လျှပ်စီးလက်စေနိုင်သော မက်မွန်ပွင့်မျက်ဝန်း၊ ခင်ပွန်းသည်စကားကို နားထောင်ခြင်း(၁)။

"ရွှမ်ဟွမ်ဂိုဏ်း ဟုတ်လား… နာမည်ကောင်းလေးပဲ…"

"ရွှမ်ဟွမ်ဆိုတာ ကောင်းကင်နဲ့မြေကြီးရဲ့ ရောယှက်မှုပဲ… ကောင်းကင်က ရွှမ်၊ မြေကြီးက ဟွမ်…"

"ရွှမ်က ကောင်းကင်ကို ကိုယ်စားပြုပြီး မြင့်မားနက်ရှိုင်းတယ်…"

"ဟွမ်က မြေကြီးကို ကိုယ်စားပြုပြီး မြေကမ္ဘာရဲ့ နက်ရှိုင်းမှုကို ဖော်ဆောင်တယ်…"

"ရွှမ်ဟွမ်ဆိုတဲ့ စကားလုံးနှစ်လုံးက ကောင်းကင်နဲ့မြေကြီး ဖြစ်သလို၊ တာအိုလမ်းစဉ်လည်း ဖြစ်တယ်…"

"ယောက်ျားရဲ့ တာအိုအသိပညာက တကယ့်ကို နက်ရှိုင်းတာပဲ…"

ချူတျဲယီသည် ကျိုးစွေ့ကို အားကျသောအကြည့်ဖြင့် ကြည့်လိုက်လေသည်။

ရိုးရှင်းသော ဂိုဏ်းအမည်လေးတစ်ခု ဖြစ်သော်လည်း တာအိုကျင့်ကြံခြင်း၏ နက်နဲသော လျှို့ဝှက်ချက်များ ပါဝင်နေပြီး၊ ကျင့်ကြံသူများ၏ တစ်ဘဝတာ ရည်မှန်းချက်နှင့် တာအိုလမ်းစဉ်၏ သရုပ်သကန်ကို ကိုယ်စားပြုနေပေသည်။

ဥပမာအားဖြင့် ဝူကျိမဟာမိတ်အဖွဲ့၊ ကောင်းကင်ဓားဂိုဏ်း၊ မြူနှင်းနန်းတော် စသည်တို့ ဖြစ်ကြသည်။ ဤဂိုဏ်းအမည်များသည် များသောအားဖြင့် သူတို့ကျင့်ကြံသော ကျင့်စဉ်များနှင့် ရည်မှန်းချက်များနှင့် ကြီးမားသော ဆက်နွယ်မှု ရှိစမြဲ ဖြစ်သည်။

"အဲ…"

"အဟွတ်… မှန်တယ်… ကိုယ်လည်း အဲ့ဒီလို တွေးမိတာပါ…"

"တျဲယီက ကိုယ့်ကို အနားလည်ဆုံး ဖြစ်လိမ့်မယ်လို့ မထင်ထားမိဘူး…"

ဤစကားကို ကြားသောအခါ ကျိုးစွေ့ ချောင်းဟန့်လိုက်ပြီး ဟိတ်ဟန်ထုတ်ကာ ပြောလိုက်သည်။

"ကောင်းပါပြီ… ဒီနေ့ကစပြီး ကျွန်မတို့က ရွှမ်ဟွမ်ဂိုဏ်း ဖြစ်သွားပြီ…"

"အင်မော်တယ်ရှားဂိုဏ်း၊ ချင်မုဂိုဏ်း၊ တန်တိန်ဂိုဏ်းဆိုတာ မရှိတော့ဘူး…"

"အင်မော်တယ်ရှားတောင်ထွတ်၊ ချင်မုတောင်ထွတ်နဲ့ တန်တိန်တောင်ထွတ်ဆိုပြီး မျိုးဆက်သုံးခုပဲ ရှိတော့မယ်…"

လင်းယာကျူက ချက်ချင်း ပြောလိုက်ပြီး ဤကိစ္စကို အတည်ပြု ဆုံးဖြတ်လိုက်သည်။

သူမသည် မူလဂိုဏ်းများကို လုံးဝ ဖျက်သိမ်းပြီး ရွှမ်ဟွမ်ဂိုဏ်း၏ တောင်ထွတ်သုံးခုအဖြစ် ပြောင်းလဲရန် ရည်ရွယ်ထားခြင်း ဖြစ်သည်။

မျိုးဆက်တစ်ခုစီသည် အထွတ်အထိပ် အမွေအနှစ်တစ်ခုကို ကိုယ်စားပြုပေလိမ့်မည်။

"ယောက်ျား… ဒီလိုဆိုရင် အင်မော်တယ်ရှားမြို့တော်ကို ရွှမ်ဟွမ်မြို့တော်လို့ ပြောင်းဖို့ လိုမလား…"

"ဒီတောင်ကိုလည်း ရွှမ်ဟွမ်တောင်ထွတ်လို့ ပြောင်းလိုက်ရမလား…"

လန်ယွဲ့ရှီက စူးစမ်းလိုစိတ်ဖြင့် မေးလိုက်သည်။

မည်သို့ပင်ဆိုစေ ဂိုဏ်းအမည် ပြောင်းလဲလိုက်သည်နှင့်တပြိုင်နက် တရားဝင်ဖြစ်မှု ရရှိစေရန် နေရာဒေသ အသီးသီး၏ အမည်နာမများကိုလည်း ပြောင်းလဲရန် လိုအပ်ပေသည်။

"မလိုပါဘူး…"

"အနာဂတ်မှာ ငါတို့ ပိုကောင်းတဲ့နေရာ၊ ပိုကောင်းတဲ့ ကျွန်းတစ်ကျွန်းကို ရှာတွေ့နိုင်ကောင်း ရှာတွေ့နိုင်မှာပါ…"

ကျိုးစွေ့ အနည်းငယ် ပြုံးလိုက်သည်။

သူသည် ကြယ်သုံးပွင့်ကျွန်းစုကို ရွှမ်ဟွမ်ဂိုဏ်း၏ အနာဂတ်ဌာနချုပ်အဖြစ် သတ်မှတ်ထားခြင်း မရှိပေ။

အနာဂတ် ရွှမ်ဟွမ်ဂိုဏ်း၏ ဌာနချုပ်ကို သူ စောစီးစွာကပင် ဆုံးဖြတ်ထားပြီး ဖြစ်သည်။ ၎င်းမှာ ကုယုံဂိုဏ်း၏ နေရာဟောင်းပင် ဖြစ်၏။

အဘယ်ကြောင့်ဆိုသော် ထိုနေရာတွင် ပဉ္စမအဆင့် ဝိညာဉ်သွေးကြော ရှိသောကြောင့် ဖြစ်သည်။

အနာဂတ်တွင် နတ်ဘုရားအသွင်ပြောင်းအဆင့်ကို တက်လှမ်းလိုလျှင် ပဉ္စမအဆင့် ဝိညာဉ်သွေးကြော၏ အထောက်အပံ့ လိုအပ်ပေသည်။

ကြယ်သုံးပွင့်ကျွန်းစုသည် မဆိုးလှသော်လည်း စတုတ္ထအဆင့် ထိပ်တန်း ဝိညာဉ်သွေးကြောသာ ရှိသည်။

ပဉ္စမအဆင့် ဝိညာဉ်သွေးကြောနှင့် နှိုင်းယှဉ်လျှင် ကွာခြားချက်မှာ အလွန် ကြီးမားလှသည်။

ထို့ကြောင့် သူသည် အနှေးနှင့်အမြန် ဂိုဏ်းကို ကုယုံဂိုဏ်း၏ နတ်ဘုရားအသွင်ပြောင်းအဆင့် အပျက်အစီးနယ်မြေထဲသို့ ပြောင်းရွှေ့မည် ဖြစ်သည်။

ကြယ်သုံးပွင့်ကျွန်းစုသည် ကြားကာလ နေထိုင်ရာ နေရာတစ်ခုသာ ဖြစ်သည်။

မှန်ပေသည်၊ ယခုအချိန်တွင် ဤကိစ္စကို ထုတ်ဖော်၍ မရနိုင်သေးပေ။

ကမ္ဘာလောကကို ဖိနှိပ်လွှမ်းမိုးနိုင်လောက်သည့် အင်အားရှိလာမည့် အချိန်ကျမှသာ ကြေညာလိုက်ခြင်းကလည်း နောက်မကျသေးချေ။

"ပိုကောင်းတဲ့ ကျွန်းတစ်ကျွန်း ဟုတ်လား…"

ကျိပင်းယွီနှင့် အခြားသူများသည် သူမတို့၏ ယောက်ျားကို အလွန်တရာ စူးစမ်းလိုစိတ်ဖြင့် ကြည့်လိုက်ကြသည်။

ကြယ်သုံးပွင့်ကျွန်းစု၏ စတုတ္ထအဆင့် ထိပ်တန်း ဝိညာဉ်သွေးကြောသည် လုံလောက်အောင် ကောင်းမွန်နေပြီဟု သူမတို့ ထင်မြင်ကြသည်။ ဤနေရာထက် ပိုကောင်းသည်ဆိုပါက ပဉ္စမအဆင့် ဝိညာဉ်သွေးကြော ဖြစ်နေမည် မဟုတ်ပါလော။

သူမတို့၏ စိတ်ထဲတွင် သံသယများ ဖြစ်ပေါ်နေမိတော့သည်။

သို့သော် ယောက်ျား ပြောသည့်စကား ဖြစ်သောကြောင့် ဘာမှ ပြောစရာ မလိုတော့ပေ။ သေချာပေါက် မှန်ကန်ပေလိမ့်မည်။

ယောက်ျားစကား နားထောင်ခြင်းသည် ဇနီးသည်၏ တာဝန်ဝတ္တရားပင်။

"ဒီလိုဆိုရင် အတူတူ အောင်ပွဲခံကြရအောင်…"

ကျိုးစွေ့သည် သူ၏ တာအိုလက်တွဲဖော်များ၏ ဆွဲဆောင်မှုရှိသော ခန္ဓာကိုယ်များကို ကြည့်လိုက်ပြီး၊ မက်မွန်ပွင့်မျက်ဝန်းများမှ အဆုံးမဲ့ညှို့ဓာတ်များကို ထုတ်လွှတ်လိုက်လေသည်။

သူ့စိတ်ထဲတွင် လှုပ်ရှားတက်ကြွလာသည်ကို ခံစားလိုက်ရသည်။

"အို..."

ချူတျဲယီ၊ လင်းယာကျူ၊ လန်ယွဲ့ရှီ၊ ရှန်ပိချန် စသည့် တာအိုလက်တွဲဖော်များ၏ ခန္ဓာကိုယ်များ တုန်ခါသွားကြသည်။ သူမတို့၏ ယောက်ျား မျက်ဝန်းများသည် အဆုံးမဲ့ ဆွဲဆောင်မှုများဖြင့် ပြည့်နှက်နေပြီး သူမတို့ကို ကြည့်လိုက်သောအခါ လျှပ်စီးကြောင်းများ ခန္ဓာကိုယ်ထဲသို့ ဝင်ရောက်လာသကဲ့သို့ ခံစားလိုက်ရသည်။

ရိုးရှင်းစွာပင် ရုန်းထွက်၍ မရနိုင်တော့ချေ။

'ဒီယောက်ျားရဲ့ မျက်လုံးတွေက ဘယ်လိုလုပ် လျှပ်စီးလက်စေနိုင်ရတာလဲ'

အားလုံး၏ မျက်နှာများ နီရဲသွားကြပြီး ဆွဲဆောင်မှုရှိသော ခန္ဓာကိုယ်များကို ယိမ်းနွဲ့လျက် ရေပူစမ်းဆီသို့ လျှောက်လှမ်းသွားကြတော့သည်။

ကျိုးစွေ့ ပျိုးထောင်ထားသော ဤမက်မွန်ပွင့်မျက်ဝန်းများသည် အဆုံးမဲ့နက်နဲမှုများ ပါဝင်နေပြီး အမျိုးသမီးကျင့်ကြံသူများအပေါ် သက်ရောက်မှု အလွန် ကြီးမားသည်ဟုသာ ဆိုရပေမည်။

မကြာမီ ရေပူစမ်းထဲတွင် စည်းချက်ကျသော တေးသံသာများ ပျံ့လွင့်လာတော့သည်။

…………

မကြာမီအချိန်အတွင်း ရွှမ်ဟွမ်ဂိုဏ်း တည်ထောင်လိုက်သည့်သတင်းသည် အင်မော်တယ်ရှားဂိုဏ်း၊ ချင်မုဂိုဏ်းနှင့် တန်တိန်ဂိုဏ်းဟူသော ဂိုဏ်းသုံးဂိုဏ်းလုံးသို့ ပျံ့နှံ့သွားခဲ့သည်။

ချက်ချင်းပင် ကျင့်ကြံသူအများအပြား တုန်လှုပ်သွားကြပြီး ပါးစပ်အဟောင်းသားဖြင့် မယုံနိုင်အောင် ဖြစ်သွားကြရသည်။

"မဖြစ်နိုင်တာ… ငါတို့ ဂိုဏ်းကြီးသုံးဂိုဏ်းက ပေါင်းစည်းလိုက်ကြတာလား… ဒီနေ့ကစပြီး အင်မော်တယ်ရှားဂိုဏ်း၊ ချင်မုဂိုဏ်း၊ တန်တိန်ဂိုဏ်းဆိုတာ မရှိတော့ဘူးပေါ့… ရှိတာက ရွှမ်ဟွမ်ဂိုဏ်း တစ်ခုတည်းပဲ… တပည့်အားလုံးက ရွှမ်ဟွမ်ဂိုဏ်းသားအဖြစ် ခံယူကြရတော့မယ်…"

လူတစ်ယောက်က တံတွေးမြိုချလိုက်မိသည်။

ဤသတင်းကို ကြားသောအခါ သူ၏ နားကိုပင် မယုံနိုင်လောက်အောင် ဖြစ်နေရသည်။

"သေချာပေါက် အဲ့ဒီ ရုပ်ချောကောင် အကြံပေးလိုက်တာ နေမှာ…"

"သူက ငါတို့ ဂိုဏ်းသုံးဂိုဏ်းလုံးကို ဝါးမြိုချင်နေတဲ့ အကြံဆိုးရှိမှန်း ငါ အစကတည်းက သိသားပဲ…"

"အခုမှ သူ့သရုပ်မှန် ပေါ်လာတော့တာကိုး…"

ချင်မုဂိုဏ်းမှ အကြီးအကဲတစ်ဦးက အံကြိတ်လိုက်ပြီး မကျေမနပ် ဖြစ်နေလေသည်။

အဘယ်ကြောင့်ဆိုသော် ဤသို့ လုပ်ဆောင်ခြင်းသည် မူလမျိုးဆက် အမွေအနှစ်ကို စွန့်လွှတ်လိုက်ခြင်းနှင့် တူညီသောကြောင့် ဖြစ်သည်။

ချင်မုဂိုဏ်းသားအဖြစ် ခံယူထားသော သူတို့အနေဖြင့် ချင်မုဂိုဏ်း၏ ဘိုးဘေးများကို မည်သို့ မျက်နှာပြရပါမည်နည်း။

"အဲ့ဒါ ဘာဖြစ်လဲ… အခြေအနေကို နားလည်သူကမှ သူရဲကောင်းပဲ…"

"အခု အကြီးအကဲကျိုး… ဟင့်အင်း… မဟုတ်သေးဘူး… ဂိုဏ်းချုပ်ကျိုးက ဝိညာဉ်သန္ဓေသား ကျင့်ကြံသူ ဖြစ်နေပြီလေ…"

"ငါတို့က အခြေတည်အဆင့် ကျင့်ကြံသူလေးတွေပဲ ရှိသေးတာ… ဝိညာဉ်သန္ဓေသား ဘိုးဘေးတစ်ယောက်ကို ဘယ်လို ယှဉ်နိုင်မှာလဲ…"

"ဒါက ကျင့်ကြံခြင်းလောကရဲ့ လက်တွေ့ဘဝပဲလေ… အားနည်းသူက အားကြီးသူရဲ့ သားကောင်ဖြစ်ရစမြဲ… အားကြီးသူကသာ အရှင်သခင်ပဲ…"

လူတစ်ယောက်က သက်ပြင်းချလိုက်ပြီး သူတို့ ဘာမှမတတ်နိုင်သလို၊ ပြောင်းလဲ၍လည်း မရနိုင်ကြောင်း ခံစားလိုက်ရသည်။

အဘယ်ကြောင့်ဆိုသော် ဤသည်မှာ ကျင့်ကြံခြင်းလောက၏ ရက်စက်သော အမှန်တရား ဖြစ်သောကြောင့်ပင်။

အကယ်၍ လုံလောက်သော အင်အားမရှိပါက ဂိုဏ်းအမွေအနှစ်ကို ကာကွယ်လိုလျှင်ပင် မဖြစ်နိုင်ချေ။

"ပြောတာ မှန်တယ်… ပြီးတော့ ဒီကိစ္စကို ဂိုဏ်းချုပ်လင်းကလည်း သဘောတူလိုက်ပြီဆိုတော့ ငါတို့က ဘာပြောနိုင်ဦးမှာလဲ…"

"ဒါက ဝိညာဉ်သန္ဓေသား ဘိုးဘေးရဲ့ ဆုံးဖြတ်ချက်ပဲ… ငါတို့ လုပ်နိုင်တာက နာခံဖို့ပဲ ရှိတယ်…"

"ဟုတ်တယ် ဟုတ်တယ်… အမှန်အတိုင်း ပြောရရင် ငါကတော့ ဒါက ကိစ္စကြီးလို့ မထင်ဘူး… အမည်ခံအနေနဲ့ ဂိုဏ်းတစ်ခုတည်း ဖြစ်သွားပေမယ့် လက်တွေ့မှာတော့ မျိုးဆက်သုံးခု ခွဲထားတုန်းပဲလေ… ကိုယ့်တာဝန် ကိုယ်ယူကြတာပဲ…"

"ပြီးတော့ ဒီလိုလုပ်တာကလည်း ကောင်းတယ်လို့ ငါ ထင်တယ်… ငါတို့က ဝိညာဉ်သန္ဓေသားအဆင့် အင်အားစုတစ်ခုဆီ ဝင်လိုက်ရတာနဲ့ အတူတူပဲလေ…"

"ဂိုဏ်းချုပ်ကျိုးက အနာဂတ် အရမ်းကောင်းတာ… အသက်တစ်ရာမှာ ဝိညာဉ်သန္ဓေသား ဖွဲ့စည်းနိုင်တယ်ဆိုတာ ကောင်းကင်ဘုံက ချီးမြှောက်တဲ့ ပါရမီရှင်ပဲ… ချန်လန်ပင်လယ်ဒေသ တစ်ခုလုံးကို ကြည့်လိုက်ရင်တောင် ပါရမီရှင်တွေထဲက ပါရမီရှင်ပဲ… အနာဂတ်မှာ နတ်ဘုရားအသွင်ပြောင်းအဆင့် ဖြစ်လာမယ့် မျှော်လင့်ချက်တောင် ရှိသေးတယ်…"

"နတ်ဘုရားအသွင်ပြောင်းအဆင့် မဖြစ်ရင်တောင်မှ ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူ ဖြစ်လာဖို့က သေချာသလောက်ပဲ… အနည်းဆုံးတော့ ဂိုဏ်းချုပ်ကျိုးက နှစ်တစ်ထောင်ကျော် အသက်ရှင်နိုင်ဦးမှာဆိုတော့ ဂိုဏ်းကို နှစ်ထောင်ချီ ကာကွယ်ပေးနိုင်မှာ…"

"တကယ်လို့ နတ်ဘုရားအသွင်ပြောင်းအဆင့် ဖြစ်လာခဲ့ရင် ငါတို့ ရွှမ်ဟွမ်ဂိုဏ်းက နတ်ဘုရားအသွင်ပြောင်းအဆင့် ဂိုဏ်းဖြစ်လာမှာ… ဒါက ရှေးဘိုးဘေးတွေတောင် စိတ်ကူးမယဉ်ရဲခဲ့တဲ့ ကိစ္စပဲ… ဘိုးဘေးတွေ သိရင်တောင် ငါတို့ကို အပြစ်တင်ကြမှာ မဟုတ်ဘူး…"

"အပြစ်တင်ရမလားကွ… တကယ်လို့ သူတို့သာ နတ်ဘုရားအသွင်ပြောင်းအဆင့် ဂိုဏ်းကို ဝင်ခွင့်ရမယ်ဆိုရင် ချက်ချင်း ဂိုဏ်းပြောင်းသွားကြမှာ သေချာတယ်… အရင်ခေတ်တုန်းက သူတို့မှာ အခွင့်အရေး မရှိခဲ့လို့သာ…"

"ဒီလိုဆိုရင် လူတိုင်းက ကန့်ကွက်တဲ့သဘောထား သိပ်မရှိကြဘူးပေါ့…"

"မေးနေစရာ လိုသေးလား… ဘယ်လိုလုပ် ကန့်ကွက်နိုင်မှာလဲ… သစ္စာဖောက်ပြီး ကြယ်သုံးပွင့်ကျွန်းစုကနေ ထွက်သွားကြမလို့လား… တကယ်လို့ ထွက်သွားရင် ပင်လယ်ပြင်ထဲ ရောက်တာနဲ့ ချက်ချင်း သေသွားကြမှာ… ဝိညာဉ်သန္ဓေသား ဘိုးဘေးရဲ့ ကာကွယ်မှု မရှိဘဲနဲ့ ငါတို့ တကယ် ဘေးကင်းမယ် ထင်နေလား…"

ကျင့်ကြံသူအများအပြား ဆွေးနွေးငြင်းခုံနေကြသည်။

အစပိုင်းတွင် သူတို့သည် ဤဆုံးဖြတ်ချက်ကို မကျေနပ်ကြဘဲ ရွှမ်ဟွမ်ဂိုဏ်းအဖြစ် မပူးပေါင်းသင့်ဟု ထင်မြင်ခဲ့ကြသော်လည်း၊ လက်မ က ခြေသလုံးကို မနိုင်နိုင်သကဲ့သို့ နောက်ဆုံးတွင် သူတို့သည် ဤဆုံးဖြတ်ချက်ကို လက်ခံလိုက်ကြရသည်။

မည်သို့ပင်ဆိုစေ ဤသည်မှာ ဝိညာဉ်သန္ဓေသား ဘိုးဘေး၏ ဆုံးဖြတ်ချက် ဖြစ်သည်။

ဝိညာဉ်သန္ဓေသား ဘိုးဘေးဆိုသည်မှာ ဧကရာဇ်မင်းတစ်ပါးနှင့် တူညီပြီး နှုတ်က ထွက်သည်နှင့် အမိန့် ဖြစ်ပေသည်။

သူတို့ကဲ့သို့သော အခြေတည်အဆင့် အကြီးအကဲများအနေဖြင့် ကန့်ကွက်ခွင့် မရှိပေ။