အခန်း (၂၁၇-၂၁၈)

အခန်း (၂၁၇) - ဝူမိသားစု၏ အလိုရှိစာရင်းနှင့် ယွန်လိုင်းမြို့အထိ ပျံ့နှံ့လာသော ကမောက်ကမဖြစ်မှုများ။

မြွေပျံကျင့်စဉ်သည် ကျန်းဖန်အား လူသားတို့၏ သက်တမ်း ကန့်သတ်ချက်ကို ချိုးဖျက်စေပြီး နတ်ဘုရားသားရဲ တစ်ကောင်ကဲ့သို့ ရှည်လျားသော သက်တမ်းကို တဖြည်းဖြည်း ရရှိလာစေခဲ့သည်။

၎င်းမှာ အစပြုရုံသာ ရှိသေးသော်လည်း သူ၏ သက်တမ်းမှာ အံ့ဩစရာကောင်းလောက်အောင် တိုးတက်လာခဲ့ချေပြီ။

သာမန် သက်တမ်းတိုးဆေးလုံးများ သောက်သုံးခြင်းမှာပင် ဤမျှ ထိရောက်သော ရလဒ်မျိုးကို ပေးနိုင်လိမ့်မည် မဟုတ်ပေ။

"ငါ့ရဲ့ ကျင့်စဉ်အဆင့်ကလည်း ၈၀% အထိ ရောက်လာပြီ"

"ကြည့်ရတာ ကိုးခုမြောက် ချီကျင့်ကြံခြင်း အဆင့်ကို ရောက်ဖို့က သိပ်မလိုတော့ဘူးပဲ"

ကျန်းဖန်သည် သူ၏ ကျင့်စဉ်တိုးတက်မှုကို ကြည့်ရင်း အလွန်ပင် စိတ်ကျေနပ်နေမိသည်။

ဤသုံးလတာ ပြင်းပြင်းထန်ထန် ကျင့်ကြံခဲ့သည့် အချိန်အတွင်း သူ၏ အဆင့်မှာ မယုံနိုင်စရာ အရှိန်အဟုန်ဖြင့် တိုးတက်လာခဲ့သည်။

သိသာလှသည်မှာ ၎င်းမှာ 'နှစ်တစ်ရာသက်တမ်း ကြာနဂါးဂျင်ဆင်း' ကြောင့်ပင် ဖြစ်သည်။

အကယ်၍ ဤဝိညာဉ်ဆေးပင်သာ မရှိခဲ့လျှင် သူ၏ ကျင့်စဉ်မှာ ဤမျှ မြန်ဆန်နိုင်မည် မဟုတ်ပေ။

အကယ်၍ သူသာ ယွန်လိုင်းမြို့သို့ ရောက်ရှိပြီး အဆင့်မြင့်ဆေးလုံးအချို့ ထပ်မံဝယ်ယူနိုင်ပါက အဆင့် (၉) သို့ တက်လှမ်းနိုင်ရန်မှာ လက်တစ်ကမ်းအလိုပင် ဖြစ်ပေလိမ့်မည်။

"ဒါပေမဲ့ ဒီသုံးလအတွင်းမှာ အတိုးတက်ဆုံးကတော့ အရှိန်အဝါဖျောက်အင်း နဲ့ ကာကွယ်ရေးအင်း ပဲ"

ကျန်းဖန်က သူ၏ မေးစေ့ကို ပွတ်ရင်း တွေးလိုက်မိသည်။

သူသည် သူ၏ ကံကောင်းခြင်း အမှတ်များကို အသုံးပြုကာ ဤအသက်သွေးကြောအင်း နှစ်ခုလုံးကို ပြီးပြည့်စုံသော အဆင့်သို့ မြှင့်တင်ထားခဲ့ခြင်း ဖြစ်၏။ ၎င်းက ထိုအင်းနှစ်ခု၏ စွမ်းအားကို သိသိသာသာ တိုးတက်စေခဲ့သည်။

အရှိန်အဝါဖျောက်အင်း - ဤအင်းမှာ ပြီးပြည့်စုံသော အဆင့်သို့ ရောက်ရှိသွားသောအခါ သူ၏ အရှိန်အဝါကို သဘာဝပတ်ဝန်းကျင်နှင့် တစ်သားတည်း ဖြစ်သွားစေသည်။ ရန်သူများမှာ သူ့ကို သတိမထားမိဘဲ ကျော်ဖြတ်သွားစေနိုင်လောက်သည် အထိ ထိရောက်လှ၏။

သားရဲတစ်သောင်းတောင်တန်း ခရီးစဉ်အတွင်း အဆင့် (၂) မိစ္ဆာသားရဲများနှင့် တိုးသည့်အခါတိုင်း သူသည် ဤစွမ်းအားကို အသုံးပြုကာ ဘေးကင်းအောင် ပုန်းကွယ်နိုင်ခဲ့သည်။

ကာကွယ်ရေးအင်း - ၎င်းမှာ ပြီးပြည့်စုံသောအဆင့်တွင် ဝိညာဉ်စွမ်းအား ဒိုင်းကိုးထပ် အထိ တစ်ပြိုင်နက်တည်း ဖော်ဆောင်ပေးနိုင်သည်။

၎င်း၏ ကာကွယ်နိုင်စွမ်းမှာ ယခင်ကထက် အဆပေါင်းများစွာ ပိုမိုအားကောင်းလာသဖြင့် အဆင့် (၉) ကျင့်ကြံသူများ အုပ်စုလိုက် တိုက်ခိုက်လျှင်ပင် ဖြိုခွဲနိုင်ရန် မလွယ်ကူတော့ပေ။

အုတ်မြစ်တည်ဆောက်ခြင်း အဆင့်သို့ စတင်ဝင်ရောက်ကာစ ကျင့်ကြံသူတစ်ဦး အတွက်ပင် ဤဒိုင်းကို ဖောက်ထွက်ရန်မှာ မလွယ်ကူလှပေ။

ယခုအခါ ကျန်းဖန်သည် မိမိကိုယ်ကိုယ် လိပ်ခွံကြီးတစ်ခုဖြင့် အုပ်ထားသကဲ့သို့ လုံခြုံသည်ဟု ခံစားနေရပြီ ဖြစ်သည်။ ရန်သူများ သူ့ကို မည်သို့ပင် ချုံခိုတိုက်ခိုက်စေကာမူ သူ အေးအေးဆေးဆေး ခုခံနိုင်စွမ်း ရှိသွားခဲ့ချေပြီ။

နောက်တစ်နေ့ မနက်တွင်…

ကျန်းဖန်သည် သူ၏ ကျင့်စဉ်နှင့် တိုးပွားလာသော စွမ်းအားများကို တည်ငြိမ်အောင် ပြုလုပ်ပြီးနောက် စုဝေဝေနှင့်အတူ ယွန်လိုင်းမြို့ဆီသို့ ခရီးဆက်ခဲ့သည်။

သူတို့သည် သားရဲတစ်သောင်းတောင်တန်း အတွင်း၌ သုံးလတိုင်တိုင် နေထိုင်ခဲ့ကြရသဖြင့် လူသားကျင့်ကြံသူများကို မြင်တွေ့ချင်စိတ် ပြင်းပြနေခဲ့ကြသည်။

"အစ်ကို... ယွန်လိုင်းမြို့ကို ရောက်တော့မှာလားဟင်" ဟု စုဝေဝေက စိတ်လှုပ်ရှားစွာ မေးလိုက်သည်။

"အင်း... မြေပုံအရဆိုရင်တော့ သိပ်မဝေးတော့ဘူး။ ဒီနေ့အတွင်း ရောက်နိုင်ပါတယ်"

နာရီအနည်းငယ် ထပ်မံ ခရီးနှင်ပြီးနောက်တွင်တော့ ကျန်းဖန်နှင့် စုဝေဝေတို့သည် ယွန်လိုင်းမြို့ရှေ့သို့ ရောက်ရှိလာခဲ့ကြသည်။

ထိုမြို့ကြီးမှာ ကျယ်ပြောလှသော လွင်ပြင်ကြီးပေါ်တွင် ခန့်ညားထည်ဝါစွာ တည်ရှိနေပြီး မြို့ပတ်ပတ်လည်၌ ဖြူစင်သော တိမ်တိုက်များက ဝန်းရံထားသည်။ ဝေးလံသော နေရာမှ လှမ်းကြည့်လျှင် ထိုမြို့ကြီးမှာ လျှို့ဝှက်ဆန်းပြားပြီး မှော်ဆန်လှသော အသွင်ကို ဆောင်နေ၏။

မြို့တစ်ခုလုံးကို အားကောင်းလှသော အစီအရင် အတားအဆီးကြီးဖြင့် ဖုံးအုပ်ထားပြီး ရံဖန်ရံခါတွင် စွမ်းအင်လှိုင်းများမှာ တဖျတ်ဖျတ် တောက်ပနေသည်ကို တွေ့ရသည်။

မြို့၏ ကောင်းကင်ယံ၌ သင်္ဘောပျံများမှာ အလုပ်ရှုပ်စွာ သွားလာနေကြသလို အုတ်မြစ်တည်ဆောက်ခြင်းအဆင့် ကျင့်ကြံသူ အချို့ ဓားပျံစီးနင်းကာ သွားလာနေသည်ကိုလည်း တွေ့မြင်ရသည်။

မြစိမ်းတော ဈေးတန်း နှင့် နှိုင်းယှဉ်ပါက ဤနေရာ၏ စည်ကားမှုမှာ အဆပေါင်းများစွာ သာလွန်လှပေသည်။

"အစ်ကို... ယွန်လိုင်းမြို့ရဲ့ အနားမှာလည်း ဆင်းရဲသားရပ်ကွက်တွေ ရှိနေတာပဲနော်"

ကျင့်ကြံသူ အမြောက်အမြားမှာ မြို့အတွင်းသို့ မဝင်ကြဘဲ မြို့အပြင်ဘက်ရှိ ဆင်းရဲသား ရပ်ကွက်များ အတွင်းသို့ ဝင်ရောက်သွားကြသည်ကို စုဝေဝေ သတိပြုမိလိုက်သည်။

ထိုနေရာများမှာ လေလွင့်ကျင့်ကြံသူများ တည်ဆောက်ထားသော နေရာများ ဖြစ်ပုံရသော်လည်း အိမ်ခြေများမှာ စနစ်တကျ ရှိနေကြသည်။

မြစိမ်းတော ဈေးတန်းကဲ့သို့ ကြပ်ညှပ်မနေဘဲ အိမ်တစ်လုံးနှင့် တစ်လုံးကြားတွင် နေရာလွတ်များ ချန်ထားကာ စနစ်တကျ စီမံထားပုံရ၏။

"ဟုတ်တယ်... ယွန်လိုင်းမြို့က လေလွင့်ကျင့်ကြံသူတွေရဲ့ မြို့တော်လို့ နာမည်ကြီးပေမဲ့ အထဲမှာ အဆင့် (၃) ဝိညာဉ်သွေးကြောတွေ ရှိတယ်လေ"

"မြို့တော်က လူအကန့်အသတ်နဲ့ပဲ လက်ခံနိုင်သလို ဝိညာဉ်စွမ်းအားတွေကလည်း ကျင့်ကြံသူ အားလုံးအတွက် မလုံလောက်ဘူး။ ဒါကြောင့် လေလွင့်ကျင့်ကြံသူ အများစုက မြို့ထဲမှာ နေထိုင်ခွင့်မရကြဘဲ မြို့ပြင်က ဆင်းရဲသား ရပ်ကွက်တွေမှာပဲ နေကြရတာပေါ့" ဟု ကျန်းဖန်က လေးလေးနက်နက် ရှင်းပြလိုက်သည်။

သူသည် ယွန်လိုင်းမြို့အကြောင်း သတင်းအချက်အလက်အချို့ ကြားဖူးထားသည်။

အစပိုင်းတွင် လေလွင့်ကျင့်ကြံသူ အားလုံး မြို့အတွင်း၌ နေထိုင်ခွင့်ရခဲ့သော်လည်း အချိန်ကြာလာသည်နှင့်အမျှ လူဦးရေမှာ များပြားလာခဲ့သဖြင့် ယခုကဲ့သို့ စည်းကမ်းချက်များ ဖြစ်လာရခြင်း ဖြစ်ပေတော့သည်။

……

အခန်း (၂၁၈) - ဝူမိသားစု၏ အလိုရှိစာရင်းနှင့် ယွန်လိုင်းမြို့အထိ ပျံ့နှံ့လာသော ကမောက်ကမဖြစ်မှုများ (အပိုင်း ၂)

သို့သော်လည်း ဤလေလွင့်ကျင့်ကြံသူများသည် မြို့တော်အနီးမှ ထွက်ခွာသွားရန် အလိုမရှိကြပေ။

ထိုအခါ အချိန်ကြာလာသည်နှင့်အမျှ မြို့ပြင်ပတ်ဝန်းကျင်၌ ဤကဲ့သို့သော ဆင်းရဲသားရပ်ကွက်များ အခြေခိုင်လာခဲ့တော့သည်။

ဆင်းရဲနွမ်းပါးသော လေလွင့်ကျင့်ကြံသူ အမြောက်အမြားသည် ဤနေရာ၌သာ အခြေချနေထိုင်ကြ၏။ အကြောင်းမှာ ဤဧရိယာတွင် အိမ်လခမှာ အလွန် သက်သာသောကြောင့် ဖြစ်သည်။

အကယ်၍ သူတို့အနေဖြင့် ရတနာများ ဝယ်ယူရန် လိုအပ်လာပါကလည်း ယွန်လိုင်းမြို့အတွင်းသို့ အလွယ်တကူ ဝင်ရောက်နိုင်ကြသည်။

ထို့ကြောင့် လေလွင့်ကျင့်ကြံသူများသည် ယွန်လိုင်းမြို့၏ အကာအကွယ်ကို ရရှိရုံတင်မကဘဲ မြို့အတွင်းရှိ အရင်းအမြစ်များကိုပါ အသုံးချနိုင်သဖြင့် နှစ်ဦးနှစ်ဖက် အကျိုးရှိသော အခြေအနေမျိုးပင် ဖြစ်ပေသည်။

"ယောကျာ်း... ငါတို့ သွားကြည့်ကြရအောင်" ဟု စုဝေဝေက စိတ်အားထက်သန်စွာ ပြောလိုက်သည်။

အဆိုပါ ဆင်းရဲသားရပ်ကွက် အတွင်းသို့ မဝင်ရောက်မီ သူတို့ဇနီးမောင်နှံသည် ရုပ်ဖျက်လိုက်ကြပြီး သူတို့၏ အရှိန်အဝါများကိုလည်း ပြောင်းလဲပစ်လိုက်ကြသည်။

မကျွမ်းကျင်သေးသော နေရာသစ်တစ်ခုသို့ သွားသည့်အခါတိုင်း အမြဲတမ်း သတိရှိနေရမည် မဟုတ်ပါလား။

၎င်းအပြင် ယွန်လိုင်းမြို့သည် လေလွင့်ကျင့်ကြံသူများ၏ မြို့တော်ဖြစ်သဖြင့် လူမျိုးစုံ ရောနှောနေပြီး ဓားပြကျင့်ကြံသူများလည်း အမြောက်အမြား ရှိနေနိုင်သောကြောင့် ဖြစ်သည်။

မည်သို့ပင်ဆိုစေ မိမိကိုယ်ကိုယ် ကာကွယ်ခြင်းမှာ အမြဲတမ်း ပထမဦးစားပေးပင်။

မကြာမီမှာပင် ကျန်းဖန်နှင့် စုဝေဝေတို့သည် ယွန်လိုင်းမြို့၏ ဆင်းရဲသားရပ်ကွက် အတွင်းသို့ ခြေချလိုက်ကြသည်။

၎င်းကို ဆင်းရဲသားရပ်ကွက်ဟု ခေါ်ဆိုသော်လည်း အမှန်တကယ်တွင် သာမန် မြို့ငယ်လေး တစ်ခုနှင့် မခြားနားလှပေ။ စီးပွားရေး ရပ်ကွက်များ သာမက လူနေရပ်ကွက်များပါ ရှိနေ၏။

လေလွင့်ကျင့်ကြံသူ ပေါင်းစုံတို့၏ လှုပ်ရှားမှုကြောင့် ဤနေရာမှာ အလွန်ပင် စည်ကားနေတော့သည်။

ဟိုတယ်များ၊ အရက်ဆိုင်များ၊ ဆေးလုံးဆိုင်များ၊ အင်းဆိုင်များ နှင့် ဝိညာဉ်လက်နက်ဆိုင်များ စသည်ဖြင့် အစုံအလင် ရှိနေသည်။

၎င်းက သားရဲတစ်သောင်းတောင်တန်း အတွင်း၌ အချိန်အတော်ကြာ နေထိုင်ခဲ့ရသော ကျန်းဖန်နှင့် စုဝေဝေတို့ကို လူသားတို့၏ အငွေ့အသက်ကို ပြန်လည် ခံစားရစေခဲ့သည်။

"သက်ပြင်းချစရာပဲ... နေမင်းကြီးဓားဂိုဏ်း နဲ့ ဓာတ်ကြီးငါးပါးဆေးလုံးဂိုဏ်း တို့ရဲ့ စစ်ပွဲက ဘယ်တော့မှ ပြီးမှာလဲ မသိဘူး"

"သူတို့ တိုက်နေကြတာ အခုဆို လပေါင်းများစွာ ကြာနေပြီ မဟုတ်လား"

"အဲဒီဒဏ်ကြောင့် ယွန်လိုင်းမြို့မှာ ကုန်စျေးနှုန်းတွေ တက်ကုန်ပြီ။ အင်းတွေ၊ ဆေးလုံးတွေနဲ့ ဝိညာဉ်လက်နက်တွေရဲ့ စျေးနှုန်းက အရင်ကထက် ၃၀ ရာခိုင်နှုန်းကျော်လောက် တက်သွားတယ်။ ဒီအတိုင်းသာ ဆက်သွားရင် ငါတို့ လေလွင့်ကျင့်ကြံသူတွေ ဘယ်လိုမှ ရပ်တည်နိုင်တော့မှာ မဟုတ်ဘူး"

အရက်ဆိုင်တစ်ခု အတွင်း၌ ကျင့်ကြံသူတစ်ဦး၏ မြည်တမ်းသံမှာ အခြားသူများ၏ ထောက်ခံမှုကို ချက်ချင်း ရရှိသွားခဲ့သည်။

"ဟုတ်ပါ့ဗျာ... ရွှေအမြုတေအဆင့် ဂိုဏ်းကြီးတွေရဲ့ စစ်ပွဲကတော့ အဆုံးသတ်မဲ့ပဲ။ ကြားရတာတော့ မြစိမ်းတော ဈေးတန်း မှာ သန္ဓေတည်ဝိညာဉ်အဆင့် ဂူဗိမာန် တစ်ခုကို တွေ့လိုက်ကြလို့ ဂိုဏ်းပေါင်းစုံက ရွှေအမြုတေအဆင့် အရှင်သခင်တွေ အဲဒီကို အကုန်ရောက်နေကြတယ်တဲ့။ အခု အဲဒီနေရာက စစ်တလင်း ဖြစ်နေလို့ အဲဒီက လေလွင့်ကျင့်ကြံသူတွေလည်း အသေအပျောက် များနေကြတယ်ဆိုပဲ"

"သန္ဓေတည် ဝိညာဉ်အဆင့် ဂူဗိမာန် ဟုတ်လား... ဘယ်သူ့ရဲ့ ဂူဗိမာန်လဲ"

"ဟိုးလွန်ခဲ့တဲ့ နှစ်ပေါင်းတစ်ထောင်ကျော်က ကျင့်စဉ်လောကရဲ့ ဒဏ္ဍာရီတစ်ဦးဖြစ်တဲ့ ဝမ်ဟာရဲ့ ဂူဗိမာန်လို့ ဆိုကြတာပဲ။ သူက ညံ့ဖျင်းတဲ့ ဝိညာဉ်အမြစ်လေးနဲ့တင် သန္ဓေတည် ဝိညာဉ်အဆင့် ဘိုးဘေးတစ်ဦး ဖြစ်လာခဲ့တဲ့ လေလွင့်ကျင့်ကြံသူတွေရဲ့ စံပြပုဂ္ဂိုလ်ပေါ့။ ဒါပေမဲ့ လူအများစု ခန့်မှန်းကြတာကတော့ ဝမ်ဟွာမှာ အကြီးအကျယ် ကံကောင်းမှုတွေ ရှိနေလို့သာ ဒီအဆင့်ထိ တက်နိုင်ခဲ့တာတဲ့"

"ဒါကြောင့်လည်း ဂိုဏ်းကြီးတွေက အဲဒီနေရာကနေ မခွာနိုင်ကြတာပေါ့။ ဝမ်ဟွာက နာမည်ကျော် အဆင့် (၄) ဆေးလုံးဆရာ တစ်ယောက်လေ။ သူ သန့်စင်ခဲ့တဲ့ ပြီးပြည့်စုံတဲ့ ဆေးလုံးတွေက မရေမတွက်နိုင်အောင်ပဲ။ သူ့ရဲ့ ချမ်းသာကြွယ်ဝမှုက တိုင်းပြည်တစ်ခုစာလောက် ရှိတယ်လို့တောင် ပြောကြတာ။ အဲဒီတော့ သူ့ရဲ့ ဂူဗိမာန်ထဲမှာ အဆင့်မြင့်ဆေးလုံးတွေ ဘယ်လောက်တောင် များနေမလဲ စဉ်းစားသာကြည့်တော့"

"ဂူဗိမာန်ရဲ့ အပြင်ဘက် ဧရိယာလေးမှာတင်ပဲ အဆင့် (၃) ဆေးလုံး အမြောက်အမြားကို အရှင်သခင်တွေ တွေ့ခဲ့ကြတယ်တဲ့။ အဲဒါကြောင့် သူတို့ အသေအလဲ တိုက်နေကြတာပေါ့။ သတင်းတွေအရဆိုရင် ယွန်လိုင်းမြို့စား 'ယွန်လိုင်းအရှင်သခင်' ကိုယ်တိုင်တောင် အဲဒီကို သွားချင်နေတယ်လို့ ကြားတယ်"

ကျင့်ကြံသူ အမြောက်အမြားမှာ စိတ်လှုပ်ရှားစွာ ဆွေးနွေးနေကြတော့သည်။ သုံးလခန့် ကုန်ဆုံးသွားပြီဖြစ်ရာ သန္ဓေတည် ဝိညာဉ်အဆင့် ဂူဗိမာန်အကြောင်းမှာ လူတိုင်းသိသော သတင်းတစ်ခု ဖြစ်နေချေပြီ။

"မဖြစ်နိုင်တာ... မြို့စားမင်းကိုယ်တိုင်တောင် စိတ်လှုပ်ရှားနေတာလား။ အကယ်၍ မြို့စားမင်းသာ ဒီစစ်ပွဲမှာ တစ်ခုခုဖြစ်သွားရင် ငါတို့ ယွန်လိုင်းမြို့တော့ ဒုက္ခရောက်ကုန်တော့မှာပဲ" ဟု ကျင့်ကြံသူတစ်ဦးက စိုးရိမ်တကြီး ပြောလိုက်သည်။

ယွန်လိုင်းမြို့အတွက်မူ 'ယွန်လိုင်းအရှင်သခင်' သည် မြို့တော်၏ ကျောရိုးဖြစ်သလို ပင်လယ်ငြိမ်စေမည့် အပ်စိုက်တိုင်ကဲ့သို့ပင် အားကိုးရာ ဖြစ်သည်။

အကယ်၍ သူသာ ကျဆုံးသွားပါက ယွန်လိုင်းမြို့သည် အခြားသော ရွှေအမြုတေအဆင့် ဂိုဏ်းကြီးများ၏ ဝါးမြိုခြင်းကို ခံရပေလိမ့်မည်။

"ဒါကတော့ ရှောင်လွှဲလို့မရဘူးလေ၊ ဒီကိစ္စက မြို့စားမင်းရဲ့ ကျင့်စဉ်လမ်းကြောင်းနဲ့ သက်ဆိုင်နေတာကိုး။ မြို့စားမင်းရဲ့ အသက်ကလည်း ၄၀၀ ကျော်နေပြီဆိုတော့ ရွှေအမြုတေအဆင့် ရဲ့ သက်တမ်း ကန့်သတ်ချက်ကို ရောက်တော့မှာလေ။ သူလည်း အိုမင်းမစွမ်း ဖြစ်မသွားခင်မှာ နောက်တစ်ဆင့် တက်လှမ်းနိုင်ဖို့ မျှော်လင့်နေမှာပေါ့"

"ဟုတ်ပါတယ်... အကယ်၍ မြို့စားမင်းသာ ဝမ်ဟွာရဲ့ အမွေအနှစ်ကို ရရှိပြီး အဆင့် (၃)၊ အဆင့် (၄) ဆေးလုံးတွေကို ရခဲ့မယ်ဆိုရင် သူ တကယ်ပဲ သန္ဓေတည် ဝိညာဉ်အဆင့် ဘိုးဘေးတစ်ယောက် ဖြစ်လာနိုင်တာပေါ့"

"ဒါပေမဲ့ အဲဒီမှာ ဂိုဏ်းပေါင်းစုံက အရှင်သခင်တွေ အများကြီး ရှိနေတာလေ။ တစ်ဦးတည်းနဲ့ အဲဒီအမွေအနှစ်ကို အရယူဖို့ဆိုတာကတော့ အတော်လေးကို မဖြစ်နိုင်တဲ့ ကိစ္စပဲ" ဟု အချို့ကလည်း သံသယဖြင့် ဝေဖန်နေကြတော့သည်။

…..