နဂါးတံခါး၏ နိယာမ
Vol. 26 Ch. 288
နဂါးတံခါးထက်မှ တောက်ပသော အလင်းတန်းများကြောင့် ကောင်းကင်တစ်ခွင်လုံး၏ လင်းထိန်မှုမှာ ပို၍ပင် တိုးသွားခဲ့သည်။
ကျင့်ကြံခြင်းအဆင့် နိမ့်ပါးသော တပည့်များမှာမူ လက်ရှိတွင် မည်သည့်အဆင့်သို့ ရောက်ရှိနေပြီလဲဆိုသည်ကိုပင် သေချာမမြင်နိုင်ကြတော့ပေ။
သို့သော် ဤအခြေအနေမှာ ကြာရှည်မခံဘဲ မကြာမီမှာပင် အလင်းတန်းများမှာ ရုတ်တရက် ကျုံ့ဝင်သွားကာ တောက်ပသော အလင်းလုံးကြီးတစ်ခုအဖြစ် စုစည်းသွားသည်။ ထို့နောက် အတန်းရှည်ကြီး တစ်ခုကို ဆွဲယမ်းကာ ထိပ်ဆုံးရှိ နတ်မီးအိမ် ၉ လုံးဆီသို့ အရှိန်အဟုန်ဖြင့် ပြေးဝင်သွားတော့သည်။
တစ်ချိန်တည်းမှာပင် နဂါးတံခါးအတွင်း၌ ရှိနေသော ထန်ထျန်းကလည်း ထိုအတွင်းမှ ပြောင်းလဲမှုများကို သတိထားမိလိုက်သည်။
ဘေးတစ်ဖက်စီရှိ မီးအိမ်များမှ ထိုးဖောက်လာသော အလင်းတန်းများမှာ အကုန်လုံး ပျောက်ကွယ်သွားခဲ့ပြီ ဖြစ်သည်။
သူ၏ ဦးခေါင်းထက်မှ ကြီးကျယ်ခမ်းနားသော အသိစိတ်ကြီးမှာမူ ဖြည်းညှင်းစွာ ဆင်းသက်လာနေ၏။
"ရှူး..."
မျက်တောင်တစ်ခတ်အတွင်းမှာပင် အလင်းလုံးမှာ နဂါးတံခါးထိပ်ရှိ ပထမဆုံး မီးအိမ်ဆီသို့ ရောက်ရှိသွားသည်။
ပထမမီးအိမ်မှာ အလွန်တောက်ပသော အလင်းရောင်များကို ချက်ချင်း ထုတ်လွှတ်လိုက်၏။
တစ်ချိန်တည်းမှာပင် အပေါ်ဘက်ရှိ အသိစိတ်ကြီးမှာ သူနှင့် တစ်လှမ်း ပိုနီးကပ်လာကြောင်း ထန်ထျန်း ရှင်းရှင်းလင်းလင်း ခံစားလိုက်ရသည်။
ဒုတိယမီးအိမ် ဆက်လက် လင်းထိန်လာသည်။
ထိုအသိစိတ်ကြီးကလည်း နောက်ထပ် တစ်လှမ်း ပိုနီးကပ်လာပြန်၏။
နဂါးတံခါးမှ နတ်မီးအိမ်များ ပို၍ လင်းထိန်လာသည်နှင့်အမျှ ထိုကြီးကျယ်သော အသိစိတ်နှင့် ထန်ထျန်းအကြား အကွာအဝေးမှာလည်း ပို၍ ပို၍ နီးကပ်လာခဲ့သည်။
ထန်ထျန်းက နဂါးတံခါး၏ ဤအပိုင်းမှ နိယာမကို လျင်မြန်စွာပင် သဘောပေါက်သွားခဲ့သည်။
ယခင်က ဘေးတစ်ဖက်စီရှိ မီးအိမ် ၁၈ လုံးမှ ထွက်ပေါ်လာသော မရေမတွက်နိုင်သည့် အလင်းတန်းတစ်ခုချင်းစီမှာ တကယ်တော့ အနုစိတ်လှသော ပါရမီစစ်ဆေးမှုတစ်ခုနှင့် တူပေသည်။
၎င်းမှာ ကျင့်ကြံခြင်းစနစ်တစ်ခုလုံး၏ ကဏ္ဍစုံကို အသေးစိတ် ခွဲခြားစစ်ဆေးခြင်း ဖြစ်သည်။
စစ်ဆေးမှု ပြီးဆုံးသွားသည့်အခါ ထိုအလင်းတန်းများက တိကျသော စစ်ဆေးမှုရလဒ်များကို ယူဆောင်ပြီး မီးအိမ်များအတွင်းသို့ ပြန်ဝင်သွားကာ မတူညီသော တုံ့ပြန်ချက်များအပေါ် မူတည်ပြီး ကွဲပြားသော အလင်းတောက်ပမှုများကို ထုတ်လွှတ်ခြင်း ဖြစ်သည်။
ဖြစ်စဉ်တစ်ခုလုံးမှာ အလိုအလျောက်စနစ်ပင် ဖြစ်သည်။
ဤသို့ ကြည့်မည်ဆိုလျှင် ၎င်းမှာ ဉာဏ်ရည်တုဦးနှောက် (AI ) တစ်ခုနှင့် တူနေ၏။
၎င်း၏ "ညွှန်ကြားသူ " မှာမူ အပေါ်ဘက်ရှိ ကြီးကျယ်ခမ်းနားသော အသိစိတ်ကြီးပင် ဖြစ်ရမည်။
ဘေးတစ်ဖက်စီရှိ မီးအိမ် ၁၈ လုံး၏ စစ်ဆေးမှုများ ပြီးဆုံးသွားသည့်အခါ ၎င်းတို့မှာ စွမ်းအင်တစ်ခုအဖြစ် စုစည်းသွားပြီး ထိပ်ဆုံးရှိ မီးအိမ် ၉ လုံးဆီသို့ ပြေးဝင်သွားခြင်း ဖြစ်သည်။
အကယ်၍ ကြီးမားသော ဟာကွက်မျိုး မရှိပါက အခြေခံအားဖြင့် အားလုံး လင်းထိန်သွားရန် ပြဿနာ မရှိပေ။
နောက်ထပ် ဟင်းလင်းပြင် ခေါင်းလောင်းကို တီးခတ်နိုင်ရန်မှာမူ ထိုအသိစိတ်ကြီးနှင့် တိုက်ရိုက် သက်ဆိုင်နေပေလိမ့်မည်။
ထန်ထျန်းက တိတ်ဆိတ်စွာ စောင့်ဆိုင်းနေသည်။
သူ အစောပိုင်းက စုစည်းခဲ့သော စွမ်းအားမှာ အလွန်စွမ်းအားကြီးလှသဖြင့် ထိပ်ဆုံးရှိ မီးအိမ် ၉ လုံးမှာ အလွန်မြန်ဆန်စွာ လင်းထိန်သွားခဲ့သည်။
အသက်ရှိုက်ချိန် အတွင်းမှာပင် အလင်းတန်းအားလုံးမှာ ဟင်းလင်းပြင် ခေါင်းလောင်းအတွင်းသို့ စတင် စုစည်းသွားကြတော့သည်။
ထိုအချိန်တွင် ဦးခေါင်းထက်မှ အသိစိတ်ကြီးမှာလည်း လုံးဝ ဆင်းသက်လာခဲ့ပြီ ဖြစ်သည်။
နူးညံ့သော တာအိုလှိုင်း များမှာ အပေါ်ဘက်မှ ဖြည်းညှင်းစွာ လွင့်ပျံ့ထွက်ပေါ်လာပြီး ထန်ထျန်းတစ်ကိုယ်လုံးကို လွှမ်းခြုံထားလိုက်သည်။
ဤတာအိုလှိုင်းများမှာ သူ၏ ဝိညာဉ်အနက်ရှိုင်းဆုံးနေရာသို့ တိုက်ရိုက် သက်ရောက်သွား၏။
ထန်ထျန်းက ကြယ်ပွင့်များကဲ့သို့ တောက်လှမ်းနေသော အလင်းစက်ကလေးများ သူ၏ ဝိညာဉ်အတွင်းသို့ ပေါင်းစပ်ဝင်ရောက်သွားသည်ကို မြင်တွေ့နေရသည်။
"ဒေါင်"
မျှော်လင့်ထားသည့်အတိုင်း ပထမဆုံး ခေါင်းလောင်းသံ ထွက်ပေါ်လာသည်။
ထန်ထျန်းက အသာအယာ ပြုံးလိုက်မိသည်။ ဒုတိယအပိုင်း၏ နိယာမကိုလည်း သူ သဘောပေါက်သွားခဲ့ပြီ ဖြစ်သည်။
ခြုံပြောရလျှင် ပထမအပိုင်းနှင့် သိပ်မကွာလှပေ။
သို့သော် တစ်ခုမှာ ရုပ်ပိုင်းဆိုင်ရာ သက်ရှိအပေါ်တွင် သက်ရောက်ခြင်း ဖြစ်ပြီး နောက်တစ်ခုမှာမူ ဝိညာဉ်အပေါ်တွင် သက်ရောက်ခြင်း ဖြစ်သည်။
ထိုကြီးကျယ်သော အသိစိတ်၏ ထိန်းချုပ် မှုအောက်တွင် ဤအပိုင်းမှာ ဝိညာဉ်နှင့် ကောင်းကင် မြေကြီး နိယာမများ မည်မျှအထိ လိုက်လျောညီထွေရှိသည်ကို အဓိက စစ်ဆေးခြင်း ဖြစ်သည်။
အချိန်ကုန်ဆုံးလာသည်နှင့်အမျှ ကြယ်အလင်းတန်းများမှာ တဖြည်းဖြည်း စုစည်းလာပြီး ထန်ထျန်း၏ ဝိညာဉ်အပြင်တွင် မရေမတွက်နိုင်သော အလင်းစက်ကလေးများ ပေါ်ထွက်လာသည်။
"ဒေါင်"
ဒုတိယမြောက် ခေါင်းလောင်းသံ ဆက်လက် မြည်ဟည်းလာသည်။
ကြယ်အလင်းတန်းများ ပိုမိုတောက်ပလာသည်နှင့်အမျှ ကြယ်စင်မြစ်ကြီးတစ်ခုမှာ သူ၏ မျက်စိရှေ့တွင် ဖြည်းညှင်းစွာ ဖြစ်တည်လာသည်။
"ဒေါင်"
တတိယမြောက် ခေါင်းလောင်းသံမှာမူ သူက အနည်းဆုံး "ကံကြမ္မာသားတော်" အဆင့်သို့ ရောက်ရှိနေကြောင်း ပြသနေသည်။
ကြယ်စင်မြစ်မှာ တဖြည်းဖြည်း ကြီးထွားလာပြီး စတုတ္ထမြောက် ခေါင်းလောင်းသံမှာလည်း မည်သည့် အနှောင့်အယှက်မျှမရှိဘဲ ထွက်ပေါ်လာခဲ့သည်။
၎င်းနောက်တွင်မူ ပဉ္စမမြောက် ခေါင်းလောင်းသံပင် ဖြစ်သည်။
ကြယ်စင်မြစ်ကြီးမှာ တလဟော စီးဆင်းသွားပြီး ကျယ်ပြောလှသော စကြာဝဠာ ကြယ်တာရာ ကောင်းကင်ကြီးမှာ သူ့ရှေ့တွင် ပေါ်ထွက်လာခဲ့ပြီ ဖြစ်သည်။
ဆဋ္ဌမမြောက် ခေါင်းလောင်းသံမှာ လောကအနှံ့ ဟည်းထွက်သွားတော့သည်။
တစ်ချိန်တည်းမှာပင် အပြင်ဘက်၌
စူးရှသော အလင်းတန်းများမှာ ပျောက်ကွယ်သွားခဲ့ပြီ ဖြစ်သည်။ လူတိုင်းမှာ နဂါးတံခါးထိပ်ရှိ ဟင်းလင်းပြင် ခေါင်းလောင်းကို စူးစိုက်ကြည့်ရင်း နောက်ဆုံးရလဒ်ကို စောင့်ဆိုင်းနေကြသည်။
ထန်ထျန်းကလည်း သူတို့ကို စိတ်မပျက်စေဘဲ ခြောက်ကြိမ်မြောက် ခေါင်းလောင်းသံအထိ တစ်ချက်ပြီးတစ်ချက် ကောင်းကင်ယံတွင် ဟည်းထွက်အောင် တီးနိုင်ခဲ့သည်။
ထို့ပြင် သူ၏ တီးသံ စည်းချက်မှာ အရင်က လော့ရှီးထက်ပင် ပို၍ မြန်ဆန်နေသေးသည်။
မကြာခင်မှာပင် သတ္တမမြောက် ခေါင်းလောင်းသံမှာ ဟိန်းထွက်လာပြန်၏။
"ဝိုး... ထန်ထျန်းက ဒီလောက်တောင် အစွမ်းထက်တာလား။ ဒီပုံစံအတိုင်းဆိုရင် လော့ရှီးရဲ့ စံချိန်ကိုတောင် လိုက်မှီတော့မှာပဲ"
"အရင်က တစ်ယောက်ယောက် ပြောခဲ့သေးတယ်လေ၊ ထန်ထျန်းမှာက မွေးရာပါ ဟာကွက်တွေ ရှိလို့ အများဆုံး ခေါင်းလောင်း ၆ ချက်ပဲ တီးနိုင်မှာပါဆိုတဲ့လူ... သူ ဘယ်ရောက်နေလဲ၊ သူ့မျက်နှာ ဘယ်လောက်တောင် မည်း နေမလဲဆိုတာ ကြည့်ချင်သေးတယ်"
"မပြောပါနဲ့တော့၊ ငါ နဂါးတံခါးရဲ့ သမိုင်းကြောင်းကို ဖတ်ဖူးတယ်။ အပြင်လောကကနေ လာတဲ့ ပါရမီရှင်တွေက တကယ်ပဲ အများဆုံး ၆ ချက်ပဲ တီးနိုင်ခဲ့ကြတာ"
"ငါတို့ မထင်ထားရုံတင် မဟုတ်ဘူး၊ ဂိုဏ်းရဲ့ အထက်လူကြီးတွေတောင် ထင်ထားမှာ မဟုတ်ဘူး"
လူများက အံ့သြတကြီးဖြင့် တိုးတိုးလေး ဆွေးနွေးနေကြသည်။
ထိုနောက်ဆုံး တပည့်ပြောသည်မှာလည်း မမှားပေ။
ကောင်းကင်ယံရှိ အကြီးအကဲများမှာလည်း အံ့အားသင့်နေကြသည်။
"တကယ့်ကို အနှိုင်းမဲ့ ပါရမီရှင်ပဲ"
"သူက ဝမ့်ယွဲ့လှိုဏ်ဂူထဲမှာ မွေးရာပါ ဟာကွက်အချို့ကို ပြန်ပြင်နိုင်ခဲ့တယ်ဆိုပေမဲ့ ခေါင်းလောင်း ၆ ချက်ဆိုတဲ့ အကန့်အသတ်ကို ကျော်ဖြတ်နိုင်ခဲ့တာကတင် သူ့ရဲ့ ထူးခြားမှုကို ပြသနေပြီ"
"ခေါင်းလောင်းသံ အစဉ်ထာဝရ မြည်ဟည်းဖို့ဆိုတာလည်း မဖြစ်နိုင်တာ မဟုတ်ဘူး"
အင်မော်တယ်အရှင် တစ်ဦးက ပြောလိုက် သည်။
"ဟုတ်တယ်၊ ပြီးတော့ သူက တကယ့်ကို ကဏ္ဍစုံထူးချွန်တဲ့ ကျင့်ကြံသူပဲ။"
" အကယ်၍ နောက်ဆုံးမှာ အစဉ်ထာဝရ မြည်ဟည်းခြင်း အဆင့်ကို မရောက်ခဲ့ရင်တောင် သူနဲ့ လော့ရှီးကြားမှာ သိပ်ပြီး ကွာခြားချက် ရှိမှာ မဟုတ်ဘူး။ "
"တကယ်ကို ရှားပါးတဲ့ ပါရမီရှင် တစ်ယောက်ပဲ"
အခြားတစ်ဦးကလည်း ထောက်ခံသည်။
အခြားသော အကြီးအကဲများမှာလည်း ထိုနည်းတူပင်ဖြစ်ပြီး အချို့မှာ ထန်ထျန်းကို သူတို့တပည့်အဖြစ် သိမ်းသွင်းရန်ပင် စတင် စီစဉ်နေကြပြီ ဖြစ်သည်။
ဘာကြောင့်လဲဆိုတော့ ထန်ထျန်းက လော့ရှီးနှင့် မတူဘဲ မည်သည့်အင်အားစုနှင့်မျှ မပတ်သက်သော "လွတ်လပ်သူ" တစ်ဦး ဖြစ်သောကြောင့်ပင်။
သို့သော် တစ်ဦးတည်းသောသူမှာမူ မျက်နှာပျက်နေသည်။
အင်မော်တယ်အရှင် ထျန်းယွမ်၏ မျက်နှာမှာ မည်းမှောင်နေ၏။ သူက ထန်ထျန်း ဝမ့်ယွဲ့လှိုဏ်ဂူမှ ထွက်လာသည့်အခါ မည်သို့ နှိပ်ကွပ်ရမည်ကို အရင်ကတည်းက ကြံစည်ထားခဲ့ခြင်း ဖြစ်သည်။
သို့သော် ယခုအခြေအနေကို ကြည့်ရသည်မှာ ထိုကိစ္စမှာ မလွယ်ကူတော့ပေ။
အထက်လူကြီးများက ဤမျှ အာရုံစိုက်နေသည့် အခြေအနေမျိုးတွင် သူက ထပ်မံ၍ လှည့်ကွက်များ သုံးရန်မှာ ကောင်းကင်ပေါ် တက်ရသကဲ့သို့ ခက်ခဲလိမ့်မည် ဖြစ်သည်။
ထျန်းယွမ်အပြင် နောက်ထပ် တစ်ဦးမှာလည်း အံ့သြနေသော အမူအရာ ရှိနေသည်။
"သူငယ်ချင်း ကျီယွိ... ဒါလား ရှင်ပြောတဲ့ သူ့ရဲ့အစွမ်းတွေက ကျောက်စိမ်းတွေနဲ့ စုပုံပြီး ရလာတာဆိုတာ"
" သူ့ရဲ့ စွမ်းဆောင်ရည်က ကျွန်မထက်တောင် ပိုတော်နေပြီ"
နတ်သမီးလင်းလျို့ က ဝမ်ကျီယွိကို အဓိပ္ပာယ်ပါပါ ကြည့်ကာ ပြောလိုက်သည်။
ဝမ်ကျီယွိက ချောင်းနှစ်ချက် ခပ်အုပ်အုပ် ဆိုးလိုက်ပြီး သူ၏ အရှက်ရမှုကို ဖုံးကွယ်ကာ ပြုံးလိုက်သည်။ "သူက ဒီလောက်အထိ လျှို့ဝှက်ထားလိမ့်မယ်လို့ ကျွန်တော်လည်း မထင်ထားခဲ့ဘူး။ "
"ချင်းယွဲ့ဂိုဏ်းမှာတုန်းက သူက တကယ်ကို ထုတ်မပြ ခဲ့တာပါ။"
" ဒါဆိုရင် ကျွန်တော်တို့ သူ့ကို နောက်တစ်ခါ ထပ်ပြီး ဆက်သွယ်ကြည့်ကြမလား"
နတ်သမီးလင်းလျို့က အေးဆေးစွာပင် "အခုမှလား"
" နောက်ကျသွားပြီ ထင်တယ်။ "
"ဟို အကြီးအကဲတွေ အကုန်လုံး သူ့ကို မျက်စိကျနေကြပြီလေ"
ဝမ်ကျီယွိက နှာခေါင်းကို ပွတ်လိုက်ရင်း "ဟုတ်သားပဲ။"
" နှမြောစရာကြီးနော်"
နတ်သမီးလင်းလျို့က သူ့ကို ကြည့်ပြီး မျက်လုံးများ မှေးလိုက်ကာ "ကျွန်မ ဘာလို့ ခံစားနေရလဲဆိုတော့ ရှင်က အရင်တုန်းက ကျွန်မကို သူ့ဆီ ဆက်သွယ်ခွင့် မပေးဖို့ တမင် လုပ်ခဲ့သလိုပဲ။"
" တကယ်တော့ ရှင်က သူ့ရဲ့ နောက်ကြောင်းကို ကောင်းကောင်း သိထားတယ် မဟုတ်လား"
ဝမ်ကျီယွိက အံ့သြသွားဟန်ဖြင့် အမြန် ပြန်ပြောသည်။ "ဘယ်လိုလုပ် ဖြစ်နိုင်မှာလဲ"
" ကျွန်တော်က... "
"သူက ခန့်မှန်းရခက်တဲ့သူ ဖြစ်နေလို့ ကျွန်တော်တို့ရဲ့ အစီအစဉ်ကို ထိခိုက်မှာ စိုးရိမ်လို့ပါ"
နတ်သမီးလင်းလျို့က ဘာမှ ဆက်မပြောတော့ပေ။
သူတို့က ဝမ်တောက်စန်းကို တိုက်ခိုက်ရန် အစီအစဉ် ဆွဲထားကြသဖြင့် အရာရာကို သတိထားနေကြခြင်း ဖြစ်သည်။
ခန့်မှန်းရခက်သောသူတစ်ဦးကို ပါဝင်ခိုင်းခြင်းမှာ အစီအစဉ်အတွက် မလိုလားအပ်သော အန္တရာယ်များကို သယ်ဆောင်လာနိုင်သည်။
သို့သော် ထန်ထျန်း၏ ဤသို့သော စွမ်းဆောင်ရည်မျိုးနှင့်ဆိုလျှင်မူ ထိုအန္တရာယ်လေးကို လျစ်လျူရှု၍ ရပေသည်။
ဒါဆိုလျှင် ဝမ်ကျီယွိက ဘာကြောင့် သူမကို ထန်ထျန်းနှင့် မဆက်သွယ်စေရန် တားဆီးခဲ့သနည်း။
တစ်ခုခုတော့ ရှိနေသည်။ သူနှင့် ထန်ထျန်းမှာ ရန်ညှိုး ရှိနေသလား
သို့မဟုတ် သူမနှင့် ရန်ညှိုး ရှိနေသလား။
သို့မဟုတ် ဝမ်ကျီယွိ၏ ရည်ရွယ်ချက်မှာ ဝမ်တောက်စန်းကို နှိမ်နင်းရုံထက်မက ပို၍ ကြီးမားနေသလား။
သို့သော် နတ်သမီးလင်းလျို့ အများကြီး စဉ်းစားရန် အချိန်မရှိပေ။
အောက်ဘက်တွင် ကိုးကြိမ်မြောက် ခေါင်းလောင်းသံမှာ ဟည်းထွက်လာခဲ့ပြီ ဖြစ်သည်။
စွမ်းအားများမှာ ပျောက်ကွယ်သွားခြင်း မရှိသေးဘဲ ထန်ထျန်းက "ခေါင်းလောင်းသံ အစဉ်ထာဝရ မြည်ဟည်းခြင်း" ဟူသော အဆုံးစွန်သော အောင်မြင်မှုဆီသို့ ဆက်လက် တိုးဝင်နေပြီ ဖြစ်သည်။
နတ်သမီးလင်းလျို့က စိတ်ကို စုစည်းလိုက်ပြီး ဝမ်ကျီယွိ၏ ကိစ္စကို ခဏ ဘေးဖယ်ထားလိုက်သည်။
ဤနဂါးတံခါး စမ်းသပ်ပွဲ ပြီးဆုံးသည်အထိ အရင် စောင့်ကြည့်ရမည် ဖြစ်သည်။