ရောင်းရင်းယဲ့... မြူနှင်းနန်းတော်က အမျိုးသမီးကျင့်ကြံသူတွေ ဒီမှာ သေဆုံးသွားမှာကို မင်းလည်း မလိုလားလောက်ပါဘူး(၁)။

မကြာမီအချိန်အတွင်း ဝိညာဉ်သန္ဓေသား ကျင့်ကြံသူအများအပြားသည် ကျိုးစွေ့၏ တောင်းဆိုချက်များကို စတင် နားထောင်လာကြလေသည်။

မည်သို့ပင်ဆိုစေကာမူ သူတို့သည် နှစ်အနည်းငယ်ကြာ ပိတ်မိနေခဲ့ကြသဖြင့် ထွက်ခွာရန် မစောင့်နိုင်လောက်အောင် ဖြစ်နေကြပြီ ဖြစ်ချေသည်။ အခြေအနေ သတ်မှတ်ချက်များ မြင့်မားနေလျှင်တောင်မှ လက်မခံနိုင်စရာ အကြောင်းမရှိပေ။

"ဘာ... ဝိညာဉ်သန္ဓေသား အစောပိုင်းအဆင့် ကျင့်ကြံသူတစ်ဦးစီအတွက် အထွတ်အထိပ်အဆင့် ဝိညာဉ်ကျောက်တုံး ငါးထောင်၊ ဝိညာဉ်သန္ဓေသား အလယ်အလတ်အဆင့် ကျင့်ကြံသူအတွက် အထွတ်အထိပ်အဆင့် ဝိညာဉ်ကျောက်တုံး တစ်သောင်း၊ ဝိညာဉ်သန္ဓေသား နှောင်းပိုင်းအဆင့် ကျင့်ကြံသူအတွက် အထွတ်အထိပ်အဆင့် ဝိညာဉ်ကျောက်တုံး ငါးသောင်း ပေးဆောင်ရမယ် ဟုတ်လား…

ဒါ့အပြင် စတုတ္ထအဆင့်၊ ပဉ္စမအဆင့် ပစ္စည်းတွေ အများကြီးကိုပါ လိုချင်သေးတယ်တဲ့လား… မင်း သွားပြီးပဲ ဓားပြတိုက်လိုက်ပါတော့လား… ယုတ်မာလိုက်တဲ့ ဓားပြကောင်…"

ကျိုးစွေ့၏ တောင်းဆိုချက်များကို ကြားပြီးနောက် ဟေးရှားနန်းတော်၏ နန်းတော်သခင် ပင်လယ်ခွင်းမိစ္ဆာဘုရင်၏ မျက်နှာထားမှာ လုံးဝ စိမ်းဖန်သွားလေသည်။

သူတို့၏ စိတ်ထဲတွင် ရှေ့မှ လျှို့ဝှက်ဆန်းကြယ်သော ပုဂ္ဂိုလ်သည် ကြီးမားသော တောင်းဆိုမှုများ ပြုလုပ်လိမ့်မည်ဟု ကြိုတင်ပြင်ဆင်ထားခဲ့ကြသော်လည်း၊ ဤလူယုတ်မာသည် သူတို့ ထင်ထားသည်ထက် ပိုမို လောဘကြီးလိမ့်မည်ဟု လုံးဝ ထင်မှတ်မထားခဲ့ကြပေ။

အထွတ်အထိပ်အဆင့် ဝိညာဉ်ကျောက်တုံးများသည် အလွန်တရာ ရှားပါးပြီး တန်ဖိုးကြီးသော မဟာဗျူဟာမြောက် အရင်းအမြစ်များ ဖြစ်ကြောင်း သိထားရပေမည်။

ဝိညာဉ်သန္ဓေသား အင်အားစုကြီးများ၏ ဘဏ္ဍာတိုက်ထဲတွင်ပင် အထွတ်အထိပ်အဆင့် ဝိညာဉ်ကျောက်တုံး များများစားစား မရှိကြပေ။

သို့သော် ဤလူယုတ်မာကမူ ပါးစပ်ဟလိုက်သည်နှင့် ထောင်သောင်းချီသော အထွတ်အထိပ်အဆင့် ဝိညာဉ်ကျောက်တုံးများကို တောင်းဆိုနေလေသည်။ ဤသည်မှာ သူတို့၏ သွေးကို စုပ်ယူပြီး၊ အသားကို စားကာ၊ အရိုးပါမကျန် ဝါးမြိုပစ်ချင်နေခြင်း ဖြစ်သည်မှာ ထင်ရှားလှသည်။

ပင်လယ်ခွင်းမိစ္ဆာဘုရင်သည် ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူ ဖြစ်လင့်ကစား၊ ဤကဲ့သို့သော အခြေအနေမျိုးကို ရင်ဆိုင်ရသောအခါ အလွန်တရာ လွန်ကဲလွန်းသည်ဟု ခံစားလိုက်ရသည်။

အကယ်၍ တစ်ဖက်လူ၏ တောင်းဆိုမှုကို အမှန်တကယ် သဘောတူလိုက်ပါက၊ ဟေးရှားနန်းတော်၏ ဘဏ္ဍာတိုက်သည် အနည်းငယ် လျော့နည်းသွားခြင်းမဟုတ်ဘဲ ကြီးမားသော ဆုံးရှုံးမှုကို ကြုံတွေ့ရပေလိမ့်မည်။

"အိုး... ကျုပ်က ဓားပြတိုက်နေတာပဲလေ… စောစောက ကျုပ်ပြောတဲ့ စကားတွေကို ခင်ဗျားတို့ နားမလည်ကြဘူးလား…"

"ဒါမှမဟုတ် မင်းတို့ရဲ့ အသက်တွေက ဒီအ‌ပေါ်ယံပစ္စည်းတွေလောက် တန်ဖိုးမရှိဘူးလို့ ထင်နေကြတာလား…"

"မင်းတို့ ကိုယ်တိုင် ဒီမှာ သေသွားပြီး ဂိုဏ်းကို အပြီးတိုင်‌ ယိုယွင်းပျက်စီးသွားအောင် မလုပ်ချင်ကြဘူး မဟုတ်လား…" ကျိုးစွေ့က တည်ငြိမ်စွာ ပြောလိုက်သည်။

ဘာ...

ဤစကား ထွက်ပေါ်လာသည်နှင့်တပြိုင်နက် ဝိညာဉ်သန္ဓေသား ကျင့်ကြံသူအများအပြား၏ မျက်နှာထားသည် အလွန်တရာ အရုပ်ဆိုးသွားကြသည်။

ထင်ရှားသည်မှာ ဤယုတ်မာကောက်ကျစ်သော လူငယ်သည် သူတို့၏ အားနည်းချက်ကို ဖမ်းဆုပ်ထားခြင်း ဖြစ်ပေသည်။ ကိုယ့်အတွက် မစဉ်းစားလျှင်တောင်မှ ဂိုဏ်းအတွက် ထည့်သွင်းစဉ်းစားရပေမည်။

သူတို့အားလုံးသည် အင်အားစုအသီးသီး၏ မဏ္ဍိုင်ထောက်တိုင်ကြီးများ ဖြစ်ကြသည်ကို သိထားရပေမည်။

အကယ်၍ သူတို့အားလုံး ဤနေရာတွင် ပိတ်မိနေခြင်း သို့မဟုတ် သေဆုံးသွားခြင်း ဆိုပါက၊ သူတို့၏ နောက်ကွယ်မှ ဂိုဏ်းများတွင် မည်သည်များ ဖြစ်ပျက်လာမည်ကို မသိနိုင်ပေ။ ရန်သူအင်အားစုများ၏ ဖျက်ဆီးခြင်းကို ခံရကာ လျင်မြန်စွာ ပျက်စီးသွားကောင်း ပျက်စီးသွားနိုင်သည်။

"ဒီလူယုတ်မာကို ကြောက်နေစရာ မလိုဘူး…"

"ဒီကောင်က ငါတို့ကို ခြိမ်းခြောက်နေရုံ သက်သက်ပဲ…"

"ငါ့အမြင်အရဆိုရင် ဒီကောင့်မှာ ငါတို့ကို သတ်နိုင်တဲ့ စွမ်းရည် လုံးဝ မရှိဘူး…"

"အများဆုံး ပဉ္စမအဆင့် ချုပ်နှောင်ခြင်းအစီအရင် တစ်ခုလောက်ကိုပဲ ထိန်းချုပ်ပြီး ငါတို့ကို ဝိုင်းရံထားနိုင်တာ…"

"တကယ်လို့ ဒီ နတ်ဘုရားအသွင်ပြောင်းအဆင့် အကြွင်းအကျန်ရဲ့ အစီအရင်အားလုံးကို အပြည့်အဝ ထိန်းချုပ်နိုင်တယ်ဆိုရင် ငါတို့ကို အစောကြီးကတည်းက သတ်ပစ်လောက်ပြီ…"

"အခုမှ လက်ခမောင်းခတ်ဖို့ ဘာကိစ္စ စောင့်နေမှာလဲ…"

"သာမန် ချုပ်နှောင်ခြင်းအစီအရင်လေးပါကွာ… ငါတို့သာ အချိန်နည်းနည်းလောက် ပေးလိုက်ရင် သေချာပေါက် ဖြိုခွဲနိုင်မှာပဲ…"

"ဒီကောင့်ရဲ့ ခြိမ်းခြောက်မှုတွေကို ကြောက်နေစရာ မလိုဘူး… ငါတို့ကို တကယ်ပဲ ရွှံ့ရုပ်တွေလို့ ထင်နေတာလား"

ဝိညာဉ်သန္ဓေသား အလယ်အလတ်အဆင့် ကျင့်ကြံသူတစ်ဦးက အော်ဟစ်ပြောဆိုလိုက်သည်။

သူသည် ဟေးရှားနန်းတော်မှ ဝိညာဉ်သန္ဓေသား မိစ္ဆာကျင့်ကြံသူတစ်ဦး ဖြစ်ပြီး စိတ်သဘောထား အလွန် ကြမ်းတမ်းသူ ဖြစ်၏။

တစ်ချိန်တည်းမှာပင် သူသည် ဤခေါင်းဝှက်ထားသောကောင်တွင် မည်သည့် အစွမ်းအစမှ ရှိမည်မဟုတ်ဟု ယုံကြည်နေသည်။ အကယ်၍ အမှန်တကယ် စွမ်းအားကြီးမားပါက ခေါင်းဝှက်ကာ ပုန်းအောင်းနေမည်မဟုတ်ဘဲ လူသိရှင်ကြား ထွက်ပေါ်လာမည်သာ ဖြစ်၏။

စကားနည်းနည်း ပြောရုံဖြင့် သူတို့ကို အထွတ်အထိပ်အဆင့် ဝိညာဉ်ကျောက်တုံး ထောင်သောင်းချီ ပေးဆောင်ခိုင်းခြင်းမှာ နေ့ခင်းကြောင်တောင် အိပ်မက်မက်နေခြင်းသာ ဖြစ်ချေသည်။

ဝုန်း...

ထိုအချိန်တွင် ကျိုးစွေ့သည် အတွေးတစ်ချက် လှုပ်ရှားလိုက်ပြီး ကျွန်းတစ်ကျွန်းလုံးကို လွှမ်းခြုံထားသော ပဉ္စမအဆင့် ထိပ်တန်းအစီအရင် 'လေးပါးသင်္ကေတ ကုယုံအစီအရင်'ကို ချက်ချင်း လှုံ့ဆော်လိုက်ရာ၊ အကန့်အသတ်မဲ့သော ပဉ္စမအဆင့် ဝိညာဉ်သွေးကြောစွမ်းအားများ စုဝေးလာခဲ့လေသည်။

ကျွန်းတစ်ကျွန်းလုံး၏ ကောင်းကင်ယံတွင် နဂါးစိမ်း၊ ကျားဖြူ၊ ဖီးနစ်ငှက်နှင့် လိပ်နက် ဟူသော နတ်ဘုရားသားရဲလေးကောင်၏ ပုံရိပ်ယောင်များ ပေါ်လာသကဲ့သို့ ရှိသည်။

အစိမ်းရောင် အလင်းတန်းတစ်ခု ကောင်းကင်မှ ကျဆင်းလာပြီး လျှပ်စီးကဲ့သို့ လျင်မြန်သော အရှိန်အဟုန်ဖြင့် ထိုဝိညာဉ်သန္ဓေသား မိစ္ဆာကျင့်ကြံသူကို ချက်ချင်း ရိုက်ခတ်လိုက်လေသည်။

"အား..."

တစ်ခဏအတွင်း ထိုဝိညာဉ်သန္ဓေသား မိစ္ဆာကျင့်ကြံသူသည် သွေးပျက်ဖွယ် အော်ဟစ်သံကို မထိန်းချုပ်နိုင်ဘဲ အော်ဟစ်လိုက်မိတော့သည်။ သူ၏ အသက်စွမ်းအင်များ လျင်မြန်စွာ ယိုယွင်းပျက်စီးသွားသည်ကို ခံစားလိုက်ရပြီး၊ ခန္ဓာကိုယ်ပေါ်ရှိ သက်တမ်းများ ဖယ်ရှားခံလိုက်ရသကဲ့သို့ ဖြစ်နေချေသည်။

မူလက မည်းနက်နေသော ဆံပင်များသည် ယခုအခါ ဖြူဖွေးလာနေပြီ ဖြစ်သည်။ ချောမွေ့သော အရေပြားပေါ်တွင်လည်း အရေးအကြောင်းများ စတင် ထွက်ပေါ်လာသည်။ ပုပ်သိုးဆွေးမြေ့သော အရှိန်အဝါများ သူ၏ ခန္ဓာကိုယ်မှ ထွက်ပေါ်လာနေသည်။

ဘုန်း... ဘုန်း...

သို့သော် ဤသည်မှာ အစပျိုးခြင်းသာ ရှိသေးသည်။ နောက်ထပ်သော အစိမ်းရောင်အလင်းတန်း နှစ်ခုသုံးခုက ထပ်မံ ကျရောက်လာပြီး ထိုဝိညာဉ်သန္ဓေသား မိစ္ဆာကျင့်ကြံသူကို ဆက်တိုက် ရိုက်ခတ်လိုက်ရာ၊ တစ်ဖက်လူသည် အစွမ်းကုန် ခုခံသော်လည်း ဤစွမ်းအားကို တားဆီးနိုင်ခြင်း မရှိပေ။

တစ်ခဏအတွင်း ထိုဝိညာဉ်သန္ဓေသား မိစ္ဆာကျင့်ကြံသူ၏ ခန္ဓာကိုယ်ပေါ်မှ အရှိန်အဝါများ ပျောက်ကွယ်သွားပြီး ခြောက်သွေ့သော အလောင်းကောင်အဖြစ် ပြောင်းလဲသွားကာ၊ မျက်နှာမှာ ကြည့်၍မရအောင် အိုမင်းရင့်ရော်သွားပြီး မြေပြင်ပေါ်သို့ လဲကျကာ သက်တမ်းကုန်ဆုံး၍ သေပွဲဝင်သွားရလေသည်။

"ဒါက..."

ဝိညာဉ်သန္ဓေသား ကျင့်ကြံသူအများအပြား မျက်ဆံများ ကျုံ့သွားကြပြီး အမွေးအမျှင်များ ထောင်ထလာကာ ကြက်သီးထသွားကြရသည်။ သူတို့သည် ဝိညာဉ်သန္ဓေသား အလယ်အလတ်အဆင့် ကျင့်ကြံသူတစ်ဦး ဤကဲ့သို့ သေဆုံးသွားပြီး အလောင်းခြောက်အဖြစ် ပြောင်းလဲသွားသည်ကို မျက်မြင်ကိုယ်တွေ့ မြင်တွေ့လိုက်ရသည်။

ခုခံရန် နည်းလမ်းပင် မရှိခဲ့ချေ။ အစိမ်းရောင် အလင်းတန်းများသည် ဝိညာဉ်ရတနာ အကာအကွယ်များကို လျစ်လျူရှုထားနိုင်ပုံရပြီး ထိုဝိညာဉ်သန္ဓေသား ကျင့်ကြံသူ၏ ခန္ဓာကိုယ်ထဲသို့ လွယ်ကူစွာ ဝင်ရောက်သွားခဲ့သည်။

ဤအခိုက်အတန့်တွင် သူတို့သည် ထိုလျှို့ဝှက်ဆန်းကြယ်သော ပုဂ္ဂိုလ်၏ ကြောက်မက်ဖွယ်ကောင်းမှုကို အမှန်တကယ် ခံစားလိုက်ရသည်။

တစ်ဖက်လူသည် ခြိမ်းခြောက်နေခြင်း လုံးဝ မဟုတ်ပေ။ သူတို့အားလုံးကို ဤနေရာတွင် သတ်ဖြတ်ပစ်နိုင်သော စွမ်းရည် အမှန်တကယ် ရှိနေခြင်းပင် ဖြစ်၏။

"မင်းတို့သာ ငါ့ ကုယုံဂိုဏ်းရဲ့ မှတ်တမ်းတွေကို ဖတ်ဖူးရင် စောစောက ဘာလဲဆိုတာ သေချာပေါက် သိကြမှာပါ"

"ဒါက ငါ့ ကုယုံဂိုဏ်းရဲ့ ပဉ္စမအဆင့် ထိပ်တန်းအစီအရင်ကြီး 'လေးပါးသင်္ကေတ ကုယုံအစီအရင်' ပဲ"

"ဒီအစီအရင်ကြီးရဲ့ စွမ်းရည်က တစ်ခုတည်း ရှိတယ်… အဲဒါကတော့ ကျင့်ကြံသူရဲ့ သက်တမ်းကို ဖယ်ရှားပစ်တာပဲ…"

"ကုယုံဆန်းကြယ်အလင်း တစ်ချက်ထိရင် သက်တမ်း နှစ်တစ်ရာ လျော့နည်းသွားလိမ့်မယ်…"

"စောစောက ရောင်းရင်းက သက်တမ်းရှည်တယ်လို့ ပြောလို့ရတယ်… ကုယုံဆန်းကြယ်အလင်း ငါးချက်တောင် ထိမှန်လို့ သက်တမ်းငါးရာ ကုန်ဆုံးမှ သေသွားတယ်…"

"တကယ်လို့ ဘယ်ရောင်းရင်းမဆို မကျေနပ်တာ ရှိသေးရင် ထွက်လာပြီး ငါ့ ကုယုံဂိုဏ်းရဲ့ 'လေးပါးသင်္ကေတ ကုယုံအစီအရင်' ဘယ်လောက် စွမ်းသလဲဆိုတာ စမ်းကြည့်လို့ ရပါတယ်…" ကျိုးစွေ့က တည်ငြိမ်စွာ ပြောလိုက်သည်။

"ဒါက..."

ဤစကားကို ကြားသောအခါ ဝိညာဉ်သန္ဓေသား ကျင့်ကြံသူအများအပြား ပြောစရာစကားမဲ့သွားကြပြီး၊ ကြောက်လွန်း၍ အသံပင် မထွက်ရဲကြတော့ဘဲ မည်သည့်စကားမျှ မပြောရဲကြတော့ပေ။

ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူများပင်လျှင် အမွှေးအမျှင်များ ထောင်ထလာပြီး ကိုယ့်အသက်ကို ဤနေရာတွင် အချိန်မရွေး ဆုံးရှုံးရနိုင်ကြောင်း ခံစားလိုက်ရတော့သည်။

မည်သို့ပင်ဆိုစေ သူတို့တစ်ဦးစီတိုင်းသည် အသက်ကိုးရာ၊ တစ်ထောင်ကျော် နေထိုင်လာခဲ့ကြပြီး ဖြစ်သည်။ သက်တမ်းကုန်ဆုံးရန် သိပ်မလိုတော့ပေ။

အကယ်၍ ကုယုံဆန်းကြယ်အလင်း တစ်ချက်နှစ်ချက်သာ ထိမှန်သွားပါက အမှန်တကယ်ပင် ဤနေရာတွင် သက်တမ်းကုန်ဆုံး၍ သေဆုံးသွားနိုင်သည်။

ထို့အပြင် သူတို့တွင် မည်သည့် ကာကွယ်ရေးနည်းလမ်းမျှ မရှိပေ။ ကုယုံဂိုဏ်းသည် ရှေးဟောင်းခေတ်က နတ်ဘုရားအသွင်ပြောင်းအဆင့်ဂိုဏ်း၊ အင်အားကြီး ဂိုဏ်းတစ်ဂိုဏ်း ဖြစ်ရသည်နှင့် ထိုက်တန်သည်ဟုသာ ဆိုရပေမည်။ ဤကဲ့သို့သော ဆန်းကြယ်သည့် စွမ်းအားကို ပိုင်ဆိုင်ထားလေသည်။

ဤအချက်ကြောင့် သူတို့ မည်သည့်စကားမျှ ဆက်မပြောရဲကြတော့ပေ။ အမှန်အတိုင်း ဆိုရလျှင် အစောပိုင်းက သူတို့သည်လည်း ထိုဝိညာဉ်သန္ဓေသား မိစ္ဆာကျင့်ကြံသူကဲ့သို့ပင် ဤလျှို့ဝှက်ဆန်းကြယ်သော ပုဂ္ဂိုလ်သည် ဟန်ဆောင်ခြိမ်းခြောက်နေခြင်း ဖြစ်နိုင်သည်ဟု ထင်မှတ်ခဲ့ကြသည်။

ထိုသို့မဟုတ်ပါက အဘယ်ကြောင့် ယခုမှ ပေါ်ထွက်လာပါမည်နည်း။

သို့သော် ယခု ကျိုးစွေ့သည် ပြင်းထန်သော တိုက်ခိုက်မှုတစ်ချက်ဖြင့် ဝိညာဉ်သန္ဓေသား အလယ်အလတ်အဆင့် ကျင့်ကြံသူတစ်ဦးကို ချက်ချင်း သတ်ဖြတ်လိုက်ချေသည်။

ပြိုင်ဘက်ကင်းသော စွမ်းအားကို ထုတ်ဖော်ပြသလိုက်ခြင်းပင် ဖြစ်သည်။

သူတို့၏ စိတ်ထဲရှိ အကြံအစည်လေးများ အားလုံး ပျောက်ကွယ်သွားကြတော့သည်။ မည်သူမျှ ခေါင်းထောင်ရဲခြင်း မရှိကြတော့ပေ။ နောက်ထပ် အသတ်ခံရမည့် ဝိညာဉ်သန္ဓေသား ကျင့်ကြံသူမှာ မိမိကိုယ်တိုင် ဖြစ်လာမည်ကို စိုးရိမ်နေကြတော့သည်။

"ရောင်းရင်း... ခင်ဗျား နားလည်မှုလွဲနေပါပြီ…"

"ဒါက စောစောက လူမိုက်ကောင်ရဲ့ အတွေးသက်သက်ပါ… ကျွန်တော်တို့မှာ ဒီလိုအတွေးမျိုး လုံးဝ မရှိပါဘူး…"

"ပြီးတော့ ကုယုံဂိုဏ်းထဲကို ကျူးကျော်ဝင်ရောက်မိတာ ကျွန်တော်တို့ မှားပါတယ်…"

"ဖြစ်ပေါ်လာတဲ့ ဆုံးရှုံးမှုတွေကိုလည်း လျော်ကြေးပေးသင့်ပါတယ်…"

"ဖြစ်နိုင်မယ်ဆိုရင် ကျွန်တော်တို့ အခုပဲ လျော်ကြေးကိစ္စ ဆွေးနွေးလို့ ရမလား…"

ရွှမ်ပေါင်မျှော်စင်၏ သခင် ထျန်းဆွမ်းတာအိုအရှင်က ချက်ချင်း အရှုံးပေးလိုက်သည်။

တစ်ဖက်လူ၏ ကြောက်မက်ဖွယ် စွမ်းအားကို မြင်တွေ့လိုက်ရပြီဖြစ်ရာ ခေါင်းငုံ့သင့်သည့်အချိန်တွင် ခေါင်းငုံ့ရမည်ကို သူ သိပေသည်။ ထိုသို့မဟုတ်ဘဲ ခေါင်းမာနေလျှင် မိမိအတွက် မည်သည့် အကျိုးကျေးဇူးမျှ ရှိလာမည် မဟုတ်ပေ။