အခန်း (၂၂၇-၂၂၈)

အခန်း (၂၂၇) ကျင့်ကြံသူများ လေလံပွဲ

ဝူတာဟန်က ပွင့်ပွင့်လင်းလင်းပင် ခေါင်းငြိမ့်ပြလိုက်သည်။

"ဒီလောက်အဆင့်အတန်းရှိတဲ့ တိမ်တိုက်မယ်ပန်းကို ရွှေတိမ်တိုက်ဂိုဏ်းရဲ့ နတ်သားတော်တွေဆီမှာပဲ ရှိနိုင်တာပါ။ အဲဒါကိုမှ ဒီမိုးကြိုးနဂါးလှံနဲ့ပါ ပေါင်းလိုက်ရင်တော့...

ဒီဂိုဏ်းနှစ်ခုက အကြီးအကဲတွေ လာရောက်ပြီး ကျွန်တော်တို့ရဲ့ လေလံပွဲကို ဖျက်ဆီးပစ်ကြမှာ စိုးရိမ်မိပါတယ်"

"ဘာကြောက်စရာရှိလဲ........... ဒါတွေက ငါ့ရဲ့ စစ်သုံ့ပန်း ပစ္စည်းတွေပဲ။ ငါ့ရဲ့ ကိုယ်ပိုင်ပစ္စည်းကို ငါ့ဘာသာ စီမံတာ ဘာမှားလို့လဲ..........."

မုန့်ဝမ်၏ အမူအရာမှာ တည်ငြိမ်နေသည်။ "နင် လုပ်စရာရှိတာသာ ဆက်လုပ်ပါ။ အဲဒီ အဘိုးကြီးတွေ တကယ်ပဲ လာနှောင့်ယှက်ရဲရင် ငါ့မှာ ရင်ဆိုင်ဖို့ နည်းလမ်းရှိပြီးသား။ နင် ငါ့ကို ဒါပဲပြော၊ ဒီလေလံပွဲကို အောင်မြင်အောင် လုပ်နိုင်မလား၊ မလုပ်နိုင်ဘူးလား..........."

ဝူတာဟန်မှာ ထိတ်လန့်သွားသော်လည်း မုန့်ဝမ်၏ ယုံကြည်ချက်ရှိမှုကို မြင်သောအခါ စိတ်အေးသွားရသည်။

သူက ရင်ဘတ်ကို ပုတ်ကာ "နတ်သမီး စိတ်မပူပါနဲ့။ ဘယ်သူမှ လာမနှောင့်ယှက်သရွေ့တော့ ဒီရတနာတွေရှိနေရင် လေလံပွဲက သေချာပေါက် အောင်မြင်မှာပါ..........." ဟု ဆိုလိုက်သည်။

မုန့်ဝမ်က ခေါင်းအသာငြိမ့်လိုက်ပြီး "ဒီလေလံပွဲရဲ့ အသေးစိတ် အစီအစဉ်ကို ပြောပြဦး" ဟု မေးလိုက်သည်။

ဝူတာဟန်က အမြန်တွက်ချက်ပြီးနောက် စီမံချက်တစ်ခုကို တင်ပြလာသည်။

"ကျွန်တော်တို့ နတ်သမီးရဲ့ နာမည်ကို တိုက်ရိုက် သုံးလို့ရပါတယ်။ ဒီလေလံပွဲကို နတ်သမီးကိုယ်တိုင် စီစဉ်တာလို့ ကြေညာပြီး ရတနာတွေရဲ့ သတင်းကို လွှင့်လိုက်မယ်ဆိုရင် ကျင့်ကြံသူတွေ အများကြီးကို ဆွဲဆောင်နိုင်မှာပါ" သူက ခေတ္တရပ်ကာ သတိကြီးစွာဖြင့် ထပ်လောင်းပြောဆိုသည်

"အကျိုးအမြတ် ခွဲဝေမှုအနေနဲ့ကတော့... အရောင်းအဝယ်တိုင်းကနေ ၆ ရာခိုင်နှုန်း ဖြတ်မယ်လို့ ကျွန်တော် ထင်ပါတယ်။ အဲဒီထက် များသွားရင်တော့ လူတွေ ဝယ်ချင်ကြမှာ မဟုတ်ဘူး"

မုန့်ဝမ်က သဘောတူလိုက်သည် "ဒါတွေကိုတော့ နင်ပဲ ဆုံးဖြတ်လိုက်ပါ။ အားလုံးပြီးသွားရင်တော့ အမြတ်ထဲက သုည ဒသမ ငါး ရာခိုင်နှုန်းကို နင် ရလိမ့်မယ်"

ဝူတာဟန်က ဝမ်းသာအားရ ကျေးဇူးတင်လိုက်သည် "ကျေးဇူးတင်ပါတယ် နတ်သမီး။ ဒီပွဲကို အခမ်းနားဆုံး အောင်မြင်အောင် ကျွန်တော် အစွမ်းကုန် ကြိုးစားပါ့မယ်"

နောက်ရက်အနည်းငယ်အတွင်း ရွှမ်ယင်ရတနာခန်းမမှာ အတွင်းရော အပြင်ပါ အလွန်စည်ကားနေတော့သည်။

ဝူတာဟန်ကိုယ်တိုင် ကြီးကြပ်ပြီး ထူးခြားဆန်းသစ်သော ဖိတ်စာများကို ပြုလုပ်စေကာ နည်းလမ်းမျိုးစုံဖြင့် လေလံပွဲသတင်းကို ပျံ့နှံ့အောင် လုပ်ဆောင်ခဲ့သည်။

ဈေးတန်းအတွင်း၌ ရွှမ်ယင်ဂိုဏ်းမှ သွေးလမ်းစဉ် နတ်သမီး လေလံပွဲ ကျင်းပမည့်သတင်းမှာ တောမီးပမာ ဟိုးလေးတကျော် ဖြစ်သွားပြီး နေရာအနှံ့သို့ ရောက်ရှိသွားတော့သည်။

တစ်ချိန်တည်းမှာပင် ဈေးတန်းရှိ လက်ဖက်ရည်ဆိုင်တစ်ခု၌ အခြေခံတည်ဆောက်ခြင်းအဆင့် ကျင့်ကြံသူအချို့ စုဝေးစကားပြောနေကြသည်။

"ကြားပြီးကြပြီလား........... ဟိုတစ်နေ့က ဈေးတန်းထဲမှာ လူသတ်ခဲ့တဲ့ မိစ္ဆာကျင့်ကြံသူမက လေလံပွဲ လုပ်မလို့တဲ့။ ဒီသတင်းက အစစ်ရော ဟုတ်ရဲ့လား မသိဘူး" ဆိတ်မုတ်ဆိတ်နှင့် ကျင့်ကြံသူတစ်ဦးက သံသယမျက်လုံးများဖြင့် တိုးတိုးလေး မေးလိုက်သည်။

"အေးလေ... ထူးဆန်းလိုက်တာ။ ဘာလို့ အကြောင်းရင်းမရှိဘဲ လေလံပွဲ လုပ်တာလဲ........... ဘာလှည့်ကွက်တွေ သုံးဦးမလို့လဲ မသိဘူး" နောက်တစ်ဦးကလည်း သတိကြီးစွာဖြင့် ဝင်ပြောသည်။

"ဘယ်သူသိမှာလဲ........... ဒီမိစ္ဆာကျင့်ကြံသူတွေထဲမှာ လူကောင်း မရှိပါဘူး။ တစ်ခုခုတော့ ကြံစည်နေတာ ဖြစ်မှာပေါ့" အသားရောင်ဝတ်စုံနှင့် ကျင့်ကြံသူကလည်း စိုးရိမ်တကြီး ထောက်ခံလိုက်သည်။

သူတို့ ဆွေးနွေးနေစဉ်မှာပင် အေးစက်သော နှာခေါင်းရှုံ့သံတစ်ခု ထွက်ပေါ်လာသည်။

"ဟမ့်..........."

လက်ဖက်ရည်ဆိုင်၏ ထောင့်တစ်နေရာတွင် မျက်စိတစ်ဖက်လပ် ကျင့်ကြံသူတစ်ဦးက သူတို့ကို လှမ်းကြည့်ကာ ဝိညာဉ်လက်ဖက်ရည်ကို တစ်ငုံ သောက်လိုက်သည်။

လက်ဖက်ရည်များက သူ၏ မုတ်ဆိတ်များမှတစ်ဆင့် အဝတ်အစားပေါ်သို့ စီးကျသွားသည်။

"အမြင်ကျဉ်းတဲ့ လူအုပ်စုပဲ........... ဟို ပါးစပ်သရမ်းတဲ့ အသုံးမကျတဲ့ကောင်တွေကြောင့်သာ မဟုတ်ရင် ရွှမ်ယင်ဂိုဏ်းရဲ့ နတ်သမီးက ဘာလို့ လူသတ်ရမှာလဲ...........

ဒီအရွယ်အထိ ကျင့်ကြံလာပြီးတော့ စကားပြော ဆင်ခြင်ရမှန်း မသိတဲ့သူတွေဟာ သေတာ မဆန်းပါဘူး..........."

သူက ရိုင်းစိုင်းစွာ ပြောဆိုလိုက်သဖြင့် ပတ်ဝန်းကျင်ရှိ ကျင့်ကြံသူများ အားလုံး တိတ်ဆိတ်သွားကြပြီး မုန့်ဝမ်အကြောင်းကို ဆက်မပြောရဲကြတော့ချေ။

အားလုံး တိတ်ဆိတ်နေစဉ်မှာပင် မျောက်မျက်နှာနှင့် ကျင့်ကြံသူတစ်ဦးက လက်ဖက်ရည်ဆိုင်ထဲသို့ အပြေးအလွှား ဝင်လာသည်။

သူ၏လက်ထဲတွင် ရွှေရောင်ဖိတ်စာတစ်စောင်ကို ကိုင်မြှောက်ထားပြီး အလွန်ပင် စိတ်လှုပ်ရှားနေပုံရသည်။

"အဆွေတို့ရေ........... သွေးလမ်းစဉ် နတ်သမီး စီစဉ်တဲ့ လေလံပွဲက အစစ်ကြီးဗျ........... ကျွန်တော် လက်မှတ်တစ်စောင် ရခဲ့ပြီ........... အဲဒီပွဲမှာ ရတနာတွေ အများကြီး ပါမယ်တဲ့။

လူခေါင်းခွံလောက်ရှိတဲ့ ရေခဲဥက္ကာခဲ၊ ရွှေတိမ်တိုက်ဂိုဏ်းရဲ့ တိမ်တိုက်မယ်ပန်းနဲ့ ကောင်းကင်မိုးကြိုးဂိုဏ်းရဲ့ နာမည်ကျော် မိုးကြိုးနဂါးလှံတွေတောင် ပါမယ်လို့ ကြားတယ်..........."

သူက အခြားသူများ မကြားမိမှာ စိုးသည့်အလား အကျယ်ကြီး အော်ဟစ်လိုက်သည်။

ဤစကားများကို ကြားလိုက်ရသည်နှင့် လက်ဖက်ရည်ဆိုင်တစ်ခုလုံး ဆူညံသွားတော့သည်။ ရေခဲဥက္ကာခဲဆိုသည်မှာ မှော်လက်နက်များ သွန်းလုပ်ရာတွင် အလွန်ကောင်းမွန်သော ကုန်ကြမ်းဖြစ်ပြီး ၎င်းအတွင်းရှိ အအေးဓာတ်မှာ အရာအားလုံးကို အေးခဲစေနိုင်သည်။ လူခေါင်းခွံအရွယ်အစားရှိသော ရေခဲဥက္ကာခဲဆိုသည်မှာ အလွန်ပင် ရှားပါးလှသည်။

တိမ်တိုက်မယ်ပန်းနှင့် မိုးကြိုးနဂါးလှံတို့မှာလည်း ထိုနည်းတူပင် တန်ဖိုးကြီးလှသည်။

ဤရတနာများထဲမှ တစ်ခုတည်းနှင့်ပင် လောကကို တုန်လှုပ်စေနိုင်ရာ ယခုအခါ ၎င်းတို့အားလုံး တစ်နေရာတည်းတွင် ရှိနေမည်ဆိုခြင်းက လူတိုင်းကို စိတ်လှုပ်ရှားစေရန် လုံလောက်လှပေသည်။

ယခင်က သံသယဖြစ်နေသော ကျင့်ကြံသူများပင် ယခုအခါ စိတ်လှုပ်ရှားလာကြသည်။

"ဒီသတင်းက... တကယ်ပဲ စိတ်ချရရဲ့လား..........." ကျင့်ကြံသူတစ်ဦးက အသံတုန်တုန်ဖြင့် မေးလိုက်သည်။

"စစ်မှန်ကြောင်း အာမခံတယ်ဗျာ........... ကျွန်တော် ရွှမ်ယင်ရတနာခန်းမကနေ တိုက်ရိုက် ရလာတဲ့ သတင်းပဲ..........." မျောက်မျက်နှာနှင့် ကျင့်ကြံသူက ရင်ဘတ်ကို ပုတ်ကာ ပြောလိုက်သည်။

လူအုပ်ကြီးမှာ ဝိုင်းအုံလာပြီး အသေးစိတ်ကို မေးမြန်းကြတော့သည်။

"ဒီလေလံပွဲကို တက်ဖို့ဆိုတာ မလွယ်ဘူး မဟုတ်လား..........." "လက်မှတ်ကို ဘယ်လိုရနိုင်မလဲ..........." ဗလကောင်းကောင်းနှင့် ကျင့်ကြံသူတစ်ဦးက လိုချင်တကြီး မေးလိုက်သည်။

"ဟုတ်တယ်၊ ဟုတ်တယ်။ ဘယ်လိုရမလဲ မြန်မြန်ပြောပါဦး" ပတ်ဝန်းကျင်ရှိ ကျင့်ကြံသူများ အားလုံးကလည်း ယခင် သတိထားနေမှုကို မေ့လျော့ကာ ပါဝင်ချင်စိတ်များ ပြင်းထန်နေကြပြီ ဖြစ်သည်။

၎င်းကို မြင်သောအခါ မျောက်မျက်နှာနှင့် ကျင့်ကြံသူက ဂုဏ်ယူစွာ ပြုံးလိုက်ပြီး— "ဟဲဟဲ... ဒီလက်မှတ်တွေက လွယ်လွယ်နဲ့ ရတာ မဟုတ်ဘူးဗျ။ ဒါပေမဲ့ ဝိညာဉ်ကျောက်တုံး လုံလောက်ရင်ဖြစ်ဖြစ်၊ သိကျွမ်းသူရဲ့ ထောက်ခံချက်ရှိရင်ဖြစ်ဖြစ် အားလုံးက အဆင်ပြေပါတယ်" ဟု လျှို့ဝှက်စွာ ပြောလိုက်သည်။

ထိုသူ၏ မြှောက်ပင့်ပြောဆိုမှုများကြောင့် လက်ဖက်ရည်ဆိုင်အတွင်းရှိ အခြေအနေမှာ အထွတ်အထိပ်သို့ ရောက်ရှိသွားတော့သည်။

ရွှမ်ယင်ဂိုဏ်း နတ်သမီး၏ လေလံပွဲအကြောင်း သတင်းများမှာလည်း ပို၍ ပျံ့နှံ့သွားသည်။

အခြားတစ်ဖက်တွင်မူ မုန့်ဝမ်သည် နတ်သမီးဝူမုံ့ကို တစ်ဦးတည်း တွေ့ဆုံရန် အခွင့်အရေး ရှာဖွေခဲ့သည်။ မုန့်ဝမ်သည် နတ်သမီးဝူမုံ့၏ အခန်းအပြင်ဘက်သို့ ရောက်သောအခါ အရိုအသေ ပေးလိုက်သည်။

"တပည့် မုန့်ဝမ်... နတ်သမီးဝူမုံ့ကို ဂါရဝပြုခွင့် တောင်းခံပါတယ်"

မုန့်ဝမ်မှာ ဦးညွှတ်ထားလျက် တိတ်ဆိတ်စွာ စောင့်နေစဉ် အတန်ကြာမှ အတွင်းဘက်မှ အသံထွက်လာသည်— "ဝင်ခဲ့ပါ။"

မုန့်ဝမ်သည် တံခါးကို တွန်းဖွင့်ကာ အတွင်းသို့ ဝင်လိုက်ပြီး သူမလာရခြင်း အကြောင်းရင်းကို တိုက်ရိုက်ပင် တင်ပြလိုက်သည်။

"တပည့် လေလံပွဲတစ်ခု စီစဉ်ထားပါတယ်။ အဲဒီပွဲမှာ နတ်သမီးကို သဘာပတိအဖြစ် ဆောင်ရွက်ပေးဖို့ လာရောက် တောင်းဆိုတာပါ။ ပွဲပြီးရင်တော့ ရရှိတဲ့ အမြတ်ရဲ့ ထက်ဝက်ကို နတ်သမီးအား လုံးလုံးလျားလျား ဆက်သဖို့ ဆန္ဒရှိပါတယ်"

မုန့်ဝမ်၏ လေသံမှာ ရိုသေလေးစားမှု အပြည့်ရှိလှသည်။ နတ်သမီးဝူမုံ့က မျက်လုံးကို အနည်းငယ် ပင့်ကြည့်ကာ မုန့်ဝမ်ကို စိုက်ကြည့်လိုက်သည်။

"နင်က စီးပွားရေးမှာ အတော်လေး တော်တာပဲ။ ဒါပေမဲ့..." သူမက ခေတ္တရပ်ကာ နောက်ပြောင်သည့် လေသံဖြင့် ဆက်ပြောသည် "နင်တို့ အခြေခံတည်ဆောက်ခြင်းအဆင့် တပည့်လေးတွေရဲ့ လေလံပွဲကို ငါက ဘာလို့ ကိုယ်တိုင် တက်ပေးရမှာလဲ..........."

နတ်သမီးဝူမုံ့၏ စူးစမ်းသော အကြည့်ကို ခံနေရသော်လည်း မုန့်ဝမ်၏ အမူအရာမှာ ပြောင်းလဲခြင်း မရှိဘဲ အရိုအသေပေးလျက်ပင် ဆက်ပြောလိုက်သည်။

"နတ်သမီး ပြောတာ မှန်ပါတယ်။ ဒီလို ကိစ္စမျိုးက နတ်သမီးကို မနှောင့်ယှက်သင့်ပါဘူး။ ဒါပေမဲ့ ဒီလေလံပွဲမှာ တပည့်က ရှားပါးရတနာအချို့ ပြင်ဆင်ထားပါတယ်။

အဲဒီထဲမှာ အခြားဂိုဏ်းက ပါရမီရှင်တွေဆီက သိမ်းဆည်းထားတဲ့ တိမ်တိုက်မယ်ပန်းနဲ့ မိုးကြိုးနဂါးလှံတွေလည်း ပါဝင်ပါတယ်။ အဲဒီအချိန်ကျရင် အများက လေးစားရတဲ့ ရွှေအမြုတေအဆင့် အကြီးအကဲ တစ်ဦးသာ သဘာပတိအဖြစ် မရှိဘူးဆိုရင် အခြေအနေကို ထိန်းချုပ်ဖို့ ခက်ခဲလိမ့်မှာကို တပည့် စိုးရိမ်မိလို့ပါ"

အခန်း (၂၂၈) ငါးမျှားခြင်း

နတ်သမီးဝူမုံ့သည် ထိုစကားကို ကြားသောအခါ သူမ၏ မျက်ဝန်းများထဲတွင် အံ့အားသင့်ရိပ်များ လျှပ်ခနဲ ပေါ်သွားပြီးနောက် တိုးညှင်းစွာ ရယ်မောလိုက်သည်။

"နင်က တကယ့် ကောင်မလေးပဲ.......တော်တော်လေး သတ္တိရှိတာပဲ။ ရွှေတိမ်တိုက်ဂိုဏ်းနဲ့ ကောင်းကင်မိုးကြိုးဂိုဏ်းက နတ်သားတော်တွေရဲ့ ပစ္စည်းတွေကို သုံးပြီး လေလံပွဲလုပ်ဖို့ ကြံရဲတယ်ပေါ့။ သူတို့ လာပြီး ပြဿနာရှာမှာကို မကြောက်ဘူးလား..........."

မုန့်ဝမ်က ထိုစကားကို ကြားသောအခါ ရှက်ပြုံးလေး ပြုံးလိုက်ရင်း အနည်းငယ် အနေခက်ဟန်ဖြင့် ဆိုလိုက်သည်။

"တပည့်က အဲဒါကို စိုးရိမ်လို့ပဲ နတ်သမီးရဲ့ အကူအညီကို အထူးတလည် လာတောင်းတာပါ။ နတ်သမီးသာ သဘာပတိအဖြစ် ရှိနေရင်တော့ ဟို စိတ်ပုတ်တဲ့သူတွေလည်း ရမ်းကားရဲမှာ မဟုတ်ဘူးလို့ ယုံကြည်ပါတယ်"

သူမက ခေတ္တရပ်ကာ "နတ်သမီးရဲ့ ဂုဏ်သတင်း အရှိန်အဝါနဲ့ဆိုရင် အဲဒီလူတွေကို ဟန့်တားနိုင်မှာ ဖြစ်သလို ဒီလေလံပွဲကိုလည်း ချောချောမောမော ပြီးဆုံးစေမှာပါ။

အကယ်၍ နတ်သမီးက တပည့်အတွက် အားကိုးရာအဖြစ် ရှိနေပေးမယ်ဆိုရင် ရေခဲဥက္ကာခဲ၊ တိမ်တိုက်မယ်ပန်းနဲ့ မိုးကြိုးနဂါးလှံ ဆိုတဲ့ ပစ္စည်းသုံးခုထဲက နတ်သမီး ကြိုက်နှစ်သက်ရာ တစ်ခုကို လက်ဆောင်အဖြစ် ဆက်သဖို့ ဆန္ဒရှိပါတယ်" ဟု ထပ်လောင်း ပြောကြားလိုက်သည်။

နတ်သမီးဝူမုံ့၏ အကြည့်မှာ မုန့်ဝမ်ထံတွင် ခေတ္တမျှ ရပ်တန့်သွားပြီး နှုတ်ခမ်းထောင့်မှ အပြုံးမှာ ပိုမို နက်ရှိုင်းလာသည်။

"ဒီလေလံပွဲကို ဘယ်တော့ ကျင်းပဖို့ စီစဉ်ထားသလဲ..........."

မုန့်ဝမ်က ယဉ်ကျေးစွာ ပြုံးလျက် "လေလံပွဲက ပြင်ဆင်နေတုန်းမို့လို့ အချိန်အတိအကျကိုတော့ မသတ်မှတ်ရသေးပါဘူး။ နတ်သမီး အားမယ့် အချိန်ပေါ်မှာပဲ မူတည်ပါတယ်။ နတ်သမီး ဘယ်နေ့ အားမလဲ၊ အဲဒီနေ့ကိုပဲ လေလံပွဲနေ့အဖြစ် သတ်မှတ်ပါ့မယ်" ဟု ဆိုလိုက်သည်။

နတ်သမီးဝူမုံ့၏ နှုတ်ခမ်းများမှာ အနည်းငယ် ကွေးညွတ်သွားသည်။

"ဒါဆိုရင် ဒီလ ၁၅ ရက်နေ့ကိုပဲ သတ်မှတ်လိုက်ရအောင်။ အဲဒီနေ့ကျရင် ငါ လာခဲ့မယ်"

မုန့်ဝမ်၏ စိတ်ထဲတွင် ဝမ်းသာမှုများ ပြည့်နှက်သွားသည်။ သူမသည် အမြန်ထရပ်ကာ အရိုအသေ ထပ်မံ ပေးလိုက်ပြီး "သဘောတူပေးတဲ့အတွက် ကျေးဇူးတင်ပါတယ် နတ်သမီး။ ဒီလေလံပွဲကို အခမ်းနားဆုံး အောင်မြင်အောင် တပည့် သေချာပေါက် ကြိုးစားပါ့မယ်..........." ဟု ပြောလိုက်သည်။

မုန့်ဝမ်သည် နတ်သမီးဝူမုံ့၏ ကျင့်ကြံခြင်းဂူထဲမှ စိတ်ရွှင်လန်းစွာဖြင့် ထွက်လာခဲ့ရာ ခြေလှမ်းများမှာပင် ပေါ့ပါးနေတော့သည်။

သူမ၏ အခန်းတံခါးဝသို့ ရောက်၍ ဖွင့်ပြီး ဝင်ရန် ပြင်ဆင်နေစဉ်မှာပင် အသံတစ်ခု ရုတ်တရက် ထွက်ပေါ်လာသည်။

"ဂျူနီယာညီမလေး မုန့်... လက်လှမ်း တော်တော်ကျယ်တာပဲ။ ဒီလေလံပွဲက တော်တော်လေး စည်ကားနေတာကို ငါတို့ စီနီယာအစ်ကို၊ အစ်မတွေကို ဘာလို့ အသိမပေးရတာလဲ..........."

ချင်းယွီက လက်ကိုင်ယပ်တောင်ကို ခတ်ရင်း အနည်းငယ် စိတ်ကောက်နေသည့် လေသံဖြင့် ပြောလိုက်သည်။ လီဖော်တျန်းမှာမူ တိတ်ဆိတ်နေသော်လည်း ဤကိစ္စတွင် ပါဝင်ပတ်သက်လိုသည့် ဆန္ဒရှိနေပုံရသည်။

မုန့်ဝမ်က လှည့်ကြည့်လိုက်ပြီး အပြုံးမပျက်ဘဲ တည်ငြိမ်စွာ ဆိုလိုက်သည်။ "စီနီယာအစ်ကိုတို့ကလည်း ဘာတွေ ပြောနေတာလဲ........... ဒါက သေးငယ်တဲ့ ကိစ္စလေးမို့လို့ အစ်ကိုတို့နှစ်ယောက်ကို မနှောင့်ယှက်ချင်လို့ပါ"

"သေးငယ်တဲ့ ကိစ္စ ဟုတ်လား..........."

ချင်းယွီက အံ့သြဟန်ဆောင်ကာ မျက်ခုံးပင့်ရင်း ယပ်တောင်ဖြင့် အသာအယာ ပုတ်လိုက်သည်။ "ညီမလေး မုန့်... နင် မတရားဘူးနော်။ ဒီလေလံပွဲသတင်းက သတ္ထုတွင်း နယ်မြေတစ်ခုလုံးမှာ ပျံ့နေတာ။ ရတနာကောင်းတွေ ဒီလောက် အများကြီး ပါတာကို ငါတို့ကိုကျတော့ မဖိတ်ဘူးလား..........."

လီဖော်တျန်းကလည်း အခွင့်သာတုန်း ဝင်ပြောလိုက်သည် "ဟုတ်တယ်။ အကျိုးအမြတ်တွေကို စီနီယာတွေဆီကနေ ဖုံးကွယ်ထားတာဟာ ငါတို့ ရွှမ်ယင်ဂိုဏ်းရဲ့ စည်းကမ်း မဟုတ်ဘူးလေ"

မုန့်ဝမ်က အသာအယာ ပြုံးလိုက်ပြီး "ဒါဆို စီနီယာအစ်ကိုတို့ကလည်း ဒီလေလံပွဲကို စိတ်ဝင်စားကြတယ်ပေါ့........... ဒါဆိုလည်း အတူတူ ပါဝင်ကြတာပေါ့" ဟု အေးအေးဆေးဆေးပင် ပြောလိုက်သည်။

ချင်းယွီ၏ မျက်လုံးများ လင်းလက်သွားသည်။ "တကယ်လား........... အစ်ကို့ဆီမှာလည်း လေလံပွဲမှာ ထုတ်ပြလို့ရမယ့် ရှားပါးပစ္စည်း အချို့ ရှိတယ်"

လီဖော်တျန်းကလည်း "ငါ့ဆီမှာလည်း အားလုံးနဲ့ မျှဝေလို့ရမယ့် ပစ္စည်းကောင်းအချို့ ရှိပါတယ်" ဟု ဆိုလာသည်။

မုန့်ဝမ်က ပြုံးလျက် ခေါင်းငြိမ့်ပြကာ "သေချာပေါက် အစစ်ပါပဲ။ အကယ်၍ စီနီယာအစ်ကိုတို့ ပါဝင်ချင်တယ်ဆိုရင် တစ်ယောက်ကို ကော်မရှင် ၁ ရာခိုင်နှုန်းစီတောင် ပေးနိုင်ပါတယ်။ ဘယ်လိုလဲ..........."

"ငါတို့ကို ကော်မရှင်တောင် ပေးဦးမှာလား..........."

ချင်းယွီနှင့် လီဖော်တျန်းတို့ အကြည့်ချင်း ဆုံသွားကြသည်။ နှစ်ယောက်လုံး အနည်းငယ် မယုံနိုင်သလို ဖြစ်နေကြသည်။

မုန့်ဝမ်က ခေါင်းငြိမ့်ပြကာ "သေချာပေါက် အစစ်ပါ။ ကျွန်မ မုန့်ဝမ်က ပြောပြီးရင် ဘယ်တော့မှ မဖျက်ပါဘူး"

ချင်းယွီက အားရပါးရ ရယ်မောလိုက်ပြီး ယပ်တောင်ကို ခတ်ကာ "ကောင်းပြီ... ဒါဆိုရင်တော့ သဘောတူပြီ။ အခုကစပြီး ငါတို့ အားလုံး အတူတူ ချမ်းသာကြတာပေါ့" ဟု ပြောလိုက်သည်။

လီဖော်တျန်းမှာလည်း ရှားရှားပါးပါး ပြုံးပြလိုက်ပြီး "ဂျူနီယာညီမလေး မုန့်က ငါတို့ကို ဒီလောက် ဂရုစိုက်ပေးမှတော့ နောက်နောင် ပစ္စည်းကောင်းတွေ ရှိရင်လည်း ညီမလေးကို မမေ့ပါဘူး" ဟု ဆိုသည်။

မုန့်ဝမ်သည် သူတို့၏ စိတ်အားထက်သန်နေသော အမူအရာများကို ကြည့်ကာ သူမ၏ အပြုံးမှာ ပိုမို နက်ရှိုင်းလာသည်။ သူမသည် အခက်တွေ့ဟန်ဆောင်ကာ "စီနီယာအစ်ကိုတို့... တကယ်တော့ ကျွန်မမှာ နောက်ထပ် တောင်းဆိုစရာလေး တစ်ခု ရှိပါသေးတယ်" ဟု ဆိုလိုက်သည်။

လီဖော်တျန်းက သဘောထားကြီးဟန်ဖြင့် "ညီမလေး မုန့်... လိုအပ်တာ ရှိရင် ပြောသာပြောပါ။ စကားတွေကို ကွေ့ပတ်နေဖို့ မလိုပါဘူး" ဟု ဆိုသည်။

မုန့်ဝမ်က ခေတ္တမျှ တွေဝေဟန်ဆောင်ပြီးမှ ဖြည်းဖြည်းချင်း ပြောလိုက်သည်။

"ဒီတစ်ခေါက် ပါရမီရှင်တွေကို အမဲလိုက်တဲ့ စစ်ဆင်ရေးမှာ စီနီယာအစ်ကိုတို့ တော်တော်လေး အမှတ် တွေ စုမိထားကြတယ် မဟုတ်လား။

ဒါပေမဲ့ ကျွန်မ ခန့်မှန်းရသလောက်တော့ အဲဒီအမှတ်တွေက 'ကောင်းကင်အဆင့် ဓာတ်ငါးပါး ဝိညာဉ်ပစ္စည်း' နဲ့ လဲဖို့တော့ မလုံလောက်သေးဘူး ထင်တယ်။ အဲဒါ... စီနီယာတို့က ကျွန်မကို ကူညီတဲ့အနေနဲ့ အစ်ကိုတို့ရဲ့ အမှတ်တွေကို ကျွန်မကို ပေးလို့ ရမလားဟင်..........."

ထိုစကားကို ကြားလိုက်ရသည်နှင့် ချင်းယွီနှင့် လီဖော်တျန်းတို့၏ အပြုံးများမှာ ချက်ချင်းပင် အေးခဲသွားတော့သည်။

ချင်းယွီသည် မုန့်ဝမ်ကို မသိမသာ လှမ်းကြည့်လိုက်ရာ မုန့်ဝမ်မှာ အပြစ်ကင်းစင်သော အပြုံးလေးဖြင့် သူတို့၏ အဖြေကို စောင့်ဆိုင်းနေသည်ကို တွေ့ရသည်။

အတန်ကြာမှ ချင်းယွီက ချောင်းအနည်းငယ် ဟန့်လိုက်ရင်း တိတ်ဆိတ်မှုကို ဖြိုခွင်းလိုက်သည်။ "ညီမလေး မုန့်... အဲဒီကိစ္စကတော့... ငါတို့ကို ပြန်ပြီး စဉ်းစားဖို့ အချိန်လေး ပေးပါဦး"

လီဖော်တျန်းကလည်း ခေါင်းငြိမ့်ကာ "ဟုတ်တယ်၊ အမှတ်ဆိုတာ ငါတို့အတွက်လည်း အရမ်း အရေးကြီးတာမို့လို့ သေချာ တိုင်ပင်ဖို့ လိုတယ်" ဟု ဆိုသည်။

မုန့်ဝမ်က ပြုံးမြဲအတိုင်းပင် ရှိနေကာ သူမ၏ စကားလုံးတိုင်းမှာ သူတို့နှစ်ဦးကို ငဲ့ညှာသည့်အလား ပြောဆိုလိုက်သည်။ "စီနီယာအစ်ကိုတို့... အလောတကြီး ဆုံးဖြတ်ဖို့ မလိုပါဘူး။ ဒီကိစ္စက သေချာ စဉ်းစားဖို့ လိုတာပဲ။ ပြန်ပြီးတော့ အေးအေးဆေးဆေး စဉ်းစားကြပါဦး"

သူတို့နှစ်ဦးသည် နှုတ်ဆက်ကာ လီဖော်တျန်း၏ အခန်းသို့ အမြန် ပြန်သွားကြတော့သည်။ လီဖော်တျန်းမှာ အခန်းထဲတွင် ဟိုမှသည်းမှ လျှောက်ရင်း စိတ်မရှည်သလို ဖြစ်နေသည်။

"ငါ စုံစမ်းထားသလောက်တော့ ဒီလေလံပွဲရဲ့ စုစုပေါင်း ကော်မရှင်က ၆ ရာခိုင်နှုန်းပဲ ရှိတာ။ မုန့်ဝမ်က ငါတို့နှစ်ယောက်ကို ၂ ရာခိုင်နှုန်း ပေးမယ်ဆိုတာ တကယ်တော့ အများကြီးပဲ"

"နတ်သမီး လီ... ဒီလောက် အကျိုးအမြတ်လေးနဲ့ မျက်စိ မမှောင်ပါနဲ့ဦး" ချင်းယွီက ဘေးတွင် ထိုင်ကာ တည်ငြိမ်စွာ ဝေဖန်ပြသည်။

"မုန့်ဝမ်မှာက အမှတ်တွေ အများကြီး ရှိပြီးသား။ ငါတို့ အမှတ်တွေကိုပါ ပေါင်းလိုက်မယ်ဆိုရင် သူမ အနည်းဆုံး 'ကောင်းကင်အဆင့် ဓာတ်ငါးပါး ဝိညာဉ်ပစ္စည်း' တစ်ခုတော့ လဲနိုင်မှာပဲ။ ဂိုဏ်းက ပေးတဲ့ ဝေစုနဲ့ပါဆိုရင် နှစ်ခု ဖြစ်သွားမယ်"

ဤနေရာသို့ ရောက်သောအခါ ချင်းယွီက အသံကို နှိမ့်လိုက်ပြီး လေးနက်သော လေသံဖြင့် "အကယ်၍ သူမသာ ဒီလေလံပွဲမှာ ပစ္စည်းကောင်းတွေ ထပ်ရဦးမယ်ဆိုရင် သူမ တကယ်ပဲ 'ကောင်းကင်အဆင့် ဓာတ်ငါးပါး ဝိညာဉ်ပစ္စည်း' တွေ အားလုံးကို စုမိသွားနိုင်တယ်..........." ဟု ဆိုလိုက်သည်။

လီဖော်တျန်းမှာ အသက်ရှူပင် မှားသွားတော့သည်။ အကယ်၍ မုန့်ဝမ်သာ ထိုပစ္စည်းများ အားလုံးကို တကယ် စုမိသွားပါက သူမ၏ ရွှေအမြုတေအဆင့် တက်လှမ်းနိုင်ဖို့မှာ သေချာသလောက် ရှိသွားပြီ ဖြစ်သည်။

ထို့ကြောင့် သူတို့၏ အမှတ်များကို အလွယ်တကူ မပေးနိုင်ချေ။ သူတို့နှစ်ဦး အကြည့်ချင်း ဆုံသွားကြရာ နှစ်ဦးလုံး၏ မျက်လုံးထဲတွင် စိုးရိမ်မှုနှင့် ပြတ်သားမှုများကို တွေ့လိုက်ရသည်။

နောက်တစ်နေ့တွင် ချင်းယွီနှင့် လီဖော်တျန်းတို့သည် မုန့်ဝမ်ထံသို့ ထပ်မံ ရောက်ရှိလာကြသည်။

"ဂျူနီယာညီမလေး မုန့်..." ချင်းယွီက အားနာဟန်ဖြင့် အရင် စကားစလိုက်သည်။ "ငါတို့ သေချာ စဉ်းစားပြီးပြီ။ ဒီလေလံပွဲမှာ... ငါတို့ မပါဝင်တော့ဘူး"

လီဖော်တျန်းကလည်း ရှင်းပြသည် "ညီမလေး သိတဲ့အတိုင်း ငါတို့လည်း အရည်အချင်း မြှင့်တင်ဖို့အတွက် 'ဓာတ်ငါးပါး ဝိညာဉ်ပစ္စည်း' တွေကို အသည်းအသန် လိုအပ်နေတာမို့လို့... ဒီအမှတ်တွေကိုတော့ မပေးနိုင်တော့ဘူး"

မုန့်ဝမ်၏ အပြုံးမှာ အနည်းငယ်မျှပင် မပြောင်းလဲသွားချေ။ သူမသည် လက်ဖက်ရည်ခွက်ကို အသာအယာ မလိုက်ပြီး တစ်ငုံ သောက်လိုက်ရာ အမူအရာမှာ ကျော့ရှင်းနေသည်။

"စီနီယာအစ်ကိုတို့... အားနာစရာ မလိုပါဘူး" သူမက လက်ဖက်ရည်ခွက်ကို ပြန်ချလိုက်ပြီး ညင်သာသော လေသံဖြင့် ဆက်ပြောသည်— "အမှန်တော့ စီနီယာတို့ဆီ မလာခင်ကတည်းက ကျွန်မ ဂိုဏ်းက တခြား တပည့်တွေနဲ့ ဆက်သွယ်ပြီး သူတို့ဆီမှာ ရှိတဲ့ အမှတ်တွေကို အကျိုးအမြတ် တစ်ခုခုနဲ့ လဲပြီးပါပြီ"

ချင်းယွီနှင့် လီဖော်တျန်းတို့မှာ ထိုစကားကို ကြားသော် မှင်တက်သွားကြသည်။

"သူတို့ဆီမှာ ရှိတဲ့ အမှတ်တွေက သိပ်မများပေမဲ့ အားလုံး ပေါင်းလိုက်ရင်၊ ပြီးတော့ ကျွန်မရဲ့ ကိုယ်ပိုင်အမှတ်တွေနဲ့ပါဆိုရင် 'ကောင်းကင်အဆင့် ဓာတ်ငါးပါး ဝိညာဉ်ပစ္စည်း' တစ်ခုနဲ့ လဲဖို့တော့ နီးစပ်သွားပါပြီ"

ထိုစကားကို ကြားသောအခါ သူတို့နှစ်ဦး၏ မျက်နှာများမှာ ချက်ချင်းပင် ပျက်သွားတော့သည်။ ဒါဆိုရင် မုန့်ဝမ်က သူတို့ဆီက အမှတ်လေးတွေကို လိုချင်တာ မဟုတ်ဘူးပေါ့...........

သူမက ဒီနည်းလမ်းကို သုံးပြီး သူတို့ကို လေလံပွဲမှာ မပါဝင်နိုင်အောင် တမင် လုပ်ခဲ့တာလား...........

မုန့်ဝမ်သည် သူတို့၏ အမူအရာများကို ကြည့်ကာ သူမ၏ အပြုံးမှာ ပိုမို နက်ရှိုင်းလာသည်။ "စီနီယာအစ်ကိုတို့... တခြား ပြောစရာ ရှိသေးလား..........."

ချင်းယွီသည် အသက်ကို ပြင်းပြင်းရှူလိုက်ပြီး သူ၏ လက်ကိုင်ယပ်တောင်ကို 'ဖြတ်' ကနဲ မြည်အောင် ပိတ်လိုက်တော့သည်။