နတ်သမီးလင်းလျို့ အလည်လာခြင်း

ထန်ထျန်းကို စစ်ဆေးမေးမြန်းခြင်းမှာ ဤနေရာတွင်ပင် တစ်ခန်းရပ်သွားခဲ့သည်။

ချမှတ်လိုက်သော ပြစ်ဒဏ်နှစ်ခုမှာ ထန်ထျန်းကို ထိခိုက်မှု တစ်စုံတစ်ရာ မပေးနိုင်သော်လည်း ကန့်ကွက်လိုသူများ၏ ပါးစပ်ကို ပိတ်ရန်အတွက်မူ လုံလောက်ခဲ့သည်။

"ငါက သူ့ကို ရှန့်ထန်းတာအိုကျောက်စိမ်း ဘီလီယံ ၁၀၀ တောင် ဒဏ်ရိုက်ထားပြီးပြီပဲ၊ ခင်ဗျားတို့က ဘာထပ်လိုချင်သေးတာလဲ" ဆိုသည့် သဘောပင် ဖြစ်သည်။

သို့သော် အမြင်ရှိသူတိုင်းကတော့ ဤအရာမှာ သာမန် သက်သက် ပြစ်ဒဏ်ဖြစ်ကြောင်း သိကြ၏။

ထျန်းဖူနန်းတော်က ထန်ထျန်းထံမှ ထိုငွေများကို တကယ်တောင်းလိမ့်မည်ဟု မည်သူမျှ မယုံကြည်ကြသလို ထန်ထျန်းကလည်း ထိုမျှများပြားသော ပမာဏကို ပြန်ဆပ်နိုင်မည်ဟု မည်သူမျှ မထင်ကြပေ။

မည်သို့ပင်ဆိုစေကာမူ ဤစီရင်ချက်မှာ ထျန်းဖူနန်းတော် အဆင့်မြင့်ပုဂ္ဂိုလ်များ၏ သဘောတူညီချက်ဖြင့် ဆုံးဖြတ်ခဲ့ခြင်း ဖြစ်ပြီး ရှင်းဟယ် အင်မော်တယ်ဧကရာဇ်ကိုယ်တိုင် ပါဝင်ခဲ့သဖြင့် မည်သူမျှ ဝေဖန်ခြင်း မပြုရဲကြတော့ပေ။

ထန်ထျန်းကို အပိုင်းပိုင်း အစစ ဖြစ်အောင် လုပ်ချင်နေသည့် ထျန်းယွမ်အင်မော်တယ်အရှင်ပင်လျှင် ဤရလဒ်ကို လက်ခံရုံမှတစ်ပါး အခြားမရှိပေ။

၎င်းအပြင် ဤအခြေအနေအောက်တွင် နောင်တစ်ချိန်၌ ထန်ထျန်းကို ဒုက္ခပေးရန်မှာ ပို၍ပင် ခက်ခဲသွားတော့မည် ဖြစ်သည်။

အဘယ်ကြောင့်ဆိုသော် ထန်ထျန်းမှာ နန်းတော်၏ သမိုင်းတစ်လျှောက် အကြွေးအများဆုံးလူ ဖြစ်နေသဖြင့် သူ့ကို တစ်ခုခုလုပ်လိုက်ပါက နန်းတော်က ရစရာရှိသည့် ဘီလီယံ ၁၀၀ ကို မည်သူက တာဝန်ယူ ဆပ်ပေးမည်နည်း။

ထန်ထျန်းကလည်း ဤစီရင်ချက်အပေါ် အထွေအထူး ကန့်ကွက်ခြင်း မရှိပေ။

တာဝန်လုံးဝ မရှိဘဲ လွတ်မြောက်သွားရန်မှာ မဖြစ်နိုင်ကြောင်း သူ သိသည်။

၎င်းအပြင် နဂါးတံခါး ပျက်စီးမှုမှာ သူ တိုက်ရိုက်လုပ်ဆောင်ခဲ့ခြင်း မဟုတ်သော်လည်း မူလဟင်းလင်းပြင် ခေါင်းလောင်း၏ အပိုင်းအစများနှင့် အဖိုးတန် နတ်ဘုရားသတ္တု အပိုင်းအစများမှာမူ သူ၏ ထူးဆန်းသော ဥအတွင်းရှိ ဟင်းလင်းပြင်ထဲတွင် ရောက်ရှိနေပြီ ဖြစ်ရာ သူ အမြတ်ထွက်နေသည်ဟု ဆိုနိုင်၏။

စစ်ဆေးမှု ပြီးဆုံးသွားသည့်အခါ အဆင့်မြင့်ပုဂ္ဂိုလ်များမှာ ဤဘေးအန္တရာယ်၏ နောက်ဆက်တွဲ ကိစ္စရပ်များကို ဆက်လက် ဆွေးနွေးကြသည်။

နဂါးတံခါး ပျက်စီးသွားပြီ ဖြစ်ရာ ပါရမီ မစစ်ဆေးရသေးသည့် တပည့် တစ်သိန်းကျော်ကို မည်သို့ ဆက်လက် စစ်ဆေးမည်၊ မည်သို့ ခွဲဝေမည် စသည်တို့မှာ ကြီးမားသော ပြဿနာများ ဖြစ်သည်။

သို့သော် ထိုကိစ္စများမှာ ထန်ထျန်းနှင့် မသက်ဆိုင်တော့ပေ။

အဆင့်မြင့် အင်မော်တယ်အရှင်တစ်ဦး၏ လမ်းပြမှုဖြင့် ထန်ထျန်းမှာ နန်းတော် ၏ ဘေးရှိ အခန်းတစ်ခုသို့ ရောက်ရှိလာခဲ့သည်။

ဤအခန်းမှာ ရှေ့က အခန်းငယ်ကဲ့သို့ မဟုတ်ဘဲ သာမန်အခန်းတစ်ခုဖြစ်ကာ ရိုးရှင်းသော်လည်း ဖိအား မရှိပေ။

"မင်း ဒီမှာ ခဏ စောင့်နေဦး၊ အစည်းအဝေး ပြီးရင် အရှင်ချီက မင်းကို စကားပြောချင်လို့တဲ့"

ထိုအင်မော်တယ်အရှင်က ကြင်နာစွာ ပြောလိုက်သည်။ "သိပ်ပြီး စိတ်မပူပါနဲ့တော့၊ စီရင်ချက်က အတည်ဖြစ်သွားပြီဆိုတော့ ထပ်ပြီး ပြောင်းလဲမှာ မဟုတ်ပါဘူး။"

" နန်းတော်ရဲ့ လုပ်ဆောင်ချက်ကိုလည်း မင်း နားလည်ပေးလိမ့်မယ်လို့ မျှော်လင့်ပါတယ်။ ဒီကိစ္စက သက်ရောက်မှု အရမ်းကြီးလွန်းလို့ပါ"

ထန်ထျန်းက နားလည်ကြောင်း ခေါင်းညိတ်ပြလိုက်သည်။

ထိုသူက အနည်းငယ် ထပ်မံ မှာကြားပြီးနောက် အခန်းထဲမှ ထွက်ခွာသွား၏။

ပတ်ဝန်းကျင် တိတ်ဆိတ်သွားမှ ထန်ထျန်းမှာ သက်ပြင်းအရှည်ကြီး ချလိုက်မိသည်။

ဤအဖြစ်အပျက်မှာ တကယ်ပင် ထင်မှတ်မထားဘဲ ဖြစ်ခဲ့ရခြင်း ဖြစ်သည်။

မူလက သူ ခန့်မှန်းထားသည်မှာ သူက ပြိုင်ဘက်ကင်း ပါရမီရှင်အဖြစ် နဂါးတံခါးသို့ တက်လှမ်းကာ ခေါင်းလောင်းသံ အဆက်မပြတ် မြည်စေပြီး နန်းတော်၏ ဒဏ္ဍာရီ တစ်ပုဒ် ဖန်တီးမည်ဟု ဖြစ်သည်။

အဆင့်မြင့်ပုဂ္ဂိုလ်များမှာ သူ့ကို တပည့်အဖြစ် ရရှိရန် အလုအယက် ကြိုးစားကြလိမ့်မည်ဟု ထင်ခဲ့ခြင်း ဖြစ်၏။

သို့သော် သူက အစကို ခန့်မှန်းနိုင်ခဲ့သော်လည်း အဆုံးသတ်ကိုတော့ မှားယွင်းခဲ့သည်။

ကြောက်မက်ဖွယ်ကောင်းသော နိယာမ တွင်းနက်ကြီးမှာ သူနှင့် ဟင်းလင်းပြင် ခေါင်းလောင်းအနီးသို့ ရုတ်တရက် ပေါ်လာလိမ့်မည်ဟု မည်သူမျှ မထင်ခဲ့ပေ။

၎င်းနောက် ခေါင်းလောင်းကြီး ပျက်စီးကာ နဂါးတံခါးနှင့် နဂါးကျွန်းပါ ပေါက်ကွဲသွားခဲ့ရသည်။

အဆင့်မြင့်ပုဂ္ဂိုလ်များ ရောက်လာသည်မှာ မှန်သော်လည်း သူ့ကို လုယူရန် မဟုတ်ဘဲ စစ်ဆေးရန်အတွက်သာ ဖြစ်ခဲ့သည်။

သို့သော် ဘေးအန္တရာယ် ကြီးမားသည်နှင့်အမျှ သူကတော့ ဒဏ္ဍာရီ တစ်ပုဒ် ဖြစ်ကျန်ခဲ့သည်မှာ သေချာသည်။

ဤသို့ကြည့်မည်ဆိုလျှင် သူ၏ ရည်မှန်းချက်မှာ အောင်မြင်သည်ဟု ဆိုရပေမည်။

ထန်ထျန်းမှာ စိတ်ကောင်းဝင်သွား ၏။

ဘယ်လိုပဲဖြစ်ဖြစ် သူ လက်မခံနိုင်သော ပြစ်ဒဏ်မျိုးကို မခံစားရသဖြင့် တော်သေးသည်ဟု ဆိုရမည်။

တောင်ထိပ်တပည့်အဖြစ် အဆင့်လျှော့ခံရခြင်းမှာ သူ့အတွက် ဘာမှမဟုတ်ပေ။

၎င်းအပြင် နန်းတော်သို့ ဘီလီယံ ၁၀၀ ဆပ်ရမည့် ကိစ္စမှာလည်း...

ထန်ထျန်း သူ့၏ စနစ် ကို ကြည့်လိုက်သည်။

သူ ချင်းယွဲ့ဂိုဏ်းမှ ထွက်လာသည့် အချိန်အတွင်း ထျန်းရှထုန် ကုန်သွယ်ရေးအသင်း၏ တိုးချဲ့မှုမှာ အနည်းငယ် နှေးကွေးသွားသော်လည်း ရပ်တန့်မသွားခဲ့ပေ။

ဝမ်ကန်း၏ ကြိုးစားမှုကြောင့် လအနည်းငယ်အတွင်း ရှန့်ထန်းတာအိုကျောက်စိမ်း ၆ သန်းကျော် ရရှိထားပြီး ဖြစ်သည်။

ထိုကုန်သွယ်ရေးအသင်းကို နန်းတော်တွင်ပါ အခြေချနိုင်ပါက ဝင်ငွေမှာ ပို၍ မြန်ဆန်လာပေလိမ့်မည်။

ဘီလီယံ ၁၀၀ ဆိုသည်မှာ မဖြစ်နိုင်သည့် ပမာဏ မဟုတ်ပေ။

၎င်းအပြင် အကယ်၍ စနစ် ကသာ ဤအကြွေးကို ပုံမှန်သုံးစွဲမှုအဖြစ် သတ်မှတ်ပေးမည်ဆိုလျှင်...

ထန်ထျန်း၏ နှုတ်ခမ်းတွင် အပြုံးတစ်ခု ပေါ်လာသည်။

နန်းတော်တွင် အခြေကျသွားသည့်အခါ တစ်သန်းခန့် အရင်ဆပ်ကြည့်မည်ဟု သူ ဆုံးဖြတ်လိုက်၏။

အကယ်၍ တကယ်သာ အလုပ်ဖြစ်ခဲ့လျှင် ကောင်းကင်က ပေးတဲ့ ဆုလာဘ်ကြီးပင် ဖြစ်ပေလိမ့်မည်။

ထန်ထျန်းက အခြားဘာမျှ မလုပ်ဘဲ ငြိမ်သက်စွာ စောင့်နေလိုက်သည်။

ခေါင်းလောင်းအပိုင်းအစများနှင့် အခြားအရာများကိုတော့ ပြန်ရောက်မှသာ စစ်ဆေးတော့မည်ဟု ဆုံးဖြတ်ထား၏။

သို့သော် သူ သိပ်အကြာကြီး မစောင့်လိုက်ရဘဲ အခန်းတံခါးကို တစ်စုံတစ်ယောက်က လာခေါက်သည်။

ထန်ထျန်း အံ့သြသွားမိ၏။ အဆင့်မြင့်ပုဂ္ဂိုလ်များ၏ အစည်းအဝေးမှာ ပုံမှန်အားဖြင့် အလွန်ကြာမြင့်လေ့ ရှိသော်လည်း ယခုမှာ အတော်လေး စောနေသဖြင့် ဖြစ်သည်။

၎င်းအပြင် တံခါးကို ခေါက်နေခြင်းမှာလည်း အလွန် ယဉ်ကျေးလွန်းနေ၏။

ထန်ထျန်း တံခါးဖွင့်လိုက်သည့်အခါ အလွန် လှပသော အမျိုးသမီးတစ်ဦးကို မြင်လိုက်ရသည်။

"ခင်ဗျားက..."

ထန်ထျန်း ထိုအမျိုးသမီးကို မသိပေ။

သို့သော် ထိုသူ့ထံမှ ထွက်ပေါ်နေသော အော်ရာ ကြောင့် ထန်ထျန်း သတိထားလိုက်မိ၏။

အနည်းဆုံးတော့ အင်မော်တယ်ဘုရင် အဆင့် ရှိပေလိမ့်မည်။

ထန်ထျန်းကို မြင်သည့်အခါ ထိုအမျိုးသမီးက ပြုံးပြကာ "သခင်လေးထန် "

"မစိုးရိမ်ပါနဲ့၊ ကျွန်မက အဆင့်မြင့်ပုဂ္ဂိုလ်တွေရဲ့ ခွင့်ပြုချက်နဲ့ လာခဲ့တာပါ။"

" ကျွန်မရဲ့ နာမည်က လင်းချိုက်ယီ ပါ၊ ဒါပေမဲ့ ရှင့်အနေနဲ့ နောက်ထပ် နာမည်တစ်ခုကို ပိုပြီး ရင်းနှီးလိမ့်မယ် ထင်ပါတယ်... "

"နတ်သမီးလင်းလျို့ ပါ"

ထန်ထျန်း မှင်တက်သွား၏။

ဤသူမှာ အမြဲတမ်း နာမည်သာ ကြားဖူးပြီး လူမမြင်ဖူးသည့် နတ်သမီးလင်းလျို့လော။

ချင်းယွဲ့ဂိုဏ်းတွင် ရှိစဉ်ကပင် သူမ၏ အကြောင်းများကို ကြားဖူးခဲ့သလို လေလံပွဲတစ်ခုတွင် သူမ၏ အဝတ်အစားတစ်ခုကိုပင် ဝယ်ယူခဲ့ဖူးသေးသည်။ နောက်ပိုင်း သူမ အင်မော်တယ်အရှင် ဖြစ်သွားပြီဟု ကြားသောအခါ သူ လွှင့်ပစ်လိုက်သည်။

ထို့အပြင် ကျင်းဝမ်ရှင်း ဆိုသည့် အင်မော်တယ်ဘုရင်ကလည်း သူမ၏ လက်အောက်သို့ ဝင်ရန် ဖိတ်ခေါ်ခဲ့ဖူးသေး၏။

သို့သော် ထိုသူမှာ အလွန် မာန်တက်နေသဖြင့် ထန်ထျန်းက ငြင်းပယ်ခဲ့ခြင်း ဖြစ်သည်။

ယခုအခါ နတ်သမီးလင်းလျို့ကိုယ်တိုင် သူ့ထံသို့ အဘယ်ကြောင့် ရောက်လာရသနည်း။

ထန်ထျန်း ကြောင်နေသည်ကို မြင်သောအခါ လင်းလျော့နတ်သမီးက ပြုံးရင်း "ဘာလဲ၊ ကျွန်မကို အထဲဝင်ဖို့ မဖိတ်တော့ဘူးလား"

ထန်ထျန်း သတိပြန်ဝင်လာကာ အမြန်ပင် လမ်းဖယ်ပေးလိုက်၏။ "မဟုတ်ပါဘူး၊ ကြွပါ"

သူတို့အကြားတွင် ပတ်သက်မှု ရှိနေသည်ကို ထားလိုက်ဦး၊ သူမ၏ အင်မော်တယ်အရှင် ဆိုသည့် အဆင့်အတန်းကြောင့်ပင် လေးစားမှု ပေးရပေမည်။

ခဏအကြာတွင် သူတို့နှစ်ဦး မျက်နှာချင်းဆိုင် ထိုင်လိုက်ကြသည်။

"နတ်သမီး လင်းလျို့ ဘာကိစ္စများ ရှိလို့ပါလဲ"

ထန်ထျန်းက တိုက်ရိုက် မေးလိုက်သည်။

နတ်သမီးလင်းလျို့က ပြုံး ရင်း "ဒီလောက်ကြီးလည်း သူစိမ်းမဆန်ပါနဲ့၊ တို့တွေက ချင်းယွဲ့ဂိုဏ်းက လာတဲ့သူတွေပဲလေ"

ထန်ထျန်းက ခဏစဉ်းစားပြီးမှ "မင်း ပြောတာ မှန်ပါတယ်"

" ဒါပေမဲ့ ကျွန်တော် ဒီကို မလာခင်မှာ အကြီးအကဲရွှမ်က မှာထားပါတယ်။ နန်းတော်ကို ရောက်ရင် နန်းတော်ရဲ့ တပည့်ဖြစ်သွားပြီမို့ အရင်က အဆင့်အတန်းတွေကို ဆုပ်ကိုင်မထားပါနဲ့တဲ့"

သူမ၏ ဖိတ်ခေါ်မှုကို ငြင်းပယ်မည့် သဘောကို သူက ကြိုတင် ပြလိုက်ခြင်း ဖြစ်သည်။

နတ်သမီးလင်းလျို့ကလည်း ထိုအဓိပ္ပာယ်ကို နားလည်သွားပြီး သက်ပြင်းချကာ "ရှင့်ရဲ့ သဘောထားကို ကျွန်မ သိပါတယ်၊ ကျင်ဝမ်ရှင်းဆီကနေလည်း ရှင့်ရဲ့ အတွေးတွေကို ကြားဖူးပါတယ်။"

" ဒါပေမဲ့ အချို့ကိစ္စတွေက ရှင် ထင်သလောက် မရိုးရှင်းဘူး။"

" တို့ ဒီနေ့ လာတာက ချင်းယွဲ့ဂိုဏ်းက တပည့်တွေ နန်းတော်မှာ တိုးတက် ဖို့အတွက် ရှင် တို့နဲ့ ပူးပေါင်းပေးဖို့ လာတောင်းဆိုတာပါ။ "

"ဒါ့အပြင် သူငယ်ချင်းတစ်ယောက်ကလည်း ရှင့်ကို တို့နဲ့ အတူတူ ရှိစေချင်နေတယ်"

သူမ ပြော ကာ လက်ထဲမှ လှပသော သေတ္တာလေးတစ်လုံးကို ထုတ်လိုက်သည်။

"အဲဒီသူငယ်ချင်းကို ရှင် သိပါတယ်၊ ဒါပေမဲ့ အကြောင်းအမျိုးမျိုးကြောင့် သူ အခု လူကိုယ်တိုင် မလာနိုင်သေးဘူး။"

" ဒါက သူ ရှင့်အတွက် ပေးခိုင်းလိုက်တဲ့ လက်ဆောင်ပါ၊ ဒါကို မြင်ရင် သူ ဘယ်သူလဲဆိုတာ ရှင် သိလိမ့်မယ်လို့ သူက ပြောလိုက်တယ်"

နတ်သမီးလင်းလျို့က ပြောလိုက်လေသည်။