သူရဲကောင်းများ စုဝေးရာ

ယောင်ယိချန်တို့ ဆေးပညာရှင်အဖွဲ့နှင့် ဆေးလုံးဖော်စပ်ရေး လမ်းကြောင်းများကို ဆွေးနွေးပြီးနောက် အချိန်သင့်ပြီဖြစ်သဖြင့် ကျန်းပေရန်သည် ဆေးခန်းမမှ ပြန်ထွက်လာခဲ့သည်။ သူ့နောက်တွင်မူ သက်ပြင်းချသံများ ကျန်ရစ်ခဲ့လေသည်။

ယွမ်မြို့ရှိ နန်းတော်ကြီးသည် အလွန်ကြီးမားသည်။ သာမန်လူတစ်ယောက် လမ်းလျှောက်ဝင်လာပါက လမ်းပျောက်ပြီး အစာငတ်သေသွားလျှင်ပင် ထွက်ပေါက်ကို ရှာတွေ့နိုင်မည် မဟုတ်လောက်အောင် ကျယ်ဝန်းလှသည်။

ထိုဝင်္ကပါကဲ့သို့သော အဆောက်အအုံထဲတွင် ကျန်းပေရန်သည် လမ်းကြိုလမ်းကြားများမှ ကွေ့ပတ်သွားလာပြီးနောက် ကျင်းကျယ်မျှော်စင်သို့ ရောက်ရှိလာခဲ့သည်။

ထိုနေရာတွင် လူအများအပြား စောင့်ဆိုင်းနေကြသည်ကို တွေ့လိုက်ရသည်။

ကျန်းပေရန် ဝင်လာသည်ကို မြင်သောအခါ ခန်းမဆောင်ထဲမှ လူများသည် ခေတ္တမျှ ကြောင်အမ်းသွားကြသည်။ ကျန်းပေရန်၏ ငယ်ရွယ်နုပျိုမှုကို အံ့သြသွားကြခြင်း ဖြစ်သည်။

သို့သော် နောက်တစ်စက္ကန့်တွင်ပင် ကျန်းပေရန်၏ မည်သူမည်ဝါဖြစ်ကြောင်း အားလုံးက အတည်ပြုလိုက်ကြသည်။

အဘယ်ကြောင့်ဆိုသော် ယွမ်မြို့တွင် ဒီရက်ပိုင်းအတွင်း အကျော်ကြားဆုံး ပုဂ္ဂိုလ်မှာ ထိုလူငယ်သာ ဖြစ်သည်။ မျက်မြင်ကိုယ်တွေ့ မမြင်ဖူးလျှင်ပင် သူ့သတင်းများကို အနည်းနှင့်အများ ကြားဖူးကြသည်။

ထိုခန်းမဆောင်ထဲတွင် ရှိနေသူတိုင်းသည် စီနီယာကြီးကူ ကိုယ်တိုင် ဖိတ်ခေါ်ထားသော အဆင့် ၉ သခင်ကြီးများ ဖြစ်ကြသော်လည်း ကျန်းပေရန်ကဲ့သို့ ငယ်ရွယ်လွန်းသူ တစ်ဦးတစ်ယောက်မျှ မရှိပေ။

ထို့ကြောင့် ဤလူငယ်သည် ကောလာဟလ သတင်းများထဲမှ ဆရာသခင်ကျန်း ဖြစ်ကြောင်း အလွယ်တကူ ခန့်မှန်းနိုင်သည်။

လူအများ၏ အကြည့်များ သူ့ဆီသို့ ရောက်လာသည်ကို ခံစားမိသော်လည်း ကျန်းပေရန်က အထူးတလည် ဂရုမစိုက်ဘဲ ဘေးတစ်နေရာသို့ လျှောက်သွားကာ ဝင်ထိုင်လိုက်သည်။

"ဟွန်း... ဒီ အဆင့် ၉ သခင်ကြီးက ငယ်ငယ်ရွယ်ရွယ်နဲ့ မာန်မာနကြီးတယ်လို့ ကြားဖူးပါတယ်၊ ဒီနေ့မှပဲ ကိုယ်တိုင် မြင်ဖူးတော့တယ်၊ တကယ် နာမည်နဲ့လိုက်ပါပေတယ်"

ဤကျင်းကျယ်မျှော်စင်သို့ ဖိတ်ခေါ်ခံရသူများသည် အဆင့်အတန်းရှိသူများ ဖြစ်ကြသည်။ မည်သည့်နေရာသို့ သွားသည်ဖြစ်စေ အမြင့်ဆုံး အဆင့်အတန်းဖြင့် ကြိုဆိုဧည့်ခံခြင်း ခံရသူများ ဖြစ်သည်။

ပုံမှန်အချိန်များတွင် လူငယ်များမဆိုထားနှင့် စွမ်းအားကြီးသော ကျင့်ကြံသူအချို့ပင်လျှင် သူတို့ကို တွေ့ပါက ရိုသေသမှုဖြင့် ဂါရဝပြု နှုတ်ဆက်ကြရသည်။

သို့သော် ထိုလူငယ် သခင်ကြီးကမူ သူတို့ကို လုံးဝ အရေးမလုပ်ပေ။ တစ်ယောက်ချင်းစီ လိုက်လံနှုတ်ဆက်ဖို့ မပြောနှင့် ခေါင်းညိတ်ပြဖို့ပင် စိတ်ကူးမရှိဘဲ သူ့ဟာသူ ဘေးတစ်နေရာတွင် သွားထိုင်နေလေသည်။

အဆင့် ၉ သခင်ကြီးများ အချင်းချင်း ပြောဆိုဝေဖန်နေကြစဉ် ကူလျန်ချန်သည် တံခါးပေါက်မှ ဝင်လာပြီး ပြောလိုက်သည်။

"အားလုံးပဲ ငါ့မျက်နှာကို ထောက်ပြီး အလုပ်ရှုပ်တဲ့ကြားက လာပေးကြတဲ့အတွက် ကျေးဇူးတင်ပါတယ် ပင်ပန်းကြပါပြီ"

ကူလျန်ချန်သည် အနက်ရောင်သူတော်စင်တစ်ပါး ဖြစ်သည့်အတွက် ပုံမှန်အားဖြင့် သူ့မာန်မာနသည်လည်း ကြီးမားလှသည်။ အခြားသူများသာ ဆိုလျှင် သူသည် ဤကဲ့သို့ ဧည့်ဝတ်ပြုစကား ပြောလိမ့်မည် မဟုတ်ပေ။

သို့သော် အဆင့် ၉ သခင်ကြီးများ ဆိုသည်မှာ သူ့အနေဖြင့် ဂိုဏ်း၏ အကျိုးစီးပွားအတွက် အစွမ်းကုန် ဆွဲဆောင်စည်းရုံးထားရမည့် သူများဖြစ်သဖြင့် လိုအပ်သော ဧည့်ဝတ်ပြုမှုများကို မလုပ်၍ မဖြစ်ပေ။

သခင်ကြီးများက ချက်ချင်းပင် လက်ဆုပ်ဂါရဝပြုပြီး ပြန်ပြောကြသည်။

"စီနီယာကြီး ကူ က အားနာစရာတွေ ပြောနေပါပြီ"

ကူလျန်ချန်၏ ဆက်ဆံပုံနှင့် နှိုင်းယှဉ်လိုက်သောအခါ သခင်ကြီးများသည် ကျန်းပေရန်ကို ပို၍ပင် အမြင်ကပ်လာကြသည်။

အနက်ရောင်သူတော်စင်တစ်ပါးတောင်မှ ငါတို့ကို တွေ့ရင် ယဉ်ကျေးရသေးတာ၊ ဒီကောင်လေးက အသက်ငယ်ငယ်လေးနဲ့ လူကြီးသူမကို မလေးမစား လုပ်တယ်၊ တကယ့်ကို ရိုင်းစိုင်းလွန်းတယ် ဟု တွေးနေကြသည်။

သခင်ကြီးများကို နှုတ်ဆက်ပြီးနောက် ကူလျန်ချန်သည် ကျန်းပေရန် ထိုင်နေသော နေရာကို လှမ်းကြည့်လိုက်သည်။

ခါးသက်သက် ပြုံးရင်း ခေါင်းခါလိုက်သော်လည်း ကျန်းပေရန်၏ အပြုအမူကြောင့် အခြားသခင်ကြီးများက ဖယ်ကြဉ်ထားမည်ကို သူ မစိုးရိမ်ပေ။

ထိုသခင်ကြီးများသည် မျက်နှာနှင့် ဂုဏ်ရှိန်ကို အလေးထားကြသော်လည်း တစ်ဖက်လူတွင် တကယ့်အရည်အချင်း အစစ်အမှန် ရှိနေပါက ရွှံ့နွံထဲဆင်းပြီး ကန်စွန်းဥ ဖုတ်စားခိုင်းလျှင်ပင် တွန့်ဆုတ်ခြင်းမရှိ လိုက်လုပ်ကြမည့်သူများ ဖြစ်ကြောင်း သူ ကောင်းကောင်း သိထားသောကြောင့် ဖြစ်သည်။

ကျန်းပေရန်ကတော့ တကယ့်အရည်အချင်း အစစ်အမှန် ရှိသူတစ်ယောက် ဖြစ်ကြောင်း ထင်ရှားနေပြီ။

အဓိက ထိုင်ခုံသို့ လျှောက်သွားရင်း ကူလျန်ချန်က လည်ချောင်းတစ်ချက်ရှင်းကာ ပြောလိုက်သည်။

"အခြေအနေက အရေးကြီးနေတော့ ငါ တဲ့တိုးပဲ ပြောလိုက်ပါမယ်၊ ဒီနေ့ ခင်ဗျားတို့ကို ခေါ်လိုက်ရတာက ဆရာသခင်ကျန်းရဲ့ ဆန္ဒပါပဲ၊ သူက ခင်ဗျားတို့နဲ့အတူ အရေးကြီးကိစ္စကို ဆွေးနွေးချင်လို့ပါတဲ့"

ကူလျန်ချန် ပြောပြီးသည်နှင့် ကျန်းပေရန်သည် ထိုင်ရာမှထကာ ဖြည်းညှင်းစွာ လျှောက်လာပြီး ပြောလိုက်သည်။

"ဒီနေ့ ခင်ဗျားတို့ကို ခေါ်လိုက်ရတာ တခြားကြောင့် မဟုတ်ပါဘူး၊ ဒီ အဆိပ်မြူတွေကို ဘယ်လို ဖြေရှင်းမလဲဆိုတာ ဝိုင်းဝန်းဆွေးနွေးချင်လို့ပါ"

သခင်ကြီးများ အားလုံး ကြောင်အမ်းသွားကြသည်။ ဒီတစ်ခေါက် စုဝေးပွဲကို ဒီလူငယ်လေးက ဦးဆောင်စီစဉ်တယ်တဲ့လား။ ဒါဆိုရင် စီနီယာကြီးကူ က သူ့အတွက် အလုပ်လုပ်ပေးနေတယ် ဆိုတဲ့ သဘောလား။

ဒီလိုတွေးလိုက်မိတော့ သခင်ကြီးအများစု အံ့အားသင့်သွားကြသည်။ ထိပ်တန်း အနက်ရောင်ပညာရှင်များ ဖြစ်ကြသည့်အတွက် သူတို့သည် အရင်က ကူလျန်ချန်နှင့် ထိတွေ့ဆက်ဆံဖူးခြင်း မနည်းလှပေ။

သူတို့စိတ်ထဲတွင် ဤ အထက်စီးမှ ပုဂ္ဂိုလ်ကြီးသည် စကားပြောဆိုရာတွင် ဖော်ရွေသော်လည်း အရိုးထဲထိ စွဲနေသော အနက်ရောင်သူတော်စင်၏ မာန်မာနကို ဖုံးကွယ်ထား၍ မရကြောင်း သိထားကြသည်။

ဒီလိုပုဂ္ဂိုလ်ကြီးတစ်ယောက်ကိုတောင် တမန်တော်အဖြစ် ခိုင်းစေနိုင်ရအောင် ဒီ ကျန်းပေရန် ဆိုတဲ့ကောင်က ဘာများ စွမ်းဆောင်နိုင်လို့လဲ။

ကျန်ရှိသော သခင်ကြီးတစ်ချို့ကမူ ကျန်းပေရန် ပြောသည့် "ဝိုင်းဝန်းဆွေးနွေးခြင်း" ဆိုသည်မှာ ဘာကို ဆိုလိုသနည်းဟု စဉ်းစားနေကြသည်။

ယွမ်မြို့ထဲတွင် ပိတ်မိနေသော "အသက်ရှင် ကျန်ရစ်သူများ" အနေဖြင့် ဤသခင်ကြီးများသည် မိမိတို့၏ စွမ်းရည်များကို ထုတ်ဖော်ပြီး တိုင်းပြည်ကို အခက်အခဲမှ ကယ်တင်ချင်ကြသည်။

သို့သော် အဆိပ်မြူနှင့် ပတ်သက်လာလျှင် အနက်ရောင်ပညာရှင် အများစုမှာ လက်မှိုင်ချနေရုံမှတစ်ပါး ဘာမှ မတတ်နိုင်ကြပေ။

ဥပမာ - ဂီတပညာရှင်များ၊ ပုံရိပ်ယောင်ဖန်ဆင်းရှင်များ၊ ယန္တရားပညာရှင်များ စသည်ဖြင့် သူတို့အားလုံး ကူညီချင်ကြသော်လည်း လက်တွေ့အခြေအနေက ခွင့်မပြုသဖြင့် သူတို့ စွမ်းရည်ပြသခွင့် မရကြပေ။

"ခင်ဗျားတို့ထဲက တော်တော်များများက အဆိပ်မြူကိစ္စနဲ့ ကိုယ်နဲ့ မဆိုင်ဘူး၊ ကူညီချင်ပေမဲ့လည်း ဘာမှ မတတ်နိုင်ဘူးလို့ တွေးနေကြတယ် မဟုတ်လား"

ကျန်းပေရန်၏ စကားအဆုံးတွင် လူအုပ်ထဲမှ ဝါရင့်ပုံပေါက်သော အဘိုးအိုတစ်ဦး ထရပ်ပြီး ပြောလိုက်သည်။

"အဆိပ်မြူ ဖြေရှင်းဖို့က ဆေးပညာရှင်တွေပဲ လုပ်နိုင်တဲ့ကိစ္စလေ၊ ငါတို့ ဝတ်စုံဒီဇိုင်းပညာရှင်တွေက ဘာဝင်ပါရမှာလဲ၊ ပွဲလာကြည့်ရမှာလား"

ထိုစကားပြောလိုက်သော အဘိုးအိုကို ကြည့်ရင်း ကျန်းပေရန် ပြုံးလိုက်သည်။

"ဝတ်စုံဒီဇိုင်းပညာရှင်တွေက အဆိပ်မြူကို ကာကွယ်ဖို့ ဘာလို့ မကူညီနိုင်ရမှာလဲ"

ကျန်းပေရန်က ပြောရင်း သိုလှောင်လက်စွပ်ထဲမှ သားရေလက်အိတ်တစ်စုံကို ထုတ်ကာ ထိုအဘိုးအိုထံ ပစ်ပေးလိုက်သည်။

"ဒီစကား မပြောခင် ဒီလက်အိတ်ကို အရင် စမ်းကြည့်ပါဦးလား"

ကျန်းပေရန် ပစ်ပေးလိုက်သော လက်အိတ်ကို ဖမ်းယူပြီး ထိုအဘိုးအိုက လက်အိတ်ကို ဖွဖွလေး ပွတ်သပ်ကြည့်လိုက်ရာ မျက်လုံးထဲတွင် မယုံနိုင်သော အရိပ်အယောင်များ ပေါ်လာသည်။

"ဒီလက်အိတ်ကို... မောင်ရင်က သားရေ ဘယ်နှစ်မျိုး သုံးပြီး ပြုလုပ်ထားတာလဲ"

"အဆင့် ၉ သခင်ကြီးဆိုတာ တကယ်မမှားပါဘူး၊ မေးလိုက်တာနဲ့ အဓိကအချက်ကို တန်းထိတာပဲ"

ကျန်းပေရန်က နှုတ်ခမ်းထောင့် ကွေးညွှတ်သွားအောင် ပြုံးလိုက်သည်။

ထိုအချိန်တွင် အခြားသော အနက်ရောင်ပညာရှင်များလည်း လက်အိတ်ကို ကိုင်ထားသော အဘိုးအိုကို ဝိုင်းကြည့်လိုက်ကြသည်။ ထိုလက်အိတ်မှာ ဘာများ ထူးခြားနေလို့လဲဟု သိချင်နေကြသည်။

လူအုပ်ထဲတွင် တုန်ကျန့်ရွှမ်၏ သားရေလုပ်ငန်း ကျွမ်းကျင်မှုကို ကောင်းကောင်းသိသော သခင်ကြီးအချို့မှာမူ ကြောင်အမ်းနေကြသည်။

သူ့မိတ်ဆွေများအနေဖြင့် တုန်ကျန့်ရွှမ်သည် သားရေလုပ်ငန်းတွင် မည်မျှ ထိပ်ခေါင်ရောက်နေကြောင်း သိထားကြသည်။ မည်သည့် သားရေပစ္စည်းကိုမဆို သူ့လက်ထဲ ထည့်ပေးလိုက်သည်နှင့် ကုန်ကြမ်းပစ္စည်းအားလုံးကို တန်းပြောပြနိုင်သူ ဖြစ်သည်။

သို့သော် ယခုအချိန်တွင်မူ... သူ စမ်းသပ်လို့ မရတော့ဘူးလား။

လေထုက အတော်လေး အရှိန်ရနေပြီဖြစ်သဖြင့် ကျန်းပေရန်က တုန်ကျန့်ရွှမ်ကို ပြုံးလျက် ကြည့်ကာ ပြောလိုက်သည်။

"ဒီလက်အိတ်ကို ဘယ်လို ပြုလုပ်ထားသလဲ၊ သားရေအရည်အသွေးက ဘာထူးခြားသလဲဆိုတာ သခင်ကြီးအနေနဲ့ သေချာ ခန့်မှန်းကြည့်ပါလား"

ကျန်းပေရန်က ပဟေဠိဝှက်နေသည်ကို မြင်သောအခါ တုန်ကျန့်ရွှမ်သည် ခေါင်းငုံ့ပြီး လက်ထဲမှ လက်အိတ်ကို ပြန်လည် စစ်ဆေးကြည့်ရှုလိုက်သည်။

သို့သော် မည်သည့် ရှုထောင့်မှ ကြည့်သည်ဖြစ်စေ ဤလက်အိတ်ကို မည်သည့် သားရေဖြင့် ပြုလုပ်ထားကြောင်း သူ လုံးဝ မခန့်မှန်းနိုင်ပေ။

ဒါသည် တုန်ကျန့်ရွှမ်အတွက် ဆန်းသစ်သော အတွေ့အကြုံတစ်ခု ဖြစ်နေသည်။ အဆင့် ၉ ဝတ်စုံဒီဇိုင်းပညာရှင်တစ်ဦးအနေဖြင့် အထည်၊ သားရေ၊ ပိုး၊ ဖဲ၊ ဝါ၊ လျှော် စသည့် ဝတ်စုံချုပ်လုပ်ရာတွင် အသုံးပြုနိုင်သော ပစ္စည်းမှန်သမျှကို လက်ဖဝါးပေါ် တင်ထားသကဲ့သို့ ကျွမ်းကျင်ပိုင်နိုင်သူ ဖြစ်သည်။ မည်သည့် သာမန်ပစ္စည်းကိုမဆို သူ့လက်ထဲ ရောက်သွားပါက အံ့ဖွယ်ရတနာအဖြစ် ပြောင်းလဲပေးနိုင်ပြီး စွမ်းအားရှင်များ လိုက်လံရှာဖွေရသော ရတနာပစ္စည်းများ ဖြစ်လာစေသည်။

သူ့အဆင့်အတန်းနှင့်ဆိုလျှင် လောကတွင် သူ မသိသော ပစ္စည်းဟူ၍ မရှိသလောက် ရှားပါးသည်။ အဆင့် ၉ မိစ္ဆာသားရဲ၏ အရေခွံကိုပင် ထိပ်တန်းဂိုဏ်းကြီးများ၏ ဘဏ္ဍာတိုက်များတွင် သိမ်းဆည်းထားလေ့ရှိရာ သူ မြင်ဖူးသည်သာ ဖြစ်သည်။

ထို့ကြောင့် တုန်ကျန့်ရွှမ်သည် ကျန်းပေရန်က ရှားပါးပစ္စည်းတစ်မျိုးမျိုးကို အသုံးပြုထားခြင်း ဖြစ်မည်ဟူသော အတွေးကို ချက်ချင်း ပယ်ဖျက်လိုက်သည်။

ထို့အပြင် တကယ်သာ ရိုးရှင်းမည်ဆိုလျှင် သူက ဒါကိုထုတ်ပြီး စမ်းသပ်လိမ့်မည် မဟုတ်ပေ။ အဘယ်ကြောင့်ဆိုသော် ပစ္စည်းရှားပါးခြင်းက ဝတ်စုံဒီဇိုင်းပညာရှင်တစ်ယောက်၏ တော်ခြင်းကို သက်သေမပြနိုင်ပေ။ သာမန်ပစ္စည်းကို မသာမန်အောင် ဖန်တီးနိုင်မှသာလျှင် ဝတ်စုံဒီဇိုင်းပညာရှင်တို့ ဂုဏ်ယူရမည့်အချက် ဖြစ်သည်။

မျက်စိဖြင့် ကြည့်ရုံဖြင့် ဤလက်အိတ်တွင် မည်သည့်နည်းပညာ အသုံးပြုထားကြောင်း မသိနိုင်သဖြင့် တုန်ကျန့်ရွှမ်က မော့ကြည့်ကာ မေးလိုက်သည်။

"ဒီပစ္စည်းကို အလုပ်ရုံဆီ ယူသွားပြီး သေချာ လေ့လာခွင့် ပြုနိုင်မလား"

ကျန်းပေရန်က လက်ကာပြလိုက်သည်။

"အဲဒီလောက် ဒုက္ခခံစရာ မလိုပါဘူး၊ သခင်ကြီးက မခန့်မှန်းချင်ဘူးဆိုတော့လည်း ကျွန်တော်ပဲ အဖြေထုတ်ပေးလိုက်ပါ့မယ်"

ပြောရင်းနှင့် ကျန်းပေရန်က သိုလှောင်လက်စွပ်ထဲမှ အစိမ်းရင့်ရောင် သားရေတစ်ချပ်ကို ထုတ်လိုက်သည်။

"ဒါက သက်တံမြေခြင်္သေ့ရဲ့ အရေခွံပါ"

"မဖြစ်နိုင်တာ"

တုန်ကျန့်ရွှမ်က အလိုအလျောက် အော်ပြောလိုက်မိသည်။

သက်တံမြေခြင်္သေ့ဆိုသည်မှာ အဆင့် ၇ မိစ္ဆာသားရဲသာ ဖြစ်ပြီး ၎င်းတို့၏ အရေခွံမှာ သိပ်ပြီး ရှားပါးလှသည်တော့ မဟုတ်ပေ။ တုန်ကျန့်ရွှမ် မကိုင်တွယ်ဖူးဘဲ နေမည်မဟုတ်ပေ။

"သခင်ကြီး စိတ်မလှုပ်ရှားပါနဲ့၊ ကျွန်တော် အခုပဲ ရှင်းပြပေးပါမယ်"

ကျန်းပေရန်က ပြောရင်း သိုလှောင်လက်စွပ်ထဲမှ ကြေးဝါရောင် ထွင်းဓားတစ်ချောင်းကို ထုတ်ကာ သက်တံမြေခြင်္သေ့အရေခွံပေါ်တွင် အဆောင်စာလုံးအချို့နှင့် စွယ်ပုံသဏ္ဌာန် နှစ်ခုကို ထွင်းထုလိုက်သည်။

ထွင်းထုပြီးနောက် သိုလှောင်လက်စွပ်ထဲမှ ပုံးတစ်ပုံးကို ထုတ်ကာ လူအများ အံ့သြနေစဉ်တွင် ဆေးဖက်ဝင်ပစ္စည်း အမျိုးမျိုးကို ပုံးထဲသို့ ထည့်လိုက်သည်။

နောက်ဆုံးတွင် ဝိညာဉ်အရက်တစ်အိုးကို လောင်းထည့်ပြီး ပြင်ဆင်ထားသော သက်တံမြေခြင်္သေ့အရေခွံကို ပုံးထဲသို့ ပစ်ထည့်လိုက်သည်။

"ပလုံ... ပလုံ... ပလုံ... ပလုံ..."

အဆင့် ၉ သခင်ကြီးများ ဝိုင်းကြည့်နေကြစဉ် ပုံးထဲမှ အရက်များသည် ဆူပွက်လာပြီး အရောင်မှာလည်း အဖြူရောင်မှ အနီရောင်သို့ တဖြည်းဖြည်း ပြောင်းလဲသွားသည်။

လက်ဖက်ရည်တစ်အိုးခန့် ကြာပြီးနောက် ပုံးထဲမှ အရက်များ လုံးဝ ပျောက်ကွယ်သွားသော်လည်း အငွေ့ပျံသွားခြင်း မဟုတ်ဘဲ စောစောက ထည့်လိုက်သော သက်တံမြေခြင်္သေ့အရေခွံက စုပ်ယူလိုက်ခြင်း ဖြစ်သည်။

အရောင်ပြောင်းသွားသော သက်တံမြေခြင်္သေ့အရေခွံကို ဆယ်ယူပြီး ကျန်းပေရန်က တုန်ကျန့်ရွှမ်ထံ ပစ်ပေးလိုက်သည်။

"ကဲ... အခု ကြည့်ကြည့်ပါဦး၊ သခင်ကြီးလက်ထဲက လက်အိတ်ရဲ့ ကုန်ကြမ်းနဲ့ တူသွားပြီလားလို့"

တုန်ကျန့်ရွှမ်က လက်လှမ်းပြီး အရောင်ပြောင်းသွားသော အရေခွံကို ဖမ်းယူလိုက်သည်။ လက်ဖြင့် စမ်းသပ်ကြည့်လိုက်သည်နှင့် မျက်နှာပေါ်တွင် စောစောကထက် ပိုမို အံ့သြသော အမူအရာများ ပေါ်လာသည်။

"တကယ်ပဲ... တူညီတဲ့ ကုန်ကြမ်း ဖြစ်သွားပြီပဲ"

"ဒါဆို သခင်ကြီးအနေနဲ့ ဒီစိမ်ပြီးသား အရေခွံက မူလအရေခွံထက် ပိုပြီး ခိုင်ခံ့မာကျောသွားတာကိုလည်း သတိထားမိမှာပေါ့"

တုန်ကျန့်ရွှမ်က ခေါင်းညိတ်လိုက်သည်။

"ဟုတ်တယ် အများကြီး ပိုခိုင်မာသွားတယ် မဟုတ်ဘူး... အဆမတန် ပိုခိုင်မာသွားတာ"

ဒါကြောင့်လည်း တုန်ကျန့်ရွှမ် အံ့သြနေရခြင်း ဖြစ်သည်။ သက်တံမြေခြင်္သေ့အရေခွံသည် မီးဓာတ်နှင့် လိုက်ဖက်မှု အလွန်ကောင်းမွန်သောကြောင့် ကာကွယ်ရေးဝတ်စုံ ပြုလုပ်ရာတွင် မီးဓာတ်အခြေခံ တိုက်ခိုက်မှုများကို ကောင်းစွာ ခုခံနိုင်စွမ်း ရှိသည်။

ဒါ့အပြင် ဝတ်စုံဒီဇိုင်းပညာရှင်၏ အရည်အချင်း မြင့်မားလျှင် ရန်သူ၏ အတွင်းအားတိုက်ခိုက်မှုကို စုပ်ယူပြီး မီးဓာတ်အဖြစ် ပြောင်းလဲကာ သိမ်းဆည်းထားနိုင်ပြီး ဝတ်ဆင်သူ၏ တိုက်ခိုက်မှု စွမ်းအားကို မြှင့်တင်ပေးနိုင်သည်။

ထို့ကြောင့် မီးဓာတ်ကျင့်ကြံသူများအတွက် သက်တံမြေခြင်္သေ့အရေခွံဖြင့် ပြုလုပ်သော ရတနာပစ္စည်းများသည် အကြိုက်ဆုံး ပစ္စည်းများထဲတွင် ပါဝင်သည်။

သို့သော် သက်တံမြေခြင်္သေ့အရေခွံတွင် ကြီးမားသော အားနည်းချက်တစ်ခု ရှိသည်။ ၎င်းမှာ အလွန် ပျက်စီးလွယ်ခြင်း ဖြစ်သည်။ ပြင်းထန်သော တိုက်ပွဲများနှင့် ကြုံတွေ့ပါက အလွယ်တကူ ကွဲအက်သွားနိုင်သဖြင့် ကျင့်ကြံသူအများစုသည် ၎င်းကို အတွင်းဝတ်အင်္ကျီအဖြစ်သာ ဝတ်ဆင်ကြပြီး အပြင်ဘက်တွင် ခံနိုင်ရည်မြင့်မားသော သံချပ်ကာအင်္ကျီကို ထပ်ဝတ်လေ့ရှိသည်။

သို့သော် ဒီနည်းလမ်းကလည်း ရောဂါလက္ခဏာကို ကုသခြင်းသာ ဖြစ်ပြီး အရင်းအမြစ်ကို ကုသခြင်း မဟုတ်ပေ။ အဆင့်မြင့် ကျင့်ကြံသူများသည် ထိုးဖောက်ဝင်ရောက်နိုင်သော စွမ်းအားကို အသုံးပြုတတ်ကြသဖြင့် တိုက်ခိုက်သောအခါ သက်တံမြေခြင်္သေ့အရေခွံဖြင့် ပြုလုပ်သော ပစ္စည်းများသည် ပျက်စီးလွယ်ဆဲ ဖြစ်သည်။

သို့သော် ကျန်းပေရန်၏ ပြုပြင်မှုကြောင့် ဤအရေခွံသည် အလွန် ခိုင်ခံ့မာကျောလာပြီး သာမန်အရေခွံထက် လက်တွေ့အသုံးဝင်မှု များစွာ မြင့်မားသွားသည်။

ဒါက တုန်ကျန့်ရွှမ်ကို အတော်လေး ဇဝေဇဝါ ဖြစ်စေသည်။ အဘယ်ကြောင့်ဆိုသော် ဝတ်စုံဒီဇိုင်းပညာရှင်၏ စွမ်းရည်မှာ ကုန်ကြမ်း၏ ဂုဏ်သတ္တိများကို အပြည့်အဝ ဖော်ထုတ်ပေးခြင်းနှင့် သင့်လျော်သော ကုန်ကြမ်းများကို ကျွမ်းကျင်စွာ ပေါင်းစပ်ပေးခြင်းသာ ဖြစ်သင့်သည်။

သို့သော် ကျန်းပေရန်၏ လုပ်ဆောင်ချက်မှာ လုံးဝ ကွဲပြားနေသည်။ သူသည် အရေခွံ၏ မူလဂုဏ်သတ္တိကို အပြည့်အဝ ဖော်ထုတ်ပေးရုံသာမက ၎င်း၏ အားနည်းချက်ကိုပါ အကြီးအကျယ် ပြုပြင်မြှင့်တင်ပေးလိုက်ခြင်း ဖြစ်သည်။

ဒါသည် တုန်ကျန့်ရွှမ်၏ အမြင်တွင် မယုံနိုင်စရာ ကောင်းလွန်းနေသည်။

သူ့အယူအဆအရ မည်သည့် ကုန်ကြမ်းမှ ပြီးပြည့်စုံခြင်း မရှိပေ။ ဝတ်စုံဒီဇိုင်းပညာရှင် လုပ်ရမည့်အလုပ်မှာ အားသာချက်ကို ပုံကြီးချဲ့ပြီး အားနည်းချက်ကို ဖုံးကွယ်ပေးရန်သာ ဖြစ်သည်။

သို့သော် ဤ ဆရာသခင်ကျန်းကမူ အားနည်းချက်ကိုပါ အားသာချက်အဖြစ် ပြောင်းလဲပစ်လိုက်သည်။ ဒါသည် တုန်ကျန့်ရွှမ်၏ ခံယူချက်များကို ဇောက်ထိုးမိုးမျှော် ဖြစ်သွားစေသည်။

အချိန်အတော်ကြာမှ တုန်ကျန့်ရွှမ်သည် အံ့သြမှုမှ ပြန်လည် သတိဝင်လာပြီး လက်အိတ်နှင့် ပြုပြင်ပြီးသား အရေခွံကို ကျန်းပေရန်ထံ ပြန်ပေးကာ လက်ဆုပ်ဂါရဝပြုလိုက်သည်။

"သတင်းကြီးနေတဲ့ 'ပင်လယ်ဖြတ် ကောင်းကင်ထောက်' ဆရာသခင်ကျန်း ဆိုတာ တကယ်မမှားပါဘူး၊ လက်စွမ်းပြလိုက်တာနဲ့ သာမန်မဟုတ်ကြောင်း သိသာသွားတာပဲ"

'ဟမ်... မင်းတို့တောင် ဒီဘွဲ့နာမည်ကို ကြားဖူးသွားပြီလား'

သို့သော် ယခုအချိန်တွင် ကျန်းပေရန်သည် ကိုယ့်ကိုယ်ကိုယ် လွှတ်ပေးထားသော အခြေအနေဖြစ်သဖြင့် ဘွဲ့နာမည်တစ်ခု ပိုလာခြင်း လျော့သွားခြင်းက သူ့ကို မထိခိုက်စေပေ။

ခေါင်းခါလိုက်ပြီး ကျန်းပေရန်က လက်အိတ်နှင့် အရေခွံကို သိမ်းဆည်းကာ ပြောလိုက်သည်။

"ဒီလောက်လေးနဲ့ သာမန်မဟုတ်ဘူးလို့ မခေါ်နိုင်သေးပါဘူး"

ကျန်းပေရန်က မျက်နှာသာ လုံးဝမပေးသည်ကို မြင်သောအခါ သခင်ကြီးများသည် မျက်မှောင်ကြုတ်သွားကြသည်။ ခုနကတည်းက ဤ ဆရာသခင်ကျန်း၏ ငယ်ရွယ်ပြီး မာန်တက်ပုံကို မြင်တွေ့ခဲ့ရသော်လည်း ဤမျှလောက်အထိ မာန်တက်လိမ့်မည်ဟု ထင်မထားခဲ့ကြပေ။

"ဟားဟားဟား... ကောင်းတယ် ဒါဆိုရင် ကျုပ်က ဆရာသခင်ကျန်းဆီကနေ တကယ့် သာမန်မဟုတ်တဲ့ အရာတွေကို တွေ့မြင်ရဖို့ မျှော်လင့်ပါတယ်"

တုန်ကျန့်ရွှမ် ဘယ်လို တုံ့ပြန်မလဲဟု သခင်ကြီးများ စဉ်းစားနေစဉ် သူက ရုတ်တရက် အားရပါးရ ရယ်မောလိုက်ပြီး ပျော်ရွှင်စွာ ပြောလိုက်သည်။

ထိုမြင်ကွင်းကို ကြည့်ရင်း ကူလျန်ချန်သည် တိတ်တဆိတ် ခေါင်းခါကာ စိတ်ထဲတွင် သက်ပြင်းချလိုက်သည်။

'ဟူး... နောက်တစ်ယောက် ရူးသွားပြန်ပြီ'

လမ်းတစ်လျှောက်လုံးတွင် သူသည် ကျန်းပေရန်၏ စစ်မှန်သော စွမ်းရည်ကြောင့် အရှုံးပေးလိုက်ရသော အဆင့် ၉ သခင်ကြီး အများအပြားကို တွေ့မြင်ခဲ့ရပြီးဖြစ်သည်။ ထိုသူများမှာလည်း မတူညီသော နယ်ပယ်အသီးသီးမှ ဖြစ်ကြသည်။

ဒါကြောင့် ကျန်းပေရန်သည် ဤတိုက်ကြီးမှ လူမဟုတ်ကြောင်း ကူလျန်ချန် ပို၍ ယုံကြည်လာသည်။ သို့မဟုတ်လျှင် "အများလက်ခံထားသော အမှန်တရား" များကို ဤမျှ ပြတ်သားစွာ ချိုးဖျက်နိုင်မည် မဟုတ်ပေ။

တုန်ကျန့်ရွှမ်၏ ရယ်သံကို ကြားပြီးနောက် အခြားသော သခင်ကြီးများသည် အစပိုင်းတွင် အံ့သြသွားကြသော်လည်း မကြာမီတွင် နားလည်သဘောပေါက်သော အပြုံးများ ပေါ်လာကြသည်။

အဘယ်ကြောင့်ဆိုသော် သခင်ကြီးအချင်းချင်း ဖြစ်သည့်အတွက် တစ်ဖက်လူ၏ လေကြီးမိုးကြီးပြောဆိုမှုကို သည်းခံနိုင်ရသည့် အကြောင်းရင်းမှာ တစ်ခုတည်းသာ ရှိကြောင်း သူတို့ နားလည်သောကြောင့် ဖြစ်သည်။

ထိုအကြောင်းရင်းမှာ တစ်ဖက်လူတွင် တကယ့်ကို ထူးကဲသော အရည်အချင်း ရှိနေခြင်းပင် ဖြစ်သည်။

ဆရာသခင်ကျန်း ခုနက ပြသလိုက်သော လက်စွမ်းမှာ တုန်ကျန့်ရွှမ်ကို တုန်လှုပ်သွားစေသည်မှာ ထင်ရှားသည်။

တုန်ကျန့်ရွှမ်ကို ခေါင်းညိတ်ပြပြီး ကျန်းပေရန်က ပြန်ပြောလိုက်သည်။

"ကောင်းပြီ၊ ကျွန်တော့်ရဲ့ နောက်တစ်ကြိမ် သာမန်မဟုတ်တဲ့ ဖန်တီးမှုတွေမှာ ခင်ဗျား ပါဝင်လာမယ်လို့ မျှော်လင့်ပါတယ်"

"ကောင်းပါပြီ၊ ကျုပ်အတွက် ဂုဏ်ယူစရာပါပဲ"

တုန်ကျန့်ရွှမ်က ပြောပြီးနောက် ကျန်းပေရန်ကို လက်ဆုပ်ဂါရဝပြုလိုက်သည်။ သို့သော် သူ့မျက်လုံးများက ကျန်းပေရန် သိမ်းဆည်းလိုက်သော သိုလှောင်လက်စွပ်ဆီသို့ မကြာခဏ ရောက်သွားသည်။

ထိုအခြေအနေကို မြင်သောအခါ ကျန်းပေရန်က ပြုံးပြီး မေးလိုက်သည်။

"ကျွန်တော် ဘယ်လိုလုပ်လိုက်လဲဆိုတာ အရမ်း သိချင်နေတယ်မလား"

တုန်ကျန့်ရွှမ် မျက်လုံးများ အရောင်တောက်သွားပြီး လက်ဆုပ်ကာ မေးလိုက်သည်။

"ဆရာသခင်ကျန်း အနေနဲ့ ပညာကိုလျို့ဝှက်မထားဘဲ သင်ပြပေးဖို့ တောင်းဆိုပါတယ်"

"တကယ်တော့ ဝတ်စုံဒီဇိုင်းပညာ တစ်ခုတည်းနဲ့ဆိုရင် ကျွန်တော်လည်း ဒီအရေခွံကို ဒီလောက်ထိ ခိုင်မာအောင် လုပ်နိုင်မှာ မဟုတ်ပါဘူး၊ ဒါပေမဲ့ အဆောင်ပညာ၊ ဝိညာဉ်အရက်ပညာ နဲ့ ဆေးပညာ ဒီ ၃ ခုကို ပေါင်းစပ်လိုက်မယ်ဆိုရင်တော့ လုပ်လို့ရပါတယ်"

"အဆောင်ပညာ... ဝိညာဉ်အရက်ပညာ... ဆေးပညာ..."

တုန်ကျန့်ရွှမ်က ရေရွတ်လိုက်ပြီး မျက်နှာတွင် နားမလည်သော အရိပ်အယောင်များ ပေါ်နေဆဲဖြစ်သည်။

ကျန်းပေရန်က သိုလှောင်လက်စွပ်ထဲမှ သာမန် သက်တံမြေခြင်္သေ့အရေခွံ တစ်ချပ်နှင့် ကြေးဝါရောင် ထွင်းဓားကို ထပ်ထုတ်လိုက်ပြီး ပြောသည်။

"သေချာ ကြည့်ထားနော်၊ ကျွန်တော် တစ်ခါပဲ သင်ပေးမယ်"