ရှေးဦးနတ်ဘုရားချီ

ရှေးဦးနတ်ဘုရားရတနာအဖြစ် အဆင့်မမြှင့်ခင်တုန်းက အချိန်ခေါင်းလောင်းမှာ စွမ်းအားကြီးတဲ့ တိုက်ခိုက်နိုင်စွမ်းရှိပေမဲ့၊ အဲဒါက အဓိကလုပ်ဆောင်ချက် မဟုတ်ခဲ့ပါဘူး။ စစ်မှန်တဲ့ အသုံးဝင်မှုက ကျင့်ကြံခြင်းကို အထောက်အကူပြုဖို့ပါပဲ။

ဒါကြောင့်လည်း သူ တိုက်ခိုက်တဲ့အချိန်တိုင်းမှာ အချိန်ခေါင်းလောင်းရဲ့စွမ်းအားကို အပြည့်အဝ ထုတ်သုံးဖို့ ခက်ခဲခဲ့တာပါ။

ဒါပေမဲ့ အခုတော့ မတူတော့ပါဘူး။

လီချန် ကြည်လင်တဲ့ အလင်းရောင်တွေ ထုတ်လွှတ်နေတဲ့ အချိန်ခေါင်းလောင်းကို မော့ကြည့်ပြီး ပြုံးလိုက်သည်။

ရုတ်တရက် သူ လက်ဝှေ့ယမ်းလိုက်ရာ၊ အချိန်ခေါင်းလောင်းက ရုတ်ချည်း ကျုံ့ဝင်သွားပြီး သူ့လက်ဖဝါးပေါ် ကျရောက်ကာ လည်ပတ်နေသည်။

ရှေးဦးနတ်ဘုရားရတနာ အချိန်ခေါင်းလောင်းရဲ့ ခေါင်းလောင်းသံမှာ မဟာတာအိုရဲ့ အသံစဉ်တွေပါဝင်ပြီး၊ ကာကွယ်ရေးစွမ်းအားက ပြိုင်ဘက်ကင်းတယ်။ ထုတ်သုံးလိုက်တာနဲ့ မသေမျိုးဧကရာဇ်တောင်မှ ဖောက်ဖျက်လို့ မရဘူး။ ရှုံးနိမ့်ခြင်းမရှိတဲ့နေရာမှာ ရပ်တည်နေတယ်လို့ ပြောလို့ရတယ်။

ဒါ့အပြင် တိုက်ခိုက်နည်း ၂ မျိုး ပါဝင်လာတယ်။ ပထမတစ်မျိုးက ခေါင်းလောင်းသံ တိုက်ခိုက်မှု၊ နာမည်က "ဈာပနပို့ဆောင်ခြင်း" တဲ့။ ကာကွယ်ရေး မှန်သမျှကို လျစ်လျူရှုပြီး၊ နတ်ဘုရားဝိညာဉ်ကို တိုက်ရိုက်တိုက်ခိုက်တာ။

ဒီတိုက်ခိုက်မှုက အရင်တုန်းကလို တုန်ခါမှုသက်သက် ဖြစ်စေတာမျိုး မဟုတ်တော့ဘူး။

အခု ခေါင်းလောင်းသံက နတ်ဘုရားဝိညာဉ်ကို တိုက်ရိုက် ချေမှုန်းဖျက်ဆီးပစ်နိုင်တယ်။

ဒုတိယ တိုက်ခိုက်နည်းက "မီးဖို"။

ဒီတိုက်ခိုက်မှုက အချိန်ဟင်းလင်းပြင်ကို တွန့်လိမ်စေပြီး၊ ယင်နဲ့ယန်ကို ပြောင်းပြန်လှန်ပစ်နိုင်တယ်။

ဒီတိုက်ခိုက်မှု ၂ ခု ပေါင်းစပ်လိုက်ရင်၊ ဈာပနပို့ဆောင်ခြင်း တိုက်ခိုက်မှုကို ရှောင်နိုင်ရင်တောင်မှ၊ နောက်ဆုံးမှာ မီးဖိုအောက်မှာ လောင်ကျွမ်းပျက်စီးသွားမှာပဲ။

"နောက်ဆို မင်း ငါနဲ့အတူ အချိန်တိုင်းလိုက်ပါလို့ရပြီ"

လီချန် လက်ထဲက ခေါင်းလောင်းလေးကို ကြည့်ပြီး ပြုံးလိုက်သည်။

အရင်တုန်းက ဒီအချိန်ခေါင်းလောင်းကို အချိန်ခေါင်းလောင်း လှိုဏ်ဂူကောင်းကင်ဘုံထဲမှာပဲ ထားလို့ ရတာ။ မဟုတ်ရင် လှိုဏ်ဂူကောင်းကင်ဘုံရဲ့ အထူးကျင့်ကြံခြင်း အထောက်အကူပြု အာနိသင် ပျောက်သွားမှာကိုး။

အခုတော့ မတူတော့ဘူး။

အချိန်ခေါင်းလောင်းကို သူ ယူသွားရင်တောင်မှ၊ လှိုဏ်ဂူကောင်းကင်ဘုံတစ်ခုလုံးရဲ့ ကျင့်ကြံခြင်း အထောက်အကူပြု အာနိသင်က ပျောက်ကွယ်သွားမှာ မဟုတ်ဘူး။ ဒါ့အပြင် အဆင့်မမြှင့်ခင်ကထက် အဆပေါင်းများစွာ ပိုစွမ်းအားကြီးနေဦးမှာ။

သေချာတာကတော့ အချိန်ခေါင်းလောင်းရဲ့ အကျိုးကျေးဇူးက ဒီလောက်ပဲ မဟုတ်သေးဘူး။ ဥပမာ - ရှေးဦးနတ်ဘုရားချီကို စုစည်းပေးနိုင်တာမျိုးပေါ့။

ဒီရှေးဦးနတ်ဘုရားချီဆိုတာ သာမန် နတ်ဘုရားချီတွေနဲ့ ယှဉ်လို့ မရဘူး။ မိုးနဲ့မြေကြားက ပထမဆုံးဖြစ်တည်လာတဲ့ စွမ်းအင်ကို ကိုယ်စားပြုတယ်။ ဒီစွမ်းအင်ရှိမှသာ ရှေးဦးနတ်ဘုရားပစ္စည်းတွေကို ဖန်တီးနိုင်တာ။

တကယ်တမ်းကျတော့ အပြင်မှာ ပြောနေကြတဲ့ မွေးရာပါနတ်ဘုရားပစ္စည်းဆိုတာတွေက အစစ် မဟုတ်ကြဘူး... နောက်မှ ဖြစ်လာတဲ့ ပစ္စည်းတွေပဲ။

ရှေးဦးနတ်ဘုရားချီနဲ့ မွေးဖွားလာမှသာ စစ်မှန်တဲ့ ရှေးဦးနတ်ဘုရားပစ္စည်း ဖြစ်တာ။

အရင်တုန်းက လီချန်ဟာ အချိန်ခေါင်းလောင်းက ထုတ်ပေးတဲ့ ရှေးဦးနတ်ဘုရားချီတစ်မျှင်ကို ရရှိခဲ့ဖူးလို့ ခန္ဓာကိုယ်မှာ ထူးဆန်းတဲ့ ပြောင်းလဲမှုတွေ ဖြစ်ခဲ့ဖူးတယ်။ အခုတော့ သူက လုံးဝ အသွင်ပြောင်းသွားပြီး ရှေးဦးနတ်ဘုရားခန္ဓာဖြစ်သွားကာ၊ စစ်မှန်တဲ့ ရှေးဦးသက်ရှိဖြစ်သွားပြီ။

မွေးရာပါနတ်ဘုရားအမြစ်ဆိုတာ ရှေးဦးနတ်ဘုရားခန္ဓာနဲ့ ယှဉ်လိုက်ရင် ဘာမှ မဟုတ်တော့ဘူး။

လီချန် အချိန်ခေါင်းလောင်းကို ခန္ဓာကိုယ်ထဲ သိမ်းဆည်းလိုက်ပြီး၊ အသက်ပြင်းပြင်းရှူကာ တင်ပျဉ်ခွေ ထိုင်လိုက်သည်။ အချိန်ခေါင်းလောင်း အဆင့်မြှင့်ပြီးနောက် ပထမဆုံးအကြိမ် ကျင့်ကြံမှုကို စတင်လိုက်သည်။

ရှေးဦးနတ်ဘုရားချီ တစ်မျှင်ကို အပြည့်အဝ သန့်စင်လိုက်တာနဲ့ စနစ်မျက်နှာပြင်ပေါ်က အချက်အလက်တွေ ပြောင်းလဲသွားသည်။

"မြန်လိုက်တာ"

သူ မျက်လုံးပြူးသွားသည်။

ဘာလို့လဲဆိုတော့ အဆင့် ၃ ကျန်းရှန်း ကျင့်ကြံမှု တိုးတက်နှုန်းက ၁ မှတ် တက်သွားလို့ပဲ။

သူ မှတ်မိသလောက် အရင်တုန်းက တိုးတက်ဖို့ ဘယ်လောက်တောင် ကြာခဲ့လဲ။

ဆိုလိုတာက သူ့ရဲ့ ရှေးဦးနတ်ဘုရားခန္ဓာ၊ ရှေးဦးနတ်ဘုရားချီ နဲ့ ရှေးဦးနတ်ဘုရားရတနာ အချိန်ခေါင်းလောင်းတို့ ပေါင်းစပ်လိုက်တဲ့အခါ၊ ကြောက်ခမန်းလိမ့် ကျင့်ကြံမှုနှုန်း ဖြစ်ပေါ်လာတာပဲ။

"နှမြောစရာပဲ... ဒီရှေးဦးနတ်ဘုရားချီက အချိန်ခေါင်းလောင်းကပဲ ထုတ်ပေးနိုင်တာ။ ဒီကမ္ဘာမှာတင် မကဘူး၊ နတ်ဘုရားကမ္ဘာတစ်ခုလုံးမှာတောင် ရှေးဦးနတ်ဘုရားချီ မရှိလောက်တော့ဘူး"

လီချန် စိတ်ထဲ တွေးလိုက်သည်။

တကယ်လို့ ရှေးဦးနတ်ဘုရားချီသာ လုံလုံလောက်လောက် ရှိရင်၊ နှစ်အနည်းငယ်အတွင်းမှာတင် အဆင့် ၉ မသေမျိုးဧကရာဇ်အဆင့်ကို ရောက်နိုင်ပြီး... မသေမျိုးဧကရာဇ် အထက်အဆင့်ကိုတောင် ချိုးဖျက်ဝင်ရောက်နိုင်မယ်လို့ သူ ယုံကြည်တယ်။

အခုတော့ အချိန်ခေါင်းလောင်းက ရှေးဦးနတ်ဘုရားချီတစ်မျှင်ထုတ်ပေးဖို့ အချိန်ဘယ်လောက် ကြာမလဲဆိုတာ စောင့်ကြည့်ရတော့မယ်။

ယခုအချိန်တွင် အချိန်ခေါင်းလောင်း လှိုဏ်ဂူကောင်းကင်ဘုံအတွင်းရှိ ယွီဟွာနတ်ဘုရားနန်းတော်တပည့်များစွာသည် သူတို့ ကိုယ်ခန္ဓာနှင့် ကမ္ဘာကြီးရဲ့ ပြောင်းလဲမှုတွေကို ခံစားလိုက်ရသည်။

အောက်ပိုင်းကမ္ဘာကနေ တက်လာတဲ့ နတ်ဘုရားဓားဂိုဏ်းက လူဟောင်းတွေကတော့ အချိန်ခေါင်းလောင်း အဆင့်မြှင့်တာကို ကြုံဖူးကြလို့ ဝမ်းသာကြပေမဲ့ သိပ်ပြီး မတုန်လှုပ်ကြဘူး။

ဒါကြောင့် သူတို့က ရရှိလာတဲ့ အကျိုးကျေးဇူးတွေကို ချက်ချင်း စုပ်ယူကြသည်။

ဒါပေမဲ့ မသိနားမလည်တဲ့ တခြားတပည့်တွေကတော့ ပထမဆုံးကြုံဖူးတာမို့၊ နားမလည်ဖြစ်နေကြပေမဲ့ စီနီယာတွေရဲ့ လမ်းညွှန်မှုအောက်မှာ အလျင်အမြန် ကျင့်ကြံကြတော့သည်။

ဒီနေ့ကတော့ ယွီဟွာနတ်ဘုရားနန်းတော်အတွက် ငြိမ်သက်မယ့်နေ့ မဟုတ်ပါဘူး။

နေရာတိုင်းမှာ အဆင့်တက်တာတွေ ဖြစ်ပေါ်နေတယ်။ အဆင့်ငယ်အနည်းငယ် တက်တာက ပုံမှန်ပဲ။ တချို့ဆို အဆင့်ကြီး ၁ ဆင့်၊ ၂ ဆင့် တက်သွားကြတယ်။ တစ်ယောက်ဆိုရင် အခြေခံတည်ဆောက်ခြင်းအဆင့်ကနေ ဝိညာဉ်ပေါင်းစည်းခြင်းအဆင့်ကို တန်းရောက်သွားတာ၊ တကယ့်ကို ကောင်းကင်အလိုကို ဆန့်ကျင်တာပဲ။

ဒါ့အပြင် နတ်ဘုရားဖြစ်မယ့် အရှိန်အဝါတွေ လှိုဏ်ဂူကောင်းကင်ဘုံထဲမှာ ဆက်တိုက် ပေါ်ထွက်လာသည်။

စုစုပေါင်း လူအတော်များများ ရှိတယ်။

အားလုံးက နိယာမတွေကို ရုတ်တရက် အပြည့်အဝ နားလည်သဘောပေါက်သွားပြီး၊ သဘာဝအလျောက် ကျန်းရှန်းအဆင့်ကို ချိုးဖျက်ဝင်ရောက်သွားကြတာ။

စည်းမျဉ်းနတ်ဆေးလုံးတောင် သုံးစရာ မလိုလိုက်ဘူး။

ဘာလို့လဲဆိုတော့ အချိန်ခေါင်းလောင်း လှိုဏ်ဂူကောင်းကင်ဘုံထဲမှာ ပျံ့နှံ့နေတဲ့ နတ်ဘုရားချီတွေထဲမှာ မမြင်နိုင်တဲ့ စည်းမျဉ်းမူလအနှစ်သာရတွေ ပါဝင်နေလို့ပဲ။

အချိန်ခေါင်းလောင်းက ရှေးဦးနတ်ဘုရားရတနာဖြစ်သွားပြီးနောက်၊ လှိုဏ်ဂူကောင်းကင်ဘုံကို စစ်မှန်တဲ့ ကမ္ဘာတစ်ခု ဖြစ်စေခဲ့တာ။ တခြားကမ္ဘာကြီးတွေထက် အဆင့်ပိုမြင့်ပြီး၊ မူလအနှစ်သာရ အဆင့်အတန်းက နတ်ဘုရားကမ္ဘာနဲ့ ယှဉ်လို့ရနေပြီ။

"ငါ့ရဲ့ ယွီဟွာနတ်ဘုရားနန်းတော်က နှစ်တစ်သောင်းအတွင်းမှာ သေချာပေါက် အင်အားကြီးလာတော့မှာ"

လီချန် လှိုဏ်ဂူကောင်းကင်ဘုံထဲက အခြေအနေကို အာရုံခံမိပြီးနောက် ပြုံးလိုက်သည်။

ဒီတစ်ခေါက် အချိန်ခေါင်းလောင်း အဆင့်မြှင့်တင်မှုက တပည့်တွေအတွက် အရင်က မကြုံဖူးလောက်အောင် အကျိုးကျေးဇူး ကြီးမားတယ်။ အရင်အကြိမ်တွေထက် အများကြီး သာတယ်။

ပြီးတော့ လှိုဏ်ဂူကောင်းကင်ဘုံရဲ့ဧရိယာက ဘယ်နှဆကျယ်သွားလဲ မသိနိုင်ဘူး။ ကျင့်ကြံရေး ပတ်ဝန်းကျင်ကလည်း အရမ်းကောင်းမွန်သွားတယ်။

လေထုထဲမှာ သိပ်သည်းတဲ့ နတ်ဘုရားချီတွေ ပြည့်နှက်နေပြီး၊ မြစ်ချောင်းအင်းအိုင်တွေထဲမှာ စီးဆင်းနေတာက နတ်ဘုရားအရည်တွေချည်းပဲ။

ဒီလို အခြေအနေမျိုးက ဟိုးအရင် နတ်ဘုရားကမ္ဘာတုန်းကတောင် ယှဉ်လို့ရမှာမဟုတ်ဘူး။

သေချာတာကတော့ ဒါက လှိုဏ်ဂူကောင်းကင်ဘုံရဲ့ ဧရိယာ ကျဉ်းတာနဲ့လည်း ဆိုင်တယ်။ အဆင့်မြှင့်ပြီးတာတောင်မှ အခု လှိုဏ်ဂူကောင်းကင်ဘုံက မိုင်ပေါင်း တစ်သောင်း ဝန်းကျင်လောက်ပဲရှိတာ။

ဒီဧရိယာက မငယ်ဘူးဆိုပေမဲ့၊ တိုက်ကြီးတွေနဲ့ ယှဉ်ဖို့ မပြောနဲ့၊ ၃၃ ဘုံထဲက တစ်ဘုံနဲ့ ယှဉ်ရင်တောင် ပြောပလောက်စရာ မရှိဘူး။

ဒါကြောင့်လည်း အချိန်ခေါင်းလောင်းကမ္ဘာက သေးငယ်ပြီး၊ ရှေးဦးနတ်ဘုရားရတနာကို ဗဟိုပြုထားတော့၊ မူလအနှစ်သာရက အလွန် အဆင့်မြင့်နေတာပေါ့။

လီချန် ခန့်မှန်းတာကတော့ လက်ရှိဧရိယာနဲ့ဆိုရင်၊ ယွီဟွာနတ်ဘုရားနန်းတော် တပည့် ဦးရေ ၁၀ ဆ တိုးလာရင်တောင် လုံလောက်တယ်။

သေချာတာကတော့ အဲဒီထက် ပိုလို့ မဖြစ်ဘူး။

ဒါကြောင့် နောက်ပိုင်း နတ်ဘုရားနန်းတော်ရဲ့ အင်အားအတိုင်းအတာကို သူ သေချာ ထိန်းချုပ်ရမယ်။

ကောင်းမွန်တဲ့ ဖွံ့ဖြိုးတိုးတက်မှုဖြစ်အောင် လုပ်ရမယ်။

တကယ်တမ်းကျတော့ ဒီနှစ်တွေအတွင်း သူ ထိန်းချုပ်လာခဲ့တာပါ။

အရင်းအမြစ်အကန့်အသတ်ရှိတဲ့အချိန်မှာ၊ တပည့်အရမ်းများရင် ခွဲဝေမှု မညီမမျှ ဖြစ်ပြီး... တပည့်တွေရဲ့ အရည်အသွေးကို ထိခိုက်စေနိုင်တယ်။

မဟုတ်ရင် အခု အနောက်ဘက်စွန်းဆန်းကြယ်တိုက်မှာ ရှိတဲ့ ဩဇာအာဏာနဲ့ဆို တပည့် ဘယ်လောက်လိုချင်ချင် ရနိုင်တာပဲ။

ရုတ်တရက် လီချန် အားရို့ဆီမှာ ပုံမှန်မဟုတ်တဲ့ အခြေအနေတစ်ခုဖြစ်နေတာ အာရုံခံမိလိုက်သည်။

ဒါနဲ့ သူ ချက်ချင်း ပျောက်ကွယ်သွားပြီး၊ နောက်တစ်ခဏမှာ အားရို့ဘေး ရောက်သွားသည်။

အခုအချိန်မှာ အားရို့က မေ့မြောအိပ်ပျော်နေပုံရပြီး၊ ခန္ဓာကိုယ်ပေါ်မှာ ဖျော့တော့တဲ့ အလင်းရောင်လေးတွေ ထွက်ပေါ်နေသည်။

"ဟမ်... ဒါက"

လီချန် မျက်နှာပေါ်တွင် အံ့သြရိပ်များ ပေါ်လာသည်။

ဘာလို့လဲဆိုတော့ ဒါက သာမန်အလင်းရောင် မဟုတ်ဘဲ ရှေးဦးနတ်ဘုရားအလင်းဖြစ်နေလို့ပဲ။

ထူးဆန်းတယ်... အားရို့ ကိုယ်ပေါ်မှာ ဘာလို့ ရှေးဦးနတ်ဘုရားအလင်း ရှိနေရတာလဲ။

အားရို့ဆီမှာလည်း ရှေးဦးနတ်ဘုရားရတနာ ရှိနေလို့လား။

မဟုတ်သေးဘူး။

ဒါ မဖြစ်နိုင်ဘူး။

တကယ်လို့ ရှေးဦးနတ်ဘုရားရတနာရှိရင်၊ သူ့ရဲ့ အချိန်ခေါင်းလောင်းက စောစောစီးစီး တုံ့ပြန်မှု ပြပြီးလောက်ပြီ။

"ကြည့်ရတာ... အားရို့ရဲ့ ခန္ဓာကိုယ်ထဲမှာ ရှေးဦးနတ်ဘုရားချီတစ်မျှင် ပိတ်လှောင်ထားတာ ဖြစ်မယ်"

လီချန် ရေရွတ်ရင်း သုံးသပ်လိုက်သည်။

ဒီဖြစ်နိုင်ချေပဲရှိတယ်။ ရှေးဦးနတ်ဘုရားချီက ရှားပါးတယ်ဆိုပေမဲ့...

အားရို့ရဲ့အဖေက အနောက်ဘက်စွန်းရူလိုင်မသေမျိုးဧကရာဇ်၊ အမေက ပေါင်လင်းမယ်တော်ဖြစ်ပြီး၊ လျှို့ဝှက်ဆန်းကြယ်တဲ့ ဟုန်ကျွင်းနန်းတော်က လာတာဆိုတော့၊ ရှေးဦးနတ်ဘုရားချီ ရရှိထားတာက ဖြစ်နိုင်တာပါပဲ။

***