ဆင်းသက်ဂိုဏ်းကို အမြစ်ပြတ်ချေမှုန်းခြင်းနှင့် ယင်သန့်စင်ခန္ဓာ၏ လျှို့ဝှက်ချက် (အပိုင်း ၄)

[တောင်စဉ်တစ်သိန်းအတွင်း ဖြစ်ပွားနေသည့် ပြည်တွင်းပဋိပက္ခများနှင့် နတ်ဆိုးဘုရင်များ၏ အင်အားစုများ လျင်မြန်စွာ ပြိုကွဲပျက်စီးနေကြခြင်းသည် ဆင်းသက်ဂိုဏ်းမှ ကွယ်ရာက ကြိုးကိုင်ခြယ်လှယ်နေခြင်းကြောင့် ဖြစ်ကြောင်း သင်က ရှင်းပြလိုက်သည်။]

[ပထမတော့ ကျားဝိဇ္ဇာသည် ဤအယူအဆကို ပယ်ချခဲ့၏။ သို့သော်လည်း နက်နက်ရှိုင်းရှိုင်း ပြန်လည် စဉ်းစားကြည့်လိုက်သည့်အခါ သူသည် ထိတ်လန့်တုန်လှုပ်သွားရသည်။ လွန်ခဲ့သော ဆယ်စုနှစ် အနည်းငယ် အတွင်းမှာတင် နတ်ဆိုးဘုရင် အပါးနှစ်ဆယ်ထက်မက သေဆုံးခဲ့ပြီး သူတို့၏ နယ်မြေများ ဝါမျိုခံလိုက်ရခြင်းသည် အမှန်တကယ်ပင် ပုံမှန်မဟုတ်‌သော အခြေအနေ မဟုတ်ပါလော။]

[ထို့ကြောင့် ကျားဝိဇ္ဇာသည် ပျာယာခတ်သွားပြီး ဤအခြေအနေကို ဘယ်လို ကိုင်တွယ်ရမလဲ ဆိုသည်ကို မဝေခွဲနိုင် ဖြစ်နေသည်။]

[ထိုအခွင့်အရေးကို အသုံးချပြီး သင်သည် ရွှေရောင်နတ်ဆိုးဘုရင်နဲ့ ပြန်လည် သင့်မြတ်အောင် ကူညီပေးနိုင်ကြောင်း ကမ်းလှမ်းလိုက်သည်။ သို့သော် အပြန်အလှန်အားဖြင့် ကျားနတ်ဘုရားအနေနှင့် သင့်ကို တောင်စဉ်တစ်သိန်း၏ မြောက်ဘက်မှတစ်ဆင့် အဖြူရောင်ဧကရာဇ် မြို့တော်အထိ လိုက်လံပို့ဆောင်ပေးရမည် ဖြစ်သည်...]

လက်တွေ့ကမ္ဘာတွင် စုရှင်း ဤသည်ကို မြင်လိုက်ရသောအခါ မျက်လုံးများ အရောင်တောက်သွားသည်။

"ဒါပေါ့။ တကယ်လို့ ဒါကို အခြေအနေတစ်ခုအနေနဲ့ အသုံးချနိုင်မယ်ဆိုရင် ငါ တကယ်ပဲ အဖြူရောင်ဧကရာဇ် မြို့တော်ကို ရောက်သွားနိုင်မှာပဲ"

"ဒီတောင်စဉ်တစ်သိန်းထဲမှာ အကြာကြီးနေတာက အန္တရာယ်ရှိနိုင်တယ်... ဒီသတင်းတွေကို အပြင်ကို သယ်သွားပြီး ကောင်းကင်လျှို့ဝှက်နန်းတော်ဆီမှာ ရောင်းစားတာက ပိုကောင်းလိမ့်မယ်"

ထိုသို့ တွေးတောရင်း စုရှင်းသည် သရုပ်ပြမျက်နှာပြင်ဆီသို့ ပြန်လည် ကြည့်ရှုလိုက်သည်။

[သင်၏ အကြိမ်ကြိမ် ကြိုးပမ်းမှုတွေအပြီးမှာတော့ ကျားနတ်ဘုရားသည် ဤအရောင်းအဝယ်ကို သဘောတူလိုက်သည်။]

[ထို့နောက် သင်သည် နည်းဟောင်းကိုပင် ပြန်လည် အသုံးပြုပြီး ရွှေရောင်နတ်ဆိုးဘုရင်၏ အခြေစိုက်စခန်းဆီသို့ သွားရောက်ကာ သူ့အား 'သားသမီးရတနာ ထွန်းကားခြင်း' စွမ်းရည်ကို ချီးမြှင့်လိုက်သည်။]

[နောက်ထပ် နှစ်နှစ်တာအတွင်း သင်သည် ကျားနတ်ဘုရား၏ ခံတပ်အတွင်းတွင် မည်သည့် ခြိမ်းခြောက်မှုမှ မရှိဘဲ နေထိုင်ခဲ့သည်။]

[ထိုအတောအတွင်း သင်သည် ယခင်က ရရှိထားသော သတင်းအချက်အလက်များကို ပေါင်းစပ်ဆန်းစစ်ခဲ့ရာ ချင်းယွင်နယ်မြေငယ် အတွင်းရှိ ဆင်းသက်ဂိုဏ်း၏ အခြေစိုက်စခန်း ၁၃ ခုထက်မကနှင့် သူတို့နဲ့ တိတ်တဆိတ် ပူးပေါင်းနေကြသော ကုန်သည်မိသားစုများကိုပါ အကြမ်းဖျင်း ဖော်ထုတ်နိုင်ခဲ့သည်။]

[၄၈ နှစ်မြောက်တွင် ရွှေရောင်နတ်ဆိုးဘုရင်သည် သားသမီးရတနာ ထွန်းကားလာခဲ့ပြီး ကျားနတ်ဘုရားနှင့်လည်း ပြန်လည် သင့်မြတ်သွားခဲ့သည်။]

[ကျားနတ်ဘုရားအနေနှင့် သူ၏ ကတိကို ဖျက်လိမ့်မည်ဟု သင် အစက ထင်ထားသော်လည်း ဤနတ်ဆိုးကျင့်ကြံသူသည် သူ၏ ဆိုးသွမ်းလှသော စိတ်နေစိတ်ထားအောက်မှာ ဂုဏ်သိက္ခာရှိသည့် သူတစ်ယောက် ဖြစ်နေခဲ့သည်။]

[ထို့ပြင် သင်သည် ရွှေရောင်နတ်ဆိုးဘုရင်နှင့် အကြောင်းအကျိုး ဆက်နွယ်မှုကို တည်ဆောက်ထားခဲ့သည့် အတွက် နတ်ဆိုးဘုရင် နှစ်ပါးစလုံးက သင့်ကို တောင်စဉ်တစ်သိန်း အပြင်ဘက် အထိ ကိုယ်တိုင်ကိုယ်ကျ လိုက်လံ ပို့ဆောင်ပေးခဲ့ကြသည်...]

[ဤသို့ဖြင့် ရွှေရောင်နတ်ဆိုးဘုရင်နှင့် သင်၏ အကြောင်းအကျိုး ဆက်နွယ်မှုမှာ ပြီးဆုံးသွားခဲ့ပြီး သူသည် သင့်အပေါ် မည်သည့် အကြွေးမှ တင်ရှိမနေတော့ပေ။]

[တောင်စဉ်တစ်သိန်း၏ မြောက်ဘက်ခြမ်းကို ရောက်ရှိသွားသည်နှင့် သင်သည် အဖြူရောင်ဧကရာဇ် မြို့တော်ဆီသို့ တိုက်ရိုက် ဦးတည်ထွက်ခွာခဲ့သည်။]

[အဖြူရောင်ဧကရာဇ် မြို့တော် အတွင်းသို့ ဝင်ရောက်ပြီးနောက် သင်သည် ရက်အနည်းငယ်ကြာ အနားယူခဲ့ပြီး နှစ်ပေါင်းများစွာအတွင်း သင် စုဆောင်းလာခဲ့သော သတင်းအချက်အလက်များကို ပြန်လည် ပြုစုပျိုးထောင်လိုက်သည်။]

စုရှင်းသည် ဤနေရာတွင် ရင်ထဲ၌ လှုပ်ရှားသွားပြီး တိုးတိုးလေး ရေရွတ်လိုက်သည်။

"မြှုပ်နှံသရုပ်ပြခြင်းကို သုံးမယ်..."

[ဒင်...]

စုရှင်း၏ ပုံရိပ်သည် သရုပ်ပြကမ္ဘာ အတွင်း၌ ပေါ်လာပြီး သူ၏လက်ထဲရှိ ကျောက်စိမ်းလွှာကို ကြည့်ကာ ၎င်းကို စတင် အာရုံစိုက် မှတ်သားတော့သည်။

ခဏအကြာတွင် ချင်းယွင်နယ်မြေငယ် အတွင်းရှိ ဆင်းသက်ဂိုဏ်း အခြေစိုက်စခန်းများနှင့် ဆက်စပ် အင်အားစုများ၏ သတင်းအချက်အလက်များမှာ စုရှင်း၏ စိတ်ထဲတွင် ပေါ်လာတော့သည်။

"မဆိုးဘူး၊ သံသယဖြစ်စရာ အခြေစိုက်စခန်း တည်နေရာ စုစုပေါင်း ၁၃ ခုမှာ အဲ့ဒီထဲက ၈ ခုကတော့ ရာနှုန်းပြည့် သေချာတယ်၊ ကျန်တဲ့ ၅ ခုထဲက ၂ ခုကလည်း မှန်ကန်နေတယ်။"

"ဒါ့အပြင် ငါက အဓိက သစ္စာဖောက် မိသားစု ၁၀ စုရဲ့ သတင်းကိုလည်း ရခဲ့တယ်... အားလုံးနီးပါးက အတည်ပြုပြီးသားတွေပဲ..."

စုရှင်း ကျေနပ်စွာ ခေါင်းညိတ်လိုက်သည်။ ဤသတင်းအချက်အလက်များ၏ အသေးစိတ်ကျမှုနှင့် တိကျမှုမှာ အဆင့်A သတင်းအချက်အလက်များနှင့်ပင် ညီမျှနေချေပြီ။

"ဒါဆိုရင် နောက်တစ်ဆင့်အနေနဲ့ ဒါကို ကောင်းကင်လျှို့ဝှက်နန်းတော်ဆီ အကြောင်းကြားလိုက်ရင် ဘယ်လို နောက်ဆက်တွဲ ရလဒ်တွေ ထွက်လာမလဲဆိုတာ ကြည့်ရတာပေါ့..."

"ပြီးတော့ အဲ့ဒါနဲ့ တစ်ဆက်တည်းမှာပဲ ယင်သန့်စင်ခန္ဓာရဲ့ သတင်းကိုပါ စုံစမ်းရမယ်"

စုရှင်းသည် ရုပ်ဖျက်ပြီး သူ၏ အငွေ့အသက်ကို ဖုံးကွယ်လိုက်ပြီးနောက် အဖြူရောင် ဧကရာဇ်မြို့တော်ရှိ ကောင်းကင်လျှို့ဝှက်နန်းတော် ဌာနခွဲဆီသို့ ဦးတည်ခဲ့သည်။

အကာအကွယ် အစီအရင်ကို ဖြတ်ကျော် ဝင်ရောက်ပြီးနောက် စုရှင်းသည် စားပွဲပေါ်တွင် ငိုက်မြည်းနေသော မိန်းကလေးငယ် တစ်ဦးကို မြင်လိုက်ရသည်။ စုရှင်း ဆိုင်ထဲသို့ ဝင်လာသည်ကို သတိပြုမိသွားသော မိန်းကလေးက ပျင်းရိစွာ မေးလိုက်၏ -

"မိတ်ဆွေ... သတင်းအချက်အလက် လာဝယ်တာလား၊ လာရောင်းတာလား"

စုရှင်းက ပြန်ဖြေလိုက်သည် - "ဝယ်လည်း ဝယ်မယ်၊ ရောင်းလည်း ရောင်းမယ်"

"ငါ့မှာ ချင်းယွင်နယ်မြေငယ် အတွင်းက ဆင်းသက်ဂိုဏ်းရဲ့ ဖြန့်ကျက်မှုတွေအကြောင်း အသေးစိတ် သတင်းတွေ ရှိသလို ချင်းယွင်ကျီ နဲ့ ရွှယ်ယွဲ့တို့နဲ့ ပတ်သက်တဲ့ သတင်းတွေလည်း ရှိတယ်..."

စုရှင်းသည် ကျောက်စိမ်းလွှာ အချို့ကို ထုတ်ယူကာ ကမ်းပေးလိုက်ပြီးနောက် တိတ်ဆိတ်စွာ စောင့်ဆိုင်းနေလိုက်သည်။

မိန်းကလေးက သူမ၏ နတ်ဘုရားအာရုံကို ကျောက်စိမ်းလွှာ အတွင်းသို့ ထည့်သွင်းကြည့်ရှုလိုက်သည်။ ခဏအကြာတွင် သူမ၏ ယခင်က ပေါ့ပေါ့ပါးပါး အမူအရာမှာ ချက်ချင်းဆိုသလို လေးနက်သွားတော့သည်။

"ရွှယ်ယွဲ့ရဲ့ သတင်းက တန်ဖိုးရှိပေမဲ့ ရောက်လာတာ နောက်ကျသွားပြီ... လောလောဆယ် ရှေ့တန်းစစ်မျက်နှာပြင်တွေမှာ မျက်လုံးနီ တိုင်းတစ်ပါးသားတွေ စတင် ပေါ်ပေါက်နေပြီဆိုတော့ ဒါကို အမြင့်ဆုံး အဆင့် B အထက် သတင်းအဖြစ်ပဲ သတ်မှတ်နိုင်မယ်"

စုရှင်း ခေတ္တမျှ စဉ်းစားလိုက်ပြီး အသာအယာ ခေါင်းညိတ်လိုက်သည်။ အမှန်ပင်၊ သရုပ်ပြခြင်းမှာ ၄၈ နှစ်မြောက်သို့ ရောက်ရှိနေပြီဖြစ်ရာ ၅၀ နှစ်မြောက်ရန် မဝေးတော့ပေ။ သို့ဖြစ်ရာ ရွှေယွဲ့သည်လည်း သူမ၏ ခြိမ်းခြောက်မှုကို စတင်ပြသနေပြီဖြစ်ရာ သတင်း၏ တန်ဖိုးမှာ သဘာဝကျစွာပင် လျော့ကျသွားခြင်း ဖြစ်သည်။

စုရှင်း တွေးတောနေစဉ် မိန်းကလေးက ဆက်ပြောသည် -

"ချင်းယွင်ကျီရဲ့ သတင်းနဲ့ ပတ်သက်ရင်တော့ နောင်ဆယ်နှစ်အတွင်းမှာ မင်းပြောသလို တကယ်ဖြစ်လာမယ်ဆိုရင် အဆင့်B အထက် သတင်းနဲ့ ညီမျှလိမ့်မယ်"

"ဆင်းသက်ဂိုဏ်း အခြေစိုက်စခန်းတွေရဲ့ သတင်းကတော့... အရမ်း တန်ဖိုးရှိတယ်။ အကယ်၍ ဒါက တိကျမှန်ကန်မယ်ဆိုရင် ငါ ဒါကို အဆင့် A အောက် သတင်းအနေနဲ့ သတ်မှတ်ပေးနိုင်တယ်"

စုရှင်း ခေါင်းညိတ်လိုက်သည်။ ဆင်းသက်ဂိုဏ်းသည် ချင်းယွင်နယ်မြေငယ်သာမက လောကသုံးထောင် အတွင်း၌ပါ ကြီးမားသော ဘေးဆိုးတစ်ခု ဖြစ်သည်။ စုရှင်း၏ အသေးစိတ်ကျသော သတင်းမှာ အဆင့်A အကဲဖြတ်မှုကို ရရှိရန် ထိုက်တန်လှပေသည်။

"မိတ်ဆွေ... ဒီသတင်း သုံးခုအတွက် မင်း အလိုရှိတဲ့ ဈေးနှုန်းကို ပြောပါ၊ ငါတို့ အဖြူရောင် ဧကရာဇ်မြို့တော်က ယူပါ့မယ်" ဟု မိန်းကလေးက ယုံကြည်မှုအပြည့်ဖြင့် ပြောလိုက်သည်။

စုရှင်းက ဈေးနှုန်းကို ချက်ချင်း မပြောသေးဘဲ မေးလိုက်၏ -

"အဖြူရောင်ဧကရာဇ် မြို့တော်မှာ ယင်သန့်စင်ခန္ဓာနဲ့ ပတ်သက်တဲ့ သတင်းတွေ ရောင်းဖို့ ရှိလား"

မိန်းကလေးက ခေါင်းအသာညိတ်ပြီး ပြန်ဖြေသည် -

"အကြီးမြတ်ဆုံး သန့်စင်ခန္ဓာ ဆယ်ပါးထဲက တစ်ပါးဖြစ်တဲ့ ယင်သန့်စင်ခန္ဓာက အရမ်းပဲ ရှားပါးပါတယ်။ ငါတို့ အဖြူရောင် ဧကရာဇ်မြို့တော်မှာ အဲ့ဒီအကြောင်း သတင်းရှိရုံတင် မကဘူး၊ ဘယ်ကျင့်ကြံသူတွေမှာ ယင်သန့်စင်ခန္ဓာ ရှိနေသလဲဆိုတာနဲ့ အဲ့ဒီခန္ဓာကိုယ်ရဲ့ အသေးစိတ် အကျိုးအာနိသင်တွေကိုပါ သိရှိထားပါတယ်။"

စုရှင်း၏ မျက်လုံးများ အရောင်တောက်သွားပြီး မေးလိုက်သည် - "အဲ့ဒီ သတင်းက ဘယ်လောက် ကျသင့်မလဲ"

ခဏမျှ စဉ်းစားပြီးနောက် မိန်းကလေးက ပြန်ဖြေသည် -

"ယင်သန့်စင်ခန္ဓာရဲ့ အပြည့်အစုံ သတင်းကတော့ အဆင့် B အထက်နဲ့ ညီမျှပါတယ်။ ကဲ... ငါ မင်းကို ယင်သန့်စင်ခန္ဓာရဲ့ အပြည့်အစုံ သတင်းရယ်၊ အဆင့်မြင့် ဝိညာဉ်ကျောက်တုံး တစ်သန်းရယ် ပေးမယ်၊ ဘယ်လိုလဲ"

စုရှင်းသည် ဝိညာဉ်ကျောက်တုံးများကို ဂရုမစိုက်ပေ။ သူ အမှန်တကယ် ရှာဖွေနေသည်မှာ ယင်သန့်စင်ခန္ဓာ၏ သတင်းအချက်အလက် ဖြစ်သဖြင့် သူက ချက်ချင်းပင် သဘောတူလိုက်သည်။

မိန်းကလေးက သူ့ကို ကျောက်စိမ်းလွှာတစ်ခု ကမ်းပေးလိုက်ပြီး စုရှင်းသည် သတင်းအချက်အလက်များကို စတင် ဖတ်ရှုတော့သည်။

…

မကြာမီမှာပင် မြှုပ်နှံသရုပ်ပြခြင်း ပြီးဆုံးသွားပြီး စုရှင်းသည် လက်တွေ့ကမ္ဘာသို့ ပြန်လည် ရောက်ရှိလာခဲ့သည်။

အနည်းငယ် ပင်ပန်းနေသော သူ၏ မျက်ခုံးနှစ်ဖက်ကို ပွတ်သပ်ရင်း စုရှင်း၏ မျက်လုံးများမှာ လေးနက်နေပြီး သူ၏ စိတ်ထဲရှိ သဲလွန်စများနှင့် သတင်းအချက်အလက်များမှာ တဖြည်းဖြည်း ချိတ်ဆက်မိသွားတော့သည်...။

"ဒီလိုကိုး... ယင်သန့်စင်ခန္ဓာမှာ ဒီလို ထူးခြားတဲ့ အသုံးဝင်ပုံတွေ ရှိနေတာပဲ"

စုရှင်း ရရှိထားသော သတင်းအချက်အလက်များအရ လောကသုံးထောင် အတွင်းရှိ ယင်သန့်စင်ခန္ဓာ ပိုင်ဆိုင်သူအားလုံးကို အခုတော့ သူ သိရှိသွားခဲ့ပြီ ဖြစ်သည်။