အခန်း (၂၁၁)

အခန်း။ ၂၁၁

ဇွန်ဘီတွေက ကားမောင်းနေတယ် ဟုတ်လား...

ဝမ်လေ့သည် သိမ်းငှက်၏ ပါးစပ်မှ ထိုသတင်းကို ကြားလိုက်ရသည့်ခဏတွင် မျက်လုံးများ ပြူးကျယ်သွားပြီး စိတ်ထဲ၌ အကြီးအကျယ် တုန်လှုပ်သွားရသည်။

ဒီကိစ္စက တကယ်ကြီး ဖြစ်နေတာပဲ။

အမှန်စင်စစ် သူသည် ရှင်သန်ကျန်ရစ်သူများ၏ ပြောစကားအရ ဤသတင်းကို ကြိုတင်သိရှိထားခဲ့သလို အခြေစိုက်စခန်းမြို့တော်သို့ သူကိုယ်တိုင် တင်ပြခဲ့သည့် အစီရင်ခံစာထဲတွင်လည်း ဇွန်ဘီများ ကားမောင်းသည့်အကြောင်း ပါဝင်ခဲ့သည်။ သို့သော်လည်း ဇွန်ဘီတစ်ကောင် ကားမောင်းသည်ဟူသော အချက်မှာ သာမန်လူသားတို့၏ အသိဉာဏ်ဖြင့် လက်ခံရန် အလွန်ပင် ခက်ခဲလွန်းလှသည်။

ထို့ကြောင့်ပင် သူ၏ရင်ထဲ၌ သံသယအနည်းငယ်မှာ အမြဲကိန်းအောင်းနေခဲ့သည်။ ရှင်သန်

ကျန်ရစ်သူများက သူ့ကို လိမ်ညာနေခြင်း မဟုတ်ကြောင်း ဗီဇအရ သိနေသော်လည်း မမြင်ရလျှင် မယုံကြည်နိုင်ဘူးဟူသော စိတ်က စိုးမိုးနေခဲ့သည်။ သို့သော် ယခုမူ သူ၏ ရဲဘော်ရဲဘက်ဖြစ်သူ သိမ်းငှက် ကိုယ်တိုင် မျက်မြင်တွေ့ရှိခဲ့ပြီဟု ဆိုလာသောအခါ မှားယွင်းရန် အကြောင်းမရှိတော့ဘဲ ယုံကြည်လိုက်ရုံသာ ရှိတော့သည်။

ထို့နောက် ဝမ်လေ့သည် တစ်စုံတစ်ခုကို တွေးမိသွားဟန်ဖြင့် မျက်နှာပျက်သွားပြီး သူ၏ မျက်ဝန်းများထဲတွင် ထိတ်လန့်ရိပ်များ ထပ်မံပေါ်ပေါက်လာသည်။

ရှင်သန်ကျန်ရစ်သူများ၏ ပြောစကားအရ ကျန်းနန်မြို့ပြခရိုင်အတွင်းရှိ ဇွန်ဘီများသည် ကားမောင်းရုံသာမက အရင်းအမြစ် ပစ္စည်းများကိုပါ သယ်ယူပို့ဆောင်နေကြခြင်း ဖြစ်သည်။ ဤအချက်က သူ၏စိတ်ထဲတွင် ပိုမိုကြီးမားသော တွေးဆချက်များကို ဖြစ်ပေါ်စေခဲ့သည်။

ဒါဆိုရင်... ကျန်းနန်မြို့ထဲမှာ တကယ်ပဲ ဇွန်ဘီဘုရင်တစ်ကောင် ပုန်းအောင်းနေတာလား။

ကုန်တင်ကားမောင်းတာကအစ အရင်းအမြစ်တွေ သယ်ယူတာအထိ ဒီဇွန်ဘီအားလုံးကို ဇွန်ဘီဘုရင်က နောက်ကွယ်ကနေ အမိန့်ပေးပြီး။ ထိန်းချုပ်နေတာလား။

အရင်က သံသယတွေ အားလုံးက မှန်ကန်နေခဲ့ပြီ။ ကျန်းနန်မြို့ပြခရိုင်ထဲမှာ ဇွန်ဘီဘုရင်တစ်ကောင် တကယ်ရှိနေတာပဲ။

ဘေးနားတွင် မတ်တပ်ရပ်နေသော ခေါင်းဆောင်ကျန်းမှာမူ သိမ်းငှက်၏ စကားကို ကြားရသောအခါ အံ့ဩလွန်းသဖြင့် ပါးစပ်အဟောင်းသား ဖြစ်သွားရသည်။

"တကယ်ကြီးလားဗျာ... ဇွန်ဘီတစ်ကောင်က ကုန်တင်ကားကို မောင်းနေတယ်ဆိုတာ"

"မှတ်တမ်းတွေထဲမှာ ဖော်ပြထားတာတွေက တကယ်ကြီးလားဗျာ..."

"ဒါပေမဲ့ ဇွန်ဘီတစ်ကောင်က ကုန်တင်ကားကို ဘယ်လိုနည်းနဲ့ မောင်းနိုင်မှာလဲ"

သိမ်းငှက်၏ ဘေးတွင် ရပ်နေသော ခေါင်းဆောင်လီသည် မျက်မှောင်ကြုတ်လျက် ရေရွတ်

လိုက်သည်။ သူသည် သူ့အဖွဲ့ဝင်ဖြစ်သူ၏ စကားကို သေချာပေါက် ယုံကြည်သည်။ အဘယ်ကြောင့်ဆိုသော် ယခုအချိန်မှာ အခြေစိုက်စခန်းအတွက် အလွန်အရေးကြီးသော တာဝန်ကို ထမ်းဆောင်နေချိန်ဖြစ်ရာ သိမ်းငှက် အနေဖြင့် ဤကဲ့သို့ အဆုံးအဖြတ်ပေးရမည့် အချိန်မျိုးတွင် လိမ်ညာရဲမည် မဟုတ်ပေ။

သို့သော်လည်း ဇွန်ဘီများ ကားမောင်းသည်ဟူသော အချက်မှာ အမှန်တကယ်ပင် အံ့ဩတုန်လှုပ်ဖွယ် ကောင်းလွန်းလှသည်။ သူသည်လည်း ယခင်က ထိုမှတ်တမ်းများကို ဖတ်ဖူးခဲ့သော်လည်း ကောလာဟလမျှသာ ဖြစ်လိမ့်မည်ဟု ထင်မှတ်ခဲ့ခြင်းဖြစ်သည်။ ယခုမူ ထိုသတင်းအချက်အလက်မှာ မှန်ကန်နေကြောင်း သက်သေပြလိုက်ပြီ ဖြစ်သည်။

အဖွဲ့ခေါင်းဆောင် သုံးဦးသာမက ကျန်ရှိနေသော အဖွဲ့ဝင်များမှာလည်း တစ်ဦးကိုတစ်ဦး မယုံကြည်နိုင်သလို ကြည့်ရင်း မှင်တက်နေကြသည်။

ဇွန်ဘီတွေက ကားမောင်းတယ် ဟုတ်လား။ အသိဉာဏ်မဲ့တဲ့ သတ္တဝါတွေက ဒါမျိုးလုပ်နိုင်

တယ်ဆိုတာ လုံးဝ မဖြစ်နိုင်သလောက်ပဲ။

သို့သော် သိမ်းငှက်၏ မျက်နှာထားမှာ နောက်ပြောင်နေသည့် အရိပ်အယောင် လုံးဝမရှိပေ။

"ခင်ဗျားတို့ နှစ်ယောက်ရော ဘယ်လိုထင်လဲ အခြေစိုက်စခန်းက ကျွန်တော်တို့ကို ပေးလိုက်တဲ့ တာဝန်က ဟိုထူးဆန်းတဲ့ မိန်းကလေးကို ဖမ်းဖို့လေ"

ထိုအချိန်တွင် ခေါင်းဆောင်ကျန်းက ဝမ်လေ့နှင့် အခြားသူများကို ကြည့်ကာ ဝေခွဲမရစွာဖြင့် မေးမြန်းလိုက်သည်။ သူတို့၏ မူလပစ်မှတ်မှာ လူသားဆင့်ကဲပြောင်းလဲသူ ဖြစ်နိုင်ခြေရှိသော မိန်းကလေးငယ် ဖြစ်သော်လည်း ယခု ပေါ်ပေါက်လာသည်မှာ ဇွန်ဘီတစ်ကောင် ဖြစ်နေသည်။ တစ်ဖက်က ဆင့်ကဲပြောင်းလဲသူ တစ်ဖက်က ဇွန်ဘီ သူတို့နှစ်ဦးမှာ လုံးဝ ဆက်စပ်မှု မရှိသကဲ့သို့ ဖြစ်နေသည်။

"ကျွန်တော် ထင်တာကတော့ ဒီအခြေအနေကို အလေးအနက် ထားသင့်တယ်ဗျ။ ကျွန်တော့်စိတ်ထဲမှာ မကောင်းတဲ့ အငွေ့အသက်တစ်ခု ခံစားနေရတယ်... အဲဒါက ဇွန်ဘီဘုရင်ပဲ"

ဝမ်လေ့၏ မျက်နှာမှာ အလွန်တည်ကြည်နေပြီး သူက ဆက်လက်၍ "ဇွန်ဘီဘုရင်ဟာ ဇွန်ဘီတွေကို ထိန်းချုပ်ပြီး ဇွန်ဘီလှိုင်းလုံးကြီးတွေ ဖြစ်ပေါ်စေနိုင်တာပဲ။ အခု ဇွန်ဘီတစ်ကောင်ကို ကားမောင်းဖို့ ထိန်းချုပ်ခိုင်းတာကလည်း သူ့အတွက် ပြဿနာရှိမယ် မထင်ဘူး"

"ဇွန်ဘီဘုရင် ဟုတ်လား"

ခေါင်းဆောင်ကျန်း၏ မျက်နှာအရောင်မှာ ချက်ချင်း ပြောင်းလဲသွားသည်။ ပြန်စဉ်းစားကြည့်လျှင် ဇွန်ဘီကားမောင်းသည့် ကိစ္စမှာ ဇွန်ဘီဘုရင်နှင့် ဆက်စပ်နေနိုင်သည်မှာ သေချာသလောက် ရှိသည်။

"ဖြစ်နိုင်ခြေ အများကြီးရှိတယ် ရာနှုန်းပြည့်တော့ အာမမခံနိုင်ပေမဲ့ ကျွန်တော်တို့ ဒါကို အလေးအနက် ထားရမယ်။ ဘာပဲဖြစ်ဖြစ် ဒါက ဇွန်ဘီဘုရင်ပဲဗျ ဇွန်ဘီဘုရင်ရဲ့ ခြိမ်းခြောက်မှုက ဘယ်လောက်ကြီးမားသလဲဆိုတာ ကျွန်တော် အထူးတလည် ရှင်းပြနေစရာ မလိုဘူးလို့ ထင်တယ် ခင်ဗျားတို့လည်း နားလည်ပြီးသား ဖြစ်မှာပါ"

“ဟိုထူးဆန်းတဲ့ မိန်းကလေးကိစ္စကိုတော့ ခဏဘေးဖယ်ထားလိုက်ရအောင်။ အရင်ဆုံး ဒီ ဇွန်ဘီဘုရင်ရဲ့ အခြေအနေကို အတည်ပြုပြီးမှပဲ အဲဒါကို ဆက်ကိုင်တွယ်ကြတာပေါ့”

“တကယ်လို့ ဇွန်ဘီဘုရင်သာ မရှိဘူးဆိုရင်တော့ အဲဒီမိန်းကလေးကို ဖမ်းဖို့ ဆက်လုပ်မယ် ဒါပေမဲ့ ရှိနေခဲ့မယ်ဆိုရင်တော့...”

ဝမ်လေ့သည် စကားကို ရပ်လိုက်ပြီး ခေါင်းဆောင်လီနှင့် ခေါင်းဆောင်ကျန်းတို့ကို မျက်နှာပျက်ပျက်ဖြင့် ကြည့်လိုက်သည်။

“ကျွန်တော် သဘောတူတယ် တကယ်လို့ ဇွန်ဘီဘုရင်သာ ရှိနေခဲ့ရင် အဲဒီမိန်းကလေးကို ဝင်ဖမ်းဖို့ ကြိုးစားတာက သူ့ကို သွားပြီး သတိပေးလိုက်သလို ဖြစ်သွားလိမ့်မယ်။ အဆိုးဆုံးကတော့ ကျွန်တော်တို့ တစ်ဖွဲ့လုံး အမြစ်ပြတ် ချေမှုန်းခံရနိုင်တယ်”

ခေါင်းဆောင်လီက လေးနက်သော အမူအရာဖြင့် ခေါင်းညိတ်ထောက်ခံလိုက်သည်။

“ကောင်းပြီလေ... အရင်ဆုံး ဒီဇွန်ဘီ ကားမောင်းတဲ့ကိစ္စက ဘာလဲဆိုတာ အရင်ကြည့်ကြတာပေါ့။ ဇွန်ဘီဘုရင် မဟုတ်ပါစေနဲ့လို့ပဲ ဆုတောင်းရမှာပဲ...”

ခေါင်းဆောင်ကျန်းကလည်း စိုးရိမ်တကြီးဖြင့် ပြောလိုက်သည်။

ကျန်းနန်မြို့ထဲတွင် ဇွန်ဘီဘုရင်တစ်ကောင် ရှိနေနိုင်သည်ဟူသော အသိကြောင့် အဖွဲ့ဝင်အားလုံး၏ စိတ်အာရုံများ တင်းမာသွားကြပြီး ပတ်ဝန်းကျင်တစ်ခုလုံး ခြောက်ခြားဖွယ်ရာ တိတ်ဆိတ်သွားတော့သည်။

“သိမ်းငှက်... ကုန်တင်ကားပေါ်မှာ ဘာတွေ တင်ထားသလဲဆိုတာ မင်းမြင်လိုက်ရလား”

ဝမ်လေ့က သိမ်းငှက် ဘက်သို့ လှည့်ကာ မေးမြန်းလိုက်သည်။ အကြောင်းမဲ့သက်သက် ဇွန်ဘီတစ်ကောင်က ကားအလွတ်ကြီးကို လျှောက်မောင်းနေစရာ အကြောင်းမရှိပေ။

ထိုအခါ သိမ်းငှက်သည် မျက်လုံးများကို ပြန်မှိတ်လိုက်ပြီး သိမ်းငှက်ကြီး၏ အမြင်အာရုံကို အသုံးချကာ အားကစားကွင်းဘက်သို့ အာရုံစိုက်ကြည့်လိုက်သည်။

“ဒါက... ဗီဇပြောင်းသားရဲတွေရဲ့ အလောင်းတွေပဲ။ ဒါပေမဲ့ အသားတုံးတွေဖြစ်အောင် သေသေချာချာ အပိုင်းပိုင်း ဖြတ်ထားကြတာဗျ။ ပြီးတော့... ဇွန်ဘီတွေက အဲဒီသားရဲအသားတွေကို လက်တွန်းလှည်းတွေနဲ့ တင်ပြီး ကျန်းနန်အားကစားကွင်းထဲကို သယ်သွားနေကြတယ်။ ဘာအတွက်လဲဆိုတာတော့ ကျွန်တော် မသိဘူး”

“ဗီဇပြောင်းသားရဲ အလောင်းတွေ ကားနဲ့သယ်ပြီး အားကစားကွင်းထဲ ပို့နေတယ်ဆိုတော့... ဒါ ဇွန်ဘီဘုရင် စားဖို့အတွက် ပို့ပေးနေတာများလား”

ဖြစ်နိုင်ခြေ အလွန်များနေပြီ။

ဝမ်လေ့သည် အလွန်အမင်း အံ့အားသင့်သွားပြီး အားကစားကွင်းမှာ ဇွန်ဘီဘုရင်၏ အမာခံစခန်း ဖြစ်မည်ဟု တွက်ဆလိုက်သည်။ ဤဗီဇပြောင်းသားရဲများကို ဇွန်ဘီဘုရင်၏ စေခိုင်းမှုဖြင့် ဇွန်ဘီများက မြို့ပြင်တွင် အမဲလိုက်ခဲ့ကြခြင်း ဖြစ်ပေလိမ့်မည်။ ယခုမူ ထိုအသားများကို ဇွန်ဘီဘုရင် စားသောက်ရန်အတွက် အားကစားကွင်းအတွင်းသို့ ကုန်တင်ကားဖြင့် ပြန်လည်သယ်ဆောင်လာခြင်း ဖြစ်ရမည်။

မှားစရာမရှိဘူး သေချာပေါက် ဒါပဲ ဖြစ်ရမယ်။

ဝမ်လေ့၏ မျက်လုံးများမှာ အရောင်တလက်လက် တောက်ပသွားပြီး သိမ်းငှက်ကို ထပ်မံ မေးမြန်းလိုက်သည်။

"သိမ်းငှက်... တခြား ဆင့်ကဲဇွန်ဘီတွေရဲ့ အရိပ်အယောင်ကိုရော သတိထားမိသေးလား အထူးသဖြင့် အားကစားကွင်း ပတ်ဝန်းကျင်မှာလေ"

"မတွေ့ဘူးဗျ အခုလောလောဆယ်တော့ ဒီတစ်ကောင်ပဲ ရှိနေပုံရတယ်"

သိမ်းငှက်သည် အသေအချာ စောင့်ကြည့်ပြီးနောက် ခေါင်းခါယမ်းလျက် ပြန်ဖြေလိုက်သည်။

မရှိဘူး ဟုတ်လား။

ဝမ်လေ့ မျက်မှောင်ကြုတ်သွားသည်။ ဇွန်ဘီဘုရင်တစ်ကောင်၏ လက်အောက်တွင် ဆင့်ကဲဇွန်ဘီ တစ်ကောင်တည်းသာ ရှိနေသည်ဆိုသည်မှာ လုံးဝ မဖြစ်နိုင်ပေ။ ကျန်းနန်မြို့ပြခရိုင် တစ်ခုလုံးရှိ ဆင့်ကဲဇွန်ဘီများ ပျောက်ကွယ်နေခြင်းကို ကြည့်လျှင် ၎င်းတို့ကို ဇွန်ဘီဘုရင်က တစ်နေရာရာသို့ စုစည်းခေါ်ယူထားခြင်း ဖြစ်ရမည်။ တစ်ကောင်မှ မရှိဘဲ နေမည်မဟုတ်ပေ။

"သိမ်းငှက်... ကားမောင်းနေတဲ့ ဇွန်ဘီကို မျက်ခြေမပြတ်အောင် စောင့်ကြည့်ထားပါ။ အဲဒီကုန်တင်ကားကို ဘယ်အထိ မောင်းသွားမလဲဆိုတာ ငါသိချင်တယ်"

ဝမ်လေ့က အေးစက်သော အကြည့်ဖြင့် ညွှန်ကြားလိုက်သည်။

ဤဆင့်ကဲဇွန်ဘီသည် ဇွန်ဘီဘုရင်၏ တိုက်ရိုက်ထိန်းချုပ်မှုအောက်တွင် ရှိနေခြင်းဖြစ်ရမည်။ အကယ်၍ ဤဇွန်ဘီကိုသာ မျက်ခြေမပြတ် လိုက်ကြည့်နိုင်လျှင် အခြားသော ဆင့်ကဲဇွန်ဘီများ မည်သည့်နေရာတွင် ပုန်းအောင်းနေကြသည်ကို ရှာဖွေတွေ့ရှိနိုင်မည်ဟု ဝမ်လေ့ အခိုင်အမာ ယုံကြည်နေသည်။

မိမိကိုယ်ကိုသိပြီး ရန်သူကိုလည်း သိပါက တိုက်ပွဲတိုင်းတွင် အောင်နိုင်လိမ့်မည်။

ဤအရာသည် ထိတ်လန့်ဖွယ်ကောင်းလှသော ဇွန်ဘီဘုရင် ဖြစ်နေသောကြောင့် အကယ်၍ ၎င်းသာ ဇွန်ဘီလှိုင်းလုံးကြီးကို အောင်မြင်စွာ ဖန်တီးနိုင်ခဲ့ပါက ကျန်းဟိုင်အခြေစိုက်စခန်း တစ်ခုလုံးပင် မျက်တောင်တစ်ခတ်အတွင်း ပြာကျသွားနိုင်သည်။ ထို့ကြောင့် စစ်ဆင်ရေးကို ကောင်းမွန်စွာ ဆောင်ရွက်နိုင်ရန် ဇွန်ဘီဘုရင်၏ လက်အောက်တွင် ဆင့်ကဲဇွန်ဘီ မည်မျှရှိသည်ကို ဝမ်လေ့ သေချာပေါက် သိရှိရပေမည်။

"ဟုတ်ကဲ့ပါ ရန်သူကို သေချာပေါက် မျက်ခြေမပြတ် စောင့်ကြည့်နေပါ့မယ်"

သိမ်းငှက်က ပြန်လည်ဖြေကြားပြီး ဇွန်ဘီရုပ်သေး၏ လှုပ်ရှားမှုတိုင်းကို အာရုံစိုက်ကာ စောင့်ကြည့်နေတော့သည်။

ဘေးနားရှိ အဖွဲ့ခေါင်းဆောင်နှစ်ဦးမှာမူ ဝမ်လေ့ အမိန့်ပေးနေသည်ကို တိတ်ဆိတ်စွာ ကြည့်နေကြသည်။ စောစောကပင် ဤစစ်ဆင်ရေးကို ဝမ်လေ့က ဦးဆောင်ရန် သဘောတူထားပြီး ဖြစ်သဖြင့် သူတို့မှာ အမိန့်ကို လိုက်နာရန်သာ လိုတော့သည်။

ကျန်းနန်မြို့ပြခရိုင်အတွင်း၌ လုချွမ်းသည် ဇွန်ဘီရုပ်သေးကို စေခိုင်း၍ လက်တွန်းလှည်းဖြင့် ဗီဇပြောင်းအသားများကို အားကစားကွင်းအတွင်းသို့ သယ်ယူကာ ဇွန်ဘီအုပ်ကို ကျွေးမွေးနေသည်။

ခဏအကြာ ကျွေးမွေးပြီးသွားသောအခါ လုချွမ်းသည် ကုန်တင်ကားကို မောင်းနှင်၍ ခြံဝင်းဆီသို့ အမြန်ဆုံး ပြန်လာခဲ့သည်။ သူ၏ ကုန်တင်ကား အထက်တွင် အနက်ရောင် အရိပ်တစ်ခုက ထပ်ကြပ်မကွာ လိုက်ပါနေသည်ကိုမူ သူ လုံးဝ သတိမပြုမိသေးချေ။