ကောင်းကင်နှင့် မြေကြီး စာရင်းဝင်များ၏ အလှည့်

ဝမ့်ယွဲ့လှိုဏ်ဂူ၊ နံနက်ခင်း

လှိုဏ်ဂူ ၏ ခြံ ဝင်းထဲတွင် ထန်ထျန်း၊ ကုရှောင်းရွှယ်၊ လီဟုန်နှင့်အတူ လန်ယွီ၊ လွီကျူး ညီအစ်မ နှစ်ဦးတို့က ကျောက်စားပွဲတွင် ဝိုင်းထိုင်နေကြသည်။

ယနေ့က သူတို့ ဝမ့်ယွဲ့လှိုဏ်ဂူတွင် နေရမည့် နောက်ဆုံးနေ့ ဖြစ်သည်။

ယနေ့ကုန်ဆုံးသွားပါက လှိုဏ်ဂူမှာ လုံးဝ ပိတ်သွားမည်ဖြစ်ပြီး နောက်တစ်ကြိမ် ပြန်ပွင့်ရန်မှာ နောက်နှစ်အထိ စောင့်ရပေတော့မည်။

တစ်ချိန်တည်းမှာပင် ယနေ့က "နဂါးတံခါး" စမ်းသပ်ပွဲ ကျင်းပမည့်နေ့လည်း ဖြစ်သည်။

"တစ်ရက်တည်းနဲ့ အချိန်မီပါ့မလား"

"ဒီတစ်သုတ် တပည့်သစ်တွေက တစ်သိန်းကျော်တောင် ရှိတာ မဟုတ်လား"

ထန်ထျန်းက မေးလိုက်သည်။

ထျန်းဖူနန်းတော်တွင် တပည့်များစွာ ရှိသည်။ လူတစ်ယောက် နဂါးတံခါးကို ဖြတ်ကျော်ရန် တစ်စက္ကန့်သာ ကြာမည်ဆိုလျှင်တောင် အားလုံးပြီးစီးရန် ရက်အတော်ကြာ အချိန်ယူရပေလိမ့်မည်။

အကယ်၍ ယနေ့ သူတို့ နဂါးတံခါးကို မဖြတ်ကျော်နိုင်ခဲ့ပါက နေစရာနေရာတောင် ရှိတော့မည် မဟုတ်ချေ။

"တစ်ရက်တည်းနဲ့တော့ မပြီးနိုင်ပါဘူး"

လီဟုန်က ပြုံး၍ ရှင်းပြသည်။ "ပုံမှန်အားဖြင့် နဂါးတံခါး စမ်းသပ်ပွဲက စုစုပေါင်း ၁၀ ရက် ကြာတတ်ပါတယ်။ တစ်ရက်ကို တပည့်ပေါင်း တစ်သောင်းကျော်စီ စမ်းသပ်မှု ခံယူရတာပါ။"

" အဲ့ဒီအချိန်အတောအတွင်းမှာ ထျန်းဖူ နန်းတော်က တပည့်အားလုံး နားခိုဖို့ နေရာတစ်ခု စီစဉ်ပေးပါလိမ့်မယ်။"

" ဒါပေမဲ့ လူဦးရေ အရမ်းများတာကြောင့် အဲ့ဒီနေရာတွေက နားနားနေနေ နေဖို့လောက်ပဲ ရမှာပါ၊ ကျင့်ကြံဖို့အတွက်ဆိုရင်တော့ မဖြစ်နိုင်သလောက်ပါပဲ"

ထန်ထျန်း မျက်မှောင်ကြုတ်လိုက်မိသည်။ "ဒါဆို နောက်ဆုံးရက်တွေမှ နဂါးတံခါးကို ဝင်ရမယ့် တပည့်တွေအတွက် မတရားသလို ဖြစ်မနေဘူးလား"

ကျင့်ကြံချိန် ဖြုန်းတီးမိသလို ဖြစ်ရုံသာမက အကြာကြီး စောင့်ဆိုင်းရသည့်အတွက် စိတ်ဓာတ်နှင့် ခန္ဓာကိုယ် အခြေအနေ မှာလည်း ပြဿနာ ရှိလာနိုင်သည်။

သို့သော် လီဟုန်က ခေါင်းခါလျက် "အခြေခံအားဖြင့်တော့ ဘာသက်ရောက်မှုမှ မရှိပါဘူး။"

" ဘာလို့လဲဆိုတော့ နဂါးတံခါး စမ်းသပ်ပွဲက သာမန်စမ်းသပ်ပွဲတွေနဲ့ မတူလို့ပါ။ သူက ကျင့်ကြံသူတစ်ယောက်ရဲ့ အနက်ရှိုင်းဆုံး ပါရမီကို စစ်ဆေးတာ ဖြစ်လို့ အဲ့ဒီအချိန်မှာ ရှိနေတဲ့ ခန္ဓာကိုယ် အခြေအနေပေါ်မှာ မူတည်ခြင်း မရှိပါဘူး။"

" ပထမဆုံးရက်မှာ ဝင်တာဖြစ်ဖြစ်၊ ၁၀ ရက်မြောက်နေ့မှာ ဝင်တာဖြစ်ဖြစ် စစ်ဆေးမှုရလဒ်က ပြောင်းလဲသွားမှာ မဟုတ်ပါဘူး။ "

"အလွန်ဆုံးရှိရင် ကျင့်ကြံချိန် ရက်အနည်းငယ် ဖြုန်းတီးမိတာပဲ ရှိမှာပါ"

"ဒါပေမဲ့..."

လီဟုန်က စကားလမ်းကြောင်း လွှဲလိုက်ပြီး "နန်းတော်က အဲ့ဒီလို ပြောထားပေမဲ့လည်း တပည့်တွေကြားမှာတော့ နဂါးတံခါးကို စောစောဝင်နိုင်လေ ပိုကောင်းလေပဲဆိုပြီး ကောလာဟလတွေ ရှိနေကြတယ်။"

" သူတို့က ဒါကို 'ကျင့်ကြံခြင်း ကံကြမ္မာ ' လို့ ခေါ်ကြတာပေါ့။"

" ဒါကြောင့် တပည့်အများစုက စောစောစီးစီး ဖြတ်ကျော်ချင်ကြတာပါ။"

" ဒီလို အခြေအနေတွေကြောင့် တစ်ခု ဖြစ်လာတာကတော့..."

" စောစောဖြတ်ကျော်နိုင်တဲ့ တပည့်တွေက ပိုပြီး အစွမ်းထက်တဲ့သူတွေ ဖြစ်နေတတ်တာပါပဲ"

ထန်ထျန်း အံ့အားသင့်သွားရသည်။

'လော့ရှီး' ဆိုတဲ့ ကောင်မလေးတစ်ယောက်တည်း ကံကြမ္မာ တွေကို ယုံတာ မဟုတ်ဘဲ ထျန်းဖူနန်းတော်က တပည့်အားလုံးက ဒီလိုပဲကိုး။

သေချာ စဉ်းစားကြည့်လျှင်လည်း အစွမ်းထက်သူများမှာ ဤကဲ့သို့ ကိစ္စရပ်များအတွက် အချိန်မဖြုန်းလိုကြချေ။

သူကိုယ်တိုင်ဆိုလျှင်လည်း ပထမဆုံးရက်မှာပင် ဝင်ရောက်ရန် ရွေးချယ်မိမည်သာ ဖြစ်သည်။

"ဒါဆိုရင် စောစောဝင်ချင်တဲ့သူတွေကြားမှာ အငြင်းပွားမှုတွေ အများကြီး ရှိလာနိုင်တာပေါ့။ "

"ထျန်းဖူနန်းတော်က ဒါကို မတားဘူးလား"

ထန်ထျန်းက မေးသည်။

"တားတာပေါ့"

လီဟုန်က ပြော သည်။ "အရင်တုန်းကတော့ နန်းတော်က ကြားဝင်စွက်ဖက်ခြင်း မရှိခဲ့ဘူး၊ ဒါကြောင့် နှစ်တိုင်း နဂါးတံခါးရှေ့မှာ အကြီးအကျယ် တိုက်ခိုက်တဲ့ ပွဲတော်ကြီး ဖြစ်ခဲ့တာပေါ့။ "

"အဲ့ဒီတုန်းက တပည့်အသစ် အရေအတွက်ကလည်း အခုလောက် မများသေးတော့ လူကြီးတွေက ဒါကိုပါ စမ်းသပ်မှုတစ်ခုအဖြစ် သတ်မှတ်ခဲ့ကြတယ်။ ဒါက 'နဂါးတံခါး စမ်းသပ်ပွဲ' ဆိုတဲ့ နာမည် စတင်လာပုံပါပဲ။"

" ဒါပေမဲ့ နောက်ပိုင်း တပည့်တွေ ပိုများလာတဲ့အခါမှာတော့ စနစ်တကျ စီမံဖို့ လိုအပ်လာခဲ့တယ်"

"အခုတော့ နန်းတော်က တပည့်တွေရဲ့ အခြေအနေအလိုက် အသုတ်လိုက် ခွဲခြားထားပါတယ်။ အရင်ကလိုပဲ အစွမ်းထက်တဲ့သူက အရင်ဝင်ရမယ်ဆိုတဲ့ ပုံစံမျိုးကိုပဲ အသုံးပြုထားတာပါ။"

" ဥပမာ ပထမဆုံး အသုတ်မှာ ဝင်ရမယ့်သူတွေက အဓိကအားဖြင့် 'ကောင်းကင်နှင့် မြေကြီး စာရင်း' မှာ ပါတဲ့သူတွေ ဖြစ်ပါတယ်"

ထန်ထျန်း ခေါင်းငြိမ့်လိုက်သည်။

တစ်သိန်းကျော်သော တပည့်များကို စနစ်တကျ မစီမံထားပါက မည်မျှ ရှုပ်ထွေးသွားမည်ကို တွေးကြည့်၍ပင် မရနိုင်ချေ။

ယခုလို အသုတ်လိုက် ခွဲခြားထားခြင်းက ပို၍ ကောင်းမွန်လှသည်။

ထို့ပြင် အစွမ်းထက်သူများကို စုစည်းထားခြင်းဖြင့် အကြီးအကဲ များအတွက်လည်း ပါရမီရှင်များကို ရွေးချယ်ပြီး အထူးပျိုးထောင်ရန် ပို၍ လွယ်ကူစေသည်။

"ဒါဆိုရင် ငါက ပထမဆုံးအသုတ်ပေါ့"

ထန်ထျန်းက ပြုံး၍ မေးလိုက်သည်။

သူက လက်ရှိတွင် 'ကောင်းကင်စာရင်း' ၏ နံပါတ် (၂) နေရာမှာ အခိုင်အမာ ရှိနေသည် မဟုတ်ပါလား။

လီဟုန်က ပြုံးလျက် ခေါင်းငြိမ့်ပြသည်။ "ဟုတ်ပါတယ် သခင်လေး "

"အစီအစဉ်ကို ကိုယ်တိုင် ရွေးချယ်လို့ ရတယ်ဆိုပေမဲ့ သခင်လေး ကတော့ သေချာပေါက် ပထမအသုတ်မှာ ပါမှာပါ။"

" နှမြောစရာ ကောင်းတာက ရှောင်းရွှယ်က လူပုံအလယ်မှာ သူမရဲ့ အစွမ်းကို မပြဖူးတာပဲ၊ မဟုတ်ရင် သူမလည်း ရှေ့ဆုံးမှာ ပါမှာ သေချာပါတယ်"

ဤရက်ပိုင်းအတွင်း ကျင့်ကြံပြီးနောက် ကုရှောင်းရွှယ်၏ အဆင့်မှာ အစစ်အမှန်အင်မော်တယ် အလယ်အလတ်အဆင့်သို့ ရောက်ရှိနေပြီ ဖြစ်သည်။

သူမ၏ ထူးခြားသော တိုက်ခိုက်ရေးပုံနှင့် ပေါင်းစပ်လိုက်လျှင် 'မြေကြီး စာရင်း' ထဲသို့ ဝင်ရန်မှာ ဘာမှ မခဲယဉ်းချေ။

သို့သော် သူမ၏ အစွမ်းကို ဘယ်သူမှ မသိကြသေးပေ။

"ရပါတယ်၊ ကျွန်မက ဘယ်အချိန်သွားသွား ကိစ္စမရှိပါဘူး"

သူမကိုယ်တိုင်ကတော့ အေးအေးဆေးဆေးပင်။

"သွားလိုက်ပါ"

ထန်ထျန်းက ပြော သည်။ "မင်းရဲ့ ပါရမီက ဘယ်လောက်အထိ ရှိမလဲဆိုတာ ငါလည်း မြင်ချင်တယ်။ "

"ဘာပဲဖြစ်ဖြစ် မင်းက တာအိုသားတော် အဆင့်လောက်ပဲ ရှိမှာတော့ မဟုတ်တာ သေချာတယ်"

သူက ကုရှောင်းရွှယ်၏ တကယ့်ပါရမီကို သိချင်နေသည်မှာ ကြာပြီဖြစ်သည်။ ယခု နဂါးတံခါး စမ်းသပ်ပွဲမှာ သူမ၏ ပါရမီကို အနက်ရှိုင်းဆုံး စစ်ဆေးနိုင်မည့် အခွင့်အရေးကောင်းပင် ဖြစ်သည်။

"အိုး..."

" ကောင်းပြီလေ၊ ရှင် သွားဆိုရင် သွားမယ်"

ဤကောင်မလေးမှာ အမြဲတမ်း စကားနားထောင်တတ်သူ ဖြစ်သည်။

ထန်ထျန်း ခေါင်းငြိမ့်ပြလိုက်ပြီး အခြား အသေးစိတ်များကို ဆက်လက် ဆွေးနွေးကြသည်။

လီဟုန်နှင့် လန်ယွီ ညီအစ်မတို့မှာ ထန်ထျန်း၏ ကိုယ်ရံတော်အဖြစ် ဝင်ရောက်လာခြင်း ဖြစ်သဖြင့် နဂါးတံခါးကို ဖြတ်ကျော်ရန် မလိုပေ။

သို့သော် သူတို့၏ ခွန်အား မှာလည်း အလွန် လျင်မြန်စွာ တိုးတက်နေသည်။

သုံးဦးစလုံးမှာ တက်လှမ်းခြင်း အဆင့်သို့ ရောက်ရှိနေကြပြီး လျိုလီပုတီးစေ့များ၏ အကူအညီဖြင့် မကြာမီတွင် အင်မော်တယ်အဆင့်သို့ တက်လှမ်းနိုင်တော့မည် ဖြစ်သည်။

"တကယ်တော့ အပြင်လောကက လာတဲ့ တပည့်တွေရဲ့ တိုးတက်မှုနှုန်းက တော်တော်လေး မြန်ကြတယ်"

လီဟုန်က ပြော သည်။ "ဖြစ်နိုင်တာက အပြင်လောကရဲ့ ပတ်ဝန်းကျင်က သူတို့ရဲ့ ပါရမီတွေကို ကန့်သတ်ထားသလို ဖြစ်နေတာပါ။"

" ထျန်းဖူနန်းတော်ကို ရောက်တဲ့အခါမှသာ အဲ့ဒီပါရမီတွေက အပြည့်အဝ ပွင့်လင်းလာတာမျိုးပေါ့။ "

"ပိုင်တိဂိုဏ်း က ချောင်လွေ့ချိုက် တောင် ရှောင်းရွှယ်လိုပဲ အစစ်အမှန်အင်မော်တယ် အဆင့်ကို ရောက်နေပြီလို့ ကြားတယ်"

ထန်ထျန်း ခေါင်းငြိမ့်လိုက်သည်။

ချောင်းလွေ့ချိုက် မှာ ထိုစဉ်က ကုရှောင်းရွှယ်ပြီးလျှင် ဒုတိယမြောက် အတော်ဆုံး ပါရမီရှင် ဖြစ်ခဲ့ပြီး ပိုင်တိနန်းတော်၏ ခေါ်ဆောင်ခြင်းကို ခံခဲ့ရသူ ဖြစ်သည်။

သူ၏ ကျင့်ကြံခြင်း ပတ်ဝန်းကျင်မှာ ဝမ့်ယွဲ့လှိုဏ်ဂူထက် ပို၍ ကောင်းမွန်နေမည် ဖြစ်သဖြင့် ဤမျှ တိုးတက်လာခြင်းမှာ အံ့သြစရာ မဟုတ်ပေ။

"အခြေအနေအရဆိုရင် နဂါးတံခါး စမ်းသပ်ပွဲပြီးရင် သူလည်း တောင်ထိပ် တပည့် တစ်ယောက် ဖြစ်လာနိုင်တယ်"

လီဟုန်က ဆက်ပြောသည်။

ထန်ထျန်း မျက်ခုံးပင့်လိုက်မိပြီး "နဂါးတံခါး စမ်းသပ်ပွဲက တပည့်တွေကို အဆင့်အတန်း ခွဲခြားလိုက်တာလား"

လီဟုန်က ခေါင်းငြိမ့်လျက် "ခေါင်းလောင်းသံ ၃ ချက် (၉ ကြိမ်တွင်) မပြည့်ရင်တော့ ထူးခြားတဲ့ အရည်အချင်း မရှိဘူးဆိုရင် နန်းတော်ရဲ့ သာမန်တပည့် ပဲ ဖြစ်မှာပါ။"

" ခေါင်းလောင်းသံ ၄ ချက် တီးနိုင်ရင်တော့ အဓိက တပည့် အဆင့်ကို ရောက်ပါလိမ့်မယ်။ "

"အကယ်၍ ၅ ချက်နဲ့ အထက် တီးနိုင်မယ်ဆိုရင်တော့ တိုက်ရိုက် တောင်ထိပ် တပည့် ဖြစ်လာမှာပါ"

ထန်ထျန်း အနည်းငယ် မှင်တက်သွားသည်။ "တောင်ထိပ် တပည့် ဖြစ်ရတာ အဲ့လောက် လွယ်သလား"

မိုရှောင်းရှောင်း ပြောပြဖူးသည်အရဆိုလျှင် ခေါင်းလောင်းသံ ၅ ချက်က ကံကြမ္မာသားတော် အဆင့်သို့ မရောက်သေးပေ။

ဤအဆင့်ရှိသူများမှာ ထျန်းဖူနန်းတော်တွင် အများကြီး ရှိနေမည် မဟုတ်ပါလား

သို့သော် လီဟုန်က ခါးသီးစွာ ပြုံးလျက် "သခင်လေး... တကယ်တော့ မလွယ်ပါဘူး။ "

"မိန်းကလေးမို ပြောပြတာက ဥပမာတစ်ခုအနေနဲ့ ပြောတာပါ၊ နဂါးတံခါးကတော့ အလားအလာ ကို စစ်ဆေးတာ ဖြစ်ပါတယ်။ "

"နှစ်တိုင်း တပည့်သစ်တွေထဲမှာ တောင်ထိပ် တပည့် တိုက်ရိုက်ဖြစ်နိုင်တဲ့သူက ဘယ်တုန်းကမှ ၂၀၀ မကျော်ဖူးပါဘူး။ "

"အဲ့ဒီအထဲမှာ တစ်ဝက်ကျော်ကလည်း 'ကောင်းကင်စာရင်း' ထဲက တပည့်တွေပါပဲ"

ထန်ထျန်း တိတ်ဆိတ်သွားသည်။

၂၀၀ ဆိုသည်မှာ နည်းသည်တော့ မဟုတ်၊ သို့သော် တပည့်ပေါင်း တစ်သိန်းကျော်ရှိသည့် အထဲတွင်တော့ အလွန်ပင် ရှားပါးလှသည်မှာ အမှန်ပင်။

"ကောင်းပြီလေ..."

" ငါတို့ ဘယ်အချိန် ထွက်ကြမလဲ"

ထန်ထျန်းက မေးလိုက်သည်။

"မွန်းတည့်ခါနီးလောက်ပါ"

လီဟုန်က ပြုံး၍ ဖြေသည်။ "ဒီနေ့ကတော့ 'ကောင်းကင်နှင့် မြေကြီး စာရင်း' ဝင်တွေအတွက် သီးသန့် အလှည့်ပဲလေ"