အခန်း (၂၄၈)

ကျိရုရွှယ်၏ လုပ်ကြံမှုဗျူဟာကြောင့် လက်ရှိရောက်ရှိနေသော ဆင့်ကဲပြောင်းလဲသူများအားလုံး အထူးသတိထားရမည့် အခြေအနေသို့ ရောက်ရှိသွားသည်။

မျက်စိတစ်မှိတ်အတွင်းမှာပင် ဆင့်ကဲပြောင်းလဲသူလေးဦး မမျှော်လင့်ဘဲ အသက်ဆုံးရှုံးသွားခဲ့ရသည်။ အဆိုးရွားဆုံးမှာ သူတို့ မည်သို့သေဆုံးသွားသည်ကို မသိရှိခြင်းနှင့် တိုက်ခိုက်သူ မည်သည့်

နေရာတွင် ရှိနေသည်ကို လုံးဝ ရှာမတွေ့ခြင်းပင်။

"ဟင်"

ကပ္ပတိန်လင်း၏ ကျယ်လောင်သော အော်ဟစ်သံကို ကြားလိုက်ရသောအခါ လုချွမ်းမှာ အနည်းငယ် အံ့အားသင့်သွားသည်။ သူသည် ကပ္ပတိန်လင်း ကြည့်နေသည့်ဘက်သို့ ချက်ချင်း လှည့်ကြည့်လိုက်ရာ မလှမ်းမကမ်းရှိ မြေပြင်ပေါ်တွင် လဲကျနေသော အလောင်းလေးလောင်းကို လျင်မြန်စွာ မြင်လိုက်ရသည်။

သေသွားပြီလား။

လုချွမ်းမှာ ဝေခွဲမရဖြစ်သွားသည်။ သူသည် မူလက အဆင့် ၃ ဇွန်ဘီရုပ်သေးများကို ထိုသူများကို ကြားဖြတ်တားဆီးရန် အမိန့်ပေးဖို့ ပြင်ဆင်နေခြင်းဖြစ်ရာ သူတို့ ဘယ်လိုဖြစ်ပြဖိး ရုတ်တရက် အသတ်ခံလိုက်ရတာလဲ။

သို့သော်လည်း ထိုသူများ၏ မျက်ခုံးနှစ်ခုကြားရှိ သွေးစွန်းနေသော နေရာကို သတိပြုမိလိုက်သောအခါ ဤသည်မှာ ချီချီလေး၏ လက်ချက်ဖြစ်ကြောင်း လုချွမ်း ချက်ချင်း နားလည်သွားတော့သည်။

တကယ့်ကို ထူးချွန်တဲ့ လုပ်ဆောင်ချက်ပဲ။ တစ်ကြိမ်တည်းနဲ့ ရန်သူလေးယောက်ကို အပြတ်ရှင်းလိုက်နိုင်တာပဲ။

လုချွမ်း၏ ရင်ထဲတွင် ကျေနပ်ပီတိဖြစ်သွားရသည်။ ဤကာလအတွင်း လေ့ကျင့်ပေးခဲ့မှုများမှာ အလကားမဖြစ်ခဲ့ကြောင်း အတည်ပြုလိုက်နိုင်ပြီဖြစ်သည်။ ယခုကဲ့သို့ ဖရိုဖရဲဖြစ်နေသော တိုက်ပွဲများတွင် ချီချီလေး၏ စွမ်းရည်များသည် မယုံနိုင်လောက်အောင် ထိရောက်မှု ရှိလှသည်။

အထူးသဖြင့် သူမ အသုံးပြုသော အပ်ချည်ထိုးအပ်များသည် အလွန်သေးငယ်လွန်းလှသဖြင့် အထူးတလည် အာရုံစိုက်မကြည့်ပါက လေထဲတွင် ပျံသန်းလာသည်ကို သတိပြုမိရန် ခက်ခဲလွန်းလှသည်။ အခုသေဆုံးသွားသော ဆင့်ကဲပြောင်းလဲသူလေးဦးမှာ ဤအချက်ကြောင့်ပင် ဒုက္ခရောက်သွားခြင်းဖြစ်သည်။ သူတို့သည် မဆင်မခြင် ရှေ့သို့ တိုးဝင်လာခဲ့ပြီး အမှောင်ထဲက လာနေသည့် ဘေးအန္တရာယ်ကို လျစ်လျူရှုမိခဲ့ကြသည်။

အပ်၏ အရှိန်သာ လုံလောက်အောင် မြန်ဆန်ပါက မျက်လုံးရှေ့သို့ ရောက်လာလျှင်ပင် သတိပြုမိနိုင်မည် မဟုတ်ပေ။

"အားလုံး သတိထားကြ။ အမှောင်ထဲက တိုက်ခိုက်သူကို အခွင့်အရေး မပေးနဲ့"

ကောင်းကင်ယံရှိ မီးကွန်ယက်နှင့် လုံးထွေးနေရသည့်ကြားမှ ကပ္ပတိန်လင်းသည် အောက်ခြေရှိ ဖရိုဖရဲဖြစ်နေသော ဆင့်ကဲပြောင်းလဲသူများကို နောက်တစ်ကြိမ် သတိပေးလိုက်ရပြန်သည်။

သို့သော်လည်း ဤရုတ်တရက် အပြောင်းအလဲသည် ကပ္ပတိန်လင်း၏ စိတ်ဓာတ်ကို များစွာ ထိခိုက်သွားစေပြီး ယခင်ကရှိခဲ့သော ယုံကြည်မှုများအားလုံး ပျောက်ကွယ်သွားခဲ့ရသည်။ ဤမစ်ရှင်သည် ကျရှုံးရန် အလားအလာရှိနေပြီဖြစ်ကြောင်း သူ ကြိုတင်ခံစားနေရပြီဖြစ်သည်။

ဤခြံဝင်းအတွင်း၌ အခြားသော လျှို့ဝှက်ဆင့်ကဲပြောင်းလဲသူတစ်ဦး ပုန်းအောင်းနေလိမ့်မည်ဟု မည်သူမျှ မျှော်လင့်မထားခဲ့ကြပေ။ တိုက်ခိုက်သူ ပြသခဲ့သော စွမ်းအားအရ ထိုသူ၏ အရည်အချင်းမှာ အနည်းငယ်မျှ မနိမ့်ပါးကြောင်း ထင်ရှားသည်။ ကပ္ပတိန်လင်း၏ အမြင်တွင် အခြားတစ်ဖက်မှလူသည် အနည်းဆုံး အဆင့် ၃ ဆင့်ကဲပြောင်းလဲသူဖြစ်ပြီး ဆန်းကြယ်သော တိုက်ခိုက်မှုစွမ်းရည်ဖြင့် အမှောင်ထဲတွင် ပုန်းကွယ်နေသူဖြစ်သည်။ ယခုကဲ့သို့ အကြီးအကျယ် တိုက်ပွဲဖြစ်ပွားနေချိန်တွင် ထိုကဲ့သို့သော ရန်သူမျိုးမှာ အလွန်ပင် ကိုင်တွယ်ရခက်ခဲလှသည်။

"အမှောင်ထဲကနေပဲ ခိုးကြောင်ခိုးဝှက် တိုက်ခိုက်ရဲတာလား။ ထွက်လာပြီး ငါနဲ့ ရင်ဆိုင်စမ်း"

"ခိုးတိုက်တာက စွမ်းရည်မဟုတ်ဘူး။ သတ္တိရှိရင် ရှေ့ထွက်ခဲ့"

"အားလုံး သတိထားကြ။ ဒီကောင် ဘယ်မှာလဲဆိုတာ ရှာစမ်း..."

ကျန်ရှိနေသော ဆင့်ကဲပြောင်းလဲသူ ၁၁ ဦးတို့သည် အလွန်အမင်း သတိကြီးစွာ ထားနေကြရပြီး အမှောင်ထဲက တိုက်ခိုက်သူသည် သူတို့ကို မည်သည့်အချိန်တွင် ပစ်မှတ်ထားလာမလဲဟု စိုးရိမ်နေကြသည်။ ပွင့်လင်းစွာ တိုက်ခိုက်ရသော ရန်သူထက် ယခုကဲ့သို့ ပုန်းကွယ်နေသော ရန်သူက ပို၍ပင် ကြောက်မက်ဖွယ်ကောင်းလှသည်။

"မရဘူး ချီချီလေးကို အရိပ်အယောင်တောင် အသိခံလို့ မဖြစ်ဘူး"

ဆင့်ကဲပြောင်းလဲသူများက လုပ်ကြံသတ်ဖြတ်သူကို ဝိုင်းဝန်းရှာဖွေနေကြသည်ကို မြင်သောအခါ လုချွမ်းသည် သူတို့ကို အခွင့်အရေးပေးရန် အစီအစဉ်မရှိပေ။ သူသည် စိတ်အာရုံဖြင့် ကျန်ရှိနေသော အဆင့် ၃ ဇွန်ဘီရုပ်သေးများကို တိုက်ခိုက်ရန် အမိန့်ပေးလိုက်သည်။

ဝူး... ဝူး... ဝူး...

လျှပ်စီး ၂ ကဲ့သို့သော အဆင့် ၃ ဇွန်ဘီရုပ်သေးများသည် နားကွဲမတတ် ဟိန်းဟောက်သံများနှင့်အတူ ဆင့်ကဲပြောင်းလဲသူများဆီသို့ တစ်ရှိန်ထိုး ပြေးဝင်သွားကြတော့သည်။

“မကောင်းတော့ဘူး အားလုံး သတိထားကြ”

အဆင့် ၃ ဆင့်ကဲဇွန်ဘီများ၏ ထိုးစစ်ကို မြင်လိုက်ရသောအခါ ကျန်ရှိနေသော ဆင့်ကဲပြောင်းလဲသူများမှာ ထိတ်လန့်သွားကြပြီး ချီချီလေးကို ရှာဖွေရန် အချိန်မရတော့ဘဲ သူတို့၏ သေနတ်များကို အလျင်အမြန်မြှောက်ကာ ပြေးဝင်လာသော ဇွန်ဘီများဆီသို့ တရစပ် ပစ်ခတ်ကြတော့သည်။

ဒိုင်း... ဒိုင်း... ဒိုင်း...

ချက်ချင်းပင် သေနတ်သံများ ဆူညံသွားပြီး ကျည်ဆန်များနှင့် လက်ပစ်ဗုံးများသည် လေထဲတွင် မီးခိုးတန်းများစွာ ချန်ရစ်ကာ ပေါက်ကွဲထွက်ကုန်သည်။ သို့သော် ကံဆိုးသည်မှာ ဤကဲ့သို့သော အကြီးစားလက်နက်များသည် အဆင့် ၃ နှင့် အဆင့် ၄ ရောက်နေပြီဖြစ်သော ဇွန်ဘီရုပ်သေးများကို အနည်းငယ် ဟန့်တားရုံမှလွဲ၍ တကယ့်ထိခိုက်ဒဏ်ရာ ရအောင် မစွမ်းဆောင်နိုင်ခြင်းပင်။

တာ့ဖန်းကဲ့သို့သော တင့်ကားအမျိုးအစားဇွန်ဘီရုပ်သေးများမှာ အံ့မခန်း ခုခံနိုင်စွမ်းရှိသဖြင့် ကျည်ဆန်များမှာ သူတို့ကိုယ်ပေါ်တွင် မီးပွားများသာ ထွက်ပေါ်စေသည်။ လျှပ်စီး ၂ ကဲ့သို့သော ဇွန်ဘီရုပ်သေးများမှာမူ အလွန်လျင်မြန်လွန်းလှသဖြင့် သူတို့၏ အရိပ်ကိုပင် ဖမ်းမမိနိုင်ပေ။

မယုံနိုင်စရာ မြန်နှုန်းကြောင့် စက္ကန့်ပိုင်းအတွင်းမှာပင် ဇွန်ဘီရုပ်သေးများသည် ဆင့်ကဲပြောင်းလဲသူများ၏ အနားသို့ ရောက်ရှိလာခဲ့သည်။ ဆင့်ကဲပြောင်းလဲသူများမှာ သေနတ်များကို စွန့်ပစ်ကာ သူတို့၏ စွမ်းရည်များကို အသုံးပြုလျက် ဆုတ်ခွာရင်း ခုခံတိုက်ခိုက်ရုံသာ ရှိတော့သည်။

ဝုန်း... ဝုန်း...

ခဏချင်းမှာပင် နှစ်ဖက်လုံး ထိပ်တိုက်တွေ့ကြရာ အဆင့် ၃ ဇွန်ဘီရုပ်သေးများသည် သူတို့၏ သန်မာလှသော ခန္ဓာကိုယ်များဖြင့် ဆင့်ကဲပြောင်းလဲသူများကြားထဲသို့ အတင်းတိုးဝင် မွှေနှောက်ကြတော့သည်။

အားဖန်းကဲ့သို့သော တင့်ကားဇွန်ဘီများမှာ လူသားပုံစံ တင့်ကားကြီးများအလား ခြေတစ်လှမ်းလှမ်းတိုင်း မြေပြင်ကို တုန်ခါသွားစေပြီး လက်သီးတစ်ချက် ပစ်လွှတ်တိုင်း လေထုကို ပေါက်ကွဲသံများ ထွက်ပေါ်စေသည်။

လျှပ်စီး ၁ ကဲ့သို့သော ရုပ်သေးများမှာမူ လျှပ်စီးအလား မြန်ဆန်စွာ လှုပ်ရှားလျက် သူတို့၏ လက်သည်းဓားသွားများဖြင့် လေထုကို ပိုင်းဖြတ်နေကြရာ အေးစက်သော အလင်းတန်းများနှင့်အတူ စူးရှသော အသံများ ပဲ့တင်ထပ်နေတော့သည်။

အဆင့် ၂ ဆင့်ကဲပြောင်းလဲသူများသာ ဖြစ်ကြသော ထိုသူများသည် ထိပ်တိုက်ရင်ဆိုင်ရန် မဝံ့ရဲဘဲ ဘယ်ညာရှောင်တိမ်းနေရသဖြင့် အလွန်ပင် အရှက်ရဖွယ် အခြေအနေသို့ ရောက်ရှိနေကြသည်။

တိုက်ပွဲမှာ ပိုမိုရှုပ်ထွေးလာပြီး ကောင်းကင်ယံနှင့် မြေပြင်နှစ်ဖက်လုံးတွင် တိုက်ပွဲများ အရှိန်

မြင့်လာသည်။ ဤသည်မှာ ချီချီလေးအတွက် ပိုမိုကြီးမားသော အခွင့်အရေးကို သဘာဝအတိုင်း ဖန်တီးပေးလိုက်ခြင်းပင်။

"ချီချီလေးက မှန်ကန်တဲ့ ဆုံးဖြတ်ချက်ကို ချပြီး ပြတ်ပြတ်သားသား တိုက်ခိုက်နိုင်ပါ့မလားဆိုတာ ကြည့်ရသေးတာပေါ့"

တိုက်ပွဲ၏ အလှည့်အပြောင်းကို တိတ်တဆိတ် ထိန်းကျောင်းနေရင်း လုချွမ်း၏ အကြည့်များမှာ တစ်ချက် ဝင်းလက်သွားသည်။

သို့သော် လုချွမ်း မသိရှိသည်မှာ ကျိရုရွှယ်သည် သူမ၏ ယခင်ဘဝမှ များပြားလှသော အတွေ့အကြုံများကြောင့် အခွင့်အရေးကို စောင့်ဆိုင်းရမည့် အချိန်ကို အတိအကျ သိရှိနေခြင်းပင်။

ထို့ကြောင့် လုချွမ်းက အဆင့် ၃ ဇွန်ဘီရုပ်သေးများကို စတင်လှုပ်ရှားစေလိုက်သည့် တစ်ခဏမှာပင် ကျိရုရွှယ်သည် နောက်ထပ် ဘာလုပ်ရမည်ကို ချက်ချင်း သိရှိသွားသည်။ ဤအချိန်တွင် သူမ၏ အာရုံအားလုံးသည် ဇွန်ဘီရုပ်သေးများ၏ တိုက်ခိုက်မှုကြောင့် ဖရိုဖရဲဖြစ်နေသော ဆင့်ကဲပြောင်းလဲသူများဆီသို့ ရောက်ရှိနေပြီး သူမ၏ လက်ဖဝါးပေါ်တွင် အေးစက်သော အလင်းတန်းများ ထွက်ပေါ်နေသည့် အပ်ချည်ထိုးအပ်များ နောက်တစ်ကြိမ် ထွက်ပေါ်လာပြန်သည်။

"အား"

ထိုစဉ် နာကျင်စွာ အော်ဟစ်သံတစ်ခု ထွက်ပေါ်လာသည်။ ဆင့်ကဲပြောင်းလဲသူတစ်ဦးမှာ လျှပ်စီး ၂ ၏ မျက်စိကျိန်းမတတ် မြန်ဆန်လှသော ဓားသွားအလင်းတန်းကြောင့် လက်တစ်ဖက် ပြတ်တောက်သွားခဲ့သည်။ သူသည် ပြတ်သွားသော လက်မောင်းငုတ်တိုကို ဖိထားရင်း အသည်းအသန် အော်ဟစ်ကာ ယိမ်းယိုင်လျက် ထွက်ပြေးရန် ကြိုးစားနေသည်။

ကျိရုရွှယ်၏ အကြည့်မှာ စူးရှသွားပြီး သူမလက်ထဲမှ အပ်မှာ ချက်ချင်းပင် ပျံထွက်သွားတော့သည်။

ရွှပ်…

မျက်စိတစ်မှိတ်အတွင်းမှာပင် လျှပ်စီး ၂ ၏ လိုက်လံတိုက်ခိုက်မှုမှ ရှောင်တိမ်းနေသော ထိုဆင့်ကဲပြောင်းလဲသူမှာ ကိုယ်လက်များ တောင့်တင်းသွားပြီး မြေပြင်ပေါ်သို့ သက်မဲ့အလောင်းအဖြစ် လိမ့်ကျသွားတော့သည်။ အခြားဆင့်ကဲပြောင်းလဲသူများမှာ ဇွန်ဘီရုပ်သေးများနှင့် အသည်းအသန် တိုက်ခိုက်နေရသဖြင့် ဘေးပတ်ဝန်းကျင်ကို သတိမထားမိကြပေ။ လဲကျသွားသူမှာ ဆင့်ကဲဇွန်ဘီများ၏ လက်ချက်ဖြင့် သေဆုံးသွားသည်ဟုသာ သူတို့ ထင်မှတ်နေကြသည်။

ထို့နောက်တွင် ကျိရုရွှယ်သည် ဤနည်းလမ်းကိုသာ ထပ်တလဲလဲ အသုံးပြုခဲ့သည်။ ဆင့်ကဲပြောင်းလဲသူတစ်ဦးဦး ဆင့်ကဲဇွန်ဘီများကြောင့် ဒဏ်ရာရသွားတိုင်း သူမက နောက်ဆုံးသေစေနိုင်သော အချက်ကို တိတ်တဆိတ် ပစ်လွှတ်ကာ သူတို့၏ အသက်ကို နုတ်ယူခဲ့သည်။

မကြာမီမှာပင် ဆင့်ကဲပြောင်းလဲသူ အတော်များများမှာ ကျိရုရွှယ်၏ လက်ချက်ဖြင့် သေဆုံးသွားခဲ့ရသော်လည်း သူမ၏ လှုပ်ရှားမှုများမှာ အလွန်လျှို့ဝှက်လွန်းလှသဖြင့် ကျန်ရှိနေသောသူများမှာ အမှောင်ထဲတွင် တစ်စုံတစ်ယောက် ရှိနေသည်ကို သတိမပြုမိကြသေးပေ။

ဝုန်း…

ထိုအခိုက်အတန့်တွင် အဆင့် ၃ ဆင့်ကဲပြောင်းလဲသူတစ်ဦးမှာ အခွင့်ကောင်းကို အသုံးချကာ မီးကွန်ယက်၏ ပိတ်ဆို့မှုကို ဖောက်ထွက်နိုင်ခဲ့သည်။ သူ၏ ခန္ဓာကိုယ်မှ မှိန်ဖျော့သော အလင်းနက်များ ထွက်ပေါ်လာပြီး ပေရာချီသော အကွာအဝေးကို တစ်ဟုန်ထိုး ဖြတ်သန်းကာ လက်ထဲတွင် တပ်ဆင်ထားသောဓားကို ဝှေ့ယမ်းလျက် လူနေအိမ်ဆီသို့ ပြေးဝင်လာတော့သည်။

"အဲဒါ အဲဒီမိန်းကလေးပဲ"

အဆင့် ၃ ဆင့်ကဲပြောင်းလဲသူသည် ပြတင်းပေါက်တွင် ရှိနေသော ကျိရုရွှယ်ကို မြင်လိုက်ရသောအခါ မျက်လုံးများ ဝင်းလက်သွားပြီး ဦးတည်ချက်ကို အနည်းငယ်ပြင်ကာ ပိုမိုနီးကပ်အောင် တိုးဝင်လိုက်သည်။

"မင်းရဲ့ ရန်သူက ငါပဲ"

မထင်မှတ်ဘဲ ထိုအချိန်တွင် ကျောက်လင်းသည် တစ်နေရာရာမှ ရလာသော သံမဏိဓားတစ်လက်ကို ဆွဲကာ တိုက်ပွဲဝင်လိုစိတ် အပြည့်ဖြင့် သူ့ကို တားဆီးရန် ရှေ့သို့ ပြေးထွက်လာသည်။

"ဖယ်စမ်း"

ကျောက်လင်းကို မြင်လိုက်ရသောအခါ ဆင့်ကဲပြောင်းလဲသူမှာ ဒေါသထွက်သွားပြီး သူ၏ ခန္ဓာကိုယ်မှ အလင်းနက်များ ထပ်မံ ထွက်ပေါ်လာကာ ကျောက်လင်း၏ အနားသို့ ချက်ချင်း ရောက်ရှိသွားသည်။ သူ၏ လက်ထဲမှ လှံစွပ်ဓားမှာ အေးစက်စွာ တောက်ပနေပြီး ပြင်းထန်သော သတ်ဖြတ်လိုစိတ်ဖြင့် လျင်မြန်စွာ ထိုးသွင်းလိုက်သည်။

"သေပေတော့"

ကျောက်လင်းမှာလည်း အနည်းငယ်မျှ ကြောက်ရွံ့ခြင်းမရှိဘဲ သူမလက်ထဲမှ သံမဏိဓားကို အားကုန်လွှဲကာ ရှေ့သို့ တိုးဝင်ပြီး ပြင်းထန်စွာ ပိုင်းချလိုက်တော့သည်။