လောင်းကြေးထပ်ခြင်း

ရုတ်တရက် လီချန်၏ အသိစိတ်သည် ခန္ဓာကိုယ်မှ ခွဲထွက်သွားပြီး ရှောင်နိုင့်ယိုနှင့် ဆက်သွယ်လိုက်သည်။

"သခင်... သူ့ရဲ့ နိုးထမှုနှုန်းက အရမ်းမြန်ဆန်လာပါပြီ။ မကြာခင် လုံးဝ နိုးထလာတော့မယ်လို့ ခန့်မှန်းရပါတယ်" ရှောင်နိုင့်ယိုက သတိပေးလိုက်သည်။

"ရှောင်နိုင့်ယို... ပင်ပန်းသွားပြီနော်" လီချန် ခေါင်းညိတ်ပြီး ပြောလိုက်သည်။

ဒီနှစ်တွေအတွင်းမှာ ရှောင်နိုင့်ယိုက အချိန်ဆွဲပေးထားခဲ့လို့သာ ဟွန်တွန်ပြင်ပနတ်ဘုရားရဲ့ နိုးထချိန် နောက်ဆုတ်သွားခဲ့ရတာပင်။

အခုတော့ ရှောင်နိုင့်ယိုလည်း တောင့်မခံနိုင်တော့ဘူး။

"နောက်ပိုင်းကျရင် မင်း ကောင်းကောင်း အနားယူလို့ရပါပြီ" လီချန် ပြောလိုက်သည်။

"သခင်... သခင့်ရဲ့ ရှေးဦးနတ်ဘုရားရတနာထူး ပြီးမြောက်ဖို့ နှစ်နည်းနည်း လိုနေသေးတယ် မဟုတ်လား။ တကယ်လို့ ဟွန်တွန်ပြင်ပနတ်ဘုရား ကြိုတင်နိုးထလာရင် ဘယ်လိုလုပ်မလဲ" ရှောင်နိုင့်ယို စိတ်ပူစွာ ပြောလိုက်သည်။

"စိတ်မပူပါနဲ့... ငါ့မှာ ဖြေရှင်းမယ့်နည်းလမ်းရှိပါတယ်" လီချန် ပြုံးပြီး ပြောလိုက်သည်။

နှစ်ပေါင်းများစွာ စီစဉ်ထားခဲ့တာ၊ ဟွန်တွန်ပြင်ပနတ်ဘုရားကို ယဉ်ပါးအောင်လုပ်ဖို့က မဖြစ်မနေ လုပ်ရမယ့်ကိစ္စပဲ။ ကြိုတင် နိုးထလာလည်း သိပ်ကိစ္စမရှိပါဘူး။

ဒီဟွေ့ယွမ် ၂ ခုကျော် ကာလအတွင်းမှာ၊ သူက အချိန်ခေါင်းလောင်း လှိုဏ်ဂူကောင်းကင်ဘုံရဲ့ စွမ်းအားတွေကို ဒီနေရာဆီစိမ့်ဝင်စေခဲ့တာ။

သူ့ရဲ့ ရည်မှန်းချက်က အချိန်ခေါင်းလောင်းကို ရှေးဦးနတ်ဘုရားရတနာထူး ဟွန်တွန်ခေါင်းလောင်းအဖြစ် အဆင့်မြှင့်တင်ပြီးတာနဲ့ သားရဲထိန်းချုပ်ခြင်းစနစ်ရဲ့ စွမ်းအားနဲ့ ပေါင်းစပ်ပြီး ဟွန်တွန်ပြင်ပနတ်ဘုရားကို အပြည့်အဝယဉ်ပါးအောင်လုပ်ဖို့ပဲ။

....

ဒီလိုနဲ့ နောက်ထပ် နှစ်အနည်းငယ် ကုန်ဆုံးသွားသည်။

အချိန်ခေါင်းလောင်း အဆင့်မြှင့်တင်မှု ပြီးမြောက်ဖို့ နီးကပ်လာသလို၊ ဟွန်တွန်ပြင်ပနတ်ဘုရား နိုးထဖို့လည်း နီးကပ်လာပြီ။

လီချန်က ဗဟိုချက်မထဲမှာ ရှိနေတာမို့ မျက်စိနဲ့ မမြင်ရတဲ့ နတ်ဘုရားအရှိန်အဝါတွေ ပိုမိုပြင်းထန်လာတာကို ခံစားနေရသည်။ ဒါက ဟွန်တွန်ပြင်ပနတ်ဘုရား လုံးဝနိုးထတော့မယ့် လက္ခဏာပဲ။

တကယ်လို့ သူ့မှာ နတ်ဘုရားအာဏာစက်သာ မရှိရင်၊ လွတ်မြောက်သူဖြစ်ရင်တောင်မှ ဒီဗဟိုချက်မထဲမှာ ကြီးမားတဲ့ ဖိအားကို ခံစားရမှာ။

....

တစ်နေ့တွင်။

လီချန်သည် အချိန်ခေါင်းလောင်း လှိုဏ်ဂူကောင်းကင်ဘုံရဲ့စွမ်းအားတွေကို ဟွန်တွန်ပြင်ပနတ်ဘုရားရဲ့ ဗဟိုချက်မထဲ ဆက်လက်စိမ့်ဝင်စေလျက်ရှိသည်။

ရုတ်တရက် ပြင်းထန်သော အသံမဲ့ ဟိန်းဟောက်သံကြီး ထွက်ပေါ်လာသည်။

"နောက်ဆုံးတော့ နိုးလာပြီလား" လီချန် ရေရွတ်လိုက်သည်။

နောက်တစ်ခဏတွင် ကမ္ဘာကြီး ပြင်းထန်စွာ တုန်ခါသွားပြီး၊ ကြောက်မက်ဖွယ်ကောင်းသော အရှိန်အဝါတစ်ခု ဆင်းသက်လာသည်။

ဟွန်တွန်ပြင်ပနတ်ဘုရား နိုးထလာပြီ။

နိုးထလာတဲ့ တခဏချင်းမှာပဲ လီချန်ရဲ့တည်နေရာကို ချက်ချင်း ပိတ်ဆို့လိုက်သည်။

ဟွန်တွန်ပြင်ပနတ်ဘုရားရဲ့ ခန္ဓာကိုယ်အတွင်းပိုင်း ဗဟိုချက်မထဲမှာ ရောက်နေတာမို့၊ ဘယ်လောက်ပဲ ကောင်းကောင်းပုန်းနေပါစေ နိုးထလာတဲ့ပိုင်ရှင်ကို လှည့်စားဖို့ ခက်ခဲပါတယ်။

"မင်းက လွတ်မြောက်ခြင်းရသွားပြီလား"

ပုံသဏ္ဍာန်မမှန်သော၊ ရှုပ်ထွေးပြီး ထူးဆန်းသောအရိပ်တစ်ခု တဖြည်းဖြည်းစုစည်းလာသည်။

လီချန်ကတော့ ရှင်းရှင်းလင်းလင်း မြင်နေရသည်။

ဟွန်တွန်ပြင်ပနတ်ဘုရား စကားပြောတာကို ကြားလိုက်ရပေမဲ့ သူ မအံ့သြပါဘူး။

ဒီအဆင့် ဟွန်တွန်ပြင်ပနတ်ဘုရားဆိုတာ ၇ ခုမြောက် ရှုထောင့်အဆင့်ကို ရောက်နေပြီမို့ ဆက်သွယ်ပြောဆိုနိုင်တာ ပုံမှန်ပါပဲ။

ဟွန်တွန်ပြင်ပနတ်ဘုရားတွေရဲ့ ထူးခြားမှုကြောင့် သာမန်သက်ရှိတွေကို ဆက်သွယ်ပြောဆိုဖို့ ဝန်လေးတတ်ကြတယ်။

အရင်တုန်းက လီချန် လွတ်မြောက်ခြင်း မရသေးခင်တုန်းကလည်း ဒီဟွန်တွန်ပြင်ပနတ်ဘုရား နဲ့ ဆက်သွယ်ဖူးတယ်။ ဒါပေမဲ့ အဲဒီတုန်းက သူက စတင်ဆက်သွယ်ခဲ့ရတာ။

ဒီတစ်ခေါက်တော့ လီချန်က လွတ်မြောက်ခြင်းရပြီး၊ အချိန်ခရီးသည်ဖြစ်လာလို့ ဟွန်တွန်ပြင်ပနတ်ဘုရားအတွက် ကြီးမားတဲ့ ခြိမ်းခြောက်မှုဖြစ်လာတာကြောင့် သူကိုယ်တိုင် စတင်ဆက်သွယ်လာခြင်းဖြစ်သည်။

"ငါ အရင်တစ်ခေါက်ကပြောခဲ့တဲ့ အကြံပြုချက်ကို ဘယ်လိုသဘောရလဲ" လီချန် ပြုံးပြီး မေးလိုက်သည်။

"အာဆာလီက လွတ်လပ်တယ်... ဘယ်သူကမှ ငါ့ကို ကျွန်ပြုလို့ မရဘူး..." ထူးဆန်းသော အရိပ်၏လေသံက အေးစက်မာကျောသွားသည်။

"ကျွန်ပြုတယ်လို့ ဘယ်လိုပြောလို့ရမလဲ။ ငါတို့ စာချုပ်ချုပ်တာက မိတ်ဖက်ဖြစ်တာပါ..." လီချန် ခေါင်းခါပြီး ငြင်းလိုက်သည်။

"ဟွန့်... မင်းတို့ ဟုန်မုန်ကမ္ဘာက သက်ရှိတွေကို ယုံလို့မရဘူး" ထူးဆန်းသော အရိပ်က အထင်သေးစွာ ရယ်မောလိုက်သည်။

"မင်း ငါ ဟုန်မုန်ကမ္ဘာကလာတယ်ဆိုတာ သိတယ်လား" လီချန် အံ့သြသွားသည်။

အတိတ်ဘဝတုန်းက ဆက်သွယ်ခဲ့စဉ်မှာ ဒီဟွန်တွန်ပြင်ပနတ်ဘုရားက ဒီအကြောင်းကို ထုတ်မပြောခဲ့ဘူး။

"ငါ့ရဲ့ အမေနဲ့ အဖေ... နှစ်ယောက်စလုံး ဟုန်မုန်ကမ္ဘာရဲ့ လုပ်ကြံမှုအောက်မှာ သေဆုံးခဲ့ရတာ။ အာဆာလီနဲ့ ဟုန်မုန်ကမ္ဘာကြားက ရန်ငြိုးက ကောင်းကင်နဲ့ မြေကြီးလိုပဲ၊ ဘယ်တော့မှ မပြေပျောက်ဘူး..." ထူးဆန်းသော အရိပ်၏ စိတ်ခံစားချက် လှိုင်းဂယက်များ ပြင်းထန်လာသည်။

ပတ်ဝန်းကျင်က အချိန်ဟင်းလင်းပြင်တွေတောင် လိမ်ဖယ်ပြိုကျကုန်သည်။

"ဪ... ဟုန်မုန်ကမ္ဘာက လူတွေက မင်းရဲ့ မိဘတွေကို သတ်ခဲ့တာလား" လီချန် အံ့သြဟန်ဆောင်လိုက်ပြီး၊ ကိုယ်ချင်းစာစိတ် ဖြစ်သွားသကဲ့သို့ ပြောလိုက်သည်။ "မင်း သိလား... ငါလည်း ဟုန်မုန်ကမ္ဘာက လူတွေရဲ့ နယ်နှင်ဒဏ်ပေးတာ ခံခဲ့ရတာ။ ငါတို့မှာ တူညီတဲ့ရန်သူရှိနေတယ်လို့ မင်း မထင်ဘူးလား"

"မင်းက ဟုန်မုန်ကမ္ဘာကနေ နယ်နှင်ဒဏ် ပေးခံရတာလား" ထူးဆန်းသော အရိပ် (အာဆာလီ) ၏လေသံ ပျော့ပြောင်းသွားပြီး အံ့သြစွာ မေးလိုက်သည်။

"ဟုတ်တယ်... ငါ လုပ်နေသမျှ အရာအားလုံးက ရည်ရွယ်ချက်တစ်ခုတည်း ရှိတယ်။ အဲဒါက ဟုန်မုန်ကမ္ဘာကိုပြန်သွားပြီး လက်စားချေဖို့ပဲ... အာဆာလီ၊ မင်း ငါ့ကို တစ်ဖက်တစ်လမ်းက ကူညီနိုင်မလား" လီချန် ၏ လေသံက အလွန် ရိုးသားဟန် ပေါက်နေသည်။

"ငါ မင်းကို ကူညီရင်၊ မင်းက ငါ့ကို လက်စားချေဖို့ ကူညီမှာလား" ထူးဆန်းသော အရိပ်က စိတ်ဝင်စားသွားပုံ ရသည်။

"ဒါပေါ့... ငါတို့ မိတ်ဖက်ဖြစ်သွားရင် မင်း ငါ့ကိုကူညီ၊ ငါ မင်းကို ကူညီ... ဒါ သဘာဝကျတာပဲ မဟုတ်လား" လီချန် အလျင်အမြန် ပြောလိုက်သည်။ "ဒါနဲ့... မင်းရဲ့ မိဘတွေကို သတ်ခဲ့တာ ဟုန်မုန်ကမ္ဘာက ဘယ်သူတွေလဲ"

"ဟုန်မုန်နန်းတော်က ဟုန်မုန်အကြီးအကဲတချို့လေ... သူတို့က ယုတ်မာတဲ့ နည်းလမ်းတွေ သုံးပြီး ငါ့ အမေနဲ့ အဖေရဲ့ နတ်ဘုရားမူလရင်းမြစ်ကို လုယူသွားကြတာ..." ထူးဆန်းသော အရိပ်၏လေသံတွင် ပြင်းထန်သော အမုန်းတရားများ ပါဝင်နေသည်။

ဟုန်မုန်အကြီးအကဲတချို့?

လီချန်၏ရင်ထဲ ထိတ်လန့်သွားပြီး လေအေးတစ်ချက် ရှိုက်မိလိုက်သည်။

ဟုန်မုန်ကမ္ဘာမှာ ဟုန်မုန်အကြီးအကဲ ဘယ်နှယောက်တောင်ရှိလို့လဲ။

တစ်ယောက်ချင်းစီက ဟုန်မုန်ကမ္ဘာရဲ့ထိပ်ဆုံးမှာ ရပ်တည်နေတဲ့ သူတွေလေ။

မထင်မှတ်ထားတာက ဒီဟွန်တွန်ပြင်ပနတ်ဘုရား ရင်ဆိုင်ရမယ့် ရန်သူတွေက သူ့ထက်တောင် များနေသေးတယ်။

သူက ဟုန်မုန်အကြီးအကဲတစ်ယောက်ကိုပဲ ရင်ဆိုင်ရမှာ။

ဒီဟွန်တွန်ပြင်ပနတ်ဘုရား လက်စားချေချင်တဲ့ ပစ်မှတ်က ဟုန်မုန်အကြီးအကဲ အများကြီး ဖြစ်နေတယ်။

"အာဆာလီ... မင်းရဲ့ လက်ရှိ အင်အားနဲ့ဆိုရင် ဘယ်တော့မှ လက်စားချေနိုင်မှာ မဟုတ်ဘူး" လီချန် ပြောလိုက်သည်။

ဟွန်တွန်ပြင်ပနတ်ဘုရားတွေက မွေးရာပါ စွမ်းအားကြီးပြီး၊ တိုးတက်မှုနှုန်း မြန်ဆန်တယ်၊ သဘာဝတရား အပြင်ဘက်မှာရှိနေလို့ လွတ်မြောက်သူနဲ့ တန်းတူရှိတယ်ဆိုပေမဲ့...

ဟုန်မုန်ကမ္ဘာက ဟုန်မုန်အကြီးအကဲ တစ်ယောက်ချင်းစီမှာ အာဆာလီလို ဟွန်တွန်ပြင်ပနတ်ဘုရားမျိုးကို တစ်ချက်တည်းနဲ့ သတ်နိုင်တဲ့ စွမ်းအား ရှိကြတယ်။

"ငါ သိတယ်... ဒါပေမဲ့ ငါ လက်မလျှော့ဘူး။ ငါ ဖြည်းဖြည်းချင်း သန်မာအောင် လုပ်မယ်။ တစ်နေ့ကျရင် အဖေနဲ့ အမေအတွက် ငါ လက်စားချေမယ်" ထူးဆန်းသော အရိပ် (အာဆာလီ) က ပြတ်သားစွာ ပြောလိုက်သည်။

"အာဆာလီ... မင်း ငါနဲ့ စာချုပ်ချုပ်မယ်ဆိုရင်၊ မင်းရဲ့ စွမ်းအား တိုးတက်မှုနှုန်းကို ငါ မြှင့်တင်ပေးနိုင်တယ်" လီချန် စကားလုံး ရွေးပြီး ပြောလိုက်သည်။

ဒီဟွန်တွန်ပြင်ပနတ်ဘုရား ရင်ဆိုင်ရမယ့် အမုန်းတရားက ကြီးမားလွန်းပေမဲ့၊ လောလောဆယ် ဒီကောင်ကို လှည့်စားပြီး လက်ထဲရောက်အောင် အရင်လုပ်ရမယ်။

သူ့မှာ သားရဲထိန်းချုပ်ခြင်းစနစ်ရှိတယ်လေ။ စနစ်ကတဆင့် ဒီဟွန်တွန်ပြင်ပနတ်ဘုရား ကို ပြုစုပျိုးထောင်လိုက်ရင် အနာဂတ်မှာ သေချာပေါက် စွမ်းအားကြီးလာမှာ။

"ငါ မယုံဘူး..." ထူးဆန်းသော အရိပ်က ခေါင်းခါလိုက်သည်။ "ငါ မင်းကို မတိုက်ခိုက်တော့ဘူး။ မင်း အမြန်ထွက်သွားတော့။ ငါ အစာမစားရတာကြာပြီမို့ အစာစားဖို့ လိုနေပြီ"

သူက ဟွန်တွန်ပြင်ပနတ်ဘုရားလေ။ မွေးကတည်းက ပြင်ပဟင်းလင်းပြင်မှာ အသက်ရှင်နိုင်တဲ့ ကြောက်မက်ဖွယ် သက်ရှိ။ လီချန်ရဲ့လှည့်စားမှုကို ဘယ်လိုလုပ် ယုံမှာလဲ။

သူ လီချန်ကို မတိုက်ခိုက်တာက လီချန်က လွတ်မြောက်ခြင်း ရသွားလို့ပါ။

အရင်က လီချန်ရဲ့အကွက်ချမှုကြောင့် သူ အိပ်ပျော်သွားခဲ့ဖူးတယ်လေ။

ဒါကြောင့် လီချန်ကို သူ သတိထားနေတာ။

အထူးသဖြင့် အခု လီချန်က လွတ်မြောက်သူဖြစ်လာတော့ ခြိမ်းခြောက်မှုက ပိုကြီးလာပြီ။

"အာဆာလီ... မင်းက အစာစားရုံနဲ့ ဘယ်တော့မှ လက်စားချေနိုင်မှာ မဟုတ်ဘူး။ မင်းရဲ့ အမေနဲ့ အဖေက အရင်တုန်းက ဘယ်လောက် စွမ်းအားကြီးခဲ့လဲ။ မင်း အခု သူတို့နဲ့ယှဉ်ရင် ဘယ်လောက် ကွာခြားနေသေးလဲ" လီချန် က ဒီတိုင်း လက်မလျှော့ဘဲ မေးလိုက်သည်။

"ငါ အခုထိ အရွယ်မရောက်သေးဘူးလေ... ဒါပေမဲ့ ငါ ကမ္ဘာတချို့ကို ထပ်စားလိုက်ရင် အသွင်ပြောင်းခြင်း ပြီးမြောက်သွားလိမ့်မယ်... တစ်နေ့ကျရင် ငါ လုံလောက်တဲ့ အင်အား ရှိလာမှာပါ" အာဆာလီ ပြောလိုက်သည်။

"အဲဒီ တစ်နေ့ဆိုတာ ဘယ်လောက် ကြာဦးမှာလဲ။ အရမ်းမကြာလွန်းဘူးလား" လီချန် ပြောလိုက်သည်။ "ဟုန်မုန်နတ်ဘုရားချီအကြောင်း ကြားဖူးလား"

"ဟုန်မုန်နတ်ဘုရားချီ? ကြားဖူးတာပေါ့။ ဟုန်မုန်နတ်ဘုရားချီက ကမ္ဘာပေါင်းများစွာကို မွေးဖွားပေးတယ်လေ... ငါ ကမ္ဘာတွေကို မျိုချနေတာက အဲဒီထဲမှာ ကျန်ရစ်နေတဲ့ ဟုန်မုန်နတ်ဘုရားချီတွေကို ထုတ်ယူချင်လို့ပဲ" အာဆာလီ ပြောလိုက်သည်။

ဟွန်တွန်ပြင်ပနတ်ဘုရား တစ်ပါးအနေနဲ့ ဟုန်မုန်နတ်ဘုရားချီအကြောင်း မသိစရာ အကြောင်း မရှိဘူး။ ဒါက သွေးသားထဲမှာပါလာတဲ့ အသိပညာပဲ။ အရွယ်ရောက်တာနဲ့ အလိုလို သိလာတာ။

ဟွန်တွန်ပြင်ပနတ်ဘုရားတွေလို ပြင်ပဟင်းလင်းပြင် သက်ရှိတွေအတွက် ဟုန်မုန်နတ်ဘုရားချီဆိုတာ တန်ဖိုးအရှိဆုံး အစာအာဟာရပဲ။

"အာဆာလီ... တကယ်လို့ ငါ့မှာ ဟုန်မုန်နတ်ဘုရားချီတွေ ပိုရနိုင်မယ့် နည်းလမ်းရှိတယ်၊ မင်းကို ပိုပြီး မြန်မြန် စွမ်းအားကြီးလာအောင် ကူညီပေးနိုင်တယ်ဆိုရင်... မင်း ယုံမလား" လီချန် ပြောလိုက်သည်။

"မင်းလို လွတ်မြောက်သူ အသေးစားလေးတစ်ယောက်က ဘယ်လိုလုပ် ဟုန်မုန်နတ်ဘုရားချီ ရနိုင်မှာလဲ။ ငါ လုံးဝ မယုံဘူး" အာဆာလီ က လှောင်ပြောင်စွာ ပြောလိုက်သည်။

"ဒါဆို ငါတို့ လောင်းကြေးထပ်မလား" လီချန် စိန်ခေါ်လိုက်သည်။

"ဘာလောင်းကြေးလဲ" အာဆာလီ မေးလိုက်သည်။

"မင်း နောက်ထပ် နှစ်နည်းနည်းစောင့်... အဲဒီအချိန်ကျရင် ငါ မင်းကို ဟုန်မုန်နတ်ဘုရားချီ မပေးနိုင်ရင် မင်း ဒီကမ္ဘာတွေကို ဝါးမျိုတာ ငါ ဘယ်တော့မှ မတားဆီးတော့ဘူး။ ဒါပေမဲ့ ငါ ပေးနိုင်ခဲ့ရင်တော့ မင်း ငါနဲ့ စာချုပ်ချုပ်ရမယ်" လီချန် ကမ်းလှမ်းလိုက်သည်။

အာဆာလီ တိတ်ဆိတ်သွားပြီး အကျိုးအမြတ်ကို တွက်ချက်နေပုံရသည်။

အချိန်အတော်ကြာမှ အာဆာလီ ပြန်ပြောလိုက်သည်။ "ကောင်းပြီ... ငါ မင်းကို တစ်ကြိမ် ယုံကြည့်မယ်။ နောက်ထပ် နှစ်နည်းနည်း အချိန်ပေးမယ်"

ဘာပဲဖြစ်ဖြစ် နှစ်အနည်းငယ်ဆိုတာ သက်တမ်း အကန့်အသတ်မရှိတဲ့ သူ့လို ဟွန်တွန်ပြင်ပနတ်ဘုရားအတွက် သမ်းဝေလိုက်တဲ့ အချိန်လောက်ပဲရှိတာပါ။

***