ချူကျီယန် ရှုံးနိမ့်သွားခြင်း

ပိုင်ကျီဟန်သည် ကောင်းကင်ဓားဂိုဏ်းသို့ ရောက်ရှိသွားရာ ထုံးစံအတိုင်းပင် ဂယက်ထသွားခဲ့သည်။

သို့သော် အားကျမနာလိုဖြစ်နေသည့် အကြည့်များကြားတွင် သူ့ကို အကဲခတ်နေသော အကြည့်အချို့လည်း ရောနှောနေသည်။

ထိုအခြေအနေကို ပိုင်ကျီဟန် သိပ်မအံ့ဩမိပေ။ ၎င်းမှာ အထူးအဆန်းမဟုတ်သော်လည်း ယခုတစ်ခေါက် သူ့ကို စောင့်ကြည့်နေသူအရေအတွက်သည် ပုံမှန်ထက် ပိုများနေသည်မှာတော့ အမှန်ပင်။

(တစ်ခုခုတော့ ဖြစ်နေပြီ)

ပိုင်ကျီဟန်သည် အသံလွှင့်အဆောင်မှတစ်ဆင့် ခုန်ကျန်းဟုန်ကို ခေါ်လိုက်ရာ သူသည် ပိုင်ကျီဟန်၏ရှေ့မှောက်သို့ ချက်ချင်းဆိုသလို ရောက်ရှိလာသည်။ ခုန်ကျန်းဟုန်သည် ထုံးစံအတိုင်း လိုအပ်သည့် သတင်းအချက်အလက်အားလုံးကို အဆင်သင့် ပြင်ဆင်လာခဲ့ချေသည်။

ပိုင်ကျီဟန်သည် သတင်းများကို ဖတ်ကြည့်လိုက်ပေ၏

"ဟင်း... ဂိုဏ်းခေါင်းဆောင်ဆန့်ကျင်ရေးအုပ်စုက လှုပ်လှုပ်ရှားရှားတွေ အတော်လုပ်နေတာပဲ။"

ခုန်ကျန်းဟုန်သည် တည်ကြည်သောအမူအရာဖြင့် ခေါင်းညိတ်လိုက်ရာ အခြေအနေသည် အတော်လေး လေးနက်နေပုံရသည်။

ဂိုဏ်းခေါင်းဆောင်ဆန့်ကျင်ရေးအုပ်စုသည် တစ်ပတ်ထက်တစ်ပတ် ပို၍ ရဲတင်းလာခဲ့သည်။ ၎င်းတို့၏ လုပ်ရပ်များသည် တိုးတိုးတိတ်တိတ် မဟာမိတ်ဖွဲ့ခြင်းအဆင့်

မဟုတ်တော့ဘဲ ပြင်ပဂိုဏ်းအကြီးအကဲများနှင့် လက်အောက်ခံ မျိုးနွယ်စုများကြားတွင် ဩဇာလွှမ်းမိုးနိုင်ရန် ပေါ်ပေါ်ထင်ထင်ပင် စုစည်းလာကြသည်။

လွန်ခဲ့သောလများအတွင်း သူတို့သည် ဂိုဏ်း၏ဂုဏ်သိက္ခာကို ပြန်လည်ထိန်းသိမ်းခြင်းဟူသော ခေါင်းစဉ်ဖြင့် ဩဇာရှိသော မျိုးနွယ်စုအချို့ကို သိမ်းသွင်းနိုင်ခဲ့သည်။

သူတို့သည် ဂိုဏ်းချုပ် ထျန်းယုဟန်ကို ပြတ်သားမှုနှင့် မျှော်မှန်းချက်မရှိသော လူပျော့လူညံ့တစ်ဦးအဖြစ် ပုံဖော်ကာ ဂုဏ်သိက္ခာကြီးမားသော ကောင်းကင်ဓားဂိုဏ်းအား ဦးဆောင်ရန် မထိုက်တန်ကြောင်း ဝါဒဖြန့်ခဲ့ကြသည်။

ရှန်လျန့်နှင့် ပတ်သက်သော ဖြစ်ရပ်သည် သူတို့အတွက် အကောင်းဆုံးလက်နက် ဖြစ်လာခဲ့သည်။ ထျန်းယုဟန်သည် ဂိုဏ်း၏အလားအလာအရှိဆုံး ပါရမီရှင်တစ်ဦးဖြစ်ပြီး ရှန်မျိုးနွယ်စု၏ အနာဂတ်ဖြစ်သော ရှန်လျန့်ကို မကာကွယ်နိုင်ခဲ့ခြင်းမှာ သူ၏ မစွမ်းဆောင်နိုင်မှုကို သက်သေပြနေခြင်းဖြစ်ကြောင်း စွပ်စွဲကြသည်။

ရှန်လျန့်သည် ပိုင်ကျီဟန်ကို လုပ်ကြံရန် ကြံစည်ရင်း ဒုက္ခိတဖြစ်သွားခဲ့ရသည့် အမှန်တရားကို ဖုံးကွယ်ကာ ဂိုဏ်းချုပ်၏ ပေါ့ဆမှုနှင့် ပိုင်မျိုးနွယ်စုအပေါ် ဘက်လိုက်မှုကြောင့် ဖြစ်ရသည်ဟု ပုံဖော်ခဲ့ကြသည်။

အမှန်တရားကို လူတိုင်းသိကြသည်။

ရှန်လျန့်ကိုယ်တိုင်သည် ပိုင်ကျီဟန်ကို နာမည်ဖျက်ရန် မရိုးသားသော နည်းလမ်းများ သုံးခဲ့ခြင်းဖြစ်ကြောင်း လူတိုင်း မြင်တွေ့ခဲ့ရသည်။

သို့သော် နိုင်ငံရေးအရ ကစားကွက်ဆင်သည့်အခါ အချက်အလက်များမှာ အရေးမပါတော့ပေ။

ပိုင်ကျီဟန်သည် သွားလေရာ၌ ပြဿနာရှာတတ်သည့် နာမည်ကျော်ကြားမှုကြောင့်အဆိုပါအုပ်စုအတွက် ပုံဖျက်ဝါဒဖြန့်ရန် ပိုမိုလွယ်ကူစေခဲ့သည်။

ဂိုဏ်းခေါင်းဆောင်ဆန့်ကျင်ရေးအုပ်စုသည် ထိုအရာကို ပုံဖော်ခဲ့သည်။

ပိုင်ကျီဟန်၏ ရက်စက်သော သဘောသဘာဝကြောင့် နောက်တစ်ခါ သားကောင်ဖြစ်သွားမည့်သူမှာ အခြားတပည့်များ၏ သားသမီးများပင် ဖြစ်လာနိုင်ကြောင်း ကောလာဟလများ ဖြန့်ခဲ့သည်။

ဤနည်းလမ်းမှာ အတော်လေး ထိရောက်သည်။ အဘယ်ကြောင့်ဆိုသော် ကောင်းကင်ဓားဂိုဏ်းတွင် နောက်ခံအင်အားကြီးမားသော တပည့်များစွာ ရှိနေပြီး ၎င်းတို့အားလုံးသည် ဂိုဏ်း၏ အကာအကွယ်ကို မျှော်လင့်နေကြသူများ ဖြစ်သောကြောင့်ပင်။

ရှန်လျန့်ကဲ့သို့သောသူပင် အကာအကွယ်မရလျှင် သူတို့အတွက် မည်သူက အာမခံပေးနိုင်မည်နည်းဟု တွေးတောလာကြသည်။

ဝါဒဖြန့်မှုများမှာ ထိုမျှနှင့် မရပ်တန့်သွားပေ။ ဂိုဏ်းချုပ် ထျန်းယုဟန်သည် ပိုင်မျိုးနွယ်စု၏ ရုပ်သေးရုပ်မျှသာ ဖြစ်ပြီး နောက်ကွယ်မှ ပိုင်ထျန်းဟမ်သည် ကြိုးကိုင်နေခြင်းဖြစ်သည်ဟုပင် စွပ်စွဲလာကြသည်။ ပိုင်ထျန်းဟမ်နှင့် ထျန်းယုဟန်သည် ရင်းနှီးသော သူငယ်ချင်းများ ဖြစ်ကြသည်မှာလည်း လျှို့ဝှက်ချက်မဟုတ်ပေ။

ပိုင်မျိုးနွယ်စုသည် ကောင်းကင်ဓားဂိုဏ်း၏ ကိစ္စများတွင် မည်သည့်အခါကမျှ ဝင်ရောက်စွက်ဖက်ခြင်း မရှိခဲ့သော်လည်း ဂိုဏ်းခေါင်းဆောင် ဆန့်ကျင်ရေးအုပ်စုကမူ အမှန်တရားကို ဂရုမစိုက်ဘဲ သူတို့အကြိုက် လိမ်လည်ပုံဖော်ခဲ့သည်။

ပိုင်ကျီဟန်သည် သတင်းစာလိပ်ကို ဖတ်ရင်း ပါးစပ်ဖျားတွင် လှောင်ပြုံးတစ်ခု ပေါ်လာသည်။

"ချစ်စရာကောင်းလိုက်တာ..." သူက ခပ်တိုးတိုး ရေရွတ်လိုက်သည်။

ထိုနည်းဗျူဟာများသည် ရိုးရှင်းသော်လည်း ထိရောက်သည်။

ပိုင်မျိုးနွယ်စုသည် အင်အားအကြီးဆုံး ဖြစ်နေသည့်အတွက် မဟာမိတ်များ ရှိသကဲ့သို့ ရန်သူများလည်း ရှိစမြဲပင်။

ဂိုဏ်းခေါင်းဆောင်ဆန့်ကျင်ရေးအုပ်စုသည် ပိုင်မျိုးနွယ်စုနှင့် ဆက်ဆံရေးမကောင်းသူများကို ဆွဲဆောင်ခြင်းဖြင့် မဟာမိတ်အင်အား စုဆောင်းနေခြင်းဖြစ်သည်။

ရှန်မျိုးနွယ်စုသည် သူတို့နှင့် ထပ်မံပူးပေါင်းသွားပြီဖြစ်၍ ၎င်းမှာ အတော်လေး အောင်မြင်နေသည်ဟု ဆိုရမည်။

(သူတို့ လီမျိုးနွယ်နဲ့ ကျောက်မျိုးနွယ်ဆီကိုလည်း ချဉ်းကပ်မှာပဲ။ သူတို့ ကူညီဖို့ သဘောတူလိုက်ပြီလားတော့ မသိဘူး။)

ပိုင်ကျီဟန် တွေးလိုက်သည်။

ပိုင်မျိုးနွယ်စုနှင့် လီ-ကျောက် မျိုးနွယ်စုများကြားရှိ ရန်ငြိုးကို လူတိုင်းသိသည်။ ဂိုဏ်းခေါင်းဆောင်ဆန့်ကျင်ရေးအုပ်စုသည် ဤအခွင့်အရေးကို အလွတ်ခံမည် မဟုတ်ပေ။ လီ-ကျောက် မျိုးနွယ်စု၏ ဩဇာသည် ဂိုဏ်းအတွင်း၌ သုညနီးပါး ဖြစ်နေသော်လည်း သူတို့သာ ရင်းနှီးမြှုပ်နှံလိုက်လျှင် အခြေအနေမှာ ပြောင်းလဲသွားနိုင်သည်။

သို့သော် ခုန်ကျန်းဟုန်ပေးသည့် စာလိပ်တွင် ထိုအချက်အလက်များ မပါဝင်သေးပေ။ ခုန်ကျန်းဟုန် ထည့်သွင်းထားသော သူလျှိုမှာ ရာထူးနိမ့်နေခြင်းကြောင့် သော်လည်းကောင်း၊ သို့မဟုတ် လျှို့ဝှက်လွန်းနေခြင်းကြောင့် သော်လည်းကောင်း ဖြစ်နိုင်သည်။

အကယ်၍ ထိုနှစ်ဦးသာ ပါဝင်လာခဲ့လျှင် ဂိုဏ်းခေါင်းဆောင်ဆန့်ကျင်ရေးအုပ်စု၏ အင်အားသည် ဂိုဏ်းခေါင်းဆောင်ဘက်တော်သားများကို ကျော်လွန်သွားပေလိမ့်မည်။

ဂိုဏ်းအတွင်းရှိ တပည့်များကိုလည်း ချန်လှပ်မထားခဲ့ပေ။ ဂိုဏ်းခေါင်းဆောင်ဆန့်ကျင်ရေးဘက်မှ တပည့်များသည် ပိုမိုကောင်းမွန်သော အရင်းအမြစ်များနှင့် ဂရုစိုက်မှုများကို ရရှိနေကြသည်။

ထိုတပည့်များ၏ စွမ်းရည်များ သိသိသာသာ တိုးတက်လာသည်ကို မြင်ရသောအခါ အခြားတပည့်များသည်လည်း ထိုအုပ်စုဘက်သို့ ယိမ်းလာကြသည်။

"အကြီးအကဲ ဟန် ကရော?"

ဂိုဏ်းခေါင်းဆောင်ဆန့်ကျင်ရေးအုပ်စု၏ ခေါင်းဆောင်နှင့် ပတ်သက်သော သတင်းအချက်အလက်ကို မတွေ့ရသဖြင့် ပိုင်ကျီဟန်က မေးလိုက်သည်။

"သူကတော့ ကျင့်စဉ်တက်လှမ်းဖို့အတွက် တံခါးပိတ်ကျင့်ကြံနေပါတယ်၊ အခုကိစ္စတွေကိုတော့ သူ့ရဲ့ တပည့်တပန်းတွေကပဲ လုပ်ဆောင်နေတာပါ" ခုန်ကျန်းဟုန်က ဖြေကြားသည်။

"အင်း..."

ဂိုဏ်းခေါင်းဆောင်ဆန့်ကျင်ရေးအုပ်စု အင်တိုက်အားတိုက် လှုပ်ရှားနေချိန်တွင် အကြီးအကဲဟန်သည် အေးအေးဆေးဆေး ကျင့်ကြံနေမည်ဟု ပိုင်ကျီဟန် မယုံကြည်ပေ။

တံခါးပိတ်ကျင့်ကြံခြင်းမှာ လျှို့ဝှက်လုပ်ဆောင်စရာရှိသည်များကို လုပ်ရန်အတွက် အယောင်ပြထားခြင်းသာ ဖြစ်နိုင်သည်။

ဥပမာ လီ-ကျောက် မျိုးနွယ်စုနှင့် လျှို့ဝှက်

မဟာမိတ်ဖွဲ့ခြင်းမျိုးပေါ့။

အခုချိန်မှာတော့ အသေအချာ မသိနိုင်သေးသော်လည်း ၎င်းကို စိတ်ထဲ၌ မှတ်ထားရမည်ဖြစ်သည်။

ပိုင်ကျီဟန်သည် ကျန်ရှိသော အစီရင်ခံစာများကို လှန်ဖတ်နေရင်း ရုတ်တရက် အကြည့်များ တင်းမာသွားသည်။ အသံမှာလည်း အေးစက်သွားပြီး...

"ချူကျီယန်က လုရှန်ယွမ်ကို ရှုံးသွားတယ်ဆိုတာ ဘာလဲ?"

ခုန်ကျန်းဟုန်သည် တံတွေးကို ခက်ခက်ခဲခဲ မျိုချလိုက်ရသည်။

ပိုင်ကျီဟန်ကို မော့မကြည့်သော်လည်း သူ၏ မကျေနပ်မှုကို ခံစားနေရသည်။

ပိုင်ကျီဟန်၏ စေ့စပ်ထားသူ ချူကျီယန်အနေဖြင့် တစ်ဦးဦးအား ရှုံးနိမ့်သွားသည်မှာ ဒေါသထွက်စရာပင်။

"အဲဒါ... အမှန်ပါပဲ" ခုန်ကျန်းဟုန်က သတိထား၍ ပြန်ဖြေသည်။

"လုရှန်ယွမ်က ငါးနှစ်ကြာ တံခါးပိတ်ကျင့်ကြံရာကနေ ပြီးခဲ့တဲ့လကမှ ပြန်ထွက်လာတာပါ။ အဲဒီအချိန်အတွင်းမှာ သူက ဝိညာဉ်

ခွဲခြမ်းစိတ်ဖြာခြင်းအထွတ်အထိပ်ကို ရောက်ရှိသွားခဲ့ပါတယ်။ သူ့ရဲ့ စွမ်းအားက အကြီးအကဲ အတော်များများထက်တောင် သာလွန်နေပါပြီ။ သူက ဂိုဏ်းခေါင်းဆောင်ဆန့်ကျင်ရေးအုပ်စုကို ပေါ်တင်ထောက်ခံတဲ့ ပါရမီရှင်တပည့်တွေထဲက တစ်ယောက်ပါ။"

သူက ခေတ္တမျှ ဝေခွဲမရဖြစ်နေပြီးမှ ဆက်ပြောသည်။

"သူ့ရဲ့ဖခင် လုထျန်းက ဂိုဏ်းရဲ့ အဆင့်မြင့်အကြီးအကဲတစ်ယောက်ပါ။ လုရှန်ယွမ်က ချူသခင်မလေးကို စိန်ခေါ်တာက တိုက်ဆိုင်မှုမဟုတ်ဘဲ ရည်ရွယ်ချက်ရှိရှိ လုပ်တာပါ။ ချူမျိုးနွယ်စုနဲ့ ပိုင်မျိုးနွယ်စုရဲ့ မဟာမိတ်ဖြစ်မှုကြောင့် သူမက နိုင်ငံရေးအရ ပစ်မှတ်ထားခံလိုက်ရတာပါ။"

ပိုင်ကျီဟန်၏ အမူအရာသည် မပြောင်းလဲသော်လည်း အခန်းတွင်းရှိ အပူချိန်မှာ ရုတ်တရက် ကျဆင်းသွားသကဲ့သို့ ခံစားရသည်။

ခုန်ကျန်းဟုန်က ဆက်လက်ပြောကြားလေ၏

"သူမကို လူပုံအလယ်မှာ အနိုင်ယူလိုက်တာက ဂိုဏ်းခေါင်းဆောင်ဆန့်ကျင်ရေးအုပ်စုအတွက် ဂိုဏ်းအတွင်းမှာ၊ အထူးသဖြင့် တပည့်တွေကြားမှာ ဩဇာပိုရှိသွားစေပါတယ်။"

သူက တံတွေးတစ်ချက် မျိုချလိုက်ပြီး... "ပြီးတော့... လုရှန်ယွမ်ရဲ့ နောက်ထပ် ပစ်မှတ်က ပိုင်ရွှယ်ချင်းလို့ သိရပါတယ်။"

အခန်းတွင်း၌ တိတ်ဆိတ်သွားသည်။

ကောင်းကင်ဓားဂိုဏ်းတွင် ပိုင်ရွှယ်ချင်း၏ တည်ရှိမှုသည် သူမ၏ ပါရမီ၊ အောင်မြင်မှုနှင့် ဂုဏ်သတင်းတို့ကြောင့် အလွန်ပင် လွှမ်းမိုးမှုရှိသည်။

အကယ်၍ သူမသာ ရှုံးနိမ့်သွားခဲ့လျှင် လုရှန်ယွမ်နှင့် ဂိုဏ်းခေါင်းဆောင်ဆန့်ကျင်ရေးအုပ်စုတို့သည် ဂိုဏ်းရှိ တပည့်များ၏ ဩဇာအားလုံးကို ထိန်းချုပ်သွားနိုင်ပေလိမ့်မည်။

"ကြည့်ရတာ..." ပိုင်ကျီဟန်က နောက်ဆုံးတွင် စကားပြောလာသည်။ သူ၏ အသံသည် ပျင်းရိပျင်းတွဲ နိုင်သော်လည်း မျက်လုံးများမှာမူ ဆောင်းရာသီ၏ အအေးစက်ဆုံး သံမဏိများကဲ့သို့ပင်။ "သူက အကြီးအကဲအဆင့်ကို မတက်ခင်မှာ တပည့်တွေအားလုံးအပေါ် လွှမ်းမိုးမှုကို ရယူချင်နေတာပဲ။"

ခုန်ကျန်းဟုန်သည် စိုးရိမ်တကြီး ခေါင်းညိတ်လိုက်သည်။

လုရှန်ယွမ်သည် ဝိညာဉ်ခွဲခြမ်းစိတ်ဖြာခြင်းအဆင့်၏ အထွတ်အထိပ်သို့ ရောက်နေသဖြင့် ပိုင်ရွှယ်ချင်းကို အနိုင်ယူရန် အခွင့်အလမ်းများနေသည်။

ပိုင်ရွှယ်ချင်းသည် သူမထက် အဆင့်မြင့်သော သာမန်ကျင့်ကြံသူကို အနိုင်ယူနိုင်သော်လည်း လူရှန်ယွမ်ကဲ့သို့ ပါရမီရှင်တစ်ဦးနှင့်ဆိုလျှင် အခြေအနေမှာ ကွဲပြားသွားနိုင်သည်။

လုရှန်ယွမ်တွင် အတွေ့အကြုံ၊ နည်းစနစ်ကျွမ်းကျင်မှုနှင့် ပိုမြင့်မားသော ကျင့်ကြံမှုအဆင့်ဟူသော အားသာချက်များ ရှိနေသည်။

ပိုင်ရွှယ်ချင်း၊ ချူကျီယန်နှင့် သူတို့၏ ဆရာမဖြစ်သူတို့သည် ဂိုဏ်းအတွင်းရေးတွင် ဝင်ရောက်စွက်ဖက်ခြင်း မရှိကြသော်လည်း သူတို့၏ဆရာမ အကြီးအကဲ ချင်းလန်မှာ ဂိုဏ်းခေါင်းဆောင်၏ ဂျူနီယာညီမဖြစ်၍ ဂိုဏ်းချုပ်ဘက်သို့ ယိမ်းနေသည်မှာ ထင်ရှားသည်။

ထို့ကြောင့် သူမ၏ တပည့်နှစ်ဦးဖြစ်သော ပိုင်ရွှယ်ချင်းနှင့် ချူကျီယန်၏ ဩဇာကို နှိမ်နင်းခြင်းဖြင့် ဂိုဏ်းခေါင်းဆောင်ဆန့်ကျင်ရေးအုပ်စုသည် ၎င်းတို့၏ အင်အားကို ပြသရန် ကြိုးစားနေခြင်းဖြစ်သည်။

ပိုင်ကျီဟန်သည် အစီရင်ခံစာကို ဆက်ဖတ်ကြည့်ရာ ချူကျီယန်နှင့် လုရှန်ယွမ်တို့ မတိုက်ခိုက်မီ အလားတူ ဖြစ်ရပ်များစွာ ရှိခဲ့ကြောင်း တွေ့ရသည်။ ဂိုဏ်းခေါင်းဆောင်ဆန့်ကျင်ရေးအုပ်စုသည် ၎င်းတို့၏ တပည့်များကို အသုံးပြု၍ ဂိုဏ်းခေါင်းဆောင်ဘက်တော်သား တပည့်များကို တမင်တကာ စိန်ခေါ်တိုက်ခိုက်စေခဲ့သည်။

၎င်းတို့၏ ရည်ရွယ်ချက်မှာ ရှင်းလင်းပါသည် - မျိုးဆက်သစ်များကြားတွင် သူတို့၏ စွမ်းအားနှင့် ဩဇာသည် ထိပ်ဆုံးတွင်ရှိကြောင်း သက်သေပြရန်ပင်။

အောင်ပွဲတစ်ခုစီတိုင်းသည် ဂိုဏ်းအတွင်းရှိ အခြေအနေကို သူတို့လက်ထဲသို့ ပိုမိုရောက်ရှိသွားစေသည်။

ယခု ချူကျီယန်ကို အနိုင်ယူပြီးနောက် သူတို့၏ နောက်ထပ်နှင့် အကြီးမားဆုံး ပစ်မှတ်မှာ ပိုင်ရွှယ်ချင်း ဖြစ်နေသည်။

သူမသာ ရှုံးနိမ့်သွားခဲ့လျှင် ကောင်းကင်ဓားဂိုဏ်း၏ လေးစားအားကျရဆုံး တပည့်ဟူသော ပုံရိပ်မှာ အစိတ်စိတ်အမွှာမွှာ ပျက်စီးသွားပေမည်။

၎င်းသည် အကွက်ချစီစဉ်ထားသော ခြေလှမ်းတစ်ခုလည်း ဖြစ်သည်။

၎င်းမှာ သူ့အစ်မကို နှိမ်နင်းရန်သာမကပေ။

ပိုင်ကျီဟန်နှင့် ပိုင်မျိုးနွယ်စု အပါအဝင် ဂိုဏ်းခေါင်းဆောင်ဘက်တော်သား အားလုံးကို သတိပေးချက် ပေးပို့လိုက်ခြင်းပင် ဖြစ်သည်။

ပိုင်ကျီဟန်၏ နှုတ်ခမ်းဖျားမှ ထက်ရှပြီး အေးစက်သော ရယ်သံလေးတစ်ခု ထွက်ပေါ်လာသည်။

"ဒါက သူတို့ရဲ့ ကစားကွက်ပေါ့... စိတ်ဝင်စားစရာပဲ။"

သူ့မျက်လုံးများသည် မှောင်မှောင်မှိုင်းမှိုင်းဖြစ်သွားပြီး လူသတ်ချင်စိတ်များ ဖြတ်ပြေးသွားသည်။

"ငါ့အစ်မကို နင်းပြီး အထက်တက်ဖို့ ကြံနေတာလား?"

သူသည် အစီရင်ခံစာကို ဖြည်းညှင်းစွာ ချလိုက်ပြီး အပြုံးများ ပျောက်ကွယ်သွားကာ “ကောင်းပြီလေ... သူ ဘာတွေစွမ်းလဲဆိုတာ သွားကြည့်ကြတာပေါ့”