သစ် တစ်ခုခုကို ရလို့လား..."

လီမိသားစု၏ မဟာအကြီးအကဲက မေးမြန်းလိုက်သည်။

နန်ကုန်းမိသားစုက အုပ်စိုးသူအရှင် အမွေအနှစ်ကို ရရှိပြီးကတည်းက လီမိသားစုတစ်စုလုံးသည် ထိုအရာကို မည်သို့ သိမ်းယူရမည်နည်း ဟူသည်ကို စီစဉ်ရန် မကြာခဏ စုဝေးခဲ့ကြသည်။

မဟာအကြီးအကဲ စကားပြောဆိုလိုက်သည်နှင့် လူများအားလုံး၏အကြည့်များသည် လီယန်အန်းထံသို့ စူးစိုက်၍ ကျရောက်သွားပေ၏။

အချိန်တခဏမျှ စဉ်းစားပြီးနောက် သူက တည်ကြည်လေးနက်သော လေသံဖြင့် ပြောဆိုလိုက်သည်။

"ဒီတစ်ခါ လူတိုင်းကို ခေါ်လိုက်ရတဲ့ အကြောင်းရင်းက အုပ်စိုးသူအရှင် အမွေအနှစ် အတွက် မဟုတ်ပါဘူး... ဝမ်မိသားစုရဲ့ ထူးဆန်းတဲ့ လှုပ်ရှားမှုတွေကို ဆွေးနွေးဖို့ပဲ..."

"ဝမ်မိသားစုရဲ့ ထူးဆန်းတဲ့ လှုပ်ရှားမှုတွေ...ဟုတ်လား..."

လီယန်အန်း၏စကားသံ ဆုံးသွားသည်နှင့် ရောက်ရှိနေသော လူအုပ်ကြီးသည် တက်ကြွစွာ ဆွေးနွေးလိုက်ကြသည်။

သူတို့အားလုံးသည်လည်း ဝမ်မိသားစု၏ ပုံမှန်မဟုတ်သော အပြုအမူများကို သတိထားမိကြကြောင်း သိသာထင်ရှားသည်။

"မိသားစုခေါင်းဆောင်... ကျွန်တော်တို့ရဲ့ မသိနားမလည်မှုကို ခွင့်လွှတ်ပါ... ရှင်းရှင်းလင်းလင်း ပြောပြပေးပါ..."

လီမိသားစု၏ မဟာအကြီးအကဲက ထပ်မံ၍ ပြောဆိုလိုက်သည်။

လူများအားလုံးသည် သဘောတူညီကြောင်း ခေါင်းညိတ်လိုက်ကြ၏။

"ကောင်းပြီလေ... ငါတို့အားလုံးက ကိုယ့်လူတွေပဲ ဆိုတော့... ငါ့ရဲ့ ခန့်မှန်းချက်ကို ပွင့်ပွင့်လင်းလင်း ပြောပြလိုက်မယ်..."

လီယန်အန်းက တည်ကြည်လေးနက်သော မျက်နှာထားဖြင့် ပြောဆိုသည်။

"အုပ်စိုးသူအရှင် အမွေအနှစ်ကို ငါတို့ ပထမတန်းစား မိသားစုသုံးစုလုံးက လိုချင်နေကြတယ်... တခြားမိသားစုနှစ်စုက ပေါ်ပေါ်ထင်ထင် ဘာမှ မလုပ်ကြသေးပေမယ့် ကွယ်ရာမှာ ဘာတွေ လုပ်နေကြလဲဆိုတာ ဘယ်သူက သိနိုင်မှာလဲ..."

"မိသားစုခေါင်းဆောင် ဆိုလိုတာက..."

မဟာအကြီးအကဲ၏မျက်နှာအမူအယာ အံ့အားသင့်မှုကြောင့် အနည်းငယ်ပြောင်းလဲသွားသည်။

"ဟုတ်တယ်...ဝမ်မိသားစုက နန်ကုန်းမိသားစုကို လှုပ်ရှားပြီးပြီလို့ ငါ သံသယရှိတယ်..."

လီယန်အန်းက သူ၏ကောက်ချက်ကို ပြောပြလိုက်သည်။

ထိုစကားကိုကြားချိန်၌ လူများအားလုံး အလွန်အမင်း ထိတ်လန့်တုန်လှုပ်သွားကြ၏။

အုပ်စိုးသူအရှင် အမွေအနှစ်ကို ရရှိသော မည်သည့်အင်အားစုမဆို လျှင်မြန်စွာ တိုးတက်လာမည့် အလားအလာ ရှိသည်။

အကယ်၍ ဝမ်မိသားစုသာ အုပ်စိုးသူအရှင် အမွေအနှစ်ကို အပြည့်အဝ ပေါင်းစပ်နိုင်ခဲ့လျှင် အနာဂတ်တွင် နာမည်မဲ့မြို့တော်၌ လီမိသားစုသည် ရပ်တည်စရာနေရာ ရှိနိုင်အုံးမည်လော။

သို့သော် တစ်စုံတစ်ယောက်က အလျင်အမြန် ပြန်လည်၍ ချေပလိုက်သည်။

"ဒါပေမဲ့ မိသားစုခေါင်းဆောင်... အဲ့ဒါက ဖြစ်နိုင်ပါ့မလား...တကယ်လို့ ဝမ်မိသားစုက တကယ်ပဲ နန်ကုန်းမိသားစုကို လှုပ်ရှားခဲ့တယ်ဆိုရင် နန်ကုန်းမိသားစုက ဘာလှုပ်ရှားမှုမှ မရှိဘဲ ဘေးကင်းလုံခြုံနေဖို့ဆိုတာ မဖြစ်နိုင်ဘူးလေ..."

"အဲ့ဒါပဲ... ငါ ပြောချင်တာက အဲ့ဒါပဲ..."

လီယန်အန်းက တည်ကြည်လေးနက်သော မျက်နှာထားဖြင့် ပြောဆိုသည်။

"ပုံမှန် အခြေအနေမျိုးမှာဆိုရင် နန်ကုန်းမိသားစုက ဘေးကင်းလုံခြုံနေမှာ မဟုတ်ဘူး... အခု နန်ကုန်းမိသားစုက ဘေးကင်းလုံခြုံနေပြီးတော့ ဝမ်မိသားစုက ပုန်းအောင်းနေတယ် ဆိုကတည်းက ဖြစ်နိုင်ခြေတစ်ခုပဲ ရှိတယ်..."

"ဘာလဲ..."

လူများအားလုံး လီယန်အန်းကို ကြည့်လိုက်ကြသည်။

"အဲ့ဒါကတော့ နန်ကုန်းမိသားစုက ငါတို့ ထင်ထားသလောက် ရိုးရှင်းမနေဘူး ဆိုတာပဲ...ဝမ်မိသားစုတောင် ပြန်ပြီးမတိုက်ခိုက်ရဲလောက်အောင် မရိုးရှင်းတာမျိုး ဖြစ်နိုင်တယ်...အဲ့ဒီလိုမှသာ ဝမ်မိသားစုက ဘာလို့ ဒီလောက်ထိ ပုံမှန်မဟုတ်တဲ့ပုံစံမျိုး ပြုမူနေရလဲဆိုတာ ရှင်းပြလို့ ရမှာ..."

ဤစကားသည် လူများအားလုံးအတွက် အမှန်တကယ်ကို ထိတ်လန့်တုန်လှုပ်ဖွယ်ရာ ဖြစ်နေတော့သည်။

"မိသားစုခေါင်းဆောင်... ဒါ... ဒါက မဖြစ်နိုင်ဘူး..."

ဝမ်မိသားစုသည် မည်သည့် အဆင့်အတန်းမျိုးရှိသူများ ဖြစ်သနည်း....

နန်ကုန်းမိသားစုသည် မည်သည့် အဆင့်အတန်းမျိုးရှိသူများ ဖြစ်သနည်း...

တစ်ခုသည် ပထမတန်းစား မိသားစုဖြစ်ကာ နောက်တစ်ခုသည် ဒုတိယတန်းစား မိသားစုပင်။

အကယ်၍ ပထမတန်းစားမိသားစုသည် ကျား သို့မဟုတ် ကျားသစ် ဆိုလျှင် ဒုတိယတန်းစား မိသားစုသည် သိုးတစ်ကောင်နှင့် မခြားနားချေ။

ပထမတန်းစား မိသားစုသုံးစုအကြား၌ အပြန်အလှန် သတိထားနေမှုများသာ မရှိခဲ့လျှင် နန်ကုန်းမိသားစုသည် လွန်ခဲ့သော ကာလကြာရှည်ကတည်းက ပျက်စီးသွားပြီး ဖြစ်ပေမည်။

ယခုချိန်၌ သူတို့၏မိသားစုခေါင်းဆောင်က နန်ကုန်းမိသားစုသည် ဝမ်မိသားစုကိုပင် ပြန်မတိုက်ခိုက်ရဲအောင် လုပ်နိုင်လောက်သည်အထိ မရိုးရှင်းကြောင်း ခန့်မှန်းနေသည်မှာ စိတ်ကူးယဉ်ပုံပြင်တစ်ပုဒ်အလားပင်။

လီမိသားစုတစ်စုလုံးအတွင်း၌ အရေးပါသော ရာထူးနေရာကို ရယူထားသည့် လီယန်အန်းသာ မဟုတ်ဘဲ တခြားသူ တစ်ဦးဦးကသာ ထိုစကားကို ပြောခဲ့ပါက အဓိပ္ပာယ်မရှိသော စကားဟုဆိုကာ သူတို့ ချက်ချင်းလှောင်ပြောင်ပြီးဖြစ်ပေမည်။

ထိုသို့ဖြစ်လင့်ကစား လူများအားလုံး၏မျက်နှာပေါ်တွင် မယုံကြည်နိုင်မှုများနှင့်သံသယများ ပြည့်နှက်နေဆဲပင်။

အချိန်တခဏအတွင်းတွင် သက်ဝင်လှုပ်ရှားနေသော ဆွေးနွေးသံများနှင့်ငြင်းခုံသံများသည် လေထုထဲတွင် ပြည့်နှက်သွားပေ၏။

ထိုအချိန်မှာပင် လီမိသားစု၏ဘိုးဘေး လီဝူရွှမ်က စကားပြောဆိုလိုက်သည်။

"မင်းမှာ ဒီလိုပြောရတဲ့ အခြေခံအကြောင်းအရင်း ရှိလား..."

လီမိသားစုဘိုးဘေးသည် သံသယဖြစ်ဖွယ်မလိုဘဲ မိသားစုတစ်စုလုံး၏ ကျောထောက်နောက်ခံ ထောက်တိုင်ကြီးဖြစ်ပြီး သာလွန်ထူးကဲသော အဆင့်အတန်းကို ရယူထားသူပင်။

သူ စကားပြောလိုက်သည်နှင့် အစည်းအဝေးခန်းမတစ်ခုလုံး ချက်ချင်းတိတ်ဆိတ်သွားပေ၏။

လီယန်အန်းက တည်ကြည်လေးနက်သော မျက်နှာထားဖြင့် ပြောဆိုသည်။

"ဘိုးဘေးကို အဖြေပေးပါ့ရစေ... ခုဏက ကျွန်တော် ဝမ်မိသားစုဆီ သွားလည်ခဲ့ပါတယ်... သူတို့ ဘာလှည့်ကွက်တွေ သုံးနေလဲဆိုတာ သိချင်လို့ပါ..."

"အဲ့ဒီကို ရောက်မှပဲ ဝမ်အိမ်တော်ရဲ့ တံခါးတွေကို တင်းတင်းကြပ်ကြပ် ပိတ်ထားပြီးတော့ အဓိကတပည့်တွေ အကုန်လုံးကို ပြန်ခေါ်ထားတယ် ဆိုတာ သိလိုက်ရတယ်... ပြီးတော့ သူတို့က အိမ်တော်ကာကွယ်ရေး မဟာဝင်္ကပါကြီးကိုတောင် ဖွင့်ထားကြတယ်..."

"သူတို့က တိုက်ပွဲဝင်ဖို့ အသင့်အနေအထားမှာ ရှိနေတယ်..."

"ဒါတွေအားလုံးက ဝမ်မိသားစုအတွင်းမှာ ကြီးမားတဲ့ အပြောင်းအလဲတစ်ခု ဖြစ်ပျက်ခဲ့တယ်ဆိုတာ ပြသနေတယ်..."

"အိမ်တော်ကာကွယ်ရေး မဟာဝင်္ကပါကြီးကိုတောင် ဖွင့်ထားတယ်ဆိုတော့... ဝမ်မိသားစုရဲ့ ဘိုးဘေးလည်း ဒုက္ခအကြီးအကျယ် ရောက်နေပြီလို့ ကျွန်တော် သံသယရှိတယ်..."

ပထမတန်းစား မိသားစုသုံးစုတွင် မိသားစုတစ်ခုစီ၌ ကောင်းကင်နက်နဲသိမ်မွေ့နယ်ပယ် ဘိုးဘေးတစ်ဦးစီ ရှိကြသည်။

သဘောတရားအရ ပြောဆိုရလျှင် ကောင်းကင်နက်နဲသိမ်မွေ့နယ်ပယ် ထိပ်သီးကျင့်ကြံသူတစ်ဦး စောင့်ကြပ်နေသမျှ ကာလပတ်လုံး တခြားသော အဓိကမိသားစုနှစ်စုက ပူးပေါင်းတိုက်ခိုက်ခြင်း မရှိလျှင် သူတို့အနေဖြင့် အိမ်တော်ကာကွယ်ရေး မဟာဝင်္ကပါကြီးကို အသက်သွင်းမည် မဟုတ်ချေ။

သို့သော် ဝမ်မိသားစုကမူ ထိုသို့ ပြုလုပ်ခဲ့သည်။

ဤအချက်ကြောင့် နောက်ကွယ်မှ အကြောင်းအရင်းများကို လူအများအား တွေးတောမိစေပေ၏။

လီယန်အန်း၏ကောက်ချက်ချမှုကို တင်ပြလိုက်သည်နှင့် လူများအားလုံး၏မျက်လုံးများ တောက်ပလာကြသည်။

အကယ်၍ မိသားစုခေါင်းဆောင်၏ စကားများသာ မှန်ကန်ပါက အုပ်စိုးသူအရှင် အမွေအနှစ် ပြိုင်ပွဲတွင် သူတို့အတွက် စွမ်းအားကြီးမားသော ပြိုင်ဘက်တစ်ဦး လျော့နည်းသွားပြီ မဟုတ်လော။

လီယန်အန်းက အခွင့်ကောင်းယူပြီး ပြောဆိုလိုက်၏။

"ဘိုးဘေး... မနေ့ညက ပုံမှန်မဟုတ်တာ တစ်ခုခုကို သတိထားမိလား..."

လီဝူရွှမ်သည် ထိုစကားကိုကြားချိန်၌ သူ၏ မျက်လုံးများထဲတွင် ထူးဆန်းသော အရိပ်အယောင်တစ်ရပ် ထင်ဟပ်လာသည်။

"မနေ့ညက ဒီဘိုးဘေး ကြယ်တွေကို ကြည့်နေတုန်းက ဝမ်မိသားစုရဲ့ဘိုးဘေးဖြစ်တဲ့ ဟိုလူယုတ်မာအဘိုးကြီးရဲ့ အရှိန်အဝါကို တကယ်ကြီး အာရုံခံမိလိုက်တယ်..."

"ဒါပေမဲ့ အဲ့ဒါက ခဏလေးပဲ... ချက်ချင်း ပျောက်ကွယ်သွားတယ်..."

"မင်းပြောတာ ကြားရတော့... အဲ့ဒီအဘိုးကြီးမှာ ပြဿနာ တစ်ခုခု ရှိနေတာ သေချာတယ်... မဟုတ်ရင် ဝမ်မိသားစုတစ်စုလုံး ဒီလို ပုံစံမျိုး ပြုမူမှာ မဟုတ်ဘူး..."

လီယန်အန်း၏ကောက်ချက်ချမှုက လီမိသားစုဝင်များကို တစ်ဝက်ခန့်ယုံကြည်စေခဲ့လျှင် ဘိုးဘေး၏စကားများက ထိုကောက်ချက်ကို သံသယဖြစ်ဖွယ်မလိုဘဲ ပို၍ခိုင်မာသွားစေခဲ့သည်။

"ဒါဆိုရင် ဒီဝမ်မိသားစုကို ကြောက်စရာ မလိုတော့ဘူးပေါ့..."

"ငါတို့က အုပ်စိုးသူအရှင်အမွေအနှစ် ကိစ္စအတွက် ချန်မိသားစုကိုပဲ သတိထားဖို့ လိုတော့တယ်..."

တစ်စုံတစ်ယောက်က စိတ်လှုပ်ရှားစွာဖြင့် ပြောဆိုလိုက်သည်။

သို့သော် လီယန်အန်းက သူတို့၏စိတ်ကူးယဥ်မှုများကို ပျောက်ကွယ်သွားစေသည်။

"မိုက်မဲလိုက်တာ..."

"တကယ်လို့ ဒီကောက်ချက်ချမှုသာ တကယ်ကြီး မှန်ကန်တယ်ဆိုရင်... နန်ကုန်းမိသားစုက ဝမ်မိသားစုကို ဒီလို ဖြစ်သွားအောင် လုပ်နိုင်မှတော့ ဘာလို့ ငါတို့ လီမိသားစုကိုရော ဘာလို့ အဲ့ဒီလိုမျိုး မလုပ်နိုင်ရမှာလဲ..."

"ငါ့ရဲ့အမြင်အရတော့ အုပ်စိုးသူအရှင် အမွေအနှစ် နဲ့ ပတ်သက်ပြီး လီမိသားစု အနေနဲ့ ခဏလောက် လက်လျှော့ထားတာ ပိုကောင်းမယ်..."

"ဝမ်မိသားစုက တံခါးပိတ်ထားမယ်ဆိုရင် ချန်မိသားစုက နောက်ဆုံးမှာ လှုပ်ရှားလာလိမ့်မယ်..."

"ချန်မိသားစု လှုပ်ရှားတာကို ငါတို့က စောင့်ကြည့်ရလိမ့်မယ်..."

"ပြီးမှ အခြေအနေကို မူတည်ပြီးတော့ လိုက်လျောညီထွေ ပြုမူကြတာပေါ့..."

"မိသားစုခေါင်းဆောင်က ဉာဏ်ပညာ ကြီးမားပါပေတယ်..."

ဤအကြံပြုချက်သည် လီမိသားစုအဆင့်မြင့် အဖွဲ့ဝင်များထံမှ တညီတညွတ်တည်း သဘောတူညီမှုကို ရရှိခဲ့သည်။

သို့သော် အစည်းအဝေး၏ အကြောင်းအရာသည် အလွန်အမင်း ယုံကြည်ရခက်ခဲလွန်းသဖြင့် သူတို့ ဖြည်းဖြည်းချင်း စဉ်းစားပြီး ချေဖျက်ရန် အချိန်လိုအပ်သည်။

မည်သို့ပင်ဆိုစေကာမူ နန်ကုန်းမိသားစုသည် သူတို့၏အမြင်အရ အားနည်းသူများသာ ဖြစ်ပြီး သူတို့၏ စိတ်ကြိုက်ဆော့ကစားနိုင်သော အရာတစ်ခုသာ ဖြစ်သည်။

ယခုချိန်၌ မိသားစုခေါင်းဆောင်က တစ်ဖက်လူသည် မရိုးရှင်းကြောင်းနှင့် ဝမ်မိသားစုကိုပင် အိမ်တော်ကာကွယ်ရေး မဟာဝင်္ကပါကြီး ဖွင့်ပြီး ပုန်းအောင်းသွားအောင် လုပ်နိုင်သည်အထိ စွမ်းအားကြီးကြောင်း ခန့်မှန်းနေသည်။

ဤအချက်က လီမိသားစုဝင်များကို မည်သည်ကြောင့် မတုန်လှုပ်စေဘဲ နေမည်နည်း။

သေချာသည်မှာ ဤအရာအားလုံးသည် ခန့်မှန်းချက် သက်သက်သာ ဖြစ်သည်။

ဤကိစ္စအတွက် ခိုင်လုံသော သက်သေအထောက်အထား မရှိသေးချေ။

အရာအားလုံးကို သူတို့အတွက် အတည်ပြုပေးရန် ချန်မိသားစု၏လှုပ်ရှားမှုကို စောင့်ဆိုင်းရပေမည်။

နာမည်မဲ့မြို့တော်တွင်...

လေများတိုက်ခတ်နေပြီး မြေအောက်တွင် လှိုင်းထန်နေသည်ဟု ပြောရပေမည်။

အုပ်စိုးသူအရှင် အမွေအနှစ်တစ်ခုသည် မရေမတွက်နိုင်သော လူများ၏ စိတ်နှလုံးသားများကိုလှုပ်ရှားသွားစေခဲ့လေပြီ။

လီမိသားစုသည် အချိန်ကြာမြင့်စွာ စောင့်ဆိုင်းရန် မလိုလိုက်ချေ။

နောက်တစ်နေ့တွင် ချန်မိသားစု စတင်၍လှုပ်ရှားလာခဲ့သည်။

ချန်အိမ်တော်အတွင်း၌ အဆင့်မြင့်တပည့်တစ်စု စုဝေးနေကြသည်။

သူတို့သည် ဓားများကို သွေးပြီး မိသားစုစစ်ပွဲအတွက် ပြင်ဆင်နေသည့် ပြင်းထန်သော အရိပ်အယောင်တစ်ရပ် ရှိနေပေ၏။

"နောက်ဆုံးတော့ သူတို့ လှုပ်ရှားလာကြပြီလား..."

လီမိသားစုဝင်များသည် ပြောင်းလဲနေသော အခြေအနေကို စောင့်ကြည့်ရင်း သူတို့၏ မျက်နှာအမူအယာများ တည်ကြည်လေးနက်လာကြသည်။

သူတို့ မမျှော်လင့်ထားသော အရာမှာ ချန်မိသားစုက နန်ကုန်းမိသားစုကို အကြီးအကျယ် တိုက်ခိုက်မည်ကို စောင့်ဆိုင်းနေချိန်မှာပင် ချန်မိသားစုခေါင်းဆောင် ချန်ဖင်းက လီအိမ်တော်သို့ လာရောက်လည်ပတ်ခဲ့ခြင်းပင်။