ရတနာရွေးချယ်ခြင်း

“အထက်တန်း ပြန်လည်မွေးဖွားခြင်းအဆင့် ရတနာတွေကို ဒီနေရာမှာ နေရာအနှံ့ တွေ့နိုင်တာပဲ...”

ယီထျန်းယွမ်သည် ခေါင်းခါလိုက်မိသည်။ ဤသည်မှာ အဆင့် ၂ နတ်ဘုရားနယ်မြေ၏ အင်အားပင် ဖြစ်သည်။ အဆင့် ၁ နတ်ဘုရားနယ်မြေတွင် အလွန်ရှားပါးလှသော အရာမျိုးကို ဤနေရာတွင် နေရာအနှံ့ တွေ့နိုင်ပေသည်။ သို့သော် ဈေးနှုန်းမှာ အလွန်ကြီးမြင့်လှသဖြင့် နတ်ဘုရားစစ်ပွဲ မိုးကြိုးစည်တွင် ရလဒ်ကောင်းများ မရရှိခဲ့ပါက လက်နက်ကောင်းတစ်ခုနှင့် လဲလှယ်ရန် အလွန်ခဲယဉ်းပေလိမ့်မည်။

သူ၏အမြင်အရ အထက်တန်းအဆင့် ပြန်လည်မွေးဖွားခြင်းအဆင့် ရတနာနှင့် လဲလှယ်ရန် စံနှုန်းမီသူမှာ ငါးဆယ်ပင် မပြည့်နိုင်ချေ။ လူတိုင်းမှာ ထူးကဲသော ရလဒ်ကောင်းများ မရရှိနိုင်သောကြောင့် ဖြစ်သည်။

ဤနေရာတွင် အထက်တန်းအဆင့် ပြန်လည်မွေးဖွားခြင်းအဆင့် ရတနာ တစ်ခု သို့မဟုတ် သိုင်းပညာတစ်ခုကို လဲလှယ်ရန် တံဆိပ်ပြား တစ်ထောင်ကျော် လိုအပ်သည်။ ဆိုလိုသည်မှာ အနည်းဆုံး အဆင့် ၆ သို့မဟုတ် ၇ အထက် ရလဒ်မျိုး သုံးကြိမ်ခန့် ရရှိထားရမည် ဖြစ်ပြီး ယခင်က ရရှိထားသော တံဆိပ်ပြားများနှင့် ပေါင်းစပ်မှသာ စံနှုန်းမီမည် ဖြစ်သည်။

ပို၍ကောင်းမွန်သော ရတနာများအတွက်မူ အဆင့် ၈ အထက် ရလဒ်မျိုး အကြိမ်အနည်းငယ် ရရှိထားရန် လိုအပ်သည်။ သို့မဟုတ်လျှင်လည်း လူထောင်ပေါင်းများစွာ၏ တံဆိပ်ပြားများကို လုယူထားနိုင်မှသာ လဲလှယ်နိုင်မည် ဖြစ်သည်။

တစ်ဦးတည်း အစွမ်းဖြင့် တံဆိပ်ပြား ထောင်ချီ လုယူရန်မှာ အလွန်ခဲယဉ်းလှသည်။ အဓိကမှာ ကျင့်ကြံသူများမှာ ပြန့်ကျဲနေသဖြင့် ရှာဖွေရန် မလွယ်ကူသောကြောင့် ဖြစ်သည်။

သို့သော် အစပိုင်းကတည်းက တံဆိပ်ပြား နှစ်ရာကျော် လုယူထားနိုင်သူများမှာမူ တိုက်ရိုက် ရွေးချယ်နိုင်ပေသည်။ ဤအချက်ကြောင့် စံနှုန်းမီသူ အရေအတွက်မှာ ရုတ်တရက် မြင့်တက်သွားသော်လည်း လူတစ်ရာထက်မူ ပိုမည်မဟုတ်ပေ။

ယီထျန်းယွမ်သည် ဝေခွဲမနေဘဲ အထက်တန်းအဆင့် ပြန်လည်မွေးဖွားခြင်းအဆင့် ရတနာများရှိရာ နယ်မြေသို့ လျှောက်သွားလိုက်သည်။ သူသည် စံနှုန်းမီသဖြင့် ဤနေရာကို ဦးစားပေး ရွေးချယ်ရမည်မှာ သေချာသည်။ စံနှုန်းမမီလျှင်ပင် နတ်ဘုရားစစ်ပွဲ မိုးကြိုးစည်မှ သူရရှိထားသော တံဆိပ်ပြား ခုနစ်ထောင်မှာ အထက်တန်းအဆင့် ပြန်လည်မွေးဖွားခြင်းအဆင့် ရတနာများစွာကို လဲလှယ်ရန် လုံလောက်နေပြီ ဖြစ်သည်။

‘ထူးခြားတဲ့ ရတနာတချို့ လိုနေတာနဲ့ အတော်ပဲ...’

ယီထျန်းယွမ်သည် သူမျက်စိကျနေသော ရတနာတစ်ခုကို ချက်ချင်း ရှာတွေ့သွားသည်။ ၎င်းမှာ သူတော်စင်နတ်ဘုရားစုတ်တံပင် ဖြစ်သည်။

သူသည် ယခုအခါ နတ်ဘုရားအင်းဆရာအဆင့်ကို မြှင့်တင်ရန် လိုအပ်နေသည်။ သုံးဘုံလောကကို ကောင်းမွန်စွာ ပြုပြင်လိုသလို မိမိ၏ လက်နက်များကိုလည်း ပိုမို အားကောင်းအောင် လုပ်ဆောင်လိုသောကြောင့် ဖြစ်သည်။

သူ ယခင်က သင်ယူခဲ့သော နတ်ဘုရားအင်းများမှာ ကံစမ်းမဲမှ ရရှိထားသော လက်နက်ပစ္စည်းများပေါ်တွင် လုံးဝ အာနိသင် မရှိပေ။ လက်နက်ကိရိယာတိုင်းပေါ်တွင် နတ်ဘုရားအင်းများ ရေးထိုး၍ ရသည်မဟုတ်ပေ။ သို့မဟုတ်ပါက သူ၏ လက်နက်ကိရိယာများမှာ ကြာလှပြီပင် ပေါက်ကွဲသွားလောက်ပြီ ဖြစ်သည်။

နတ်ဘုရားနယ်မြေသို့ ရောက်သောအခါတွင်မူ ဤနေရာရှိ နတ်ဘုရားအင်းများကို သူ၏ လက်နက်ကိရိယာများပေါ်တွင် ရေးထိုးနိုင်ပြီ ဖြစ်သည်။ ဥပမာအားဖြင့် ရှေးဟောင်းဝတ်စုံ သို့မဟုတ် မိစ္ဆာနတ်ဘုရား ဝတ်စုံများပေါ်တွင် ရေးထိုးရာ၌ မည်သည့် ပြဿနာမျှ မရှိပေ။

မည်မျှ အကျိုးသက်ရောက်မှု ရှိမည်ကိုမူ ရေးထိုးကြည့်မှသာ သိနိုင်မည် ဖြစ်သည်။

သူက သူတော်စင်စုတ်တံကို ယူရန် ကြံလိုက်စဉ်မှာပင် နားထဲသို့ ရိုင်းစိုင်းသော အသံတစ်သံ ဝင်ရောက်လာသည်။

“အဲ့ဒီ သူတော်စင်စုတ်တံကို ပြန်ချထားလိုက်စမ်း..”

ယီထျန်းယွမ် လှည့်ကြည့်လိုက်ရာ မြွေမျက်လုံးကဲ့သို့သော သူငယ်အိမ်ရှိသည့် ပြိုင်ပွဲဝင်တစ်ဦး ဤဘက်သို့ လျှောက်လာသည်ကို တွေ့လိုက်ရသည်။ သူ၏ တစ်ကိုယ်လုံးတွင် ယုတ်ညံ့သော အငွေ့အသက်များ လွှမ်းခြုံထားပြီး ထိုမြွေမျက်လုံးများမှာ အလွန်ပင် ကျောချမ်းဖွယ် ကောင်းလှသည်။ သူသည် ယီထျန်းယွမ်ကို သားကောင်တစ်ကောင်ကဲ့သို့ စူးစိုက်ကြည့်နေသည်။

ယီထျန်းယွမ်က သူ့ကို ဂရုမစိုက်ဘဲ မူလရှိထားသော တံဆိပ်ပြား တစ်ရာ့ကိုးဆယ်ဖြင့် ထိုအထက်တန်းအဆင့် ပြန်လည်မွေးဖွားခြင်းအဆင့် ရတနာကို အောင်မြင်စွာ လဲလှယ်လိုက်သည်။ အဓိပ္ပါယ်မှာ သူသည် အခမဲ့ လဲလှယ်ခွင့် မရှိတော့ဘဲ ကျန်ရှိသော ရတနာများကို မူလဈေးနှုန်းဖြင့်သာ လဲလှယ်ရတော့မည် ဖြစ်သည်။

သို့သော် ဤအရာမှာ သူ့အတွက် အသုံးဝင်သဖြင့် လက်လွှတ်ခံမည် မဟုတ်ပေ။

“ငါပြောတဲ့စကားကို နားထဲမှာ လေတိုက်သွားတယ်လို့ ထင်နေတာလား..”

မြွေမျက်လုံးနှင့် အရှင်သခင်သည် သူ၏ ရှေ့သို့ ရောက်လာပြီး ဒေါသတကြီး ကြည့်ကာ အော်ဟစ်လိုက်သည်။

“အဲ့ဒါကို ပြန်ထုတ်ပေးစမ်း... အဲ့ဒါ ငါမျက်စိကျထားတဲ့ အရာပဲ..”

“ခင်ဗျား မျက်စိကျထားတော့ ဘာဖြစ်လဲ... ခင်ဗျားလက်ထဲ အရင်မရောက်သေးသရွေ့ ဒါကို လူတိုင်း ရယူပိုင်ခွင့် ရှိတာပဲ... နောက်ပြီး ဒါက ကျွန်တော် အရင်ရွေးလိုက်တဲ့ အရာပဲလေ...”

ယီထျန်းယွမ်က မျက်နှာသာမပေးဘဲ ပြန်လည်ချေပလိုက်သည်။

“မင်း..”

မြွေမျက်လုံးနှင့် အရှင်သခင်သည် ယီထျန်းယွမ်ကို လက်ရောက် တိုက်ခိုက်ချင်သော်လည်း မလုပ်ရဲပေ။ ဤနေရာတွင် တိုက်ခိုက်ခြင်းကို တားမြစ်ထားပြီး တိုက်ခိုက်မိပါက ပြိုင်ပွဲမှ ချက်ချင်း ထုတ်ပယ်ခံရမည် ဖြစ်သည်။

“ဘာမှ ထွေထွေထူးထူး မရှိရင် ကျေးဇူးပြုပြီး ဖယ်ပေးပါဦး... ကျွန်တော် တခြား ရတနာတွေ ရွေးဖို့ အနှောင့်အယှက် ဖြစ်နေလို့...”

ယီထျန်းယွမ်သည် ရတနာတစ်ခုတည်းနှင့် တင်းတိမ်မည့်သူ မဟုတ်ပေ။ ဤတံဆိပ်ပြားများ၏ အကြီးမားဆုံး အသုံးဝင်မှုမှာ ရတနာများနှင့် လဲလှယ်ရန် ဖြစ်ပြီး ဤသည်မှာ အကြီးအကဲများ ပေးအပ်သော ဆုလာဘ်များ ဖြစ်သည်ဟု ဆိုနိုင်သည်။

နောင်လာမည့် အဆင့်များကို မကျော်ဖြတ်နိုင်လျှင်ပင် ဤနေရာမှ လဲလှယ်သွားသော ရတနာများမှာ သူတို့အတွက် အလွန်အသုံးဝင်ပေလိမ့်မည်။ နောက်တစ်ကြိမ် ပြိုင်ပွဲဝင်ရန်အတွက် ပြင်ဆင်ရန် အခွင့်အရေးပင် ဖြစ်သည်။

“မင်းလို လူသားကောင်ကတော့ အေးအေးဆေးဆေး ပြောတာကို မကြားဘူးပဲ... တံဆိပ်ပြား အများဆုံးရလို့ ကိုယ့်ကိုယ်ကိုယ် အသန်မာဆုံးလို့ မထင်လိုက်နဲ့... ငါတို့သာ အစွမ်းကုန် ထုတ်သုံးမယ်ဆိုရင် အဆင့် ၉ မပြောနဲ့... ဘာမဆို ဖြစ်နိုင်တယ်..”

မြွေမျက်လုံးနှင့် အရှင်သခင်၏ လေသံမှာ အထင်အမြင်သေးမှုများ ပြည့်နှက်နေပြီး သူတို့သာ အဆင့် ၉ ရအောင် လုပ်ချင်ပါက လုပ်နိုင်သည်ဟု ဆိုလိုနေသည်။

သူတို့၏ အငြင်းပွားမှုမှာ ပတ်ဝန်းကျင်ရှိ ပြိုင်ပွဲဝင်များ၏ အာရုံစိုက်မှုကို ခံလိုက်ရသော်လည်း လူတိုင်းက မြွေမျက်လုံးနှင့် အရှင်သခင်၏ စကားကို ထောက်ခံနေကြသည်။

တကယ်တမ်း အစွမ်းကုန် ကြိုးစားမည်ဆိုပါက အဆင့် ၉ အတွက် ပြဿနာမရှိသော်လည်း မိမိ၏ အစွမ်းကို ကြိုတင် ထုတ်ပြရာရောက်သဖြင့် တွက်ခြေမကိုက်ဟု သူတို့ ယူဆကြသည်။ သူတို့သည် ယီထျန်းယွမ်၏ စွမ်းဆောင်ရည်ကို မမြင်ဖူးကြသဖြင့် ယီထျန်းယွမ်သည် အစွမ်းကုန် ကြိုးစားပြီးမှသာ ဤရလဒ်ကို ရရှိခဲ့ခြင်း ဖြစ်မည်ဟု တညီတညွတ်တည်း ယူဆထားကြသည်။

အစွမ်းကုန် ကြိုးစားမှသာ ဤရလဒ်မျိုး ရခြင်းမှာ သူတို့အမြင်တွင် အလွန်မသန်မာဟု ထင်နေကြသည်။ ယီထျန်းယွမ်၏ အကြောင်းကို ကြားဖူးသူများကလည်း သူသည် အစွမ်းကုန် ကြိုးစားခဲ့သည်ဟု ယူဆကာ သူ၏ စွမ်းအားအဆင့်ကို ခန့်မှန်းထားကြသည်။

“အို... ဒါက ခင်ဗျားတို့ ကိစ္စပဲလေ... မလုပ်နိုင်တာက မလုပ်နိုင်တာပဲ... ကျွန်တော့်ကို လာပြီး တခြားအကြောင်းပြချက်တွေ လာမပေးနဲ့...”

ယီထျန်းယွမ်က သူ့ကို အေးစက်စွာ ကြည့်လိုက်သည်။

“ဖယ်ပေးတော့... ရတနာရွေးတာကို လာပိတ်မနေနဲ့... ထပ်ပြီး မဖယ်ပေးဘူးဆိုရင် ရှေ့က တာဝန်ရှိတဲ့ ပုဂ္ဂိုလ်ကြီးတွေကို ပြောလိုက်မယ်... ခင်ဗျား ကျွန်တော့်ကို နှောင့်ယှက်နေတယ်လို့..”

မြွေမျက်လုံးနှင့် အရှင်သခင်၏ အကြည့်မှာ အလွန်အေးစက်သွားပြီး တံခါးဝရှိ ကင်းစောင့်များပင် သတိပြုမိသွားကာ လာရောက် စစ်ဆေးရန် ပြင်လိုက်ကြသည်။

“ကောင်းပြီ... မင်း စောင့်နေလိုက်... အဲ့ဒီအချိန်ကျရင် မင်းက ဖားသူငယ် တစ်ကောင်ပဲဆိုတာ သိစေရမယ်... ရလဒ်လေး နည်းနည်းရတာနဲ့ ကိုယ့်ကိုယ်ကိုယ် အဟုတ်ကြီး ထင်မနေနဲ့... တကယ်တော့ မင်းက ဘာမှမဟုတ်ဘူး... ငါနဲ့ မတွေ့ဖို့ပဲ ဆုတောင်းထားလိုက်... မဟုတ်ရင် ဒီပြိုင်ပွဲကို လာတာဟာ မင်းရဲ့ အကြီးမားဆုံး အမှားပဲဆိုတာ သိစေရမယ်...”

မြွေမျက်လုံးနှင့် အရှင်သခင်သည် ယီထျန်းယွမ် ထွက်သွားနိုင်ရန် ဘေးသို့ မကျေမနပ် ဖယ်ပေးလိုက်ရသည်။ အကယ်၍ ထိုကင်းစောင့်များကို အနှောင့်အယှက် ပေးမိပါက သူသာလျှင် ဒုက္ခရောက်မည် ဖြစ်သည်။

“ဟုတ်လား... ဒါဆိုရင် ဘယ်သူက ဖားသူငယ် တစ်ကောင် ဖြစ်မလားဆိုတာ ကြည့်ကြသေးတာပေါ့...”

ယီထျန်းယွမ်က ခပ်အေးအေးပင် ပြုံးလိုက်ပြီး ဤကိစ္စကို စိတ်ထဲမထားဘဲ အခြားနယ်မြေရှိ ရတနာများကို ဆက်လက် ရွေးချယ်ရန် ထွက်ခွာသွားတော့သည်။

မြွေမျက်လုံး အရှင်သခင်သည် သူ့ကို အံကြိတ်ကာ ကြည့်နေသော်လည်း ဤနေရာတွင် လက်ရောက် တိုက်ခိုက်၍ မရသဖြင့် ရတနာရွေးချယ်ရန်သာ လှည့်ထွက်သွားတော့သည်။

အခြားသော ပြိုင်ပွဲဝင်များမှာလည်း ခေါင်းခါလိုက်ကြပြီး ယီထျန်းယွမ်သည် သေတွင်းတူးနေသည်ဟု ယူဆလိုက်ကြသည်။ ရောက်ရောက်ချင်းမှာပင် ပြိုင်ဘက် အများအပြားကို ရန်စလိုက်သောကြောင့် ဖြစ်သည်။ ယွမ်လဲ့ အရှင်သခင် သာမက ယခု မြွေမျက်လုံးနှင့် အရှင်သခင်ကိုပါ ရန်စလိုက်ခြင်းမှာ သေချင်နေသည်ဟုပင် ဆိုနိုင်သည်။

“ညီအစ်ကိုယီ... အဆင်ပြေရဲ့လား... အဲ့ဒီ မြွေမျက်လုံးနဲ့ အရှင်သခင်က ထိပ်သီး ရှစ်ယောက်စာရင်းဝင် တစ်ယောက်ပဲ... သူက အရမ်းတော်တယ်လို့ ကျွန်တော် ကြားဖူးတယ်...”

လီယွမ်က အနားသို့ ကပ်ကာ မေးမြန်းလိုက်သည်။

“ဒါဆိုရင် ကျွန်တော်က ရတနာကို သူ့ကို ပေးလိုက်ရင်... သူနဲ့ တွေ့တဲ့အခါ သူက ကျွန်တော့်ကို အရှုံးပေးမှာလား...”

ယီထျန်းယွမ်က ပြန်လည် မေးခွန်းထုတ်လိုက်သည်။

“အဲ့ဒါကတော့ ဖြစ်နိုင်မယ် မထင်ဘူး...”

လီယွမ်က ပြန်ပြောလိုက်သည်။

“အဲ့ဒါဆိုရင် ပြီးတာပဲလေ... သူက ကျွန်တော့်ကို လွှတ်ပေးမှာ မဟုတ်မှတော့ ကျွန်တော်က ဘာလို့ သူ့ကို ပေးရမှာလဲ...”

ယီထျန်းယွမ်က ပုခုံးတွန့်လိုက်သည်။

“ကျွန်တော့်ရဲ့ ဘဝမှာ ရန်သူတွေက အမြောက်အများပဲ... ဒါပေမဲ့ လူတိုင်းဟာ ကျွန်တော် အောင်မြင်မှုဆီ တက်လှမ်းဖို့အတွက် ခြေနင်းတုံးတွေ ဖြစ်သွားခဲ့တာချည်းပဲ... သူလည်း ချွင်းချက် မဟုတ်ပါဘူး...”

လီယွမ်သည် ယီထျန်းယွမ်ကို ကြည့်ကာ မှင်တက်မိသွားသည်။ ယီထျန်းယွမ်က ဤမျှအထိ ခန့်ညားထည်ဝါသော စကားမျိုး ပြောလိမ့်မည်ဟု သူ မထင်ထားခဲ့ချေ။

“ကြည့်ရတာ ကျွန်တော်က သတ္တိနည်းနေပုံရတယ်... ညီအစ်ကိုလီလောက် မစွမ်းဘူးပဲ..”

လီယွမ်သည် ယီထျန်းယွမ်အပေါ် ပို၍ပင် ရိုသေလေးစားမှုများ တိုးပွားသွားတော့သည်။

အခန်း ၁၀၀၈ ပြီးပါပြီ။