လျှို့ဝှက်နယ်မြေထဲ ဝင်ရောက်ခြင်း

ဟေးပိုင်သည် လက်ဝါးရိုက်ချက် တစ်ချက်တည်းဖြင့် နဂါးနက်ဂိုဏ်းမှ လူအမြောက်အများကို ရှင်းလင်းလိုက်ပြီးနောက် ကျုံးချင်၏နောက်တွင် ခံစားချက်မရှိဘဲ ဆက်လက်၍ မတ်တတ်ရပ်နေပေ၏။

အစောပိုင်းက ဖြစ်ပျက်ခဲ့သမျှ အရာအားလုံးသည် လုံးဝမဖြစ်ပျက်ခဲ့သကဲ့သို့ ဖြစ်နေပြီး သူ့ထံတွင် စိတ်ခံစားမှုလှိုင်းဂယက် အနည်းငယ်မျှပင် မဖြစ်ပေါ်စေခဲ့ချေ။

သူသည် မူလကတည်းက ရုပ်သေးရုပ်တစ်ရုပ် ဖြစ်ပြီး အမြဲတစေ အေးစက်တည်ငြိမ်နေသဖြင့် ကျုံးချင်သည် ဤကိစ္စအပေါ် အံ့အားသင့်သွားခြင်းမရှိချေ။

သို့သော် ကျုံးချင်၏စူးစမ်းလိုစိတ်ကို နှိုးဆွလိုက်သည်မှာ ဟေးပိုင်သည် မည်သည်ကြောင့် ဤနဂါးနက်ဂိုဏ်းသားများကို ခေါ်ဆောင်လာခဲ့သည်ဟူသော အချက်ပင်။

ဤနဂါးနက်ဂိုဏ်းသားများသည် လမ်းခရီးတွင် ဟေးပိုင်နှင့် တွေ့ဆုံခဲ့ခြင်းသည် ထူးဆန်းသော ကိစ္စတစ်ရပ် မဟုတ်ချေ။

သို့သော် ဟေးပိုင်၏ စိတ်နေသဘောထားအရ ကျုံးချင်၏အမိန့်မရှိဘဲ ပုံမှန်အားဖြင့် တခြားသူများကို ဂရုစိုက်လိမ့်မည် မဟုတ်ပေ။

အကယ်၍ ဤလူများသည် သူတို့၏သဘောဆန္ဒအလျောက် နောက်မှလိုက်ပါလာခဲ့ခြင်း ဖြစ်လျှင် ကျုံးချင်ကို လက်စားချေရန်အတွက် ဟေးပိုင်ကို အသုံးပြုရန် သူတို့သည် မည်သည်ကြောင့် ဤမျှထိ ယုံကြည်မှု ရှိနေကြသနည်း။

ဤနဂါးနက်ဂိုဏ်းသားများသည် ဟေးပိုင်မှ သူတို့ကို ကာကွယ်ပေးရန် သိမ်းသွင်းစည်းရုံးနိုင်လိမ့်မည်ဟု ကျုံးချင် မထင်ချေ။ သူတို့ကိုယ်စား သူ လှုပ်ရှားပေးရန် ဆိုသည်မှာမူ ပို၍ပင် အလှမ်းကွာဟသည်။

မည်သည့်ကိစ္စများ ဖြစ်ပျက်ခဲ့သည်ကို ကျုံးချင် စဉ်းစား၍ မရတော့ချေ။

ဤနဂါးနက်ဂိုဏ်းသားများနှင့် နှိုင်းယှဉ်လျှင် ဟေးပိုင်၏အခြေအနေက ကျုံးချင်အတွက် ပို၍စိတ်ဝင်စားစရာ ကောင်းနေသည်။

သို့သော် ယခုအချိန်သည် ဟေးပိုင်၏ ပြောင်းလဲမှုများကို စူးစမ်းလေ့လာရန် အချိန်မဟုတ်ပုံရသည်။

ကျုံးချင်သည် သူ့အပေါ်သို့ ကျရောက်နေသော နှင်းပွင့်များကို ခါထုတ်လိုက်ပြီး မတ်တတ်ထရပ်ကာ သူ၏လက်ဖက်ရည်ဖျော်စပ်သည့် ပစ္စည်းများကို သိမ်းဆည်းလိုက်၏။

"ငါတို့ဆီမှာ အခု လျှို့ဝှက်နယ်မြေ သံမဏိပြားလေးခု ရှိနေပြီ... ဝင်ကြစို့..."

မင်ဆုရှင်းသည် ထိုစကားကို ကြားချိန်၌ အနည်းငယ် ထိတ်လန့်သွားသည်။

"အခု ဝင်ကြမလို့လား... ရေခဲဓားဂိုဏ်းနဲ့ကျန်းယွဲ့ဂိုဏ်းရဲ့ လျှို့ဝှက်နယ်မြေ သံမဏိပြားတွေကို မစောင့်တော့ဘူးလား..."

ကျုံးချင်က ခေါင်းယမ်းလိုက်သည်။

"ဟင့်အင်း... မစောင့်တော့ဘူး..."

သူ၏စကားသံ ဆုံးသွားသည်နှင့် သူသည် မင်ဆုရှင်း၏အဖြေကို မစောင့်ဘဲ ဧရာမ တိုင်လုံးကြီးထံသို့ လှည့်ထွက်သွားလိုက်၏။

မင်ဆုရှင်းသည် အချိန်တခဏကြာခန့် တွေဝေတုံ့ဆိုင်းနေပြီးနောက် ကျုံးချင်၏နောက်မှ လိုက်ပါသွားသည်။

သံမဏိပြားခြောက်ခုလုံး စုစည်းမိမှသာ လျှို့ဝှက်နယ်မြေအတွင်းမှ အခွင့်အလမ်းများကို အပြည့်အဝ ရရှိနိုင်မည်ဟု ဆိုကြသော်လည်း...

ကျုံးချင်သည် သူမ၏နံဘေးတွင် ရှိနေသဖြင့် သူမ အနေဖြင့် မည်သည့် ပြီးပြည့်စုံသော အခွင့်အလမ်းကိုမျှ ရရှိရန် မျှော်လင့်မထားခဲ့ချေ။

ထို့ပြင် သူမ၏အမြင်အရ ရေခဲဓားဂိုဏ်းနှင့် ကျန်းယွဲ့ဂိုဏ်းတို့သည်လည်း ကျုံးချင်နှင့် ယှဉ်ပြိုင်နိုင်မည့် အခွင့်အရေး မရှိပေ။

ကျုံးချင်သည် သူမကို လိုက်ပါခွင့်ပြုရန် ယခင်က သဘောတူခဲ့သော်လည်း သူမကို လျှို့ဝှက်နယ်မြေဆီသို့ ခေါ်ဆောင်လာရန်သာဖြစ်သည်။ လျှို့ဝှက်နယ်မြေထဲသို့ ရောက်သွားလျှင် သူမကို စောင့်ရှောက်ပေးမည်ဟု သူ တစ်ကြိမ်တစ်ခါမျှ မပြောခဲ့ချေ။

ယခုချိန်၌ သူမ၏ဂိုဏ်းတွင် သူမတစ်ယောက်တည်း ရှိနေသဖြင့် ကျုံးချင် မရှိလျှင်ပင် သူမသည် တခြားဂိုဏ်းနှစ်ဂိုဏ်းကို ယှဉ်ပြိုင်နိုင်မည် မဟုတ်ပေ။

ထိုသို့ဖြစ်နေသဖြင့် သူမသည် ကျုံးချင်၏နောက်သို့ လိုက်ပြီး လျှို့ဝှက်နယ်မြေထဲသို့ စောစောစီးစီး ဝင်ရောက်ခြင်းက ပို၍ကောင်းမွန်ပေလိမ့်သည်။ ဤသည်က သူမကို တခြားဂိုဏ်းနှစ်ဂိုဏ်းထက် လက်ဦးမှုကို ရရှိစေနိုင်ပြီး အနည်းဆုံးအနေဖြင့် အခွင့်အလမ်းတချို့ကို ရရှိနိုင်ပေလိမ့်မည်။

ဤနည်းအားဖြင့် ဤတစ်ကြိမ်တွင် သူမ၏ ကြေးမုံနှလုံးသားရေကန်ဂိုဏ်းသည် အလဟဿ လာရောက်ခဲ့ခြင်း ဖြစ်လိမ့်မည် မဟုတ်ပေ။

ဤအတွေးဖြင့် မင်ဆုရှင်းသည် ဆက်လက်၍ တွန့်ဆုတ်မနေတော့ဘဲ သူမ၏ရင်ဘတ်ကြားမှ သံမဏိပြားကို ထုတ်ယူလိုက်ပြီး သူမ၏လက်ချောင်းများဖြင့် ပေါ့ပေါ့ပါးပါး တောက်လိုက်ရာ ထိုအရာသည် ချိုင့်ခွက်ဆီသို့ ပျံသန်းသွားပေ၏။

ကျုံးချင်နှင့်ဟေးပိုင်တို့သည်လည်း သူတို့၏ သံမဏိပြားများကို ထုတ်ယူလိုက်ပြီး ဧရာမတိုင်လုံးကြီးဆီသို့ ပစ်လိုက်ကြသည်။

မမြင်နိုင်သော ဆွဲငင်အားတစ်ရပ် ရှိနေသည့်အလား ထိုသံမဏိပြားများသည် ချိုင့်ခွက်ထဲသို့ အလိုအလျောက် ပြီးပြည့်စုံစွာ ဝင်ရောက်သွားကြပြီး မူလက တသားတည်း အစိတ်အပိုင်းများ ဖြစ်ခဲ့ကြောင်း သိသာထင်ရှားသည်။

ချိုင့်ခွက်၌ လက်ဝဲဘက်နှင့်လက်ယာဘက် အစွန်းများရှိ နေရာလွတ်နှစ်ခုသာ ကျန်ရှိတော့သည်။

သို့သော် သံမဏိပြားလေးခု စုစည်းသွားသည်နှင့် ဧရာမတိုင်လုံးကြီး စတင်၍ တုန်ခါလာတော့သည်။

စိတ်ဝိညာဉ်အလင်းတန်းတစ်တန်းသည် ဧရာမ တိုင်လုံးကြီး၏ဘေးတစ်ဖက်မှ ထွက်ပေါ်လာပြီး မည်းမှောင်နေသော အက်ကွဲကြောင်းထဲသို့ တန်းတန်းမတ်မတ် ဝင်ရောက်သွားသည်။

ထို့နောက် ကျုံးချင်တို့သုံးယောက်၏အကြည့်များအောက်တွင် စိတ်ဝိညာဉ် အလင်းတန်း ကျရောက်သွားရာ အက်ကွဲကြောင်းအတွင်း၌ ဆက်တိုက်လည်ပတ်နေသော ရေဝဲတစ်ခုနှင့် တူညီသည့် ဂိတ်တံခါးတစ်ခု ထွက်ပေါ်လာသည်။

လျှို့ဝှက်နယ်မြေ၏ဝင်ပေါက် ပွင့်သွားလေပြီ။

ဝင်ပေါက်ပွင့်သွားသည်နှင့် ဧရာမ တိုင်လုံးကြီးပေါ်တွင် မြှုပ်နှံထားသော လျှို့ဝှက်နယ်မြေ သံမဏိပြားများမှနေ၍ ဖျော့တော့တော့ တောက်ပနေသည့် ရောင်စုံအရှိန်အဝါ အမြောက်အများ ထွက်ပေါ်လာကာ ကျုံးချင်နှင့် တခြားလူနှစ်ဦးကို လွှမ်းခြုံသွားတော့သည်။

ထိုအထဲတွင် ကျုံးချင်၏အရှိန်အဝါသည် အထူထပ်ဆုံး ဖြစ်ပြီး တခြားလူနှစ်ဦး ပေါင်းစပ်ထားသည်နှင့် ညီမျှသည်။

သူတို့သုံးယောက်သည် မရှောင်တိမ်းဘဲ ထိုအရှိန်အဝါများကို သူတို့၏ခန္ဓာကိုယ်များပေါ်သို့ လွှမ်းခြုံခွင့် ပြုလိုက်ကြသည်။ မင်ဆုရှင်း၏ နူးညံ့သိမ်မွေ့သော ခန္ဓာကိုယ်လေး တုန်ရီသွားပြီး ထိုအရှိန်အဝါအတွင်း၌ ပါဝင်သော အလွန် သန့်စင်သည့် စိတ်ဝိညာဉ်စွမ်းအားများသည် သူမ၏ ကိုယ်ပိုင်စိတ်ဝိညာဉ်စွမ်းအင်နှင့် ပေါင်းစပ်သွားသည်ကို ခံစားလိုက်ရသည်။

သူမ၏အရှိန်အဝါတစ်ရပ်လုံး လျှင်မြန်စွာ မြင့်တက်သွားသည်။

ကောင်းကင်နက်နဲသိမ်မွေ့နယ်ပယ် အစောပိုင်းအဆင့်တွင် သူမ ပိတ်မိနေခဲ့သော အတားအဆီးများသည် ဤစိတ်ဝိညာဉ်စွမ်းအားများ၏ ရိုက်ခတ်မှုအောက်တွင် တိုက်ရိုက်ကြေမွှပျက်စီးသွားပြီး သူမကို ကောင်းကင်နက်နဲသိမ်မွေ့နယ်ပယ် အလယ်အလတ်အဆင့်သို့ မြင့်တက်သွားစေခဲ့သည်။

ထို့ပြင် မျက်စိတစ်မှိတ်အတွင်း သူမသည် ကောင်းကင်နက်နဲသိမ်မွေ့နယ်ပယ် အလယ်အလတ်အဆင့် အထွတ်အထိပ်သို့ ရောက်ရှိသွားပြီးမှ တဖြည်းဖြည်း တည်ငြိမ်သွားသည်။ သို့သော် သူမသည် ရက်အနည်းငယ်ကြာခန့် တံခါးပိတ်ကျင့်ကြံပြီးနောက် ကြွင်းကျန်သော စိတ်ဝိညာဉ်စွမ်းအားများအားလုံးကို စုပ်ယူလိုက်ပါက ကောင်းကင်နက်နဲသိမ်မွေ့နယ်ပယ် နှောင်းပိုင်းအဆင့်သို့ တိုက်ရိုက် ချိုးဖျက်ဝင်ရောက်နိုင်မည်ဟု သူမ ခံစားလိုက်ရသည်။

ထိုမျှသာမက ထိုအရှိန်အဝါသည် သူမ၏ ခန္ဓာကိုယ်အတွင်း၌ ဆက်လက်၍ တည်ရှိနေပြီး လျှို့ဝှက်ဆန်းကြယ်သော အကျိုးသက်ရောက်မှု တစ်စုံတစ်ခု ရှိနေပုံရသည်။

လျှို့ဝှက်နယ်မြေ အပိုင်းအစတစ်ခုတည်းဖြင့် ဝင်ပေါက်ကို ဖွင့်လှစ်ခြင်းက ယူဆောင်လာသော တိုးတက်မှုသည်ပင် ဤမျှထိ ကြီးမားလှပေ၏။ သူမသည် အဓိကကျင့်ကြံဆင့်နယ်ပယ် တစ်ဝက်နီးပါးကို ဖြတ်ကျော်ခွင့်ပြုခဲ့သည် ဆိုကတည်းက ဤလျှို့ဝှက်နယ်မြေသည် အမှန်တကယ်ကို ထူးခြားဆန်းပြားသည်။

မင်ဆုရှင်းက မျက်လုံးဖွင့်လိုက်ရာ စိတ်လှုပ်ရှားမှု အရိပ်အယောင်တစ်ရပ်က သူမ၏ မျက်လုံးများထဲတွင် ဖြတ်ပြေးသွားသော်လည်း ကျုံးချင်နှင့်ဟေးပိုင်တို့ထံတွင် မည်သည့်တုံ့ပြန်မှုမျှ မရှိသည်ကို သူမ မြင်တွေ့လိုက်ရသည်။

မင်ဆုရှင်း ရုတ်တရက် နားလည်သဘောပေါက်သွားသည်။ ဤလူနှစ်ဦး၏ ကျင့်ကြံခြင်း နယ်ပယ်များသည် အလွန်သန်မာလွန်းလှသဖြင့် ဤတိုးတက်မှု အနည်းငယ်သည် သူတို့ကို မည်သည့် အကျိုးကျေးဇူးမျှ ဆောင်ကျဥ်းပေးနိုင်ခြင်း မရှိတော့ခြင်းပင်။

သို့သော် တခြားလူများသာ ဖြစ်ခဲ့လျှင် သံမဏိပြားအမြောက်အများဖြင့် လျှို့ဝှက်နယ်မြေကို တပြိုင်နက်တည်း ဖွင့်လှစ်ပါက လျှို့ဝှက်နယ်မြေ အရှိန်အဝါ၏ ကောင်းချီးပေးမှုကြောင့် ယင်သုံးပါးနယ်ပယ်သို့ပင် တိုက်ရိုက်ချိုးဖျက်ဝင်ရောက်နိုင်ကောင်း ဝင်ရောက်နိုင်ပေလိမ့်မည်။

လျှို့ဝှက်နယ်မြေ၏ပြင်ပတွင် ဤကဲ့သို့ ဖြစ်နေလျှင် နယ်မြေအတွင်းမှ အခွင့်အလမ်းများကို တွေးတောကြည့်နိုင်သည်။ ပထမတန်းစား ဂိုဏ်းကြီးလေးဂိုဏ်းက မိုင်ထောင်ပေါင်းများစွာ ခရီးနှင်ပြီး ဤနေရာသို့ ရောက်လာရန် စွန့်စားခဲ့ကြသည်မှာ အံ့အားသင့်ဖွယ် ကိစ္စတစ်ရပ် မဟုတ်တော့ချေ။

"သွားကြစို့..."

မင်ဆုရှင်း၏ အဆင့်တက်ခြင်း ပြီးဆုံးသွားသည်ကို မြင်တွေ့ချိန်၌ ကျုံးချင်က ပေါ့ပေါ့ပါးပါး ပြောဆိုသည်။ ထို့နောက် သူသည် လျှို့ဝှက်နယ်မြေဝင်ပေါက်ဆီသို့ လျှောက်လှမ်းသွားလိုက်ရာ ဟေးပိုင်သည် တိတ်ဆိတ်စွာဖြင့် နောက်မှ လိုက်ပါသွားလေ၏။

ကျုံးချင်၏ကျောပြင်ကို ကြည့်ရင်း မင်ဆုရှင်း၏ လှပသော မျက်လုံးများထဲတွင် အလင်းတန်းတစ်တန်း ဖြတ်ပြေးသွားပြီး သူမလည်း လိုက်ပါသွားသည်။

သူတို့သုံးဦးသည် နှင်းဖုံးတောင်များ ဝန်းရံထားသောလျှို့ဝှက်နယ်မြေထဲသို့ ဖြည်းညှင်းစွာ ဝင်ရောက်သွားကြသည်။

ထို့နောက် နှင်းဖုံးတောင်များအတွင်းရှိ လျှို့ဝှက်နယ်မြေသည် သူတို့၏မျက်စိရှေ့မှောက်တွင် နောက်ဆုံး၌ ထွက်ပေါ်လာခဲ့သည်။

လျှို့ဝှက်နယ်မြေ၏ရှုခင်းကို ရှင်းလင်းစွာ မြင်တွေ့လိုက်ရသည့် အချိန်အခိုက်အတန့်တွင် မင်ဆုရှင်း၏မျက်လုံးများထဲ၌ အံ့အားသင့်မှင်သက်မှု အရိပ်အယောင်တစ်ရပ် ဖြတ်ပြေးသွားသည်။

နှင်းဖုံးတောင်များ ဝန်းရံထားသော နှင်းဖုံးလွင်ပြင်၏အတွင်းပိုင်းနက်ရှိုင်းသောနေရာတွင် ရှိသော ဤလျှို့ဝှက်နယ်မြေသည်...

တစ်ချက်ကြည့်လိုက်ရုံဖြင့် သက်ဝင်လှုပ်ရှားပြီး လန်းဆန်းသော အရာများဖြင့် ပြည့်နှက်နေလိမ့်မည်ဟု သူမ မျှော်လင့်မထားမိချေ။

ဤသည်မှာ သာယာလှပသော ဥယျာဉ်တစ်ခုအလား မြက်ခင်းပြင်များ မြင့်မားသော သစ်တောများနှင့် တသွင်သွင်စီးဆင်းနေသော မြစ်များဖြင့် ပြည့်နှက်နေသည့် ကမ္ဘာငယ်လေး တစ်ခုပင်။

လျှို့ဝှက်နယ်မြေ၏ အတိုင်းအတာသည် သိပ်မကြီးမားသော်လည်း မိုင်ထောင်နှင့်ချီပြီး ကျယ်ဝန်းပေ၏။

မြင်ကွင်း၏အဆုံးသတ်ရှိ လျှို့ဝှက်နယ်မြေ၏ အတွင်းပိုင်းနက်ရှိုင်းသောနေရာတွင် ဆက်တိုက်တည်ရှိနေသော နန်းတော်များကို ဝေဝါးစွာ မြင်တွေ့နိုင်သည်။ ထိုနန်းတော်များ၏ အလယ်ဗဟိုတည့်တည့်တွင် ရွှေရောင်မျှော်စင်တစ်ခုက မြင့်မားစွာ တည်ရှိနေသည်။ ဝင်ပေါက်တွင် ရပ်နေလျှင်ပင် ထိုမျှော်စင်၏ အပေါ်ပိုင်းတစ်ဝက်ကို ရှင်းလင်းစွာ မြင်တွေ့နိုင်သည်။

"ကျွန်မတို့က နောက်ဆုံးတော့ လျှို့ဝှက်နယ်မြေထဲကို ရောက်လာပြီ..."

မင်ဆုရှင်း၏မျက်နှာအမူအယာတွင် မည်သည့်လှုပ်ခတ်မှုမျိုးမျှ မရှိသော်လည်း သူမ၏စိတ်နှလုံးသားထဲတွင် စိတ်လှုပ်ရှားမှု အရိပ်အယောင် အနည်းငယ် ရှိနေသည်။

ဂိုဏ်းကြီးလေးဂိုဏ်း အလုအယက် ဝင်လိုသော လျှို့ဝှက်နယ်မြေသည် ယခုချိန်၌ သူမ၏ မျက်စိရှေ့မှောက်တွင် ရောက်ရှိနေလေပြီ။

သူမ သေသေချာချာ မလေ့လာနိုင်မီမှာပင် ကျုံးချင်သည် အကြိမ်အနည်းငယ်သာ ဝေ့ဝိုက်ကြည့်ရှုလိုက်ပြီးနောက် တွေဝေခြင်း မရှိဘဲ ရှေ့သို့ ဆက်လက်၍ လျှောက်လှမ်းသွားသည်ကို မြင်တွေ့လိုက်ရသည်။

လျှို့ဝှက်နယ်မြေသည် အပြင်ဘက်ထက် ပို၍အန္တရာယ်များနိုင်ပြီး ဤနေရာအထိ ရောက်လာပြီးပြီဖြစ်သဖြင့် သူမသည် ကျုံးချင် နောက်သို့လိုက်ပါခြင်းကို သူမ လုပ်ဆောင်ရမည့် လမ်းစဉ်အဖြစ် မသိစိတ်မှ သတ်မှတ်ထားပြီးဖြစ်သည်။

အရပ်သိပ်မရှည်သော ဤပုံရိပ်၏ နောက်တွင် သူမသည် ထူးခြားသော လုံခြုံမှု ခံစားချက်တစ်ရပ်ကို ခံစားနေရသည်။

သေချာသည်မှာ သူမသည် ကျုံးချင်၏နောက်သို့ လိုက်ပါနေခြင်းသည် လျှို့ဝှက်နယ်မြေအတွင်း၌ဖြစ်စေ ပြင်ပတွင်ဖြစ်စေ ထပ်တူထပ်မျှသာ ဖြစ်ပုံရသည်။

လမ်းတစ်လျှောက်တွင် တောင်ကြားများ သစ်တောများနှင့် လှိုဏ်ဂူများကို ဖြတ်သန်းသွားလာရင်း မင်ဆုရှင်းသည် ထူးခြားသော စိတ်ဝိညာဉ်စွမ်းအင် အရှိန်အဝါတစ်ခုကို ဝေဝါးစွာ အာရုံခံစားမိသည်။

သို့သော် ကျုံးချင်သွားလေရာ နေရာတိုင်း၌ အရာအားလုံးသည် တိတ်ဆိတ်ငြိမ်သက်နေပြီး မည်သည့်ကိစ္စမျှ ဖြစ်ပျက်မလာခဲ့ချေ။

ထိုအစား နယ်မြေအတွင်း၌ ဖုံးကွယ်ပြီး ပေါက်ရောက်နေသော သဘာဝရတနာအချို့ကို သူက ပေါ့ပေါ့ပါးပါး ယူဆောင်သွားခဲ့သည်။

ရံဖန်ရံခါတွင် အရွယ်အစား မကြီးမားသော ကြောက်မက်ဖွယ်ကောင်းသည့် သားရဲအနည်းငယ် ခုန်ထွက်လာပြီး ရတနာများကို စောင့်ကြပ်သူများ ဖြစ်ပုံရသည်။ မင်ဆုရှင်းသည် ထိုသားရဲများကို ရှင်းရှင်းလင်းလင်း မမြင်လိုက်ရမီမှာပင် ကျုံးချင်က ရိုက်သတ်လိုက်၏။

ထောင်ချောက်များဖြင့် ပြည့်နှက်နေသော လျှို့ဝှက်နယ်မြေတစ်ခုကို သူတို့သည် အပျော်ခရီးထွက်နေသကဲ့သို့ ဖြတ်သန်းသွားလာခဲ့ကြသည်။

ဤအတွေ့အကြုံသည် အတော်လေး ထူးဆန်းသော်လည်း မင်ဆုရှင်း အလွန်စိတ်ကျေနပ်နေမိသည်။

တစ်ချိန်တည်းမှာပင် သူမသည် လျှို့ဝှက်နယ်မြေ၏ အရှိန်အဝါကာကွယ်မှုမှတဆင့် တခြားသော နက်နဲသည့် အသွင်အပြင်တစ်ခုကိုလည်း ရှာဖွေတွေ့ရှိလိုက်သည်။