နတ်ဘုရားအမြုတေ

"စီနီယာအစ်မစု ... ကောင်းကင်ဆေးပညာမဟာညီလာခံက ဘယ်တော့ ကျင်းပမှာလဲ" လီချန် စူးစမ်းစွာ မေးလိုက်သည်။

"အဲဒါတော့ မသိဘူး။ ဒီတစ်ခေါက် ကောင်းကင်နန်းတော်က နတ်ဘုရားကမ္ဘာ (ရှင်းကျဲ့) နဲ့ စစ်တိုက်တော့မှာဆိုတော့၊ ညီလာခံကို ရွှေ့ဆိုင်းမှာ သေချာတယ်။ အနည်းဆုံး နှစ် ၁၀၀ လောက်တော့ ကြာလိမ့်မယ်" စီနီယာအစ်မစု ခေါင်းခါပြီး ပြောလိုက်သည်။

အချိန်အများကြီး လိုသေးတယ် ဆိုပေမဲ့၊ သူမအတွက်တော့ အချိန်က ကြပ်တည်းနေတုန်းပဲ။ ဘာလို့လဲဆိုတော့ သူမက စည်းမျဉ်းနတ်ဆေးလုံးဖော်စပ်တဲ့အဆင့်မှာ တစ်ဆို့နေတုန်းလေ။

စည်းမျဉ်းနတ်ဆေးလုံးကို မဖော်စပ်နိုင်ရင်၊ ကောင်းကင်ဆေးပညာမဟာညီလာခံမှာ ထိပ်တန်း ၃ နေရာ ဝင်ဖို့ဆိုတာ လုံးဝ မဖြစ်နိုင်ဘူး။

ညီလာခံတိုင်းမှာ စည်းမျဉ်းနတ်ဆေးလုံး ဖော်စပ်နိုင်တဲ့ အဂ္ဂိရတ်ဆရာတွေ ပါဝင်လာစမြဲလေ။

စည်းမျဉ်းနတ်ဆေးလုံး ဖော်စပ်နိုင်ခြင်းက ကြီးမားတဲ့ အဆင့်အတန်းခွဲခြားမှုတစ်ခုပဲ။

ဒီအဆင့်ကို ကျော်ဖြတ်နိုင်လိုက်တာနဲ့ နာမည်ကျော်ကြားလာပြီး ထိပ်တန်း အဂ္ဂိရတ်ဆရာ စာရင်းဝင်သွားပြီ။

ထိုက်ရွှီဂိုဏ်းရဲ့ ယွင်တန်နန်းတော်ဆိုတာ တောင်ဘက်ကျွန်းဆွယ်တိုက်မှာ ထိပ်တန်း ဆေးပညာနန်းတော်တစ်ခုဖြစ်ပေမဲ့၊ ဒီအဆင့်ရှိတဲ့ အဂ္ဂိရတ်ဆရာ ၁၀ ယောက်ကျော်ပဲ ရှိတာ။

ပြီးတော့ အဲဒီအဂ္ဂိရတ်ဆရာ အများစုက အချိန်အကြာကြီး ယူပြီးမှ ဒီအဆင့် ရောက်လာကြတာ။

သူမကတော့ အချိန်စောင့်လို့ မရတော့ဘူး။

ဘာလို့လဲဆိုတော့ ကောင်းကင်ဆေးပညာမဟာညီလာခံမှာ အသက်ကန့်သတ်ချက် ရှိတယ်။ အသက် ဟွေ့ယွမ်တစ်ခုထက် ကျော်လွန်လို့ မရဘူး။ ကျော်ရင် ဝင်ပြိုင်ခွင့် မရှိတော့ဘူး။

သူမ အသက်က ဟွေ့ယွမ်တစ်ခု ပြည့်ဖို့ နှစ်ပေါင်း တစ်သောင်းအောက်ပဲ လိုတော့တာ။

ပြဿနာက ညီလာခံက ဟွေ့ယွမ်တစ်ခုမှ တစ်ကြိမ်ပဲ ကျင်းပတာ။

"စီနီယာအစ်မစု... ခင်ဗျား တကယ်ပဲ သံသရာနတ်ဆေးလုံး ဆေးဖော်နည်းကို ဒီလောက် လိုချင်နေတာလား" လီချန် မေးလိုက်သည်။

"အင်း" စီနီယာအစ်မစု ခေါင်းညိတ်လိုက်သည်။

"ဒါဆိုရင်... ကျွန်တော်တို့ နက်ရှိုင်းသောဆေးပညာဆွေးနွေးဖလှယ်မှု တစ်ကြိမ်လောက် လုပ်ကြမလား" လီချန် စဉ်းစားပြီး ပြောလိုက်သည်။

နက်ရှိုင်းသောဆေးပညာဆွေးနွေးဖလှယ်မှုဆိုတာ ပုံမှန်အားဖြင့် ဆေးပညာတာအိုအဖော်တွေမှ လုပ်လေ့ရှိတာ။ နှစ်ဖက်စလုံးရဲ့ အသိစိတ်တွေ တိုက်ရိုက်ချိတ်ဆက်ပြီး ဆေးပညာ ဗဟုသုတတွေကို အပြန်အလှန် ဖလှယ်ကြတာဖြစ်ပြီး၊ ဆေးပညာ နားလည်သဘောပေါက်မှုအပိုင်းမှာ အံ့မခန်း အကျိုးရှိစေတယ်။

"ရှင်..." စီနီယာအစ်မစု ကြောင်သွားသည်။ "ရှင် သဘောမတူဘူး ဆို"

"စီနီယာအစ်မစု... ကျွန်တော် တောင်ဘက်ကျွန်းဆွယ်တိုက်ကို ရောက်လာကတည်းက၊ ခင်ဗျားသာမရှိရင် ဒီလောက်မြန်မြန် အခြေကျဖို့ မလွယ်ဘူး။ ဒီတစ်ခေါက်တော့ ခင်ဗျားရဲ့ကျေးဇူးကို ပြန်ဆပ်တယ် သဘောထားလိုက်ပါ" လီချန် ခေါင်းခါပြီး ပြောလိုက်သည်။

"ဟူး... ရှင်သာ ကျွန်မရဲ့ တာအိုအဖော်ဖြစ်ရင် သိပ်ကောင်းမှာပဲ။ ရှင့်ရဲ့ တာအိုအဖော်က ဘယ်လောက်တောင် ကံကောင်းလိုက်လဲမသိဘူး..." စီနီယာအစ်မစု သက်ပြင်းချလိုက်သည်။

လီချန် နဲ့ ပေါင်းသင်းရတာ သူမအတွက် သက်သောင့်သက်သာရှိတယ်။ ဝမ်းနည်းစရာက သူမဘက်က စိတ်ရှိပေမဲ့ တစ်ဖက်လူက စိတ်မဝင်စားဘူး ဖြစ်နေတယ်။

လီချန်ကတော့ ပြုံးရုံသာ ပြုံးလိုက်သည်။

.....

လဝက်ခန့် ကြာပြီးနောက်၊ လီချန် စီနီယာအစ်မစုရဲ့လှိုဏ်ဂူမှ ထွက်ခွာလာခဲ့သည်။

တစ်နှစ်အကြာတွင် စီနီယာအစ်မစုဆီမှ သတင်းစကား ရောက်လာသည်။ သူမ စည်းမျဉ်းနတ်ဆေးလုံးကို အောင်မြင်စွာ ဖော်စပ်နိုင်ခဲ့ပြီတဲ့။

နောက်ထပ် နှစ်အနည်းငယ်ကြာပြီးနောက်၊ ယွင်တန်နန်းတော်က အဂ္ဂိရတ်ဆရာ အားလုံးကို ခေါ်ယူပြီး စီနီယာအစ်မစုကို ယွင်တန်နန်းတော် အကြီးအကဲအဖြစ် ရာထူးတိုးမြှင့်ကြောင်း ကြေညာလိုက်သည်။

ဒီသတင်းက ဂယက်အကြီးကြီး ဖြစ်သွားစေသည်။

အသက် ဟွေ့ယွမ်တစ်ခု မပြည့်သေးဘဲ ထိပ်တန်း အဂ္ဂိရတ်ဆရာဖြစ်လာတယ်ဆိုတာ၊ တောင်ဘက်ကျွန်းဆွယ်တိုက် တစ်ခုလုံးတင် မကဘူး၊ ကောင်းကင်နန်းတော် လက်အောက်ခံ နယ်မြေအားလုံးမှာ ရှားပါးတဲ့ ထိပ်တန်း ပါရမီရှင် စာရင်းဝင်သွားပြီ။

....

နောက်ထပ် နှစ်အနည်းငယ်ကြာပြီးနောက်၊ ကောင်းကင်နန်းတော်က နတ်ဘုရားကမ္ဘာ (ရှင်းကျဲ့)နဲ့ စစ်တိုက်ပြီဆိုတဲ့သတင်း ရောက်လာသည်။

လီချန်တို့လို အဂ္ဂိရတ်ဆရာတွေက ကောင်းကင်စစ်သည်တော်အဖြစ် စစ်တိုက်စရာမလိုပေမဲ့၊ ဆေးဖော်ရမယ့် တာဝန်တွေတော့ရှိတယ်။

ဒီစစ်ပွဲက နှစ်ပေါင်း ၁၀၀ ကျော် ကြာမြင့်ခဲ့သည်။

လီချန်လည်း တိုက်ပွဲဝင်ဆေးလုံး ဖော်စပ်တဲ့ တာဝန်တွေ ဆက်တိုက်ယူခဲ့ရသည်။ တိုက်ပွဲဝင်ဆေးလုံး လိုအပ်ချက် ပမာဏကို ကြည့်ရင် ကောင်းကင်နန်းတော်နဲ့ နတ်ဘုရားကမ္ဘာ (ရှင်းကျဲ့) တို့ရဲ့စစ်ပွဲ ဘယ်လောက်ပြင်းထန်လဲ ခန့်မှန်းလို့ရတယ်။

သေချာတာကတော့ လီချန်က ဒီတာဝန်တွေကနေ အမြတ်တွေ အများကြီး ထုတ်ယူခဲ့တယ်။

ဒီနှစ်တွေအတွင်း သူ နတ်ဘုရားပျက်စီးနယ်မြေထဲ ဝင်ပြီး နတ်သားရဲ၊ ကွေ့ရှန်းတွေ လိုက်သတ်စရာတောင် မလိုတော့ဘူး။

ဆေးဖော်ရင်းနဲ့ ရလာတဲ့ အမြတ်တွေ၊ နတ်သလင်းကျောက်တွေ ဝယ်ယူတာတွေနဲ့တင် သူ့အတွက်ရော၊ ယွီဟွာနတ်ဘုရားနန်းတော်အတွက်ပါ လိုအပ်တဲ့ စည်းမျဉ်းနတ်ဆေးလုံးဖော်စပ်ဖို့ လုံလောက်နေပြီ။

တိုက်ကြီးတွေမှာက နတ်ဘုရားတွေက နတ်သလင်းကျောက်ကို အထူးဆေးလုံးတွေ၊ နတ်ဘုရားလက်နက်တွေ သန့်စင်ရာမှာပဲ သုံးကြတာ။ အတွင်းထဲက စည်းမျဉ်းမူလအနှစ်သာရကို သန့်စင်ထုတ်ယူနိုင်တဲ့သူ မရှိဘူး။

ဒါကြောင့် နတ်သလင်းကျောက်ရဲ့တန်ဖိုးက သာမန်ပဲ ရှိတယ်။

လီချန်အတွက်တော့ နတ်ဘုရားလက်နက် အချိန်ခေါင်းလောင်းရှိနေလို့ စည်းမျဉ်းမူလအနှစ်သာရကို သန့်စင်ယူလို့ ရတာကြောင့် နတ်သလင်းကျောက်ရဲ့ တန်ဖိုးက အဆမတန်မြင့်မားတယ်။

ဒါကြောင့် သူ ဈေးကွက်ထဲက နတ်သလင်းကျောက် အများအပြားကို လွယ်လွယ်ကူကူ ဝယ်ယူစုဆောင်းနိုင်ခဲ့တယ်။

ဒါကလည်း သူ တောင်ဘက်ကျွန်းဆွယ်တိုက်မှာ ဆက်နေရတဲ့ အကြောင်းရင်းပဲ။

အရင်းအမြစ်ပေါကြွယ်ဝတဲ့နေရာမှာ အဂ္ဂိရတ်ဆရာအနေနဲ့ နေထိုင်ရတာ အဆင့်မြင့်ပစ္စည်းတွေ ရှာရတာ လွယ်ကူလွန်းတယ်။

သူ ဖော်စပ်တဲ့ ဆေးလုံးတွေက အရည်အသွေး ကောင်းမွန်တာကြောင့် အဆင့်မြင့်ဆေးလုံး လာအပ်တဲ့သူတွေလည်း အများကြီးရှိတယ်။

တောင်ဘက်ကျွန်းဆွယ်တိုက်မှာ ကျင့်ကြံရတာ တကယ်သက်သောင့်သက်သာရှိတယ်။

တကယ်လို့ သူသာ ဒီနေရာမှာ မွေးဖွားခဲ့ရင်၊ အခုလောက်ဆို ကျင့်ကြံမှုအဆင့် ပိုမြင့်နေလောက်ပြီ။

ကျင့်ကြံရတာ အခက်အခဲ ပိုနည်းမယ်လေ။

အချိန်ခေါင်းလောင်းရဲ့အကူအညီနဲ့ အရင်းအမြစ်ကြွယ်ဝမှု ပေါင်းစပ်လိုက်ရင် ကျင့်ကြံမှုနှုန်းက ပိုမြန်မှာ သေချာတယ်။

....

နတ်ဘုရားစစ်ပွဲ ပြီးဆုံးသွားပြီးနောက်။

ယွင်တန်နန်းတော်က အဂ္ဂိရတ်ဆရာအားလုံးကို ဆုလာဘ်တွေ ဝေငှပေးသည်။

အဆင့်မြင့်ဆေးဖော်ကုန်ကြမ်းတွေ၊ ကျင့်ကြံရေးပစ္စည်းတွေ... အဂ္ဂိရတ်ဆရာတွေက ကိုယ်လိုချင်တာ ရွေးယူလို့ရတယ်။

လီချန် ဆုလာဘ်စာရင်းကို ကြည့်လိုက်တော့ နတ်ဘုရားအမြုတေပါနေတာ တွေ့ရပြီး အံ့သြသွားသည်။

ဒီနတ်ဘုရားအမြုတေဆိုတာ နတ်သလင်းကျောက် မဟုတ်ဘူး။

နတ်သလင်းကျောက်ဆိုတာ နတ်သားရဲ၊ ကွေ့ရှန်းတွေဆီကရတဲ့ တစ်ပိုင်းတစ်စ ပစ္စည်းလောက်ပဲရှိတာ။

နတ်ဘုရားအမြုတေကတော့ မတူဘူး။

ဒါက နတ်ဘုရားကမ္ဘာ (ရှင်းကျဲ့) က စစ်မှန်တဲ့ နတ်ဘုရားတွေဆီက ရတာ။ နတ်ဘုရားအဆင့်နဲ့ ယှဉ်ရင် ကျန်းရှန်းအထက်အဆင့်တွေ ပိုင်ဆိုင်တဲ့ အရာ။

နတ်ဘုရားအမြုတေ (ရှင်းကော်)ထဲမှာ ပါဝင်တဲ့ စည်းမျဉ်းမူလအနှစ်သာရက ပိုပြီး ပြီးပြည့်စုံပြီး အဆင့်မြင့်တယ်။ ဒါ့အပြင်... ဒီအထဲမှာ ဟွန်တွန်ပြင်ပနတ်ဘုရားရဲ့ မူလအနှစ်သာရ အငွေ့အသက် တစ်စွန်းတစ်စတောင် ပါဝင်နေနိုင်တယ်။

ပြင်ပနတ်ဘုရားရဲ့ မူလအနှစ်သာရဆိုတာ တန်ဖိုးအရှိဆုံးပဲ။

သေချာတာကတော့ ဒါက လီချန်အတွက်ပဲ တန်ဖိုးရှိတာ။ တခြား နတ်ဘုရားတွေအတွက်တော့ နတ်ဘုရားအမြုတေရဲ့ အသုံးဝင်မှုက အကန့်အသတ်ရှိတယ်။

ဒါကြောင့်လည်း နတ်ဘုရားအမြုတေက ဆုလာဘ်စာရင်းမှာ ပါလာတာပေါ့။

တကယ်လို့ တန်ဖိုးအရမ်းကြီးပြီး အသုံးဝင်တယ်ဆိုရင် ကောင်းကင်နန်းတော်က သိမ်းသွားလောက်ပြီ။

လီချန် တွန့်ဆုတ်မနေဘဲ နတ်ဘုရားအမြုတေတွေကို ရွေးချယ်လိုက်သည်။

ဒါတင်မကသေးဘူး... တခြား အဂ္ဂိရတ်ဆရာတွေကိုပါ သီးသန့်ဆက်သွယ်ပြီး သူတို့ရထားတဲ့ နတ်ဘုရားအမြုတေတွေကိုပါ လိုက်ဝယ်လိုက်သေးတယ်။

နတ်ဘုရားအမြုတေရဲ့ ဂုဏ်သတ္တိတွေကို လေ့လာပြီး ဆေးဆန်းတွေ ဖော်စပ်တာက အဂ္ဂိရတ်ဆရာ အများစုရဲ့ ဝါသနာပါပဲ။

"မင်း ဘာလို့ ဒီလောက်များတဲ့ နတ်ဘုရားအမြုတေတွေကို စုဆောင်းနေတာလဲ" စီနီယာအစ်မစု ကလည်း သူမ ရထားတဲ့ နတ်ဘုရားအမြုတေကို လီချန်ဆီပေးလိုက်ပြီး စူးစမ်းစွာ မေးလိုက်သည်။

နတ်ဘုရားအမြုတေကို သုတေသနလုပ်လို့ကောင်းပေမဲ့၊ ဒီလောက် အများကြီး စုဆောင်းစရာ မလိုဘူးလေ။

"ကျွန်တော် နတ်သလင်းကျောက်နဲ့ နတ်ဘုရားအမြုတေထဲက စည်းမျဉ်းမူလအနှစ်သာရတွေကို သန့်စင်ထုတ်ယူပြီး စည်းမျဉ်းနတ်ဆေးလုံး ဖော်စပ်ဖို့ လေ့လာနေတာ..." လီချန် ပြုံးပြီး ပြောလိုက်သည်။

"ဟမ်..." စီနီယာအစ်မစု လီချန် ကို ကြောင်ကြည့်နေပြီး ရယ်မောလိုက်သည်။ "အဲဒါကို လေ့လာတဲ့လူတွေ အများကြီးရှိခဲ့ဖူးတယ်။ ကောင်းကင်နန်းတော်ရဲ့ အကျော်ကြားဆုံး ယွမ်ချန်ဆေးဧကရာဇ်ဆိုရင် ဒီလမ်းကြောင်းကို အစောဆုံး လေ့လာခဲ့သူပဲ။ ဒါပေမဲ့ နောက်ပိုင်း လက်လျှော့လိုက်တယ်။ ဘာလို့လဲဆိုတော့ နတ်ဘုရားအမြုတေထဲက စည်းမျဉ်းမူလအနှစ်သာရ ကို သန့်စင်တဲ့အခါ၊ နတ်ဘုရားစွမ်းအားရဲ့ လွှမ်းမိုးမှုကို မဖယ်ရှားနိုင်လို့ပဲ။ အဲဒါနဲ့ စည်းမျဉ်းနတ်ဆေးလုံး ဖော်စပ်လိုက်ရင် သောက်တဲ့သူအတွက် အန္တရာယ် အရမ်းများတယ်"

ဆေးဧကရာဇ်လို့ ခေါ်ဝေါ်ခံရတယ်ဆိုကတည်းက ဆေးပညာစွမ်းရည် အလွန်မြင့်မားပြီး၊ ကျင့်ကြံခြင်းလောကရဲ့ ဆေးပညာ နံပါတ် ၁ လို့ သတ်မှတ်ခံရသူပဲ။

ယွမ်ချန်ဆေးဧကရာဇ်တောင် လက်လျှော့လိုက်ရတယ်ဆိုတော့၊ နတ်ဘုရားအမြုတေကို သုံးပြီး စည်းမျဉ်းနတ်ဆေးလုံး ဖော်စပ်ဖို့ဆိုတာ မဖြစ်နိုင်သလောက်ပဲ။

"ကျွန်တော်က စမ်းကြည့်ရုံပါ" လီချန် ပြုံးလိုက်သည်။

သူ ဖော်စပ်နိုင်နေပြီဆိုတာကိုတော့ ထုတ်မပြောပါဘူး။

ဒါတွေအားလုံးက နတ်ဘုရားလက်နက် အချိန်ခေါင်းလောင်းကြောင့် လုပ်နိုင်တာလေ။

"ကောင်းကင်ဆေးပညာမဟာညီလာခံက နောက်ထပ် နှစ် ၃၀ လောက်နေရင် ကျင်းပတော့မယ်။ အခု စာရင်းသွင်းနေကြပြီ။ မင်း ဝင်ပြိုင်မလား" စီနီယာအစ်မစုက နတ်ဘုရားအမြုတေကိစ္စကို ဆက်မပြောတော့ပါဘူး။ လီချန်ကိုယ်တိုင် ခေါင်းနဲ့ နံရံ တိုက်မိပြီးမှ လက်လျှော့သွားလိမ့်မယ်လို့ သူမ တွေးလိုက်လို့ပါ။

"မပြိုင်တော့ပါဘူး... စီနီယာအစ်မစုအတွက် ဘေးကနေ အားပေးနေပါ့မယ်" လီချန် ခေါင်းခါလိုက်သည်။

ညီလာခံမှာ ထိပ်တန်း ၃ နေရာ ဝင်ရင် ယွမ်ချန်ဆေးဧကရာဇ် ကိုယ်တိုင် ပြုပြင်ထားတဲ့ သံသရာနတ်ဆေးလုံးဆေးဖော်နည်း ရမယ်ဆိုပေမဲ့၊ သူ့မှာ သံသရာနတ်ဆေးလုံး လိုအပ်တဲ့သူမှ မရှိတာ။

"ဂျူနီယာမောင်လေးလီ... ငါ့စိတ်ထင် မင်း အရည်အချင်းကို ဝှက်ထားသလို ခံစားနေရတယ်" စီနီယာအစ်မစုက ခေါင်းစောင်းပြီး လီချန် ကို ကြည့်လိုက်သည်။

သူမကိုယ်တိုင် စည်းမျဉ်းနတ်ဆေးလုံး အောင်မြင်အောင် ဖော်စပ်နိုင်ခဲ့တာက လီချန် နဲ့ နက်ရှိုင်းသောဆေးပညာဆွေးနွေးဖလှယ်မှု လုပ်ပြီးမှ ရလာတဲ့ ရလဒ်လေ။ ဒါကြောင့် သူမ သံသယရှိတာက လီချန် လည်း စည်းမျဉ်းနတ်ဆေးလုံး ဖော်စပ်နိုင်နေပြီလား လို့ပေါ့။

ဒါပေမဲ့ လီချန်က ညီလာခံ မဝင်ဘူးဆိုတော့၊ အရည်အချင်း ဝှက်ထားတာလည်း မဟုတ်လောက်ဘူးလို့ တွေးမိပြန်တယ်။

ဘာလို့လဲဆိုတော့ ကောင်းကင်ဆေးပညာမဟာညီလာခံဆိုတာ အဂ္ဂိရတ်ဆရာတိုင်းအတွက် ငြင်းဆန်ဖို့ ခက်ခဲတဲ့ ပွဲကြီးလေ။

***