သခင်မ မက်မွန်ပွင့်က အိမ်ထောင်သည်ယောက်ျားကို ကြိုက်နေတာလား၊ နွားအိုက မြက်နုစားချင်နေတာပဲ(၂)။

"ဒါက မဖြစ်နိုင်တာတော့ မဟုတ်ဘူး..."

"ဒါပေမဲ့ ငါတို့က ရှေးဟောင်းမိစ္ဆာကမ္ဘာအကြောင်း သိပ်နားမလည်ဘူး... ဇွတ်တရွတ် ဝင်တိုက်ရင် မခန့်မှန်းနိုင်တဲ့ အန္တရာယ်တွေ ကြုံရနိုင်တယ်... ဒါပေမဲ့ တချို့လူတွေက ရှေးဟောင်းမိစ္ဆာကမ္ဘာထဲ ဝင်တိုက်ဖို့ ကြံစည်နေတာမျိုးလည်း ရှိကောင်းရှိနိုင်ပါတယ်..."

"ကံမကောင်းတာက ငါသိသလောက်တော့ ရှေးဟောင်းမိစ္ဆာကမ္ဘာက ငါတို့ ကျင့်ကြံခြင်းလောကထက် တကယ်ပဲ ပိုပြီး စွမ်းအားကြီးတယ်... အရေးကြီးတဲ့ အကြောင်းပြချက်တစ်ခုကတော့ အဲဒီက မိစ္ဆာမျိုးနွယ်စု ကျင့်ကြံသူတွေရဲ့ သက်တမ်းက ငါတို့ထက် ပိုရှည်လျားတာပဲ..."

"ငါတို့ လူသား နတ်ဘုရားအသွင်ပြောင်းအဆင့် ကျင့်ကြံသူတွေက အနှစ်သုံးထောင်လောက်ပဲ နေနိုင်ကြတာ... ဒါပေမဲ့ ပဉ္စမအဆင့် မိစ္ဆာမျိုးနွယ်စု ကျင့်ကြံသူတွေကတော့ နှစ်တစ်သောင်းကျော် အသက်ရှင်နိုင်ကြတယ်..."

"သူတို့ရဲ့ တစ်ဦးချင်း တိုက်ခိုက်ရေးစွမ်းရည်က ငါတို့ထက် ပိုသန်မာတယ်လို့ ပြောတာ မဟုတ်ဘူး... အသက်ရှင်တဲ့အချိန် ပိုကြာမြင့်တာကြောင့် ကမ္ဘာလောကထဲမှာ ကျန်ရစ်နေတဲ့ နတ်ဘုရားအသွင်ပြောင်းအဆင့် ကျင့်ကြံသူ ပိုများနေတာ..."

"ပြီးခဲ့တဲ့တစ်ခေါက် ကျင့်ကြံခြင်းလောကနဲ့ ရှေးဟောင်းမိစ္ဆာကမ္ဘာ ပေါင်းစည်းတုန်းကဆိုရင် ပဉ္စမအဆင့် မိစ္ဆာမျိုးနွယ်စု ကျင့်ကြံသူအများအပြား ဝင်ရောက်တိုက်ခိုက်ခဲ့ကြတယ်လို့ ဆိုကြတယ်... အစီအရင်စွမ်းအားကို အသုံးမချခဲ့ရင် ရှေးဟောင်းမိစ္ဆာကမ္ဘာရဲ့ ကျူးကျော်မှုကို ခုခံနိုင်ခဲ့မှာ မဟုတ်လောက်ဘူး..."

သခင်မ မက်မွန်ပွင့်က လေးနက်စွာ ပြောလိုက်သည်။ အကယ်၍ ရှေးဟောင်းမိစ္ဆာကမ္ဘာ၏ အင်အား နည်းပါးပါက ကျင့်ကြံခြင်းလောကသည် သဘာဝကျကျ အခွင့်အရေးယူပြီး ကျူးကျော်ကာ အရင်းအမြစ်များကို လုယူကြပေလိမ့်မည်။

ဝမ်းနည်းစရာမှာ ရှေးဟောင်းမိစ္ဆာကမ္ဘာ၏ အင်အားသည် ကြီးမားလွန်းလှသည်။ မျိုးဆက်ပြတ်လပ်နေသော လူသားကျင့်ကြံခြင်းလောက ယှဉ်ပြိုင်နိုင်သည်ထက် များစွာ ကျော်လွန်နေသည်။ ရှေးဟောင်းခေတ်က နတ်ဘုရားအသွင်ပြောင်းအဆင့် မိစ္ဆာသားရဲအချို့ပင် ယခုအချိန်ထိ အသက်ရှင်ကျန်ရစ်နေနိုင်ပြီး ရှေးဟောင်းမိစ္ဆာကမ္ဘာ၏ တစ်နေရာရာတွင် ပုန်းအောင်းနေနိုင်သည်။ ဤအရာများသည် ရှေးဟောင်းမိစ္ဆာကမ္ဘာ၏ ရှေးဟောင်းတည်ရှိမှုများ ဖြစ်ကြသည်။

"ဒီလိုဆိုရင် ရှေးဟောင်းမိစ္ဆာကမ္ဘာရဲ့ ခြိမ်းခြောက်မှုက တကယ်ပဲ ကြီးမားတာပေါ့..."

ချူတျဲယီလည်း ဤအချက်ကို ဝန်ခံလိုက်ရသည်။ ရှေးဟောင်းမိစ္ဆာကမ္ဘာမှ နတ်ဘုရားအသွင်ပြောင်းအဆင့် ဘိုးဘေးတစ်ခုတည်းကပင် ချန်လန်ပင်လယ်ဒေသ ကျင့်ကြံခြင်းလောက ယှဉ်ပြိုင်နိုင်သည် မဟုတ်ချေ။ ရှေးဟောင်းမိစ္ဆာကမ္ဘာမှ မိစ္ဆာကျင့်ကြံသူများ တက်ကြွစွာ ကျူးကျော်လာခြင်းမှာ အံ့သြစရာ မဟုတ်တော့ပေ။

"ဒီလိုဆိုရင် ဝူကျိမဟာမိတ်အဖွဲ့၊ ကောင်းကင်ဓားဂိုဏ်း၊ မြူနှင်းနန်းတော် စတဲ့ ဝိညာဉ်သန္ဓေသား အင်အားစုတွေက ဘယ်လို စီစဉ်ထားလဲ မသိဘူး..."

ကျိုးစွေ့ စူးစမ်းလိုစိတ်ဖြင့် မေးလိုက်သည်။ ဝူကျိမဟာမိတ်အဖွဲ့၏ နောက်ထပ် အစီအစဉ်ကို သူ သိလိုသည်။

သူသည်လည်း ဝိညာဉ်သန္ဓေသား ကျင့်ကြံသူဖြစ်သော်လည်း၊ ချန်လန်ပင်လယ်ဒေသ၏ စစ်မှန်သော ကျောထောက်နောက်ခံမှာ ဤဝိညာဉ်သန္ဓေသား အင်အားစုများသာ ဖြစ်သည်။ မိမိသည် ပုစွန်ဆိတ်ကလေးတစ်ကောင်သာ ဖြစ်သေးသည်။ အစစ်အမှန်စစ်ပွဲကြီး ဖြစ်လာလျှင်လည်း မိမိ အရှေ့ထွက်ရမည့်အလှည့် ရောက်ဦးမည်မဟုတ်ပေ။

"ဒီကိစ္စကတော့... လောလောဆယ် ဆွေးနွေးရဦးမယ်... တိကျတဲ့ အစီအစဉ် ချမှတ်ထားတာ မရှိသေးဘူး..."

"အခု ရှင်လည်း ဝိညာဉ်သန္ဓေသား ကျင့်ကြံသူ ဖြစ်နေပြီ၊ ဝူကျိမဟာမိတ်အဖွဲ့ရဲ့ အကြီးအကဲ ဖြစ်နေပြီ... ဒီတစ်ခေါက် ဝူကျိမဟာမိတ်အဖွဲ့ရဲ့ အစည်းအဝေးကို ရှင်လည်း တက်ရောက်ရလိမ့်မယ်..."

သခင်မ မက်မွန်ပွင့်သည် ကျိုးစွေ့ကို တောက်ပသော မျက်လုံးများဖြင့် ကြည့်လိုက်ပြီး ထူးဆန်းသော အရိပ်အယောင်များ ပေါ်နေလေသည်။

"ဝူကျိမဟာမိတ်အဖွဲ့ရဲ့ အစည်းအဝေးကို တက်ရောက်ရမယ် ဟုတ်လား... လုံးဝ ပြဿနာ မရှိပါဘူး..."

ကျိုးစွေ့ ခေါင်းညိတ်လိုက်သည်။ အမှန်အတိုင်း ဆိုရလျှင် သူသည်လည်း ဝူကျိမဟာမိတ်အဖွဲ့မှ ဝိညာဉ်သန္ဓေသား ကျင့်ကြံသူအများအပြားနှင့် သိကျွမ်းလိုသည်။

ယခုအခါ သူသည်လည်း ဤဝိညာဉ်သန္ဓေသား ကျင့်ကြံသူများနှင့် တန်းတူရည်တူ ဖြစ်နေပြီဖြစ်ပြီး၊ ချန်လန်ပင်လယ်ဒေသ၏ စစ်တုရင်ကစားသမားတစ်ဦးဟု ဆိုနိုင်ပြီ ဖြစ်သည်။ ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူပင်လျှင် သူ့ကို အထင်သေးရဲမည်မဟုတ်ပေ။

မှန်ပေသည်၊ ထိုသို့ဖြစ်လင့်ကစား သူသည် ကိုယ်ခန္ဓာအစစ်ဖြင့် သွားရောက်ရန် အစီအစဉ် မရှိပေ၊ ကိုယ်ပွားတစ်ခု လွှတ်လိုက်လျှင် လုံလောက်ပြီ ဖြစ်သည်။ အစည်းအဝေး တက်ရောက်နေစဉ် မတော်တဆမှုများ ဖြစ်လာမည်ကို စိုးရိမ်ရသည်။

မည်သည့်ကိစ္စကို လုပ်ဆောင်သည်ဖြစ်စေ ခြေလှမ်းတစ်လှမ်း မလှမ်းမီ သုံးလှမ်းကြိုတွေးရပေမည်၊ အခြေအနေအရပ်ရပ်အား ကြိုတွက်ထားသင့်သည်၊ မိုးမရွာမီ ထီးပြင်ထားရမည် မဟုတ်ပါလော။

…………

တစ်ရက်ကြာပြီးနောက်...။

ကျိုးစွေ့၊ သခင်မ မက်မွန်ပွင့်နှင့် လင်းယာကျူတို့ သုံးဦးသည် သစ်သားကြယ်ကျွန်းရှိ တည်နေရာရွှေ့ပြောင်းအစီအရင်မှတစ်ဆင့် ဝူကျိကျွန်းသို့ တိုက်ရိုက် ရောက်ရှိလာကြသည်။ ချူတျဲယီကမူ သဘာဝကျကျ အင်မော်တယ်ရှားတောင်ထွတ်တွင် ကျန်ရစ်ခဲ့သည်။

မည်သို့ပင်ဖြစ်စေ သူမသည် ကောင်းကင်မိစ္ဆာဂိုဏ်းမှ ဝိညာဉ်သန္ဓေသား အကြီးအကဲဖြစ်ရာ၊ ဝူကျိမဟာမိတ်အဖွဲ့မှ လူများရှေ့တွင် ထွက်ပေါ်လာရန် မသင့်တော်ပေ။

ယခုအချိန်တွင် ကျိုးစွေ့နှင့် အခြားသူများမှလွဲ၍ မည်သူမျှ ချူတျဲယီ၏ စစ်မှန်သော ဇာစ်မြစ်နှင် အင်အားကို မသိရှိကြပေ။ အင်မော်တယ်ရှားဂိုဏ်းမှ ကျင့်ကြံသူများကလည်း ချူတျဲယီသည် ကျိုးစွေ့၏ တာအိုလက်တွဲဖော်ဖြစ်သည်ဟုသာ သိထားကြသည်။

"ဝူကျိကျွန်းလား..."

မကြာမီအချိန်အတွင်း ကမ္ဘာမြေကြီး ချာချာလည်သွားသကဲ့သို့ ခံစားလိုက်ရပြီး၊ ကျိုးစွေ့သည် ကြီးမားသော မြေကွက်လပ်ကြီးတစ်ခုသို့ ရောက်ရှိနေသည်ကို တွေ့လိုက်ရကာ၊ ပတ်ဝန်းကျင်၌ သိပ်သည်းလွန်းလှသော သဘာဝဝိညာဉ်စွမ်းအင်များ ဖုံးလွှမ်းနေလေသည်။ ထင်ရှားသည်မှာ သူသည် ဝူကျိကျွန်းသို့ ရောက်ရှိနေပြီ ဖြစ်သည်။

အမှန်အတိုင်း ဆိုရလျှင် ယခုတစ်ကြိမ် ဝူကျိကျွန်းသို့ ရောက်ရှိလာသော ခံစားချက်သည် အလွန် ကွာခြားလှ၏။

ယခင်က သူသည် သာမန် အခြေတည်အဆင့် ကျင့်ကြံသူတစ်ဦးသာဖြစ်ပြီး၊ ဝူကျိကျွန်းသို့ ရောက်ရှိလာသောအခါ ဤနေရာသည် ကြီးမားခမ်းနားသော နေရာကြီးဖြစ်ပြီး၊ ဤပင်လယ်ပြင်ဒေသကို ကန့်လန့်ဖြတ် စိုးမိုးထားသော မဟာအရှင်သခင် ဖြစ်ကြောင်း ခံစားခဲ့ရကာ မည်သူမျှ ယှဉ်ပြိုင်နိုင်စွမ်း မရှိဟု ထင်ခဲ့ရသည်။ သို့သော် ယခုအခါတွင်မူ သူသည် ဝူကျိမဟာမိတ်အဖွဲ့၏ အကြီးအကဲတစ်ဦး ဖြစ်လာခဲ့ပြီ ဖြစ်သည်။

ဝူကျိမဟာမိတ်အဖွဲ့တစ်ခုလုံးတွင် ဝိညာဉ်သန္ဓေသား ကျင့်ကြံသူ အယောက်သုံးဆယ်ကျော်သာ ရှိကြောင်း သိထားရပေမည်။ သူသည် ထိုအထဲမှ တစ်ယောက် ဖြစ်သည်။

ဆိုလိုသည်မှာ သူသည် ဤပင်လယ်ပြင်ဒေသရှိ မရေမတွက်နိုင်သောကျင့်ကြံသူများ၏ ထိပ်ဆုံးတွင် ရပ်တည်နေသော အကြီးကဲတစ်ဦး၊ ဘိုးဘေးအဆင့် တည်ရှိမှုတစ်ခု ဖြစ်လာခဲ့ပြီ ဖြစ်သည်။

"အကြီးအကဲကျိုး၊ အကြီးအကဲလင်း၊ အကြီးအကဲမက်မွန်ပွင့်... ဝူကျိကျွန်းကနေ ကြိုဆိုပါတယ်... ဂိုဏ်းချုပ်က ဝူကျိနန်းတော်မှာ စောင့်နေတာ ကြာပါပြီ..."

ဤအချိန်တွင် ရွှေအမြုတေ တာဝန်ခံအချို့ လျှောက်လာကြပြီး လေးလေးစားစား ဆက်ဆံကြသည်။ ထိုအထဲမှ ရွှေအမြုတေ တာဝန်ခံတစ်ဦးမှာ ဖန်ဟောင် ဖြစ်သည်။ ဤသူသည် ယခင်က ကျိုးစွေ့နှင့် အခြားသူများ ဝူကျိမဟာမိတ်အဖွဲ့သို့ ဝင်ရောက်လာစဉ်က ကြိုဆိုခဲ့သော ရွှေအမြုတေ တာဝန်ခံများထဲမှ တစ်ဦး ဖြစ်သည်။

သို့သော် လွန်ခဲ့သော ဆယ်စုနှစ်များက သူသည် ရွှေအမြုတေ နှောင်းပိုင်းအဆင့်ဖြစ်ပြီး၊ ယခုလည်း ရွှေအမြုတေ နှောင်းပိုင်းအဆင့်ပင် ဖြစ်သည်။ ကျင့်ကြံခြင်းအဆင့်မှာ အခြေခံအားဖြင့် ပြောင်းလဲခြင်း မရှိပေ။

မှန်ပေသည်၊ ရွှေအမြုတေ ကျင့်ကြံသူများအတွက် ဤသည်မှာ အလွန် ပုံမှန်ကိစ္စ ဖြစ်သည်။ ဤအဆင့်အတားအဆီးတွင် ပိတ်မိနေပြီး နှစ်ရာချီကြာအောင် အပြောင်းအလဲ မရှိခြင်းသည်လည်း တွေ့နေကျ ကိစ္စပင်။

လက်တွေ့တွင် ကျိုးစွေ့၏ တိုးတက်မှုနှုန်းသည်သာ ပုံမှန်မဟုတ်ခြင်း ဖြစ်သည်။ ယုံနိုင်ဖွယ်ရာ မရှိလောက်အောင်ပင်။

"ရောင်းရင်းဖန်ပါလား... မတွေ့တာ ကြာပြီပဲ... နေကောင်းကျန်းမာရဲ့လား..."

ကျိုးစွေ့သည် ရွှေအမြုတေ တာဝန်ခံ ဖန်ဟောင်ကို ကြည့်ပြီး အနည်းငယ် ပြုံးလိုက်သည်။

"မ... မဟုတ်တာ... စီနီယာကျိုးက ကျွန်တော့်ကို အနေခက်အောင် လုပ်နေပါပြီ... ကျွန်တော်က စီနီယာကို ရောင်းရင်းလို့ ဘယ်ခေါ်ရဲပါ့မလဲ... ဖန်ဟောင်လို့ပဲ ခေါ်ပါ..."

ရွှေအမြုတေ တာဝန်ခံ ဖန်ဟောင်သည် ကြောက်ရွံ့ထိတ်လန့်စွာ ပြောလိုက်သည်။ သူ၏ရင်ထဲတွင် ခံစားချက်မျိုးစုံ ဖြစ်ပေါ်နေပြီး ဘာပြောရမှန်း မသိ ဖြစ်နေရသည်။

အမှန်အတိုင်း ဆိုရလျှင် ယခင်က ဤကောင်လေးကို သူ အထင်မကြီးခဲ့ပေ၊ ရွှေအမြုတေ အမျိုးသမီးကျင့်ကြံသူကို မှီခိုနေသော မျက်နှာချောလေးတစ်ယောက်သာဖြစ်သည်ဟု ထင်ခဲ့သည်။

သို့သော် မည်သူ ထင်မှတ်ထားပါမည်နည်း။

အရှေ့အရပ်သို့ ဆယ်နှစ်၊ အနောက်အရပ်သို့ ဆယ်နှစ် မြစ်ရေ စီးဆင်းသကဲ့သို့ ကံတရားဆိုသည်မှာ လှည့်ပတ်နေသည်။

ဤမျက်နှာချောလေးသည် ဆယ်စုနှစ်အနည်းငယ်သော အချိန်ကိုသာ အသုံးပြုပြီး အခြေတည်အဆင့်မှ တရိပ်ရိပ် တက်လှမ်းလာကာ ရွှေအမြုတေအဆင့်သာမက ဝိညာဉ်သန္ဓေသားအဆင့်သို့ပင် ရောက်ရှိသွားခဲ့သည်။

ရွှေအမြုတေ နှောင်းပိုင်းအဆင့်ဖြစ်သော သူ့ကို ချက်ချင်း ကျော်တက်သွားခဲ့သည်။ သူ့အနေဖြင့် ဤဘဝတွင် ဝိညာဉ်သန္ဓေသား ကျင့်ကြံသူ ဖြစ်လာရန် အခွင့်အရေး ရှိမရှိကိုပင် မသိနိုင်ပေ။

မျက်စိတစ်မှိတ်အတွင်း တစ်ဖက်လူသည် ဂျူနီယာအဆင့်မှ စီနီယာအဆင့်သို့ ပြောင်းလဲသွားခဲ့သည်။ ဤကဲ့သို့သော ခံစားချက်ကို မည်သို့ ဖော်ပြရမည်ကို သူ မသိတော့ချေ။

"ကိစ္စမရှိပါဘူး... အခေါ်အဝေါ်တစ်ခုပဲလေ..."

"ဒီနေ့ အစည်းအဝေး တက်ရမှာမို့ ရောင်းရင်းဖန်နဲ့ စကားမပြောနိုင်တော့ဘူး... နောက်မှ အခွင့်ကြုံရင် ကြယ်သုံးပွင့်ကျွန်းစုကို လာလည်ပါ..."

ကျိုးစွေ့ ပြုံးလိုက်သည်။

"ဟုတ်ကဲ့ပါ... ဟုတ်ကဲ့ပါ..."

ရွှေအမြုတေ တာဝန်ခံ ဖန်ဟောင်သည် သဘာဝကျကျ ငြင်းဆန်ရဲခြင်း မရှိဘဲ ခေါင်းတငြိမ့်ငြိမ့်ဖြင့် ပြန်ဖြေလိုက်သည်။

"သွားကြစို့... အစည်းအဝေး စတော့မယ်..."

သခင်မ မက်မွန်ပွင့်က တိုက်တွန်းလိုက်သည်။

"အင်း..."

ကျိုးစွေ့ ခေါင်းညိတ်လိုက်သည်။ မကြာမီ သုံးဦးသား၏ ခန္ဓာကိုယ်များ ရိပ်ခနဲဖြစ်သွားပြီး အဝေးရှိ တောင်ထွတ်တစ်ခုဆီသို့ ပျံသန်းသွားကြသည်။

ထိုတောင်ထွတ်သည် ဝူကျိကျွန်း၏ အမြင့်ဆုံးတောင်ထွတ်ဖြစ်ပြီး ဝူကျိတောင်ထွတ်ဟု အမည်ရသည်။ တောင်ထိပ်ပေါ်တွင် ကြီးမားခမ်းနားသော နန်းတော်ကြီးတစ်ခု တည်ဆောက်ထားသည်၊ ၎င်းမှာ ဝူကျိနန်းတော် ဖြစ်သည်။

နေရာတိုင်းတွင် မျှော်စင်များ၊ တံတားငယ်များနှင့် ရေစီးကြောင်းများ ရှိနေသည်။ ဤနေရာသည် ဝူကျိမဟာမိတ်အဖွဲ့တစ်ခုလုံး၏ အချက်အချာကျသော အစည်းအဝေးခန်းမ ဖြစ်သည်။ ဝူကျိမဟာမိတ်အဖွဲ့တွင် ကိစ္စကြီးကြီးမားမား ဖြစ်ပေါ်လာတိုင်း ဝိညာဉ်သန္ဓေသား ကျင့်ကြံသူအများအပြား ဝူကျိနန်းတော်တွင် စုဝေးလေ့ရှိကြသည်။

ဤအချိန်တွင် ဝိညာဉ်သန္ဓေသား ကျင့်ကြံသူအများအပြားသည်လည်း ဝူကျိနန်းတော် အတွင်းပိုင်းသို့ စောစီးစွာ ရောက်ရှိနေကြပြီဖြစ်ပြီး၊ သူတို့သည် ကြီးမားသော စားပွဲဝိုင်းကြီးတစ်ခု၏ ရှေ့တွင် ထိုင်နေကြသည်၊ ဤသည်မှာ စားပွဲထိုင်အစည်းအဝေး ဖြစ်သည်။

စားပွဲဝိုင်းအနီးတွင် ကြီးမားသော ကျောက်ကုလားထိုင်များ ရှိနေသည်။ ဝိညာဉ်သန္ဓေသား ကျင့်ကြံသူတစ်ဦးစီတိုင်း ဝင်ထိုင်လိုက်ကြသည်။ ကိုယ်ခန္ဓာပေါ်မှ သာမန်မဟုတ်သော အရှိန်အဝါများ ပျံ့လွင့်နေသည်။ ဝိညာဉ်သန္ဓေသား ဥပဒေသနယ်ပယ်များ အချင်းချင်း တိုက်မိနေသကဲ့သို့ပင် ရှိလေသည်။