စစ်ဆေးမှု သုံးခု
Vol. 3 Ch. 25
ဆူညံပွက်လောရိုက်နေသော လေ့ကျင့်ရေးကွင်းပြင်၌…
ရုတ်တရက် လူတစ်ယောက်၏ အော်ဟစ်သံ ထွက်ပေါ်လာသည်။
“မဟူရာသံချပ်ကာဝတ်တပ်ဖွဲ့ ရောက်လာပြီဟေ့”
ထိုအသံကြောင့် လူအုပ်ကြီးမှာ ချက်ချင်း တိတ်ဆိတ်ငြိမ်သက်သွားကြသည်။
အားလုံး၏ အကြည့်များက အဝေးတစ်နေရာသို့ ရောက်ရှိသွားကြသည်။ မဟူရာသံချပ်ကာဝတ်တပ်ဖွဲ့သည် ထောင်ရွာမှ မျိုးနွယ်စုအကြီးအကဲများနှင့် ယှဉ်တွဲလျက် ကွင်းပြင်ရှိရာသို့ ဦးတည်လာနေကြသည်ကို မြင်တွေ့လိုက်ကြရသည်။
“မသက်ဆိုင်တဲ့လူတွေအားလုံး ကွင်းထဲကနေ ထွက်ပေးကြပါ... စစ်ဆေးမှုခံယူမယ့် သတ်မှတ်အသက်အရွယ်ရှိတဲ့ လူငယ်တွေပဲ ဒီမှာကျန်နေခဲ့ပြီး နောက်ထပ်ညွှန်ကြားချက်ကို စောင့်ဆိုင်းကြပါ”
မျိုးနွယ်စုအကြီးအကဲ ထောင်ကျင်လုသည် ခြေလှမ်းကျဲကြီးများဖြင့် ရှေ့သို့ ထွက်လာသည်။ ထို့နောက် မြင့်မားသော စင်မြင့်ထက်သို့ တက်ရောက်ကာ လူအုပ်ကြီးအား လှမ်းအော်ပြောလိုက်ခြင်း ဖြစ်သည်။
.
အကြီးအကဲ၏ အမိန့်ပေးသံ အဆုံးတွင် ကွင်းပြင်အတွင်းရှိ လူအများသည် ဒီရေအလား ပြန်လည်ဆုတ်ခွာသွားကြလေသည်။
“ရွှီနင်... ငါ ကွင်းအပြင်ကနေ စောင့်နေမယ်နော်။ မင်း ရေဆာတာ၊ ဗိုက်ဆာတာဖြစ်ရင် ငါ့ဆီ လာခဲ့”
ထောင်ယွင်ချွမ်းက ရွှီနင်၏ ပခုံးကို ပုတ်ကာ အားပေးစကား ဆိုလိုက်သည်။ “မင်း အကောင်းဆုံးသာ လုပ်ပါကွာ... ကိုယ့်ကိုယ်ကိုယ် သိပ်ပြီး ဖိအားမပေးနဲ့”
“ဟုတ်ကဲ့ပါ”
ရွှီနင် ခေါင်းညိတ်ပြလိုက်သည်။
ထောင်ရွာ၏ လေ့ကျင့်ရေးကွင်းပြင်သည် အလွန်ကျယ်ဝန်းလှသည်။ လူအုပ်ကြီး ဆုတ်ခွာသွားပြီးနောက်တွင် ဝင်ရောက်ဖြေဆိုမည့် လူငယ် ၂၀၀ ဝန်းကျင်ခန့်သာ ကျန်ရစ်တော့သည်။
ကွင်းပြင်ကြီးမှာ ဟာလာဟင်းလင်း ဖြစ်သွားသော်လည်း ကွင်းအပြင်ဘက်တွင်မူ လူများနှင့် ပြည့်နှက်နေဆဲပင်။ အားလုံးသည် စစ်ဆေးအကဲဖြတ်မှုများကို စောင့်ကြည့်ရန် စိတ်အားထက်သန်နေကြသည်။
“အားလုံးပဲ ခဏလောက် နားထောင်ပေးကြပါ”
မျိုးနွယ်စုခေါင်းဆောင် ထောင်ကျင်ရှင်သည်လည်း စင်မြင့်ထက်သို့ တက်ရောက်လာသည်။
သူ၏အသံမှာ ကျယ်လောင်ပြီး အားအင်ပြည့်ဝနေ၏။ သူက မျိုးဆက်သစ်လူငယ်များကို ကြည့်ကာ ပြောကြားလိုက်သည်။ “ဒီနေ့ မဟူရာသံချပ်ကာဝတ်တပ်ဖွဲ့က အရည်အချင်းရှိတဲ့ လူငယ်တွေကို ရွေးချယ်ဖို့ ရောက်လာကြတာပါ။ အားလုံးပဲ အကောင်းဆုံး ကြိုးစားကြဖို့ မျှော်လင့်ပါတယ်။ ကိုယ့်အတွက်ပဲဖြစ်ဖြစ်၊ မိသားစုအတွက်ပဲဖြစ်ဖြစ်၊ ထောင်ရွာအတွက်ပဲဖြစ်ဖြစ် ဒီစစ်ဆေးမှုကို အလေးအနက်ထားပြီး ယှဉ်ပြိုင်ကြပါ”
“စစ်ဆေးသူတွေရဲ့ ညွှန်ကြားချက်အတိုင်း လိုက်နာဆောင်ရွက်ရမယ်။ စည်းမျဉ်းစည်းကမ်းတွေကိုလည်း လိုက်နာရမယ်။ လုပ်ထုံးလုပ်နည်းတွေကို မလိုက်နာတဲ့သူ ဘယ်သူ့ကိုမဆို ကွင်းထဲကနေ မောင်းထုတ်ပစ်မယ်။ နားလည်ကြလား”
“နားလည်ပါတယ်”
လူငယ်များ၏ တုံ့ပြန်သံက ညီညာပြီး တက်ကြွနေသည်။
အားလုံးသည် မကြာမီ စတင်တော့မည့် စစ်ဆေးမှုအပေါ် စစိတ်အားထက်သန်နေကြသည်။
“ဒီစားပွဲ ငါးလုံးရဲ့ အရှေ့မှာ တန်းစီလိုက်ကြ”
ဘေးတွင် ရပ်နေကြသော မဟူရာသံချပ်ကာဝတ်တပ်ဖွဲ့ဝင်များလည်း စတင်လှုပ်ရှားလာကြသည်။
သူတို့သည် ထောင်ရွာ၏ တာဝန်ရှိသူများကို အစီအစဉ်များ ကြိုတင်ပြောပြထားပြီး ဖြစ်သည်။
တပ်ဖွဲ့ဝင်များသည် တစ်ယောက်တစ်နေရာစီ ခွဲသွားကြပြီး သူတို့၏ အစီအစဉ်အတိုင်း စတင်ဆောင်ရွက်ကြတော့သည်။
ရွှီနင်သည် လူအုပ်နောက်သို့ လိုက်ပါသွားပြီး လူတန်း၏ အလယ်လောက်တွင် ဝင်ရပ်လိုက်သည်။
“ဘာတွေ ဖြစ်နေကြတာလဲ...”
ရွှီနင် ခေါင်းကိုစောင်းကာ ရှေ့ဆုံးမှ လူကို လှမ်းကြည့်လိုက်သည်။
လူတိုင်းလိုလိုပင် ဘေးဘီဝဲယာကို ကြည့်ရှုနေကြပြီး ဘာဆက်ဖြစ်မည်ကို သိချင်နေကြသည်။
ထို့ကြောင့် လူတန်းကြီးမှာ မညီမညာနှင့် ရှုပ်ထွေးသွားရသည်။
“တန်းစီနေကြစမ်း”
မဟူရာသံချပ်ကာဝတ်တပ်ဖွဲ့ဝင်တစ်ဦးက အသံနက်ကြီးဖြင့် ပြောလိုက်သည်။
သူတို့သည် မျက်နှာဖုံးများကို ချွတ်ထားကြပြီ ဖြစ်သော်လည်း ခြိမ်းခြောက်နိုင်စွမ်းရှိသော အသံနှင့် အေးစက်သော မျက်လုံးများကြောင့် လူငယ်များ ငြိမ်ကျသွားကြသည်။
“ကြည့်ရတာ ကိုယ်ရေးအချက်အလက် စာရင်းသွင်းနေတာနဲ့ တူတယ်...”
ဤလုပ်ငန်းစဉ်မှာ အတော်လေး မြန်ဆန်လှသဖြင့် မကြာမီတွင် ရွှီနင်အလှည့်သို့ ရောက်ရှိလာသည်။
“နောက်တစ်ယောက်”
တာဝန်ခံစစ်ဆေးသူသည် ဘောပင်တစ်ချောင်းကို ကိုင်ထားပြီး သူ့ဘေးတွင် စာရွက်အထပ်လိုက် ရှိနေသည်။
ရွှီနင် ရောက်လာသောအခါ သူက စာရွက်အလွတ်တစ်ရွက်ကို ဆွဲထုတ်လိုက်ပြီး စတင်မေးမြန်းလေသည်။
“နာမည်”
“ရွှီနင်ပါ”
“ဘာ...”
ရွှီနင်၏ နာမည်ကို ကြားလိုက်ရသောအခါ စစ်ဆေးသူမှာ အနည်းငယ် အံ့အားသင့်သွားသည်။ သူ မော့ကြည့်လိုက်၏။ “ထောင်ရွာက ဟုတ်လို့လား”
“ဟုတ်ပါတယ်” ရွှီနင်က ပြန်ဖြေသည်။ “ကျွန်တော့်ယောက်ဖက ထောင်ရွာသားပါ”
စစ်ဆေးသူက ခေါင်းညိတ်လိုက်သည်။ “အသက်”
“၁၇ နှစ်ပါ”
ဖြေပြီးသည်နှင့် ဘေးတွင်ရပ်နေသော အခြားစစ်ဆေးသူတစ်ဦး ရှေ့တိုးလာသည်။
သူက ရွှီနင်၏ ပခုံးကို ညှစ်ကြည့်ပြီး လက်မောင်းကို စမ်းသပ်ကြည့်လိုက်သည်။
“အသက် မှန်ကန်ပါတယ်”
ထိုသူက တာဝန်ခံစစ်ဆေးသူဘက်သို့ လှည့်ကာ အတည်ပြုပေးလိုက်သည်။
‘သူတို့က အသက်ကို ဒီလိုစစ်ဆေးတာကိုး...’
ရွှီနင် စိတ်ထဲမှ တွေးလိုက်မိသည်။
“မင်းတတ်မြောက်ထားတဲ့ ပြင်ပသိုင်းပညာ၊ အတွင်းအားပညာရပ်နဲ့ သက်ဆိုင်ရာ အဆင့်တွေကို ပြောပြစမ်း”
တာဝန်ခံစစ်ဆေးသူက ထပ်မေးသည်။ “အမှန်အတိုင်း ဖြေရမယ်နော်”
ရွှီနင် ခေတ္တမျှ တိတ်ဆိတ်သွားသည်။ သူ့အင်အားကို ဖုံးကွယ်ထားရန် အစီအစဉ် မရှိပေ။
“လေပြင်းမုန်တိုင်းဓားနည်းစနစ်က အလယ်အလတ်အဆင့်၊ နွေဦးလေပြည်ကျင့်စဉ်ကတော့ အရိုးအကြောနယ်ပယ်ပါ”
ရွှီနင်သည် ပေါ့ပါးငှက်မွေး လေးအတတ်ပညာကိုမူ ထည့်မပြောတော့ချေ။ ၎င်းမှာ အခြေခံအဆင့်တွင်သာ ရှိသေးပြီး အမဲလိုက်ရာတွင် အထောက်အကူပြု ကိရိယာအဖြစ်သာ အသုံးပြုခြင်းဖြစ်၍ ထည့်ပြောရန် မလိုအပ်ဟု ယူဆလိုက်သည်။
“အို...”
ရွှီနင် ဖြေလိုက်သည်ကို ကြားသောအခါ စစ်ဆေးသူနှစ်ဦးစလုံး မျက်ခုံးပင့်သွားကြသည်။
ရွှီနင်၏ အနောက်တွင် ရပ်နေသော လူငယ်မှာ ရွှီနင်၏ စွမ်းရည်ကို ကြားလိုက်ရသဖြင့် မျက်နှာပျက်ကာ မျှော်လင့်ချက်မဲ့သွားပုံ ရလေသည်။ ဤစစ်ဆေးမှုတွင် သူ့အနေဖြင့် အခွင့်အရေး မရှိတော့ဟု ခံစားလိုက်ရပုံပင်။
“တော်တော် ပါရမီရှိတာပဲ”
တာဝန်ခံစစ်ဆေးသူ၏ မျက်နှာပေါ်တွင် အပြုံးတစ်ခု ပေါ်လာသည်။
အချက်အလက်များကို ရေးမှတ်ပြီးနောက် စစ်ဆေးသူသည် မှတ်တမ်းစာရွက်ကို ရွှီနင်အား ပေးလိုက်သည်။ ထို့နောက် လက်ညှိုးထိုးပြကာ “ဟိုဘက်ကိုသွားပြီး ပထမဆုံး စစ်ဆေးမှုကို ဝင်ရောက်ဖြေဆိုလိုက်ပါ” ဟု ပြောလိုက်သည်။
“ကျေးဇူးတင်ပါတယ်”
ရွှီနင် ခေါင်းညိတ်ပြလိုက်သည်။
ရွှီနင်သည် လက်ထဲမှ မှတ်တမ်းစာရွက်ကို တစ်ချက်ကြည့်လိုက်သည်။
ထိုစာရွက်ထဲတွင် ယခုလေးတင် ဖြည့်စွက်ထားသော အချက်အလက်များ ပါဝင်ပြီး ခွန်အား၊ နည်းစနစ်နှင့် ပါရမီဟူသော ကွက်လပ်များမှာမူ အလွတ်အတိုင်း ရှိနေသေးသည်။
‘ခွန်အားဆိုတာက အလေးမ စစ်ဆေးတာ ဖြစ်လောက်တယ်... နည်းစနစ်ဆိုတာကတော့ ပြင်ပသိုင်းပညာ စစ်ဆေးမှု ဖြစ်မယ်... ပါရမီကိုကျတော့ ဘယ်လို ဆုံးဖြတ်ကြမှာလဲ’
ရွှီနင် အနည်းငယ် နားမလည်နိုင် ဖြစ်နေသော်လည်း ယခုအချိန်သည် ဤမေးခွန်းကို စဉ်းစားရမည့်အချိန် မဟုတ်ပေ။
မကြာမီတွင် ရွှီနင်သည် အခြားစခန်းတစ်ခုသို့ ရောက်ရှိသွားသည်။
ထိုနေရာတွင် အလေးမကျောက်တုံးများ အများအပြား ရှိနေလေသည်။ မနက်ပိုင်းက ထောင်ယွင်ချွမ်းနောက်လိုက်ရင်း ကွင်းထဲဝင်လာစဉ်က ဤကျောက်တုံးများကို သူမြင်တွေ့ခဲ့ဖူးသည်။
ခန့်မှန်းထားသည့်အတိုင်းပင် ခွန်အားစစ်ဆေးခြင်းသည် အကဲဖြတ်မှု၏ အစိတ်အပိုင်းတစ်ခု ဖြစ်နေသည်။
“ခွန်အားစစ်ဆေးမှုက ရိုးရှင်းပြီး ရှင်းလင်းတာပဲ”
ရွှီနင် တန်းစီလိုက်သည်။ သူ့အရင် စာရင်းသွင်းခဲ့သူများမှာ စတင် စစ်ဆေးမှုခံယူနေကြပြီ ဖြစ်သည်။
‘အတွင်းအားပညာရပ်မှာ အောင်မြင်မှုရထားတဲ့သူဆိုရင် ရုပ်ပိုင်းဆိုင်ရာ ကြံ့ခိုင်သန်စွမ်းပြီး ခွန်အားကြီးမားကြတာပဲ... ဒီကျောက်တုံးကို မနိုင်ဖို့ဆိုတာ မခက်ခဲလောက်ဘူး’
ဤအလေးမကျောက်တုံးသည် ပေါင် ၁၅၀ ခန့် လေးလံမည်ဟု ရွှီနင် ခန့်မှန်းလိုက်သည်။
‘အတွင်းအား မလေ့ကျင့်ထားဘဲ ဒီကျောက်တုံးကို မနိုင်တဲ့သူဆိုရင် သဘာဝအတိုင်း ခွန်အားကြီးမားပြီး ထူးခြားတဲ့ ပါရမီရှိလို့ပဲ နေမှာ... စစ်ဆေးတဲ့နည်းလမ်းက ရိုးရှင်းပေမဲ့ လက်တွေ့ကျတယ်’
မကြာမီ ရွှီနင်အလှည့် ရောက်လာသည်။
အခြားစစ်ဆေးသူတစ်ဦးက ရွှီနင့်လက်ထဲမှ မှတ်တမ်းစာရွက်ကို ယူလိုက်သည်။ “ဒီကျောက်တုံးကို လက်တစ်ဖက်တည်းနဲ့ မပြီး ၁၀ စက္ကန့်လောက် တောင့်ထားပါ”
“ကောင်းပါပြီ”
ရွှီနင် ရှေ့သို့တိုးပြီး ဆောင့်ကြောင့်ထိုင်ချလိုက်သည်။ အလေးမကျောက်တုံးပေါ်ရှိ လက်ကိုင်ကို ဆုပ်ကိုင်လျက် မတင်လိုက်ပြီး မတ်မတ်ရပ်လိုက်သည်။
‘ထင်တဲ့အတိုင်း ပေါင် ၁၅၀ လောက်ပဲ ရှိတာပဲ’
ရွှီနင်သည် ကျောက်တုံးကို လက်တစ်ဖက်တည်းဖြင့် မပင်ပန်းဘဲ မတင်နိုင်ခဲ့သည်။
“ရပြီ”
အချိန်ပြည့်သွားပြီဖြစ်ကြောင်း စစ်ဆေးသူက သတိပေးလိုက်သည်။
ရွှီနင်သည် ကျောက်တုံးကို ညင်သာစွာ ပြန်ချလိုက်ပြီး စစ်ဆေးသူထံမှ မှတ်တမ်းစာရွက်ကို ပြန်ယူလိုက်သည်။
ခွန်အားအချက်အလက်၏ ဘေးတွင် စက်ဝိုင်းတစ်ခု ဝိုင်းထားသည်ကို တွေ့လိုက်ရရာ သူ အောင်မြင်သွားကြောင်း ထင်ရှားနေသည်။
ပထမအဆင့် ပြီးဆုံးသွားပြီဖြစ်၍ ရွှီနင်သည် နောက်တစ်ဆင့်သို့ ဆက်သွားလိုက်သည်။
“ရွှီနင်”
ရွှီနင် လျှောက်သွားလိုက်သည်နှင့် အသိမိတ်ဆွေတစ်ဦးက သူ့ကို တိုးတိုးလေး လှမ်းခေါ်သည်ကို ကြားလိုက်ရသည်။
ထိုသူမှာ ယခင်က သူနှင့်အတူ နွေဦးလေပြည်ကျင့်စဉ်ကို ရရှိခဲ့ဖူးသော ထောင်ချင်းဖင် ဖြစ်လေသည်။
“ချင်းဖင်”
ရွှီနင်လည်း အသံတိုးတိုးဖြင့် ပြန်လည်နှုတ်ဆက်လိုက်သည်။
စစ်ဆေးသူများ ကြည့်ရှုနေသောကြောင့် နှစ်ယောက်စလုံး အသံကျယ်ကျယ် မပြောရဲကြပေ။
ထောင်ချင်းဖင်သည်လည်း ပထမအဆင့်ဖြစ်သော ခွန်အားစစ်ဆေးမှုကို အောင်မြင်ထားပုံရသည်။
ထောင်ချင်းဖင်သည် မွေးရာပါ ခွန်အားကြီးမားသူ ဖြစ်ရမည်၊ သို့မဟုတ်ပါက သာမန်လူသားနယ်ပယ် ပထမအဆင့်သို့ ရောက်ရှိထားသူ ဖြစ်ရပေမည်။
အကယ်၍ နောက်တစ်ချက်သာ မှန်ကန်ပါက နှစ်လအတွင်း နယ်ပယ်သစ်တစ်ခုသို့ ရောက်ရှိနိုင်ခြင်း ဖြစ်၍ ထောင်ချင်းဖင်သည် ထူးခြားသော ပါရမီရှင်တစ်ဦး ဖြစ်ပေလိမ့်မည်။
လူတိုင်းသည် သူ့လို သိုင်းပညာမျက်နှာပြင်၏ အထောက်အပံ့ ရထားကြသူများ မဟုတ်ပေ။
ခေတ္တမျှ နှုတ်ဆက်ပြီးနောက် ရွှီနင်သည် ပတ်ဝန်းကျင်ကို ကြည့်ရှုလိုက်သည်။ ဤစခန်းတွင် လက်နက်မျိုးစုံ ပြည့်နှက်နေပြီး ဓားများနှင့် လှံများမှာ အများဆုံး ဖြစ်သည်။
ကွင်းလယ်တွင် ထောင်ရွာမှ လူငယ်တစ်ဦးသည် လက်နက်ကိုင်ဆောင်ကာ ဓားရှည်ကိုင်ထားသော မဟူရာသံချပ်ကာဝတ်တပ်ဖွဲ့ဝင်တစ်ဦးကို တိုက်ခိုက်နေလေသည်။
ထိုတပ်ဖွဲ့ဝင်သည် သူ့လက်ထဲမှ ဓားရှည်ဖြင့် တိုက်ခိုက်မှုကို လွယ်ကူစွာ ပိတ်ဆို့ကာကွယ်နေပြီး ခံစစ်အတွက်သာ အသုံးပြုကာ ပြန်လည်တိုက်ခိုက်ခြင်း မပြုပေ။
‘ပြင်ပသိုင်းပညာကို စစ်ဆေးနေတာပဲ...’
သူ မျှော်လင့်ထားသည့်အတိုင်းပင်။
“ရွှီနင်... ငါ အရင်သွားနှင့်မယ်”
မကြာမီ ထောင်ချင်းဖင်အလှည့် ရောက်လာသည်။
သူသည် ရွှီနင်ကို ခေါင်းလှည့်ကြည့်ကာ ခေါင်းညိတ်ပြလိုက်ပြီးနောက် ဓားတစ်လက်ကို ရွေးချယ်၍ တပ်ဖွဲ့ဝင်နှင့် သွားရောက်ယှဉ်ပြိုင်လေသည်။
‘ထောင်ချင်းဖင်ရဲ့ အခြေခံအဆင့် လေပြင်းမုန်တိုင်းဓားနည်းစနစ်က တော်တော်လေး ကောင်းမွန်တယ်လို့ ပြောလို့ရတယ်’
ရွှီနင် ဘေးမှ ရပ်ကြည့်နေသည်။
နွေဦးလေပြည်ကျင့်စဉ်ကို ရရှိစဉ်က ထောင်ချင်းဖင်သည် လေပြင်းမုန်တိုင်းဓားနည်းစနစ် အခြေခံအဆင့်ကို တတ်မြောက်ကာစသာ ရှိသေးသော်လည်း ယခုအခါ အခြေခံအဆင့်ကို ပိုမိုပိုင်နိုင်ကျွမ်းကျင်လာပြီး အလယ်အလတ်အဆင့်သို့ ကူးပြောင်းရန် နီးစပ်နေပြီဖြစ်သည်။
“နောက်တစ်ယောက်”
စစ်ဆေးသူတစ်ဦးက သူ့ကို လက်ညှိုးထိုးပြသည်ကို ရွှီနင် မြင်လိုက်ရသည်။
ဤစစ်ဆေးမှုကို လူအများအပြား တစ်ပြိုင်နက်တည်း ပြုလုပ်နေခြင်းဖြစ်သည်။ ထောင်ချင်းဖင်၏ စစ်ဆေးမှု မပြီးဆုံးမီမှာပင် ရွှီနင်အလှည့် ရောက်ရှိလာခဲ့သည်။
ရွှီနင်သည်လည်း ဓားတစ်လက် သွားယူလိုက်ပြီး မှတ်တမ်းစာရွက်ကို ကမ်းပေးလိုက်သည်။
“မင်းရဲ့ အတွင်းအားကို ထုတ်ပြစရာ မလိုဘူး။ ဒါက ပြင်ပသိုင်းပညာ သက်သက်ကိုပဲ စစ်ဆေးမှာ”
စစ်ဆေးသူက ခံစားချက်မပါသော မျက်နှာထားဖြင့် ပြောလိုက်သည်။
ရွှီနင် ခေါင်းညိတ်လိုက်ကာ ဓားရိုးကို ဆုပ်ကိုင်လိုက်ပြီး တွေဝေခြင်းမရှိဘဲ ရှေ့သို့ ပြေးဝင်လိုက်သည်။
သူသည် လေပြင်းမုန်တိုင်းဓားနည်းစနစ်၏ အလယ်အလတ်အဆင့်သို့ ရောက်ရှိနေသူဖြစ်ပြီး ယခင်က မြင်းစီးဓားပြများနှင့် လက်တွေ့တိုက်ပွဲအတွေ့အကြုံ ရှိခဲ့ဖူးသူ ဖြစ်သည်။
“ဟေ...”
ဝင်ရောက်လာသော ဓားချက်ကို မြင်လိုက်ရသည့်အခါ စစ်ဆေးသူ၏ မျက်ဝန်းများ ကျဉ်းမြောင်းသွားသည်။
ဤလူငယ်သည် လက်တွေ့တိုက်ပွဲအတွေ့အကြုံ ရှိသူဖြစ်ကြောင်းနှင့် ရန်သူများကို အနိုင်ယူဖူးသူ ဖြစ်နိုင်ကြောင်း ထင်ရှားနေသည်။
‘တကယ်ပဲ ဓားနည်းစနစ် အလယ်အလတ်အဆင့်ကို ရောက်နေတာပဲ’
ဓားချက် သုံးချက်မျှ တိုက်ခိုက်ပြီးနောက်တွင် စစ်ဆေးသူအတွက် လုံလောက်သွားခဲ့ပြီ ဖြစ်သည်။
“ရပ်လိုက်တော့”
စစ်ဆေးသူက ပြောလိုက်သည်။ “အလွန်ကောင်းတယ်”
သူသည် မှတ်တမ်းစာရွက်ပေါ်ရှိ နည်းစနစ်အချက်အလက်၏ဘေးတွင် စက်ဝိုင်းတစ်ခု ဝိုင်းလိုက်ပြီး ရွှီနင်အား ပြန်ပေးလိုက်သည်။
“နောက်ဆုံးစစ်ဆေးမှုက မစသေးဘူး၊ စောင့်ခိုင်းထားတဲ့နေရာမှာ သွားနေလိုက်ပါ”
“ဟုတ်ကဲ့၊ ကျေးဇူးတင်ပါတယ်”
စစ်ဆေးမှုသညါ ဤမျှလျင်မြန်လိမ့်မည်ဟု ရွှီနင် ထင်မထားခဲ့မိပေ။
ယခုအခါ စစ်ဆေးမှု တစ်ခုသာ ကျန်ရှိတော့သည်။
‘ပါရမီဆိုတာ ဘယ်လိုစစ်ဆေးမှုမျိုးပါလိမ့်...’
ရွှီနင် အတော်လေး စူးစမ်းချင်စိတ် ဖြစ်ပေါ်နေမိသည်။