ကောင်းကင်ဧကရာဇ်

ရှန်ရှောင်ပင်မနန်းတော် တံခါးကြီး နောက်တစ်ကြိမ် ပွင့်လာသည်။

လီချန်၊ ကျူမန်မသေမျိုးဧကရာဇ်နှင့် အခြားသူများ ဝင်ရောက်သွားကြသည်။

အတွင်းပိုင်း အခြေအနေကို မြင်လိုက်ရတော့ လီချန် ကြောင်အသွားသည်။

ရှန်ရှောင်ကောင်းကင်ဧကရာဇ်ကို လူကိုယ်တိုင် တွေ့ရမယ် ထင်ထားပေမဲ့၊ တွေ့လိုက်ရတာက သလင်းကျောက်ခေါင်းတလား တစ်လုံး ဖြစ်နေလို့ပါ။

ခေါင်းတလားထဲမှာ အနက်ရောင်ဝတ်ရုံရှင် တစ်ယောက် လဲလျောင်းနေသည်။

အဲဒီအနက်ရောင်ဝတ်ရုံရှင်က ရှန်ရှောင်ကောင်းကင်ဧကရာဇ် လား။

ဒါပေမဲ့ ဘာလို့ ခေါင်းတလားထဲမှာ လဲလျောင်းနေရတာလဲ။

ကျူမန်မသေမျိုးဧကရာဇ် ရှေ့တိုးသွားပြီး လက်ဝှေ့ယမ်းလိုက်ရာ၊ သလင်းကျောက်ခေါင်းတလား ပျောက်ကွယ်သွားပြီး အနက်ရောင်ဝတ်ရုံရှင် ဖြည်းညှင်းစွာ ဆင်းသက်လာသည်။

"ဘာလို့ ငါ့ကို ထပ်နှောင့်ယှက်ရတာလဲ" အနက်ရောင်ဝတ်ရုံရှင်က မျက်လုံးမှိတ်ထားလျက်နဲ့ တိုးညှင်းပြီး အက်ရှရှ အသံဖြင့် မေးလိုက်သည်။ သူ့ဆီမှာ အသက်ငွေ့ လုံးဝမရှိပေ။

"စီနီယာအစ်ကိုကြီး... အရေးကြီးကိစ္စရှိလို့ မလွှဲမရှောင်သာ နှောင့်ယှက်ရတာပါ" ကျူမန်မသေမျိုးဧကရာဇ်၏ လေသံတွင် ရိုသေမှုများ ပါဝင်နေသည်။

"ပြောပါ... ဘာကိစ္စလဲ" အနက်ရောင်ဝတ်ရုံရှင်၏အသံက ပိုမို အားနည်းသွားပုံရသည်။

"စီနီယာအစ်ကိုကြီး... ဒီလူက အစ်ကိုကြီးရဲ့ ဝင်စားတဲ့ ခန္ဓာကိုယ် ဟုတ်မဟုတ် အတည်ပြုပေးစေချင်လို့ပါ" ကျူမန်မသေမျိုးဧကရာဇ်က အလျင်အမြန် ပြောလိုက်သည်။

ချက်ချင်းပင် အနက်ရောင်ဝတ်ရုံရှင် မျက်လုံးများကို ဖြည်းညှင်းစွာ ဖွင့်လိုက်သည်။ သူ၏ မျက်ဝန်းများတွင် သူငယ်အိမ် မရှိသကဲ့သို့ ဗလာသက်သက်ဖြစ်နေပြီး၊ ဘာအလင်းရောင်မှ မရှိပေ။

သူ တစ်စုံတစ်ယောက်ကို ရှာဖွေနေပုံရပြီး၊ နောက်ဆုံးတွင် လီချန်ဆီသို့ အကြည့်ရောက်သွားသည်။

သူ လီချန်ကို စိုက်ကြည့်နေသည်။

ကျူမန်မသေမျိုးဧကရာဇ်နှင့် အခြားသူများ အသက်ရှူဖို့တောင် မရဲကြပေ။

လီချန်ကတော့ ထူးဆန်းသလို ခံစားနေရသည်။ ဒါက လုံးဝကို လူသေတစ်ယောက်ရဲ့ အကြည့်မျိုးပဲ။ သူ့ကို ကြည့်နေပေမဲ့ ဘာခံစားချက်မှ မရဘူး။

"သူက ငါ့ရဲ့ ဝင်စားတဲ့ ခန္ဓာကိုယ် မဟုတ်ဘူး" အချိန်အတော်ကြာမှ အနက်ရောင်ဝတ်ရုံရှင် ပြောလိုက်သည်။

ကျူမန်မသေမျိုးဧကရာဇ်နှင့် အခြားသူများ သက်ပြင်းချလိုက်ကြသည်။

"ယွမ်ချန်... သူ့ကို ခေါ်ထုတ်သွားလိုက်ပါ" ကျူမန်မသေမျိုးဧကရာဇ်က ယွမ်ချန်ဆေးဧကရာဇ်ကို လှမ်းပြောလိုက်သည်။

ယွမ်ချန်ဆေးဧကရာဇ် ခေါင်းညိတ်လိုက်ပြီး၊ လီချန်ကိုခေါ်ကာ ရှန်ရှောင်ပင်မနန်းတော်ထဲကနေ ထွက်ခွာလာခဲ့သည်။ "လီချန်... ဒီနေ့ကိစ္စကို ဘာမှ မဖြစ်ခဲ့သလို သဘောထားလိုက်ပါ... သိတယ်မလား"

"ဆေးဧကရာဇ်မင်း စိတ်ချပါ... ကျွန်တော် နားလည်ပါတယ်" လီချန် ခေါင်းညိတ်လိုက်သည်။

.....

ရှန်ရှောင်ပင်မနန်းတော် အတွင်း။

ကျူမန်မသေမျိုးဧကရာဇ်နှင့် အခြားသူများ မထွက်ခွာသေးပေ။

အနက်ရောင်ဝတ်ရုံရှင် (ရှန်ရှောင်ကောင်းကင်ဧကရာဇ်) သည်လည်း ခေါင်းတလားထဲ ပြန်မဝင်သေးပေ။

"တစ်ယောက်ယောက်က ငါ့ရဲ့ ဝင်စားတဲ့ခန္ဓာကိုယ်ကို ခန္ဓာကိုယ်လုယူခြင်း လုပ်သွားခဲ့ပြီ" ရုတ်တရက် အနက်ရောင်ဝတ်ရုံရှင် ပြောလိုက်သည်။

သူ့လေသံတွင် အေးစက်မှုများ ပါဝင်နေသည်။

ကျူမန်မသေမျိုးဧကရာဇ်နှင့် အခြားသူများ မျက်နှာ အရောင်ပြောင်းသွားကြသည်။

"စီနီယာအစ်ကိုကြီး... စောစောက လူက အစ်ကိုကြီးရဲ့ဝင်စားတဲ့ ခန္ဓာကိုယ်ပဲ၊ ဒါပေမဲ့ သူများ လုယူတာ ခံလိုက်ရတယ်ဆိုတဲ့ သဘောလား" ကျူမန်မသေမျိုးဧကရာဇ် နားမလည်စွာ မေးလိုက်သည်။ "ဒါဆို ဘာလို့ စောစောက သူ့ကို ဖမ်းမချုပ်လိုက်တာလဲ"

"မင်းတို့ သူ့ကို ယှဉ်နိုင်မှာ မဟုတ်ဘူး" အနက်ရောင်ဝတ်ရုံရှင် သက်ပြင်းချလိုက်သည်။

"ဘာ... စီနီယာအစ်ကိုကြီး၊ သူက အဆင့် ၉ မသေမျိုးဧကရာဇ် ဆိုရင်တောင်၊ ဒီရှန်ရှောင်ပင်မနန်းတော်ထဲမှာဆိုရင် ဘယ်လောက် စွမ်းအားကြီးတဲ့ ဧကရာဇ်မဆို ဖမ်းချုပ်နိုင်တာပဲလေ" ကျူမန်မသေမျိုးဧကရာဇ် မနေနိုင်ဘဲ ပြောလိုက်သည်။

"ငါ သူ့ဆီမှာ အလောင်းသုံးကောင်ခုတ်ပိုင်းခြင်းရဲ့ အငွေ့အသက်တွေကို အာရုံခံမိတယ်..." အနက်ရောင်ဝတ်ရုံရှင် ပြောလိုက်သည်။

သူက အခု သေခြင်းရှင်ခြင်းကြားက အခြေအနေမှာရှိနေလို့ အာရုံခံနိုင်စွမ်း အလွန်မြင့်မားသည်။

"ဘာ..." ရှိနေတဲ့ မသေမျိုးဧကရာဇ်အားလုံး တုန်လှုပ်သွားကြသည်။

အလောင်းသုံးကောင်ခုတ်ပိုင်းခြင်းဆိုတာ လွတ်မြောက်ခြင်းလမ်းစဉ်ရဲ့ တံခါးပေါက်လေ။

လွတ်မြောက်ခြင်းလမ်းစဉ်ပေါ် လျှောက်လှမ်းပြီး အချိန်မြစ်ကို ထိတွေ့ချင်ရင်၊ အလောင်းသုံးကောင်ခုတ်ပိုင်းခြင်းကို မဖြစ်မနေလုပ်ရမှာ။

ဒီအဆင့်ကို ရှန်ရှောင်ကောင်းကင်ဧကရာဇ်တောင်မှ ခြေတစ်ဖက်ပဲ လှမ်းနိုင်သေးတာ။ ဒါတောင်မှ ရှင်လျက်နဲ့ သေနေတဲ့ အခြေအနေကို ထိန်းထားရပြီး၊ နောက်ဆုံးမှာ မတတ်သာဘဲ ဝင်စားတဲ့လမ်းကိုရွေးပြီး အတ္တကို အပြီးတိုင် ဖြတ်တောက်ဖို့ ကြိုးစားခဲ့ရတာ။

မထင်မှတ်ထားတာက... ဒီတစ်ခေါက် ဝင်စားတဲ့ခန္ဓာကိုယ်က သူများ လုယူတာ ခံလိုက်ရပြီတဲ့။

"စီနီယာအစ်ကိုကြီး... ဒါဆို ဘယ်လိုလုပ်ကြမလဲ" ကျူမန်မသေမျိုးဧကရာဇ် အလျင်အမြန် မေးလိုက်သည်။

တကယ်လို့ ဟို လီချန် ဆိုတဲ့လူက အလောင်းသုံးကောင်ခုတ်ပိုင်းခြင်း အောင်မြင်ထားတယ် ဆိုရင်၊ သူတို့အနေနဲ့ ယှဉ်ပြိုင်ဖို့ ခက်ခဲလိမ့်မယ်။

အလောင်းသုံးကောင်ခုတ်ပိုင်းခြင်း အောင်မြင်သူက အချိန်နယ်ပယ်ကို ထိတွေ့နိုင်တယ်။ မလွတ်မြောက်သေးတဲ့ သူတွေက အချိန်မြစ်ထဲမှာပဲ ရှိနေသေးတာမို့၊ ဘယ်လိုလုပ် ယှဉ်နိုင်မှာလဲ။

"ငါတို့ ဟုန်ကျွင်းနန်းတော်ရဲ့ ရည်မှန်းချက်က ဘာလဲ" အနက်ရောင်ဝတ်ရုံရှင် ရုတ်တရက် မေးလိုက်သည်။

"နတ်ဘုရားကမ္ဘာကို စောင့်ရှောက်ဖို့ပါ" ကျူမန်မသေမျိုးဧကရာဇ် ကြောင်သွားပြီးမှ ဖြေလိုက်သည်။

"ဟုတ်တယ်... အခု နတ်ဘုရားကမ္ဘာ ပျက်စီးသွားပြီ၊ ငါတို့က အသက်ဆက်ဖို့ ရုန်းကန်နေရတာ။ ဟွန်တွန်ပြင်ပနတ်ဘုရားက အချိန်မရွေး ပြန်နိုးလာနိုင်တယ်။ အဲဒီအချိန်ကျရင် ဒီကမ္ဘာကြီး တစ်ခုလုံး ဝါးမျိုခံလိုက်ရပြီး၊ အားလုံးက ကိုယ်ပိုင်အသိစိတ်မရှိတဲ့ အသက်မဲ့သူတွေဖြစ်ကုန်ကြမှာ..."

အနက်ရောင်ဝတ်ရုံရှင် သက်ပြင်းချလိုက်သည်။ "ဒီလူက အလောင်းသုံးကောင်ခုတ်ပိုင်းခြင်း အောင်မြင်ထားမှတော့... သူ့ကိုပဲ ဟုန်ကျွင်းနန်းတော် ပိုင်ရှင် ပေးလုပ်လိုက်ပြီး၊ ကောင်းကင်နန်းတော်ကို ဦးဆောင်ပြီး ဟွန်တွန်ပြင်ပနတ်ဘုရားကို တိုက်ခိုက်ခိုင်းလိုက်တာက မကောင်းဘူးလား"

"စီနီယာအစ်ကိုကြီး... သူ့ နောက်ခံအကြောင်း ကျွန်တော်တို့ ဘာမှမသိရဘူးလေ" ကျူမန်မသေမျိုးဧကရာဇ် တစ်ခုခုကို သတိရပြီး ပြောလိုက်သည်။

"သူက နတ်ဘုရားဖြစ်နေသရွေ့... ဘယ်ကလာလဲဆိုတာ အရေးမကြီးတော့ဘူး" အနက်ရောင်ဝတ်ရုံရှင် ပြောလိုက်သည်။ "ကဲပါ... ငါလည်း ပင်ပန်းနေပြီ။ နောက်ပိုင်းကိစ္စတွေ မင်းတို့ပဲ စီမံလိုက်ကြတော့"

ပြောရင်းနဲ့ အနက်ရောင်ဝတ်ရုံရှင်၏ခန္ဓာကိုယ်သည် တဖြည်းဖြည်း မှေးမှိန်ပျောက်ကွယ်လာသည်။

"စီနီယာအစ်ကိုကြီး..." ကျူမန်မသေမျိုးဧကရာဇ် ဒါကို မြင်တော့ ထိတ်လန့်သွားသည်။

ဒါက စီနီယာအစ်ကိုကြီးရဲ့ မူလအတ္တကိုယ်ပွား စတင်ပြိုကွဲနေပြီဆိုတာ သူ သိလိုက်လို့ပါ။

ဝင်စားတဲ့ ခန္ဓာကိုယ်က လုယူခံလိုက်ရပြီ။ အခု မူလအတ္တကိုယ်ပွားပါ ပြိုကွဲသွားရင်... စီနီယာအစ်ကိုကြီးရှန်ရှောင်ဟာ လောကကြီးထဲကနေ လုံးဝ ပျောက်ကွယ်သွားတော့မှာ။ နောက်ထပ် ဝင်စားဖို့တောင် အခွင့်အရေးမရှိတော့ဘူး။

"သူက စီနီယာအစ်ကိုကြီး မဟုတ်ဘူးလေ... ဘယ်လိုလုပ် ဟုန်ကျွင်းနန်းတော်ပိုင်ရှင် ပေးလုပ်မလဲ။ ဘယ်လိုလုပ် ရှန်ရှောင်ကောင်းကင်ဧကရာဇ်နေရာပေးမလဲ" ကျူမန်မသေမျိုးဧကရာဇ် လက်မခံနိုင်စွာ ပြောလိုက်သည်။

"မင်းတို့က သဘောထား သေးသိမ်လွန်းတယ်... သူက ငါ့ရဲ့ဝင်စားတဲ့ ခန္ဓာကိုယ်ကို လုယူထားတာပဲ၊ သူက ငါပဲပေါ့" အနက်ရောင်ဝတ်ရုံရှင် ခပ်ဖွဖွ ပြုံးလိုက်ပြီးနောက်၊ ခန္ဓာကိုယ် လုံးဝ ပျောက်ကွယ်သွားတော့သည်။

"စီနီယာအစ်ကိုကြီး..." ကျူမန်မသေမျိုးဧကရာဇ်နှင့် အခြားဧကရာဇ်များ အော်ဟစ်လိုက်ကြသော်လည်း ဘာပြန်ထူးသံမှ မကြားရတော့ပေ။

သူတို့က ရှန်ရှောင်ကောင်းကင်ဧကရာဇ်ရဲ့ အမာခံ ထောက်ခံသူတွေ။ အစ်ကိုကြီး ပြန်လာမှာကို နှစ်ပေါင်းများစွာ စောင့်မျှော်ခဲ့ကြတာ။ အခုတော့ ဒီလိုရလဒ်မျိုးနဲ့ အဆုံးသတ်သွားရတယ်။

"အခု ဘယ်လိုလုပ်ကြမလဲ" အခြား ဧကရာဇ် တစ်ပါးက မေးလိုက်သည်။

"ဘယ်လိုလုပ်ရမှာလဲ... စီနီယာအစ်ကိုကြီး မှာခဲ့တဲ့အတိုင်း လုပ်ရမှာပေါ့" ကျူမန်မသေမျိုးဧကရာဇ် သက်ပြင်းချလိုက်သည်။

"ဒါပေမဲ့ သူက လူစိမ်းလေ" အခြား ဧကရာဇ်တွေက ပြောကြသည်။

"ဟွန်တွန်ပြင်ပနတ်ဘုရားက ဘယ်တော့ နိုးလာမလဲ မသိဘူး။ ငါတို့မှာ တခြားရွေးချယ်စရာ ရှိလို့လား" ကျူမန်မသေမျိုးဧကရာဇ် လေးနက်စွာ ပြောလိုက်သည်။

"ရူလိုင်ကော" ရုတ်တရက် ဧကရာဇ်တစ်ပါးက နာမည်တစ်ခုကို ထုတ်ပြောလိုက်သည်။

ဒီနာမည်က ကောင်းကင်နန်းတော်မှာ တားမြစ်ထားတဲ့ နာမည်။ ဘယ်သူမှ မပြောရဲကြဘူး။

ဒါပေမဲ့ ဒီမှာရှိနေတာက ဦးဆောင်ဧကရာဇ်တွေဆိုတော့ ပြောလို့ရတယ်။

"အရင်က ပေါင်လင်းမယ်တော် နတ်ဘုရားကမ္ဘာ (ရှင်းကျဲ့) ကို သွားတယ်ဆိုတော့... ရူလိုင် က နတ်ဘုရားကမ္ဘာ (ရှင်းကျဲ့) ဘက်မှာ ဝင်စားသွားတာများလား"

"ဟွန့်... သူက အဲဒီလမ်းကို ရွေးသွားမှတော့၊ ပြန်လှည့်လာဖို့ မဖြစ်နိုင်တော့ဘူး..."

"ရူလိုင်ရဲ့ စိတ်ဓာတ်နဲ့ဆိုရင် သူက ငါတို့နဲ့ တစ်လမ်းတည်း လျှောက်မယ့်သူ မဟုတ်ဘူး"

ဧကရာဇ်တွေ ဆွေးနွေးပြီးနောက်၊ ရွေးချယ်စရာ တစ်လမ်းတည်းသာ ကျန်တော့ကြောင်း တွေ့ရှိလိုက်ရသည်။

ဒါပေမဲ့ ဒီရလဒ်ကို လက်ခံဖို့ ခက်ခဲနေကြသည်။

စီနီယာအစ်ကိုကြီးရဲ့ ဝင်စားတဲ့ ခန္ဓာကိုယ်ကို လုယူသွားတဲ့သူကို ဟုန်ကျွင်းနန်းတော်ပိုင်ရှင်၊ ကောင်းကင်ဧကရာဇ်နေရာပေးရမယ်ဆိုတာ... တရားလွန်လွန်းနေပြီ။

"ဘယ်သူသွားပြောမလဲ" ကျူမန်မသေမျိုးဧကရာဇ် မေးလိုက်သည်။

"ငါတော့ မသွားဘူး"

"ငါလည်း မသွားဘူး"

တခြား ဧကရာဇ်တွေက မကျေမနပ် ပြောကြသည်။

"ကောင်းပြီလေ... ငါပဲ သွားလိုက်မယ်" ကျူမန်မသေမျိုးဧကရာဇ်က သူတို့ တုံ့ပြန်ပုံကို ကြည့်ပြီး ခါးသက်သက် ပြုံးလိုက်သည်။

ကောင်းကင်နန်းတော်ရဲ့ ဦးဆောင် ဧကရာဇ်တွေထဲမှာ သူက သဘောထားအကြီးဆုံးပဲ။ ပုံမှန်အားဖြင့် တခြားအဖွဲ့အစည်းတွေနဲ့ဆက်ဆံရင် သူပဲ မျက်နှာထွက်ပြရတာ။

....

လီချန် သူ့အခန်းကို ပြန်ရောက်ပြီး၊ ယွင်ကျင်းကောင်းကင်ဘုံက ရလာတဲ့ ဆေးပညာ ဗဟုသုတတွေကို ပြန်လေ့လာဖို့ ပြင်ဆင်နေတုန်း၊ ကျူမန်မသေမျိုးဧကရာဇ် ရောက်လာသည်။

စောစောကမှ ရှန်ရှောင်ပင်မနန်းတော်က ထွက်လာတာ မဟုတ်လား။

ဒီကျူမန်မသေမျိုးဧကရာဇ်က ဘာလာလုပ်တာလဲ။

တကယ်တမ်းကျတော့ သူ အများကြီး ကြိုတွေးထားပြီးသား။ ကောင်းကင်နန်းတော်က လူသတ်နှုတ်ပိတ်မလားဆိုတာ အပါအဝင်ပေါ့။

ဘာလို့လဲဆိုတော့ သူက ရှန်ရှောင်ကောင်းကင်ဧကရာဇ်ရဲ့ အခြေအနေမှန်ကို သိသွားပြီလေ။

ဒါက ကောင်းကင်နန်းတော်ရဲ့ ထိပ်တန်း လျှို့ဝှက်ချက်ပဲ။

"ဧကရာဇ်မင်းကို ဂါရဝပြုပါတယ်" လီချန် လက်အုပ်ချီလိုက်သည်။

ကျူမန်မသေမျိုးဧကရာဇ်က လီချန် ကို ကြည့်လိုက်သည်။ စီနီယာအစ်ကိုကြီးရှန်ရှောင်ရဲ့ မူလအတ္တကိုယ်ပွားသာ မပြောပြခဲ့ရင်၊ တောင်ဘက်ကျွန်းဆွယ်တိုက်ကလာတဲ့ ဒီအန္တရာယ်ကင်းပုံရတဲ့ အဂ္ဂိရတ်ဆရာလေးက အလောင်းသုံးကောင်ခုတ်ပိုင်းခြင်း အောင်မြင်ထားတဲ့ ကြောက်မက်ဖွယ် ပုဂ္ဂိုလ်တစ်ဦးဖြစ်နေမယ်လို့ သူ လုံးဝထင်မိမှာမဟုတ်ဘူး။

ဒါ့အပြင် စီနီယာအစ်ကိုကြီးရှန်ရှောင်ရဲ့ ဝင်စားတဲ့ ခန္ဓာကိုယ်ကိုတောင် လုယူထားသေးတယ်... ဘယ်က လာမှန်းလည်း မသိရဘူး။

ဒါကြောင့် သူ့စိတ်ထဲမှာ သိပ်မသေချာ မရေရာဖြစ်နေသည်။

"တာအိုရောင်းရင်းလီ... မင်း အခုဆိုရင် ကောင်းကင်ဧကရာဇ်ရဲ့ အခြေအနေကို ရှင်းရှင်းလင်းလင်း သိသွားလောက်ပါပြီ။ ဒါကြောင့်ပဲ ဒီနှစ်တွေအတွင်း သူ လူလုံးမပြနိုင်ခဲ့တာပါ" ကျူမန်မသေမျိုးဧကရာဇ် စဉ်းစားပြီး ပြောလိုက်သည်။

လီချန်ကို ရှန်ရှောင်ကောင်းကင်ဧကရာဇ် လုပ်ခိုင်းဖို့ တိုက်ရိုက်ပြောလို့ မဖြစ်ဘူး။ အကြောင်းပြချက် တစ်ခုခု ရှာရမယ်။

"ဧကရာဇ်မင်း စိတ်ချပါ... ဒီကိစ္စကို ကျွန်တော် ဘယ်တော့မှ ထုတ်မပြောပါဘူး" လီချန် အလျင်အမြန် ပြောလိုက်သည်။

"တာအိုရောင်းရင်းလီ... မင်းလည်း ငါ့ကို ဧကရာဇ်မင်းလို့ မခေါ်ပါနဲ့။ တာအိုရောင်းရင်း ကျူမန် လို့ပဲ ခေါ်ပါ" ကျူမန်မသေမျိုးဧကရာဇ် အလျင်အမြန် ပြောလိုက်သည်။

အလောင်းသုံးကောင်ခုတ်ပိုင်းထားတဲ့ ကြောက်မက်ဖွယ် ပုဂ္ဂိုလ်တစ်ဦးက သူ့ကို ဧကရာဇ်မင်း လို့ခေါ်တာကို သူ မခံယူရဲဘူး။ သက်တမ်းတိုသွားလိမ့်မယ်။

"တာအိုရောင်းရင်းလီ... ငါနဲ့ တခြားဧကရာဇ်တွေ တိုင်ပင်ပြီးပါပြီ။ မင်းကို ကောင်းကင်ဧကရာဇ် နေရာမှာ ယာယီ အစားထိုး တာဝန်ယူပေးစေချင်ပါတယ်... ဒါမှသာ လောကလူသားတွေရဲ့ ပါးစပ်ပေါက်ကို ပိတ်နိုင်ပြီး၊ နတ်ဘုရားကမ္ဘာ (ရှင်းကျဲ့) နဲ့ မသမာသူတွေကို ဟန့်တားနိုင်မှာမို့ပါ" ကျူမန်မသေမျိုးဧကရာဇ် စကားလမ်းကြောင်း လွှဲပြီး ပြောလိုက်သည်။

လီချန် ကြောင်သွားသည်။

သူ့ကို ကောင်းကင်ဧကရာဇ်နေရာမှာ ယာယီ အစားထိုးခိုင်းတယ် ဟုတ်လား။

သူက ရှန်ရှောင်ကောင်းကင်ဧကရာဇ်နဲ့ ရုပ်ချင်းတူလို့လား။

"တာအိုရောင်းရင်း ကျူမန်... ကျွန်တော် လက်မခံနိုင်ပါဘူး။ ကောင်းကင်ဧကရာဇ်နေရာက အလွန် မြင့်မြတ်ပါတယ်။ ကျွန်တော်လို လူက ဘယ်လိုလုပ် အစားထိုးလို့ရမှာလဲ" လီချန် တိုက်ရိုက် ငြင်းလိုက်သည်။

"တာအိုရောင်းရင်းလီ... မငြင်းပါနဲ့ဦး" ကျူမန်မသေမျိုးဧကရာဇ် အလျင်အမြန် ပြောလိုက်သည်။ "အမှန်အတိုင်း ပြောရရင်... ကောင်းကင်ဧကရာဇ်က လုံးဝသေဆုံးသွားပါပြီ။ ဝင်စားဖို့ အခွင့်အရေးတောင် မရှိတော့ပါဘူး။ ကောင်းကင်နန်းတော်မှာ တစ်ရက်လေးတောင် ကောင်းကင်ဧကရာဇ် မရှိလို့ မဖြစ်ပါဘူး။ အခုချိန်မှာ တာအိုရောင်းရင်းလီက ယာယီ အစားထိုးပေးမှသာ လက်ရှိ အကြပ်အတည်းကို ဖြေရှင်းနိုင်မှာပါ"

"ရှန်ရှောင်ကောင်းကင်ဧကရာဇ် သေဆုံးသွားပြီလား" လီချန် ကြားတာနဲ့ အံ့သြမှင်သက်သွားသည်။

ရှန်ရှောင်ကောင်းကင်ဧကရာဇ်ဆိုတာ ဘယ်လို အဆင့်အတန်း၊ ဘယ်လို ကျင့်ကြံမှု ရှိတဲ့သူလဲ... ကောင်းကင်ဘုံတစ်ခုလုံးမှာ နံပါတ် ၁ လေ။ ရူလိုင်မသေမျိုးဧကရာဇ်တောင် သူ့အောက်မှာရှိတာ။

ရူလိုင်မသေမျိုးဧကရာဇ် တောင်မှ နတ်ဘုရားကမ္ဘာ (ရှင်းကျဲ့) ဘက်ကို ဝင်စားလို့ရသေးရင်၊ ရှန်ရှောင်ကောင်းကင်ဧကရာဇ်က ဘယ်လိုလုပ် သေဆုံးသွားရတာလဲ။

ဒီလို လူမျိုးက သေချင်ရင်တောင် သေဖို့ ခက်တယ်။

အဆင့် ၉ မသေမျိုးဧကရာဇ်ဆိုတာ အနည်းဆုံး နှစ်သန်းပေါင်း ၁၀၀ လောက် အသက်ရှည်တာ... ဟွေ့ယွမ် ပေါင်း ရာချီရှိတယ်။

ရှန်ရှောင်ကောင်းကင်ဧကရာဇ်ရဲ့သက်တမ်းက ကုန်ဖို့ အဝေးကြီး လိုသေးတယ်။

ရှန်ရှောင်ကောင်းကင်ဧကရာဇ် ရုတ်တရက် သေဆုံးသွားတယ်ဆိုတာ ယုံရခက်လွန်းတယ်။

စောစောက ရှန်ရှောင်ပင်မနန်းတော်ထဲမှာ တွေ့ခဲ့တဲ့ အနက်ရောင်ဝတ်ရုံရှင်က ရှင်လျက်နဲ့ သေနေတဲ့အခြေအနေ ဖြစ်နေတယ်။ အသက်ငွေ့ မရှိဘူး။ ပုံစံကြည့်ရတာ ခန္ဓာကိုယ်အစစ် မဟုတ်ဘဲ ကိုယ်ပွားတစ်ခုနဲ့ တူနေတယ်။

ကိုယ်ပွားဆိုရင်တောင်မှ ဒီလိုဖြစ်နေစရာ အကြောင်း မရှိဘူး။

သူ ရှန်ရှောင်ကောင်းကင်ဧကရာဇ်ရဲ့ အခြေအနေမှန်ကို မသိဘူး။

ဒါကြောင့် ကျူမန်မသေမျိုးဧကရာဇ် ပြောတာကို သိပ်မယုံဘူး။ တစ်ဖက်လူမှာ တခြားရည်ရွယ်ချက် ရှိနေမယ်လို့ သံသယဝင်မိတယ်။

ဘာပဲဖြစ်ဖြစ် သူကတော့ ရှန်ရှောင်ကောင်းကင်ဧကရာဇ်လုပ်ဖို့ သဘောတူမှာ မဟုတ်ဘူး။

တကယ်လို့ ကျူမန်မသေမျိုးဧကရာဇ်က မကောင်းကြံရင်လည်း ကောင်းတာပဲ။

သူ့ရဲ့ လက်ရှိအင်အားကို စမ်းသပ်လို့ ရတာပေါ့။

အဆင့် ၉ မသေမျိုးဧကရာဇ် ဖြစ်လာပြီးကတည်းက သူ တိုက်ခိုက်ခြင်း မရှိသေးဘူး။

အရင်တုန်းက ရူလိုင်မသေမျိုးဧကရာဇ် (ထျန်းချူ) နဲ့ တိုက်ခိုက်တုန်းက ခံစစ်အနေနဲ့ပဲ တုံ့ပြန်ခဲ့တာ။

ပြီးတော့ အဲဒီတုန်းက သူ့ကျင့်ကြံမှု မလုံလောက်သေးလို့ အကုန် ထုတ်မပြခဲ့ဘူး။

အခုတော့ မတူတော့ဘူး။

"တာအိုရောင်းရင်းလီ... ကောင်းကင်ဧကရာဇ်နေရာဆိုတာ အလွန်မြင့်မြတ်တာနော်... မင်း စိတ်မဝင်စားဘူးလား" ကျူမန်မသေမျိုးဧကရာဇ်က လီချန် ငြင်းနေတာမြင်တော့ မေးလိုက်သည်။

ကောင်းကင်ဧကရာဇ်နေရာကို ဘယ်သူ မလိုချင်ဘဲနေမလဲ။

ဒါပေမဲ့ ဒီနေရာက အင်အားအလုံအလောက်ရှိမှရတာ။ မဟုတ်ရင် တခြားဧကရာဇ်တွေကို ထိန်းချုပ်နိုင်မှာ မဟုတ်ဘူး။

ဒါကြောင့်လည်း ဟုန်ကျွင်းနန်းတော်မှာ ရှန်ရှောင်နဲ့ ရူလိုင် နှစ်ယောက်ပဲ ဒီနေရာကို လုနိုင်တဲ့ အရည်အချင်း ရှိခဲ့တာ။

"အဲဒါကလည်း အရည်အချင်းရှိမှ ဖြစ်မှာလေ" လီချန် ပြောလိုက်သည်။ "တာအိုရောင်းရင်း ကျူမန်... ကောင်းကင်နန်းတော်မှာ ဧကရာဇ်တွေ အများကြီးရှိတာပဲ၊ အဲဒီအထဲက တစ်ယောက်ကို ရွေးလိုက်ရင် မရဘူးလား"

"ဒီလောက်လွယ်ရင် ကောင်းတာပေါ့။ အခု ကောင်းကင်နန်းတော်က ဧကရာဇ်တွေထဲမှာ ကောင်းကင်ဧကရာဇ်ဖြစ်ဖို့ အရည်အချင်း ပြည့်မီသူ တစ်ယောက်မှ မရှိဘူး" ကျူမန်မသေမျိုးဧကရာဇ် ခေါင်းခါလိုက်သည်။ "အလောင်းသုံးကောင်ခုတ်ပိုင်းခြင်းအဆင့်ထိ ရောက်တဲ့သူရှိမှသာရမှာ... တာအိုရောင်းရင်းက ကောင်းကင်ဧကရာဇ်နဲ့ တစ်ပုံစံတည်း တူနေတော့၊ ယာယီ အစားထိုးဖို့ အသင့်တော်ဆုံးပဲ။ ပြီးတော့ တာအိုရောင်းရင်းလီ... ဒီနေရာကို ယူလိုက်ရင် လိုချင်တာ အကုန် ရနိုင်မှာနော်"

"တာအိုရောင်းရင်း ကျူမန်... ငါ့ကို ရှန်ရှောင်ပင်မနန်းတော်ဆီ နောက်တစ်ခေါက် ထပ်ခေါ်သွားပေးပါ" လီချန် ခဏ စဉ်းစားပြီး ပြောလိုက်သည်။

သူ တစ်ခုခုကို သဘောပေါက်သွားသလိုပဲ။ ဟိုရှန်ရှောင်ကောင်းကင်ဧကရာဇ်က သူ အလောင်းသုံးကောင်ခုတ်ပိုင်းထားတာကို အာရုံခံမိသွားပုံရတယ်။

မတော်တဆ ဖြစ်မှာစိုးလို့၊ စောစောက ရှန်ရှောင်ပင်မနန်းတော်ကို သွားတုန်းက သူ အလောင်းသုံးကောင်ခုတ်ပိုင်းခြင်း စည်းမျဉ်းကို တမင်ထုတ်သုံးထားခဲ့တာ။

တကယ်လို့ ရှန်ရှောင်ပင်မနန်းတော်ထဲက အနက်ရောင်ဝတ်ရုံရှင်က ရှန်ရှောင်ကောင်းကင်ဧကရာဇ်ရဲ့ ကိုယ်ပွားဆိုရင်၊ ရှန်ရှောင်ကောင်းကင်ဧကရာဇ်လည်း အလောင်းသုံးကောင်ခုတ်ပိုင်းထားတဲ့ အခြေအနေမှာ ရှိနေနိုင်တယ်။

"တာအိုရောင်းရင်း သဘောတူလိုက်ပြီလား" ကျူမန်မသေမျိုးဧကရာဇ် ဝမ်းသာအားရ မေးလိုက်သည်။

"အဲဒါ နောက်မှ ပြောမယ်" လီချန် ပြောလိုက်သည်။

....

ထို့နောက် လီချန် နှင့် ကျူမန်မသေမျိုးဧကရာဇ်တို့ ရှန်ရှောင်ပင်မနန်းတော်သို့ သွားရောက်ကြသည်။

တခြား ဧကရာဇ်တွေက နန်းတော်အပြင်ဘက်မှာ စောင့်နေကြပြီးသားပင်။

ရှန်ရှောင်ပင်မနန်းတော် တံခါးကြီး နောက်တစ်ကြိမ် ပွင့်လာသည်။

ဒီတစ်ရက်တည်းမှာတင် ၃ ကြိမ် ရှိပြီ။

နှစ်ပေါင်းများစွာအတွင်း ဒီလောက် မကြာခဏပွင့်တာမျိုး တစ်ခါမှ မရှိခဲ့ဖူးဘူး။

လီချန် ဧကရာဇ် အချို့ ခြံရံလျက် နန်းတော်ထဲ ဝင်သွားသည်။

အတွင်းပိုင်းက ဟာလာဟင်းလင်း ဖြစ်နေသည်။

သလင်းကျောက်ခေါင်းတလား ပျောက်နေပြီ။

အနက်ရောင်ဝတ်ရုံရှင်လည်း ပျောက်နေပြီ။

ရှန်ရှောင်ကောင်းကင်ဧကရာဇ်ရဲ့ ခြေရာလက်ရာ အားလုံး မီးခိုးလို လွင့်ပျယ်သွားသကဲ့သို့ ရှိသည်။

ဒါပေမဲ့ လီချန်က အလောင်းသုံးကောင်ခုတ်ပိုင်းထားတဲ့ အခြေအနေထဲ ဝင်ရောက်လိုက်ပြီး၊ အချိန်မြစ်ကို ထိတွေ့လိုက်သည်။

ထိုအခိုက်အတန့်တွင် ရှန်ရှောင်ပင်မနန်းတော်အတွင်းရှိ အချိန်စီးဆင်းမှု နှေးကွေးသွားသလို ခံစားလိုက်ရသည်။

အဆုံးမဲ့ အလင်းတန်းများ စုစည်းပြီး မြစ်တစ်စင်းအဖြစ် စီးဆင်းသွားကာ အတိတ်နဲ့ အနာဂတ်ကို ဆက်စပ်ပေးထားသည်။

လီချန်က အတိတ်ကို ခြေရာခံလိုက်သည်။ ရှန်ရှောင်ပင်မနန်းတော်အတွင်းက ပျောက်ကွယ်သွားတဲ့ ရှန်ရှောင်ကောင်းကင်ဧကရာဇ်ရဲ့ အငွေ့အသက်ကို ဖမ်းယူဖို့ ကြိုးစားလိုက်သည်။

ရုတ်တရက်... သူ အာရုံခံမိလိုက်သည်။

အဲဒီအငွေ့အသက်က လုံးဝ ပြတ်တောက်မသွားသေးဘူး။

အနာဂတ်က အမှတ်တစ်ခုနဲ့ ဆက်စပ်နေသလိုပဲ။

ဒါပေမဲ့ လီချန် အဲဒီအမှတ်ကို ဖမ်းယူဖို့ ကြိုးစားလိုက်တဲ့ အချိန်မှာပဲ၊ လှိုင်းထန်နေတဲ့ အချိန်မြစ်ကြီးက အရာအားလုံးကို လွှမ်းခြုံသွားပြီး၊ သူ ဆက်လက် ထိန်းသိမ်းမထားနိုင်တော့ဘဲ သူ့အသိစိတ် အချိန်မြစ်ထဲကနေ လွင့်စင်ထွက်လာခဲ့သည်။

သူ့မျက်နှာ ဖြူဖျော့သွားသည်။ အတိတ်ကို အတင်းအဓမ္မ ခြေရာခံတာက သူ့ရဲ့ မူလအနှစ်သာရကို အများကြီး ကုန်ဆုံးစေတယ်။

ကံကောင်းတာက သူ့မှာ ရှေးဦးနတ်ဘုရားရတနာ အချိန်ခေါင်းလောင်းရှိနေလို့ပဲ။ မဟုတ်ရင် လွတ်မြောက်ခြင်းအဆင့် မရောက်သေးဘဲ အချိန်မြစ်ထဲမှာ ဒီလိုလုပ်ရဲရင်....

အချိန်မြစ်ရဲ့ တိုက်စားမှုကြောင့် နတ်ဘုရားဝိညာဉ် မူလအနှစ်သာရ ပျက်စီးသွားနိုင်တယ်။

"ထင်တဲ့အတိုင်းပဲ... ဒီရှန်ရှောင်ကောင်းကင်ဧကရာဇ်က ဒီလောက် လွယ်လွယ်နဲ့ ဈာန်ကြွသွားမယ့်လူ မဟုတ်ဘူး..." လီချန် နားလည်သွားပြီ။

ဒီရှန်ရှောင်ကောင်းကင်ဧကရာဇ်က ဒီအခွင့်အရေးကို သုံးပြီး အတိတ်နဲ့ ဆက်နွယ်မှုအားလုံးကို ဖြတ်တောက်ချင်နေတာ သေချာတယ်။

ဒါက စစ်မှန်တဲ့ အလောင်းသုံးကောင်ခုတ်ပိုင်းခြင်း အောင်မြင်ဖို့အတွက် ခြေလှမ်းတစ်ခုဖြစ်လောက်တယ်။

ပြီးတော့... ဒီရှန်ရှောင်ကောင်းကင်ဧကရာဇ်က သူ့ကိုပါ အကြံအစည်တစ်ခုခု လုပ်ထားနိုင်တယ်။

ဝမ်းနည်းစရာက အခု သူ့ရဲ့ ကျင့်ကြံမှုအဆင့်နဲ့ အချိန်မြစ်ထဲက အနာဂတ် သတင်းအချက်အလက်ကို ဖမ်းယူဖို့ဆိုတာ မဖြစ်နိုင်သလောက်ပဲ။

အနည်းဆုံးတော့ အခု မရသေးဘူး။

"ရှန်ရှောင်ကောင်းကင်ဧကရာဇ်... မင်းက ငါ့ကို ကောင်းကင်ဧကရာဇ် ဖြစ်စေချင်တယ် ဆိုတော့... ငါ ဖြစ်ပေးလိုက်မယ်။ မင်း ဘာအကြံအစည်တွေရှိလဲဆိုတာ ငါ စောင့်ကြည့်ရသေးတာပေါ့" လီချန် စိတ်ထဲ တွေးလိုက်သည်။

"ပွဲထဲဝင်မှ ပွဲကို ဖျက်နိုင်မှာ"။

ရှန်ရှောင်ကောင်းကင်ဧကရာဇ်တင်မကဘူး၊ ရူလိုင်မသေမျိုးဧကရာဇ်လည်း ထင်သလောက် ရိုးရှင်းမယ် မထင်ဘူး။ အကြံအစည်တွေ ရှိလောက်တယ်။

အရင်တုန်းကဆိုရင် သူက ရှောင်ပြေးမှာ။

အခုတော့ သူက အဆင့် ၉ မသေမျိုးဧကရာဇ် ဖြစ်နေပြီ။ အချိန်မရွေး အလောင်းသုံးကောင်ခုတ်ပိုင်းနိုင်တယ်။ ရှေးဦးနတ်ဘုရားရတနာ အချိန်ခေါင်းလောင်းလည်း ရှိနေတယ်။ ရှုံးနိမ့်ခြင်းမရှိတဲ့ နေရာမှာ ရပ်တည်နေပြီမို့... ဒီဧကရာဇ်နှစ်ပါးနဲ့ ကစားပွဲတစ်ပွဲလောက် ကစားကြည့်ဖို့ ဝန်မလေးပါဘူး။

***