အပြောင်းအလဲဖြစ်ပြီးနောက်

ကောင်းကင်ယံ၌ မြင့်မားစွာ တည်ရှိခဲ့သော နဂါးကျွန်းမှာ ယခုအခါ လုံးဝ ပျောက်ကွယ်သွားခဲ့ပြီ ဖြစ်သည်။

၎င်း၏အစား အောက်ဘက်တွင် ပျက်စီးသွားသော ဧရာမ ကျောက်တုံးကြီးများမှာ တောင်တစ်လုံးသဖွယ် ပုံကျနေ၏။

မြေပြင်တစ်ခုလုံးမှာလည်း ပျက်စီးယိုယွင်းနေသည်။

အပျက်အစီးများကဲ့သို့ ဖြစ်နေသော မြင်ကွင်းကို ကြည့်ရင်း ကယ်ဆယ်ခြင်းခံလိုက်ရသော တပည့်များမှာ အလွန်အမင်း ထိတ်လန့်နေကြသည်။

ဤမျှ ကြောက်မက်ဖွယ်ကောင်းသော ကိစ္စမျိုး ဖြစ်ပျက်လာလိမ့်မည်ဟု မည်သူမျှ ထင်မထားခဲ့ကြပေ။

သူတို့အားလုံးမှာ ခုနက ဘေးအန္တရာယ်အတွင်း အသက်ဆုံးရှုံးလုနီးပါး ဖြစ်ခဲ့ရသည်။

"တကယ်ပဲ... ဘာတွေ ဖြစ်ကုန်တာလဲ"

တစ်စုံတစ်ယောက်က တုန်လှုပ်ချောက်ချားစွာ အော်လိုက်သည်။

"ဟင်းလင်းပြင် ခေါင်းလောင်းမှာ ပြဿနာတက်တာ ထင်တယ်"

"ဟုတ်တယ်၊ ငါမှတ်မိသလောက် ခေါင်းလောင်းကြီးက ရုတ်တရက် ရူးသွပ်သလိုမျိုး ဆက်တိုက် မြည်ဟည်းလာတာ"

"အဲဒီနောက် သိပ်မကြာဘူး၊ နဂါးကျွန်းနဲ့အတူ အကုန် ပေါက်ကွဲသွားတာပဲ"

ဘေးအန္တရာယ် မကျရောက်မီ ဖြစ်ပျက်ခဲ့သည်များကို လူများ ပြန်လည် အမှတ်ရနေကြသည်။

"နဂါးတံခါးထဲကို နောက်ဆုံးဝင်သွားတာ ဘယ်သူလဲ"

လူတိုင်း၏ စိတ်ထဲတွင် အမည်တစ်ခုမှာ ဖြည်းညှင်းစွာ ပေါ်ထွက်လာသည်။

"ထန်ထျန်း... ဘာမှ မဖြစ်လောက်ပါဘူးနော်"

ကုရှောင်းရွှယ်က ကောင်းကင်ယံ၌ ပျံ့နှံ့နေသော ဖုန်မှုန့်များကို ကြည့်ရင်း မျက်လုံးများထဲတွင် အတိုင်းအဆမဲ့ စိုးရိမ်မှုများ ပြည့်နှက်နေသည်။

အပြင်ဘက်တွင်ပင် ဤမျှ ဖြစ်ပျက်နေပါက နဂါးတံခါးအတွင်း၌ မည်မျှ ကြောက်စရာကောင်းသော ကိစ္စများ ဖြစ်ပျက်ခဲ့မည်ကို စိတ်ကူးကြည့်ရန်ပင် မလွယ်ကူပေ။

နဂါးတံခါးအတွင်း ရောက်နေသော ထန်ထျန်းမှာရော မည်သို့ ရှိနေမည်နည်း။

"ငါလည်း မသိဘူး..."

" ဒါပေမဲ့ သခင်လေးက ကံကောင်းတဲ့သူဆိုတော့ သေချာပေါက် ဘေးကင်းမှာပါ"

လီဟုန်ကလည်း စိုးရိမ်တကြီး ပြောလိုက်သည်။

ဤအပြောင်းအလဲမှာ ရုတ်တရက်ဆန်လွန်းလှသည်။

သို့သော် ထိုအချိန်တွင် လီဟုန်၏ စိတ်ထဲ၌ တစ်စုံတစ်ခုကို ခံစားလိုက်ရသဖြင့် သတင်းပို့ကျောက်စိမ်းပြားကို ထုတ်ကြည့်လိုက်၏။

ခဏအကြာတွင် သူ သက်ပြင်းအရှည်ကြီး ချလိုက်နိုင်သည်။

"သခင်လေး လောလောဆယ် ဘာမှမဖြစ်ဘူး"

ကုရှောင်းရွှယ်၏ မျက်လုံးများ ချက်ချင်း တောက်ပသွားပြီး လီဟုန်ကို ဆွဲကာ မေးတော့သည်။ "တကယ်လား"

"သူ ဒဏ်ရာမရဘူးလား"

"အခု သူ ဘယ်မှာလဲ"

လောလောလတ်လတ် ကုရှောင်းရွှယ်ကို ကြည့်ရင်း လီဟုန်က ပြန်ပြော၏။ "ဒဏ်ရာမရဘူး ထင်တယ်၊ ဒါကို မမလေးမိုက ပြောပြတာ။ "

"ဒါပေမဲ့... "

"သခင်လေးက နောက်ထပ် ပြဿနာ တစ်ခုထဲ ရောက်သွားပုံရတယ်။"

" ထျန်းဖူနန်းတော် အဆင့်မြင့်ပုဂ္ဂိုလ်တွေက သူ့ကို ဝိုင်းထားကြပြီး ဒီကိစ္စကို အသေအချာ စစ်ဆေးတော့မယ်တဲ့"

.....

ကောင်းကင်ယံ၌

ထန်ထျန်းကို လန်တင်း အင်မော်တယ်အရှင် အပါအဝင် အဆင့်မြင့်ပုဂ္ဂိုလ်များက ဤနေရာမှ ခေါ်သွားကြပြီ ဖြစ်သည်။

ထျန်းယွမ် အင်မော်တယ်အရှင်၊ ပဉ္စမမြောက် အင်မော်တယ်အရှင်နှင့် ရှန်းကျိုခန်းမသခင် ပိုင်နိုယီတို့ကဲ့သို့ အစွမ်းထက်သူများလည်း လိုက်ပါသွားကြ၏။

သူတို့မှာ ဖြစ်ရပ်ကို ကိုယ်တိုင်ကြုံတွေ့ခဲ့ရသူများ ဖြစ်သဖြင့် သေချာပေါက် ပါဝင်ရမည် ဖြစ်သည်။

သူတို့ ထွက်ခွာသွားသော နောက်ကျောကို ကြည့်ရင်း မိုရှောင်းရှောင်း သက်ပြင်းအရှည်ကြီး ချလိုက်မိသည်။

ဘေးရှိ အစ်ကိုဖြစ်သူ မိုကျွင်းက "ငါတို့ ထန်ထျန်းကို မိသားစုထဲ အတင်းမခေါ်ခဲ့တာ တော်သေးတာပေါ့။"

" နဂါးကျွန်းတောင် ပေါက်ကွဲသွားတယ်ဆိုတော့ တကယ့်ကို ကြောက်စရာပဲ။"

" ထျန်းဖူနန်းတော် စတင် တည်ထောင်ကတည်းက ဒီလောက်ကြီးမားတဲ့ အပြောင်းအလဲမျိုး တစ်ခါမှ မဖြစ်ဖူးဘူး"

သူ ခါးသီးစွာ ပြုံးရင်း ပြောလိုက်သည်။

မိုရှောင်းရှောင်းက မျက်မှောင်ကြုတ်ကာ "ဒီကိစ္စကို ထန်ထျန်း လုပ်တယ်လို့ အစ်ကို တကယ် ထင်နေတာလား။ "

"သူက ရွှေအင်မော်တယ် အဆင့်ကို ခုမှ ရောက်ကာစ ကျင့်ကြံသူတစ်ယောက်ပဲလေ၊ ဒီလောက် စွမ်းအား ရှိပါ့မလား"

မိုကျွင်းက ခေါင်းခါရင်း "ဒါက အရေးကြီးလို့လား။ "

"ကိစ္စက ဖြစ်သွားပြီ၊ ထန်ထျန်းကလည်း တိုက်ရိုက် သံသယရှိသူ ဖြစ်နေတယ်။ "

"သူ လုပ်တာ မဟုတ်ရင်တောင် သူနဲ့တော့ ပတ်သက်နေမှာ အသေအချာပဲ။ "

"တကယ်လို့ နောက်ဆုံးမှာ အကြောင်းရင်းကို ရှာမတွေ့ဘဲ တစ်စုံတစ်ယောက်ကို အပြစ်တင်ဖို့ လိုလာရင် ထန်ထျန်းက လွတ်မှာ မဟုတ်ဘူး။ "

"သူနဲ့ ဘာမှမဆိုင်ရင်တောင် ဒဏ်ရာရတဲ့ တပည့်တွေကို နှစ်သိမ့်ဖို့အတွက် သူ့ကို အပြစ်ပေးတာမျိုးက မရှောင်လွှဲနိုင်ဘူး"

မိုရှောင်းရှောင်း တိတ်ဆိတ်သွားတော့သည်။

မိုမိသားစု၏ တတိယမြောက် သခင်မလေး ဖြစ်သဖြင့် အဆင့်မြင့်ပုဂ္ဂိုလ်များ၏ လုပ်ဆောင်ပုံကို သူမ ကောင်းကောင်း သိထားသည်။

နဂါးတံခါးကဲ့သို့ ကြီးကျယ်သော ကိစ္စတွင် အကြောင်းရင်းမှန်ကို ရှာတွေ့လျှင်ပင် လူအများကို အမှန်အတိုင်း ထုတ်ပြန်မည် မဟုတ်ပေ။

ထန်ထျန်းမှာ အပြစ်ပုံချရန်အတွက် အကောင်းဆုံး လူတစ်ယောက် ဖြစ်နေသည်။

"အကောင်းဘက်က ကြည့်ပါ"

မိုကျွင်းက ပြုံးလျက် ပြောသည်။ "အနည်းဆုံးတော့ ထန်ထျန်းက အဆင့်မြင့်ပုဂ္ဂိုလ်အားလုံးရဲ့ အာရုံစိုက်မှုကို တကယ် ရသွားတာပဲ။ "

"စစ်နတ်ဘုရားနန်းတော် ဘက်ကလည်း သူ့ကို လွယ်လွယ်နဲ့ ဒုက္ခပေးရဲတော့မှာ မဟုတ်ဘူး။ "

"အဲဒီအချိန်ကျရင် ငါတို့ဘက်က သူ့အတွက် ကောင်းတဲ့စကားတွေ တတ်နိုင်သမျှ ပြောပေးပြီး ပြစ်ဒဏ် လျော့ပေါ့အောင် ကြိုးစားပေးတာပေါ့"

မိုရှောင်းရှောင်း ခဏမျှ တိတ်ဆိတ်သွားပြီးနောက် နောက်ဆုံးတွင် ခေါင်းညိတ်လိုက်သည်။

ဤကိစ္စ၏ သက်ရောက်မှုမှာ အလွန် ကြီးမားလှသဖြင့် သူမ ကိုင်တွယ်နိုင်သော အဆင့် မဟုတ်တော့ပေ။

အခြေအနေကို ကြည့်ပြီး လုပ်ရုံသာ ရှိတော့သည်။

"ငါတို့လည်း သွားကြစို့"

ထို့နောက် သူမနှင့် မိုကျွင်းတို့က ပင်မနန်းတော် ရှိရာဘက်သို့ အမြန် ပျံသန်းသွားကြတော့သည်။

တစ်ချိန်တည်းမှာပင် ကောင်းကင်၏ အခြားတစ်ဖက်၌

ဝမ်ကျိယွီနှင့် နတ်သမီးလင်းလျို့တို့၏ မျက်နှာတွင် ထူးဆန်းသော အမူအရာများ ပေါ်နေသည်။

ယနေ့ ဤမျှ အံ့အားသင့်ဖွယ် ကောင်းသော အပြောင်းအလဲ ဖြစ်လာလိမ့်မည်ဟု မည်သူမျှ ထင်မထားခဲ့ပေ။

"အခုတော့ ရှင်ပြောတဲ့စကားတွေကို ကျွန်မ စတင် ယုံကြည်လာပြီ၊ ကျိယွီ"

နတ်သမီးလင်းလျို့က သက်ပြင်းချရင်း ပြောလိုက်သည်။ "ဒီထန်ထျန်းဆိုတဲ့ လူက တကယ်ကို လျှို့ဝှက်ချက်တွေ များတာပဲ။"

" နှစ်ပေါင်း ထောင်ချီ တည်ရှိခဲ့တဲ့ နဂါးကျွန်းကိုတောင် အကြောင်းမဲ့ ပျက်စီးသွားအောင် လုပ်နိုင်တယ်ဆိုတော့။"

" တကယ်လို့ သူ့ကို ကျွန်မတို့အဖွဲ့ထဲ ခေါ်သွင်းပြီး ကျွန်မတို့ရဲ့ အစီအစဉ် မှာ ပါဝင်ခိုင်းခဲ့ရင် ဘာတွေ ဖြစ်လာမလဲဆိုတာ ကျွန်မ တကယ် စိတ်ကူးမယဉ်ရဲဘူး"

ပြောပြီးနောက် နတ်သမီးလင်းလျို့က ခဏစောင့်ကြည့်သော်လည်း ဝမ်ကျိယွီထံမှ မည်သည့် တုံ့ပြန်မှုမျှ မရရှိပေ။

လှည့်ကြည့်လိုက်သည့်အခါ ဝမ်ကျိယွီမှာ အတွေး ကမ္ဘာထဲ ရောက်နေသကဲ့သို့ ဖြစ်နေသည်ကို တွေ့လိုက်ရသည်။

"ကျိယွီ"

"ကျိယွီ"

နတ်သမီးလင်းလျို့က နှစ်ခါ ခေါ်လိုက်သည်။

ဝမ်ကျိယွီ သတိပြန်ဝင်လာပြီး "အော်... အင်း" ဟု ဆိုကာ နတ်သမီးလင်းလျို့ကို အလွန် ရှုပ်ထွေးသော အကြည့်များဖြင့် ကြည့်လိုက်သည်။

"မင်း ခုနက ဘာပြောလိုက်တာလဲ"

နတ်သမီးလင်းလျို့က ပြုံးရင်း "ရှင်က တကယ်ကို အမြော်အမြင်ရှိတယ်လို့ ကျွန်မ ပြောတာပါ။ "

"ထန်ထျန်းနဲ့ ဝေးဝေး နေတာက တကယ့်ကို မှန်ကန်တဲ့ ရွေးချယ်မှုပဲ"

ဝမ်ကျိယွီ၏ အမူအရာမှာ ပို၍ပင် ရှုပ်ထွေးသွားသည်။

ထို့နောက် သူက နှုတ်ခမ်းကို လှုပ်ရှားကာ ခက်ခဲစွာ ပြောလိုက်၏။ "တကယ်လို့..."

" ငါ ပြောတာက တကယ်လို့နော်၊ အခု ငါက မင်းကို ထန်ထျန်းကို ဖိတ်ခေါ်ခိုင်းမယ်ဆိုရင်..."

" ငါ့မှာ စိတ်ရောဂါ ရှိနေတယ်လို့ မင်း ထင်သွားမလား"

နတ်သမီးလင်းလျို့ ကြောင်အမ်းသွားတော့သည်။

သူမ၏ ပေါ့ပါးသော အမူအရာများမှာလည်း လုံးဝ ကွယ်ပျောက်သွား၏။

သူမ၏ စိုက်ကြည့်နေသော အကြည့်များကြောင့် ဝမ်ကျိယွီမှာ တစ်ကိုယ်လုံး ရှိန်းတိန်းရှိန်းတိန် ဖြစ်လာရသည်။

"ကျွန်မ ထင်တာကတော့..."

" ရှင် ကျွန်မကို တမင် သက်သက် နောက်နေတာလို့ပဲ"

နတ်သမီးလင်းလျို့၏ အသံမှာ အေးစက်သွားသည်။

ရှင်ကိုယ်တိုင် ဘာတွေ လုပ်ခဲ့လဲဆိုတာ ပြန်ကြည့်ဦး။

ကျွန်မ ထန်ထျန်းကို ဆက်သွယ်ချင်တုန်းက ရှင်က တားခဲ့တယ်။

ထန်ထျန်းက ထူးချွန်ပြလာလို့ ကျွန်မ ထပ်ပြောတုန်းကလည်း ရှင်ကပဲ အကြောင်းမဲ့ တားခဲ့ပြန်တယ်။

အခု ထန်ထျန်း ပြဿနာတက်နေတဲ့ အချိန်မှာ ရှင် တားခဲ့တဲ့ အကြောင်းရင်းတွေက မှန်ကန်တယ်ဆိုပြီး ကျွန်မက သုံးသပ်ပြနေတုန်း ရှိသေးတယ်

အခုကျတော့ သူ့ကို ဆက်သွယ်ခိုင်းပြန်ပြီ။ စိတ်ဝေဒနာရှင်တောင် ရှင့်လောက် စိတ်နေစိတ်ထား မပြောင်းဘူး

နတ်သမီးလင်းလျို့၏ စိတ်ထဲတွင် ဒေါသများ စထွက် လာသည်။

သူမသည်လည်း ဘယ်သူခိုင်းခိုင်း လုပ်မည့်သူမျိုး မဟုတ်ပေ။

ဝမ်ကျိယွီ၏ နောက်ခံက မည်မျှပင် ကြီးမားပါစေ၊ ဤကဲ့သို့ အကြိမ်ကြိမ်အခါခါ လုပ်လာလျှင် သူမအနေဖြင့် အမြဲတမ်း သည်းခံနေမည် မဟုတ်ပေ။

နတ်သမီးလင်းလျို့ စိတ်မချမ်းသာဖြစ်သွားသည်ကို ဝမ်ကျိယွီ ရိပ်မိသွားသဖြင့် အမြန် ပြောလိုက်သည်။"ငါ့စကားကို နားထောင်ပါဦး။ "

"တကယ်တော့ ငါလည်း ထန်ထျန်းကို အပျော် ဆက်သွယ်ချင်တာ မဟုတ်ပါဘူး၊ သူ ပြဿနာရှာနိုင်စွမ်းက ခုနက မင်းလည်း မြင်ခဲ့တာပဲ။"

" ဒါပေမဲ့ တကယ်ကို မတတ်သာလို့ပါ။"

" တစ်စုံတစ်ယောက်က ငါ့ကို အမိန့်ပေးလာလို့ပဲ"

"ထန်ထျန်းကို ဘယ်လိုနည်းနဲ့မဆို ဆက်သွယ်ရမယ်တဲ့။ အဲဒီလူရဲ့ အမိန့်ကို ငါ လုံးဝ ငြင်းဆန်လို့ မရဘူး"

ဝမ်ကျိယွီက ရှင်းပြသော်လည်း နတ်သမီးလင်းလျို့မှာ အေးစက်စွာသာ ကြည့်နေဆဲ ဖြစ်သည်။ ကြည့်ရသည်မှာ ဤရှင်းပြချက်ကို လုံးဝ လက်မခံနိုင်သေးပုံရ၏။

၎င်းကို မြင်သည့်အခါ ဝမ်ကျိယွီ သက်ပြင်းအရှည်ကြီး ချလိုက်သည်။

"မင်း ငါ့ရဲ့ နောက်ခံက ဘယ်လိုမျိုးလဲဆိုတာ အမြဲ သိချင်နေခဲ့တာ မဟုတ်လား။"

" ကောင်းပြီလေ၊ ငါ မင်းကို ပြောပြမယ်။ "

"ပြီးတော့ ဒီကိစ္စ ပြီးသွားရင် မင်း အဲဒီနေရာကို သွားလို့ရမယ်လို့ ငါ အာမခံတယ်"

ပြောပြီးနောက် ဝမ်ကျိယွီက အလင်းလုံးလေးတစ်ခုကို ထုတ်ကာ နတ်သမီးလင်းလျို့၏ ရှေ့တွင် ချလိုက်သည်။

အလင်းလုံးအတွင်းရှိ အရာကို မြင်လိုက်ရသည့်အခါ နတ်သမီးလင်းလျို့၏ မျက်လုံးများထဲတွင် အံ့သြမှုများ ဖြတ်ပြေးသွားပြီးနောက် တစ်စုံတစ်ခုကို သဘောပေါက်သွားပုံရသည်။

"ဒါကြောင့်ကိုး... ရှင်က ထျန်းဖူနန်းတော်ထဲမှာ ဒီလောက် အင်အားကြီးနေတာ။"

" စည်းကမ်းထိန်းသိမ်းရေးဌာနကို စေခိုင်းနိုင်တာတင်မကဘဲ ရှောင်းယောင် မိသားစုခေါင်းဆောင်နဲ့ပါ ရင်းနှီးနေတာပေါ့"

နတ်သမီးလင်းလျို့က ဝမ်ကျိယွီကို ကြည့်ကာ ပုံမှန်အတိုင်း ပြန်လည် တည်ငြိမ်သွား၏။

"ကောင်းပြီလေ... "

"ကျွန်မ ရှင် ပြောတာကို သဘောတူတယ်"