အခန်း (၈၈၇-၈၈၈)
Vol. 53 Ch. 887-888
အခန်း (၈၈၇) တပ်ဖွဲ့များ ဖွဲ့စည်းခြင်း
အစိုးရ အဆောက်အအုံမှ ထွက်ခွာလာစဉ် ဟန်ရှောင်း၏ ဆက်သွယ်ရေးကိရိယာ မြည်လာသည်။ သူ့ကို ခေါ်ဆိုသူမှာ မီလီဇော ဖြစ်သည်။
"ဘလက်စတား၊ မင်း ကြက်သွေးနီစက်ဝန်းဂြိုလ်မှာ ရောက်နေပြီလား" မီလီဇောက တဟားဟား ရယ်မောလိုက်သည်။
"ဟုတ်တယ်၊ ခင်ဗျားရော ဒီမှာပဲလား၊ ကျွန်တော် ခင်ဗျားကို မတွေ့မိပါလား"
"ငါမရောက်သေးဘူး၊ ငါတို့က အဝေးရောက် စုဝေးပွဲ လုပ်နေကြတာ၊ ခဏလောက် အွန်လိုင်းတက်လာခဲ့ပါ"
"ကောင်းပြီ" ဟန်ရှောင်းက ကွမ်တမ်ကွန်ရက်ထဲသို့ ဝင်ရောက်လိုက်ပြီး ကုဒ်ဝှက်ထားသော လိုင်းတစ်ခုကို ရှာတွေ့လိုက်သည်။
နောက်တစ်ခဏတွင် သူ့ရုပ်ပုံသည် အခန်းကြီးတစ်ခုထဲတွင် ပေါ်လာပြီး သူ့ရှေ့၌ စားပွဲဝိုင်းတစ်ခုနှင့် ဘေးပတ်လည်တွင် ထိုင်ခုံများစွာ ရှိနေသည်။ သူ့ရုပ်ပုံသည် လက်ရှိတွင် ထိုင်ခုံတစ်ခု၌ ရောက်နေသည်။ ထိုင်ခုံအများစုမှာ ပြည့်နေပြီး လောလောဆယ်တွင် အလွတ်လေးနေရာသာ ကျန်တော့သည်။
ဟန်ရှောင်းက ပတ်ဝန်းကျင်ကို ကြည့်လိုက်ရာ ရှိနေသူ အားလုံးသည် အင်ပါယာ၏ မဟာမိတ်များ ဖြစ်ကြောင်း သဘောပေါက်လိုက်သည်။ ၎င်းသည် ကြက်သွေးရောင်အင်ပါယာအတွက် အဆင့် အေ အထက်ဆင့် အုပ်စုဖွဲ့ စကားပြောခန်း တစ်ခုနှင့် တူသည်။
မည်သူကမျှ အစည်းအဝေး မစီစဉ်ဘဲ 'အုပ်စုဖွဲ့ စကားပြောခန်း' သည် ပုံမှန်အားဖြင့် မည်သူမျှ အွန်လိုင်းမရှိဘဲ တိတ်ဆိတ်နေတတ်သည်။ လက်ရှိတွင် အဆင့် အေ အထက်ဆင့် အများစုသည် အွန်လိုင်းတွင် ရှိနေကြပြီး ရင်းနှီးသော မျက်နှာများစွာ ရှိနေသည်။ သူတို့တွင် 'နဂါးဘုရင်' မီလီဇော၊ 'ပြာကျမီးလျှံ' ဘီယွန်နီ၊ 'စစ်သင်္ဘောဧကရာဇ်' မက်ဆီမီလာ၊ 'မြေခွေးအနုပညာ' ရာဗင်လော့ဒ်၊ 'ကြယ်ခုတ်ပိုင်းသူ' ဗီရူ နှင့် တိုင်တိုင်လေး တို့ ပါဝင်သည်။ 'အမှောင်သခင်' ကလော့တီနှင့် အခြား ဒေါက်တိုင်သုံးခုမှ တစ်ဦးတို့ အွန်လိုင်းမရှိကြပေ။
"ဟားဟား၊ ဘလက်စတား ရောက်လာပြီပဲ" ဘီယွန်နီက အဖော်ရွေဆုံးဖြစ်ပြီး သူက အလွန်ပျော်ရွှင်နေပုံရသည်။
ထို့နောက် အားလုံးက ဟန်ရှောင်းကို ကြည့်ပြီး နှုတ်ဆက်ကြသည်။ မီးပြတိုက်ဂြိုလ်တွင် သူနှင့်အတူ တိုက်ခိုက်ခဲ့သော နှစ်ဦးမှာ အဖော်ရွေဆုံး ဖြစ်သည်။ မက်ဆီမီလာသည်လည်း တော်တော်လေး ဖော်ရွေသည်။ ရာဗင်လော့ဒ်နှင့် ဟီဘာတို့က သူ့ကို တည်ငြိမ်စွာ နှုတ်ဆက်ကြပြီး အခြားသူများ၏ အသံထဲတွင် လေးစားမှု အရိပ်အယောင်များ ပါရှိသည်။
မီးပြတိုက်ဂြိုလ် တိုက်ပွဲပြီးနောက် ဟန်ရှောင်းသည် အဆင့် အေ အထက်ဆင့် တစ်ဦးကို အရှင်ဖမ်းမိသော တိုက်ပွဲမှတ်တမ်းကို ရရှိခဲ့ပြီး ၎င်းက အဆင့် အေ အထက်ဆင့် အုပ်စုအတွင်း သူ့အဆင့်အတန်းကို ခိုင်မာစေခဲ့သည်။
ဟန်ရှောင်းသည် အဆင့် အေ အထက်ဆင့် နယ်ပယ်သို့ ဝင်ရောက်သည်မှာ မကြာသေးသော်လည်း သူသည် ရဲဘော်ရဲဘက်များ၏ လေးစားမှုကို ရရှိခဲ့ပြီး အုပ်စုအတွင်းသို့ တရားဝင် လက်ခံခြင်း ခံခဲ့ရသည်။ သူသည် ယခုအခါ အုပ်စု၏ အလယ်အလတ် အဆင့်တွင် ရောက်ရှိနေပြီး အချို့သော သာမန် အဆင့် အေ အထက်ဆင့်များထက် ပိုမိုကြီးမားသော အဆင့်အတန်း ရှိနေသည်။ အနည်းဆုံးတော့ သူ့ကို တမင်တကာ ရန်စမည့်သူ မရှိတော့ပေ။
ဘာပဲဖြစ်ဖြစ် လက်သီးကသာ အမြင့်မြတ်ဆုံး ဖြစ်ပြီး အဆင့် အေ အထက်ဆင့်များသည် အင်အားကိုသာ လေးစားကြသည်။
ရဲဘော်ရဲဘက်များ၏ မျက်နှာပေါ်ရှိ ဖော်ရွေသော အကြည့်များနှင့် ရင်ဆိုင်ရသဖြင့် ဟန်ရှောင်းက သူတို့အားလုံးကို နွေးထွေးစွာ ပြန်ဖြေလိုက်သည်။
ထို့နောက် ဤအစည်းအဝေးကို စီစဉ်သူ မီလီဇောက အစည်းအဝေးကို စတင်လိုက်သည်။
"တခြားလေးယောက်က မလာကြဘူး၊ ပြီးတော့ သူတို့ကို ထည့်စဉ်းစားစရာ မလိုဘူး၊ ငါတို့ ဆွေးနွေးမှု စကြရအောင်၊ အင်ပါယာက အက်စ်ဂေါ့ဒ်ကို သတ်ဖို့ အဆင့် အေ အထက်ဆင့် အနည်းဆုံး သုံးယောက် စေလွှတ်ဖို့ စီစဉ်ထားပြီး နာမည်စာရင်း တစ်ခု ပြင်ဆင်ထားတယ်ဆိုတာ အားလုံးသိကြမှာပါ၊ ဒါပေမဲ့ ငါတို့ ဆန္ဒရှိမရှိ အရင်မေးချင်ကြတယ်၊ ဘလက်စတားက အက်စ်ဂေါ့ဒ်ကို သတ်ဖို့ ပြတ်သားတဲ့အတွက် သူ့အကြောင်း ပြောစရာ မလိုပါဘူး၊ ငါလည်း သူ့ကို ကူညီဖို့ စီစဉ်ထားတယ်၊ တခြား စိတ်ဝင်စားတဲ့သူ ရှိလား"
စကြဝဠာ လူမှုအဖွဲ့အစည်း တစ်ခုသည် အဆင့် အေ အထက်ဆင့် တစ်ဦးကို အလွယ်တကူ အမိန့်ပေး၍ မရနိုင်ဘဲ အဆင့် အေ အထက်ဆင့် စူပါက စစ်ဆင်ရေးတွင် ပါဝင်ရန် ဆန္ဒရှိမရှိကို ယေဘုယျအားဖြင့် ထည့်သွင်းစဉ်းစားရမည်။
ထို့နောက် အားလုံးသည် ဟန်ရှောင်းကို ရံဖန်ရံခါ ကြည့်ရင်း နက်နဲသော အတွေးထဲ ကျရောက်သွားကြသည်။
ဟန်ရှောင်းက ပတ်ဝန်းကျင်ကို ကြည့်လိုက်ပြီး မီလီဇောက သူ့ကို ကြည့်နေသည်ကို ခံစားလိုက်ရသည်။ မီလီဇော၏ ရည်ရွယ်ချက်များကို သူချက်ချင်း နားလည်လိုက်သည်။
မီလီဇောသည် အက်စ်ဂေါ့ဒ်ကို သတ်လိုသော ဟန်ရှောင်း၏ ရည်ရွယ်ချက်အကြောင်း အင်ပါယာထံမှ ကြားသိခဲ့ရသဖြင့် အင်ပါယာ၏ အဆင့် အေ အထက်ဆင့် အများစုကို ဆင့်ခေါ်လိုက်ခြင်း ဖြစ်သည်။ အမှန်တကယ်တွင် သူသည် ဟန်ရှောင်းအတွက် ပါတနာများ ရှာဖွေပေးရန် ကြိုးစားနေပြီး ဟန်ရှောင်းကို သူ့အသင်းဖော်များ ရွေးချယ်ရန် အခွင့်အရေး ပေးနေခြင်း ဖြစ်သည်။
ထိုအချိန်၌ပင် ဘီယွန်နီက ပခုံးတွန့်ပြီး ပြောသည်၊ "ဘလက်စတား၊ ငါတို့ အက်စ်ဂေါ့ဒ်ကို နောက်ဆုံး တိုက်ခိုက်တုန်းက မင်းရှိနေခဲ့တယ်၊ ငါမင်းကို မကူညီချင်လို့ မဟုတ်ဘူး၊ ဒါပေမဲ့ ငါက အက်စ်ပါ တစ်ယောက်ဖြစ်ပြီး အက်စ်ဂေါ့ဒ်ရဲ့ စွမ်းရည်က ငါ့ရဲ့ ရန်သူတော်ပဲ၊ ဒီတိုက်ပွဲမှာ ငါ နေရာတစ်နေရာ ယူမှာမဟုတ်ဘူး"
ဟန်ရှောင်းက သဘောတူကြောင်း ခေါင်းညိတ်လိုက်သည်။ အမှန်ပင်၊ အက်စ်ဂေါ့ဒ်သည် အက်စ်ပါများကို တိတ်ဆိတ်သွားစေသော စွမ်းရည်ရှိပြီး အက်စ်ပါ အများစု၏ ရန်သူတော် ဖြစ်သည်။ သူသွားလျှင် အသုံးမဝင် ဖြစ်လိမ့်မည်ဟု ဘီယွန်နီ ပြောသည်မှာ မမှားပေ။
သို့သော် နားလည်ပေးခြင်းက တစ်ကဏ္ဍ ဖြစ်သော်လည်း သူ အထင်သေးကြောင်း ပြသရဦးမည်။
အာ၊ ညီလေး။
ငါ့မှာ မင်းအတွက် စကားတစ်ခွန်းပဲ ရှိတယ်—နုလိုက်တာ။
ကျန်သူများ တိတ်ဆိတ်နေသည်ကို မြင်လိုက်ရသဖြင့် ဟန်ရှောင်းက ပြောသည်၊ "အင်ပါယာ အုပ်ချုပ်သူက ခုနကမှ သတင်းအချက်အလက် တချို့ ကျွန်တော့်ကို ထုတ်ပြောခဲ့တယ်၊ ဒီတစ်ခါ အင်ပါယာ တစ်ခုတည်း လှုပ်ရှားမှာ မဟုတ်ဘူး၊ အလင်း ဖက်ဒရေးရှင်းနဲ့ အာကိန်းဘုရားကျောင်းကလည်း ပါဝင်ကြလိမ့်မယ်၊ ပါတီသုံးခုစလုံး ပူးပေါင်းလုပ်ဆောင်ကြရင် သူတို့က ဟန်ပြသက်သက် လုပ်ကြမှာ မဟုတ်ဘူး၊ အက်စ်ဂေါ့ဒ်ကို ရှင်းလင်းဖို့ အခွင့်အလမ်းကောင်း တစ်ခုပဲ၊ ကျွန်တော် ဒီအခွင့်အရေးကို သေချာပေါက် လက်လွှတ်မှာ မဟုတ်ဘူး၊ ပြီးတော့ ကျွန်တော့်ကို ကူညီဖို့ ဆန္ဒရှိတဲ့ ဘယ်သူ့ကိုမဆို ကျွန်တော် သေချာပေါက် ကျေးဇူးတင်မှာပါ"
ဒါကို ကြားလိုက်ရတော့ အများအပြား၏ မျက်လုံးများ တောက်ပသွားသည်။ ဆိုလိုသည်မှာ သူတို့သည် အက်စ်ဂေါ့ဒ်ကို ရှင်းလင်းရန် ဘလက်စတားအား ကူညီပါက ဆင့်ကဲဖြစ်စဉ် ကုဗတုံးကို အသုံးပြုခွင့် ရရှိမည်ဖြစ်သည်။
"ငါပါမယ်" ရာဗင်လော့ဒ်က ပထမဆုံး စကားပြောလာသည်။
"ကောင်းပြီ၊ တခြားဘယ်သူရှိသေးလဲ" မီလီဇောက တည်ငြိမ်စွာ မေးသည်။
ရှေးဟောင်းပုဂ္ဂိုလ် တစ်ဦးအနေဖြင့် သူရော ရာဗင်လော့ဒ်ပါ ကိုင်တွယ်ရန် မလွယ်ကူပေ။ သူတို့၏ ဆက်ဆံရေး မကောင်းသော်လည်း ရာဗင်လော့ဒ်၏ အင်အားကို သူအသိအမှတ်ပြုသည်။ သာမန် အဆင့် အေ အထက်ဆင့် တစ်ဦးသည် ရှေးဟောင်းပုဂ္ဂိုလ် ဖြစ်လာနိုင်စွမ်း မရှိပေ။ မီလီဇောသည် ဘလက်စတားအတွက် ပိုမိုစွမ်းအားကြီးသော မဟာမိတ် အနည်းငယ်ကို ရွေးချယ်ရန် သဘာဝကျစွာပင် ဆန္ဒရှိလိမ့်မည်။
အခြား ဒေါက်တိုင်နှစ်ခုကို ထည့်သွင်းစဉ်းစားစရာ မလိုပေ။ ကလော့တီသည် အူရန်ရယ်၏ ဘေးတွင် အစောင့်အရှောက်အဖြစ် နေရမည်ဖြစ်ပြီး အခြားတစ်ဦးမှာ ကြယ်နယ်မြေ တစ်ခုကို စောင့်ကြပ်နေသည်။
ဟီဘာသည်လည်း စိတ်လှုပ်ရှားနေသော်လည်း အကူအညီ ကမ်းလှမ်းရန် သူ့ကိုယ်သူ မတတ်စွမ်းနိုင်ပေ။
အချို့က ငြင်းပယ်ကြပြီး အခြားသူများမှာ သိပ်စိတ်မဝင်စားကြပေ။ နောက်ဆုံးတွင် ရှိနေသော အဆင့် အေ အထက်ဆင့် ထက်ဝက်ကျော်သည် စစ်ဆင်ရေးတွင် ပါဝင်ရန် ဆုံးဖြတ်လိုက်ကြသည်။ ဟန်ရှောင်း အပါအဝင် စုစုပေါင်း လူခုနစ်ဦး ရှိသည်။
မီလီဇော၊ မက်ဆီမီလာ၊ ရာဗင်လော့ဒ်၊ ဗီရူ၊ ကိုလာနှင့် ကြာပန်းဓားသမား - ဤခြောက်ဦးသည် အက်စ်ဂေါ့ဒ်ကို ရှင်းလင်းမည့် စစ်ဆင်ရေးတွင် ပါဝင်မည့် သူ့ရဲဘော်ရဲဘက်များ ဖြစ်သည်။ ကိုလာသည် 'စစ်သည်တော်' တစ်ဦးဖြစ်ပြီး ကြာပန်းဓားသမားသည် အမျိုးသမီး စိတ်စွမ်းအားရှင် တစ်ဦးဖြစ်သည်။ အုပ်စုထဲတွင် အက်စ်ပါ တစ်ဦးတစ်ယောက်မျှ မပါဝင်ပေ။
"ငါတို့ ခုနစ်ယောက်က များလွန်းမနေဘူးလား၊ အင်ပါယာက သဘောတူပါ့မလား" ရာဗင်လော့ဒ်က မေးသည်။
"အင်ပါယာက သဘောမတူရင် ငါတို့က ကိုယ်ပိုင်အဆင့်အတန်းနဲ့ သူ့ကို ကူညီလို့ရတယ်၊ အင်ပါယာက ကန့်ကွက်နိုင်လို့လား" ကြာပန်းဓားသမားက ပြောသည်။
ကြက်သွေးရောင်အင်ပါယာသည် မူလက လူသုံးဦးမှ ငါးဦးအထိ စေလွှတ်ရန် စီစဉ်ထားသော်လည်း ဟန်ရှောင်းက ဆင့်ကဲဖြစ်စဉ် ကုဗတုံးကို ဆုလာဘ်အဖြစ် အသုံးပြုရန် ကတိပေးခဲ့သဖြင့် တပ်ဖွဲ့တွင် လူခုနစ်ဦး ပါဝင်လာရာ ၎င်းသည် အင်ပါယာ၏ မျှော်လင့်ချက် ပြင်ပတွင် ရှိနေသည်။
သို့သော် အင်ပါယာတွင် ၎င်းနှင့်ပတ်သက်၍ မည်သည့်ပြဿနာမျှ မရှိပေ။ ဘာပဲဖြစ်ဖြစ် သူတို့၏ မဟာမိတ်များကို ကိုယ်တိုင်ကိုယ်ကျ အကူအညီတောင်းခံခြင်းမှ တားဆီးခြင်းသည် သူတို့အတွက် ကောင်းမည်မဟုတ်ပေ။ ထို့ပြင် ၎င်းသည် ဆိုးရွားသော ကိစ္စလည်း မဟုတ်ပေ။
ဟန်ရှောင်းက ထိုအမျိုးသမီး စိတ်စွမ်းအားရှင်ကို အကဲခတ်လိုက်သည်။ သူမတွင် ရှည်လျားသော အဖြူရောင် ဆံပင်နှင့် ခရမ်းရောင် အသားအရေ ရှိသည်။ သူမ၏ အသွင်အပြင်သည် လူသားတစ်ဦးနှင့် ဆင်တူပြီး ဂလက်ဆီ၏ စံနှုန်းများအရ လှပသည်ဟု သတ်မှတ်ခံရသည်။ သူမသည် အိပ်မက်ဆန်သော အော်ရာတစ်ခုကို ထုတ်လွှတ်ပြီး ထူးခြားသော ဆွဲဆောင်မှုအာရုံတစ်ခု ရှိသည်။
ကြာပန်းဓားသမားသည် သူမ၏ အမည်ဖြစ်ပြီး ဘွဲ့နာမည် မဟုတ်ပေ။ ဓားသမားသည် သူမ၏ မျိုးရိုးအမည်ဖြစ်ပြီး ကြာပန်းသည် သူမ၏ နာမည်ရင်း ဖြစ်သည်။
သူမသည် ရိုင်နစ် မျိုးနွယ်စုဟု ခေါ်သော အထူးမျိုးနွယ်စု တစ်ခုမှ လာသည်။ ဤမျိုးနွယ်စု၏ အဖွဲ့ဝင်များသည် အသက် ၁၅ နှစ်မပြည့်မီ လိင်အမျိုးအစား မရှိကြဘဲ အသက် ၁၅ နှစ်တွင် သူတို့၏ ခန္ဓာကိုယ်သည် အထူးပြောင်းလဲမှု တစ်ခုကို ခံယူရသည်။ သူတို့သည် အမျိုးသမီး သို့မဟုတ် အမျိုးသား ဖြစ်လာနိုင်ပြီး ဤအခမ်းအနားကို 'လိင်သတ်မှတ်ခြင်း အခမ်းအနား' ဟု ခေါ်ဆိုကြသည်။ သူတို့၏ လိင်ကို ဆုံးဖြတ်ပြီးသည်နှင့် အနာဂတ်တွင် ပြောင်းလဲ၍ မရနိုင်တော့ပေ။
ထို့ကြောင့် မျိုးနွယ်စုသည် လုပ်ငန်းတာဝန်ကို ညီတူညီမျှ ခွဲဝေမှုအပေါ် အလေးပေးဆောင်ရွက်သည်။ သို့သော် လိင်သတ်မှတ်ခြင်း အခမ်းအနားသည် လူတစ်ဦး၏ ဘဝကို သက်ရောက်မှု ရှိသဖြင့် နှစ်စဉ် အမျိုးသား ဖြစ်လာရန် ရွေးချယ်သူ အလွန်များပြားသည်။ လူ့အဖွဲ့အစည်းက အမျိုးသမီးများ၏ အကျိုးခံစားခွင့်များနှင့် အဆင့်အတန်းကို တိုးမြှင့်ပေးလျှင်ပင် မွေးဖွားနှုန်းသည် ကျဆင်းနေဆဲ ဖြစ်သည်။
ထို့ကြောင့် ရိုင်နစ် မျိုးနွယ်စုသည် သူတို့၏ မျိုးနွယ်စု ဆက်လက် မျိုးပွားနိုင်စေရန် သေချာစေဖို့ နှစ်စဉ် ပြည့်မီရမည့် အမျိုးသမီး ခွဲတမ်းတစ်ခု ရှိသည်။ ကြာပန်းဓားသမားသည် ငယ်စဉ်က ရွေးချယ်ခံရပြီး အမျိုးသမီး ဖြစ်လာရန် တွန်းအားပေးခံရသည့် ကံဆိုးသော ကိုယ်စားလှယ်လောင်းများထဲမှ တစ်ဦးဖြစ်သည်။
ရိုင်နစ် မျိုးနွယ်စုသည် အဆင့် အေ အထက်ဆင့် စူပါတစ်ဦးကို မွေးထုတ်ပေးခဲ့သော်လည်း သူတို့သည် မည်သည့် ကာကွယ်မှုမှ မရရှိခဲ့ပေ။ ရိုင်နစ် မျိုးနွယ်စုသည် သူမနှင့် မသက်ဆိုင်ကြောင်း ကြာပန်းဓားသမားက ကြေညာထားသည်မှာ ကြာပြီဖြစ်ပြီး သူမ၏ ကိုယ်ပိုင် အဖွဲ့အစည်းကို စီမံခန့်ခွဲနေသည်။
သူတို့၏ အခြား ရဲဘော်ရဲဘက်ဖြစ်သော ကိုလာသည် အင်ပါယာထံ လုံးဝ အညံ့ခံထားသော အဆင့် အေ အထက်ဆင့် တစ်ဦးဖြစ်သည်။ သူ့တွင် အဖွဲ့အစည်း မရှိဘဲ သူ့အင်အားကို ဟီဘာနှင့် နှိုင်းယှဉ်၍ မရသော်လည်း သူသည် အဆင့် အေ အထက်ဆင့် တစ်ဦး ဖြစ်နေဆဲပင်။
"ခင်ဗျားတို့ အားလုံးရဲ့ အကူအညီကို ကျွန်တော် မှီခိုရပါလိမ့်မယ်" ဟန်ရှောင်းက ရိုးသားစွာ ပြောသည်။
နောက်ထပ် ခေတ္တမျှ စကားစမြည်ပြောပြီးနောက် မီလီဇောက အစည်းအဝေး ပြီးဆုံးကြောင်း ကြေညာလိုက်ပြီး ရလဒ်ကို အင်ပါယာထံ အသိပေးလိုက်သည်။
ဟန်ရှောင်းသည် ကွမ်တမ်ကွန်ရက်မှ ထွက်ခွာပြီး သက်ပြင်းချလိုက်သည်။
သူ့အသင်းဖော်များကို သတ်မှတ်ပြီးပြီ ဖြစ်သည်။ အင်ပါယာက လူခုနစ်ဦး စေလွှတ်သဖြင့် အခြား ပါတီနှစ်ခုနှင့် အတူဆိုလျှင် အဆင့် အေ အထက်ဆင့် ဆယ်ဦးကျော် သေချာပေါက် ရှိလာလိမ့်မည်။ တိုက်ပွဲ၏ အတိုင်းအတာသည် မီးပြတိုက်ဂြိုလ် တိုက်ပွဲကဲ့သို့ အဆင့်မျိုး ရောက်ရှိနိုင်သည်။
ဒါပေမဲ့ ဒီတစ်ခါမှာတော့ သူတို့အားလုံးက အက်စ်ဂေါ့ဒ် တစ်ယောက်တည်းကို ကိုင်တွယ်ကြမှာဖြစ်ပြီး အက်စ်ဂေါ့ဒ်၏ အခြေအနေသည် မီးပြတိုက်ဂြိုလ် တိုက်ပွဲအတွင်း အင်ပါယာ၏ အခြေအနေထက် များစွာ ပိုဆိုးရွားနေသည်။
ဟန်ရှောင်းသည် စိတ်လှုပ်ရှားစွာ လက်သီးဆုပ်လိုက်ပြီး တိုက်ပွဲအတွက် ပြင်ဆင်လိုက်သည်။
စာစဉ် (၅၃)၊ အခန်း (၈၈၇) ပြီးပါပြီ။
လင်းဆက်
+++++
အခန်း (၈၈၈) အနာဂတ် အင်ပါယာအုပ်ချုပ်သူ
အင်ပါယာ၏ အသင်းကို ဆုံးဖြတ်ပြီးဖြစ်သည်။ အဆင့် အေ အထက်ဆင့် ခုနစ်ဦးပါဝင်သော အုပ်စုသည် အလွန်အင်အားကြီးသော အင်အားစုတစ်ခုဖြစ်ပြီး အရေအတွက်သည် ဟန်ရှောင်းနှင့် အင်ပါယာ၏ မျှော်လင့်ချက်များကို ကျော်လွန်သွားသည်။ အင်ပါယာသည် အသင်းဝင်များ၏ စာရင်းကို သဘောတူခဲ့ပြီး တိုက်ပွဲအတွက် ပြင်ဆင်ရန် သူတို့၏ ယာဉ်အုပ်စုကို စုစည်းလိုက်သည်။
အက်စ်ဂေါ့ဒ်ကို မကိုင်တွယ်မီ သူတို့သည် အာကိန်းဘုရားကျောင်းနှင့် အရောင်းအဝယ်ကို ဦးစွာ ပြီးမြောက်အောင် လုပ်ဆောင်ရမည်။
အာကိန်းဘုရားကျောင်း၏ လိုက်ပါပို့ဆောင်ရေး ယာဉ်အုပ်စုသည် လမ်းခုလတ်တွင် ရှိနေဆဲဖြစ်ပြီး ဟန်ရှောင်းသည် ကြက်သွေးနီစက်ဝန်းဂြိုလ်ပေါ်တွင် သူ့အမိန့်များကို စောင့်ဆိုင်းနေသည်။ သူသည် နီရိုနှင့် အခြားသူများကို ကြက်သွေးနီစက်ဝန်းဂြိုလ်အား စူးစမ်းလေ့လာရန် အဖော်ပြုပေးဖို့ အချိန်ယူနိုင်သည်။
ကြက်သွေးနီစက်ဝန်းဂြိုလ်သည် အလွန်ကြီးမားပြီး ကောင်းကင်တွင် မျောပါနေသော မြို့တော်များစွာ ရှိသည်။ စကြဝဠာထဲတွင် ကျော်ကြားသော ရှုခင်းများစွာ ရှိသည်။ ထို့ပြင် ကြက်သွေးနီစက်ဝန်းဂြိုလ်သည် ကြက်သွေးရောင်အင်ပါယာ လူမှုအဖွဲ့အစည်း၏ မူလအစဖြစ်ပြီး လွန်ခဲ့သော အချိန်များစွာက သမိုင်းဝင် နေရာအများအပြားကို ထိန်းသိမ်းထားသည်။
ဧည့်လမ်းညွှန်၏ ဦးဆောင်မှုအောက်တွင် ဟန်ရှောင်းနှင့် အခြားသူများသည် မတူညီသော ခရီးသွား နေရာများစွာကို စူးစမ်းလေ့လာရင်း အချိန်ကုန်ဆုံးကြသည်။
ဟန်ရှောင်းသည် ယခင်ဘဝက အင်ပါယာ အဖွဲ့အစည်းတွင် ပါဝင်ခဲ့ဖူးသဖြင့် အင်ပါယာ၏ မိခင်ဂြိုလ်ကို သဘာဝကျစွာ စူးစမ်းလေ့လာဖူးသည်။ ဂြိုလ်ပေါ်ရှိ အခြေအနေနှင့် ရင်းနှီးပြီးသားဖြစ်၍ သူ သိပ်စူးစမ်းချင်စိတ် မရှိဘဲ နီရိုနှင့် အခြားသူများကို အဖော်ပြုပေးရန် အဓိက ရည်ရွယ်သည်။
ကြက်သွေးနီစက်ဝန်းဂြိုလ်တွင် ကြွယ်ဝသော မစ်ရှင် အရင်းအမြစ်များစွာ ရှိသော်လည်း လက်ရှိ ဟန်ရှောင်းအတွက် ဤမစ်ရှင်များ၏ တန်ဖိုးမှာ သိပ်မကြီးမားပေ။ ထို့ပြင် သူ့လက်ရှိ အဆင့်အတန်းသည် ကွဲပြားနေပြီး သူ့လှုပ်ရှားမှုတိုင်းကို အခြားသူများက စောင့်ကြည့်နေလိမ့်မည်။ ထို့ကြောင့် သူတစ်ပါးအတွက် အောက်ခြေသိမ်း အလုပ်သမား ဖြစ်လာရန် မဖြစ်နိုင်ပေ။
အရေးအကြီးဆုံးမှာ ယခုအချိန်တွင် မပေါ်လာသေးသော ရင်းနှီးသော မစ်ရှင်များနှင့် ဇာတ်ကောင်များစွာ ရှိနေသည်။
ဒီနေ့တွင် သူတို့အုပ်စုသည် အင်ပါယာ၏ စိန့်နန်းတော် ပြတိုက်သို့ ရောက်ရှိလာသည်။
ဤပြတိုက်သည် ကြက်သွေးရောင်အင်ပါယာတွင် အကြီးဆုံးဖြစ်ပြီး ကြက်သွေးရောင်အင်ပါယာ ဖွံ့ဖြိုးတိုးတက်မှု ကာလတစ်လျှောက် သမိုင်းဝင် ကာလတိုင်းမှ ပစ္စည်းဝတ္ထုများ ရှိသည်။
စိန့်နန်းတော် ပြတိုက်သည် မတူညီသော နန်းတော်ပေါင်း ဒါဇင်ချီ ပါဝင်သည့် ကြီးမားသော ဥယျာဉ်တစ်ခု ဖြစ်သည်။ နန်းတော်များ အားလုံးတွင် အင်ပါယာ၏ မတူညီသော အချိန်ကာလကို ကိုယ်စားပြုရန် ကွဲပြားသော ပုံစံများ ရှိကြသည်။
သူတို့ဘေးတွင် အင်ပါယာ၏ ဧည့်လမ်းညွှန် ပါရှိခြင်း၏ အားသာချက်မှာ သူတို့ တန်းစီရန် သို့မဟုတ် ဝင်ကြေးလက်မှတ် ဝယ်ရန် မလိုအပ်ခြင်း ဖြစ်သည်။ ဟန်ရှောင်းသည် ဖေဒင်၊ ရေနိုးနှင့် နီရိုတို့ကို ဦးဆောင်ကာ ရှည်လျားသော တန်းစီမှုကို ကျော်ဖြတ်ပြီး အထူးဝင်ပေါက်မှတစ်ဆင့် ပြတိုက်ထဲသို့ ဝင်ရောက်ခဲ့သည်။
သူတို့၏ အထူးအခွင့်အရေးသည် တန်းစီနေသူများ၏ အာရုံစိုက်မှုကို ဆွဲဆောင်သွားပြီး အားလုံးက တစ်ဦးနှင့်တစ်ဦး တီးတိုးပြောဆိုလာကြသည်။
"အဲဒါ ကွဲအက်ကြယ်စင်ကွင်းက ဘလက်စတားနဲ့ တူတယ်၊ ငါသူ့ကို အရင်က သတင်းမှာ တွေ့ဖူးတယ်"
"ဒီလို လူကြီးလူကောင်း တစ်ယောက်ကို တွေ့ရမယ်လို့ တွေးမိတာ၊ ကံကောင်းလိုက်တာ"
"မြန်မြန်၊ ဓာတ်ပုံရိုက်လိုက်"
ဤခရီးသွားများသည် အလွန်စိတ်လှုပ်ရှားနေကြပြီး ဓာတ်ပုံရိုက်ရန် သူတို့၏ ကင်မရာများကို ထုတ်ယူလိုက်ကြသည်။ အဆင့် အေ အထက်ဆင့် စူပါတစ်ဦးသည် ကြီးမားသော အာဏာကို အမှန်တကယ် ပိုင်ဆိုင်ထားသော ပုဂ္ဂိုလ်တစ်ဦး ဖြစ်ပြီး ဤသာမန် ဂလက်ဆီ နေထိုင်သူများနှင့် လုံးဝ ကွာခြားသည်။ ယခု သူတို့ ဟန်ရှောင်းနှင့် တွေ့ဆုံရခြင်းသည် လမ်းပေါ်တွင် ကျော်ကြားသော နာမည်ကြီး တစ်ဦးနှင့် တွေ့ဆုံရသကဲ့သို့ ဖြစ်နေသည်။
ဤခရီးသွားများသည် မတူညီသော မျိုးနွယ်စုများနှင့် လူမှုအဖွဲ့အစည်းများစွာမှ လာကြသည်။ ဆိုင်ရွန်းနစ် တံဆိပ်ခတ်ကွင်း သည် မိခင်ဂြိုလ်ကို ကာကွယ်ရန် ရှိနေခြင်းဖြစ်ပြီး မိခင်ဂြိုလ်ကို ပိတ်ဆို့ထားရန် မဟုတ်ပေ။ အနည်းဆုံးတော့ သူတို့သည် ဤမျိုးဆက်အတွင်း ထိုသို့ လုပ်ဆောင်မည် မဟုတ်ပေ။ ဧည့်သည်တိုင်းသည် တင်းကြပ်သော စစ်ဆေးမှုများကို ဖြတ်သန်းရမည်ဖြစ်ပြီး ဂြိုလ်ပေါ်တွင် အကန့်အသတ်ရှိသော အချိန်အတိုင်းအတာတစ်ခုအထိသာ နေထိုင်ခွင့်ရမည် ဖြစ်သည်။
နှစ်စဉ် ကြက်သွေးနီစက်ဝန်းဂြိုလ်သည် ဒေသတွင်း ခရီးသွားလုပ်ငန်းကို ထောက်ပံ့ရန် ခရီးသွား အမြောက်အမြားကို ကြိုဆိုလေ့ရှိသည်။ အင်ပါယာသည် ထိုငွေကြေး အနည်းငယ်ကို စိတ်မဝင်စားဘဲ ခရီးသွားလုပ်ငန်းမှတစ်ဆင့် အင်ပါယာ၏ လူမှုအဖွဲ့အစည်း လွှမ်းမိုးမှုကို တိုးမြှင့်ရန် စိတ်ဝင်စားသည်။
ဟန်ရှောင်းနှင့် အခြားသူများသည် ပြတိုက်ထဲသို့ ဝင်ရောက်လာပြီး ဧည့်လမ်းညွှန်၏ ဦးဆောင်မှုအောက်တွင် ပင်မနန်းတော်ထဲသို့ ဝင်ရောက်လာကြသည်။
အပြင်ဘက်ရှိ ဆူညံသံများနှင့် နှိုင်းယှဉ်လျှင် နန်းတော်သည် အလွန်တိတ်ဆိတ်နေပြီး လေးနက်သော လေထုတစ်ခု ရှိနေသည်။
ပင်မနန်းတော်သည် ကြက်သွေးရောင်အင်ပါယာ၏ ဖွံ့ဖြိုးတိုးတက်မှု ဦးတည်ချက်ကို ဖော်ပြထားပြီး အားလုံးက ပြသထားသော အမျိုးမျိုးသော ပစ္စည်းဝတ္ထုများကို ကြည့်ရှုရင်း ဧည့်လမ်းညွှန်၏ ရှင်းပြချက်ကို နားထောင်နေကြသည်။
နီရိုသည် အင်ပါယာ၏ သမိုင်းကြောင်းအပေါ် စူးစမ်းလိုစိတ်များ ပြည့်နှက်နေပြီး ပစ္စည်းတိုင်း၏ မိတ်ဆက်ကို ကြည့်ရှုနေသည်။ ဖေဒင်သည် နီရို၏ နောက်မှလိုက်ရင်း ပြသထားသော ပစ္စည်းများကို တော်တော်စိတ်ဝင်စားနေသည်။ ရေနိုး၏ အာရုံစိုက်မှုသည် ပြသထားသော အမျိုးမျိုးသော ရှေးဟောင်း စက်ပစ္စည်းများအပေါ် အဓိက အာရုံစိုက်နေသည်။ ဤစက်ပစ္စည်းများသည် လက်ရှိနည်းပညာနှင့် နှိုင်းယှဉ်လျှင် ခေတ်မမီတော့ဟု ယူဆရသော်လည်း ရေနိုးသည် အခြားသူများထက် ဤပစ္စည်းများကို ပိုမိုစိတ်ဝင်စားနေဆဲ ဖြစ်သည်။
ဟန်ရှောင်းသည် အမြန်ဆုံး လျှောက်သွားပြီး ကြီးမားသော အနက်ရောင် ကျောက်ပြားကြီး ဆယ်ချပ် ရှေ့သို့ ရောက်ရှိလာသည်။ ကျောက်ပြားကြီး ဆယ်ချပ်၏ အမြင့်သည် နန်းတော်၏ မျက်နှာကြက်သို့ ရောက်လုနီးပါး ဖြစ်ပြီး ကြက်သွေးရောင်အင်ပါယာ၏ သမိုင်းကြောင်းကို အစမှ ယခုအချိန်အထိ ရေးသားထားသည်။ ကြက်သွေးရောင်အင်ပါယာ၏ ဖွံ့ဖြိုးတိုးတက်မှုသည် အမြဲတမ်း ချောမွေ့နေခဲ့သည် မဟုတ်ပေ။
ကြက်သွေးရောင်အင်ပါယာသည်လည်း တစ်ချိန်က အားနည်းခဲ့ဖူးပြီး ပြည်တွင်းစစ်နှင့် တော်လှန်ရေး ကြိုးပမ်းမှုများကဲ့သို့သော တိုက်ပွဲများစွာကို ဖြတ်သန်းခဲ့ရသည်။
သူတို့၏ မျိုးရိုးဗီဇများ တိုးတက်လာခြင်းသည် ဗီဇပြောင်းလဲခြင်း အန္တရာယ်ကို ယူဆောင်လာခဲ့သည်။ စက်ပစ္စည်းများနှင့် AI များ တိုးတက်လာခြင်းသည် ဉာဏ်ရည်မြင့် စက်ပစ္စည်းများ၏ သစ္စာဖောက်ခြင်း အန္တရာယ်ကို ကြုံတွေ့စေသည်။ လေးလံသော စက်ပစ္စည်းများ အသုံးပြုခြင်းသည် ပတ်ဝန်းကျင်အပေါ် အပြောင်းအလဲများ ဖြစ်ပေါ်စေခဲ့သည်... သူတို့၏ နည်းပညာဆိုင်ရာ ကျွမ်းကျင်မှုများ တိုးတက်လာသည်နှင့်အမျှ လူမှုအဖွဲ့အစည်းသည် လမ်းခွဲများစွာနှင့်လည်း ကြုံတွေ့ခဲ့ရသည်။
အမျိုးမျိုးသော ကြယ်တာရာတံခါးပေါက်များ၊ ကပ်ရောဂါများ၊ စူးစမ်းရှာဖွေရေး စစ်ပွဲများနှင့် အခြားသော အန္တရာယ်များစွာလည်း ရှိခဲ့သည်။ ကြက်သွေးရောင်အင်ပါယာ ကြုံတွေ့ခဲ့ရသော များပြားလှသော ဆင်းရဲဒုက္ခများမှတစ်ဆင့် သူတို့သည် နောက်ဆုံးတွင် သူတို့၏ သံမဏိသွေး စရိုက်ကို မွေးမြူနိုင်ခဲ့သည်။
သူတို့သည် အားနည်းသော လူမှုအဖွဲ့အစည်းတစ်ခုမှ စကြဝဠာအတွင်း အုပ်ချုပ်သူများထဲမှ တစ်ဦးအဖြစ် ကြီးထွားလာခဲ့သည်။ ဤကာလတစ်လျှောက်လုံးတွင် သူတို့သည် ဆင်းရဲဒုက္ခ အများအပြားကို ကြုံတွေ့ခဲ့ရပြီး ကျောက်ပြားကြီး ဆယ်ချပ်သည် ထိုနေရာသို့ ရောက်ရှိရန် သူတို့ ပေးဆပ်ခဲ့ရသော တန်ဖိုးကို မှတ်တမ်းတင်ထားသည်။
လူမှုအဖွဲ့အစည်း တစ်ခုလုံး၏ သမိုင်းကြောင်းရှေ့တွင် လူတိုင်းသည် အလွန်သေးငယ်နေပုံရသည်။
ဟန်ရှောင်းသည် ကျောက်ပြားကြီးများကို ကြည့်ရင်း အတွေးလွန်နေစဉ် သူ့ဘေးမှ အိုမင်းသော အသံတစ်ခု ထွက်ပေါ်လာသည်။
"ဒီကျောက်ပြားတွေကို မြင်တိုင်း ကျွန်တော် အမြဲတမ်း အံ့သြရတယ်"
ဟန်ရှောင်း လှည့်ကြည့်လိုက်ရာ ပြတိုက်၏ ယူနီဖောင်း ဝတ်ဆင်ထားသော အဘိုးအိုတစ်ဦးကို တွေ့လိုက်ရသည်။ သူ့မျက်လုံးများထဲတွင် ကရုဏာသက်သော အကြည့်တစ်ခု ရှိပြီး စစ်သားတစ်ဦးကဲ့သို့ ကျောကို မတ်မတ်ထားသည်။
"မှန်ပါတယ်၊ စကြဝဠာ အဆင့်ကို ရောက်ရှိနိုင်တဲ့ လူမှုအဖွဲ့အစည်းတိုင်း လေးစားခံရဖို့ ထိုက်တန်ပါတယ်" ဟန်ရှောင်းက ပြန်ဖြေသည်။
အဘိုးအိုက ခေါင်းညိတ်ပြီး ဟန်ရှောင်းကို လှည့်ကြည့်လိုက်သည်။ အပြုံးတစ်ခုနှင့်အတူ သူက ပြောသည်၊ "ကျွန်တော့်ကိုယ်ကျွန်တော် မိတ်ဆက်ပါရစေ၊ ကျွန်တော်က စိန့်နန်းတော် ပြတိုက်ရဲ့ ဒုတိယ မန်နေဂျာ၊ ကာလ် ဖလော်ရာ ဝီရှန်ဒီ ပါ၊ မင်္ဂလာပါ လူကြီးမင်း ဘလက်စတား"
"မင်္ဂလာပါ" ဟန်ရှောင်းလည်း ခေါင်းညိတ်လိုက်သော်လည်း သူ့နှလုံးခုန်သံ မြန်လာသည်။
ကာလ် ဖလော်ရာ ဝီရှန်ဒီ လား။ ဒီနာမည်က ရင်းနှီးနေသလိုပဲ...
ပုံမှန်အားဖြင့် သူ ရင်းနှီးသည်ဟု ထင်ရသော နာမည်များသည် သူ့ယခင်ဘဝမှ ကျော်ကြားသော ဇာတ်ကောင်များ ဖြစ်လေ့ရှိသည်။ ဟန်ရှောင်းသည် ဒုတိယ မန်နေဂျာနှင့် စကားပြောနေရင်း သူ့အချက်အလက် အစုအဝေးကို ချက်ချင်း ရှာဖွေလိုက်သည်။
ကာလ်သည် ကျန်းမာသော အဘိုးအိုတစ်ဦး ဖြစ်ပြီး ဟန်ရှောင်း၏ အဆင့်အတန်းကို သိပ်ဂရုစိုက်ပုံမရဘဲ ဟန်ရှောင်းနှင့် တန်းတူ ဆက်ဆံပြောဆိုသည်။
"ကျွန်တော်က အင်ပါယာရဲ့ သမိုင်းကြောင်းကို အမြဲတမ်း စိတ်ဝင်စားခဲ့ပြီး ပြတိုက်ကို စောင့်ရှောက်ခဲ့တာ နှစ်ပေါင်းများစွာ ကြာပါပြီ၊ ဒီနေရာက ပစ္စည်းတွေကို ကာကွယ်ရတာ ကျွန်တော် နှစ်သက်ပါတယ်" ကာလ်က သူ့ရှေ့ရှိ ကျောက်ပြားကို ပွတ်သပ်ရင်း ညည်းညူလိုက်သည်။
ဟန်ရှောင်းက ဘေးရှိ 'မကိုင်ရ' ဟူသော ဆိုင်းဘုတ်ကို ကြည့်လိုက်ပြီး ဒုတိယ မန်နေဂျာ စည်းကမ်းဖောက်ဖျက်နေသည်ကို လျစ်လျူရှုရန် ဆုံးဖြတ်လိုက်သည်။
"ဒုတိယ မန်နေဂျာ ကာလ်၊ ခင်ဗျားက အရင်တုန်းက စစ်သား လုပ်ခဲ့ဖူးလား"
"ဟုတ်ပါတယ်၊ ကျွန်တော် ငယ်ငယ်တုန်းက အင်ပါယာရဲ့ သတ္တမမြောက် ကင်းထောက် တပ်ဖွဲ့မှာ တာဝန်ထမ်းဆောင်ခဲ့ပြီး တိုက်ပွဲပေါင်း နှစ်ဆယ့်သုံးကြိမ် ပါဝင်ခဲ့ဖူးပါတယ်၊ ပြီးတော့ စီမံခန့်ခွဲရေး အလုပ်တစ်ခု မရခင် တာဝေး တပ်မှူးအဖြစ် ပြောင်းရွှေ့ခံခဲ့ရတယ်၊ ကျွန်တော့်ဘဝရဲ့ ထက်ဝက်ကျော် တပ်မတော်မှာ တာဝန်ထမ်းဆောင်ခဲ့ပြီး အငြိမ်းစားယူဖို့ လျှောက်ထားခဲ့တယ်၊ ပြီးတော့ ပြတိုက်ရဲ့ ဒုတိယ မန်နေဂျာ ဖြစ်လာခဲ့တာပါ"
ဟန်ရှောင်းကို သူ့ဇစ်မြစ်အကြောင်း ရှင်းပြနေသည်ဟု ပြောမည့်အစား သူက ကိုယ့်ဘာသာ စကားပြောပြီး အတိတ်ကို လွမ်းဆွတ်နေသကဲ့သို့ ပိုတူသည်။
ဒါကို ကြားလိုက်ရတော့ ဟန်ရှောင်း၏ မျက်လုံးများ တောက်ပသွားပြီး သူ့ဘေးမှ လူသည် ဘယ်သူလဲ ဆိုတာ နောက်ဆုံးတော့ မှတ်မိသွားသည်။
ပို၍ တိကျစွာ ပြောရလျှင် သူ့ဘေးမှ အငြိမ်းစား စစ်သားသည် ကျော်ကြားသော ကွန်ပျူတာဇာတ်ကောင် တစ်ဦး မဟုတ်သော်လည်း သူ့မျိုးဆက်သည် စကြဝဠာတစ်ခွင် ကျော်ကြားသည်။
ကာလ်၏ မျိုးရိုးအမည်မှာ 'ဖလော်ရာ ဝီရှန်ဒီ' ဖြစ်ပြီး ကြက်သွေးရောင်အင်ပါယာ၏ အနာဂတ် အုပ်ချုပ်သူများထဲမှ တစ်ဦးတွင် ထိုကဲ့သို့သော မျိုးရိုးအမည် ရှိသည်။
အင်ပါယာ၏ အနာဂတ် အုပ်ချုပ်သူသည် သူ့ရှေ့မှ ဤအဘိုးအို၏ မျိုးဆက်ဖြစ်ရန် အလွန်ဖြစ်နိုင်ချေ များသည်။
ဒီတစ်ခါ သူ ငါးကြီးတစ်ကောင် တွေ့လိုက်ရပြီဟု ပြောနိုင်သည်။
ထို့နောက် ဟန်ရှောင်းသည် နီရိုနှင့် ဖေဒင်ကို ဖြည်းညှင်းစွာ လှည့်ကြည့်လိုက်သည်။
သူတို့က တကယ့်ကို ကြောက်စရာကောင်းတာပဲ...
သေချာပေါက် အချိန်ကာလအရ ထိုအင်ပါယာ အုပ်ချုပ်သူ မွေးဖွားလာခြင်း မရှိသေးဘဲ ဖြစ်နိုင်သည်။ သို့သော် သူ့ကို မိတ်ဆွေဖွဲ့ထားခြင်းက တန်ဖိုးရှိနေဆဲဖြစ်ပြီး တန်ဖိုး ပိုမိုမြင့်မားသည်ဟုပင် ဆိုနိုင်သည်။
ထို့နောက် ဟန်ရှောင်းက ပြုံးလျက် ပြောသည်၊ "ကျွန်တော် အင်ပါယာထဲ ဝင်တာ မကြာသေးပါဘူး၊ ပြီးတော့ အင်ပါယာရဲ့ သမိုင်းကြောင်းကိုလည်း အရမ်းစူးစမ်းချင်နေတာ၊ ခင်ဗျား ကျွန်တော့်ကို မိတ်ဆက်ပေးဖို့ စိတ်ဝင်စားမလားဆိုတာ သိချင်မိတယ်"
"အဆင့် အေ အထက်ဆင့် မဟာမိတ် တစ်ယောက်ကို အင်ပါယာရဲ့ သမိုင်းကြောင်း မိတ်ဆက်ပေးရတာ ကျွန်တော့်အတွက် ဂုဏ်ယူစရာပါ" ကာလ်က သဘောကျစွာ ရယ်မောလိုက်သည်။
ရှေးမျိုးဆက်မှ အငြိမ်းစား စစ်သားတစ်ဦး အနေဖြင့် သူသည် အင်ပါယာ၏ သမိုင်းကြောင်းကို အခြားသူများအား ပြောပြရန် အလွန်ဆန္ဒရှိသည်။
တစ်နေ့လုံး ကာလ်သည် ဧည့်လမ်းညွှန်၏ အလုပ်ကို လုယူပြီး ဟန်ရှောင်းနှင့် အခြားသူများကို အခြားနန်းတော်များ ကြည့်ရှုရန် လိုက်ပို့ပေးသည်။
ဟန်ရှောင်းသည် တစ်ဖက်လူနှင့် မိတ်ဆွေဖွဲ့ရန် ရည်ရွယ်ထားသဖြင့် သူတို့နှစ်ဦးစလုံးသည် တစ်နေ့လုံး ပျော်ရွှင်စွာ စကားစမြည်ပြောခဲ့ကြပြီး နောက်တစ်နေ့ ဆက်လက်တွေ့ဆုံရန် သဘောတူခဲ့ကြသည်။
နောက်ထပ် နှစ်ရက်လုံးလုံး ဟန်ရှောင်းသည် ကာလ်နောက်လိုက်ပြီး စိန့်နန်းတော် ပြတိုက်ကို စူးစမ်းလေ့လာခဲ့ကာ နောက်ဆုံးတွင် ညဘက်၌ နန်းတော်အားလုံးကို ကြည့်ရှုပြီးသွားသည်။
ထို့နောက် ဟန်ရှောင်းသည် ကာလ်ကို အပြင်ထွက်စားရန် ဖိတ်ခေါ်ခဲ့သော်လည်း ကာလ်က ဖိတ်ကြားမှုကို လက်မခံပေ။ ထိုအစား သူက ဟန်ရှောင်းကို သူ့အိမ်သို့ ဧည့်သည်အဖြစ် ဖိတ်ခေါ်ပြီး ကိုယ်တိုင် ချက်ပြုတ်ကျွေးမွေးမည်ဟု ပြောသည်။
ချိန်းဆိုထားသည့် နေ့တွင် ဟန်ရှောင်းနှင့် အခြားသူများသည် ကာလ်၏ နေအိမ်သို့ ဦးတည်သွားကြသည်။
အငြိမ်းစား အဆင့်မြင့် အရာရှိတစ်ဦး အနေဖြင့် ကာလ်သည် အစိုးရထံမှ အထူးအခွင့်အရေး ရရှိထားပြီး အင်ပါယာ၏ မိခင်ဂြိုလ်ပေါ်တွင် နေအိမ်လုံးချင်းလေးတစ်လုံး ပိုင်ဆိုင်ထားသည်။ ၎င်းသည် တာရူနာမီယာ နန်းတော်နှင့် သိပ်မဝေးဘဲ သွားလာရန် တော်တော် အဆင်ပြေသည်။
ဟန်ရှောင်းနှင့် အခြားသူများသည် နေအိမ်ရှေ့သို့ ရောက်ရှိလာပြီး နီရိုက တံခါးခေါက်လိုက်သည်။
အားလုံး ခေတ္တမျှ စောင့်ဆိုင်းပြီးနောက် လူလတ်ပိုင်းအရွယ် အမျိုးသားတစ်ဦး တံခါးလာဖွင့်သည်။
"မင်္ဂလာပါ၊ လူကြီးမင်း ဘလက်စတား၊ ကျေးဇူးပြုပြီး ဝင်ပါ" လူလတ်ပိုင်း အမျိုးသားက စိတ်လှုပ်ရှားပြီး လေးစားသော မျက်နှာထားဖြင့် ပြောသည်။
ဤလူလတ်ပိုင်း အမျိုးသားသည် ကာလ်၏ သားအကြီးဆုံးဖြစ်ပြီး ကြက်သွေးရောင်အင်ပါယာအတွက် အလုပ်လုပ်နေသည်။ သူ့ဖခင်၏ အဆက်အသွယ်များနှင့်အတူ သူသည် အလယ်အလတ် အဆင့်သို့ တက်လှမ်းနိုင်ခဲ့သော်လည်း ဟန်ရှောင်းရှေ့တွင် ဘာမှမဟုတ်ပေ။
သူ့ဖခင်သည် အဆင့် အေ အထက်ဆင့် စူပါတစ်ဦးနှင့် မိတ်ဆွေဖွဲ့ထားကြောင်း သိလိုက်ရသဖြင့် သူ အလွန်စိတ်လှုပ်ရှားနေပြီး ထိုည စုဝေးပွဲအတွက် ပြင်ဆင်မှုများစွာ ပြုလုပ်ခဲ့သည်။
ဧည့်ခန်းထဲသို့ ဝင်လိုက်သည်နှင့် မီးဖိုချောင်မှ ကာလ်၏ ခေါင်းထွက်လာပြီး ပြောသည်၊ "လူကြီးမင်း ဘလက်စတား၊ ကျေးဇူးပြုပြီး ခဏလောက် ထိုင်ပါဦး၊ ဟင်းပွဲတွေ ခဏနေရင် ရပါတော့မယ်"
"မပူပါနဲ့၊ ဖြည်းဖြည်းလုပ်ပါ၊ ကျွန်တော်တို့မှာ အချိန်အများကြီး ရှိပါတယ်" ဟန်ရှောင်းက လက်ကာပြလိုက်သည်။
ထို့နောက် သူတို့သည် ဧည့်ခန်းရှိ ဆိုဖာပေါ်တွင် ထိုင်လိုက်ကြသည်။ ကာလ်တွင် နောက်ထပ် ကလေးနှစ်ဦး ရှိသေးပြီး အလယ်က ကလေးမှာ သမီးဖြစ်ကာ အငယ်ဆုံး ကလေးမှာ သားဖြစ်သည်။ သမီးဖြစ်သူသည် ဂလက်ဆီ ခရီးသွား အေဂျင်စီ တစ်ခုကို စီမံခန့်ခွဲသော စီးပွားရေးလုပ်ငန်းရှင် တစ်ဦးဖြစ်ပြီး သားငယ်သည် ပန်းပုဆရာ တစ်ဦးဖြစ်သည်။ သူတို့နှစ်ဦးစလုံးသည် အလွန်လေးစားမှုရှိပြီး အလွန်အမင်း စိတ်လှုပ်ရှားနေပုံရသည်။
အခန်း၏ အပြင်အဆင်များကို ကြည့်ရှုရင်း ဟန်ရှောင်းသည် နံရံပေါ်တွင် ချိတ်ဆွဲထားသော အမျိုးသမီးတစ်ဦး၏ ဓာတ်ပုံကို တွေ့လိုက်ရသည်။ သူမသည် ကာလ်၏ ကွယ်လွန်သူ ဇနီးဖြစ်လောက်သည်။
ကာလ်တွင် ကလေးသုံးဦးရှိပြီး အနာဂတ် အင်ပါယာ အုပ်ချုပ်သူသည် မည်သည့် မျိုးဆက်မှ လာသလဲဆိုတာ ဟန်ရှောင်း မသိပေ။ သူ မမှတ်မိ၍ မဟုတ်ဘဲ ယခင်ဘဝက ဤကိစ္စကို အသေးစိတ် မလေ့လာခဲ့သောကြောင့် ဖြစ်သည်။ သို့သော် ကလေးသုံးဦး၏ အလုပ်အကိုင်များအရ သားအကြီးဆုံး၏ မျိုးဆက်ဖြစ်ရန် ဖြစ်နိုင်ချေရှိသည်။
ကာလ်၏ သားအကြီးဆုံးသည် သူ့အသံထဲတွင် မြှောက်ပင့်သော လေသံဖြင့် ဟန်ရှောင်းနှင့် မိတ်ဆွေဖွဲ့ရန် ရည်ရွယ်ထားသည်။ ကာလ်၏ အခြား ကလေးနှစ်ဦးမှာမူ သိပ်မပြောရဲကြပေ။
ဟန်ရှောင်းသည် ကာလ်၏ သားအကြီးဆုံးနှင့် ခေတ္တမျှ ပေါ့ပေါ့ပါးပါး စကားစမြည်ပြောပြီးနောက် ကာလ်သည် ဟင်းပွဲများနှင့်အတူ မီးဖိုချောင်မှ ထွက်လာပြီး အားလုံးကို လာစားရန် ခေါ်လိုက်သည်။
ဟင်းပွဲများ အားလုံးသည် ကြက်သွေးရောင်အင်ပါယာမှ သာမန် အိမ်တွင်းဟင်းလျာများ ဖြစ်ပြီး အလွန်အရသာရှိသည်။ နီရိုသည် စိတ်ကြိုက်စားသောက်ပြီး ကာလ်၏ သားအကြီးဆုံးသည် နီရိုကို အစားအစာ ထည့်ပေးရန် ဖေဒင်၏ အလုပ်ကို လုယူလိုက်သည်။
ထမင်းစားပြီးနောက် ကာလ်၏ သမီးနှင့် သားအငယ်ဆုံးသည် ပန်းကန်များကို သိမ်းဆည်းရန် တာဝန်ယူလိုက်ကြပြီး အခြားသူများက ဧည့်ခန်းသို့ ပြန်လာကြသည်။ ဒီနေ့ ကာလ် ဘယ်လောက် ပျော်ရွှင်နေသည်ကို မြင်နိုင်ပြီး သူသည် အမှန်တကယ် ပြုံးပျော်နေသည်။
"လူကြီးမင်း ဘလက်စတားက မျက်နှာအကြီးဆုံးပဲ၊ ဒီကောင်စုတ်လေး သုံးကောင်က သူတို့ နေ့တိုင်း အလုပ်ရှုပ်နေတယ်၊ ကျွန်တော့်ကို လာတွေ့ဖို့ အချိန်မရှိဘူးလို့ အမြဲတမ်း ညည်းညူနေကြတာ၊ ဒါပေမဲ့ ခင်ဗျားရောက်လာတာနဲ့ သူတို့အားလုံး လိမ္မာပါးနပ်စွာ ပြေးလာကြတယ်၊ အထူးသဖြင့် ဒီကောင်စုတ်လေး၊ သူက ဒီအဘိုးကြီးထက်တောင် ပိုပြီး စိတ်အားထက်သန်နေသေးတယ်"
ကာလ်က တဟားဟား ရယ်မောလိုက်သည်။
"အဟွတ် အဟွတ်" ကာလ်၏ သားအကြီးဆုံးက အနေခက်စွာ ချောင်းဟန့်လိုက်သည်။
ထို့နောက် ဟန်ရှောင်းက ရယ်မောပြီး ကာလ်၏ သားအကြီးဆုံးကို မေးသည်၊ "ကြက်သွေးရောင်အင်ပါယာမှာ ခင်ဗျားရဲ့ ရာထူးက ဘာလဲ"
ကာလ်၏ သားအကြီးဆုံး ချက်ချင်း မျက်နှာတောက်ပသွားပြီး သူ့ရာထူးကို ဖော်ပြလိုက်သည်။
"အို၊ ခင်ဗျားက ဒီလိုရာထူးမျိုးမှာ ထိုင်နိုင်တာ မဆိုးပါဘူး" ဟန်ရှောင်းက မေးစေ့ကို ပွတ်သပ်ပြီး ထပ်ပြောသည်၊ "အနာဂတ်မှာ ခင်ဗျား အကူအညီ လိုအပ်ရင် ကျွန်တော့်ကို အမြဲတမ်း ရှာလို့ရပါတယ်၊ ခင်ဗျား နံပါတ်ပေးပါ"
"ကောင်းလိုက်တာ၊ ကျေးဇူးတင်ပါတယ်၊ လူကြီးမင်း ဘလက်စတား။" ကာလ်၏ သားအကြီးဆုံး အလွန်ဝမ်းသာသွားသည်။
သူသည် ဘလက်စတား၏ ကာကွယ်မှုကို ရရှိနိုင်ရန် ဟန်ရှောင်းကို ဧည့်ခံရာတွင် အလွန်စိတ်အားထက်သန်နေခြင်း ဖြစ်သည်။ သူ့နိုင်ငံရေး အာရုံခံစားမှု မဆိုးလှဘဲ ဘလက်စတား၏ အဆင့်အတန်းသည် အလွန်မြင့်မားသည်။ အင်ပါယာ အုပ်ချုပ်သူက ဘလက်စတားကို အနီးကပ် အာရုံစိုက်နေသည့် အချက်နှင့် ပေါင်းစပ်လိုက်လျှင် ဘလက်စတား၏ ကာကွယ်မှုသည် သူ့အသက်မွေးဝမ်းကျောင်းအတွက် ကောင်းသော သက်ရောက်မှု ဖြစ်ပေါ်စေလိမ့်မည်။
ထို့ပြင် ဘလက်စတား၏ အသက်အရွယ်နှင့်ဆိုလျှင် သူသည် ကြက်သွေးရောင်အင်ပါယာကို အချိန်ကြာမြင့်စွာ ကာကွယ်ပေးနိုင်မည်ဖြစ်ပြီး အနာဂတ်တွင် ပိုမိုမြင့်မားသော အဆင့်အတန်း သေချာပေါက် ရှိလာလိမ့်မည်။
ကာလ်သည် သူ့သားအကြီးဆုံး၏ ပုံစံကို မကြိုက်ဘဲ သူ့သားအကြီးဆုံးက ဘလက်စတားနှင့် သူ့မိတ်ဆွေဖွဲ့မှုကို ရှုပ်ထွေးအောင် လုပ်နေသည်ဟု ခံစားရသည်။ သို့သော် သူသည် သူ့သားအကြီးဆုံး၏ အခွင့်အရေးကို တားဆီးမည်မဟုတ်ဘဲ ဘာမှမမြင်သကဲ့သို့သာ ဟန်ဆောင်နေနိုင်သည်။
"ဟုတ်သားပဲ၊ ကျွန်တော် ခင်ဗျားအတွက် လက်ဆောင်တစ်ခုလည်း ယူလာတယ်" ဟန်ရှောင်းက ပြုံးလိုက်သည်။
"ဟူး၊ လက်ဆောင်က မလိုအပ်ပါဘူး" ကာလ်က လက်ကာပြလိုက်သည်။
"ဘယ်လိုလုပ် ဖြစ်မှာလဲ၊ ကျွန်တော် လက်ဗလာနဲ့ လာလို့မဖြစ်ဘူးလေ"
ထို့နောက် ဟန်ရှောင်း လက်ဖျောက်တီးလိုက်ရာ ဖိသိပ်ထားသော ဘောလုံး ဆယ်လုံး စားပွဲပေါ်သို့ ကျလာသည်။
"ဒီယန္တရား အစောင့်အရှောက်တွေကို ကျွန်တော် ကိုယ်တိုင် လုပ်ထားတာ၊ သူတို့ကို ကျွန်တော့်ဆီ အချက်ပြ ပို့ဖို့ ထုတ်လွှင့်စက် တစ်ခု တပ်ဆင်ထားတယ်၊ ခင်ဗျား အန္တရာယ်ကြုံရတဲ့အခါ ဒီခလုတ်ကို နှိပ်လိုက်ရင် ခင်ဗျားတို့ အန္တရာယ် ကြုံနေရတယ်ဆိုတာ ကျွန်တော်သိလိမ့်မယ်၊ ပြီးရင် ကျွန်တော်က ဒီယန္တရား အစောင့်အရှောက်တွေကို အသက်သွင်းဖို့နဲ့ ခင်ဗျားတို့ အားလုံးကို ကာကွယ်ဖို့ ဟင်းလင်းပြင် ဒိုင်မင်းရှင်းကတစ်ဆင့် ကျွန်တော့် ယန္တရားစွမ်းအားကို ပို့လွှတ်နိုင်လိမ့်မယ်၊ ကျွန်တော့် ယန္တရားစွမ်းအားနဲ့ အားဖြည့်ထားတဲ့ ယန္တရား အစောင့်အရှောက်တွေက ကပ်ဘေးအဆင့် အန္တရာယ်တွေကို ကိုင်တွယ်နိုင်စွမ်း ရှိပါလိမ့်မယ်"
"ဒါက အရမ်းတန်ဖိုးကြီးလွန်းမနေဘူးလား" ကာလ်က တုံ့ဆိုင်းနေသည်။
ဟန်ရှောင်းက ဒါကို ကြားသောအခါ ရယ်မောလိုက်ပြီး ပြောသည်၊ "ဟားဟားဟား၊ ကျွန်တော်က ယန္တရားပညာရှင် တစ်ယောက်လေ"
"ကောင်းပါပြီ၊ ဒါဆို ခင်ဗျားလက်ဆောင်အတွက် ကျေးဇူးတင်ပါတယ်" ကာလ်က ဖိသိပ်ထားသော ဘောလုံး ဆယ်လုံးကို လက်ခံလိုက်သည်။
သူ အသက်ကြီးနေပြီဖြစ်ပြီး သူ့လုံခြုံရေးကို ဂရုမစိုက်လျှင်ပင် သူ့အနာဂတ် မျိုးဆက်များကို ထည့်သွင်းစဉ်းစားရမည်။
အဆင့် အေ အထက်ဆင့် တစ်ဦး၏ ယန္တရား အစောင့်အရှောက်များသည် ကြီးမားသော တန်ဖိုးရှိသည်။ ဘလက်စတား၏ သက်တမ်းသည် အလွန်ရှည်လျားပြီး ဘလက်စတား အသက်ရှင်နေသရွေ့ ဤ ဖိသိပ်ထားသော ဘောလုံး ဆယ်လုံးသည် မိသားစု အမွေအနှစ် တစ်ခုကဲ့သို့ ဖြစ်နေလိမ့်မည်။
လက်ဆောင် ပေးပြီးနောက် နှစ်ဖက်စလုံးသည် ယခင်ကထက် ပိုမိုရင်းနှီးလာကြသည်။ နောက်ထပ် ခေတ္တမျှ စကားစမြည်ပြောပြီးနောက် ဟန်ရှောင်း နှုတ်ဆက်ထွက်ခွာလာသည်။
ကာလ်၏ နေအိမ်လုံးချင်းမှ ထွက်ခွာလာစဉ် ဟန်ရှောင်း၏ ပါးစပ်က အပြုံးတစ်ခုဖြင့် အနည်းငယ် ကွေးတက်သွားသည်။
သူသည် အနာဂတ် အင်ပါယာ အုပ်ချုပ်သူ တစ်ဦး၏ ဘိုးဘေးများနှင့် မိတ်ဆွေဖွဲ့ခဲ့သည်။ အကယ်၍ သူသာ အနာဂတ် အင်ပါယာ အုပ်ချုပ်သူ တစ်ဦး၏ စီနီယာ အမှန်တကယ် ဖြစ်လာခဲ့လျှင် အခြေအနေများ စိတ်ဝင်စားစရာ ကောင်းလာလိမ့်မည်။
ဤရင်းနှီးမြှုပ်နှံမှု အသေးစားလေးသည် သူ့အား ကြီးမားသော အကျိုးအမြတ်များ ယူဆောင်လာရန် အခွင့်အလမ်းရှိပြီး သူ ထိုကဲ့သို့သော ရင်းနှီးမြှုပ်နှံမှုမျိုး မလုပ်ရမည့် အကြောင်းရင်း မရှိပေ။
စဉ်းစားရင်း ဟန်ရှောင်းက နီရို၏ ခေါင်းကို ပွတ်သပ်လိုက်သည်။
နီရိုသည် ဟန်ရှောင်း သူ့ခေါင်းကို ပုတ်ပေးသော ခံစားမှုကို နှစ်သက်ပြီး သူက ဟန်ရှောင်းကို မော့ကြည့်လိုက်သည်။
"မင်းက တကယ့်ကို ငါ့ရဲ့ ကံကောင်းခြင်း ကြယ်ပွင့်လေးပဲ" ဟန်ရှောင်းက ရယ်မောလိုက်သည်။
နီရိုက မျက်တောင်ခတ်လိုက်ပြီး ဟန်ရှောင်း ဘာဆိုလိုသည်ကို နားမလည်သော်လည်း ဟန်ရှောင်း စိတ်အခြေအနေ ကောင်းမွန်နေကြောင်း သူပြောနိုင်သည်။ ထို့ကြောင့် သူက ဤအခွင့်အရေးကို အသုံးချပြီး မေးလိုက်သည်၊ "ဒါဆို၊ ကျွန်တော့် အိမ်စာတွေ လျှော့ပေးလို့ရမလား"
"ရတာပေါ့၊ မင်းအိပ်မက်ထဲမှာလေ"
ထို့နောက် နီရိုက ဟန်ရှောင်း၏ လက်ကို ခါထုတ်ရန် ခေါင်းခါလိုက်ပြီး ဟန်ရှောင်း သူ့ကို မပုတ်နိုင်စေရန် သူ့အိတ်ကို ခေါင်းပေါ် တင်ထားလိုက်သည်။
...
ဟန်ရှောင်းသည် နောက်ရက်များကို ဤပုံစံဖြင့် ပေါ့ပေါ့ပါးပါး ကုန်ဆုံးစေခဲ့ပြီး ကာလ်၏ မိသားစုနှင့် မျက်နှာသာပေးမှု တိုးပွားအောင် လုပ်ဆောင်ရင်း နီရိုနှင့် အခြားသူများကို ခရီးသွား နေရာများသို့ ခေါ်သွားသည်။ အချိန်အတိုင်းအတာတစ်ခု ကြာပြီးနောက် အင်ပါယာက နောက်ဆုံးတွင် သူ့ထံ သတင်းအချို့ ပေးပို့လာသည်။
အာကိန်းဘုရားကျောင်း၏ တပ်ဖွဲ့များ အရောင်းအဝယ် နေရာသို့ ရောက်ရှိလာပြီဖြစ်ပြီး သူ ထွက်ခွာနိုင်ပြီဖြစ်သည်။
ဟန်ရှောင်းသည် နီရိုနှင့် အခြားသူများကို အင်ပါယာ၏ မိခင်ဂြိုလ်ပေါ်တွင် ထားခဲ့ပြီး အင်ပါယာ၏ ယာဉ်အုပ်စုနောက်သို့ တစ်ဦးတည်း လိုက်ပါသွား၏။
စာစဉ် (၅၃)၊ အခန်း (၈၈၈) ပြီးပါပြီ။
လင်းဆက်
+++++