အခန်း (၁၉၀၇)

အပိုင်း(၁၉၀၇)

ဂလက်ဆီဇုန် အဝင်ဝတွင်ပင် အဘိဿဲလ်လူမျိုး မည်သူမဆို မနာလိုဖြစ်လောက်မည့် ခရမ်းရောင် ပင်လယ် သခင်မ၏ ပျူငှာသော ကြိုဆိုမှုကို ရရှိပြီးနောက် အီလီစီယမ် အသေးစား သင်္ဘောသည် ကျောက်ဆူးပုံသဏ္ဌာန် ဟင်းလင်းပြင် သင်္ဘောနောက်မှ လိုက်ပါလာကာ ခရမ်းရောင် ပင်လယ် နန်းတော်သို့ ဂုဏ်သရေရှိ ဧည့်သည်များအဖြစ် ရောက်ရှိလာခဲ့သည်။

သူတို့ကို အစေခံ လူသားများစွာက လာရောက် ကြိုဆိုကြ၏။ ထိုအစေခံများမှာ အခြေခံ အားနည်းသော်လည်း ကျင့်ကြံခြင်းအဆင့်မှာမူ အတော်အတန် မြင့်မားကြ၏။

အသန်မာဆုံးသူမှာ ကြယ်တာရာ အမြုတေ အဆင့်၏ ပဉ္စမအဆင့် ဖြစ်သည့် အလင်းပြန်ခြင်း အဆင့်တွင် ရှိသည်။ သူတို့သည် ခန္ဓာကိုယ် အနည်းငယ် ပေါ်လွင်သည့် အဝတ်အစားများကို ဝတ်ဆင်ထားကြသည်။ အမျိုးသားများ၏ လက်နှင့် ခြေထောက်များတွင် နိုင်လွန်သား အလွှာပါးလေးများ ပါရှိသော်လည်း အမျိုးသမီးများတွင်မူ မပါရှိချေ။ ထိုအစား အမျိုးသမီးများမှာ ခါးလယ်ပိုင်းကို ပေါ်လွင်အောင် ဝတ်ဆင်ထားပြီး အင်္ကျီလက်များကို ခပ်ပွပွထားကြသည်။

သူတို့အားလုံးမှာ ကောင်းစွာ လေ့ကျင့်ထားသူများ ဖြစ်ကြပြီး စကားပြောလျှင် ချက်ချင်း ပြန်လည် ဖြေကြားကြသလို၊ ဧည့်သည်များ၏ လိုအပ်ချက်ကိုလည်း အကြည့်တစ်ချက်ဖြင့် သိမြင်ကာ စားသောက်ဖွယ်ရာများနှင့် အခြား အသုံးအဆောင်များကို အသင့်ပြင်ပေးကြသည်။

ဝေ့ဝူယင်တို့အဖွဲ့သည် ခေါင်းပေါက် အဘိဿဲလ် ဂြိုဟ်နှင့် ခရမ်းရောင် တက်သစ်ကျွန်းကို လှည့်လည်ကြည့်ရှုရန် ဆုံးဖြတ်ခဲ့ကြသည်။ ခရမ်းရောင် ပင်လယ် သခင်မ ကိုယ်တိုင်က လိုက်ပါ ပို့ဆောင်ပေးမည်ဟု ကမ်းလှမ်းခဲ့သဖြင့် ဝေ့ဝူယင်က လက်ခံလိုက်ပြီး သူတို့သည် ခေါင်းပေါက် အဘိဿဲလ် ဂြိုဟ်၏ ထူးခြားဆန်းပြားသော မြင်ကွင်းများစွာကို မြင်တွေ့ခဲ့ကြရသည်။

ဂြိုဟ်ထက်၌ မိုးသက်မုန်တိုင်းများ အမြဲတမ်း တိုက်ခတ်နေသည့် ပင်လယ်ပြင် ဒေသတစ်ခု ရှိသည်။ ထိုနေရာတွင် ရေလှိုင်းများမှာ အဆမတန် ကြီးမား မြင့်တက်နေသဖြင့် အဝေးမှ ကြည့်လျှင် ခရမ်းရောင် တောင်တန်းကြီးများ အသစ် ဖြစ်ပေါ်နေသကဲ့သို့ ထင်မှတ်ရ၏။ ထိုမြင်ကွင်းက ယွီစွန်းလီကို စိတ်ကူးဉာဏ်များ ပေးစွမ်းနိုင်ခဲ့သဖြင့် သူမနှင့် ချင်ချူးမူတို့သည် စိတ်ပါလက်ပါ ပန်းချီဆွဲနေကြတော့သည်။ ထိုနှစ်ဦးမှာ အနုပညာ ဝါသနာတူများ ဖြစ်သွားကြသဖြင့် ဝေ့ဝူယင်မှာ စိတ်အေးသွားရသည်။ သူတို့နှစ်ဦး ရင်းနှီးသွားခြင်းအား မြင်ရသည်က ဝမ်းသာစရာပင်။

ယွီစွန်းလီသည် ကြီးပြင်းလာပုံအရ လူမှုဆက်ဆံရေး အနည်းငယ် အားနည်းသူ ဖြစ်ပြီး ယခင် မျိုးဆက်တွင် 'နံပါတ်တစ် အလှမယ်' ဟု တစ်ဖက်သတ် သတ်မှတ်ခံရခြင်းကြောင့် မလိုလားအပ်သည့် အာရုံစိုက်မှုများကို ရရှိခဲ့ကာ သူငယ်ချင်း သိပ်မရှိခဲ့ချေ။ ချင်ချူးမူမှာလည်း သူမ၏ အတွေ့အကြုံများကြောင့် စိတ်အေးလက်အေး နေနိုင်ရန် ခက်ခဲခဲ့သော်လည်း၊ ယွီစွန်းလီမှာ ဝေ့ဝူယင်နှင့် ပတ်သက်နေသူ ဖြစ်သဖြင့်လား မသိ၊ သူမအပေါ် မည်သည့် ရန်လိုမှုမျှ မရှိခဲ့ချေ။

အယ်ဗန် မင်းသမီးလေးမှာ မိခင်တစ်ဦးကဲ့သို့ နူးညံ့သိမ်မွေ့သော အရှိန်အဝါရှိသော်လည်း ၎င်းမှာ သူမ၏ အစစ်အမှန် အတွေးနှင့် ခံစားချက်များကို ဖုံးကွယ်ထားသည့် အကာအကွယ်တစ်ခုလည်း ဖြစ်သည်။ ဝေ့ဝူယင်နှင့် ချင်ချူးမူတို့သည် စိတ်သဘောထားချင်း တူညီသူများ ဖြစ်ကြပြီး တစ်ဦးနှင့်တစ်ဦး အပြန်အလှန် အားဖြည့်ပေးနိုင်သူများ ဖြစ်ကြသည်။

ခရမ်းရောင် ပင်လယ်၏ လှပမှုကို မြင်လိုက်ရသောအခါ ဝေ့ဝူယင်သည် ဝေ့စီကို ခေါ်ကာ အင်္ကျီများကို ချွတ်လိုက်ကြသည်။ ဝေ့ဝူယင်၏ ထူးခြားလှပသော ခန္ဓာကိုယ် တည်ဆောက်ပုံကြောင့် သင်္ဘောပေါ်ရှိ မိန်းကလေးများပင် အသက်ရှူပင် မှားသွားကြရပြီး၊ ဝေ့စီ၏ ထွားကျိုင်းသော ခန္ဓာကိုယ်ကမူ အမျိုးသားများကို မနာလို အားကျစိတ်များ ဖြစ်ပေါ်စေသည်။ ထို့နောက် သူတို့နှစ်ဦး ငယ်စဉ်က ရေကန်ထဲတွင် ငါးဖမ်း၊ ကျောက်ခဲပစ် ကစားခဲ့ကြသလိုမျိုး ပျော်ရွှင်စွာ အော်ဟစ် ရယ်မောရင်း ရေထဲသို့ ခုန်ဆင်းသွားကြတော့သည်။

ဝေ့ဝူယင်တို့ ပြန်တက်လာသောအခါ လျှို့ဝှက်လောက အဆင့်ရှိ ခရမ်းရောင် ရေအချို့နှင့် တဖျတ်ဖျတ် တောက်ပနေသည့် ခရမ်းရွှေရောင် ပုလဲအချို့ကို ယူဆောင်လာခဲ့သည်။ ၎င်းကို မြင်လိုက်ရသောအခါ ခရမ်းရောင် ပင်လယ် သခင်မမှာ သိသိသာသာ အံ့ဩသွားရသည်။ ဝေ့စီမှာမူ ခရမ်းရောင် ပင်လယ် သခင်မ၏ တားမြစ်ချက်ကို ဂရုမစိုက်ဘဲ ရေအချို့ကို သောက်မိသွားပုံရသဖြင့် မူးဝေနေ၏။

သူ ယိုင်တိယိုင်တိုင် ဖြစ်နေပြီး စကားများ ဗလုံးဗထွေး ပြောနေသည်ကို မြင်ရသောအခါ အားလုံးမှာ ပြုံးပျော်သွားကြပြီး ချင်ချူးမူပင်လျှင် အားရပါးရ ရယ်မောလေတော့သည်။ ဤခရီးစဉ်၏ လွတ်လပ်မှု၊ ကြယ်တာရာများကြား အပန်းဖြေ သွားလာနိုင်မှုတို့က ချင်ချူးမူ၏ စိတ်အတွင်းမှ နာကျင်မှုများကို ကုသပေးနေသည်မှာ ထင်ရှားလှသည်။

ခရမ်းရောင် ပင်လယ် သခင်မမှာလည်း ခရီးစဉ်တစ်လျှောက် ပြုံးရွှင်နေသည်။ သူမသည် အာဏာရှင် ရှန့်ထိုတစ်ဦး ဖြစ်သော်လည်း အလွန် ရင်းနှီးဖော်ရွေစွာ ဆက်ဆံပေးနေ၏။ ၎င်းကပင် လူတိုင်း၏ စိတ်ဖိစီးမှုများကို လျော့ပါးစေခဲ့သည်။

သို့သော်လည်း ချောင်စွေ့ဖုန်းကတော့ အနည်းငယ် ကသိကအောက် ဖြစ်နေခဲ့၏။ ခရမ်းရောင် ပင်လယ် သခင်မသည် သူမကို အနည်းငယ် လျစ်လျူရှုပြီး ယွီစွန်းလီနှင့် ချင်ချူးမူတို့ကိုသာ ချီးကျူးနေခြင်း၊ သခင်လေးရှန့်ကိုပင် သူမထက် ပို၍ စကားပြောနေခြင်းတို့ကြောင့် စိတ်ထဲတွင် အနည်းငယ် ခံရခက်နေမိသည်။

ထိုအချိန်တွင်ပင်... ဝေ့ဝူယင်က သူမ နံဘေးသို့ လျှောက်လာကာ မေးလိုက်သည်။

“မင်း ဒီဂြိုဟ်ကို သဘောကျလား”

ချောင်စွေ့ဖုန်းမှာ အနည်းငယ် စိတ်ကောက်နေသော်လည်း အမှန်အတိုင်းပင် ဖြေလိုက်သည်။

“တကယ်ကို လှတဲ့ ဂြိုဟ်ပါပဲ... မျက်တောင်တစ်ချက် ခတ်တိုင်း ပုံသဏ္ဌာန် ပြောင်းလဲနေတဲ့ ပင်လယ် တောင်တန်းတွေ၊ ကြယ်တာရာရဲ့ အလင်းကို ရောင်ပြန်ဟပ်နေပြီးတော့ လမင်းကြီးနဲ့တူတဲ့ ခရမ်းရွှေရောင် ပုလဲတွေ... မိခင်ရဲ့ အထိအတွေ့လို နူးညံ့တဲ့ ရွှေရောင် တိမ်တိုက်တွေ... ဒါတွေကို ဘယ်သူက သဘောမကျဘဲ နေမှာလဲ”

သူမက ဂြိုဟ်၏ လှပမှုကို အလေးပေး ပြောဆိုလိုက်၏။

ဝေ့ဝူယင်က သူမ၏ နှုတ်ခမ်းလေးကို နူးညံ့စွာ နမ်းလိုက်သည်။ ထို့နောက်...

“ဒီဂြိုဟ်ကို မင်းအတွက် ငါ ဝယ်ပေးရမလား”

“...”

ခရမ်းရောင် ပင်လယ် သခင်မ အပါအဝင် အားလုံးမှာ ဆွံ့အ တိတ်ဆိတ် သွားကြတော့၏။ စားသောက်ဖွယ်ရာများ ကိုင်ဆောင်ထားသည့် အစေခံများပင်လျှင် ခြေလှမ်းများ မှားယွင်းသွားကာ ကျောက်ရုပ်ကဲ့သို့ ငြိမ်သက်သွားကြသည်။

“...”

ခရမ်းရောင် ပင်လယ်မှာ အနေရခက်သော အခြေအနေသို့ ဆိုက်ရောက်သွားပြီး ချောင်စွေ့ဖုန်းမှာလည်း ဘာပြောရမှန်းမသိ ဝေခွဲမရ ဖြစ်နေရှာ၏။

ဝေ့ဝူယင်က ခရမ်းရောင် ပင်လယ်ဘက်သို့ လှည့်ကာ ပြုံးပြလိုက်၏။ သူ၏ သာလွန် သန့်စင် အဂ္ဂိရတ် ကြယ်တာရာများမှာ အထွတ်အထိပ် အဆင့် အသန့်စင်ဆုံး မြူနှင်း အော်ရာများကို ထုတ်လွှတ်နေကာ လူတိုင်း၏ မွေးရာပါ ဝိညာဉ်၊ ကြယ်တာရာဝိညာဉ်နှင့် လျှို့ဝှက် ဝိညာဉ်များကိုပင် တုန်လှုပ် သွားစေသည်။

“ကျုပ် ဇနီးက ဒီဂြိုဟ်ကို လိုချင်တယ်ဆိုရင် ကျုပ် လျှို့ဝှက်ကောင်းကင် အဆင့် ဆေးလုံးတစ်လုံးနဲ့ ဝယ်ပါ့မယ်... ဒါဆိုရင် လုံလောက်ပြီလား”

“...”

ခရမ်းရောင် ပင်လယ် ဆွံ့အသွား၏။

“...”

သခင်လေးရှန့် အံ့အားသင့်သွား၏။

“...”

ချောင်စွေ့ဖုန်း မှင်တက်သွားသည်။

“...”

ကျန်တဲ့သူအားလုံးမှာလည်း အာမေဍိတ်သံများပင် ထွက်ပေါ်ကုန်ကြတော့သည်။

“...”

ခရမ်းရောင် ပင်လယ်မှာ စကားလုံးတို့ ပျောက်ရှနေ၏။

“ဒါမှမဟုတ်လည်း... လျှို့ဝှက် ခန္ဓာကိုယ်နဲ့ လျှို့ဝှက်နယ်မြေကို တိုးတက်စေမယ့် လျှို့ဝှက်လောက အထွတ်အထိပ် အဆင့် ထုတ်ကုန် ခြောက်ခု ထပ်ပေါင်းပေးရမလား”

ဝေ့ဝူယင်က ထပ်လောင်းပြောကြားလိုက်ပြန်သည်။ ခရမ်းရောင် ပင်လယ်မှာ နှလုံးခုန်သံ မြန်ဆန်လွန်းလှသဖြင့် ရင်ဘတ်ထဲမှပင် ခုန်ထွက်တော့မတတ် ခံစားနေရသည်။ တစ်ချိန်တည်း၌ အစေခံများမှာလည်း သူတို့၏ ကမ္ဘာကြီးတစ်ခုလုံး ပြောင်းပြန်လှန်ခံလိုက်ရသလို ခံစားလိုက်ရ၏။

လျှို့ဝှက်ကောင်းကင် အဆင့်...

လျှို့ဝှက်လောက အထွတ်အထိပ် အဆင့်...

သူတို့တစ်သက်တွင် လျှို့ဝှက်မြေကြီး အဆင့် အဆင့်နိမ့် အဂ္ဂိရတ် ထုတ်ကုန် တစ်ခုကို မြင်တွေ့ရလျှင်ပင် ကံကောင်းလှပြီဟု မှတ်ယူရမည် ဖြစ်သည်။

“ကျွန်မ...”

ချောင်စွေ့ဖုန်းမှာ ဝေခွဲမရ ဖြစ်နေသော်လည်း ဝေ့ဝူယင်ကို ကြည့်နေသည့် သူမ၏ မျက်ဝန်းအစုံမှာ အတိုင်းထက်အလွန် တောက်ပနေသည်။ သူမအတွက် ဂြိုဟ်တစ်လုံး ဝယ်ပေးမည်ဟု ဆိုသည်။ ထို့အပြင် ၎င်းမှာ သာမန်ဂြိုဟ် မဟုတ်ဘဲ လျှို့ဝှက်လောက အဆင့် ပစ္စည်းများ ထွက်ရှိနိုင်သည့် ရှေးဟောင်းဂြိုဟ်ကြီး ဖြစ်သည်။

‘သူမ လိုချင်သလား...’

မည်သူက မလိုချင်ဘဲ နေပါမည်နည်း။ မည်သူကများ ငြင်းနိုင်မည်နည်း။ လျှို့ဝှက်ကောင်းကင် အဆင့် ထုတ်ကုန် ဆိုသည်မှာ မည်မျှ တန်ဖိုးကြီးကြောင်း သူမ အတိအကျ မသိသော်လည်း ကမ္ဘာပျက်လောက်အောင် တန်ဖိုးရှိမည်ကိုမူ နားလည်ထားသည်။

ဝေ့ဝူယင်က ခရမ်းရောင် ပင်လယ်ကို ပြုံးကာ ကြည့်လိုက်ရင်း...

“မင်း ဆုံးဖြတ်ဖို့ အချိန်ရှိပါသေးတယ်... မလောပါနဲ့”

ထိုအခါမှသာ အခြေအနေက တဖြည်းဖြည်း ပြန်လည် တည်ငြိမ်သွားခဲ့သည်။ သို့သော်လည်း... လူတိုင်း၏ စိတ်ထဲ၌မူ လှိုင်းထန်နေဆဲ ဖြစ်သည်။ ဝေ့ဝူယင်သည် ချောင်စွေ့ဖုန်းနှင့်အတူ ရယ်မောပျော်ပါးရင်း သူ၏ ချစ်ခြင်း မေတ္တာကို ပေါ်ပေါ်ထင်ထင် ပြသလိုက်ပြီးနောက် အခြားသူများနှင့်လည်း အချိန်ပေး စကားပြောဆိုနေခဲ့သည်။

ထိုအချိန်မှ စ၍ ချောင်စွေ့ဖုန်းနှင့် ခရမ်းရောင် ပင်လယ်တို့၏ ဆက်ဆံရေးမှာလည်း ချက်ချင်းပင် ပြောင်းလဲသွားတော့သည်။ နောက်ပိုင်းတွင် ခရမ်းရောင် ပင်လယ်သည် ချောင်စွေ့ဖုန်းကို အထင်မသေးရဲတော့ချေ။ ကျင့်ကြံခြင်း အဆင့် နိမ့်သော်လည်း သူမသည် ဤသင်္ဘောပေါ်တွင် တန်ဖိုးအထားရဆုံး အမျိုးသမီး ဖြစ်ကြောင်း နားလည်သွားခဲ့သည်။

ထို့အပြင် ဝေ့ဝူယင်အပေါ် ထားရှိသည့် သူမ၏ အမြင်မှာလည်း အမြင့်ဆုံးသို့ ရောက်ရှိသွားခဲ့သည်။ အစောပိုင်းက တာအို ဆွေးနွေးပွဲကို ငြင်းဆိုခဲ့မိသည့်အတွက် သူမ နောင်တရမိကာ နောက်မှသာ ထပ်မံဆွေးနွေးရန် စိတ်ကူးလိုက်မိသည်။ သူနှင့် တာအိုအကြောင်း ဆွေးနွေးခြင်းဖြင့် မည်မျှအထိ သိမြင်နိုင်မည်ကို သူမ သိချင်လာမိသည်။

ဝေ့ဝူယင်သည် မိမိကိုယ်ကိုယ် လောကရှန့်ထို အဂ္ဂိရတ် ပညာရှင် အဖြစ် ကြေညာခဲ့ကြောင်း ဗာဂျန်က သတင်းပို့ခဲ့သော်လည်း... ယခုအခါ၌ လျှို့ဝှက် လောက အထွတ်အထိပ် အဆင့်ရှိ ပစ္စည်းများနှင့် လျှို့ဝှက် ကောင်းကင် အဆင့် ပစ္စည်းများကိုပင် ကမ်းလှမ်းနေသည်ကို ကြည့်ခြင်းအားဖြင့်... သူက... 'ကောင်းကင်ရှန့်ထို အဂ္ဂိရတ် ပညာရှင်' တစ်ဦးများ ဖြစ်နေမလားဟု သူမ တွေးမိသည်။

ထို့အပြင်... သူတို့စီးနင်းလာသော သင်္ဘောမှာလည်း ကောင်းကင် ရတနာ အဆင့် သို့မဟုတ် ထိုထက်ပင် မြင့်မားသော အဆင့်တွင် ရှိနေသည်မှာ သေချာလှသည်။

အဖြူရောင် အဘိဿဲလ် ဂလက်ဆီတစ်ခုလုံးနှင့် သူမ ပိုင်ဆိုင်သည့် ခရမ်းရောင် အဘိဿဲလ် ဂလက်ဆီဇုံ၏ အခြေအနေကို တွေးတောရင်း မိန်းကလေး၏ စိတ်ထဲတွင် မေးခွန်းများစွာ ပေါ်ပေါက်လာခဲ့သည်။ အရေးကြီးဆုံးက ရှေ့ဆက်၍ မည်သို့ လုပ်ဆောင်ရမည်နည်း ဟူသောအချက်ပင်။

သူမ ဆုံးဖြတ်ချက် တစ်ခု ချလိုက်သည်။ တာအို ဆွေးနွေးပွဲတဲ့လား။ သူမ ဝမ်းမြောက်စွာ လက်ခံတော့မည် ဖြစ်သည်။

***