နဂါးတံခါး အချိန်မှတ်ခြင်း

အခန်းထဲတွင် ထန်ထျန်းနှင့် ကုရှောင်းရွှယ်တို့မှာ အချိန်အတော်ကြာအောင် စကားပြောဖြစ်ခဲ့ကြသည်။

သူတို့နှစ်ဦးမှာ ချင်းယွဲ့ဂိုဏ်းတွင် စတင်သိကျွမ်းခဲ့သည့် ထိုအချိန်များဆီသို့ ပြန်ရောက်သွားသလို ခံစားရသည်။

ထိုစဉ်က ထန်ထျန်းမှာ ကျင့်ကြံခြင်းနှင့် ပတ်သက်၍ ဘာမှမသိသေးဘဲ ကုရှောင်းရွှယ်မှာ သူ၏ သက်တော်စောင့်အဖြစ်ရော၊ ဆရာအဖြစ်ပါ တာဝန်ယူကာ ကျင့်ကြံခြင်း တံခါးပေါက်ကို ဖွင့်ပေးခဲ့သူဖြစ်သည်။

နောက်ပိုင်းတွင် ထန်ထျန်း၏ အခြေခံများမှာ ပိုမိုများပြားလာပြီး ကုရှောင်းရွှယ်ကို အဝေးကြီးမှာပင် ချန်ထားရစ်ခဲ့သည်။

ယခုအခါ သူတို့နှစ်ဦး၏ နေရာ မှာ ပြောင်းပြန်ဖြစ်သွားခဲ့ပြီဖြစ်ရာ ထန်ထျန်းက ဆရာ ဖြစ်လာခဲ့သည်။

"မင်းရဲ့ ကျင့်ကြံခြင်းနှုန်းက အရမ်းမြန်တယ်၊ ဒါကြောင့် တရားနိယာမ အပေါ်မှာ နားလည်နိုင်စွမ်း ကလည်း လိုက်မီနေဖို့ လိုတယ်"

"မဟုတ်ရင်တော့ မင်းက ခွန်အားပဲရှိပြီး အရည်အချင်းမရှိတဲ့ အခွံသက်သက် လူမျိုး ဖြစ်သွားလိမ့်မယ်"

ထန်ထျန်းက ပြောသည်။

သို့သော် ကုရှောင်းရွှယ်မှာ သေချာနားထောင်ပုံမရဘဲ သူမ၏ အာရုံများမှာ လက်ထဲမှ ကျောက်စိမ်းဆံထိုးပေါ်မှာပင် ရှိနေသည်။

"သိပါပြီ"

"နားလည်ပါတယ်"

"ဟုတ်ပါပြီ"

"အာ... ဒါက ဒီလိုမျိုးလား"

သူမ၏ ဝတ်ကျေတန်းကျေ ပြန်ဖြေမှုများကြောင့် ထန်ထျန်းမှာ စိတ်တိုသွားရသည်။

"စိတ်မပူပါနဲ့၊ ဒီကမ္ဘာကြီးက ကျွန်မကို အရမ်းချစ်တာ။ ကျွန်မရဲ့ နားလည်မှု အဆင့်က ကျင့်ကြံခြင်းအဆင့်ကို သေချာပေါက် လိုက်မီပါတယ်။ "

"တိုက်ခိုက်တာနဲ့ ပတ်သက်ရင်တော့..."

" ကျွန်မက အစွမ်းကုန် တိုက်ရတာကို ပိုကြိုက်တယ်။ နိုင်ရင် ပြီးတာပဲလေ၊ မနိုင်ရင်လည်း အရှုံးပေါ့"

ကုရှောင်းရွှယ်က ပြုံးစိစိဖြင့် ပြောသည်။

ထန်ထျန်းက ဘာမှပြန်မပြောဘဲ ခေါင်းခါလိုက်သည်။

သူမ၏ တိုက်ခိုက်ပုံမှာ ထိရောက်မှုရှိသော်လည်း အလွန်ပင် အစွန်းရောက်လွန်းလှသည်။

ရန်သူကသာ သူမ၏ အားနည်းချက်ကို သိသွားပါက သေချာပေါက် ဒုက္ခရောက်ပေလိမ့်မည်။

သို့သော်လည်း လူတိုင်းတွင် ကိုယ်ပိုင်ဟန် ရှိကြသည်ဖြစ်ရာ အတင်းအကျပ် ပြောင်းလဲခိုင်းခြင်းကလည်း ကောင်းကျိုး ဖြစ်ချင်မှ ဖြစ်ပေလိမ့်မည်။

ပါရမီတစ်ခုတည်းနှင့် ကမ္ဘာပတ်၍ ရနိုင်သည်ဆိုသော အချက်မှာလည်း ကျင့်ကြံခြင်းလောကတွင် ရှိနေသည် မဟုတ်ပါလား။

ထားလိုက်ပါတော့လေ၊ သူမက သဘောကျနေမှတော့ လက်ရှိတွင် ဤအတိုင်းသာ ရှိပါစေတော့ ။

သူမက ငယ်သေးသည်ဖြစ်ရာ ကြီးလာမှသာ ဆက်ပြောရပေလိမ့်မည်။

ဝိုင်တစ်ခွက် သောက်လိုက်ရင်း ထန်ထျန်းက ဤဝိုင်ကို အတော်လေး နှစ်သက်လာမိကြောင်း သိလိုက်ရသည်။ ၎င်းက လူ၏ စိတ်ခံစားချက်များကို တည်ငြိမ်သွားစေနိုင်စွမ်းရှိသည်။

"ဟေ့... ရှင် အခု ဝိုင်သောက်တတ်သွားပြီလား"

မျက်စိလျင်သော ကုရှောင်းရွှယ်က ချက်ချင်း သတိထားမိသွားသည်။

ထန်ထျန်းက ခေါင်းငြိမ့်ပြကာ "ဒီဝိုင်က တကယ်ကောင်းတယ်၊ သောက်ရတာ ချောမွေ့ပြီး ခန္ဓာကိုယ်ကိုလည်း သန်မာစေတယ်။"

" မင်းလည်း စမ်းကြည့်မလား"

ထိုသို့ပြောပြီး ကုရှောင်းရွှယ်အတွက် တစ်ခွက် ငှဲ့ပေးလိုက်သည်။

ကုရှောင်းရွှယ်က ဝိုင်ခွက်ကိုယူ၍ နှာခေါင်းနားသို့ တိုးကာ အနံ့ခံကြည့်ပြီးနောက် အနည်းငယ် မြည်းစမ်းကြည့်လိုက်သည်။

သို့သော် နောက်တစ်စက္ကန့်တွင်ပင် သူမက ဝိုင်အားလုံးကို ပြန်ထွေးထုတ်လိုက်တော့သည်။

"အဟွတ်..."

" ရှင်သောက်နေတာ ဘာကြီးလဲ၊ ဘာလို့ ဒီလောက်တောင် အေးနေရတာလဲ"

"ကျွန်မ လျှာတောင် ခဲသွားပြီ"

ကုရှောင်းရွှယ်က ငိုကာ ပြောလိုက်သည်။

ထန်ထျန်း ချက်ချင်း မှင်တက်သွားသည်။

အေးတယ်လား

သူသောက်လိုက်စဉ်က နူးညံ့ပြီး နွေးထွေးသည့် ခံစားချက်မျိုးကိုသာ ရခဲ့သည် မဟုတ်ပါလား၊ ဘယ်နေရာက အေးနေလို့လဲ

ကုရှောင်းရွှယ်မှာ တဟူးဟူးနှင့် လေမှုတ်နေပြီး မျက်ရည်များပင် ထွက်လာသည်ကို မြင်ရသောအခါ ထန်ထျန်း ပို၍ အံ့အားသင့်သွားရသည်။

"မဟုတ်နိုင်ပါဘူး..."

" အဲ့လောက်တောင် အေးလို့လား"

" မင်းကိုတောင် အေးလို့ ငိုသွားစေလောက်တဲ့အထိလား"

ထန်ထျန်းက မေးလိုက်သည်။

"အာ"

" ကျွန်မ မငိုပါဘူး"

ကုရှောင်းရွှယ်က အမှတ်မထင် မျက်လုံးကို သုတ်လိုက်ရာ လက်ပေါ်တွင် စိုစွတ်နေသည့် မျက်ရည်စများကို မြင်လိုက်ရသဖြင့် သူမကိုယ်တိုင်လည်း မှင်တက်သွားသည်။

"အယ်... "

"ဒါက ဘာဖြစ်တာလဲ"

" ကျွန်မ တကယ် မငိုပါဘူး"

ထန်ထျန်း တိတ်ဆိတ်သွားသည်။

ဤအခြေအနေမှာ အနည်းငယ် ထူးဆန်းနေသည်။

လအင်မော်တယ်၏ ဝိုင်က လူတစ်ဦးနှင့် တစ်ဦးအပေါ် မူတည်ပြီး ကွဲပြားသော အာနိသင်များ ရှိနေခြင်းလား

ခဏ တိတ်ဆိတ်သွားပြီးနောက် ထန်ထျန်းက ကုရှောင်းရွှယ်ရှေ့မှ ဝိုင်ခွက်ကို ပြန်ယူလိုက်သည်။ "ဝိုင်မှာ ပြဿနာရှိလို့ ဖြစ်မှာပါ"

သူက ပြော သည်။

ကုရှောင်းရွှယ်က သူမ၏ မျက်နှာကို ထပ်ခါတလဲလဲ သုတ်လိုက်ရင်း "သေချာပေါက် ပြဿနာရှိတာ"

" ဒီမျက်ရည်တွေက ရပ်လို့မရတော့ဘူး။ "

"ပြီးတော့... ကျွန်မ ရုတ်တရက်ကြီး ဘာလို့မှန်းမသိ ဝမ်းနည်းလာတယ်"

" အရေးကြီးတဲ့ လူတစ်ယောက် ပျောက်ကွယ်သွားသလိုမျိုး ခံစားရတယ်..."

ထန်ထျန်း ဘာမှ ပြန်မပြောခဲ့ပေ။ ဒါဟာ ကုရှောင်းရွှယ်ဆီက ထူးခြားတဲ့ အမူအရာကို သူ ပထမဆုံးအကြိမ် မြင်လိုက်ရခြင်းဖြစ်သည်။

လအင်မော်တယ်က သူမအတွက် ဆံထိုးကို သီးသန့်ပေးလိုက်ခြင်းမှာ အကြောင်းရင်း မရှိဘဲတော့ မဟုတ်ပေ။

"ထားလိုက်ပါတော့၊ ဒီဝိုင်က မိန်းမတွေ သောက်လို့မရတဲ့ အမျိုးအစား ဖြစ်မှာပါ။ "

"အချိန်လည်း မစောတော့ဘူး၊ မင်း ပြန်နားတော့။"

" ဝမ့်ယွဲ့လှိုဏ်ဂူ ပိတ်ဖို့ ရက်အနည်းငယ်ပဲ လိုတော့တယ်၊ ငါ့ကို ကျော်တက်ချင်တယ်ဆိုရင် ရသမျှ အချိန်ကို အသုံးချလိုက်ဦး"

သူက လအင်မော်တယ်နှင့် ပတ်သက်သည့် ကိစ္စများကို ကုရှောင်းရွှယ်အား မပြောပြလိုသေးပေ။

အဓိပ္ပာယ် မရှိသလို၊ သူတို့၏ လက်ရှိအစွမ်းမှာလည်း အလွန် အားနည်းနေသေးသည်။ သိခဲ့လျှင်တောင် ဘာမှလုပ်နိုင်မည် မဟုတ်ဘဲ စိတ်အနှောင့်အယှက် ဖြစ်ရုံသာ ရှိပေလိမ့်မည်။

နောင်ကျမှ 'ကောင်းကင်ထိပ်ဖျား' သို့ ရောက်သည့်အခါမှသာ ဆက်ပြောရပေမည်။

ကုရှောင်းရွှယ်က ခေါင်းငြိမ့်ပြကာ မျက်ရည်များကို သုတ်ရင်း အခန်းထဲမှ ထွက်သွားခဲ့သည်။

တော်သေးသည်မှာ အပြင်တွင် ဘယ်သူမှ ရှိမနေခြင်းဖြစ်သည်၊ မဟုတ်လျှင် ထန်ထျန်းတစ်ယောက် ကောင်မလေးကို ဘာလုပ်လိုက်သလဲဟု အထင်မှားခံရပေလိမ့်မည်။

ကုရှောင်းရွှယ် ထွက်သွားပြီးနောက် ထန်ထျန်းက ခဏတာ ထိုင်နေပြီးမှ မိုရှောင်းရှောင်းကို ဆက်သွယ်ကာ 'ကောင်းကင်ထိပ်ဖျား' အကြောင်း စုံစမ်းကြည့်လိုက်သည်။

သို့သော် အံ့အားသင့်စရာမှာ သူမသည်လည်း ထိုနာမည်ကို တစ်ခါမှ မကြားဖူးခြင်းပင်။

လော့ရှီးကဲ့သို့ပင် သူမသည်လည်း မိသားစုမှ လူကြီးများကို မေးမြန်းပေးမည်ဟု ကတိပေးခဲ့သည်။

ထို့နောက် ထန်ထျန်းက စိတ်ကို တည်ငြိမ်အောင် ထားပြီး ကျင့်ကြံခြင်းထဲသို့ ဝင်ရောက်သွားခဲ့သည်။

....

နောက်ပိုင်းရက်များတွင် ထန်ထျန်းက မနားတမ်း ကျင့်ကြံနေခဲ့သည်။

လအင်မော်တယ် ပေးခဲ့သည့် လခြမ်းပုံ ကျောက်စိမ်းပြားကြောင့် သူက ဘယ်နေရာမှာပဲ ကျင့်ကြံနေပါစေ လပြည့်ညကဲ့သို့ အာနိသင်မျိုး ရရှိနေခဲ့သည်။

အမှန်တကယ်တော့ ထိုညကထက်ပင် ပို၍ ထိရောက်နေသေးသည်။

မကြာမီမှာပင် ထန်ထျန်းက ကောင်းကင်အင်မော်တယ် ၏ နှောင်းပိုင်း အဆင့်ကို ကျော်ဖြတ်ကာ ဆန်းကြယ် အင်မော်တယ် အဆင့်သို့ တရားဝင် ရောက်ရှိသွားခဲ့သည်။

သူ ထျန်းဖူနန်းတော် သို့ ရောက်ရှိလာခဲ့သည်မှာ နှစ်လကျော်သာ ရှိသေးသည်။

ဤမျှ တိုတောင်းသော အချိန်အတွင်းမှာပင် အစစ်အမှန်အင်မော်တယ်မှ အဆင့်ကြီး နှစ်ခုကို ကျော်ဖြတ်ကာ ဆန်းကြယ် အင်မော်တယ် အဆင့်သို့ ရောက်ရှိလာခြင်းမှာ မယုံနိုင်စရာပင်။

ဤအကြောင်းသာ အပြင်သို့ ပေါက်ကြားသွားပါက လူအများ အံ့သြလွန်း၍ ပါးစပ်အဟောင်းသား ဖြစ်သွားကြပေလိမ့်မည်။

သို့သော် ဤသည်မှာ အစသာ ရှိသေးသည်။ ကျောက်စိမ်းပြား နှစ်ခုလုံး ရှိနေသရွေ့ သူ၏ တိုးတက်မှုမှာ ရပ်တန့်နေမည် မဟုတ်ပေ။

နှစ်လနီးပါး ကျင့်ကြံပြီးနောက် ဝမ့်ယွဲ့လှိုဏ်ဂူမှာ ပိတ်တော့မည်ဖြစ်သည်။

တစ်ချိန်တည်းမှာပင် 'နဂါးတံခါး' စမ်းသပ်ပွဲကြီးမှာလည်း နီးကပ်လာခဲ့ပြီ ဖြစ်သည်။

ဤသည်မှာ ထျန်းဖူ နန်းတော်၏ အကြီးကျယ်ဆုံး အခမ်းအနားဖြစ်သလို တပည့်သစ်များအတွက် အရေးကြီးဆုံး စစ်ဆေးမှုလည်း ဖြစ်သည်။

အားလုံး၏ အကြည့်များမှာ နဂါးတံခါးပေါ်သို့ ကျရောက်နေကြပြီး တပည့်များမှာ စိတ်လှုပ်ရှားစွာ ဆွေးနွေးနေကြသည်။

"ဒီတစ်ခါတော့ ခေါင်းလောင်းသံ ကိုးချက် တီးနိုင်မယ့် ပါရမီရှင် ဘယ်နှစ်ယောက် ထွက်လာမလဲ"

တစ်စုံတစ်ယောက်က မေးလိုက်သည်။

"ပြောရခက်တယ်၊ ဒါပေမဲ့ နှစ်တိုင်းမှာ အနည်းဆုံး တစ်ယောက်တော့ ရှိတတ်တာပဲ။"

" ငါ့အမြင်အရတော့ ကောင်းကင်စာရင်းရဲ့ နံပါတ်တစ် လော့ရှီးက အဲ့ဒီလို အောင်မြင်မှုမျိုး ရနိုင်လိမ့်မယ်"

နောက်တစ်ယောက်က ဖြေသည်။

သို့သော် မကြာမီမှာပင် လူတစ်ယောက်က အထင်အမြင်သေးစွာဖြင့် "မင်းက ငယ်သေးလို့ ဘာမှမသိသေးတာ"

" အရင်တုန်းက ခေါင်းလောင်းသံ ကိုးချက် တီးနိုင်တဲ့ ပါရမီရှင်တွေထဲမှာ ဘယ်နှစ်ယောက်က ကောင်းကင်စာရင်း နံပါတ်တစ် ဖြစ်ခဲ့လို့လဲ"

"တကယ့် ထူးခြားတဲ့ ပါရမီရှင် တွေကို နန်းတော်က ဝှက်ထားတာလေ၊ သူတို့တွေသာ ထွက်လာရင် ကမ္ဘာကြီးကို တုန်လှုပ်သွားစေမှာ"

ထိုစကားကြောင့် ငြင်းခုံမှုများ ဖြစ်ပွားလာပြီး လော့ရှီးနှင့် အခြား ပါရမီရှင်များအကြောင်းကို အပြင်းအထန် ဆွေးနွေးနေကြသည်။

ထိုအသံများကြားထဲမှ တစ်စုံတစ်ယောက်က ရုတ်တရက် "ဒါနဲ့... ထန်ထျန်းရော ခေါင်းလောင်း ကိုးချက် တီးနိုင်မလား"

ဤစကားကြောင့် ဝိုင်းဖွဲ့ရယ်မောသံများ ထွက်ပေါ်လာသည်။

"ဟာသ မလုပ်စမ်းပါနဲ့၊ မင်းက ခေါင်းလောင်း ကိုးချက်ဆိုတာကို အထင်သေးနေတာလား"

" ထန်ထျန်းက တော်တယ်ဆိုတာ ငါလက်ခံပါတယ်၊ ဒါပေမဲ့ ကောင်းကင်စာရင်း နံပါတ်တစ်တောင်မှ မသေချာတဲ့ ကိစ္စကို နံပါတ်နှစ် ဖြစ်တဲ့ သူက လုပ်နိုင်မှာ မဟုတ်ပါဘူး။ နဂါးတံခါးက တိုက်ရည်ခိုက်ရည်ကို စမ်းသပ်တာ မဟုတ်ဘူး၊"

" ကျင့်ကြံသူတစ်ယောက်ရဲ့ ပါရမီကို စမ်းသပ်တာ။ ထန်ထျန်းက အပြင်လောကက လာတာဆိုတော့ အခြေခံက အားနည်းနေမှာ သေချာတယ်။ သူ ခေါင်းလောင်း ခြောက်ချက် တီးနိုင်ရင်တောင် အံ့ဖွယ်ပဲ"

"သူသာ ကိုးချက် တီးနိုင်ရင် ငါ ခေါင်းနဲ့ လမ်းလျှောက်ပြမယ်"

"ငါလည်း ပါမယ်..."

လူအများစုမှာ ထန်ထျန်းကို အထင်မကြီးကြပေ။

အဘယ်ကြောင့်ဆိုသော် အရင်ကသာဓကများ ရှိခဲ့သောကြောင့် ဖြစ်သည်။

လက်ရှိ အင်မော်တယ်အရှင် လင်းလျို့ ပင်လျှင် ထိုစဉ်က ခြောက်ချက်သာ တီးနိုင်ခဲ့ခြင်း ဖြစ်သည်။

ထိုသို့ဖြစ်ရခြင်းမှာ သူမက အပြင်လောကမှ လာသူဖြစ်၍ အခြေခံအားနည်းခြင်းကြောင့် ဖြစ်သည်။

ထန်ထျန်းမှာလည်း သူမကဲ့သို့ပင် အပြင်လောကမှ လာသူဖြစ်ရာ လူအများက သူ့ကို လျှော့တွက်နေကြသည်။

ဤကဲ့သို့သော အခြေအနေများအကြားတွင် နဂါးတံခါး ဖွင့်မည့်အချိန်မှာ အချိန်မှတ်ခြင်း စတင်နေပြီ ဖြစ်သည်။