ကောင်းကင်ဓားဂိုဏ်းကို တုန်ဟိန်းသွားစေသည့် စိန်ခေါ်မှု

တပည့်အပေါင်းသည် အုန်းအုန်းကျွက်ကျွက် စုဝေးရောက်ရှိနေကြပြီး ပြင်ပတပည့်၊ အတွင်းတပည့်များသာမက အဓိကတပည့်များပင် ထိုဆူညံပွက်လောရိုက်နေသည့် အခြေအနေကို လာရောက်ကြည့်ရှုနေကြသည်။

ဖြစ်ပျက်နေသည်များကို လာရောက်စုံစမ်းသည့် တပည့်တစ်ဦးမှာ ဇဝေဇဝါဖြစ်နေရှာသည်။

သူသည် အနီးနားရှိ တပည့်များအား လူအများအပြား အဘယ်ကြောင့် ဤနေရာတွင် စုဝေးနေကြသနည်းဟု မေးမြန်းလိုက်သည်။

အကြောင်းစုံကို သိရှိထားသူများကလည်း သူတို့ကြားထားသမျှကို စိတ်အားထက်သန်စွာ ပြန်လည်ပြောပြကြရာ နားထောင်သူ၏ မျက်နှာသည် စူးစမ်းလိုစိတ်မှသည် မယုံကြည်

နိုင်မှုသို့ ပြောင်းလဲသွားတော့သည်။

မကြာမီ ဤဆူညံပွက်လောရိုက်မှု၏ နောက်ကွယ်မှ အကြောင်းရင်းကို သူတို့ သိရှိသွားကြသည်။

၎င်းမှာ အခြားသူမဟုတ်— ပိုင်ကျီဟန် ပင် ဖြစ်သည်။

ထိုပိုင်ကျီဟန်ဆိုသည့် အမည်သည် ပေါ်ထွက်လာလေရာ၌ အံ့ဩခြင်း၊ ကြောက်ရွံ့ခြင်းနှင့် ဖရိုဖရဲဖြစ်ခြင်းတို့ကို တစ်ပါတည်း သယ်ဆောင်လာမြဲဖြစ်သည်။

မကြာသေးမီက ပိုင်ကျီဟန်သည် အနည်းငယ် ငြိမ်သက်နေပုံရသော်လည်း ရှန်လျန့်ကို အရုပ်တစ်ခုလို ကစားပြီး ဒုက္ခိတဖြစ်အောင် လုပ်ခဲ့သည့် ဖြစ်ရပ်ကို မည်သူက မေ့နိုင်မည်

နည်း။

ထို့အပြင် ပိုင်ကျီဟန်ကို နာမည်ဖျက်ရန် ကြိုးစားခဲ့သဖြင့် တစ်မျိုးနွယ်လုံး နီးပါး ပျက်စီးသွားခဲ့ရသည့် မိန်မျိုးနွယ်စု

အရေးကိစ္စလည်း ရှိသေးသည်။

ယခုအခါ လူတိုင်းသည် ပိုင်ကျီဟန်နှင့် ပတ်သက်လျှင် အထူးသတိထားရမည်ကို သိရှိနေကြပြီဖြစ်သည်။

ယခုမူ ထိုပိုင်ကျီဟန်သည် စီနီယာ လုရှန်ယွမ်ကို စိန်ခေါ်ရန် ရောက်ရှိလာခြင်း ဖြစ်သည်။ အကြောင်းရင်းမှာ?

ပိုင်ကျီဟန်ထက် အသက်နှစ်ဆနီးပါးကြီးသော လုရှန်ယွမ်သည် သူ၏ စေ့စပ်ထားသူ ချုကျီယန်ကို တိုက်ခိုက်ခဲ့သောကြောင့်ပင်။

ပိုင်ကျီဟန်သည် ထိုမျှနှင့် ရပ်မနေပေ။

စိန်ခေါ်မှုကို ပို၍ ထိရှစေရန် စော်ကားသောစကားများကိုလည်း အများအပြား ထည့်သွင်းပြောဆိုခဲ့သည်။

"လူကြီးတစ်ယောက်က ကလေးတစ်ယောက်ကို ရိုက်ပြီး အနိုင်ရတာကို ဂုဏ်ယူနေလို့ ရမလား? ဒါမှမဟုတ် လုရှန်ယွမ်က သူ့အသက်အရွယ်တူတူ လူတစ်ယောက်နဲ့ ရင်ဆိုင်ရမှာကို အသေအလဲ ကြောက်နေလို့လား?" သူက လှောင်ပြောင်သည့်သဘောဖြင့် မေးခွန်းထုတ်ခဲ့သည်။

ထိုနှိုင်းယှဉ်ချက်ကို အသုံးပြု၍ ပိုင်ကျီဟန်သည် လုရှန်ယွမ်ထက် များစွာငယ်ရွယ်သော ချုကျီယန်ကို တိုက်ခိုက်ခဲ့သည့် လုရှန်ယွမ်၏ အရှက်မရှိမှုကို ပြောင်လှောင်ခဲ့သည်။ ထို့ပြင် သူသည် ချုကျီယန်၏ စေ့စပ်ထားသူဟူသော ဂုဏ်ပုဒ်ကို အသုံးချကာ လုရှန်ယွမ်သည် သူ့ဇနီးလောင်းကို အနိုင်ကျင့်ဝံ့သည့်အတွက် သူမကိုယ်စား ကာကွယ်လက်စားချေမည်ဟု ကြေညာခဲ့သည်။

၎င်းမှာ ပိုင်ကျီဟန်အတွက် စိန်ခေါ်မှုပြုလုပ်ရန် ခိုင်လုံသော အကြောင်းပြချက်ဖြစ်စေရုံသာမက အထူးသဖြင့် အမျိုးသမီးတပည့်များကြားတွင် သူ၏ပုံရိပ်ကို တစ်ခဏချင်း ကောင်းမွန်သွားစေသည်။ မိမိချစ်သူအတွက် မားမားမတ်မတ် ရပ်တည်ပေးပြီး တရားမျှတမှု ရှာဖွေပေးသည့် အမျိုးသားတစ်ဦးအဖြစ် သယောင်ယမ်းကာ စိတ်ကူးယဉ်မိသွားကြသည်။

လုရှန်ယွမ်သည် ဤစိန်ခေါ်မှုကို တုံ့ပြန်ခြင်း ရှိ၊ မရှိမှာမူ စောင့်ကြည့်ရဦးမည် ဖြစ်သည်။

စိန်ခေါ်ပွဲစင်မြင့်ရှေ့တွင် မားမားမတ်မတ် ရပ်နေသော ပိုင်ကျီဟန်၏ အသံမှာ ဝင်းအတွင်း ပြန့်လွင့်သွားပြီး ရှင်းလင်းကာ ယုံကြည်ချက် အပြည့်ရှိနေသည်။

"သူက ကိုယ့်ထက် ငယ်တဲ့သူတွေကို အနိုင်ကျင့်ရတာ ဝါသနာပါမှတော့ ငါ့ကိုလည်း အဲဒီလို လုပ်နိုင်မလား ကြည့်ရတာပေါ့။ လုရှန်ယွမ် ဒီကိုလာပြီး ငါ့စိန်ခေါ်မှုကို တုံ့ပြန်ဖို့ အချိန်တစ်နာရီ ပေးမယ်။"

သူ၏ လေသံသည် တည်ငြိမ်သော်လည်း လူအုပ်၏ စကားသံများကို ဖြတ်တောက်သွားနိုင်လောက်အောင် ထက်ရှလှသည်။

"အကယ်၍ သူသာ ရောက်မလာဘူးဆိုရင်တော့ ကြောက်တတ်တဲ့ ကြက်မတစ်ကောင်ထက် မပိုဘူးလို့ပဲ သတ်မှတ်လိုက်မယ်။"

ထိုသို့ပြောပြီးနောက် ပိုင်ကျီဟန်သည် ထိုနေရာမှ ထွက်ခွာသွားခဲ့သည်။

လုရှန်ယွမ်နှင့် ဂိုဏ်းခေါင်းဆောင်ဆန့်ကျင်ရေးအုပ်စုတို့သည် ဤစိန်ခေါ်မှုကို လက်ခံရန်မှတစ်ပါး အခြားရွေးချယ်စရာ မရှိကြောင်း သူသိသည်။

သို့မဟုတ်ပါက သူတို့ ကြိုးပမ်းခဲ့သမျှ အချည်းနှီး ဖြစ်သွားရုံသာမက သူတို့သာ အနိုင်ရခဲ့လျှင် ၎င်းမှာ သူတို့အတွက် အခွင့်အရေးကောင်းတစ်ခုလည်း ဖြစ်နေသောကြောင့်ပင်။

ခဏချင်းမှာပင် ထိုသတင်းသည် ဂိုဏ်းတစ်ခုလုံးသို့ တောမီးပမာ ပျံ့နှံ့သွားတော့သည်။

တပည့်များ၏ လက်ထဲရှိ အသံလွှင့်အဆောင်စာလိပ်များ လင်းထိန်လာပြီး တောင်ထိပ်တစ်ခုမှ တစ်ခုသို့ သတင်းစကားများ ပေးပို့နေကြသည်။

"ပိုင်ကျီဟန်က စီနီယာ လုရှန်ယွမ်ကို စိန်ခေါ်လိုက်ပြီ! အခု ပင်မစိန်ခေါ်ပွဲစင်မြင့်မှာ စောင့်နေတယ်”

"စီနီယာလု တစ်နာရီအတွင်း ရောက်မလာရင် ကြောက်တတ်တဲ့ ကြက်မလို့ ခေါ်မယ်တဲ့”

"ပိုင်ကျီဟန်က သူ့စေ့စပ်ထားသူကို တကယ်တန်ဖိုးထားတာပဲ။ စီနီယာ လုရှန်ယွမ်ကိုတောင် တိုက်ခိုက်ဖို့ ဝန်မလေးဘူး”

တံခါးပိတ်ကျင့်ကြံနေသော တပည့်များသည်ပင် စူးစမ်းလိုစိတ်ကို မထိန်းနိုင်ဘဲ သူတို့၏ ဂူများအတွင်းမှ ထွက်လာကြသည်။

ကျင့်ကြံခြင်းများကို ရပ်နားကာ ဟောပြောပွဲများကို အနှောင့်အယှက်ပေးလျက် အကြီးအကဲများပင် နှစ်ပေါင်းများစွာအတွင်း အပြင်းထန်ဆုံး စိန်ခေါ်ပွဲဖြစ်လာနိုင်သည့် ထိုဖြစ်ရပ်ကို သက်သေအဖြစ် ကြည့်ရှုရန် ရောက်ရှိလာကြသည်။

တစ်ဦးမှာ ဂိုဏ်း၏ သက်တမ်းအရင့်ဆုံးနှင့် အသန်မာဆုံး တပည့်တစ်ဦးဖြစ်ပြီး အခြားတစ်ဦးမှာမူ အငယ်ဆုံးများထဲတွင် ပါဝင်သော်လည်း အင်အားအကြီးဆုံးစာရင်းဝင် ဖြစ်သည်။

သူတို့၏ တိုက်ပွဲမှာ သာမန်တိုက်ပွဲတစ်ခု ဖြစ်လာမည်မဟုတ်သည်မှာ သေချာလှသည်။

မကြာမီမှာပင် ထိုသတင်းသည် အကြီးအကဲ ချင်းလန်၏ တပည့်များ နေထိုင်ရာ တိတ်ဆိတ်သော ဝင်းအတွင်းသို့ ရောက်ရှိသွားသည်။

ဓားရေးလေ့ကျင့်မှုမှ ပြန်ရောက်လာသော ပိုင်ရွှယ်ချင်းသည် အခြားတပည့်တစ်ဦးထံမှ သတင်းကို ကြားလိုက်ရသည်။

နားထောင်ပြီးသောအခါ သူမ၏ မျက်လုံးများ အနည်းငယ် ကျယ်သွားပြီး တည်ငြိမ်အေးဆေးလှသော မျက်နှာပေါ်တွင် အံ့ဩမှုများ ဖြတ်ပြေးသွားသည်။

သူမသည် လျင်မြန်စွာ လှည့်လိုက်ရာ ဆံပင်ရှည်များသည် ပိုးသားမြစ်တစ်စင်းကဲ့သို့ ဝှေ့ယမ်းသွားသည်။

"ကျီယန်အာ”

ပိုင်ရွှယ်ချင်းသည် သူမ၏ သူငယ်ချင်းကျင့်ကြံနေသည့် ဘေးချင်းကပ်ဝင်းအတွင်းသို့ လှမ်းခေါ်ရင်း ဝင်လာခဲ့သည်။

ပိုင်ရွှယ်ချင်းချဉ်းကပ်လာသောအခါ ချုကျီယန်သည် မျက်လုံးများကို ဖွင့်လိုက်ပြီး သူမ၏ အကြည့်များမှာ တည်ငြိမ်နေသော်လည်း အားနည်းမှုအရိပ်အယောင်အချို့ ကျန်ရှိနေသေးသည်။

လုရှန်ယွမ်နှင့် တိုက်ပွဲကြောင့် သူမ၏ ခန္ဓာကိုယ်မှာ အပြည့်အဝ ပြန်မကောင်းသေးသော်လည်း သူမ၏ စိတ်ဓာတ်မှာမူ မပျက်စီးသေးပေ။

"အင်း?"

သူမက ခပ်တိုးတိုး မေးလိုက်သည်။

"နင် ကြားပြီးပြီလား?"

ပိုင်ရွှယ်ချင်း၏ နှုတ်ခမ်းများ အနည်းငယ် ကွေးညွှတ်သွားပြီး သူမ၏ အသံတွင် မဖုံးကွယ်နိုင်သော စိတ်လှုပ်ရှားမှုများ ပါဝင်

နေသည်။

"ပိုင်ကျီဟန်က လုရှန်ယွမ်ကို စိန်ခေါ်လိုက်ပြီ။"

"...သူက ဘာလုပ်တယ်”

ချုကျီယန် မျက်တောင်ခတ်လိုက်မိသည်။

"သူက စိန်ခေါ်ပွဲစင်မြင့်ကို တန်းသွားပြီး လူတိုင်းရှေ့မှာ ကြေညာလိုက်တာ”

ပိုင်ရွှယ်ချင်းက ဆို၏

“သူ့ထက် အသက်နှစ်ဆနီးပါးကြီးတဲ့ လုရှန်ယွမ်က နင့်ကို တိုက်ခိုက်ဝံ့တဲ့အတွက် သူကိုယ်တိုင် သင်ခန်းစာပေးမယ်တဲ့။"

ပိုင်ကျီဟန်က လုရှန်ယွမ်ရောက်မလာလျှင် 'ကြောက်တတ်တဲ့ ကြက်မ'ဟု ခေါ်မည်ဆိုသည့် အပိုင်းကိုတော့ ပိုင်ရွှယ်ချင်းချန်လှပ်ထားလိုက်သည်။

ထိုစကားကို ကြားသောအခါ ချုကျီယန်၏ စိတ်ထဲတွင် နွေးထွေးမှုတစ်ခု ဖြတ်ပြေးသွားသော်လည်း ပိုင်ကျီဟန်၏ ရည်ရွယ်ချက်မှာ ထိုမျှနှင့် ရိုးရှင်းမည်မဟုတ်ကြောင်း သူမသိသည်။

သူမအတွက် လက်စားချေပေးရန် အရာအားလုံးကို စွန့်စားရလောက်အောင် အထိ သူမသည် သူ၏နှလုံးသားထဲတွင် အရေးမပါသေးကြောင်း ကောင်းစွာ သိရှိထားသည်။

ယင်းထက် ၎င်းသည် ဂိုဏ်းခေါင်းဆောင်ဆန့်ကျင်ရေးအုပ်စုနှင့် သက်ဆိုင်နေနိုင်ပြီး ပိုင်ရွှယ်ချင်းနှင့်ပင် ပတ်သက်နေနိုင်သည်ဟု သူမ သံသယဝင်မိသည်။

အသိဉာဏ်ရှိသူတိုင်း လုရှန်ယွမ်၏ နောက်ထပ်ပစ်မှတ်မှာ ပိုင်ရွှယ်ချင်းဖြစ်လာမည်ကိုသိကြပြီး ပိုင်ရွှယ်ချင်းကိုယ်တိုင်လည်း ထိုတိုက်ပွဲအတွက် အပြင်းအထန် လေ့ကျင့်နေခဲ့ခြင်း ဖြစ်သည်။

ထို့ကြောင့် ပိုင်ကျီဟန်၏ စိန်ခေါ်မှုသည် လုရှန်ယွမ်၏ အစီအစဉ်များကို မစတင်မီကပင် ဖျက်ဆီးပစ်ရန် ဖြစ်နိုင်သည်ဟု ချုကျီယန် တွေးတောမိသည်။

အေးဆေးတည်ငြိမ်သော ချုကျီယန်၏ မျက်နှာပေါ်တွင် ရှက်သွေးဖြာလာသည်ကို ကြည့်ရင်း ပိုင်ရွှယ်ချင်းက ကျီစယ်သည့် အပြုံးဖြင့်ပြောလေ၏

"ကဲ... ကြည့်ရတာ တစ်ဂိုဏ်းလုံးက နင်တို့နှစ်ယောက်အကြောင်းပဲ ပြောနေကြတာပဲ။"

သူမက ပေါ့ပေါ့ပါးပါး ပြောလိုက်သော်လည်း ထိုစကားများနောက်ကွယ်တွင် ဖော်ပြရန် ခက်ခဲသော ခံစားချက်တစ်ခု ပါဝင်နေသည်။

"ပိုင်ကျီဟန်က သူ့စေ့စပ်ထားသူရဲ့ ဂုဏ်သိက္ခာအတွက် ဂိုဏ်းရဲ့ အသန်မာဆုံး စီနီယာတွေထဲက တစ်ယောက်ကို စိန်ခေါ်ရဲတယ်တဲ့။ ဘယ်လောက်တောင် ရိုမန့်တစ်ဆန်လိုက်

သလဲ”

ချုကျီယန် သက်ပြင်းကို ခပ်ဖွဖွ ချလိုက်သည်။

"နင်ပြောတာက သူက ငါ့ကို ချစ်လို့ လုပ်နေတဲ့အတိုင်းပဲ။"

"မဟုတ်ဘူးလား?"

ပိုင်ရွှယ်ချင်းသည် ခေါင်းကို အနည်းငယ် စောင်းကာ မျက်လုံးလေးများ မှေးလျက် ကျီစယ်လိုက်သည်။

"အနည်းဆုံးတော့ လူတိုင်းက အဲဒီလိုပဲ ထင်နေကြတာ။ ပိုင်ကျီဟန်က သူ့ရဲ့ ချစ်လှစွာသောသူကို ဘယ်သူ့မှ လက်ဖျားနဲ့တောင် မထိစေချင်ဘူးဆိုတဲ့ ရိုမန့်တစ်ဆန်တဲ့ အမူအရာပေါ့။ မှော်လမင်းတောင်ထိပ်က စီနီယာမမတွေဆိုရင် စိတ်ကူးယဉ်ပြီး ကြွေနေကြတာ။"

ချုကျီယန် သက်ပြင်းချလိုက်မိတော့သည်။

"သူတို့တွေ အရမ်းတွေးနေကြတာပါ။ နင်လည်း သိတာပဲ၊ သူက ခိုင်လုံတဲ့ အကြောင်းပြချက်မရှိဘဲ ဘာမှလုပ်လေ့ရှိတဲ့သူ မဟုတ်ဘူးဆိုတာ။"

ပိုင်ရွှယ်ချင်းသည် ခပ်တိုးတိုး ရယ်မောလိုက်သော်လည်း သူမ၏ ရင်ထဲတွင် တစ်ခုခုက ရစ်ပတ်နှောင်ဖွဲ့ထားသကဲ့သို့ ခံစားနေရသည်။ ထိုသတင်းကို ကြားလိုက်ရချိန်တွင် သူမ၏စိတ်ထဲ၌ မနာလိုစိတ်အနည်းငယ် ဖြတ်ပြေးသွားသည်ကို ငြင်းပယ်၍မရပေ။

အေးစက်ပြီး ရက်စက်တတ်ကာ အမြဲတမ်းလိုလို သီးသန့်နေတတ်သူ ပိုင်ကျီဟန် - သူမ၏ မောင်အရင်းဖြစ်သော်လည်း သူမအပေါ် တစ်ခါမျှ ထိုကဲ့သို့သော သံယောဇဉ်မျိုး မပြသခဲ့ဖူးပေ။

ပိုင်ကျီဟန်သည် ချစ်ခြင်းမေတ္တာကြောင့် လုပ်ဆောင်ခြင်း မဟုတ်နိုင်သော်လည်း

ဤကဲ့သို့ လူသိရှင်ကြား လှုပ်ရှားမှုမျိုး ပြုလုပ်ခဲ့ခြင်းအရ ချုကျီယန်သည် သူ၏နှလုံးသားနှင့် သူ၏အစီအစဉ်များထဲတွင် အရေးပါသော အခန်းကဏ္ဍမှ ပါဝင်နေသည်မှာ အမှန်ပင်။

အကြောင်းမှာ များသောအားဖြင့် သူသည် အခြားရွေးချယ်စရာမရှိမှသာ ဤကဲ့သို့ ရှေ့ထွက် လုပ်ဆောင်လေ့ရှိပြီး ကျန်အချိန်များတွင် နောက်ကွယ်မှသာ ကစားကွက်ဆင်တတ်သူ ဖြစ်သောကြောင့်ပင်။

အကယ်၍ ပိုင်ကျီဟန်၏ ရည်ရွယ်ချက်သည် ဂိုဏ်းခေါင်းဆောင်ဆန့်ကျင်ရေးအုပ်စုကို တိုက်ခိုက်ရန် သက်သက်သာဆိုလျှင် ထိရောက်သော အခြားနည်းလမ်းများစွာ ရှိသေးပေသည်။

သို့သော် ထိုရည်ရွယ်ချက်တစ်ခုတည်း မဟုတ်ဘဲ ချုကျီယန်ကို ပစ်မှတ်ထားမည့်သူများကို သတိပေးရန်အတွက်ပါ

လုရှန်ယွမ်ကို စိန်ခေါ်နေခြင်းဖြစ်သည်။

အနည်းဆုံးတော့ ပိုင်ရွှယ်ချင်းအနေဖြင့် ထိုသို့သာ ခံစားရသည်။

"အင်းလေ... သူက ခိုင်လုံတဲ့ အကြောင်းပြချက်မရှိဘဲတော့ မလှုပ်ရှားဘူးပေါ့။"

ကောင်းကင်ဓားဂိုဏ်း၏ တိမ်တောင်ထိပ်အဆောင် အတွင်း၌ ဝိညာဉ်စွမ်းအင်များ သိပ်သည်းနေသကဲ့သို့ တင်းမာမှုများလည်း မြင့်တက်နေသည်။

ဤနေရာသည် ဂိုဏ်းခေါင်းဆောင်ဆန့်ကျင်ရေးအုပ်စု၏ အစည်းအဝေးပြုလုပ်ရာ နေရာဖြစ်ပြီး လက်ရှိတွင် လေထုသည် တည်ငြိမ်မှုနှင့် အလှမ်းဝေးလျက်ရှိသည်။

အကြီးအကဲတစ်စုနှင့် အမာခံတပည့်များသည် ကျောက်စိမ်းဝိုင်းစားပွဲတစ်ခုတွင် ဝိုင်းထိုင်နေကြပြီး သူတို့၏ မျက်နှာများတွင် အကွက်ချတွက်ချက်နေမှုများနှင့် စိတ်မရှည်မှု အရိပ်အယောင်များ ရောယှက်နေသည်။

အပေါ်ထပ်တစ်ခုလုံးကို အသံလုံမန္တန်များ ဖြင့် ဖုံးအုပ်ထားသဖြင့် အတွင်းမှ ပြောဆိုသမျှကို အပြင်လူများ ကြားနိုင်မည် မဟုတ်ပေ။

စားပွဲ၏ ထိပ်ဆုံးနေရာတွင် အကြီးအကဲ ဝူဟမ်ထိုင်နေသည်။ သူ၏ဆံပင်များတွင် အဖြူရောင်အစင်းကြောင်းများ ပါဝင်သော်လည်း ခန္ဓာကိုယ်မှာမူ တက်ကြွလှုပ်ရှားနေသည့် ထက်မြက်သော မျက်လုံးပိုင်ရှင် တစ်ဦးဖြစ်သည်။

သူသည် ဂိုဏ်းခေါင်းဆောင် ထျန်းယုဟန်ကို အပြင်းထန်ဆုံး ဆန့်ကျင်သူများထဲမှ တစ်ဦးဖြစ်သည်။ သူတို့၏ ခေါင်းဆောင်ဖြစ်သူ အကြီးအကဲဟန် မရှိခိုက်တွင် သူကပင် ဦးဆောင်နေခြင်းဖြစ်သည်။

သူသည် လက်တင်ခုံကို စည်းချက်ကျကျ တောက်လိုက်ရင်း... "ဒါဆို... ပိုင်ကျီဟန်က လုရှန်ယွမ်ကို တကယ်ပဲ စိန်ခေါ်လိုက်တာပေါ့?"

"ဟုတ်တယ်" ပညာရှိပုံစံပေါက်သော်လည်း ပါးလျသော ကျင့်ကြံသူတစ်ဦးသည် လှောင်ပြုံးဖြင့် ပြန်ဖြေသည်။ "လူအများကြီးရှေ့မှာ ကြေညာသွားတာပါ။ တစ်နာရီပဲ အချိန်ပေးမယ်တဲ့။ အမြဲတမ်းလိုပဲ ထောင်လွှားနေတာပဲ။"

အကြီးအကဲ ဝူဟမ်၏ နှုတ်ခမ်းများသည် အပေါ်သို့ တွန့်တက်သွားသည်။

"ထောင်လွှားတာ ဟုတ်တယ်... ဒါပေမဲ့ အဲဒီထောင်လွှားမှုက ငါတို့အတွက် အသုံးဝင်နိုင်တယ်။"

သူသည် ကုလားထိုင်ပေါ်တွင် နောက်သို့ မှီလိုက်ရင်း မျက်မှောင်ကြုတ်ကာ အဓိပ္ပာယ်ပါသော အကြည့်ဖြင့်... "အကယ်၍ လုရှန်ယွမ်သာ နိုင်သွားရင် ပိုင်မျိုးနွယ်စုရဲ့ ရတနာလို ပါရမီရှင်ကို အရှက်ခွဲပြီးသား ဖြစ်သွားမယ်။ ပိုင်ရွှယ်ချင်းက ကောင်းမွန်တဲ့ ပစ်မှတ်တစ်ခု ဖြစ်ပေမဲ့ အမွေခံဖြစ်တဲ့ ပိုင်ကျီဟန်ကို နှိမ်နင်းနိုင်တာကလည်း အရေးပါတာပဲ။ ဒါ့အပြင် ရှန်မျိုးနွယ်စုကလည်း ဒီသတင်းကို ကြားရင် အရမ်းဝမ်းသာသွားမှာ။"

စားပွဲဝိုင်းရှိသူများထံမှ သဘောတူညီသည့် တိုးတိုးသံများ ထွက်ပေါ်လာသည်။ ငွေရောင်ဆံပင်ရှည်များနှင့် အကြီးအကဲ ချူလန်ရင်ဟုခေါ်သော အမျိုးသမီး အကြီးအကဲတစ်ဦးက အနည်းငယ် မျက်မှောင်ကြုတ်လျက်— "ဒါပေမဲ့ အကြီးအကဲဝူ၊ ပိုင်ကျီဟန်ကို လျှော့တွက်လို့ မရဘူးနော်။ အကယ်၍ လုရှန်ယွမ်သာ ရှုံးသွားရင် ပိုင်မျိုးနွယ်စုရဲ့ ဩဇာက ပိုပြီးတော့တောင် ကြီးထွားလာလိမ့်မယ်။"

ဝူဟန်က ခပ်တိုးတိုးနှင့် အေးစက်စွာ ရယ်လိုက်သည်။

"ပိုင်ကျီဟန်က အင်အားကြီးတယ်ဆိုပေမဲ့ လုရှန်ယွမ်ကို အနိုင်ယူနိုင်ပါ့မလား? ပြီးတော့ လုရှန်ယွမ် အောင်ပွဲက ရာနှုန်းပြည့် သေချာစေဖို့ ငါ့မှာ နည်းလမ်းရှိပါတယ်။"ဤစကားကြောင့် ကန့်ကွက်သူများအားလုံး တိတ်ဆိတ်သွားကြသည်။ လုရှန်ယွမ်သည် ကောင်းကင်ဓားဂိုဏ်း၏ အသန်မာဆုံးတပည့် ဖြစ်နေသလို ဝူဟမ်၏ အာမခံချက်ပါ ရှိနေသဖြင့် စိုးရိမ်စရာ မရှိတော့ဟု ယူဆလိုက်ကြသည်။

သူသည် ထောင့်တစ်နေရာတွင် တိတ်ဆိတ်စွာ ရပ်နေသော အစေခံတစ်ဦးထံသို့ အကြည့်ကို လွှဲလိုက်၏

"သွား... လုရှန်ယွမ်ကို အသိပေးလိုက်။ အခု တစ်ဂိုဏ်းလုံးက သူ့ကို စောင့်ကြည့်နေပြီလို့။ ဒါက အခြားဩဇာလွှမ်းမိုးမှုအားလုံးကို အမြစ်ပြတ်ဖျက်ဆီးပြီး တပည့်အားလုံး ငါတို့အုပ်စုဘက် ပါလာအောင် လုပ်ဖို့ အကောင်းဆုံး အခွင့်အရေးပဲလို့ ပြောလိုက်။"