အခန်း (၂၁၃-၂၁၄)

အခန်း (၂၁၃) - အဆင့် (၂) ထွက်ပြေးခြင်းအင်းနှင့် သတ္တမအဆင့် အခွင့်အရေးကို ရရှိခြင်း။

ဖုန်မှုန့်များ ငြိမ်သက်သွားရန် သိပ်မကြာလိုက်ပေ။

သို့သော် ကျန်းဖန်မှာမူ မယိုင်မလဲဘဲ မတ်မတ်ရပ်နေဆဲဖြစ်ကာ ဒဏ်ရာတစ်စုံတစ်ရာပင် ရရှိထားပုံမပေါ်ပေ။

သူ၏ ပတ်ဝန်းကျင်ရှိ အရှိန်အဝါမှာလည်း ဖျက်ဆီး၍မရနိုင်သော အရာတစ်ခုကဲ့သို့ အားမာန်အပြည့် ရှိနေဆဲပင်။

အကြောင်းမှာ 'မိုးကြိုးမီးလျှံ ရွှေဆေးလုံး' ၏ ဖျက်ဆီးနိုင်စွမ်းကို ကာကွယ်ရေးအင်းက အပြည့်အဝ ပိတ်ဆို့ထားနိုင်ခဲ့ခြင်းကြောင့် ဖြစ်သည်။ ထိုပေါက်ကွဲမှုမှာ သူ၏ ခန္ဓာကိုယ်ကို ထိခိုက်စေရန် နည်းလမ်းမရှိခဲ့ပေ။

သို့သော်ငြားလည်း ထိုဆေးလုံး၏ ဖျက်ဆီးနိုင်စွမ်းကိုတော့ အသိအမှတ် ပြုရပေလိမ့်မည်။

သူ၏ ကိုယ်ပေါ်တွင် ဝန်းရံထားသော မူလဝိညာဉ်စွမ်းအား ဒိုင်းသုံးထပ်လုံးမှာ ထိုစွမ်းအားကို မခံနိုင်ဘဲ တစ်ခုပြီးတစ်ခု ကွဲအက်ပျက်စီးသွားခဲ့ရသည်။

အကယ်၍သာ သာမန် 'ချီ' ကျင့်ကြံခြင်း အဆင့် (၈) ကျင့်ကြံသူ တစ်ဦးသာဆိုပါက အစိတ်စိတ်အမွှာမွှာ ပေါက်ကွဲသွားမည်မှာ သေချာလှသည်။

အနည်းဆုံးတော့ ဒဏ်ရာအပြင်းအထန် ရရှိပေလိမ့်မည်။ ယခုကဲ့သို့ အေးအေးဆေးဆေး ဘာမှမဖြစ်ဘဲ နေနိုင်ရန်မှာ လုံးဝ မဖြစ်နိုင်ပေ။

"မဖြစ်နိုင်တာ... မင်းက တကယ်ပဲ ဘယ်သူလဲ"

"ငါ့ရဲ့ မိုးကြိုးမီးလျှံ ရွှေဆေးလုံးကိုတောင် မင်းက ခံနိုင်ရည်ရှိတယ် ဟုတ်လား"

"မင်းက ဘယ်ဂိုဏ်းက တိုက်ရိုက်တပည့်လဲ"

ဤမြင်ကွင်းကို မြင်လိုက်ရသောအခါ ဝူဖုန်းမှာ ကြက်သီးမွေးညင်းများ ထသွားရပြီး မိမိ၏ မျက်စိကိုပင် မယုံကြည်နိုင်အောင် ဖြစ်သွားရသည်။

သူသည် ထိုဆေးလုံးကို ဝယ်ယူရန် ငွေအမြောက်အမြား အကုန်အကျခံခဲ့ရခြင်း ဖြစ်ပြီး အဆင့်တူ ကျင့်ကြံသူများကြားတွင် ပြိုင်ဘက်ကင်းသည်ဟု အပြောခံခဲ့ရခြင်း ဖြစ်သည်။

၎င်းပေါက်ကွဲပါက အဆင်သင့် မဖြစ်သေးသော အုတ်မြစ်တည်ဆောက်ခြင်း အဆင့် ကျင့်ကြံသူတစ်ဦးပင် ဒဏ်ရာရနိုင်သည် မဟုတ်ပါလား။

သို့သော် ယခုမူ ဤလူငယ်က မည်သည့်နည်းလမ်းကို သုံးလိုက်သည် မသိဘဲ အစအနပင် မကျန်ဘဲ လွတ်မြောက်သွားခဲ့ချေပြီ။

ဝူဖုန်းသည် ဤလူငယ်၏ နည်းလမ်းများမှာ သူထင်ထားသည်ထက် များစွာ ပိုမိုကြောက်စရာကောင်းကြောင်း ရိပ်မိသွားတော့သည်။

ထိုခဏတွင် သူ၏ ရင်ထဲ၌ ထွက်ပြေးလိုသော စိတ်များ အပြင်းအထန် ပေါ်ပေါက်လာခဲ့၏။ သူ၏ နည်းဗျူဟာအားလုံးမှာ ကုန်ဆုံးသွားခဲ့ပြီဖြစ်ရာ ဤကောင်လေးကို သူ မည်သို့မျှ မယှဉ်နိုင်တော့ပေ။

"မှန်တယ်... ဒီကမ္ဘာပေါ်က ကျင့်ကြံသူတွေကို အထင်သေးလို့ မရဘူးပဲ"

"အုတ်မြစ်တည်ဆောက်ခြင်း အဆင့် မျိုးနွယ်စုက ကျင့်ကြံသူလေး တစ်ယောက်က ငါ့ကို ခြိမ်းခြောက်နိုင်လိမ့်မယ်လို့ ငါ မထင်ထားခဲ့ဘူး။ သေပေတော့"

ကျန်းဖန်၏ မျက်လုံးများမှာ အေးစက်သော အလင်းတန်းများဖြင့် တောက်လောင်နေသည်။

သူသည် ဤနှစ်ဦးကို မည်သည့် အခွင့်အရေးမျှ ထပ်ပေးရန် ဆန္ဒမရှိတော့ပေ။ သူသည် သူ၏ အသက်သွေးကြောအင်းဖြစ်သော ကြာပြာမြေမီးလျှံအင်းကို ချက်ချင်း နှိုးဆွလိုက်သည်။

မျက်တောင်တစ်ခတ် အတွင်းမှာပင် စိမ်းပြာရောင် မီးလုံးနှစ်လုံးမှာ ကျည်ဆံများကဲ့သို့ ထွက်ပေါ်လာပြီး ဝူဖုန်းနှင့် ဟဲလုတို့၏ အရှိန်အဝါကို ပစ်မှတ်ထားကာ တိုးဝင်သွားတော့သည်။

ထိုမီးလျှံကျည်ဆံများကို အသံထက်မြန်သော အရှိန်ဖြင့် ပစ်ခတ်လိုက်ခြင်း ဖြစ်သည်။

"မကောင်းတော့ဘူး"

ဘေးအန္တရာယ် အငွေ့အသက်ကို အာရုံခံမိလိုက်သောအခါ ဝူဖုန်းသည် သေဘေးနီးနေပြီ ဖြစ်ကြောင်း သိလိုက်ရသဖြင့် မဆိုင်းမတွဘဲ သူ၏ ကိုယ်ပေါ်မှ အဆင့် (၂) ထွက်ပြေးခြင်းအင်းကို ထုတ်ယူလိုက်သည်။

၎င်းမှာ သူ ငွေအမြောက်အမြားပေး၍ ဝယ်ယူထားခဲ့သော အဖိုးတန်အင်းဖြစ်သလို သူ၏ နောက်ဆုံးလက်နက်လည်း ဖြစ်သည်။

မူလက အဆင့် (၂) မိစ္ဆာသားရဲနှင့် တွေ့မှ သုံးရန် ရည်ရွယ်ထားခဲ့၏။ ယခုလို 'ချီ' ကျင့်ကြံခြင်း အဆင့် (၈) ကျင့်ကြံသူတစ်ဦးက သူ့ကို ဤအခြေအနေအထိ တွန်းပို့လိုက်လိမ့်မည်ဟု သူ မထင်ထားခဲ့ပေ။

ရှပ်

နောက်တစ်စက္ကန့် အကြာတွင် အဆင့် (၂) ထွက်ပြေးခြင်းအင်း၏ စွမ်းအားမှာ ပေါက်ကွဲထွက်လာပြီး ဝူဖုန်းကို ဖြူစင်သော အလင်းတန်းများဖြင့် ဖုံးလွှမ်းသွားစေသည်။

ထိုအခါ ဝူဖုန်း၏ ခန္ဓာကိုယ်တစ်ခုလုံးမှာ အလင်းတန်း တစ်ခုအသွင် ပြောင်းလဲသွားပြီး မယုံနိုင်စရာ အရှိန်အဟုန်ဖြင့် ပျောက်ကွယ်သွားတော့သည်။

ကြာပြာမြေမီးလျှံပင်လျှင် ထိုအရှိန်ကို မမီလိုက်ပေ။

မျက်စိတစ်မှိတ်အတွင်းမှာပင် ဝူဖုန်းမှာ ထိုနေရာမှ လုံးဝ ပျောက်ကွယ်သွားခဲ့ချေပြီ။

သို့သော်လည်း ဝူဖုန်း လွတ်မြောက်သွားသော်လည်း သူ၏ ဇနီးဖြစ်သူ ဟဲလုမှာမူ ထိုမျှ ကံမကောင်းခဲ့ပေ။

ဘုန်း

စိမ်းပြာရောင် မီးလျှံကျည်ဆံမှာ ဟဲလုကို ထိမှန်သွားပြီး ချက်ချင်း ပေါက်ကွဲသွားတော့၏။

တစ်ခဏအတွင်းမှာပင် 'ချီ' ကျင့်ကြံခြင်း အဆင့် (၈) အမျိုးသမီးကျင့်ကြံသူ ဟဲလုမှာ ကြာပြာမြေမီးလျှံအတွင်း နစ်မြုပ်သွားခဲ့ရပြီး ရုန်းပင်မရုန်းနိုင်ဘဲ ပြာအတိ ဖြစ်သွားခဲ့ရလေတော့သည်။

သိသာလှသည်မှာ ဤကျင့်ကြံသူ လေးဦးအနက် သုံးဦးမှာ သေဆုံးသွားခဲ့ပြီး တစ်ဦးသာ လွတ်မြောက်သွားခြင်း ဖြစ်သည်။

"သူ လွတ်သွားတာလား..."

ကျန်းဖန်သည် မျက်မှောင်ကြုတ်လိုက်မိသည်။

သူသည် လိုက်လံဖမ်းဆီးရန် ကြံစည်သော်လည်း အဆင့် (၂) ထွက်ပြေးခြင်းအင်း၏ အရှိန်မှာ အလွန်မြန်လှသဖြင့် အုတ်မြစ်တည်ဆောက်ခြင်းအဆင့် ကျင့်ကြံသူ၏ အရှိန်ထက်ပင် မနိမ့်ပေ။

တစ်ခဏချင်းမှာပင် ဝူဖုန်း၏ အရှိန်အဝါမှာ သူ၏ အာရုံထဲမှ လုံးဝ ပျောက်ကွယ်သွားခဲ့ပြီ ဖြစ်သဖြင့် မည်သည့်ဘက်သို့ ပြေးသွားသည်ကိုပင် မသိနိုင်တော့ပေ။

ဝူဖုန်းကို အရှင်ထားလိုက်ခြင်းမှာ နောင်တစ်ချိန်တွင် ပြဿနာကြီးတစ်ခု ဖြစ်လာနိုင်ကြောင်း သူ သိသော်လည်း အခုလောလောဆယ်တွင် သူ ဘာမှ မတတ်နိုင်တော့ပါ။

ဤကမ္ဘာပေါ်ရှိ ကျင့်ကြံသူများ၏ နည်းလမ်းများမှာ အမြဲတမ်း ပြောင်းလဲနေတတ်သဖြင့် အရာအားလုံးမှာ ကိုယ်ထင်သလို ဖြစ်မလာတတ်ပေ။

ကျင့်ကြံသူ သုံးဦးကို သတ်နိုင်ခဲ့ခြင်းကပင်လျှင် တော်တော်လေး အားရစရာ ကောင်းလှပေပြီ။ ဝူဖုန်းနှင့် ပတ်သက်၍မူ နောက်တစ်ကြိမ် ပြန်တွေ့ခဲ့လျှင်တော့ ဧကန်မုချ နှိမ်နင်းရပေလိမ့်မည်။

"ယောကျာ်း..."

ထိုအချိန်တွင် စုဝေဝေသည် ဂူအတွင်းမှ ထွက်လာခဲ့သည်။ သူမသည် အပြင်ဘက်မှ အရှိန်အဝါများကို အာရုံခံမိလိုက်သဖြင့် တိုက်ပွဲပြီးဆုံးသွားပြီ ဖြစ်ကြောင်း သိလိုက်ရခြင်း ဖြစ်သည်။

မြေပြင်ပေါ်ရှိ အလောင်းများနှင့် ပျက်စီးနေသော ပတ်ဝန်းကျင်ကို ကြည့်ရင်း တိုက်ပွဲ မည်မျှ ပြင်းထန်ခဲ့ကြောင်း သူမ ရိပ်မိလိုက်သည်။

အချိန်မကြာသော်လည်း အမှန်တကယ်ပင် အသက်နှင့်လဲရသော တိုက်ပွဲတစ်ခု မဟုတ်ပါလား။

"စိတ်မကောင်းစရာက ဝူဖုန်းကတော့ လွတ်သွားတယ်"

ကျန်းဖန်က ခုနက ဖြစ်ပျက်ခဲ့သမျှကို အသေးစိတ် ပြန်ပြောပြလိုက်သည်။

"ဒီလူတွေက တကယ်ကို ယုတ်မာလွန်းတာပဲ"

"သူတို့ရဲ့ ကိုယ်ကျိုးအတွက်နဲ့ ဒီလောက်များတဲ့ လေလွင့်ကျင့်ကြံသူတွေကို သတ်ပစ်ကြတယ်ပေါ့။ သူတို့ကတော့ အကြိမ်ပေါင်း တစ်ထောင်လောက် သေရင်တောင် မကျေနိုင်စရာပဲ"

"မိတ်ဆွေ ဖန့်ဝေရဲ့ မိသားစုရော ဘာဖြစ်သွားပြီလဲ မသိဘူးနော်" ဟု စုဝေဝေက အံကြိတ်ရင်း ပြောလိုက်သည်။

အဆင့် (၂) မိစ္ဆာသားရဲ 'ရွှေအကြေးခွံသားရဲ' ပေါ်လာခြင်းမှာ ဝူဖုန်းတို့၏ ကြံစည်မှုဖြစ်ကြောင်း သူမ အခုမှ သဘောပေါက်သွားခြင်း ဖြစ်သည်။

သူတို့သည် 'ဓားငှား၍ လူသတ်ခြင်း' နည်းဗျူဟာကို သုံးကာ ကျင့်ကြံသူများ၏ ပိုင်ဆိုင်မှုများကို လုယူရန် ကြံစည်ခဲ့ကြခြင်းပင်။ တကယ့်ကို ယုတ်မာလှပေသည်။

"သက်ပြင်းချစရာပဲ... အဲဒါက အဆင့် (၂) မိစ္ဆာသားရဲလေ"

"ဖန့်ဝေတို့ မိသားစုလည်း ကံကြမ္မာဆိုးနဲ့ ရင်ဆိုင်နေရလောက်ပြီ ထင်တယ်" ဟု ကျန်းဖန်က အားကိုးရာမဲ့စွာ ဆိုလိုက်သည်။

သူသည် ဖန့်ဝေတို့ကို ကယ်တင်ချင်သော်လည်း အဆင့် (၂) သားရဲကြီး၏ ရှေ့တွင် သူကိုယ်တိုင်ပင်လျှင် ပုရွက်ဆိတ်ကြီး တစ်ကောင်ထက် မပိုပေ။

မိမိကိုယ်ကိုယ်နှင့် စုဝေဝေကို ကာကွယ်နိုင်ရန်ကိုပင် သူ အစွမ်းကုန် ကြိုးစားခဲ့ရခြင်း ဖြစ်သည်။ အခြားသူများကို ကူညီရန်မှာမူ လုံးဝ မဖြစ်နိုင်သေးပေ။

သူ လုပ်နိုင်သည်မှာ ဖန့်ဝေတို့ မိသားစု ကံကောင်းပြီး ထိုသားရဲကြီး၏ လက်မှ လွတ်မြောက်ပါစေဟု ဆုတောင်းပေးရန်သာ ရှိလေတော့သည်။

…..

အခန်း (၂၁၄) - အဆင့် (၂) ထွက်ပြေးခြင်းအင်းနှင့် သတ္တမအဆင့် အခွင့်အရေးကို ရရှိခြင်း (အပိုင်း ၂)

ဖန့်ဝေတို့ မိသားစု အသက်ရှင်ဖို့ဆိုသည်မှာ အမှန်တကယ်တော့ မဖြစ်နိုင်သလောက်ပင်။

"ဒါဆို ငါတို့ ဘယ်တော့လောက်မှ ပြန်သွားကြည့်ကြမလဲ" ဟု စုဝေဝေက မေးလိုက်သည်။

"မလောပါနဲ့ဦး"

"အဲဒီ အဆင့် (၂) မိစ္ဆာသားရဲ 'ရွှေအကြေးခွံသားရဲ' က အဲဒီနားကနေ ထွက်သွားဦးမှာ မဟုတ်ဘူး။ သူ အရင်ထွက်သွားတဲ့အထိ စောင့်ကြတာပေါ့" ဟု ကျန်းဖန်က ဆိုလိုက်သည်။

သူသည် လက်ကို ဝှေ့ယမ်းလိုက်ပြီး မြေပြင်ပေါ်ရှိ ဝိညာဉ်သိုလှောင်အိတ် သုံးအိတ်ကို ချက်ချင်း သိမ်းဆည်းလိုက်သည်။ ထိုသူတို့မှာ အဆင့် (၈) ကျင့်ကြံသူများ ဖြစ်ကြသဖြင့် သူတို့၏ ပိုင်ဆိုင်မှုများမှာ အတော်လေး များပြားမည်မှာ သေချာလှသည်။

နာရီအနည်းငယ် ထပ်မံကုန်ဆုံးသွားခဲ့သည်။

ကျန်းဖန်သည် သူ၏ နိမိတ်ဖတ်အင်းကို တစ်ဖန် နှိုးဆွလိုက်ရာ သတင်းစကားတစ်ခု ထပ်မံ ပေါ်လာတော့သည်။

"ကံကောင်းခြင်း အနည်းငယ်"

သားရဲကြီး ထွက်သွားပြီ ဖြစ်ကြောင်းနှင့် ပြန်သွားလျှင် အန္တရာယ် မရှိနိုင်ကြောင်း သူ သိလိုက်ရသည်။

သို့သော် ပို၍စိတ်ချရစေရန် စုဝေဝေကို သူမ၏ 'ခြောက်တောင်ပံ အဆိပ်ပျား' များ စေလွှတ်ကာ အခြေအနေကို အရင်စစ်ဆေးခိုင်းလိုက်သည်။

ပျားများက သားရဲကြီး ထွက်သွားပြီ ဖြစ်ကြောင်း သတင်းပို့လာမှသာ ကျန်းဖန်သည် စုဝေဝေကို ခေါ်ကာ မူလနေရာသို့ ပြန်လာခဲ့တော့၏။

"ဒါ... ဒါက…"

စုဝေဝေ၏ မျက်ဝန်းအိမ်များမှာ တုန်လှုပ်မှုကြောင့် ကျဉ်းမြောင်းသွားရသည်။ သူမ၏ ရှေ့မှ မြင်ကွင်းမှာ တကယ့်ကို ရက်စက်လွန်းလှပေသည်။

ကီလိုမီတာ တစ်ဝိုက်အတွင်းရှိ အရာအားလုံးမှာ မြေလှန်ဖျက်ဆီးခြင်း ခံထားရပြီး သွေးအိုင်များမှာ မြေပြင်အနှံ့ ဖုံးလွှမ်းနေ၏။ လေထုထဲတွင်လည်း ပြင်းထန်လှသော သွေးညှီနံ့များက ပြည့်နှက်နေသည်။

သစ်ပင်ကြီးများမှာ ဒုံးကျည်ဖြင့် ပစ်ပေါက်ခံထားရသကဲ့သို့ အပိုင်းပိုင်း ပြတ်နေကြပြီး မြေပြင်ပေါ်တွင်လည်း ကိုယ်လက်အင်္ဂါ အစိတ်အပိုင်းများနှင့် ကျင့်ကြံသူများ၏ ဝတ်ရုံစုတ်များသာ ပြန့်ကျဲနေတော့သည်။

လေလွင့်ကျင့်ကြံသူ များသည် အသက်လုကာ ခုခံခဲ့ကြသော်လည်း အဆင့် (၂) သားရဲကြီး၏ ရှေ့တွင်တော့ အားကိုးရာမဲ့စွာဖြင့် တစ်ဖက်သတ် သတ်ဖြတ်ခြင်းကိုသာ ခံခဲ့ကြရချေပြီ။

"အစ်ကို... ဒါ ဖန့်ဝေရဲ့ အဝတ်အစားတွေ မဟုတ်လား"

"ဒါပေမဲ့ သူတို့ရဲ့ အလောင်းတွေက ဘယ်မှာလဲ" ဟု စုဝေဝေက အဝတ်အစားစုတ်များကို ကြည့်ရင်း တုန်လှုပ်စွာ မေးလိုက်သည်။

ဖန့်ဝေ၊ သူ၏ဇနီးနှင့် ကလေးနှစ်ဦးစလုံး သားရဲကြီး၏ လက်ချက်ကြောင့် အသက်ပျောက်သွားခဲ့ပြီ ဖြစ်ကြောင်းမှာ ငြင်းမရသော အမှန်တရားပင်။

"သူတို့အားလုံး အဲဒီ သားရဲကြီးရဲ့ ဝါးမြိုတာကို ခံလိုက်ရတာ ဖြစ်မှာပါ" ဟု ကျန်းဖန်က သက်ပြင်းချရင်း ဆိုလိုက်သည်။

ဖန့်ဝေနှင့် သူသည် သွေးသောက်ညီအစ်ကိုများ မဟုတ်ကြသော်လည်း ရိုးသားကြိုးစားလှသော မိတ်ဆွေကောင်းများ ဖြစ်ခဲ့ကြသည်။

အကယ်၍သာ ဝူဖုန်း၏ ယုတ်မာသော အကွက်ထဲ မဝင်ခဲ့လျှင် ဖန့်ဝေတို့ မိသားစုသည် သူတို့၏ သက်တမ်း ကုန်ဆုံးသည်အထိ အေးအေးချမ်းချမ်း နေသွားနိုင်ကြဦးမည် ဖြစ်သည်။

ဝူဖုန်းကိုသာ ပြန်တွေ့ခဲ့လျှင်တော့ ငရဲပြည်အထိ လိုက်ပို့ပစ်မည်ဟု ကျန်းဖန် ကြိတ်၍ ကြုံးဝါးလိုက်မိသည်။

"အစ်ကို... ဝိညာဉ်သိုလှောင်အိတ် တစ်ခုတစ်လေတောင် ဘာလို့ ရှာမတွေ့ရတာလဲ" ဟု စုဝေဝေက ဇဝေဇဝါဖြင့် မေးလိုက်သည်။

သေဆုံးသွားသော ကျင့်ကြံသူများ၏ သိုလှောင်အိတ်များကို ကောက်ယူကာ အသုံးချရန် သူမ မျှော်လင့်ထားသော်လည်း တစ်အိတ်မျှပင် မကျန်တော့ပေ။

"ငါတို့ထက် အရင်ရောက်တဲ့သူ မရှိနိုင်ဘူး။ ဆိုလိုတာက ဒီအိတ်တွေကို အဲဒီ သားရဲကြီးကပဲ ယူသွားတာ ဖြစ်ရမယ်" ဟု ကျန်းဖန်က လေးလေးနက်နက် ပြောလိုက်သည်။

"ဘာ... သားရဲက ယူသွားတာ ဟုတ်လား။ သားရဲတွေက ဗီဇအတိုင်းပဲ လုပ်တတ်တာ မဟုတ်ဘူးလား၊ သူတို့မှာ ဒီလောက် ဉာဏ်ရည်ရှိလို့လား"

"သာမန်သားရဲတွေဆိုရင်တော့ ဟုတ်ပါတယ်၊ ဒါပေမဲ့ အချို့ ထူးခြားတဲ့သားရဲတွေက အဆင့် (၂) ကို ရောက်သွားရင် ဉာဏ်အလင်းပွင့် လာတတ်ကြတယ်။ အဲဒီသားရဲကြီးကလည်း အိတ်တွေရဲ့ တန်ဖိုးကို သိလို့ အကုန်သိမ်းသွားတာ ဖြစ်မှာပဲ"

ကျန်းဖန်သည် ထိုသားရဲကြီး၏ အန္တရာယ်ရှိမှုကို ပိုမိုရိပ်မိသွားသည်။ ဤသားရဲကြီးသာ ဆက်လက်ကြီးထွားလာပါက ကျင့်ကြံသူများအတွက် ကြီးမားသော ခြိမ်းခြောက်မှု ဖြစ်လာပေလိမ့်မည်။

သူတို့သည် ထိုနေရာ၌ ဆက်မနေတော့ဘဲ လုံခြုံသော ဂူတစ်ခုကို ရှာဖွေကာ ညဘက်အတွက် ခိုလှုံလိုက်ကြတော့၏။

ဂူအတွင်းသို့ ရောက်သောအခါ ကျန်းဖန်သည် အသံလုံအင်းနှင့် အရှိန်အဝါဖျောက်အင်းများကို အသုံးပြုကာ သူတို့၏ တည်ရှိမှုကို ဖုံးကွယ်လိုက်သည်။

ထိုခဏတွင် သူ၏ အသိစိတ်အာရုံထဲသို့ သတင်းစကားတစ်ခု ထပ်မံ ရောက်ရှိလာတော့သည်။

"နိမိတ်ဖတ်အင်းကို အသုံးပြုကာ သေဘေးမှ လွတ်မြောက်ခဲ့ပြီး ဝူဖုန်းတို့၏ လုပ်ကြံမှုကို ဖော်ထုတ်နိုင်ခဲ့သည့် အတွက် သင်သည် ကံကောင်းခြင်းအမှတ် ခုနစ်ထောင်နှင့် သတ္တမအဆင့် အခွင့်အရေးတစ်ခုကို ရရှိခဲ့သည်။"

သူ၏ ကံကောင်းခြင်းအမှတ်များ တိုးလာရုံတင်မက သူ၏ နိမိတ်ဖတ်အင်းမှာလည်း ရွှေရောင်အလင်းတန်းများ ပိုမိုတောက်ပလာခဲ့သည်။

ပို၍ စိတ်လှုပ်ရှားစရာ ကောင်းသည်မှာ 'သတ္တမအဆင့် အခွင့်အရေး' ပင် ဖြစ်သည်။

သူ၏ အာရုံခံစားမှုအရ ထိုအခွင့်အရေးမှာ အနီးအနားမှာပင် ရှိနေပြီး နောက်နေ့တွင် ရရှိနိုင်မည် ဖြစ်သည်။

ကျန်းဖန်သည် 'ချီ' ကျင့်ကြံခြင်းအဆင့်မှာ ပြိုင်ဘက်ကင်းသလောက် ရှိနေပြီဖြစ်သော်လည်း အုတ်မြစ်တည်ဆောက်ခြင်းအဆင့် ရှေ့တွင်မူ ပုရွက်ဆိတ်လေး တစ်ကောင်ကဲ့သို့ပင်။

ထို့ကြောင့် သူသည် ဤအခွင့်အရေးကို အသုံးချကာ အုတ်မြစ်တည်ဆောက်ခြင်း အဆင့်သို့ အမြန်ဆုံး ရောက်ရှိရန် ပြင်းပြစွာ ဆန္ဒရှိနေတော့သည်။

……