အခန်း (၅၉၂-၅၉၄)

အခန်း (၅၉၂) - ဝင်္ကပါပင်လယ်နယ်မြေအား ခြိမ်းခြောက်ခြင်း

~"လက်နက် ပြုပြင်ခြင်း အဆင့် (၆)၊ ကောင်းကင်ဘုံလူသား ဆဋ္ဌမအလွှာ... ဆေးဧကရာဇ်ရဲ့ စွမ်းအားက တကယ့်ကို ကြောက်စရာ ကောင်းလွန်းတယ်"

"ဆေးဧကရာဇ်က ရက်စက်ပြီး သွေးအေးတယ်။ သူ့ကို ရန်သူလို့ သတ်မှတ်လိုက်ရင် သေဖို့သာ ပြင်ထားပေတော့"

ကောင်းကင်ယံထက်မှ အင်မော်တယ် လက်နက် စံအိမ် စစ်သူကြီးသည် ဖုန်းဝူချန်ကို ကြည့်ရင်း အံ့သြမှင်သက်နေသည်။

ဖုန်းဝူချန် အင်မော်တယ် လက်နက် စံအိမ်ကို ပထမဆုံး ရောက်ခဲ့စဉ်က ထျန်းယွမ်ဘုံ အဆင့်သာ ရှိသေးသည်။ ယခု ကောင်းကင်ဘုံလူသား ဆဋ္ဌမအလွှာသို့ ရောက်ရှိနေပြီ ဖြစ်သည်။ ဤမျှ မြန်ဆန်သော ကျင့်ကြံမှုနှုန်းသည် စစ်သူကြီးကို တုန်လှုပ်စေသည်။

"ဆေးဧကရာဇ်ရဲ့ စွမ်းအားက အရမ်း ကြောက်စရာ ကောင်းတယ်။ ဒါက ဒဏ္ဍာရီထဲက 'ခေတ်အဆက်ဆက် စွမ်းအား' ၊ ဒါမှမဟုတ် 'ရှေးဦး ကမ္ဘာဦး စွမ်းအား' များ ဖြစ်မလား"

"ဆေးဧကရာဇ်ရဲ့ ကျင့်ကြံခြင်းအဆင့်၊ 'အတွေးတချက်ဖြင့် လက်နက်သွန်းလုပ်ခြင်း'နတ်ဘုရား သိုင်းကွက်၊ အဆင့်မြင့် အင်မော်တယ် လက်နက်များ ပြုလုပ်နိုင်စွမ်း... ဒီလို ပါရမီရှင်မျိုး တိုက်ကြီးပေါ်မှာ ပြိုင်ဘက် မရှိဘူး။ ယင်ယန်မိသားစု သခင်လေးတောင် ဆေးဧကရာဇ်ကို ယှဉ်နိုင်မှာ မဟုတ်ဘူး။ နောက်ထပ် နှစ်အနည်းငယ် ကြာရင် ဆေးဧကရာဇ်က ယင်ယန်မိသားစု သခင်လေးကို ကျော်တက်သွားမှာ သေချာတယ်"

"ဂိုဏ်းချုပ်ကြီးရဲ့ ဆုံးဖြတ်ချက် မှန်ကန်တယ်။ ဆေးဧကရာဇ်လို အသက်ငယ်ငယ်နဲ့ ဒီလောက် စွမ်းအားကြီးတဲ့သူ နောက်ကွယ်မှာ... ပိုပြီး အစွမ်းထက်တဲ့ ပုဂ္ဂိုလ်ကြီး ရှိနေမှာ သေချာတယ်။ ဒဏ္ဍာရီထဲက 'စစ်မှန်သော နတ်ဘုရား' ပညာရှင်များ ဖြစ်နေမလား"

စစ်သူကြီးသည် စိတ်ထဲတွင် တွေးတောနေမိသည်။ ဖုန်းဝူချန်ကို လေးစားရုံသာမက ကြောက်ရွံ့မှုပါ တိုးပွားလာသည်။

စစ်သူကြီးသည် ပါရမီရှင်များစွာကို မြင်ဖူးသော်လည်း ဖုန်းဝူချန်ကဲ့သို့ ကြောက်မက်ဖွယ် ပါရမီရှင်မျိုးကို တစ်ခါမှ မတွေ့ဖူးပေ။ ဖုန်းဝူချန်သည် ပထမဆုံးပင်။

"ညီအစ်ကိုတို့... သတ်ရတာ ကောင်းလိုက်တာ"

ဖုန်းဝူချန်က နဂါးနတ်ဘုရား ဓားသွားပေါ်မှ သွေးများကို ခါထုတ်လိုက်ပြီး ပြုံးကာ ပြောလိုက်၏။

"ရန်သူဆိုရင် သေရမယ်"

ဟွမ်ယန်နှင့် အခြား စစ်သည်တော်များလည်း ဟိန်းဟောက်လိုက်ကြ၏။ သူတို့၏ သွေးဆာနေသော လူသတ် အရှိန်အဝါများသည် ကောင်းကင်ကို တုန်လှုပ်စေပြီး လူတိုင်း၏ နှလုံးသားကို ကြောက်ရွံ့စေသည်။

"နောက်တစ်နေရာ"

ဟု ဖုန်းဝူချန်က ရက်စက်စွာ ပြုံးရင်း ပြောလိုက်၏။

ကောင်းကင်သိုင်း ဂိတ်တံခါး ပျက်စီးသွားခြင်းသည် နဂါးနတ်ဘုရား နန်းတော် ဖျက်ဆီးခဲ့သော (၈) ခုမြောက် အင်အားစု ဖြစ်သည်။

ကြည့်ရှုသူများသည် ကြောက်လွန်းသဖြင့် စကားပင် မပြောနိုင်ကြတော့ပေ။ ကျောက်ရုပ်များအလား တောင့်တင်းနေကြ၏။ နဂါးနတ်ဘုရား နန်းတော်သားများ ထွက်ခွာသွားပြီး ကြာမြင့်သည့်တိုင်အောင် အသိပြန်မဝင်နိုင်ကြသေးပေ။

ဖုန်းဝူချန်သည် သန့်ရှင်းသော နေမင်းဂိုဏ်းသို့ မသွားသေးဘဲ နောက်ဆုံးမှ သွားရန် ချန်ထားခဲ့သည်။ အရင်ဆုံး ပုစွန်ဆိတ်များကို ရှင်းလင်းပြီးမှ သန့်ရှင်းသော နေမင်းဂိုဏ်းကို အေးဆေး ကိုင်တွယ်မည် ဖြစ်သည်။

"ကောင်းကင်သိုင်း ဂိတ်တံခါး ကျသွားပြီ... ကောင်းကင်သိုင်း ဂိတ်တံခါး ပျက်စီးသွားပြီ"

"နဂါးနတ်ဘုရား နန်းတော်က တကယ် ကြောက်စရာ ကောင်းလွန်းတယ်။ ကောင်းကင်သိုင်း ဂိတ်တံခါးက တစ်ယောက်မှ အရှင်မကျန်ဘူး... အကုန်သတ်ပစ်လိုက်တာ"

"ကောင်းကင်သိုင်း ဂိတ်တံခါး အပါအဝင် ဂိုဏ်း (၈) ခု ရှိသွားပြီ။ နဂါးနတ်ဘုရား နန်းတော်က နောက်ထပ် ဘယ်လောက် ထပ်သတ်ဦးမှာလဲ"

ကောင်းကင်သိုင်း ဂိတ်တံခါး သွေးချောင်းစီးသွားသော သတင်းသည် ဝင်္ကပါပင်လယ်နယ်မြေရှိ အင်အားကြီး ဂိုဏ်းများနှင့် မိသားစုများကို တုန်လှုပ်စေသည်။ ကျင့်ကြံသူ အများအပြား ထိတ်လန့်နေကြ၏။ ဤကဲ့သို့ ကြောက်မက်ဖွယ် သတ်ဖြတ်မှုနှုန်းဖြင့် ဆိုလျှင် ဝင်္ကပါပင်လယ်နယ်မြေရှိ အင်အားကြီး ဂိုဏ်းများအားလုံး ပျက်စီးသွားမည်ကို စိုးရိမ်နေကြ၏။

ဒီလောက် ကြောက်စရာကောင်းသော နဂါးနတ်ဘုရား နန်းတော်ကို ဘယ်သူ တားနိုင်မည်လဲ။

နဂါးနတ်ဘုရား နန်းတော်သည် ကပ်ဘေးဆိုးကြီး တစ်ခုအလား အင်အားကြီး ဂိုဏ်းများကို တစ်ခုပြီးတစ်ခု ဖျက်ဆီးပစ်နေသည်။ နတ်ဘုရားတွေ့လျှင် နတ်ဘုရားကို သတ်၊ ဘုရားတွေ့လျှင် ဘုရားကို သတ် ဆိုသကဲ့သို့ မည်သူမျှ မတားဆီးနိုင်ပါလေ။

နဂါးနတ်ဘုရား နန်းတော်၏ တည်ရှိမှုသည် 'ယမမင်း နန်းတော်' ကဲ့သို့ ဖြစ်ပြီး ဖုန်းဝူချန်သည် အသက်နှင့် သေခြင်းကို အမိန့်ပေးနိုင်သော 'ယမမင်း' ကိုယ်တိုင် ဖြစ်နေသည်။ သူ သေမိန့်ပေးလိုက်လျှင် သေရမည်သာ။

ဒါဟာ ဝင်္ကပါပင်လယ်နယ်မြေ သမိုင်းတစ်လျှောက် အဆိုးရွားဆုံး အဖြစ်အပျက်ကြီးပင်။

နဂါးနတ်ဘုရား နန်းတော်ကို တိုက်ခိုက်ခဲ့သော အင်အားကြီး ဂိုဏ်းများသည် ကောင်းကင်သိုင်း ဂိတ်တံခါး ပျက်စီးသွားကြောင်း ကြားသိလိုက်ရသောအခါ မျှော်လင့်ချက်မဲ့သွားကြ၏။ လူအများအပြား ထွက်ပြေးကုန်ကြပြီ ဖြစ်သည်။

ထွက်ပြေးခြင်းမှတပါး အခြား ရွေးချယ်စရာ မရှိတော့ပေ။ မဟုတ်လျှင် သေလမ်းသာ ရှိသည်။

ယခုအခါ နဂါးနတ်ဘုရား နန်းတော် ဆိုသော အမည်ကို ကြားလိုက်ရုံဖြင့် ဝင်္ကပါပင်လယ်နယ်မြေရှိ လူတိုင်း တုန်လှုပ်ချောက်ချားနေကြ၏။

ထို့နောက် 'ခရမ်းရောင်လေ နန်းတော်' ၊ 'မိုးတိမ် မျှော်စင်' နှင့် 'ဆန်းကြယ် တာအို ဂိုဏ်း' ဟူသော အင်အားကြီး ဂိုဏ်း (၃) ခုသည်လည်း ဆက်တိုက် သွေးချောင်းစီးသွားခဲ့ရသည်။ မည်သူမျှ သေမင်းလက်မှ မလွတ်မြောက်နိုင်ခဲ့ပေ။

သွေးချောင်းစီး သတ်ဖြတ်ပွဲကြီးအတွင်း နဂါးနတ်ဘုရား နန်းတော် စစ်သည် တစ်ယောက်မှ ထိခိုက်သေဆုံးခြင်း မရှိခဲ့ပေ။

သူတို့သည် စစ်နတ်ဘုရားများ ဝင်စားထားသကဲ့သို့ ပြိုင်ဘက်ကင်းနေကြ၏။

နဂါးနတ်ဘုရား နန်းတော် စစ်သည်များသည် ရန်သူ့သွေးများဖြင့် ရွှဲနစ်နေကြပြီး ခြေလှမ်းတိုင်းတွင် သွေးခြေရာများ ကျန်ရစ်ခဲ့သည်။ သွေးများ စီးကျနေသော အလောင်းကောင်များအလား ကြောက်မက်ဖွယ် ကောင်းလှသည်။

(၁၁) ခု ရှိသွားပြီ... နဂါးနတ်ဘုရား နန်းတော်သည် အင်အားကြီး ဂိုဏ်း (၁၁) ခုကို သွေးချောင်းစီးစေခဲ့လေပြီ။

"နောက်တစ်နေရာ"

နဂါးနတ်ဘုရား ဓားကို ကိုင်ထားသော ဖုန်းဝူချန်ထံမှ ကောင်းကင်ထိ မြင့်မားသော အရှိန်အဝါများ ထွက်ပေါ်နေသည်။ ခန့်ညားထည်ဝါပြီး ကြောက်ရွံ့ဖွယ် ကောင်းလှသည်။

"ခန်းမသခင်... ကျွန်တော်တို့ကို တိုက်ခိုက်ခဲ့တဲ့ ဂိုဏ်းတွေထဲမှာ သန့်ရှင်းသော နေမင်းဂိုဏ်းပဲ ကျန်တော့တယ်။ ကျန်တဲ့ ဂိုဏ်းတွေ အကုန် ပြာကျသွားပြီ"

ဟု ယဲ့ထျန်းဝေက တင်ပြလိုက်၏။

"သန့်ရှင်းသော နေမင်းဂိုဏ်း တစ်ခုတည်း ကျန်တော့တယ်ပေါ့"

ဖုန်းဝူချန်၏ နှုတ်ခမ်းထောင့်တွင် အေးစက်သော အပြုံး တစ်ခု ပေါ်လာသည်။

"ညီအစ်ကိုတို့... သန့်ရှင်းသော နေမင်းဂိုဏ်းကို သွားကြစို့"

သန့်ရှင်းသော နေမင်းဂိုဏ်းသည် ဝင်္ကပါပင်လယ်နယ်မြေ၏ အစွမ်းအထက်ဆုံး ဂိုဏ်းဖြစ်သည်။

သို့သော် နဂါးနတ်ဘုရား နန်းတော် အနေဖြင့် အနည်းငယ်မျှ ကြောက်ရွံ့ခြင်း မရှိပေ။

"ရွှစ်... ရွှစ်... ရွှစ်"

ဖုန်းဝူချန် ဦးဆောင်သော နဂါးနတ်ဘုရား နန်းတော် စစ်သည် ရာပေါင်းများစွာသည် သန့်ရှင်းသော နေမင်းဂိုဏ်းသို့ အရှိန်အဟုန်ပြင်းစွာ ပျံသန်းသွားကြ၏။ လွှမ်းမိုးနိုင်စွမ်းရှိသော အရှိန်အဝါများနှင့် သွေးဆာနေသော လူသတ် အရှိန်အဝါများသည် ဝိညာဉ်ကို ဖမ်းစားထားသည်။

သန့်ရှင်းသော နေမင်းဂိုဏ်းသည် နဂါးနတ်ဘုရား နန်းတော်၏ နောက်ဆုံး တိုက်ပွဲ ဖြစ်သည်။

"နဂါးနတ်ဘုရား နန်းတော်က အင်အားကြီး ဂိုဏ်း (၃) ခုကို ထပ်ဖျက်ဆီးလိုက်ပြန်ပြီ။ ကြောက်စရာ ကောင်းလိုက်တာ"

"နဂါးနတ်ဘုရား နန်းတော်က သန့်ရှင်းသော နေမင်းဂိုဏ်းဆီ သွားနေပြီတဲ့။ ဘုရားရေ... သူတို့က ဝင်္ကပါပင်လယ်နယ်မြေရဲ့ အစွမ်းအထက်ဆုံး ဂိုဏ်းကိုပါ ဖျက်ဆီးပစ်ချင်နေတာလား"

"နဂါးနတ်ဘုရား နန်းတော်မှာ ထျန်းကျီဘုံ ပညာရှင် တစ်ယောက်မှ မရှိဘဲနဲ့ သန့်ရှင်းသော နေမင်းဂိုဏ်းကို သွားရဲတယ်ပေါ့။ သူတို့ တကယ်ပဲ နိုင်မယ်လို့ ယုံကြည်နေတာလား"

နဂါးနတ်ဘုရား နန်းတော်က သန့်ရှင်းသော နေမင်းဂိုဏ်းဆီ လာနေပြီ ဆိုသော သတင်းသည် ဝင်္ကပါပင်လယ်နယ်မြေရှိ ကျင့်ကြံသူများကို ထိတ်လန့်သွားစေသည်။ နဂါးနတ်ဘုရား နန်းတော်၏ ခြိမ်းခြောက်မှုက ပြင်းထန်လွန်းသဖြင့် သန့်ရှင်းသော နေမင်းဂိုဏ်းလည်း ခံနိုင်ရည် ရှိမည် မထင်တော့ပေ။

သတင်းသည် ဝင်္ကပါပင်လယ်နယ်မြေ အနှံ့ တောမီးပမာ လွှမ်းခြုံသွားသည်။

နတ်သမီး ပင်လယ် မျှော်စင် အတွင်းတွင် မိုလင်းအာနှင့် ကျူးကော့လျန်ချန်တို့ ထိတ်လန့်တုန်လှုပ်နေကြ၏။

"အင်... အင်အားကြီး ဂိုဏ်း (၁၁) ခုလုံး သွေးချောင်းစီးသွားပြီတဲ့..."

မိုလင်းအာ ပါးစပ်အဟောင်းသား ဖြစ်နေသည်။ သူမ၏ လှပသော မျက်နှာပေါ်တွင် အံ့သြမှုနှင့် မယုံကြည်နိုင်မှုများ ပြည့်နှက်နေသည်။

"ကောင်းကင်သိုင်း ဂိတ်တံခါးလည်း ပါသွားပြီလား။ ဘယ်... ဘယ်လိုလုပ် ဖြစ်နိုင်မှာလဲ..."

ကျူးကော့လျန်ချန် စကားပင် ကောင်းကောင်း မပြောနိုင်တော့ပေ။ တစ်ကိုယ်လုံး တုန်ယင်နေသည်။

"ဟုတ်တယ်။ အခု နဂါးနတ်ဘုရား နန်းတော်က သန့်ရှင်းသော နေမင်းဂိုဏ်းဆီ သွားနေပြီ"

"နဂါးနတ်ဘုရား နန်းတော်ရဲ့ စွမ်းအားက တကယ် ကြောက်စရာ ကောင်းလွန်းတယ်။ သန့်ရှင်းသော နေမင်းဂိုဏ်း ခံနိုင်ပါ့မလား မသိဘူး"

ထိုစကားကို ကြားသောအခါ မိုလင်းအာ အသိပြန်ဝင်လာပြီး အလျင်အမြန် ပြောလိုက်၏။

"အစ်ကိုကျူးကော့... သန့်ရှင်းသော နေမင်းဂိုဏ်းကို အမြန်သွားကြစို့"

ယခုအချိန်တွင် အစွမ်းထက် ကျင့်ကြံသူ အများအပြားသည် နောက်ဆုံး ရလဒ်ကို ကြည့်ရှုရန် သန့်ရှင်းသော နေမင်းဂိုဏ်းသို့ အပြေးအလွှား သွားရောက်နေကြ၏။

နဂါးနတ်ဘုရား နန်းတော် ရောက်လေရာ အရပ်တိုင်းတွင် ဝင်္ကပါပင်လယ်နယ်မြေသားများ သရဲမြင်သလို ကြောက်လန့်နေကြ၏။

အင်အားကြီး ဂိုဏ်း (၁၁) ခု ပျက်စီးသွားသော သတင်းသည် သန့်ရှင်းသော နေမင်းဂိုဏ်းသို့ ရောက်ရှိပြီး ဖြစ်သည်။

သန့်ရှင်းသော နေမင်းဂိုဏ်း အတွင်းတွင် ဂိုဏ်းချုပ်မှလွဲ၍ အကြီးအကဲများနှင့် အကျော်အမော်များအားလုံး ထိတ်လန့်စိုးရိမ်နေကြ၏။ ဂိုဏ်းချုပ်၏ မျက်နှာမှာမူ မည်းမှောင်နေသည်။

သွမ့်မိုမင်၏ မျက်နှာတွင် အံ့သြမှုနှင့် မယုံကြည်နိုင်မှုများ ပြည့်နှက်နေသည်။ နဂါးနတ်ဘုရား နန်းတော်၏ အင်အားကို သူ ကောင်းကောင်း သိသည်။ ဒီလောက် အင်အားကြီး ဂိုဏ်းတွေ အများကြီးကို ဖျက်ဆီးနိုင်စွမ်း မရှိသင့်ပေ။

ထို့အပြင် ကောင်းကင်သိုင်း ဂိတ်တံခါးတွင် ထျန်းကျီဘုံ ပညာရှင် ရှိသည်။ နဂါးနတ်ဘုရား နန်းတော်တွင် ထျန်းကျီဘုံ ပညာရှင် မရှိဘဲနဲ့ ကောင်းကင်သိုင်း ဂိတ်တံခါးကို ဘယ်လို ဖျက်ဆီးလိုက်တာလဲ။

သို့သော် သတင်းက ဝင်္ကပါပင်လယ်နယ်မြေ တစ်ခုလုံး လွှမ်းခြုံနေပြီ ဖြစ်ရာ သွမ့်မိုမင် မယုံချင်လည်း မရတော့ပေ။

သန့်ရှင်းသော နေမင်းဂိုဏ်း၏ ခန်းမဆောင်ကြီးတွင် သေမင်းတမန် တိတ်ဆိတ်မှုကြီး စိုးမိုးနေသည်။ လေထုက အေးစက်လွန်းသဖြင့် မည်သူမျှ စကားမပြောရဲကြပေ။

ဖုန်းဝူချန် ဦးဆောင်သော နဂါးနတ်ဘုရား နန်းတော် စစ်သည် ရာပေါင်းများစွာသည် သန့်ရှင်းသော နေမင်းဂိုဏ်းသို့ ချဉ်းကပ်လာကြပြီ ဖြစ်သည်။

"ရောက်လာကြပြီ"

ခန်းမဆောင်ကြီး အတွင်းရှိ ဂိုဏ်းချုပ်သည် မျက်မှောင်ကြုတ်လိုက်၏။ သွေးဆာနေသော လူသတ် အရှိန်အဝါများနှင့် ကောင်းကင်ကို တုန်လှုပ်စေသော အရှိန်အဝါများကို သူ ခံစားမိလိုက်ပြီ ဖြစ်သည်။

လွှမ်းမိုးနိုင်စွမ်းရှိသော အရှိန်အဝါများနှင့် ကြောက်မက်ဖွယ် လူသတ် အရှိန်အဝါများသည် ဒီရေလှိုင်းကြီးများအလား ဝင်ရောက်လာပြီး သန့်ရှင်းသော နေမင်းဂိုဏ်း တစ်ခုလုံးကို လွှမ်းခြုံသွားသည်။

သန့်ရှင်းသော နေမင်းဂိုဏ်း အတွင်းရှိ အစွမ်းထက် ပုဂ္ဂိုလ်များနှင့် တပည့်များသည် ကြောက်လန့်တုန်လှုပ်နေကြပြီး ကောင်းကင်ကို မော့ကြည့်လိုက်ကြ၏။

"သွမ့်မိုမင်... ထွက်လာပြီး အသေခံစမ်း"

ကောင်းကင်ယံထက်မှ ဖုန်းဝူချန်၏ အသံသည် မိုးကြိုးပစ်ချသကဲ့သို့ ဟိန်းထွက်လာသည်။ အာဏာစက် ပြည့်ဝသော အသံဖြစ်သည်။

အခန်း (၅၉၃) - သေမိန့်

~"သွမ့်မိုမင်... ထွက်လာပြီး အသေခံစမ်း"

အာဏာစက် ပြည့်ဝသော ဟိန်းဟောက်သံသည် သန့်ရှင်းသော နေမင်းဂိုဏ်း တစ်ခုလုံး ပဲ့တင်ထပ်သွားသည်။

ဖုန်းဝူချန်သည် သန့်ရှင်းသော နေမင်းဂိုဏ်း၏ ဂိုဏ်းချုပ်လေး နာမည်ကို တပ်ခေါ်ပြီး အသေခံရန် စိန်ခေါ်ရဲသည်တဲ့လား။

မောက်မာလိုက်တာ... တကယ့်ကို မောက်မာလိုက်တာ။

ခြိမ်းခြောက်မှု ပြည့်နှက်နေသော အသံကြောင့် သန့်ရှင်းသော နေမင်းဂိုဏ်း တပည့်များ၏ မျက်နှာများ ဖြူလျော်သွားပြီး ထိတ်လန့်တုန်လှုပ်ကုန်ကြ၏။

နဂါးနတ်ဘုရား နန်းတော်သည် အင်အားကြီး ဂိုဏ်း (၁၁) ခုကို သွေးချောင်းစီးစေခဲ့ပြီးပြီ ဖြစ်၏။

ဝင်္ကပါပင်လယ်နယ်မြေ၏ အစွမ်းအထက်ဆုံး ဂိုဏ်း ဖြစ်သည့်တိုင် ထိုရက်စက်သော လုပ်ရပ်များကြောင့် တုန်လှုပ်နေရသည်။

တပည့် သောင်းချီသည် ရင်ပြင်ကျယ်ကြီးတွင် စုဝေးနေကြပြီး ဂိုဏ်းချုပ်၊ အကြီးအကဲများနှင့် အကျော်အမော်များလည်း ခန်းမဆောင်ကြီးမှ ထွက်လာကြပြီ ဖြစ်သည်။

အားလုံး၏ မျက်လုံးများသည် ကောင်းကင်သို့ ရောက်နေကြ၏။

သန့်ရှင်းသော နေမင်းဂိုဏ်းသား တိုင်း၏ မျက်နှာထား လေးနက်နေပြီး အစွမ်းထက် ရန်သူနှင့် ရင်ဆိုင်နေရသကဲ့သို့ ဖြစ်နေသည်။

"ရွှစ်... ရွှစ်... ရွှစ်"

ကောင်းကင်ယံထက်တွင် သန့်ရှင်းသော နေမင်းဂိုဏ်းသား အားလုံးကို တုန်လှုပ်သွားစေမည့် မြင်ကွင်းတစ်ခု ပေါ်လာသည်။ နဂါးနတ်ဘုရား နန်းတော်သား ရာပေါင်းများစွာသည် အံ့သြဖွယ်ကောင်းသော ကိုယ်ဖော့သိုင်းကို အသုံးပြုပြီး တစ်ချက်ချင်း ရွေ့လျားကာ သန့်ရှင်းသော နေမင်းဂိုဏ်း အထက်သို့ ရုတ်တရက် ရောက်ရှိလာကြ၏။

တစ်စက္ကန့်က အဝေးတွင် ရှိနေသော်လည်း နောက်တစ်စက္ကန့်တွင် ခေါင်းပေါ် ရောက်နေပြီ ဖြစ်သည်။

"ထူးဆန်းတဲ့ ကိုယ်ဖော့သိုင်းပဲ... ချက်ချင်း ပျောက်သွားပြီး အရှိန်အဝါပါ ပျောက်သွားတာ။ တခြား နေရာလပ်တစ်ခုထဲ ရောက်သွားသလိုပဲ။ ပြီးတော့ သူတို့အားလုံး ဒီသိုင်းကွက်ကို တတ်ထားကြတယ်"

ဂိုဏ်းချုပ် 'သွမ့်ကျုံး' အလွန် အံ့သြသွားသည်။

"ဒါ ဘယ်လို ကိုယ်ဖော့သိုင်းမျိုးလဲ။ တခါမှ မမြင်ဖူးဘူး"

"သွေးဆာနေတဲ့ လူသတ် အရှိန်အဝါ... သူတို့က စစ်သည်တော်တွေလား။ ဒီလောက် စွမ်းအားကြီးတဲ့ ကိုယ်ဖော့သိုင်းကို ပိုင်ဆိုင်ထားတယ်ပေါ့"

"သူတို့က... သူတို့က နဂါးနတ်ဘုရား နန်းတော်က လူတွေလား"

အကြီးအကဲများနှင့် အကျော်အမော်များလည်း အံ့သြမှင်သက်နေကြ၏။

"ဒါ ဖုန်းဝူချန် သုံးတဲ့ ကိုယ်ဖော့သိုင်းပဲ။ နဂါးနတ်ဘုရား နန်းတော်သားတိုင်း ဒီသိုင်းကွက်ကို တတ်ထားကြတာလား"

သွမ့်မိုမင်၏ မျက်နှာ မည်းမှောင်သွားသည်။

နန်းတော်အထက်တွင် နဂါးနတ်ဘုရား နန်းတော် စစ်သည်များ၏ သွေးဆာနေသော လူသတ် အရှိန်အဝါများသည် သန့်ရှင်းသော နေမင်းဂိုဏ်း တစ်ခုလုံးကို လွှမ်းခြုံထားသည်။ လူတိုင်းကို ကြောက်ရွံ့စေသည်။

သို့သော် ပိုမို ကြောက်စရာ ကောင်းသည်မှာ နဂါးနတ်ဘုရား နန်းတော်သားများ၏ ခန္ဓာကိုယ်တွင် ရန်သူ့သွေးများဖြင့် ရွှဲနစ်နေခြင်း ဖြစ်သည်။ သွေးနတ်ဆိုးများ အလား ထင်ရသည်။

မြင်လိုက်ရုံဖြင့် လိပ်ပြာလွင့်မတတ် ကြောက်လန့်သွားစေနိုင်သည်။

သန့်ရှင်းသော နေမင်းဂိုဏ်း တပည့်များ တုန်လှုပ်ချောက်ချားနေကြ၏။

"တောက်... တောက်... တောက်"

ရင်ပြင်ကျယ်ကြီးပေါ်တွင် အရည်စက်များ ကျဆင်းသံ ထွက်ပေါ်လာသည်။

မိုးရေ မဟုတ်ပါ... သွေးများ ဖြစ်သည်။

လတ်ဆတ်သော သွေးစက်များသည် ရင်ပြင်ပေါ်သို့ ကျဆင်းလာပြီး သန့်ရှင်းသော နေမင်းဂိုဏ်း တပည့်များ၏ ခန္ဓာကိုယ်ပေါ်သို့ ကျရောက်လာသည်။

နဂါးနတ်ဘုရား နန်းတော် စစ်သည်များ၏ ခန္ဓာကိုယ်မှ သွေးများ စီးကျနေခြင်း ဖြစ်သည်။ သူတို့သည် သွေးစစ်နတ်ဘုရားများအလား ထင်ရသည်။

ကောင်းကင်မှ သွေးမိုးရွာနေသကဲ့သို့ ဖြစ်နေပြီး ထူးဆန်း၍ ကြောက်မက်ဖွယ် ကောင်းလှသည်။

"ကျန်း... ဂိုဏ်းချုပ်လေးကျန်း"

"ကျန်းမိသားစုရဲ့ ဂိုဏ်းချုပ်လေး... တိုက်ကြီးရဲ့ နံပါတ်တစ် လက်နက်သွန်းလုပ်ရေး ပါရမီရှင်"

"တကယ်ပဲ ဂိုဏ်းချုပ်လေးကျန်းပါလား။ သူက ဟိုလူရဲ့ နောက်မှာ ရပ်နေတာ။ အဲဒီလူက နဂါးနတ်ဘုရား နန်းတော် ခန်းမသခင် ဖြစ်မယ်။ ပြီးပြီ... ငါတို့တော့ ပြီးပြီ"

အံ့သြထိတ်လန့်နေစဉ်မှာပင် ကျန်းကျွင့်လန်ကို မြင်လိုက်ရသောအခါ သန့်ရှင်းသော နေမင်းဂိုဏ်း တပည့်များ မျှော်လင့်ချက်မဲ့သွားကြ၏။ မျက်နှာများ ဖြူလျော်သွားပြီး မတ်တတ်ပင် မရပ်နိုင်တော့ပေ။

ဂိုဏ်းချုပ်သွမ့်ကျုံးနှင့် အကြီးအကဲများ၏ မျက်နှာများလည်း ကြည့်မကောင်းအောင် ဖြစ်နေသည်။ ကျန်းမိသားစု၏ တည်ရှိမှုသည် သန့်ရှင်းသော နေမင်းဂိုဏ်း လှုပ်ရှား၍ မရနိုင်သော အရာဖြစ်သည်။

"ဂိုဏ်းချုပ်... နဂါးနတ်ဘုရား နန်းတော်မှာ ထျန်းကျီဘုံ ပညာရှင် တစ်ယောက်မှ မရှိပါဘူး။ အစွမ်းအထက်ဆုံးက ကောင်းကင်ဘုံလူသား အဋ္ဌမအလွှာပဲ ရှိသေးတယ်။ အဲဒီလူက အနောက်ဘက်ဒေသ ရှန်ဝူဂိုဏ်းက ပါရမီရှင် ယဲ့ထျန်းဝေပါ။ တကယ်လို့ နဂါးနတ်ဘုရား နန်းတော်က ကောင်းကင်သိုင်း ဂိတ်တံခါးကို ဖျက်ဆီးနိုင်တယ် ဆိုရင်... ကျန်းမိသားစုက ကူညီလို့ ဖြစ်မယ်။ ဒါမှမဟုတ် ရှန်ဝူဂိုဏ်း... ဒါမှမဟုတ် ဟန်ခွန်းကြောင့် ဖြစ်မယ်"

အကြီးအကဲတစ်ယောက်က သုံးသပ်လိုက်၏။

"နဂါးနတ်ဘုရား နန်းတော်က ဒီကိစ္စကို လွယ်လွယ်နဲ့ လက်လျှော့မှာ မဟုတ်ဘူး"

ဟု နောက်တစ်ယောက်က လေးလေးနက်နက် ပြောလိုက်၏။

သွမ့်ကျုံးမှာ စကားမပြောသော်လည်း ရင်ထဲတွင် စိုးရိမ်ပူပန်မှုများ ပြည့်နှက်နေသည်။

ဖုန်းဝူချန်သည် လေဟာနယ်ထဲတွင် ခြေတစ်လှမ်း တိုးလိုက်၏။ သူ့အေးစက်သော အကြည့်များက သန့်ရှင်းသော နေမင်းဂိုဏ်း တစ်ခုလုံးကို ဝေ့ဝဲကြည့်ရှုပြီးနောက် သွမ့်မိုမင်အပေါ်တွင် ရပ်တန့်သွားသည်။

နှုတ်ခမ်းထောင့်တွင် မကောင်းဆိုးဝါးဆန်သော အပြုံးတစ်ခု ပေါ်လာပြီး ဖုန်းဝူချန်က ပြောလိုက်၏။

"သွမ့်မိုမင်... ပြန်တွေ့ကြပြီနော်။ (၂) လ အတွင်း မင်းရဲ့ ကျင့်ကြံခြင်းအဆင့်က သိပ်မတိုးတက်ပါလား။ လွန်ခဲ့တဲ့ (၂) လတုန်းက မင်းက ဝင်္ကပါပင်လယ်နယ်မြေက ဂိုဏ်းတွေကို ဦးဆောင်ပြီး နဂါးနတ်ဘုရား နန်းတော်ကို လာတိုက်ခဲ့တယ်။ ငါ အရေးကြီးကိစ္စ မရှိရင် မင်း အသက်ရှင်လျက် ပြန်မရောက်ဘူး"

ခဏနားပြီး ဖုန်းဝူချန် ဆက်ပြောသည်။

"နဂါးနတ်ဘုရား နန်းတော်ကို တိုက်ခိုက်ခဲ့တဲ့ အင်အားကြီး ဂိုဏ်းတွေ အကုန်လုံး သွေးချောင်းစီးကုန်ပြီ။ သန့်ရှင်းသော နေမင်းဂိုဏ်း တစ်ခုတည်း ကျန်တော့တယ်။ ငါ ပြောခဲ့သလိုပဲ... မင်းရဲ့ ခွေးအသက်ကို ငါကိုယ်တိုင် လာယူမယ်လို့"

ထိုစကားကို ကြားသောအခါ သွမ့်မိုမင် အံကြိတ်ပြီး ဒေါသတကြီး ပြောလိုက်၏။

"ဖုန်းဝူချန်... မင်း သိပ်မောက်မာလွန်းနေပြီ။ ငါ မင်းကို ကြောက်မယ် ထင်နေလား"

"မိုမင်... ပါးစပ်ပိတ်ထား"

သွမ့်ကျုံးက ရုတ်တရက် အော်ဟစ်လိုက်ပြီး သွမ့်မိုမင်ကို မျက်စောင်းထိုးလိုက်၏။

ဒီလို အရေးကြီးတဲ့ အချိန်မှာ သွမ့်မိုမင်က ဖုန်းဝူချန်ကို ရန်စရဲသေးတယ်တဲ့လား။ ကျန်းမိသားစုရော၊ ရှန်ဝူဂိုဏ်းရော ဖုန်းဝူချန်ဘက်က ရပ်တည်နေတာ သူ မသိဘူးလား။

သန့်ရှင်းသော နေမင်းဂိုဏ်းက ရှန်ဝူဂိုဏ်းကို ရန်စနိုင်ပေမဲ့ ကျန်းမိသားစုကိုတော့ မစော်ကားရဲပါ။

ရှန်ဝူဂိုဏ်းနှင့် ကျန်းမိသားစုကို ဖယ်ထားလိုက်ဦး... ဖုန်းဝူချန်က ဆေးဧကရာဇ် ဖြစ်နေတာ တစ်ခုတည်းနှင့်တင် သန့်ရှင်းသော နေမင်းဂိုဏ်းကို ဒူးထောက်စေနိုင်သည် မဟုတ်ပါလော။

သွမ့်ကျုံးက ဆေးပညာ ပြိုင်ပွဲကို မသွားခဲ့သော်လည်း ဆေးဧကရာဇ် အကြောင်းကိုတော့ အနည်းအကျဉ်း ကြားသိထားရသည်။

"ဆေးဧကရာဇ်... ကျွန်တော့်သားက လူတွေခေါ်ပြီး နဂါးနတ်ဘုရား နန်းတော်ကို သွားတိုက်တာ ကျွန်တော်တို့ မသိလိုက်ပါဘူး။ သူ ဒဏ်ရာရပြီး ပြန်ရောက်လာမှ သိရတာပါ။ မေးကြည့်တော့မှ အမှန်တိုင်း ပြောပြတာပါ။ ဆေးဧကရာဇ် ခွင့်လွှတ်ပေးဖို့ မျှော်လင့်ပါတယ်"

ဟု သွမ့်ကျုံး ရိုသေစွာ တောင်းပန်လိုက်၏။

"မသိလိုက်ဘူး ဟုတ်လား"

ဖုန်းဝူချန်က လှောင်ရယ်တစ်ချက် ရယ်လိုက်ပြီး လက်ကာပြလိုက်၏။

"ကောင်းပြီလေ... ဒါဆို ရှင်းသွားပြီ။ ခင်ဗျားတို့ကို ရွေးချယ်စရာ (၂) ခု ပေးမယ်။ ပထမ တစ်ခုက... ခင်ဗျားတို့ မသိလိုက်ဘူး ဆိုတော့ သွမ့်မိုမင် တစ်ယောက်တည်းကိုပဲ သတ်မယ်။ ဒုတိယ တစ်ခုက... သွမ့်မိုမင်ကို သတ်မယ်။ တကယ်လို့ သန့်ရှင်းသော နေမင်းဂိုဏ်းက ဝင်ပါရင် တစ်ဂိုဏ်းလုံးကို သတ်မယ်"

ရွေးချယ်စရာ နှစ်ခုစလုံးက သွမ့်မိုမင် သေရမည့် လမ်းချည်းသာ။

"..."

သွမ့်ကျုံး တိတ်ဆိတ်သွားသည်။ သူ ရွေးချယ်ချင်တာက သွမ့်မိုမင် အသက်ရှင်ရေး ဖြစ်သော်လည်း ဖုန်းဝူချန်က ထိုအခွင့်အရေး မပေးပေ။

သွမ့်မိုမင်ကို ဖုန်းဝူချန် သတ်ကို သတ်မည်။

"ဆေးဧကရာဇ်... ကျွန်တော့်သား အသက်ကို ချမ်းသာပေးလို့ မရဘူးလား"

သွမ့်ကျုံးက မျှော်လင့်ချက် မကုန်သေးဘဲ မေးလိုက်၏။

"သွမ့်မိုမင်ကို ငါ သတ်ကို သတ်ရမယ်။ ဒီနေ့ ဘယ်သူလာလာ သူ့ကို မကယ်နိုင်ဘူး"

ဖုန်းဝူချန်က ပြတ်သားစွာ ပြောလိုက်၏။

"ဖုန်းဝူချန်... မင်း ငါ့ကို သတ်နိုင်မယ် ထင်နေလား။ သတ္တိရှိရင် လာခဲ့လေ။ ငါ ပြောပြီးသားနော်... ဒီကိစ္စက သန့်ရှင်းသော နေမင်းဂိုဏ်းနဲ့ မဆိုင်ဘူး"

သွမ့်မိုမင်က ဒေါသတကြီး ပြန်ပြောလိုက်၏။

"မင်းအဖေ ရွေးချယ်ပါလိမ့်မယ်... မင်း ဝင်မပြောနဲ့"

ဟု ဖုန်းဝူချန်က အေးစက်စွာ တုံ့ပြန်လိုက်၏။

"အား... "

သည်းမခံနိုင်တော့ဘဲ သွမ့်မိုမင်က ဟိန်းဟောက်လိုက်ရာ ကောင်းကင်ဘုံလူသား အဋ္ဌမအလွှာ စွမ်းအားများ ပေါက်ကွဲထွက်လာပြီး နန်းတော်ကြီး တုန်ခါသွားသည်။

"ဖုန်းဝူချန်... မင်းကို ငါ သတ်မယ်"

သွမ့်မိုမင်က ကောင်းကင်ကို မော့ကြည့်ပြီး ကြွေးကြော်လိုက်၏။ ကြောက်မက်ဖွယ် လူသတ် အရှိန်အဝါများ ပေါက်ကွဲထွက်လာသည်။

"ဝှစ်... ဝှစ်... ဝှစ်"

တိုက်ပွဲ စတင်တော့မည့် အချိန်မှာပင် အရပ်လေးမျက်နှာမှ လေခွင်းသံများ ထွက်ပေါ်လာသည်။

ဝင်္ကပါပင်လယ်နယ်မြေမှ အစွမ်းထက် ပုဂ္ဂိုလ် အများအပြား ရောက်ရှိလာကြ၏။

ကျူးကော့ မိသားစု၊ ကျန်းမိသားစု၊ ကောမိသားစု စသော မိသားစု ခေါင်းဆောင်များနှင့် အခြား အစွမ်းထက် ပုဂ္ဂိုလ်များ ပါဝင်သည်။

ထို့အပြင် ထျန်းရှန်းဇီနှင့် အခြား နာမည်ကြီး ဆေးပညာရှင် (၁၀) ဦးကျော်လည်း ရောက်ရှိလာကြ၏။

မိုလင်းအာနှင့် ကျူးကော့လျန်ချန်တို့လည်း ရောက်လာကြ၏။

"တပည့်များ... ဆေးဧကရာဇ်ကို ဂါရဝပြုပါတယ်"

ထျန်းရှန်းဇီ ဦးဆောင်သော ဆေးပညာရှင်များသည် ဖုန်းဝူချန်ကို တလေးတစား ဦးညွှတ် ဂါရဝပြုလိုက်ကြ၏။

ထျန်းရှန်းဇီတို့၏ လုပ်ရပ်ကြောင့် သန့်ရှင်းသော နေမင်းဂိုဏ်းသား အားလုံး အံ့သြမှင်သက်သွားကြတော့သည်။

အခန်း (၅၉၄) - သွမ့်မိုမင်နှင့် ထပ်မံရင်ဆိုင်ခြင်း

~"တပည့်များ ဟုတ်လား"

"ငါ နားကြားများ မှားနေတာလား။ ထျန်းရှန်းဇီလို ပုဂ္ဂိုလ်ကြီးက ကိုယ့်ကိုယ်ကို တပည့်လို့ ခေါ်နေပါလား"

"ထျန်းရှန်းဇီတို့ အကုန်လုံး ဆေးဧကရာဇ်ရဲ့ တပည့်တွေများလား"

သန့်ရှင်းသော နေမင်းဂိုဏ်းသားများနှင့် လာရောက်ကြည့်ရှုသူများအားလုံး ပွက်လောရိုက်ကုန်ကြ၏။ အံ့သြမှင်သက်ပြီး ပါးစပ်အဟောင်းသား ဖြစ်နေကြ၏။

ဆေးပညာရှင် (၁၀) ဦးကျော်တွင် ထျန်းရှန်းဇီအပြင် အဆင့် (၇) ဆေးပညာရှင် (၃) ဦးနှင့် ကျန်သူများသည် အဆင့် (၆) နှင့် အဆင့် (၅) ဆေးပညာရှင်များ ဖြစ်ကြ၏။ သူတို့သည် ဝင်္ကပါပင်လယ်နယ်မြေ၏ ဆေးပညာလောကတွင် မဏ္ဍိုင်ကြီးများ ဖြစ်ကြ၏။

ထျန်းရှန်းဇီသည် ဝူကျိနယ်မြေ၏ အစွမ်းအထက်ဆုံး ဆေးပညာရှင် ဖြစ်ပြီး ကျန်းမိသားစု အကြီးအကဲချုပ်နှင့် အင်မော်တယ် လက်နက် စံအိမ်တို့နှင့် ရင်ဘောင်တန်းနိုင်သော အဆင့်အတန်းရှိသူ ဖြစ်သည်။

ထိုကဲ့သို့သော ပုဂ္ဂိုလ်ကြီးက ဖုန်းဝူချန်ရှေ့တွင် ကိုယ့်ကိုယ်ကို တပည့်ဟု ခေါ်ဆိုနေသည်တဲ့လား။

"ဘယ်... ဘယ်လိုလုပ် ဖြစ်နိုင်မှာလဲ"

ကျူးကော့လျန်ချန် မျက်လုံးများ ပြူးကျယ်သွားသည်။

မိုလင်းအာလည်း ကြောင်အမ်းအမ်း ဖြစ်နေသည်။ သူမ၏ ရင်ထဲတွင် လှိုင်းလုံးကြီးများ ရိုက်ခတ်နေသကဲ့သို့ ခံစားနေရသည်။

မိုလင်းအာသည် ကျူးကော့မိသားစုတွင် နေရာတစ်ခု ရရှိထားသော်လည်း ကျူးကော့မိသားစုသည် ထျန်းရှန်းဇီနှင့် ယှဉ်လျှင် အဝေးကြီး ကွာခြားနေပါသေးသည်။

ထျန်းရှန်းဇီ၏ အဆင့်အတန်းသည် ကျူးကော့မိသားစုပင် လက်လှမ်းမမီနိုင်သော အရာဖြစ်သည်။ မိုလင်းအာ ဆိုလျှင် ပြောစရာပင် မလိုတော့ပေ။

ယခု ဖုန်းဝူချန်၏ အဆင့်အတန်းသည် ထျန်းရှန်းဇီထက်ပင် မြင့်မားနေသည် ဆိုသည်ကို သိလိုက်ရသောအခါ မိုလင်းအာ မည်သို့ လက်ခံနိုင်မည်နည်း။

ယခုအချိန်တွင် မိုလင်းအာသည် နက်ရှိုင်းသော ချောက်ကမ်းပါးကြီးထဲသို့ ထပ်မံ ပြုတ်ကျသွားသကဲ့သို့ ခံစားလိုက်ရသည်။

ထျန်းရှန်းဇီ၏ အဆင့်အတန်းသည် သူမ တစ်သက်လုံး ကြိုးစားလျှင်တောင် ရောက်ရှိနိုင်မည် မဟုတ်ပေ။ ဖုန်းဝူချန်ကို ကျော်တက်ဖို့ဆိုတာ ဝေလာဝေးပင်။

မိုလင်းအာ နောင်တရနေမလား ဆိုတာတော့ မည်သူမျှ မသိနိုင်ပေ။

ဆေးပညာ ပြိုင်ပွဲတွင် ရှိနေခဲ့သော အစွမ်းထက် ပုဂ္ဂိုလ်များမှလွဲ၍ မည်သူမျှ ဖုန်းဝူချန်၏ 'အတွေးတချက်ဖြင့် ဆေးဖော်ခြင်း' နတ်ဘုရား သိုင်းကွက်အကြောင်း မသိရှိကြပေ။ ထျန်းရှန်းဇီတို့က ဖုန်းဝူချန်ကို မည်မျှ လေးစားကြောင်းလည်း မသိရှိကြပေ။

"ထျန်းရှန်းဇီ... ခင်ဗျားတို့က သွမ့်မိုမင်အတွက် လာပြီး အသနားခံပေးတာ ဆိုရင်တော့ ပြန်ကြပါတော့။ ဒီနေ့ သွမ့်မိုမင်ကို ဘယ်သူမှ မကယ်နိုင်ဘူး"

ဖုန်းဝူချန်က ထျန်းရှန်းဇီတို့ကို တချက်ကြည့်ပြီး အေးစက်စွာ ပြောလိုက်၏။

ထျန်းရှန်းဇီတို့က သွမ့်မိုမင်ဘက်မှ ပါဝင်ပြီး ပြောဆိုပေးမည်ဟု ထင်မှတ်ကာ ဖုန်းဝူချန်၏ သဘောထားမှာ အေးစက်နေသည်။

ဖုန်းဝူချန်၏ စကားကို ကြားသောအခါ ထျန်းရှန်းဇီနှင့် အခြား ဆေးပညာရှင်များ ကြောက်လန့်တကြား ဖြစ်သွားကြ၏။

"ဆေးဧကရာဇ် အထင်လွဲနေပါပြီ။ တပည့်တို့က အသနားခံပေးဖို့ လာတာ မဟုတ်ပါဘူး။ သွမ့်မိုမင်က ဆေးဧကရာဇ်ကို စော်ကားမိတဲ့အတွက် သေသင့်ပါတယ်။ တပည့်တို့က ဆေးဧကရာဇ် လက်စားချေဖို့ လာတယ်ဆိုတာ ကြားလို့ လာရောက် ကြိုဆိုတာပါ"

ထျန်းရှန်းဇီက အလျင်အမြန် ရှင်းပြလိုက်၏။

ထျန်းရှန်းဇီ၏ စကားက သူတို့သည် သန့်ရှင်းသော နေမင်းဂိုဏ်းနှင့် မပတ်သက်ကြောင်း ရှင်းလင်းစွာ ပြောပြလိုက်ခြင်း ဖြစ်သည်။ ပုံမှန်အချိန်တွင် ဆက်ဆံရေး ရှိကောင်းရှိနိုင်သော်လည်း ယခုအချိန်တွင်မူ ဖုန်းဝူချန်ဘက်မှ ရပ်တည်မည် ဖြစ်ကြောင်း ပြသလိုက်ခြင်း ဖြစ်သည်။

သွမ့်ကျုံးနှင့် အကြီးအကဲများ၏ မျက်နှာ ပိုမို ဆိုးရွားသွားသည်။

"ဪ... ကျွန်တော် အထင်လွဲသွားတာကိုး"

ဖုန်းဝူချန်၏ မျက်နှာထား ပြေလျော့သွားပြီး ပြုံးလိုက်၏။

ထိုအခါမှ ထျန်းရှန်းဇီတို့ သက်ပြင်းချနိုင်တော့သည်။ ချွေးစေးများပင် ပြန်နေကြပြီ။

"ဆေးဧကရာဇ် ဘာအမိန့်ရှိရှိ ပြောပါ။ တပည့်တို့ အစွမ်းကုန် လုပ်ဆောင်ပေးပါ့မယ်"

ထျန်းရှန်းဇီက ရိုသေစွာ ပြောလိုက်၏။

"မလိုပါဘူး... ကြည့်နေရုံပါပဲ"

ဖုန်းဝူချန်က ခေါင်းခါလိုက်ပြီး သွမ့်ကျုံးဘက်သို့ လှည့်ကာ ပြောလိုက်၏။

"သန့်ရှင်းသော နေမင်းဂိုဏ်းချုပ်... သေချာ စဉ်းစားနော်"

"..."

သွမ့်ကျုံး တိတ်ဆိတ်နေသည်။ ဆုံးဖြတ်ချက်ချရန် ခက်ခဲနေသည်။

"သွမ့်မိုမင်... လှုပ်ရှားလိုက်တော့"

ဖုန်းဝူချန်က အေးစက်စွာ ရယ်မောရင်း သွမ့်မိုမင်ကို စိန်ခေါ်လိုက်၏။

ဖုန်းဝူချန်သည် ကောင်းကင်ဘုံလူသား ဆဋ္ဌမအလွှာသို့ ရောက်ရှိနေပြီ ဖြစ်ရာ တိုက်ခိုက်စွမ်းရည် အဆမတန် တိုးတက်နေပြီ ဖြစ်သည်။ သွမ့်မိုမင်ကတော့ (၂) လ အတွင်း သိသိသာသာ တိုးတက်မှု မရှိသဖြင့် ဖုန်းဝူချန် အနေဖြင့် သွမ့်မိုမင်ကို သတ်နိုင်မည်ဟု ယုံကြည်ချက် အပြည့်ရှိနေသည်။

"ဝုန်း"

"ဝီ... ဝီ"

ကောင်းကင်ဘုံလူသား အဋ္ဌမအလွှာ၏ ကြောက်မက်ဖွယ် စွမ်းအားများ ပေါက်ကွဲထွက်လာသည်။ သွမ့်မိုမင်သည် ဒေါသတကြီးဖြင့် ကောင်းကင်သို့ ပျံတက်လာပြီး ဖုန်းဝူချန်ကို တိုက်ခိုက်ရန် ပြင်လိုက်၏။

"ဝီ... ဝီ"

ဖုန်းဝူချန်၏ မျက်လုံးများတွင် အေးစက်သော အလင်းရောင်များ လက်ကနဲ ဖြစ်သွားသည်။ ကမ္ဘာပျက် စွမ်းအားနှင့် အထွတ်အထိပ် ခန္ဓာကိုယ် ဒုတိယအဆင့် စွမ်းအားတို့ကို တပြိုင်နက်တည်း ထုတ်ဖော်လိုက်၏။ နက်မှောင်သော အနီရောင် အလင်းတန်းများ ကောင်းကင်သို့ ထိုးတက်သွားပြီး သန့်ရှင်းသော နေမင်းဂိုဏ်း တစ်ခုလုံးကို လွှမ်းခြုံသွားသည်။ လွှမ်းမိုးနိုင်စွမ်းရှိသော အရှိန်အဝါများနှင့် ကြောက်မက်ဖွယ် စွမ်းအားများ မီးတောင်ပေါက်ကွဲသကဲ့သို့ ပေါက်ကွဲထွက်လာသည်။

"ကောင်းကင်ဘုံလူသား ဆဋ္ဌမအလွှာ"

ဖုန်းဝူချန် စွမ်းအား ထုတ်ဖော်လိုက်သည်နှင့် သွမ့်မိုမင်၏ မျက်နှာထား တောင့်တင်းသွားပြီး အလွန် အံ့သြသွားသည်။

ဖုန်းဝူချန် နောက်ထပ် အဆင့်တက်သွားလိမ့်မည်ဟု သွမ့်မိုမင် ထင်မထားခဲ့ပေ။

"ကောင်းကင်ဘုံလူသား ဆဋ္ဌမအလွှာတဲ့လား"

မိုလင်းအာနှင့် ကျူးကော့လျန်ချန်တို့လည်း ထပ်မံ အံ့သြသွားကြ၏။

ဖုန်းဝူချန်၏ ကျင့်ကြံခြင်းအဆင့်သည် မိုလင်းအာ လက်လှမ်းမမီနိုင်တော့သော အဆင့်သို့ ရောက်ရှိသွားပြီ ဖြစ်သည်။

"ဘယ်... ဘယ်လိုလုပ် ဒီလောက် မြန်မြန်ဆန်ဆန် တိုးတက်သွားတာလဲ"

မိုလင်းအာ ပါးစပ်အဟောင်းသား ဖြစ်နေသည်။

ယခုအချိန်တွင် ဖုန်းဝူချန်သည် အလွန် တောက်ပပြီး ခန့်ညားထည်ဝါနေသည်။ အာဏာစက် ပြည့်ဝနေသည်။

အသက်ငယ်ငယ်လေးနှင့် လူတိုင်း အိမ်မက်မက်ရသော အဆင့်အတန်းသို့ ရောက်ရှိနေပြီ ဖြစ်ရာ မိန်းကလေးများ၏ နှလုံးသားထဲမှ သူရဲကောင်း ဖြစ်လာခဲ့ပြီ။

"ကောင်းကင်ဘုံလူသား ဆဋ္ဌမအလွှာ ရှိပေမဲ့... သတ္တမအလွှာ အထွတ်အထိပ် စွမ်းအားကို ပိုင်ဆိုင်ထားတယ်တဲ့လား"

သွမ့်ကျုံးနှင့် အကြီးအကဲများ အာမေဋိတ် သံများ ထွက်ပေါ်လာသည်။

လက်အိတ်နှင့် ချီလင် ချပ်ဝတ်ကို ဆက်တိုက် ဆင့်ခေါ်လိုက်သောအခါ ဖုန်းဝူချန်၏ အရှိန်အဝါသည် ကောင်းကင်ဘုံလူသား နဝမအလွှာ အဆင့်သို့ တစ်ဟုန်ထိုး မြင့်တက်သွားသည်။

"ကောင်းကင်ဘုံလူသား နဝမအလွှာ စွမ်းအား..."

"အဆင့် (၆) လက်နက်... သူ့လက်အိတ်က အဆင့် (၆) လက်နက်ပဲ"

"တိုက်ခိုက်စွမ်းရည် (၃) ဆင့် တက်သွားတာလား... ကြောက်စရာ ကောင်းလိုက်တာ"

လူအုပ်ကြီး ပွက်လောရိုက်သွားသည်။ ဖုန်းဝူချန်ကို ပါးစပ်အဟောင်းသား ကြည့်နေကြ၏။

တိုက်ခိုက်စွမ်းရည် (၃) ဆင့် တက်သွားခြင်းက လူတိုင်းကို တုန်လှုပ်စေသည်။ အဆင့် (၆) လက်အိတ်ပါ ပေါင်းစပ်လိုက်လျှင် ဖုန်းဝူချန်၏ စွမ်းအားက ဘယ်လောက်တောင် ကြောက်စရာ ကောင်းနေမလဲ ဆိုတာ တွေးကြည့်လို့ ရသည်။

ဖုန်းဝူချန်၏ တိုက်ပွဲကို ပထမဆုံး အကြိမ် မြင်ဖူးသော ထျန်းရှန်းဇီတို့လည်း ကြောင်အမ်းအမ်း ဖြစ်နေကြ၏။ ကျောက်ရုပ်များအလား တောင့်တင်းနေကြ၏။

ခေတ္တမျှ အံ့သြပြီးနောက် သွမ့်မိုမင်၏ မျက်နှာ ပြန်လည် ရှုံ့မဲ့သွားပြီး အရှိန်မြှင့်ကာ ဖုန်းဝူချန်ကို ရက်စက်စွာ တိုက်ခိုက်လိုက်၏။

ဖုန်းဝူချန်က အေးစက်စွာ နှာခေါင်းရှုံ့လိုက်ပြီး ကျောဘက်မှ အတောင်ပံများကို ခတ်ကာ အောက်သို့ ထိုးဆင်းလိုက်၏။ အနီရောင် လျှပ်စီးတစ်ခုအလား လျင်မြန်လှသည်။

"ဝုန်း"

"ဝီ... ဝီ"

မျက်စိတစ်မှိတ်အတွင်း လက်သီးနှစ်ဖက် ပြင်းထန်စွာ ထိတိုက်မိကြ၏။ မိုးကြိုးပစ်သံကဲ့သို့ ကျယ်လောင်သော ပေါက်ကွဲသံကြီး ထွက်ပေါ်လာပြီး စွမ်းအင်လှိုင်းများ လှိုင်းလုံးကြီးများအလား လွှမ်းခြုံသွားသည်။ လေဟာနယ်တွင် အက်ကြောင်းများ ပေါ်လာသည်။

ကြောက်မက်ဖွယ် လေစီးကြောင်းများသည် မုန်တိုင်းတစ်ခုအလား တိုက်ခတ်သွားပြီး ကောင်းကင်မှ တိမ်တိုက်များကို လွင့်စင်သွားစေသည်။

အဝေးမှ ကြည့်နေသော ကျင့်ကြံသူ အများအပြားသည် လေစီးကြောင်း၏ ဒဏ်ကြောင့် နောက်သို့ လွင့်ပါသွားကြ၏။ အချို့က လက်ကာထားရသည်။

လက်သီးချင်း ယှဉ်ပြိုင်မှုတွင် နှစ်ဖက်စလုံး၏ စွမ်းအားက တူညီနေသည်။

"ဒါ မင်းရဲ့ အစွမ်းကုန်ပဲလား။ ဝင်္ကပါပင်လယ်နယ်မြေရဲ့ နံပါတ်တစ် ပါရမီရှင်က (၂) လ အတွင်း ဒီလောက်ပဲ တိုးတက်လာတာလား"

ဖုန်းဝူချန်က လှောင်ပြောင်လိုက်၏။

ဖုန်းဝူချန်၏ အထင်သေးသော အပြုံးကို မြင်လိုက်ရသောအခါ သွမ့်မိုမင်၏ ဒေါသများ ပိုမို ပြင်းထန်လာသည်။

"မင်းကို သတ်ပြီးမှ ပြုံးနိုင်သေးလား ကြည့်ကြသေးတာပေါ့"

"ဟုတ်လား"

ဖုန်းဝူချန်၏ မျက်လုံးများ ရုတ်တရက် ရက်စက်သွားပြီး ပိုမို ကြီးမားသော စွမ်းအားများ ပေါက်ကွဲထွက်လာတော့သည်။

"ဘယ်... ဘယ်လိုလုပ် ဖြစ်နိုင်မှာလဲ"

သွမ့်မိုမင် တုန်လှုပ်သွားသည်။ တစ်စုံတစ်ခု မှားယွင်းနေကြောင်း ခံစားမိလိုက်၏။

"ဝုန်း"

သွမ့်မိုမင် မတုံ့ပြန်နိုင်ခင်မှာပင် ကြီးမားသော စွမ်းအားတစ်ခုက သူ့ကို လွင့်စင်သွားစေသည်။

ထိုမြင်ကွင်းကို ကြည့်ပြီး သန့်ရှင်းသော နေမင်းဂိုဏ်း တပည့်များနှင့် လာရောက်ကြည့်ရှုသူများ အံ့သြမှင်သက်သွားကြ၏။

လက်သီးတစ်ချက်တည်းနှင့်တင် ဘယ်သူက အားသာလဲ ဆိုတာ သိသာနေလေသည်။

"ဒါ လက်နက် ပြုပြင်ခြင်းရဲ့ စွမ်းအားပဲ"

သွမ့်မိုမင် စိတ်ထဲတွင် တုန်လှုပ်သွားရတော့သည်။