အခန်း (၂၃၆)

အခန်း။ ၂၃၆

အချိန်ကာလသည် တစ်ရွေ့ရွေ့ ကုန်လွန်ခဲ့ရာ ရက်အနည်းငယ်မျှပင် ကြာမြင့်ခဲ့ပြီဖြစ်သည်။

လွတ်လပ်ခွင့် ရရှိထားသော ကျောက်လင်းသည် ယခင်ကကဲ့သို့ လျှောစင်အနီးရှိ ကန့်သတ်နယ်မြေလေးအတွင်း ပိတ်လှောင်ခံထားရခြင်း မရှိတော့ဘဲ ပိုမိုတက်ကြွ လန်းဆန်းလာပုံရသည်။ သို့သော်လည်း သူမ၏ နေ့စဉ်ကိုယ်လက်လှုပ်ရှား လေ့ကျင့်ခန်းများကိုမူ တစ်ရက်မျှ ပျက်ကွက်ခြင်း မရှိပေ။ သူမ၏ ခန္ဓာကိုယ်ကြံ့ခိုင်မှု ကျဆင်းမသွားစေရန်နှင့် တိုက်ပွဲဝင်အသင့်အနေအထားရှိစေရန်အတွက် ပြင်းထန်သော လေ့ကျင့်ခန်းများကို မယိမ်းမယိုင် ဆက်လက်လုပ်ဆောင်နေခဲ့သည်။ အမှန်စင်စစ် သူမအနေဖြင့် တိုက်ပွဲများနှင့် ဝေးကွာနေခဲ့သည်မှာ အတော်ပင် ကြာမြင့်သွားခဲ့သည်။

နေ့စဉ်နေ့တိုင်း အလကားထိုင်စားနေရသည်ကို အားနာ၍လားမသိပေ။ ကျောက်လင်းသည် သုမဘာသာ လုပ်စရာအလုပ်တစ်ခုကို ရှာဖွေခဲ့သည်။ ကျိရုရွှယ်နှင့် လုချွမ်းတို့အတွက် သူမ၏ ကြိုးပမ်းအားထုတ်မှုမှာ အရေးမပါလှဟု ထင်ရသော်လည်း ဤနည်းလမ်းဖြင့် ခြံဝင်းအတွက် တစ်ထောင့်တစ်နေရာမှ အကျိုးပြုနိုင်လိမ့်မည်ဟု သူမ တွေးတောခဲ့ပုံပင်။

နံနက်ဦးယံတွင် နေခြည်နုနုတို့သည် ခြံဝင်းတစ်ခုလုံးသို့ လိမ္မော်နီရောင် အလင်းတန်းများ ဖြန့်ကျက်ကျရောက်လာပြီး လေထုထဲတွင် ရစ်သိုင်းနေသော မြူနှင်းပါးပါးတို့ကို တဖြည်းဖြည်း ဖယ်ခွာစေသည်။ ငြိမ်သက်နေသော ခြံဝင်းကြီးမှာ ပြန်လည်နိုးထလာပြီး ဆင့်ကဲရုပ်သေးဇွန်ဘီတစ်ကောင်ချင်းစီသည်လည်း ၎င်းတို့၏ နေ့စဉ်တာဝန်များကို စတင်ထမ်းဆောင်နေကြပြီ ဖြစ်သည်။

နံနက်စောစော ကိုယ်လက်သန့်စင်ပြီးနောက် မနက်စာ စားသောက်ပြီးချိန်တွင် ကျောက်လင်းသည် အခြားသော ဆင့်ကဲဇွန်ဘီ ဆယ်ဂဏန်းခန့်နှင့်အတူ ဂိုဒေါင်ထဲသို့ လျှောက်လှမ်းဝင်သွားခဲ့သည်။ ခေတ္တအကြာတွင် သူမသည် ဇွန်ဘီများ၏ နောက်မှ ပြန်လည်ထွက်ခွာလာပြီး သူမ၏ လက်ထဲတွင်လည်း စိုက်ပျိုးရေးသုံး ကိရိယာတစ်ခုကို ကိုင်ဆောင်ထား၏။

စိမ်းလန်းစိုပြည်နေသော ဟင်းသီးဟင်းရွက်စိုက်ခင်းထဲသို့ ဇွန်ဘီအုပ်စုနှင့်အတူ လိုက်ပါသွားပြီးနောက် ကျောက်လင်းသည် ၎င်းတို့၏ လုပ်ဆောင်ချက်များကို အတုယူကာ ခရမ်းသီးခင်းများအတွင်း ပေါင်းပင်များ ရှင်းလင်းခြင်းနှင့် မြေဆီလွှာ ပြုပြင်ခြင်းတို့ကို စတငလုပ်ဆောင်တော့သည်။ သူမတာဝန်ယူထားသော စိုက်ခင်းအပိုင်းပြီးစီးသွားသောအခါ ကျောက်လင်းသည် အနားမယူဘဲ အခြားစိုက်ခင်းအလွတ်တစ်ခုသို့ အပြေးသွားကာ ဆင့်ကဲရုပ်သေးဇွန်ဘီတစ်ကောင်ကို ဟင်းသီးဟင်းရွက် မျိုးစေ့များ စိုက်ပျိုးရာတွင် ကူညီပေးပြန်သည်။

ယခုအချိန်တွင် ကျောက်လင်းသည် ဤခြံဝင်းအတွင်းရှိ လူနေမှုဘဝတွင် လုံးဝဥဿုံ ပေါင်းစည်းသွားပုံရပြီး ခြံ၏ အဖွဲ့ဝင်တစ်ဦးသဖွယ် ဖြစ်လာခဲ့ပြီဖြစ်သည်။ သူမ၏ ဘေးပတ်လည်တွင် စကားမပြောနိုင်ဘဲ တိတ်ဆိတ်စွာ လှုပ်ရှားနေသော ရုပ်သေးဇွန်ဘီများ ဝန်းရံနေသော်လည်း သူမ ဂရုမစိုက်တော့ပေ။

မနီးမဝေးရှိ ခရမ်းချဉ်သီးရွက်ပေါ်တွင် နားနေသော ပျားငယ်လေးတစ်ကောင်သည်လည်း သူမ၏ အပြုအမူများကို စောင့်ကြည့်ပြီးနောက် တောင်ပံများကို ခတ်ကာ တိတ်ဆိတ်စွာ ပျံသန်းထွက်ခွာသွားတော့သည်။

အခန်းအတွင်း၌ ကျိရုရွှယ်သည် ပျားငယ်လေး၏ အမြင်အာရုံမှတစ်ဆင့် ကျောက်လင်းကို စောင့်ကြည့်နေရင်း သူမ၏ နှုတ်ခမ်းအစုံမှာ အနည်းငယ် ကွေးညွှတ်သွားကာ ပြုံးယောင်သန်းသွားတော့သည်။

ဤကာလအတွင်း ကျောက်လင်း၏ အပြုအမူများအပေါ် သူမ တော်တော်လေး ကျေနပ်မိသည်။ အကြိမ်ကြိမ် တိတ်တဆိတ် စောင့်ကြည့်ခဲ့သော်လည်း ကျောက်လင်းထံမှ မသင်္ကာဖွယ်ရာ သို့မဟုတ် ပုံမှန်မဟုတ်သော လုပ်ရပ်မျိုး တစ်ခုတစ်လေမျှ မတွေ့ရှိခဲ့ရပေ။ ကျောက်လင်း၏ နေ့စဉ်ဘဝမှာ အလွန်ပင် စနစ်ကျလွန်းလှသည်။ စားသောက်ခြင်း၊ အိပ်စက်ခြင်းနှင့် လေ့ကျင့်ခန်းလုပ်ခြင်းတို့အပြင် ကျန်ရှိသော အချိန်များကို ခြံအလုပ်များ ကူညီပေးခြင်းဖြင့်သာ ကုန်ဆုံးစေခဲ့သည်။

ဟင်းသီးဟင်းရွက်ခင်းများထဲမှ ပေါင်းပင်များ ရှင်းလင်းပေးခြင်း၊ ဆင့်ကဲဇွန်ဘီများကို ကူညီ၍ သစ်သီးခြံအတွင်းမှ မှည့်ဝင်းနေသော အသီးအနှံများ ဆွတ်ခူးပေးခြင်းနှင့် ဧည့်ခန်းကို သန့်ရှင်းရေးလုပ်ပေးခြင်း...

ကောင်းကင်ယံတွင် ပျံသန်းနေသော ပျားငယ်လေး၏ အမြင်မှတစ်ဆင့် ဟင်းသီးဟင်းရွက်ခင်းထဲတွင် အလုပ်ရှုပ်နေသော ကျောက်လင်းကို ကြည့်ရင်း ကျိရုရွှယ်၏ မျက်ဝန်းများမှာ အရောင်တောက်လာသည်။ ယခုဆိုလျှင် ကျောက်လင်းသည် သူမ၏ ကနဦးစစ်ဆေးမှုကို အောင်မြင်စွာ ကျော်ဖြတ်နိုင်ခဲ့ပြီ ဖြစ်သည်။ ကျောက်လင်းအား စနစ်တကျ ပျိုးထောင်ပေးရန် အချိန်တန်ပြီဟု သူမ တွေးတောမိလိုက်သည်။

တစ်ချိန်တည်းမှာပင် လုချွမ်းသည်လည်း ကျိရုရွှယ်ကဲ့သို့ပင် ကျောက်လင်းကို အပြင်းအထန် စောင့်ကြည့်ပြီးနောက်တွင် သူမအပေါ် ထားရှိသော သတိဝီရိယကို အနည်းငယ် လျှော့ချလိုက်သည်။ အနည်းဆုံးတော့ ယခုအချိန်အထိ ကျောက်လင်းထံတွင် အမှားအယွင်း တစ်စုံတစ်ရာ မတွေ့ရသေးပေ။

ထို့အပြင် ချီချီလေးမှာလည်း ယခုအခါ သူမကိုယ်ကိုယ် ကာကွယ်နိုင်စွမ်း ရှိနေပြီဖြစ်ရာ သာမန်ဆင့်ကဲပြောင်းလဲသူ အများစုမှာ ချီချီလေးကို ယှဉ်နိုင်လိမ့်မည် မဟုတ်ပေ။ အကယ်၍ ချီချီလေး ရှုံးနိမ့်သွားလျှင်ပင် သူမ၏ စိတ်စွမ်းအင်ကို အသုံးပြု၍ အလွယ်တကူ ထွက်ပြေးလွတ်မြောက်နိုင်စွမ်း ရှိသည်။ ထို့ကြောင့် ကျောက်လင်း၏ လက်ရှိစွမ်းရည်ဖြင့် ဤခြံဝင်းအတွင်း ဒုက္ခပေးရန်မှာ မဖြစ်နိုင်သလောက်ပင်။

အကယ်၍ သူမ ထွက်ပြေးလိုပါက အလွှာလိုက် ဝန်းရံထားသော ရုပ်သေးဇွန်ဘီများကို ဖြတ်ကျော်ရန်အတွက် ချီချီလေးကို ဓားစာခံအဖြစ် ဖမ်းဆီးပြီး လုချွမ်းကို ခြိမ်းခြောက်ရန်သာ နည်းလမ်းရှိတော့သည်။ သို့သော် ချီချီလေးက ကိုယ့်ကိုယ်ကိုယ် ကာကွယ်နိုင်နေပြီဖြစ်ရာ ကျောက်လင်းအတွက် ထွက်ပြေးရန် အခွင့်အရေး လုံးဝမရှိတော့ပေ။

လုချွမ်းသည် ဟင်းသီးဟင်းရွက်ခင်းထဲမှ ကျောက်လင်းကို ခေတ္တမျှ ကြည့်ရှုပြီးနောက် အာရုံလွှဲလိုက်သည်။ ယခုအခါ သူသည် ဧည့်ခန်းထဲတွင် ထိုင်နေရင်း အဝါရောင်နဂါးတောင်ရှိ ရုပ်သေးဇွန်ဘီစစ်တပ်ကို စိတ်ဖြင့် ထိန်းချုပ်ကာ ဆင့်ကဲသားရဲကြီးများကို ဆက်လက် အမဲလိုက်ခိုင်းနေတော့သည်။

သားရဲတိရစ္ဆာန်များကို ရုပ်သေးဇွန်ဘီစစ်တပ်က တစ်ကောင်ပြီးတစ်ကောင် သုတ်သင်ရှင်းလင်းနေပြီး ၎င်းတို့၏ ခန္ဓာကိုယ်အတွင်းမှ အမြုတေများကို ထုတ်ယူကာ အသားများကိုလည်း ယာဉ်များပေါ်သို့ အဆက်မပြတ် တင်ဆောင်နေကြသည်။

လုချွမ်း၏ တွက်ချက်မှုအရ မကြာမီအချိန်အတွင်းမှာပင် ဇွန်ဘီသားဖောက်ရာဌာနသည် တတိယအကြိမ်မြောက် အသီးအပွင့်များကို ရိတ်သိမ်းရန် အသင့်ဖြစ်တော့မည်ဖြစ်သည်။

...

တစ်ချိန်တည်းမှာပင် အခန်းအတွင်း၌ ကျိရုရွှယ်သည် ကုတင်ပေါ်တွင် တင်ပလ္လင်ခွေထိုင်ရင်း အတွေးနက်နေမိသည်။ ကျောက်လင်းသည် ကြီးမားသော အလားအလာရှိသူဖြစ်ရာ သူမကို ပျိုးထောင်ပေးခြင်းဖြင့် နောင်တစ်ချိန်တွင် သူမအတွက် များစွာအကျိုးရှိနိုင်မည်မှာ အမှန်ပင်။

ဒါပေမဲ့ သူမကို ဘယ်လိုမျိုး ပျိုးထောင်ပေးရမလဲ ...

အမှန်စင်စစ် ကျိရုရွှယ်သည် ကျောက်လင်းကို ကျင့်စဉ်တစ်ခု သင်ကြားပေးရန် ယခင်ကတည်းက ကြံစည်ထားခဲ့ဖူးသည်။ ဆင့်ကဲပြောင်းလဲသူတစ်ဦးအနေဖြင့် အင်အားကို လျင်မြန်စွာ တိုးတက်လိုပါက ဆင့်ကဲပြောင်းလဲမှုဆေးရည်များအပြင် ပြင်ပစွမ်းအင်များကို လျင်မြန်စွာ စုပ်ယူနိုင်မည့် ကျင့်စဉ်ကို အသုံးပြုခြင်းမှာ အကောင်းဆုံးနှင့် အတည်ငြိမ်ဆုံး နည်းလမ်းဖြစ်သည်။

ကျင့်စဉ်တစ်ခုသာ ရှိခဲ့လျှင် ကျောက်လင်းသည် လျင်မြန်စွာ အစွမ်းထက်လာမည်ဖြစ်ပြီး သူမ၏ ထူးခြားသော ပြန်လည်ရှင်သန်ခြင်းစွမ်းရည်နှင့် ပေါင်းစပ်လိုက်ပါက တိုတောင်းသော အချိန်ကာလအတွင်းမှာပင် အမြင့်ဆုံး အခြေအနေတစ်ခုသို့ ရောက်ရှိသွားနိုင်သည်။

အကယ်၍ အခြေအနေများက ထိုအတိုင်း ဖြစ်လာခဲ့လျှင် ကျိရုရွှယ်အတွက် ကောင်းမွန်သော ကိစ္စတစ်ရပ် ဖြစ်ပေလိမ့်မည်။ သို့သော် လူ့စိတ်ဆိုသည်မှာ ခန့်မှန်းရ ခက်ခဲလှသည်။ ယခုအချိန်တွင် ကျောက်လင်းသည် ခြံဝင်းအတွင်းရှိ ဘဝတွင် ပေါင်းစည်းနေသည်ဟု ထင်ရသော်လည်း နောင်တစ်ချိန်တွင် သူမက ရန်သူအဖြစ် ပြောင်းလဲမသွားဘူးဟု မည်သူက အာမခံနိုင်မှာလဲ။

ကျောက်လင်းသည် မည်သို့ပင်ဆိုစေကာမူ လူသားတစ်ဦးသာ ဖြစ်သည်။ ဇွန်ဘီများနှင့် မူလဗီဇချင်း မတူညီပေ။ ယခုအချိန်တွင် ဇွန်ဘီများဘက်မှ ရပ်တည်နေသော်လည်း နောင်တစ်ချိန် အင်အားကြီးမားလာချိန်တွင်မူ သဘောထား ပြောင်းလဲသွားနိုင်သည်။ အကယ်၍ တစ်နေ့တွင် ကျောက်လင်းသည် ခြံဝင်းအပေါ် သစ္စာဖောက်ခဲ့ပါက မတွေးဝံ့စရာ အကျိုးဆက်များ ဖြစ်ပေါ်လာပေလိမ့်မည်။ အဆုံးသတ်တွင် ကျိရုရွှယ်သည် သူမကိုယ်တိုင်အတွက် ရန်သူတစ်ဦးကို မွေးမြူခြင်းမျိုး မဖြစ်စေလိုပေ။

“လူ့သဘာဝဆိုတာ တကယ်ကို ခန့်မှန်းရ ခက်တာပဲ”

ယခင်ဘဝက ကြုံတွေ့ခဲ့ရသော ခါးသီးသည့် အတွေ့အကြုံများကို ပြန်လည်အမှတ်ရမိရင်း ကျိရုရွှယ်သည် သက်ပြင်းတစ်ချက်ချကာ လက်လျှော့အရှုံးပေးသကဲ့သို့ ခေါင်းကိုသာ ရမ်းနေမိတော့သည်။

သူမကိုယ်တိုင်အတွက် ရန်သူတစ်ဦးကို မွေးမြူမိမည်ကို စိုးရိမ်နေမိသော်လည်း ကျောက်လင်း၏ ပါရမီနှင့် အလားအလာမှာ အမှန်တကယ်ပင် နှမြောစရာကောင်းလှသည်။ ထို့ကြောင့် စိုးရိမ်စိတ်များ ရှိနေလင့်ကစား ကျောက်လင်းအား ပျိုးထောင်ပေးမည့် အစီအစဉ်ကို သူမ လုံးဝစွန့်လွှတ်လိုက်ခြင်း မရှိပေ။

ယခုအခါ သူမအတွက် လိုအပ်နေသည်မှာ နှစ်ဦးနှစ်ဖက် အကျိုးရှိစေမည့်ဗျူဟာတစ်ခု ဖြစ်သည်။ ကျောက်လင်းအား အစွမ်းထက်လာအောင် ပျိုးထောင်ပေးနိုင်ရမည်ဖြစ်သလို တစ်ဖက်မှလည်း သူမအား အမြဲတမ်း ထိန်းချုပ်ထားနိုင်ပြီး သစ္စာဖောက်မှုအတွက် စိုးရိမ်စရာမလိုသည့် နည်းလမ်းမျိုးကို ရှာဖွေရမည်ဖြစ်သည်။ ကျောက်လင်း၏ အနာဂတ်ကို သူမ၏ လက်ခုပ်ထဲတွင် ထားရှိနိုင်ရမည်ဖြစ်ပြီး ကျောက်လင်းအနေဖြင့် သဘောထားကွဲလွဲမှုများ ရှိလာခဲ့လျှင်ပင် လက်တွေ့တွင် မည်သည့်အရာမျှ မလုပ်ဆောင်ရဲအောင် ဖန်တီးရပေလိမ့်မည်။

အတန်ကြာ စဉ်းစားပြီးနောက် ကျိရုရွှယ်၏ မျက်ဝန်းများမှာ ရုတ်တရက် ဝင်းလက်သွားခဲ့သည်။

ရပြီ နည်းလမ်းတွေ့ပြီ။

သူမ ကျောက်လင်းကို သင်ကြားပေးရန်အတွက် ယခင်ဘဝက သူမကိုယ်တိုင် ရရှိခဲ့သော ထူးခြားသည့် ကျင့်စဉ်တစ်ခုကို သတိရသွားခြင်းပင်။ ဤကျင့်စဉ်မှာ ကျောက်လင်းအား အစွမ်းထက်လာစေရန် အကောင်းဆုံး အထောက်အပံ့ပေးနိုင်ရုံသာမက ၎င်း၏ ထူးခြားသော ဝိသေသလက္ခဏာများကြောင့် ကျိရုရွှယ်အနေဖြင့် ကျောက်လင်းအပေါ် အပြည့်အဝ လွှမ်းမိုးထားနိုင်မည်ဖြစ်သည်။

ကျိရုရွှယ်၏ စိတ်ထဲတွင် ကျင့်စဉ်တစ်ခု ပေါ်လာသည်။

ကိုးပါးသောဓာတ် စွမ်းအင်သန့်စင်ခြင်း ကျင့်စဉ်….

ဤကျင့်စဉ်သည် လူသားတို့၏ စွမ်းအင်စီးဆင်းရာ သွေးကြောမျှင်များကို အံ့အားသင့်ဖွယ် ကောင်းလောက်အောင် ပြန်လည်ပြုပြင် တည်ဆောက်ပေးနိုင်စွမ်း ရှိသည်။ ကိုယ်တွင်းရှိ စွမ်းအင်လမ်းကြောင်းများကို ကျယ်ပြန့်စေပြီး ပြုပြင်ပြောင်းလဲပေးနိုင်သဖြင့် အဆင့်တူ ဆင့်ကဲပြောင်းလဲသူများထက် များစွာသာလွန်သော စွမ်းအားကို ပိုင်ဆိုင်စေမည်ဖြစ်သည်။

သို့သော် ဤကျင့်စဉ်တွင် အားနည်းချက်တစ်ခု ရှိသည်။ ၎င်းကို စတင်ကျင့်ကြံပြီးပါက အခြားကျင့်စဉ်တစ်ခုသို့ ပြောင်းလဲရန်မှာ အလွန်ပင် ခက်ခဲလှသည်။ အကယ်၍ အတင်းအကျပ် ပြောင်းလဲရန် ကြိုးစားခဲ့ပါက စွမ်းအင်စီးဆင်းရာ လမ်းကြောင်းများ ပေါက်ကွဲပြီး ရုတ်တရက် သေဆုံးနိုင်သည့် အန္တရာယ်ရှိသည်။ ကျောက်လင်းသည် အကြိမ်ကြိမ် ပြန်လည်ရှင်သန်နိုင်သည်ဆိုသော်လည်း ဤကျင့်စဉ်၏ အမှတ်အသားများမှာ သူမ၏ ဝိညာဉ်ထဲတွင် စွဲထင်ကျန်ရစ်နေမည်ဖြစ်သည်။

ထို့ကြောင့် ကျိရုရွှယ်သည် ဤကျင့်စဉ်၏ ပထမနှစ်ဝက်ကိုသာ ကျောက်လင်းအား သင်ကြားပေးရန် စီစဉ်လိုက်သည်။ ကျောက်လင်းအနေဖြင့် အနာဂတ်တွင် ပိုမိုမြင့်မားသော အဆင့်အတန်းများသို့ တက်လှမ်းလိုပါက ကျိရုရွှယ်ထံမှ ဒုတိယနှစ်ဝက်ကျင့်စဉ်ကို ရယူရန်မှတစ်ပါး အခြားနည်းလမ်းမရှိပေ။

ဤနည်းဖြင့် ကျောက်လင်းသည် သူမ၏ ထိန်းချုပ်မှုအောက်တွင် မလွဲမသွေ ရှိနေပေလိမ့်မည်။

ထိုသို့ တွေးတောမိလိုက်သည်နှင့် ကျိရုရွှယ်၏ နှုတ်ခမ်းများမှာ ကွေးညွှတ်ကာ ပြုံးလိုက်မိသည်။ ကျောက်လင်းအား ပျိုးထောင်ပေးရန် ကိစ္စမှာ ပြေလည်သွားခဲ့ပြီဖြစ်သည်။ မကြာမီ အချိန်အတွင်းမှာပင် သူမ၏ လက်အောက်တွင် အစွမ်းထက်သော လက်ရုံးတစ်ဦး ရှိလာမည်ဖြစ်ရာ လူသားအခြေစိုက်စခန်းများမှ ခြိမ်းခြောက်မှုများကို ရင်ဆိုင်ရန် ပိုမိုယုံကြည်မှု ရှိလာတော့သည်။