မူလဝိညာဉ် အတားအဆီးကို ချိုးဖျက်ခြင်းနှင့် မသေမျိုးအဆင့် မူလဝိညာဉ် ဖြစ်လာခြင်း

ထို့နောက်တွင် စုရှင်းသည် ရုပ်သေးများကို အဓိက ကုန်သည်ကြီးများအသင်း တည်ရှိရာ မြို့များသို့ စေလွှတ်လိုက်သည်။

ဤအလုပ်များအားလုံး ပြီးမြောက်သွားသောအခါ စုရှင်းသည် မသေမျိုး စစ်သည်တော်ခေတ် အကျဉ်းခန်းသို့ သွားရောက်ခဲ့သည်။

ယခုအပတ်တွင် သတ္တုတူးဖော်ရေး ရုပ်သေးခုနစ်ခုသည် တိုင်းတစ်ပါး သတ္တုရိုင်းများကို တူးဖော်နိုင်ခဲ့ရာ ၎င်းက နောက်အပတ်တွင် စုရှင်းအတွက် သရုပ်ပြစွမ်းအင် ၃၅ ဘီလီယံအထိ ရရှိစေမည် ဖြစ်သည်။

တိုင်းတစ်ပါး သတ္တုရိုင်းများကို ထုတ်ယူပြီးနောက် စုရှင်းသည် ကြယ်ပြာသို့ ပြန်လာခဲ့၏။

"ဟဲဟဲ... ရုပ်သေးလမ်းစဉ်က တကယ် အသုံးဝင်တာပဲ"

"ငါ့မှာသာ ရုပ်သေးတွေ အလုံအလောက် ရှိမယ်ဆိုရင် ဘာမှလုပ်စရာ လိုတော့မှာ မဟုတ်ဘူး။ အချိန်တန်တာနဲ့ လုံလောက်တဲ့ စွမ်းအင်တွေကို ရိတ်သိမ်းရုံပဲ"

စုရှင်း အနည်းငယ် စိတ်ကျေနပ်သွားမိသည်။ လောလောဆယ်တွင် သူ၏ သရုပ်ပြစွမ်းအင် ရရှိမှုလမ်းကြောင်းမှာ တည်ငြိမ်နေပြီ ဖြစ်သည်။

ထို့နောက် စုရှင်းသည် ရုပ်ဖျက်ကာ ကျင်းချုံးရွှယ်နှင့် တွေ့ဆုံရန် ဗီလာသို့ သွားခဲ့၏။

ယနေ့တွင် ကျင်းချုံးရွှယ်က တောက်ပသည့် အနီရောင်ဂါဝန်ကို ဝတ်ဆင်ထားပြီး စုရှင်းကို ထူးဆန်းသော မျက်လုံးများဖြင့် ကြည့်နေ၏။

ထမင်းစားပြီးနောက် ကျင်းချုံးရွှယ်က အဓိက အကြောင်းအရာကို စတင်ပြောဆိုလာသည်။

"အာရှင်း... ငါတို့ အဖွဲ့အစည်းက ကုန်သည်ကြီးများ အသင်းတွေနဲ့ အရောင်းအဝယ် လုပ်နေတာလား"

"ပြီးခဲ့တဲ့အပတ်က ငါ ကျင်းလင်မြို့ကို ပြန်သွားတော့ ကျင်းမိသားစု ကုန်သည်အသင်းဆီကနေ အဆောင်လက်ဖွဲ့တချို့ ရခဲ့တယ်။ အဲ့ဒီ အဆောင်လက်ဖွဲ့တွေက နင် ငါ့ကို အရင်က ပေးခဲ့တာတွေနဲ့ အရမ်းတူနေလို့"

ကျင်းချုံးရွှယ်က စတုတ္ထအဆင့် အဆောင်လက်ဖွဲ့တစ်ခုကို ထုတ်ယူကာ စုရှင်း ပေးထားသည်နှင့် နှိုင်းယှဉ်ပြသည်။ စုရှင်း မျက်ခုံးပင့်လိုက်မိသော်လည်း တည်ငြိမ်စွာပင် ဝန်ခံလိုက်သည်။

"ဟုတ်တယ်... ငါတို့အပြင် အဖွဲ့အစည်းထဲမှာ ဝါရင့်ပညာရှင် အများကြီး ရှိသေးတယ်လေ"

"သူတို့က ကုန်သည်ကြီးများ အသင်းတွေနဲ့ အရောင်းအဝယ် လုပ်ကြတယ်။ တစ်ဖက်က လူသားမျိုးနွယ်ရဲ့ အင်အားကို မြှင့်တင်ပေးသလို နောက်တစ်ဖက်ကလည်း အဖွဲ့အစည်းအတွက် ရန်ပုံငွေ စုဆောင်းတာပေါ့"

ကျင်းချုံးရွှယ်က ခေါင်းညိတ်ကာ ထိုရှင်းပြချက်ကို လက်ခံလိုက်သည်။ စုရှင်းက လေးနက်စွာဖြင့် -

"မမရွှယ်... နောင်မှာ ဘယ်သူပဲမေးမေး အဖွဲ့အစည်းအကြောင်း ဘာမှ ထုတ်မပြောမိဖို့ ဂရုစိုက်နော်၊ နားလည်လား"

ကျင်းချုံးရွှယ်က လိမ္မာပါးနပ်စွာ ခေါင်းညိတ်ပြသဖြင့် စုရှင်း စိတ်အေးသွားရသည်။

ကြယ်ပြာပေါ်တွင် စုရှင်းနှင့် ကျင်းချုံးရွှယ်က အရင်းနှီးဆုံး သူငယ်ချင်းများ ဖြစ်ကြသည်။ လျှို့ဝှက်ကောင်းကင် နန်းတော် နှင့် အရောင်းအဝယ် ကိစ္စများကို သူမ သိသွားခြင်းမှာ အချိန်ကိစ္စသာ ဖြစ်သည်။ ယခု သူမ သိသွားခြင်းက အကျိုးကျေးဇူး ရှိသည်။

အနည်းဆုံးတော့ နောင်တွင် ကျင်းချုံးရွှယ် အဆောင်လက်ဖွဲ့များ ထုတ်သုံးသည့်အခါ အခြားသူများ မြင်လျှင်ပင် ထျန်းကျီးဆီက ဝယ်ထားသည်ဟု အကြောင်းပြချက် ပေးနိုင်မည် မဟုတ်ပါလော။ ဤသို့ဖြင့် စုရှင်းဆီသို့ မည်သူမှ ဆက်စပ်တွေးတောနိုင်တော့မည် မဟုတ်ပေ။

အလုပ်အကြောင်း ပြောဆိုပြီးနောက် သူတို့နှစ်ဦး စကားစမြည် ဆက်ပြောဖြစ်ကြပြီးမှ လမ်းခွဲခဲ့ကြသည်။

ယခုအပတ်တွင် တာရော့အဖွဲ့အစည်းက ပြီးခဲ့သည့်အပတ်၏ သန့်စင်ပြီး သတ္တုရိုင်းများ အပါအဝင် သရုပ်ပြစွမ်းအင် ၂၆ ဘီလီယံကို ယူဆောင်လာပေးခဲ့သည်။ စုရှင်းကလည်း ဆေးလုံးများနှင့် သတ္တုရိုင်းများကို ကျင်းချုံးရွှယ်ထံ တစ်ခုချင်း လွှဲပြောင်းပေးအပ်ခဲ့သည်။

လုံလောက်သော စွမ်းအင်များကို ရရှိပြီးနောက် စုရှင်းသည် ဝိညာဉ်စိုက်ခင်းဂူသို့ အလျင်အမြန် ပြန်လာခဲ့၏။

"တစ်... ဆယ်... ရာ... ထောင်... သောင်း..."

သရုပ်ပြ မျက်နှာပြင်ပေါ်ရှိ စွမ်းအင်များကို ကြည့်ရင်း စုရှင်း၏ ရင်ခုန်သံများ မြန်လာသည်။

စုစုပေါင်း သရုပ်ပြစွမ်းအင် ၄၅၇ ဘီလီယံ။

၎င်းက စုရှင်း မျှော်မှန်းထားသည်ထက် များစွာ ပိုနေခဲ့သည်။

"ဟူး... သရုပ်ပြစွမ်းအင်တွေက အရင်ကထက် ပိုပေါများလာပြီပဲ"

"နှမြောစရာကောင်းတာက နောင်မှာ သရုပ်ပြဖို့ လိုအပ်တဲ့ စွမ်းအင်တွေကလည်း ပိုပြီး များလာဦးမှာပဲ..."

လူသားနတ်ဘုရား နယ်ပယ်အတွက် လိုအပ်မည့် စွမ်းအင်များ ရုတ်တရက် မြင့်တက်သွားမည်ကို စုရှင်း စိုးရိမ်မိသည်။ ထို့ကြောင့် သူသည် စွမ်းအင်များကို ကြိုတင် စုဆောင်းထားရန် လိုအပ်၏။

ခဏတာ စဉ်းစားပြီးနောက် စုရှင်းသည် ယခုတစ်ကြိမ် သရုပ်ပြဆုလာဘ်များကို ကြည့်ကာ ရေရွတ်လိုက်သည်။

"ဝိညာဉ်အရည်တွေကို လဲလှယ်မယ်... ပြီးတော့ မူလဝိညာဉ်နယ်ပယ်ရဲ့ အသိအမြင်တွေကိုလည်း ရယူမယ်"

သူ၏ စကားအဆုံးတွင် အသိပေးချက် ပေါ်လာသည်။

[ဒင်၊ သင်သည် မူလဝိညာဉ်နယ်ပယ် အသိအမြင်များ (အာရုံခြောက်ပါး နယ်ပယ်၊ မိုင်တစ်ထောင် နတ်ဘုရားအာရုံ) ကို အောင်မြင်စွာ ရယူလိုက်ပါပြီ။ စွမ်းအင် ၅ သန်း ကျသင့်ပြီး လက်ကျန်စွမ်းအင် ၄၀၇.၇ ဘီလီယံ ရှိပါသည်။]

[ဒင်၊ သင်သည် ဝိညာဉ်အရည် အပိုင်းအစများကို အောင်မြင်စွာ ရယူလိုက်ပါပြီ။ စွမ်းအင် ၂၅၀ ဘီလီယံ ကျသင့်ပြီး လက်ကျန်စွမ်းအင် ၁၅၇.၇ ဘီလီယံ ရှိပါသည်။]

အသိပေးချက်နှင့်အတူ စွမ်းအားလှိုင်းတစ်ခုက စုရှင်း၏ ခန္ဓာကိုယ်အတွင်းသို့ စီးဝင်လာသည်။ စုရှင်းသည် အဆင့်တက်ခြင်းကို ကြိုဆိုရန် စိတ်ကို လျင်မြန်စွာ ထိန်းချုပ်လိုက်၏။

ချက်ချင်းဆိုသလိုပင် စုရှင်း၏ နတ်ဘုရားအာရုံက လျင်မြန်စွာ စတင် ကြီးထွားလာတော့၏။

ရှစ်ထောင်မိုင်... ကိုးထောင်မိုင်... ကိုးထောင့်ငါးရာမိုင်…

နောက်ဆုံးတွင် နတ်ဘုရားအာရုံသည် မိုင်တစ်သောင်းအထိ ချိုးဖျက်နိုင်ခဲ့ပြီ ဖြစ်သည်။ တစ်ချိန်တည်းမှာပင် သူသည် "အာရုံခြောက်ပါး နယ်ပယ်" သို့ ရောက်ရှိသွားခဲ့၏။

စုရှင်း၏ နတ်ဘုရားအာရုံ အဆမတန် ကြီးထွားလာသည်နှင့်အမျှ သူ၏ တန်းထျန်အတွင်းရှိ ရွှေရောင် ရုပ်ပွားတော်လေးသည်လည်း စတင် ပြောင်းလဲလာသည်။

လက်ဝါးခန့်သာရှိသော ရွှေရောင်ရုပ်ပွားတော်လေးမှာ ပိုမို အသက်ဝင်လာခဲ့၏။ အရောင်မှာ ရွှေအစစ်ကဲ့သို့ တောက်ပနေပြီး ရုပ်ပွားတော်လေးမှာ မျက်လုံးများကို ဖြည်းညင်းစွာ ဖွင့်လိုက်ရာ ရွှေရောင်အလင်းတန်းများ ဖြတ်သန်းသွားသည်။

ဤအခိုက်အတန့်တွင် စုရှင်းသည် လူသားနတ်ဘုရား နယ်ပယ်၏ ဒုတိယမြောက် အတားအဆီးဖြစ်သော "မူလဝိညာဉ် အတားအဆီး" ကို အောင်မြင်စွာ ကျော်ဖြတ်နိုင်ခဲ့ပြီ ဖြစ်သည်။

အောင်မြင်စွာ အဆင့်တက်ပြီးနောက် စုရှင်း မျက်လုံးများကို အသာအယာ ဖွင့်လိုက်သည်။ သူ၏ စိတ်အကြံတစ်ခုဖြင့် သူသည် ကျောင်းအိပ်ဆောင်အတွင်း၌ ပေါ်လာ၏။

"ဟဲဟဲ... မူလဝိညာဉ် အတားအဆီး၊ မသေမျိုးအဆင့် မူလဝိညာဉ်... ဘယ်လောက်ထိ စွမ်းမလဲဆိုတာ ကြည့်ရသေးတာပေါ့"

စုရှင်း စိတ်လှုပ်ရှားစွာဖြင့် ကုတင်ပေါ်တွင် တင်ပလ္လင်ခွေ ထိုင်လိုက်ပြီး သူ၏ မူလဝိညာဉ်ကို ခန္ဓာကိုယ်ပြင်ပသို့ ထွက်ခွာရန် ထိန်းချုပ်လိုက်သည်။

မူလဝိညာဉ် ခန္ဓာကိုယ်ပြင်ပသို့ ထွက်လာသောအခါ စုရှင်း၏ အမြင်တွင် ပတ်ဝန်းကျင် တစ်ခုလုံးမှာ အဆုံးမဲ့ ကျယ်ပြန့်သွားသလို ခံစားလိုက်ရသည်။ နတ်ဘုရားတစ်ပါး၏ အမြင်ဖြင့် သူသည် ပတ်ဝန်းကျင်ရှိ အရာရာကို ရှင်းလင်းစွာ မြင်နေရသည်။ ဤခံစားချက်မှာ ရိုးရိုး နတ်ဘုရားအာရုံနှင့် မတူဘဲ ပိုမို ကြည်လင်ပြတ်သားကာ ပိုမို စစ်မှန်လှသည်။

စုရှင်း၏ မူလဝိညာဉ်သည် ကောင်းကင်နှင့် မြေကြီးကြားတွင် အလွန်လျင်မြန်သော အရှိန်ဖြင့် ပျံဝဲနေသည်။ ၎င်းမှာ ဓားပျံစီးခြင်းထက်ပင် နှစ်ဆကျော် ပိုမြန်နေ၏။

"မမရွှယ် ဘာလုပ်နေလဲဆိုတာ သွားကြည့်ဦးမှ..."

စုရှင်း တိုးတိုးလေး ရေရွတ်လိုက်ပြီးနောက် ခဏချင်းမှာပင် ကျင်းချုံးရွှယ်၏ အနားသို့ ရောက်ရှိသွားသည်။ ကျင်းချုံးရွှယ်မှာ တာရော့အဖွဲ့အစည်း၏ အနာဂတ် ဖွံ့ဖြိုးတိုးတက်ရေး အတွက် စာရွက်စာတမ်းများကို အာရုံစိုက်ကာ ကိုင်တွယ်နေ၏။

"ကျင်းချုံးရွှယ်ဆီမှာ နတ်ဘုရားအာရုံ အစအနလေး တစ်ခု ချန်ထားပေးရမလား"

စုရှင်း စမ်းသပ်ကြည့်လိုက်ပြီး ရွှေရောင်သဲပွင့်လေးသဖွယ် သေးငယ်လှသော မူလဝိညာဉ် အစအနလေးတစ်ခုကို ကျင်းချုံးရွှယ်၏ ခန္ဓာကိုယ်အတွင်းသို့ ပေါင်းစပ်ထည့်သွင်းလိုက်သည်။

ကျင်းချုံးရွှယ်မှာ သူမ၏ နှာခေါင်းလေးကို အသာရှုံ့ကာ ပတ်ဝန်းကျင်ကို ဝေ့ဝဲကြည့်လိုက်သည်။

"ဟဲဟဲ... ဒီမူလဝိညာဉ် အစအနလေး ရှိနေရင် ကျင်းချုံးရွှယ် နောင်မှာ အန္တရာယ်တွေ့လာရင် ငါ တိုက်ရိုက် ကာကွယ်ပေးနိုင်ပြီ"

ဤမူလဝိညာဉ် အစအနလေးမှာ သတိမထားမိလောက်အောင် သေးငယ်သော်လည်း စုရှင်း အလိုရှိပါက ၎င်းကို ဖောက်ခွဲလိုက်နိုင်ပြီး "ကိုယ်ခန္ဓာ ပေါင်းစည်းခြင်း" နယ်ပယ် ကျင့်ကြံသူတစ်ဦး၏ အစွမ်းကုန် တိုက်ခိုက်မှုနှင့် ညီမျှသော ဒဏ်ကို ရရှိစေမည် ဖြစ်သည်။

ဤနည်းလမ်းဖြင့် ကြယ်ပြာပေါ်ရှိ မည်သူမျှ ကျင်းချုံးရွှယ်၏ အသက်ကို ခြိမ်းခြောက်နိုင်တော့မည် မဟုတ်ပေ။

"အင်း... ငါ့ရဲ့ မူလဝိညာဉ်က နည်းနည်းတော့ အားနည်းသွားသလိုပဲ။ ပြန်ကောင်းဖို့ နှစ်ရက်၊ သုံးရက်လောက်တော့ ကြာမှာ”