အခန်း (၁၄၈၁-၁၄၈၂)
Vol. 112 Ch. 1481-1482
အခန်း (၁၄၈၁) ရေပေါ်မှ ပုံရိပ်ယောင်
ပင်လယ်မြို့တွင် တစ္ဆေသင်္ဘောနှင့် ခေါင်းဆောင်များ၏ တိုက်ပွဲ စတင်လေပြီ။
တစ္ဆေများသည် သင်္ဘောပေါ်မှ ဆင်းသက်လာပြီး ပင်လယ်မြို့ထဲသို့ ဝင်ရောက်ရန် ကြိုးစားနေကြသည်။ ဌာနချုပ်မှ ခေါင်းဆောင်များသည် တစ္ဆေရေကန်ဖြင့် ပိတ်ဆို့ကာ ပထမ ခံစစ်စည်း ပြုလုပ်ထားပြီး အခြား ခေါင်းဆောင်များက ဒုတိယ ခံစစ်စည်း ပြုလုပ်ထားကြသည်။
တစ္ဆေများသည် ရေကန်ကို ကျော်ဖြတ်ပြီး ခေါင်းဆောင်များကို ဖောက်ထွက်နိုင်ပါက ပင်လယ်မြို့တွင် လွတ်လပ်စွာ ကျက်စားနိုင်မည် ဖြစ်သည်။
အချိန်ကြာလာသည်နှင့်အမျှ ရေကန်ထဲမှ လွတ်မြောက်လာသော တစ္ဆေများ များပြားလာသည်။ ခေါင်းဆောင်များလည်း ဖိအားများလာကြသည်။
ယန်ကျန့် ရင်ဆိုင်နေရသော တစ္ဆေသည် အလွန် ကြောက်စရာ ကောင်းလေသည်။
သူသည် ပုံရိပ်ယောင် တစ်ခုထဲတွင် ရောက်ရှိနေလေသည်။ ဟောင်းနွမ်းနေသော အနီရောင် ဇာတ်ခုံတစ်ခုရှေ့တွင် ရပ်နေရပြီး ဇာတ်သဘင် ဝတ်စုံနှင့် တစ္ဆေသည် နားမလည်နိုင်သော သီချင်းတစ်ပုဒ်ကို ဆိုနေလေသည်။
"မဖြစ်နိုင်ဘူး... ငါ လှံနဲ့ ပစ်လိုက်တာလေ... လှံက အလောင်းကောင်သံချောင်း နဲ့ လုပ်ထားတာ... တစ္ဆေစွမ်းအားကို ဖောက်ထွက်နိုင်ရမှာ... ဘာလို့ ငါ ဒီရောက်နေရတာလဲ..."
ယန်ကျန့် လှုပ်ရှား၍ မရသော်လည်း တွေးတော၍ ရနေသေးသည်။
"ငါ့အသိစိတ်ကို ထိန်းချုပ်ထားတာ မဟုတ်ဘူး... ခွေးဆိုးကြီးက ငြိမ်နေတယ်... ငါ့ခန္ဓာကိုယ်ကို တခြား တစ္ဆေက တိုက်ခိုက်တာလည်း မဟုတ်ဘူး... ငါ ဘာမှ မခံစားရဘူး..."
"ဒီတစ္ဆေက ငါ့ရဲ့ အသိဥာဏ်ကို လှည့်စားနေတာ... ငါ့မျက်လုံးကိုပါ လှည့်စားနေတာ..."
ဇာတ်ခုံပေါ်မှ တစ္ဆေသည် မျက်နှာထား ပြောင်းလဲလာသည်။ အမည်းရောင် မျက်နှာဖုံးသည် ဒေါသထွက်နေသော ပုံစံ ဖြစ်လာသည်။
"ငါ့ခန္ဓာကိုယ်က လှုပ်ရှားလို့ ရနေတာ ဖြစ်မယ်... ငါ့စိတ်ကသာ မလှုပ်ရှားနိုင်ဘူးလို့ ထင်နေတာ..."
ယန်ကျန့်သည် ရဲရင့်သော ယူဆချက် တစ်ခုကို ပြုလုပ်လိုက်သည်။
သူသည် ရထားပေါ်တွင် ထိုင်နေသူ တစ်ဦးကဲ့သို့ ဖြစ်နေသည်။ ပြတင်းပေါက် အပြင်ဘက်ကို ကြည့်လျှင် သစ်ပင်များ နောက်ဆုတ်သွားသကဲ့သို့ ခံစားရသော်လည်း အမှန်တကယ်တွင် သူ ကိုယ်တိုင် ရွေ့လျားနေခြင်း ဖြစ်သည်။
"ငါ စမ်းကြည့်မယ်..."
ယန်ကျန့်သည် ရှေ့သို့ တိုးရန် ကြိုးစားလိုက်သည်။ သူ၏ စိတ်ထဲတွင် မလှုပ်ရှားနိုင်သော်လည်း ခြေထောက်အောက်ရှိ ရေပြင်သည် လှိုင်းထနေသည်ကို သတိထားမိလိုက်သည်။
"ငါ့ယူဆချက် မှန်တယ်... တစ္ဆေက ငါ့ကိုပဲ လှည့်စားနိုင်တာ... ရေကန်ကို မလှည့်စားနိုင်ဘူး..."
ယန်ကျန့်သည် မျက်လုံးမှိတ်လိုက်ပြီး တစ္ဆေကတ်ကြေး ကို ထုတ်ယူရန် ကြိုးစားလိုက်သည်။
ကတ်ကြေးကို ထုတ်ယူလိုက်သောအခါ မျှင်မျှင်လေးများ ပေါ်လာလေသည်။ မျှင်တစ်ချောင်းသည် သူနှင့် ဇာတ်ခုံပေါ်မှ တစ္ဆေကို ဆက်သွယ်ထားသည်။
"ဒီကြိုးကို ဖြတ်လိုက်ရင် အကုန် ပျောက်သွားလိမ့်မယ်..."
ယန်ကျန့်၏ တစ္ဆေအရိပ်သည် ကတ်ကြေးကို ကိုင်ကာ ကြိုးကို ဖြတ်ရန် ပြင်ဆင်လိုက်သည်။
ဇာတ်ခုံပေါ်မှ တစ္ဆေသည် သီချင်းဆိုရင်း ယန်ကျန့်ဆီသို့ လျှောက်လာနေသည်။
တစ္ဆေ နီးကပ်လာသည်နှင့်အမျှ ယန်ကျန့်၏ မျက်နှာသည် မည်းနက်လာပြီး အဝတ်အစားများလည်း ဇာတ်သဘင် ဝတ်စုံအဖြစ် ပြောင်းလဲလာသည်။
တစ္ဆေသည် ယန်ကျန့်ကို နောက်ထပ် ဇာတ်သဘင် တစ္ဆေတစ်ကောင်အဖြစ် ပြောင်းလဲပစ်ရန် ကြိုးစားနေခြင်း ဖြစ်သည်။
သို့သော် ယန်ကျန့် မကြောက်ပေ။
"မင်း နောက်ကျသွားပြီ..."
ယန်ကျန့် ကြိုးကို ဖြတ်လိုက်သည်။
ကြိုးပြတ်သွားသည်နှင့် တပြိုင်နက် ပုံရိပ်ယောင်များ အားလုံး ပျောက်ကွယ်သွားလေသည်။
ဇာတ်ခုံ၊ တစ္ဆေ၊ ထိုင်ခုံများ အားလုံး ပျောက်သွားပြီး ယန်ကျန့်သည် ရေကန်ပေါ်တွင် ပြန်လည် ရောက်ရှိလာလေသည်။ သူသည် မူလနေရာထက် အနည်းငယ် ရှေ့ရောက်နေသည်။
ထိုအချိန်တွင်...
အနီရောင် လှံတစ်ချောင်းသည် လေထဲမှ ပျံသန်းလာပြီး တစ္ဆေကို ထိုးစိုက်လိုက်လေသည်။
ဒါ သူ စောစောက ပစ်လိုက်သော လှံ မဟုတ်ပါလော။
"ဟာသ လုပ်နေတာလား..." ယန်ကျန့် အံ့သြသွားသည်။
သူ ပုံရိပ်ယောင်ထဲတွင် အကြာကြီး နေခဲ့ရသော်လည်း လက်တွေ့တွင် တစ်စက္ကန့်ပင် မကြာသေးပေ။ သူ လှံပစ်လိုက်ပြီး ချက်ချင်း ပုံရိပ်ယောင်ထဲ ရောက်သွားခြင်း ဖြစ်သည်။
သို့သော် တစ္ဆေကတ်ကြေးကို ဘာလို့ သုံးလို့ ရတာလဲ။ ရေပေါ်မှာ ဘာလို့ လမ်းလျှောက်လို့ ရတာလဲ။
နားမလည်နိုင်စရာပင်။
မည်သို့ပင်ဖြစ်စေ တစ္ဆေသည် လှံချက်မိပြီး ရေထဲသို့ နစ်မြုပ်သွားလေသည်။
ယန်ကျန့်သည် တစ္ဆေ နစ်မြုပ်ရာသို့ သွားပြီး ထင်းခုတ်ဓား ဖြင့် ၆ ပိုင်း ပိုင်းလိုက်သည်။ ထို့နောက်မှ လှံကို ပြန်နုတ်ယူလိုက်သည်။
တစ္ဆေသည် ရေထဲသို့ လုံးဝ နစ်မြုပ်သွားလေသည်။
"နောက်တစ်ကောင် လာပြန်ပြီ..."
ယန်ကျန့် မောပန်းချိန် မရလိုက်ပေ။
မလှမ်းမကမ်း ရေပြင်ပေါ်တွင် အဘိုးအို တစ်ဦး ရပ်နေသည်ကို တွေ့လိုက်ရလေသည်။ အဝတ်အစားများ စုတ်ပြဲနေပြီး မျက်လုံးများ မှုန်ဝါးနေလေသည်။
ဒီတစ္ဆေကလည်း ရေကန်ကို အာခံနိုင်သော ကောင်ပင် ဖြစ်သည်။
ယန်ကျန့်သည် တုံ့ဆိုင်းခြင်း မရှိဘဲ လှံကို ကိုင်ကာ အဘိုးအိုဆီသို့ လျှောက်သွားလိုက်လေသည်။
အခန်း (၁၄၈၂) အထိအခိုက်နှင့် မျက်နှာသုံးမျိုး
တစ္ဆေရေကန်နှင့် အနီးဆုံး အဆောက်အအုံ အတွင်း၌...
မီးရောင်များ အားလုံး ငြိမ်းနေလေသည်။ ရံဖန်ရံခါ လင်းလက်လာသော မီးရောင်များသည်လည်း တစ္ဆေစွမ်းအား သက်ရောက်မှုကြောင့် ချက်ချင်း ပြန်ငြိမ်းသွားလေသည်။
ထိုအဆောက်အအုံသည် ပင်လယ်မြို့ထဲသို့ တစ္ဆေများ မဝင်ရောက်နိုင်ရန် တားဆီးထားသော ခံစစ်စည်း တစ်ခု ဖြစ်သည်။ လီယန်၊ ထုန်ချန်၊ ဆူဖန်၊ ကျန်းလေ စသည့် ခေါင်းဆောင်လောင်းများ စုပေါင်းထားသော အဖွဲ့သည် ဤနေရာကို တာဝန်ယူထားလေသည်။
ရုတ်တရက်...
"ဘုန်း..."
တံခါးကြီး ပွင့်ထွက်သွားသံနှင့် အတူ နာကျင်စွာ အော်ဟစ်သံ တစ်ခု ထွက်ပေါ်လာလေသည်။
လင်းလုံ သည် မြေကြီးပေါ်သို့ လဲကျသွားလေသည်။ မျက်နှာသည် မီးခိုးရောင် သန်းနေပြီး အသက်ရှူသံ ပျောက်ကွယ်လုနီးပါး ဖြစ်နေလေသည်။ ကြောက်မက်ဖွယ် တစ္ဆေတိုက်ခိုက်မှု တစ်ခုက သူ့ကို ပြင်းထန်စွာ ထိခိုက်စေခဲ့လေသည်။
"ဘယ်လို ဖြစ်တာလဲ..." လီယန် အံ့သြတကြီး ဖြစ်သွားလေသည်။
တစ္ဆေတစ်ကောင် ရေကန်ထဲမှ ထွက်လာပြီး သူတို့ တာဝန်ယူထားသော အဆောက်အအုံထဲသို့ ဝင်ရောက်လာခဲ့သည်။ သူတို့ အဖွဲ့သည် ထိုတစ္ဆေကို ရှင်းလင်းရန် ဆုံးဖြတ်ခဲ့ကြသည်။ ဆူဖန်၏ ကြိုတင်သိမြင်နိုင်စွမ်းဖြင့် တစ္ဆေရှိရာကို ရှာဖွေပြီး အခန်းထဲတွင် ပိတ်လှောင်ထားခဲ့သည်။
သို့သော် မကြာမီမှာပင် ဤအဖြစ်ဆိုး ကြုံတွေ့လိုက်ရလေသည်။
တစ္ဆေတားဆီးခြင်း စွမ်းရည်သည် ကျရှုံးသွားပြီး တံခါး ပွင့်ထွက်သွားခဲ့သည်။ တံခါးနှင့် အနီးဆုံးတွင် ရှိနေသော လင်းလုံသည် ကံဆိုးစွာ တိုက်ခိုက်ခံလိုက်ရခြင်း ဖြစ်သည်။
"အစားထိုးအရုပ် သုံးလိုက်... မြန်မြန်... ကယ်လို့ ရလောက်သေးတယ်..."
ဆူဖန် သတိပေးလိုက်သည်။
အဖြစ်အပျက်က မြန်ဆန်လွန်းသဖြင့် လင်းလုံသည် အစားထိုးအရုပ်ကို ထုတ်သုံးချိန် မရလိုက်ပေ။
"ငါ လုပ်လိုက်မယ်..."
ကျန်းလေသည် အန္တရာယ်ကို ဂရုမစိုက်ဘဲ ပြေးဝင်သွားလေသည်။ သူ၏ လက်ထဲတွင် အစားထိုးအရုပ် တစ်ရုပ် ပါရှိသည်။ လင်းလုံ၏ သွေးနှင့် ထိတွေ့စေရန် လိုအပ်သည်။
သို့မှသာ လင်းလုံ အစား အသေခံပေးနိုင်မည် ဖြစ်သည်။
ကျန်းလေအတွက် အလွန် အန္တရာယ် များလှသည်။ တံခါးကို ဖွင့်ပြီး လင်းလုံကို သတ်နိုင်သော တစ္ဆေသည် သူ့ကိုလည်း သတ်နိုင်လေသည်။
"ငါ ကူညီမယ်..."
လီယန်သည် ကိုယ့်ကိုယ်ကိုယ် အပြစ်တင်စိတ်ဖြင့် ရှေ့တိုးလာလေသည်။
တစ္ဆေတားဆီးခြင်း စွမ်းရည်ကို ပြန်လည် အသုံးပြုလိုက်ရာ ပွင့်နေသော တံခါးသည် ပြန်ပိတ်သွားလေသည်။ သို့သော် စိတ်မချရသေးပေ။ တစ္ဆေသည် တံခါးကို အလွယ်တကူ ဖွင့်နိုင်ကြောင်း သိရှိထားပြီး ဖြစ်သည်။ သူသည် ကျန်းလေ အတွက် အချိန်ဆွဲပေးခြင်းသာ ဖြစ်သည်။
ကျန်းလေသည် လင်းလုံ၏ အနားသို့ ရောက်ရှိသွားပြီး သွေးစွန်းနေသော နေရာတွင် အစားထိုးအရုပ်ကို ပွတ်တိုက်ပေးလိုက်လေသည်။
သွေးစွန်းသွားသော အစားထိုးအရုပ်သည် ချက်ချင်း လှုပ်ရှားလာလေသည်။
သို့သော် ထူးဆန်းသည်မှာ အရုပ်သည် အားနည်းနေပုံ ရသည်။ ကျန်းလေ လက်ထဲမှ ရုန်းထွက်ရန်ပင် အားမရှိပေ။ ကျန်းလေ လွှတ်ပေးလိုက်မှသာ မြေကြီးပေါ်သို့ ကျသွားလေသည်။
မြေကြီးပေါ်သို့ ရောက်သောအခါ အရုပ်သည် ပြန်မထနိုင်တော့ဘဲ လျင်မြန်စွာ ဟောင်းနွမ်း ဆွေးမြေ့သွားလေသည်။
အရုပ်၏ အခြေအနေ ဆိုးရွားနေသော်လည်း လင်းလုံ၏ အခြေအနေမှာ တိုးတက်လာလေသည်။
မျက်နှာပေါ်မှ မီးခိုးရောင်များ ပျောက်ကွယ်သွားပြီး အသက်ရှူသံ မှန်လာလေသည်။ အခြေအနေ ကောင်းမွန်လာပုံ ရသည်။
သို့သော် အရုပ်သည် ကြာရှည် မခံပေ။ လုံးဝ ငြိမ်သက်သွားပြီး စုတ်ပြတ်သတ်သွားလေသည်။
"အရုပ် သေသွားပြီ... လင်းလုံ ကောင်းသွားပြီ ထင်တယ်..."
ဝမ်ကျုံး တီးတိုး ပြောလိုက်သည်။
ကျန်းလေ၏ မျက်နှာသည် နီရဲနေပြီး ခန္ဓာကိုယ် အတွင်း၌ မီးလောင်နေသကဲ့သို့ ဖြစ်နေလေသည်။ သူသည် လင်းလုံကို စိုက်ကြည့်နေသည်။
"မဟုတ်ဘူး... သူ သတိမရသေးဘူး... စောစောက သက်သာသလို ရှိပေမယ့် အခု ပြန်ဆိုးလာပြီ..."
လီယန် ကြည့်လိုက်သည်။
ဟုတ်ပါသည်။ လင်းလုံ၏ မျက်နှာသည် ပြန်လည် မီးခိုးရောင် သန်းလာပြီး ယခင်ကထက်ပင် ပိုမို ဆိုးရွားလာနေလေသည်။
"တစ္ဆေစွမ်းအားက သူ့ခန္ဓာကိုယ်ထဲမှာ ကျန်နေသေးတယ်... အရုပ်က ဒဏ်ရာ တစ်စိတ်တစ်ပိုင်းကိုပဲ ယူသွားနိုင်တာ..."
လီယန် မျက်မှောင်ကြုတ်လိုက်သည်။
"ဘယ်လို ဖြစ်တာလဲ... အစားထိုးအရုပ်က အသေခံပေးလို့ ရတယ် မဟုတ်လား..."
ဆူဖန် အံ့သြသွားလေသည်။
"အရုပ်က အစွမ်းမထက်တာ မဟုတ်ဘူး... သုံးတာ နောက်ကျသွားလို့... တိုက်ခိုက်မခံရခင် သုံးရမှာ... အခုက တိုက်ခိုက်ခံရပြီးမှ သုံးတာ... တချို့ တိုက်ခိုက်မှုတွေက ကျိန်စာ ပါတယ်... လူသေသွားရင်တောင် ကျိန်စာက ကျန်ခဲ့တာ..."
"နောက်ထပ် အရုပ် တစ်ရုပ် ထပ်သုံးကြည့်ရအောင်... တစ္ဆေစွမ်းအား ကုန်သွားမလား လို့..."
လီယန်သည် နောက်ထပ် အရုပ် တစ်ရုပ် ထုတ်သုံးလိုက်လေသည်။
ဒုတိယ အရုပ်သည်လည်း ပထမ အရုပ်ကဲ့သို့ပင် ဖြစ်ပျက်သွားလေသည်။ လင်းလုံ ခဏတာ သက်သာလာသော်လည်း ပြန်လည် ဆိုးရွားသွားပြန်သည်။
"ထပ်စမ်းမယ်..." ဆူဖန်က တတိယ အရုပ်ကို ထုတ်ပေးလိုက်သည်။
တတိယ အရုပ်သည် အနည်းငယ် ကွာခြားလေသည်။ လှုပ်ရှားနိုင်စွမ်း ရှိပြီး လမ်းလျှောက်နေလေသည်။ သို့သော် မကြာမီ အားကုန်သွားပြီး လဲကျကာ ဆွေးမြေ့သွားပြန်သည်။
"အလုပ်ဖြစ်တယ်... နောက်ထပ် တစ်ရုပ်လောက် ဆိုရင် ရလောက်ပြီ..."
ဝမ်ကျုံးက စတုတ္ထ အရုပ်ကို ထုတ်ယူလိုက်လေသည်။
ထိုအချိန်တွင်...
"ဒုန်း..."
လီယန် ပိတ်ထားသော တံခါးသည် ထပ်မံ ပွင့်ထွက်သွားလေသည်။ တိုက်ခိုက်မှု မပြင်းထန်သော်လည်း တားဆီး၍ မရနိုင်ပေ။
"ဒုက္ခပဲ... တစ္ဆေ လာပြန်ပြီ... သတိထား..."
လီယန်သည် တံခါးကို ပိတ်ရန် မကြိုးစားတော့ဘဲ ဖွင့်ပေးလိုက်လေသည်။
ဒါက သူ့ရဲ့ ဒုတိယ စွမ်းရည် ဖြစ်သော "တံခါးဖွင့်တစ္ဆေ" ဖြစ်သည်။
တံခါးပွင့်သွားလျှင် အခန်းထဲရှိ လူ သေဆုံးရမည် ဖြစ်သည်။
တစ္ဆေစာတိုက်မှ ရရှိထားသော စွမ်းရည် ဖြစ်သည်။
တစ္ဆေကို မသတ်နိုင်သော်လည်း ကြီးမားသော ထိခိုက်မှု ဖြစ်စေနိုင်လေသည်။
တံခါးပွင့်သွားသောအခါ အခန်းထဲတွင် မှောင်မည်းနေလေသည်။
ခြေသံများ ကြားလိုက်ရသည်။ လေးလံသော ခြေသံများ ဖြစ်သည်။
ခြေသံသည် အပြင်သို့ မထွက်လာဘဲ အနောက်သို့ ဆုတ်သွားလေသည်။
"အလုပ်ဖြစ်တယ်... ဒါပေမဲ့ သိပ်မထိရောက်ဘူး... နောက်ဆုတ်သွားရုံပဲ ရှိတယ်..."
လီယန် ချွေးစေးများ ပြန်လာလေသည်။
တစ္ဆေ၏ ကြောက်မက်ဖွယ် စွမ်းအားကို သူ ခံစားမိလိုက်ပြီ ဖြစ်သည်။
ခေါင်းဆောင် အဆင့်သာ ကိုင်တွယ်နိုင်မည့် တစ္ဆေမျိုး ဖြစ်သည်။ သူတို့ အဖွဲ့လိုက်မို့သာ ခံနိုင်ရည် ရှိနေခြင်း ဖြစ်သည်။
"လင်းလုံ သေသွားပြီ..."
ကျန်းလေ၏ အသံ ထွက်ပေါ်လာလေသည်။
"ဘယ်လို ဖြစ်တာလဲ... စောစောက ကောင်းနေသေးတယ်လေ..."
ဝမ်ကျုံး အံ့သြသွားလေသည်။ အရုပ်သုံးရန် ပြင်ဆင်နေဆဲ ဖြစ်သည်။
၃ စက္ကန့်ပင် မကြာလိုက်ပေ။
"တံခါးပွင့်သွားတဲ့ အချိန်မှာတင် သေသွားတာ..."
ကျန်းလေ မျက်နှာပျက်နေလေသည်။
အားလုံး တိတ်ဆိတ်သွားကြသည်။
လင်းလုံသည် အားနည်းသူ မဟုတ်ပေ။ သို့သော် ပြန်လည် တိုက်ခိုက်ခွင့်ပင် မရလိုက်ဘဲ သေဆုံးသွားခဲ့ရသည်။ အရုပ် ၃ ရုပ် သုံးတာတောင် မကယ်နိုင်ခဲ့ပေ။
"တစ္ဆေရဲ့ သတ်ဖြတ်ပုံကို မသိဘဲ ဝင်တိုက်ရင် ငါတို့ အကုန် သေကုန်လိမ့်မယ်... ယန်ကျန့် ရေကန်ထဲမှာတောင် မမြုပ်တဲ့ ကောင်လေ... S အဆင့် တစ္ဆေ ဖြစ်လောက်တယ်..."
ဆူဖန် သုံးသပ်ပြလေသည်။
"ဖယ်လိုက်ကြ... ငါ ရှင်းမယ်..."
စိမ်းသက်သော အသံတစ်ခု ထွက်ပေါ်လာလေသည်။
ထုန်ချန် ရောက်လာလေပြီ။ မိတ်ကပ်လိမ်းခြယ်ထားသော မျက်နှာဖြင့် ဖြစ်သည်။
"ဆူဖန်က တစ္ဆေရဲ့ လှုပ်ရှားမှုကို ခန့်မှန်း... လီယန်က တားဆီး... ကျန်းလေ၊ ဝမ်ကျုံး၊ လျူချီ တို့က အချိန်ဆွဲ... ပြီးရင် ငါ အဆုံးသတ်မယ်... အစီအစဉ် အတိုင်း သွားမယ်..."
ထုန်ချန်သည် အခန်းထဲသို့ ဝင်ရောက်သွားလေသည်။
သူ့မျက်နှာပေါ်တွင် မျက်နှာ ၃ မျိုး ပြောင်းလဲသွားလေသည်။ တစ်ခုမှာ ဝေ့ကျင်း၏ မျက်နှာ ဖြစ်သည်။ ကျန်နှစ်ခုမှာ သူစိမ်းများ ဖြစ်သည်။
လီယန် မှတ်မိလိုက်သည်။ တစ်ခုမှာ တစ္ဆေပန်းချီကားထဲမှ အမျိုးသမီး၏ မျက်နှာ ဖြစ်သည်။ လှပလွန်းသဖြင့် လက်တွေ့တွင် မရှိနိုင်သော မျက်နှာ ဖြစ်သည်။
နောက်ဆုံး တစ်ခုမှာ အဘိုးအို တစ်ဦး၏ မျက်နှာ ဖြစ်သည်။ အလောင်းကွက်များဖြင့် ပြည့်နှက်နေပြီး တစ္ဆေစာတိုက်၏ ပထမဆုံး မန်နေဂျာ လော်ဝန်စုန့် (တံခါးခေါက်တစ္ဆေ) ၏ မျက်နှာ ဖြစ်လေသည်။
တစ္ဆေထိန်းချုပ်သူ၊ တစ္ဆေပန်းချီကား၊ တံခါးခေါက်တစ္ဆေ။
ကြောက်မက်ဖွယ် တစ္ဆေ ၃ ကောင်၏ စွမ်းအားများ ထုန်ချန်ထံတွင် စုဝေးနေလေသည်။ ခဏတာ ဖြစ်သော်လည်း ခေါင်းဆောင် အဆင့်သို့ ရောက်ရှိနေပြီ ဖြစ်သည်။
"ထုန်ချန်က တော်တော် မိုက်ရူးရဲ ဆန်တာပဲ... တစ်ခါတည်း မျက်နှာ ၃ ခုလုံး ထုတ်သုံးလိုက်တယ်..."
လီယန် အံ့သြသွားလေသည်။
သို့သော် သူ နားလည်လိုက်သည်။
တစ္ဆေက အရမ်း ကြမ်းတမ်းလွန်းသည်။ လင်းလုံကို ချက်ချင်း သတ်ပစ်လိုက်သည်။ ထုန်ချန်သည် အမှားမခံလိုသဖြင့် အစွမ်းကုန် ထုတ်သုံးလိုက်ခြင်း ဖြစ်သည်။