အခန်း (၂၉၈)

အကြီးအကဲ ဂူရှန်းထျန်းသည် ဘေးနားမှ လိုက်ပါလာသော မိန်းကလေးငယ်၏ လက်ကိုဆွဲကာ တောင်ပေါ်သို့ ဖြည်းဖြည်းချင်း တက်လာခဲ့သည်။

ထိုမိန်းကလေးငယ်မှာ အလွန်ငယ်ရွယ်သေးသော်လည်း သူမ၏မျက်နှာတွင် ထိုအရွယ်ကလေးများတွင် တွေ့ရလေ့ရှိသည့် အပြစ်ကင်းစင်သော အံ့သြမှင်သက်မှုမျိုး လုံးဝမရှိပေ။ ယင်းအစား သူမ၏ အကြည့်များမှာ ထက်မြက်မှုအပြည့်ရှိနေပြီး တည်ငြိမ်လေးနက်သော အမူအရာကိုသာ ဆုပ်ကိုင်ထားသည်။

"ရောက်ပြီ"

တောင်ထိပ်သို့ ရောက်ရှိသွားသောအခါ အကြီးအကဲဂူက ကြေညာလိုက်သည်။

သူသည် ဘေးမှမိန်းကလေးကို ကြည့်ရင်း ကျေနပ်အားရစွာ ပြုံးလိုက်မိသည်။

'ဒီကလေးကတော့ တကယ်ကို ထူးခြားတာပဲ'

သူတွေးနေမိသည်။ သူသည် သူမကို စမ်းသပ်သည့်အနေဖြင့် တောင်ပေါ်သို့ လမ်းလျှောက်တက်ခိုင်းခဲ့ခြင်းဖြစ်သည်။ အကယ်၍ သူမ ရှုံးနိမ့်ခဲ့လျှင်ပင် သူမကို တပည့်အဖြစ် သူလက်ခံမည်သာဖြစ်သည်။

သို့သော် သူမသည် ဝိညာဉ်စွမ်းအားကျင့်ကြံခြင်းတွင် ပါရမီပါရုံသာမက ခန္ဓာကိုယ်သန့်စင်ခြင်းအတွက်ပါ သဘာဝအလျောက် သန်မာသော ကိုယ်ခန္ဓာကို ပိုင်ဆိုင်ထားလိမ့်မည်ဟု ဘယ်သူက ထင်ထားမှာလဲ။

သူ၏မျက်နှာတွင် ဂုဏ်ယူဝင့်ကြွားသော အပြုံးတစ်ခု ပေါ်လာပြီး ငါ့ရဲ့ တောင်နှလုံးသားခန်းမကတော့ တကယ့်ကို ကြီးကျယ်မြင့်မြတ်ဖို့ ကံပါလာတာပဲဟု တွေးနေတော့သည်။

"ရှန်းယွီ... မင်း ဘယ်မှာလဲ"

အကြီးအကဲဂူ၏ ခေါ်သံမှာ တောင်ထိပ်တစ်ခုလုံး ဟိန်းထွက်သွားသည်။

"မင်း နောက်တစ်ခါ ပျင်းရိပြီး အိပ်နေပြန်တာတော့ မဟုတ်ပါဘူးနော်"

သူသည် အသံကို အနည်းငယ်မြှင့်ကာ စိတ်မရှည်သလိုဖြင့် ဆက်ပြောလိုက်သည်။

"ထွက်လာပြီး မင်းရဲ့ ဂျူနီယာညီမလေးကို နှုတ်ဆက်လိုက်ဦး။ ငါ့ကို အရှက်မခွဲနဲ့"

သူ၏ ပထမတပည့်ဖြစ်သူမှာ ယခုအချိန်တွင် ဘာများလုပ်နေပါလိမ့်ဟု တွေးရင်း သက်ပြင်းတစ်ချက် ချလိုက်မိသည်။ ထိုကောင်လေးမှာ အစားစားဖို့ မေ့သွားပြီး တစ်နေရာရာမှာ သေနေတာမျိုးတော့ မဖြစ်ပါစေနဲ့ဟု သူ အလေးအနက် ဆုတောင်းနေမိသည်။

ခေတ္တမျှ တိတ်ဆိတ်သွားပြီးနောက် ဂေဟာအဆောက်အဦးတစ်ခု၏ နောက်ကွယ်မှ သေးငယ်သော အရိပ်တစ်ခု ဖြည်းဖြည်းချင်း ထွက်ပေါ်လာသည်။ အကြီးအကဲဂူသည် သူ၏ ပထမတပည့်ကို မြင်လိုက်ရသောအခါမှ စိတ်သက်သာရာရသွားပြီး မျက်နှာမှာ သိသိသာသာ လင်းပသွားတော့သည်။

'အနည်းဆုံးတော့ သူ အသက်ရှင်နေသေးတာပဲ။ ဒါလည်း မဆိုးပါဘူးလေ'

အကြီးအကဲက သူ့ဘာသာ တွေးလိုက်သည်။

"ရှန်းယွီ... ဒါက လီယောင်းတဲ့"

အကြီးအကဲဂူက မိန်းကလေးငယ်ကို လက်ညှိုးညွှန်ပြရင်း မိတ်ဆက်ပေးလိုက်သည်။

"သူမက အခုကစပြီး မင်းရဲ့ ဂျူနီယာညီမလေး ဖြစ်လာမှာမို့လို့ သူ့ကို ကောင်းကောင်း စောင့်ရှောက်ပေးလိုက်ဦး"

အကြီးအကဲဂူက မိန်းကလေးဘက်သို့ လှည့်ကာ ဆက်လက်မိတ်ဆက်ပေးသည်။

"လီယောင်း... ဒါက ရှန်းယွီ မင်းရဲ့ စီနီယာအစ်ကိုပဲ။ သူက ကြည့်ရတာ ပျင်းရိပြီး ပါရမီမရှိသလို ထင်ရပေမဲ့ မင်းရဲ့ စီနီယာအစ်ကို ဖြစ်နေတုန်းပဲမို့ သူ့ကို သေချာလေး လေးစားသမှု ပြရမယ်နော်"

"ပျင်းရိတာ ပါရမီမရှိတာ"

ရှန်းယွီသည် သူ၏ရင်ဘတ်ကို လက်ဖြင့်ဖိကာ နာကျင်ဟန်ဖြင့် မျက်နှာရှုံ့မဲ့လိုက်သည်။ "ဆရာ... ဒါက ဒီလိုလား။ အသစ်တွေ့တော့ အဟောင်းကို ပစ်လိုက်ပြီပေါ့လေ"

"ဘာအဟောင်း ဘာအသစ်လဲ။ ငါက အမှန်အတိုင်း ပြောပြနေတာ"

အကြီးအကဲဂူက ဂရုမစိုက်ဟန်ဖြင့် လက်ယမ်းပြလိုက်သည်။

"မင်းက ပျင်းရိပြီး ပါရမီမရှိတဲ့သူလို့ အခေါ်မခံချင်ရင် ကျင့်စဉ်စာအုပ်တစ်အုပ်ကို ကောက်ကိုင်ပြီး တစ်ခါလောက်ဖြစ်ဖြစ် ကြိုးစားကျင့်ကြံကြည့်စမ်းပါ။ ကဲ... ငါသွားပြီ။ မင်းတို့နှစ်ယောက် အချင်းချင်း သေသေချာချာ မိတ်ဆက်ထားကြဦး"

စကားဆုံးသည်နှင့် အကြီးအကဲသည် လေထဲသို့ ပျံတက်ကာ ထွက်ခွာသွားပြီး သူတို့နှစ်ဦးတည်းသာ ကျန်ရစ်ခဲ့တော့သည်။

လီယောင်းသည် သူမ၏ စီနီယာအစ်ကိုသစ်ကို စူးစမ်းသော အကြည့်ဖြင့် စိုက်ကြည့်နေမိသည်။ သူမသည် သူငယ်ချင်းမလိုအပ်ကြောင်းနှင့် အထူးသဖြင့် သူမရှေ့ရှိ ဤသနားစရာကောင်းသော ကောင်လေးမျိုးကို ပို၍ပင် အလိုမရှိကြောင်း ပြတ်ပြတ်သားသား တွေးလိုက်သည်။ တစ်ချက်ကြည့်ရုံဖြင့် သူသည် ကျင့်ကြံနိုင်စွမ်း လုံးဝမရှိကြောင်း သူမ သိနိုင်သည်။ ဤအရွယ်အထိ မကျင့်ကြံနိုင်ခြင်းမှာ အမှန်တကယ်ပင် သနားစရာကောင်းလှသည်။

ထိုသို့ အထင်သေးသော အတွေးများ သူမခေါင်းထဲတွင် လည်ပတ်နေစဉ် ရှန်းယွီက သူမရှိရာသို့ လမ်းလျှောက်လာသည်။

'သူ ဘာလုပ်ချင်တာလဲ'

လီယောင်း သိချင်နေမိသည်။ သူမက ဒေါသနှင့် မုန်းတီးမှုအပြည့်ဖြင့် စိုက်ကြည့်နေသော်လည်း သူကတော့ သူမ၏ ရန်လိုသော အမူအရာကို လုံးဝ ဂရုမစိုက်ပုံရသည်။ သူသည် သူမ၏ ရှေ့တည့်တည့်သို့ ရောက်သည်အထိ တိုးကပ်လာပြီး သူ၏မျက်လုံးများကို ကြည့်ရန် သူမ ခေါင်းကို အနည်းငယ် မော့လိုက်ရသည်။

"ဟိုင်း"

သူက ညင်သာစွာ ပြောလိုက်သည်။

"ငါ့နာမည်က ရှန်းယွီ။ ယွီဆိုတာက ငှက်မွေးဆိုတဲ့ စာလုံးနဲ့ အတူတူပဲ"

[ပြီးသွားပြီ]

ဧကရီ၏ အသံသည် လီယောင်း၏ မှတ်ဉာဏ်များကြားမှ ရုတ်တရက် ထိုးဖောက်ထွက်ပေါ်လာသည်။

လီယောင်းသည် မျက်လုံးများကို ချက်ချင်းဖွင့်လိုက်ရာ ကျယ်ပြောလှသော တောင်တန်းကြီးဆီသို့ ပြန်လည်ရောက်ရှိနေသည်ကို တွေ့လိုက်ရသည်။ သူမ၏ ဉာဏ်အလင်းပွင့်မှုသည် နောက်ဆုံးတွင် မသေမျိုးအဆင့်သို့ အခြေကျသွားပြီဖြစ်ရာ အသိအမြင်များ အရှိန်အဟုန်ဖြင့် စီးဝင်လာမှုကို ခံစားလိုက်ရသည်။

"ကျွန်မ အခြေတည်ဝိညာဉ်အဆင့်ရဲ့ အထွတ်အထိပ်ကိုလည်း ချိုးဖျက်နိုင်ခဲ့ပြီ"

သူမသည် အသက်ကို မှန်မှန်ရှူသွင်းလိုက်ပြီး "အခု ကျွန်မ ဝိညာဉ်ဖြစ်တည်မှုအဆင့်ကို စတင်ကြိုးစားတော့မယ်"

[နေဦး...]

ဧကရီက တုံ့ဆိုင်းစွာဖြင့် လှမ်းပြောလိုက်သည်။

"ရပါတယ် ကျွန်မ နားလည်တယ်"

လီယောင်းက ပြန်ဖြေသည်။

"ဘယ်လို စိတ်အနှောင့်အယှက်ဖြစ်စေမယ့် အမှောင်စွမ်းအားမျိုးကိုမဆို ကျွန်မ အရှုံးပေးမှာ မဟုတ်ဘူး"

လီယောင်းသည် ဆက်လက်မဆိုင်းမတွဘဲ သူမ၏ ဝိညာဉ်စွမ်းအားများကို စတင်လှုံ့ဆော်လိုက်တော့သည်။

ချက်ချင်းဆိုသလိုပင် ပတ်ဝန်းကျင်တစ်ခုလုံး၌ လျှပ်စီးတန်းများ တဖြဖြဖြတ်သန်းသွားပြီး ကျောက်ဆောင်တောင်တန်းများပေါ်တွင် ကခုန်နေကြသည်။ ကောင်းကင်ယံ၌လည်း အရပ်မျက်နှာအနှံ့မှ မည်းမှောင်သော တိမ်တိုက်ကြီးများ စုဝေးလာကြပြီး လီယောင်းရှိရာ အပေါ်တည့်တည့်တွင် ကြောက်မက်ဖွယ်ကောင်းသော မိုးကြိုးတိမ်တိုက်ကြီးတစ်ခု ဖြစ်ပေါ်လာသည်။

မိုင်ပေါင်းများစွာ အကွာအဝေးအတွင်း ရိုင်းစိုင်းသော မိုးကြိုးတောက်များက မြေပြင်သို့ အဆက်မပြတ် ပစ်ချနေပြီး ထိမှန်သမျှ အရာအားလုံးကို မီးလောင်ကျွမ်းကာ ပျက်စီးသွားစေသည်။

လီယောင်းသည် သူမ၏ ဝိညာဉ်ပင်လယ်အတွင်းရှိ ချီများကို ပို၍မြှင့်တင်လိုက်ရာ ပတ်ဝန်းကျင်ရှိ လျှပ်စစ်စွမ်းအင်များမှာ ပိုမိုလှုပ်ရှားကာ မတည်မငြိမ် ဖြစ်လာတော့သည်။ တိမ်တိုက်များအတွင်း၌လည်း စွမ်းအင်များမှာ မထိန်းထားနိုင်လောက်အောင် သိပ်သည်းလာသည်။

တောင်တန်းတစ်ခုလုံးကို တုန်ခါသွားစေသော ဟိန်းဟောက်သံနှင့်အတူ စုစည်းနေသော မိုးကြိုးစွမ်းအင်များသည် ဧရာမလျှပ်စီးတန်းကြီးအဖြစ် ကောင်းကင်မှ ဆင်းသက်လာကာ လီယောင်းထံသို့ တည့်တည့်မတ်မတ် ဦးတည်သွားတော့သည်။

ဘေးဒုက္ခသည် တရားဝင် စတင်ခဲ့ပြီဖြစ်သည်။

အခြားတစ်ဖက်တွင်မူ ရှန်းယွီသည် မျှော်စင်မှ ရရှိထားသော သွေးမျိုးဆက်အားလုံးကို သူ၏ ကောင်းကင်ဘုံအဆင့် ဆန်းစစ်ခြင်းစွမ်းရည်ဖြင့် အသေအချာ စစ်ဆေးပြီးနောက် သူ၏ အမှုန်ခွဲခြင်းနှင့် ပေါင်းစပ်ခြင်းအစီအစဉ်အတွက် အသုံးဝင်ဆုံးဖြစ်မည့် စာရင်းကို ပြုစုလိုက်သည်။

ဒဏ္ဍာရီအဆင့်သွေးမျိုးဆက်များထဲမှ သူ၏ မူလသွေးမျိုးဆက်များနှင့် အကိုက်ညီဆုံး သုံးမျိုးကို သူရွေးချယ်လိုက်သည်။ အရိပ်ကျား၊ ရွှေလိပ်နှင့် မုန်တိုင်းလင်းယုန်တို့ပင်။

အရိပ်ကျား၏ သဘာဝအတိုင်း ပုန်းကွယ်နိုင်စွမ်းမှာ သူ၏ ဖီးနစ်သွေးမျိုးဆက်နှင့် ပေါင်းစပ်ရန် အကောင်းဆုံးဖြစ်လိမ့်မည်ဟု သူယူဆသည်။

ရွှေလိပ်၏ အလွန်အမင်း မြင့်မားသော ခံစစ်စွမ်းရည်နှင့် ခန္ဓာကိုယ်ပတ်လည်တွင် ချီအကာအကွယ်များကို ချက်ချင်းဖန်တီးနိုင်စွမ်းကို သူစိတ်ဝင်စားသည်။ ဤစွမ်းရည်များသည် သူ၏ နဂါးသွေးမျိုးဆက် နှင့် တစ်သားတည်း ဖြစ်သွားလိမ့်မည်ပင်။

ရှန်းယွီသည် ဤသွေးမျိုးဆက်သစ်များမှ အကောင်းဆုံး ဝိသေသလက္ခဏာများကို ခွဲထုတ်ကာ သူ၏အင်အားကို နောက်တစ်ဆင့်သို့ မြှင့်တင်ရန် ပြင်ဆင်လိုက်သည်။

ရှန်းယွီသည် တစ်ချက်ကြည့်ရုံဖြင့် ဆင်တူသည်ဟု ထင်ရသော စွမ်းရည်များကိုပင် သေချာစွာ ခွဲခြမ်းစိတ်ဖြာသည်။ ၎င်းတို့သည် အလုပ်လုပ်ပုံချင်း မတူညီကြသဖြင့် ပေါင်းစပ်လိုက်ပါက တစ်ခုနှင့်တစ်ခု အားဖြည့်ပေးမည်မှာ သေချာသည်။

မုန်တိုင်းလင်းယုန်ထံမှမူ သူသည် ထက်မြက်သော အမြင်အာရုံ၊ ပိုမိုမြန်ဆန်သော ပျံသန်းမှုနှုန်းနှင့် လေထဲတွင် ကျွမ်းကျင်စွာ လှုပ်ရှားနိုင်စွမ်းတို့ကို ရွေးချယ်ခဲ့သည်။ ဤအရာများသည် သူ၏ ဖီးနစ်သွေးမျိုးဆက်နှင့် အလွန်ကိုက်ညီလှသည်။

သတိပြုရမည့်အချက်မှာ သွေးမျိုးဆက်စွမ်းရည်များသည် သင်ယူထားသော နည်းစနစ်များနှင့် အလွန်ကွာခြားသည်။ လေ့ကျင့်ယူရသော ပြင်ပကျွမ်းကျင်မှုများ မဟုတ်ဘဲ တစ်ဦးတစ်

ယောက်၏ တည်ရှိမှုအတွင်း၌ပင် ပေါင်းစပ်ပါဝင်နေသည့် ပင်ကိုယ်စွမ်းရည်များပင်။

ဤစွမ်းရည်များကို သူ၏ မူလသွေးမျိုးဆက်များအတွင်းသို့ အောင်မြင်စွာ ပေါင်းစပ်နိုင်ပါက ၎င်းတို့သည် လက်ခံရရှိသော သွေးမျိုးဆက်၏ အင်အားအဆင့်နှင့်အညီ အလိုအလျောက် ညှိနှိုင်းပြောင်းလဲသွားမည်ဖြစ်သည်။ ရှန်းယွီ၏ ခန့်မှန်းချက်အရ စနစ်ကို ပြန်လည်သတ်မှတ်ပြီးချိန်တွင် ဤညှိနှိုင်းမှုများမှာ ပိုမိုပြီးပြည့်စုံသွားပေလိမ့်မည်။ အထူးသဖြင့် သူ၏ သွေးမျိုးဆက်များသည် မြင့်မြတ်သောသွေးအဆင့်သို့ ချိုးဖျက်ရန် အဆင်သင့် ဖြစ်နေသောကြောင့်ပင်။

ဆက်လက်၍ သူသည် မြင့်မြတ်သောအဆင့်ရှိ သွေးမျိုးဆက် ၄ ခုမှ အသုံးဝင်ဆုံး စွမ်းရည်များကို ရွေးချယ်ခဲ့သည်။

နှင်းဝံပုလွေသည် မီးအခြေခံဖြစ်သော ဖီးနစ်နှင့် မကိုက်ညီဟု ထင်ရသော်လည်း သူသည် သွေးမျိုးဆက်တစ်ခုလုံးကို ယူခြင်းမဟုတ်ဘဲ အအေးဒဏ်ခံနိုင်စွမ်းကိုသာ ခွဲထုတ်ယူခြင်းဖြစ်သည်။ ၎င်းက ဖီးနစ်၏ ကြံ့ခိုင်မှုကို ပိုမိုအားကောင်းစေမည်ပင်။

ကျောက်သားဝက်ဝံ၏ သဘာဝမှာ သံချပ်ကာနည်းစနစ်၊ ရုပ်ပိုင်းဆိုင်ရာ ခွန်အားနှင့် ခံနိုင်ရည်တို့ကို နဂါးသွေးမျိုးဆက် အတွက် ရွေးချယ်သည်။ ဝက်ဝံ၏ ထူးခြားသော ကုသနိုင်စွမ်းကိုမူ ဖီးနစ် ဘက်သို့ ပေးခဲ့သည်။ စနစ်၏ အမှုန်ခွဲခြင်းစွမ်းရည်ကြောင့် ဆောင်းခိုခြင်းဟူသော ကန့်သတ်ချက်ကို ဖယ်ရှားပြီး သီးသန့် ကုသနိုင်စွမ်းအဖြစ် ပြောင်းလဲနိုင်ခဲ့သည်။

လျင်မြန်သောသမင်သည် ထူးကဲသော အရှိန်နှင့် ဖျတ်လတ်မှုကို နဂါးအတွက်ယူပြီး လှုပ်ရှားမှုများတွင် ချီသုံးစွဲမှု လျှော့ချပေးနိုင်စွမ်းကို ဖီးနစ်အတွက် သတ်မှတ်လိုက်သည်။

ဖန်သားမျောက်ဝံသည်။ မြင့်မားသော ဉာဏ်ရည်နှင့် သင်ယူမှုအရှိန်ကို ဖီးနစ်အတွက်

လည်းကောင်း ပင်ကိုယ် ကိရိယာသွန်းလုပ်နိုင်စွမ်းနှင့် ရတနာများကို အာရုံခံနိုင်စွမ်းကို နဂါးအတွက်လည်းကောင်း ခွဲဝေပေးခဲ့သည်။

ရှန်းယွီသည် ဤသွန်းလုပ်ခြင်းနှင့် ရတနာရှာဖွေခြင်း စွမ်းရည်များက သူ၏ အခြားအသက်မွေးဝမ်းကြောင်းများအပေါ်တွင် အကျိုးသက်ရောက်မှု ရှိမရှိကို အလွန်စိတ်ဝင်စားနေမိသည်။

နိမ့်ကျသော အဆင့်ရှိ သွေးမျိုးဆက်များထံမှလည်း လိုအပ်ချက်များကို ဖြည့်ဆည်းပေးမည့် အသေးစားစွမ်းရည်များကို သူ ရွေးချယ်ခဲ့သည်။ အရေးကြီးဆုံးအချက်မှာ သူ၏ ပင်မသွေးမျိုးဆက်နှစ်ခုအကြား အင်အားညီမျှမှုကို ထိန်းသိမ်းရန်ဖြစ်သည်။ တစ်ဖက်ဖက်က အင်အားသာလွန်သွားပါက ဖြစ်ပေါ်လာမည့် ပြဿနာများကို သူ မလိုလားပေ။

သူအလိုရှိသော စွမ်းရည်များကို အဆင့်ပေါင်းစုံမှ ရွေးချယ်ပြီးသွားသောအခါ ရှန်းယွီသည် အသက်ကို ပြင်းပြင်းရှူသွင်းကာ ပေါင်းစပ်ခြင်းလုပ်ငန်းစဉ်ကို စတင်ရန် ပြင်ဆင်လိုက်တော့သည်။