အခန်း (၁၉၁၆)

အပိုင်း(၁၉၁၆)

ဝှစ်...

ပိုင်ရှုမှာ စားပွဲပေါ်ရှိ မှော်သန့်စင် ဆေးအိုးထဲမှ စိတ်လှုပ်ရှားစွာ ထွက်လာ၏။ သူမ၏ ခန္ဓာကိုယ်မှာ ယခင်ကထက် သိသိသာသာ ကြီးထွားလာပြီး သာမန် မိန်းကလေးငယ်တစ်ဦး၏ တစ်ဝက်ခန့် ရှိနေပြီ ဖြစ်သည်။

“ဆရာ လုပ်နိုင်သွားပြီလား...”

“အင်း... ငါ့ရဲ့ အာရုဏ်ဦး ကောင်းကင် မူလ ဆေးအနှစ်ကို လျှို့ဝှက်မြေကြီးအဆင့် အဖြစ် ဖော်စပ်ဖို့ သီအိုရီအရတော့ တွက်ချက်နိုင်သွားပြီ...”

သူက ပြောရင်း၊ သူသည် လေလံပွဲမှ ရရှိထားသော ကုန်ကြမ်းအချို့ကို အလျင်အမြန် ထုတ်လိုက်သည်။ ထိုကုန်ကြမ်းများထဲတွင် ကောင်းကင်ရှန့်ထိုများထံတွင်သာ တွေ့ရလေ့ရှိသည့် ‘ကောင်းကင်ဘုံ ရောင်ခြည်’ အငွေ့အသက်များ ပါဝင်သည့် ကောင်းကင်ရတနာ နှင့် ဆင်တူသော ပစ္စည်းအချို့လည်း ပါဝင်သည်။

၎င်းတို့မှာ လျှို့ဝှက်လောက အဆင့် ကုန်ကြမ်းများ ဖြစ်ကြသည်။

ဝေ့ဝူယင်သည် လျှို့ဝှက်မြေကြီးအဆင့်နှင့် ကြယ်တာရာအဆင့် ကုန်ကြမ်းအချို့ကိုလည်း ထုတ်လိုက်သည်။ ထို့နောက် သူ ဖော်စပ်ခြင်းကို စတင်လိုက်ပြီး ပိုင်ရှုကလည်း ‘အာရုဏ်ဦး ခြေချခြင်း မှော်သန့်စင် ဆေးအိုး’ အတွင်းသို့ အလျင်အမြန် ဝင်သွားကာ အသန့်စင်ဆုံး မြူနှင်းများကို အသုံးပြု၍ အစီအရင်များကို စတင် လှုပ်ရှားစေလိုက်သည်။

၁၆ နာရီ ကြာပြီးနောက်...

ဝေ့ဝူယင်၏ မျက်လုံးများ ဝင်းလက်သွား၏။ သူ၏ ရှေ့တွင် ရွှံ့ကဲ့သို့ ပျစ်ချွဲနေသော ဆေးအနှစ်များ ပြည့်နေသည့် လေးထောင့် သေတ္တာတစ်လုံး ရှိနေသည်။ မန်နာအမျိုးအစား လျှို့ဝှက် သင်္ကေတများမှာ အထင်ရှားဆုံး ဖြစ်သော်လည်း တောက်ပသည့် ကောင်းကင်ဘုံ ရောင်ခြည် မျှင်လေးများကလည်း ၎င်းတို့ပတ်လည်တွင် ဝဲလည်နေကြသည်။

ပြီးပြည့်စုံသော ထုတ်ကုန်တစ်ခု...

ဤအရာနှင့်ဆိုပါက... အဆင့်ကိုး မူလ အဆင့်သို့ ရောက်ရှိရန် ဖြစ်နိုင်ခြေ ရှိသွားပြီ ဖြစ်သည်။ အကယ်၍ ၎င်းကို ပို၍ အစွမ်းထက်အောင် ပြုလုပ်နိုင်ပါက ကျင့်ကြံသူများကို ကောင်းကင်ဘုံ ရောင်ခြည် တစ်စက်မျှ ရရှိစေပြီး သူတို့၏ ‘ကောင်းကင်ဘုံ ရောင်ခြည် အသွင်’ ကို အတုအယောင် ဖန်တီးပေးခြင်း သို့မဟုတ် အားဖြည့်ပေးခြင်းတို့ကို လုပ်ဆောင်နိုင်လိမ့်မည် ဖြစ်သည်။

ကောင်းကင်ရှန့်ထိုများ အတွက် အသုံးဝင်သည့် လျှို့ဝှက်မြေကြီးအဆင့် ထုတ်ကုန်တစ်ခုဆိုသည်မှာ တကယ်ပင် စိတ်ကူးယဉ်ရန် ခက်ခဲလှပေသည်။ ထို့အပြင် ၎င်းကို ကြယ်တာရာ သခင်များပင် အသုံးပြုနိုင်သည်။ ဝေ့ဝူယင်သည် မိမိ၏ အောင်မြင်မှုအတွက် မိမိကိုယ်တိုင်ပင် အံ့ဩနေမိသည်။

တစ်ချိန်တည်းမှာပင်... ဝေ့ဝူယင်သည် အဂ္ဂိရတ်တာအို၏ ထောက်ခံချီးကျူးသံများကို ခံစားနေရပြီး အမည်တစ်ခု ပေးရန် စောင့်ဆိုင်းနေကြောင်း သိလိုက်သည်။

“အဂ္ဂိရတ်တာအိုဆိုတာ အကန့်အသတ် မရှိပါလား...”

ကောင်းကင်စစ်ဝိညာဉ်က စိတ်လှုပ်ရှားစွာ သက်ပြင်းချလိုက်သည်။

“အာရုဏ်ဦး ကောင်းကင်ဆုလာဘ် ဆေးအနှစ်လို့ နာမည်ပေးမယ်”

ဟူး... ဟူး...

ဝေ့ဝူယင် ရေရွတ်လိုက်သည်နှင့် တစ်ပြိုင်နက် အဂ္ဂိရတ် ကြယ်တာရာများမှာ တုန်ခါလာပြီး ရောင်စုံအဂ္ဂိရတ်အလင်းတန်းများကို ထုတ်လွှတ်လိုက်ကြ၏။

ဤဆေးအနှစ်နှင့်ဆိုပါက ‘ကောင်းကင်ဘုံ ရောင်ခြည် အသွင်’ မှာ ကောင်းကင်ရှန့်ထိုများအတွက်သာ မဟုတ်တော့ဘဲ၊ သေမျိုးများပင်လျှင် ဤစွမ်းအားကို အတိုင်းအတာတစ်ခုအထိ ကိုင်တွယ်နိုင်တော့မည် ဖြစ်သည်။

“နင်ကတော့ အစဉ်အလာတွေကို ဖျက်ဆီးရတာကို ဝါသနာ ပါနေတာပဲ...’

ကောင်းကင်စစ်ဝိညာဉ်က ကျေနပ်အားရစွာ ရယ်မောလိုက်သည်။ ဝေ့ဝူယင်၏ ကြီးထွားမှုကို စောင့်ကြည့်ရသည်မှာ မယုံနိုင်စရာများဖြင့်သာ ပြည့်နှက်နေပေသည်။

ဝေ့ဝူယင်က အလွန် ကျေနပ်စွာ ပြုံးလိုက်၏။ သူ့ မျက်လုံးအတွင်းရှိ အဂ္ဂိရတ် ကြယ်တာရာများ၏ အစွမ်းမှာလည်း ထပ်မံ တိုးမြင့်လာခဲ့ပြန်သည်။

ယနေ့တွင် ‘အာရုဏ်ဦး’ အဂ္ဂိရတ်မျိုးဆက်၌ အဖွဲ့ဝင်သစ် တစ်ခု ထပ်တိုးသွားပြီ ဖြစ်သည်။

ထိုအချိန်မှာပင် သူသည် ဝိညာဉ်သတင်းစကား တစ်ခုကို လက်ခံရရှိလိုက်သည်။

“ဂလက်ဆီ လေလံပွဲ ပြီးဆုံးသွားပါပြီ...”

...

“အရှင်မင်းကြီး... ဒါက ဂလက်ဆီလေလံပွဲကနေ ရရှိခဲ့တဲ့ စုစုပေါင်းအမြတ်အစွန်း အစီရင်ခံစာပါ... အရောင်းအဝယ်ဖြစ်ခဲ့တဲ့ ပစ္စည်းတိုင်း အပြင် ကုန်ကြမ်းတွေနဲ့ ကျင့်ကြံခြင်းနည်းလမ်းတွေရဲ့ တန်ဖိုး၊ ဈေးကွက်ပေါက်ဈေးနဲ့ ခန့်မှန်းခြေတန်ဖိုး အသေးစိတ်တွေကို ကျွန်မ ထည့်သွင်းပေးထားပါတယ်... ဒါ့အပြင် အဲဒီပစ္စည်းတွေရဲ့ မူလအစ၊ မျိုးရိုးနဲ့ အရည်အသွေးတွေကိုလည်း စာရင်းပြုစုထားပါတယ်ရှင်”

လော့နင်သည် ဝိညာဉ်သင်္ကေတများစွာ ရေးထိုးထားသည့် ဟင်းလင်းပြင်လက်စွပ်တစ်ကွင်းကို ဝေ့ဝူယင်ထံ ကမ်းပေးလိုက်သည်။

ဝေ့ဝူယင်သည် ကြီးမားသော ကုလားထိုင်ပေါ်တွင် သက်သောင့်သက်သာ ထိုင်နေပြီး သစ်သီးရနံ့သင်းသည့် ဝိုင်ကို တစ်ငုံသောက်ရင်း လက်စွပ်ကို လှမ်းယူလိုက်သည်။

“ကောင်းပြီ... တော်တယ်”

သူ ချီးကျူးလိုက်၏။ အရည်အချင်းရှိသော လက်အောက်ငယ်သားများ ရှိခြင်းမှာ ဘဝကို များစွာလွယ်ကူစေပြီး ပိုမိုအရေးကြီးသော လုပ်ငန်းဆောင်တာများကိုသာ အာရုံစိုက်နိုင်စေသည်။

“နောက်ထပ် အစီရင်ခံစရာ တစ်ခုရှိပါသေးတယ်”

လော့နင်က ဆိုသည်။

“ပြောပါဦး”

ဝေ့ဝူယင်က နောက်ထပ်တစ်ငုံ သောက်လိုက်ရာ အလွန်ပင် လန်းဆန်းသွားသလို ခံစားရသည်။ ဤဝိုင်မှာ နတ်မိမယ် တိတ်ဆိတ်ခြင်းက လက်ဆောင်ပေးထားသည့် နှစ်ပေါင်း ၁ သိန်း ၅ သောင်းကျော် သက်တမ်းရှိသော ရှေးဟောင်းဝိုင်ဖြစ်ပြီး ခန္ဓာကိုယ်၊ စိတ်နှင့် အမတေ စွမ်းအားတို့အတွက် စစ်မှန်သော အာဟာရဆေးပင် ဖြစ်သည်။ အကယ်၍ သူ၏ ကျင့်ကြံခြင်း အခြေခံအုတ်မြစ်သာ အလွန်အမင်း ကြီးမားမနေပါက ဤဝိုင်ကြောင့်ပင် သူ၏ ကျင့်ကြံခြင်း အဆင့်မှာ သိသိသာသာ တိုးတက်နေပေလိမ့်မည်။

“ဟုတ်ကဲ့ပါ”

လော့နင်က ခေါင်းညိတ်ပြသည်။

“အာရုဏ်ဦးမျိုးဆက် ထုတ်ကုန်တွေကို ဒီလူ့အဖွဲ့အစည်းထဲ ထည့်သွင်းလိုက်တာက အဖြူရောင် အဘိဿဲလ် ဂလက်ဆီက ပညာရှင်တွေနဲ့ ခေါင်းဆောင်တွေကြားမှာ သိသာတဲ့ အပြောင်းအလဲနဲ့ စိုးရိမ်တုန်လှုပ်မှုတွေကို ဖြစ်ပေါ်စေခဲ့ပါတယ်... အာရုဏ်ဦးကြယ်တာရာနယ်မြေက လူတွေလိုပဲ သူတို့လည်း ဒီဆေးလုံးတွေဟာ မျိုးဆက်သစ်တွေအပေါ် ဘယ်လောက်အထိ သက်ရောက်မှုရှိမလဲဆိုတာကို သဘောပေါက်သွားကြပါပြီ... ဒါ့အပြင် အစဉ်အလာတွေကို ဖျက်ဆီးပစ်တဲ့ အစွမ်းတွေကလည်း သူတို့အရင်က မဖြစ်နိုင်ဘူးလို့ ထင်ထားတဲ့ အယူအဆတွေကို ရိုက်ချိုးပစ်လိုက်ပါတယ်...”

“ဥပမာဆိုရင် အာရုဏ်ဦး နေမီးတောက် ဆေးလုံးရဲ့ လောကသခင် အဆင့် မတိုင်ခင် လောကနယ်မြေကို ဖန်တီးပေးနိုင်တဲ့ အာနိသင်ဟာ ဆိုရင် အဖြူရောင် အဘိဿဲလ် လူ့အဖွဲ့အစည်းမှာ 'လောကရှန့်ထို' နဲ့ အထက် ပညာရှင်အနည်းငယ်လောက်ပဲ လေ့လာဖူးတဲ့ နက်နဲတဲ့ အယူအဆတစ်ခုပါ... အရင်ကတော့ ဒါကိုလုပ်ဖို့ ကုန်ကျစရိတ်က မထိုက်တန်ဘူးလို့ အများစုက ယူဆခဲ့ကြပြီး သူတို့ရဲ့ တိုက်ရိုက်မျိုးဆက်တွေအတွက်တောင် လုပ်ပေးခဲပါတယ်”

“တကယ်တော့ အဖြူရောင် အဘိဿဲလ် ဂလက်ဆီရဲ့ ယဉ်ကျေးမှုဟာ ကျင့်ကြံခြင်းရဲ့ အခြေခံဂုဏ်သတ္တိတွေကို မြှင့်တင်တာထက် သူတို့ရဲ့ မွေးရာပါ မန်နာ ထိန်းချုပ်မှု ဗီဇအပေါ်မှာပဲ အလွန်အမင်း မှီခိုနေကြတာပါ... ဒါ့အပြင် အဘိဿဲလ်လူမျိုးတွေရဲ့ အယူအဆတွေကလည်း နောက်မျိုးဆက်တွေအတွက် ကိုယ့်ကိုယ်ကိုယ် စတေးတာမျိုးထက် အဲဒီစွမ်းရည်ကိုပဲ အားကိုးကြတာကြောင့် ကျင့်ကြံခြင်းလောကဟာ ရပ်တန့်နေခဲ့တာပါ... ပြောရရင် သူတို့ဟာ အဖြူရောင် အဘိဿဲလ် ဂလက်ဆီရဲ့ အလယ်ဗဟိုကနေ ရံဖန်ရံခါ ထွက်ပေါ်လာတတ်တဲ့ ရတနာတွေအပေါ်မှာပဲ မှီခိုနေရတာပါ...”

“ဒါပေမဲ့ အာရုဏ်ဦးထုတ်ကုန်တွေ ရောက်လာပြီးနောက်မှာတော့ နည်းပါးတဲ့ ရင်းနှီးမြှုပ်နှံမှုဟာ ကြီးမားတဲ့ အကျိုးကျေးဇူးတွေ ရနိုင်တာကို သိသွားတဲ့အခါ လူ့အဖွဲ့အစည်းရဲ့ အရေးပါမှုက အလျင်အမြန် ပြောင်းလဲလာပါတယ်... အမြော်အမြင်ရှိသူတွေက ဒီအကျိုးသက်ရောက်မှုတွေကို ချက်ချင်း မြင်လိုက်ကြပါတယ်”

“နောက်ထပ် နှစ်အနည်းငယ် အတွင်း ဒါမှမဟုတ် ဆယ်စုနှစ် အနည်းငယ်အတွင်းမှာ ဒီလူ့အဖွဲ့အစည်းဟာ အာရုဏ်ဦးကြယ်တာရာနယ်မြေရဲ့ လူငယ်မျိုးဆက် ဖွံ့ဖြိုးတိုးတက်မှု ယဉ်ကျေးမှုအတိုင်း လိုက်ပါပြောင်းလဲလာလိမ့်မယ်လို့ ကျွန်မ ယူဆပါတယ်... အရှင်မင်းကြီး ခိုင်းစေထားတဲ့အတိုင်း 'ခရမ်းရောင်ပင်လယ်' နဲ့ 'သွေးရောင်ဓား' တို့ဟာ မဟာစက်ဝန်း ကြယ်ကွင်းပြင်ရဲ့ ရွေးချယ်ခံ ဆိုတဲ့ အယူအဆကို အခြေခံပြီး အနာဂတ်ခေါင်းဆောင်တွေ ဖြစ်လာမယ့် အရည်အချင်းရှိတဲ့ လူငယ်တွေကို စတင်ရှာဖွေနေကြပါပြီ...”

“ပြီးတော့ အရှင်မင်းကြီး ညွှန်ကြားထားတဲ့အတိုင်း 'ရွေးချယ်ခံ' ဆိုတဲ့ စကားလုံးအစား 'အရုဏ်ဦး' နဲ့ 'ဆည်းဆာ' ဆိုတဲ့ အခေါ်အဝေါ်ကို ပြောင်းလဲလိုက်ပါတယ်... 'အရုဏ်ဦး' က ငယ်ရွယ်တဲ့ အရည်အချင်းရှိသူတွေကို ဆိုလိုပြီး၊ 'ဆည်းဆာ' ကတော့ အသက်အရွယ် ကျော်လွန်ပြီး စစ်မှန်တဲ့ ပညာရှင်အဆင့်ကို ရောက်ရှိသွားတဲ့ ခေတ်တစ်ခေတ်ရဲ့ အရုဏ်ဦးဟောင်းတွေကို ရည်ညွှန်းတာပါ”

လော့နင်မှာ ပြောကြားရင်း စိတ်အား ထက်သန်လာကာ မျက်လုံးများ တဝင်းဝင်း တောက်ပလာ၏။ သို့သော်လည်း... သူမက ချက်ချင်းပင် သူမ၏ အမူအရာကို ထိန်းချုပ်လိုက်ပြီး ခေါင်းငုံ့ကာ ဆက်ပြောလိုက်သည်။

“အရှင်မင်းကြီး ခိုင်းစေထားတဲ့အတိုင်း အာရုဏ်ဦး နေမီးတောက် ဆေးလုံးရဲ့ အဆင့်နိမ့် ဖြစ်တဲ့ ‘ကွဲပျက် နတ်ဘုရား နယ်မြေ ဆေးလုံး' နဲ့ 'မူလရှာဖွေခြင်း ဆေးရည်' တို့ကိုလည်း ဖြန့်ဖြူးထားပါတယ်ရှင်...”

သူမ ခေတ္တရပ်လိုက်ရာ နှလုံးခုန်သံများ မြန်လာ၏။ အစဉ်အလာကို ရိုက်ချိုးပစ်သည့် ဤထုတ်ကုန်များကို ကမ္ဘာလောကထဲသို့ ထည့်သွင်းလိုက်ခြင်းဖြင့် လူတိုင်း လက်လှမ်းမီနိုင်စေပြီး ဤဂလက်ဆီကို 'အာရုဏ်ဦး ဖန်ဆီခြင်းခေတ်' စံနှုန်းထဲသို့ ပိုမိုသက်ရောက်စေမည်ဖြစ်သည်။

“ခရမ်းရောင်ပင်လယ်၊ မီးခိုးရောင် နှင်းဆီ၊ သွေးရောင်ဓားနဲ့ နတ်မိမယ်တိတ်ဆိတ်ခြင်းတို့ကလည်း ဟင်းလင်းပြင် ယဇ်ပလ္လင် တစ်ခု တည်ဆောက်ဖို့ သဘောတူလိုက်ကြပါပြီ... ဒါပေမဲ့ အရှင်မင်းကြီး... ဟင်းလင်းပြင်ယဇ်ပလ္လင် ဆိုတာက... ဘာလဲဟင်...”

လော့နင်သည် ခေါင်းငုံ့လျက်ပင် ခပ်တိုးတိုးလေး မေးမြန်းလိုက်၏။

***