သခင်မ မက်မွန်ပွင့်က အိမ်ထောင်သည်ယောက်ျားကို ကြိုက်နေတာလား၊ နွားအိုက မြက်နုစားချင်နေတာပဲ(၃)။

"ငါတို့ ဝူကျိမဟာမိတ်အဖွဲ့မှာ ဝိညာဉ်သန္ဓေသား အစောပိုင်းအဆင့် ကျင့်ကြံသူ အသစ်နှစ်ယောက် ပေါ်လာတယ်ဆိုတဲ့သတင်းက အမှန်ပဲလား..."

စကားပြောလိုက်သူမှာ ဝူကျိမဟာမိတ်အဖွဲ့၏ ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူလေးဦးထဲမှ တစ်ဦးဖြစ်သော ရွှမ်ချန်တာအိုအရှင် ဖြစ်သည်။ သူသည် ဝူကျိမဟာမိတ်အဖွဲ့၏ ဂိုဏ်းချုပ် ဝူကျိတာအိုအရှင်ကို စူးစမ်းလိုစိတ်ဖြင့် ကြည့်လိုက်သည်။

"မှန်တယ်... ဒီကိစ္စက တကယ်ပါ..."

"တစ်ယောက်က ကျိုးစွေ့လို့ ခေါ်ပြီး... နောက်တစ်ယောက်က လင်းယာကျူလို့ ခေါ်တယ်..."

"သူတို့က လွန်ခဲ့တဲ့ ဆယ်စုနှစ်တွေတုန်းက ငါတို့ ဝူကျိမဟာမိတ်အဖွဲ့ကို ဝင်ရောက်လာတဲ့ ကျင့်ကြံသူတွေပေါ့... မကြာသေးမီက သူတို့ ဝိညာဉ်သန္ဓေသား ဖွဲ့စည်းရာမှာ အောင်မြင်သွားကြလို့... ထုံးစံအတိုင်း ငါတို့ ဝူကျိမဟာမိတ်အဖွဲ့ရဲ့ အကြီးအကဲတွေ ဖြစ်လာကြတာပဲ..."

ဝူကျိတာအိုအရှင်က ခေါင်းညိတ်လိုက်သည်။

"ဝိညာဉ်သန္ဓေသား အမျိုးသမီးကျင့်ကြံသူ လင်းယာကျူကိုတော့ ထားလိုက်ပါတော့..."

"ဒါပေမဲ့ ကျိုးစွေ့ဆိုတဲ့ လူကတော့ သာမန် မဟုတ်ဘူး..."

"ငါတို့ ဝူကျိမဟာမိတ်အဖွဲ့ကို စရောက်တုန်းက အခြေတည်အဆင့် ကျင့်ကြံသူပဲ ရှိသေးတယ်လို့ ပြောကြတယ်... ဆယ်စုနှစ် အနည်းငယ်ဆိုတဲ့ အချိန်အတွင်းမှာ ရွှေအမြုတေ ဖွဲ့စည်းနိုင်ရုံတင် မကဘူး... ဝိညာဉ်သန္ဓေသားအဆင့်ကိုတောင်မှ တက်လှမ်းနိုင်ခဲ့တယ်..."

"လောလောဆယ် သူ့အသက်က တစ်ရာကျော်ပဲ ရှိသေးတယ်..."

ရွှီယွင်တာအိုအရှင်က လေသံအေးအေးဖြင့် ပြောလိုက်သည်။ သူသည်လည်း ဝူကျိမဟာမိတ်အဖွဲ့၏ ဝိညာဉ်သန္ဓေသား နှောင်းပိုင်းအဆင့် ကျင့်ကြံသူလေးဦးထဲမှ တစ်ဦးဖြစ်ပြီး၊ ဝူကျိမဟာမိတ်အဖွဲ့တွင် ဂုဏ်ကျက်သရေ ကြီးမားသူ ဖြစ်သည်။

"မဖြစ်နိုင်တာ... တကယ်ကြီးလား..."

"အသက်တစ်ရာနဲ့ ဝိညာဉ်သန္ဓေသား ဖွဲ့စည်းတာလား... လာနောက်နေတာလား... ဝိညာဉ်သန္ဓေသား ဂိုဏ်းကြီးတွေရဲ့ ပါရမီရှင်တွေတောင် ဒီလို မလုပ်နိုင်ဘူးလေ..."

"ဝိညာဉ်သန္ဓေသား ဂိုဏ်းတွေရဲ့ အမာခံတပည့်တွေ မလုပ်နိုင်ရုံတင် မကဘူး... ရှေးဟောင်းခေတ် နတ်ဘုရားအသွင်ပြောင်းအဆင့် ဂိုဏ်းတွေက နှစ်တစ်ထောင်မှ တစ်ယောက်ပေါ်တဲ့ မကောင်းဆိုးဝါးအဆင့် ပါရမီရှင်တွေတောင် ဒီလောက်ပဲ ရှိမှာ... အသက်တစ်ရာနဲ့ ဝိညာဉ်သန္ဓေသား ဖြစ်တယ်ဆိုတာ နတ်ဘုရားအသွင်ပြောင်းအဆင့် ပါရမီပဲ..."

"တကယ်လို့ ရှေးဟောင်းခေတ် ကျင့်ကြံခြင်းလောကမှာသာ ဆိုရင်... သေချာပေါက် နတ်ဘုရားအသွင်ပြောင်းအဆင့် ဖြစ်လာမှာ... ခုခေတ်မှာတော့ နတ်ဘုရားအသွင်ပြောင်းအဆင့် ဖြစ်လာမယ်လို့ အာမ မခံနိုင်ပေမယ့်... ဝိညာဉ်သန္ဓေသား နှောင်းပိုင်းအဆင့် ဖြစ်လာဖို့ကတော့ သေချာသလောက်ပဲ..."

"ဒီကျိုးစွေ့က ဘယ်ကလာတာလဲ..."

"သူတို့က ဝေးလံခေါင်သီတဲ့ ပင်လယ်ပြင်က လာတဲ့ ကျင့်ကြံသူတွေလို့ ဆိုကြတယ်... အင်မော်တယ်ရှားကျွန်းက လာတာတဲ့..."

"အင်မော်တယ်ရှားကျွန်း ဟုတ်လား... ငါ ဘယ်နားမှာ ကြားဖူးပါလိမ့်... အဲဒီကျွန်းက လွန်ခဲ့တဲ့ နှစ်ထောင်ပေါင်းများစွာတုန်းက စတုတ္ထအဆင့် ကျွန်းတစ်ကျွန်း ဖြစ်ခဲ့ပြီးတော့... ငါတို့ ဝူကျိမဟာမိတ်အဖွဲ့နဲ့လည်း ဆက်သွယ်မှု ရှိခဲ့ဖူးတယ်...

ဒါပေမဲ့ မိစ္ဆာကပ်ဘေးတစ်ခုကြောင့် စတုတ္ထအဆင့် ဝိညာဉ်သွေးကြော ပျက်စီးသွားပြီး... တည်နေရာရွှေ့ပြောင်းအစီအရင်လည်း ပျက်စီးသွားတယ်... အဲဒီနောက်ပိုင်း လုံးဝ ယိုယွင်းပျက်စီးသွားပြီး... ပြင်ပကမ္ဘာနဲ့ အဆက်အသွယ် ပြတ်သွားတာ... အဲဒီလို ကျွန်းမျိုးကနေ ဒီလို ပါရမီရှင်မျိုး ပေါ်ထွက်လာနိုင်တာလား..."

"ပြီးတော့ ဒီလူက ဝိညာဉ်သန္ဓေသား ဖွဲ့စည်းတုန်းက ငါတို့ ဝူကျိမဟာမိတ်အဖွဲ့ဆီမှာ ဝိညာဉ်သန္ဓေသားဆေးလုံးကို လာမလဲလှယ်ခဲ့ဘူး... ဆိုလိုတာက သူက ကိုယ့်အစွမ်းအစနဲ့ ဝိညာဉ်သန္ဓေသား ပစ္စည်းတွေကို ရှာဖွေပြီး... အောင်အောင်မြင်မြင် ဝိညာဉ်သန္ဓေသား ဖွဲ့စည်းနိုင်ခဲ့တာ... ကြည့်ရတာ သူရထားတဲ့ ကံကောင်းခြင်းအထောက်အပံ့က သာမန် မဟုတ်လောက်ဘူး..."

"ဟဟ... သာမန် မဟုတ်တာတော့ သေချာတာပေါ့... ဒါပေမဲ့ ဒီမှာရှိတဲ့ လူတွေထဲမှာ ဘယ်သူက သာမန် ကံကောင်းခြင်းလောက်နဲ့ ရပ်တည်နေလို့တုန်း... ကံတရား မကောင်းရင် ဝိညာဉ်သန္ဓေသား ကျင့်ကြံသူ ဖြစ်လာဖို့ဆိုတာ လုံးဝ မဖြစ်နိုင်ဘူး..."

ဝိညာဉ်သန္ဓေသား အကြီးအကဲအများအပြား ဆွေးနွေးငြင်းခုံနေကြပြီး အံ့သြမဆုံး ဖြစ်နေကြသည်။

ဝူကျိမဟာမိတ်အဖွဲ့တွင် ဝိညာဉ်သန္ဓေသား အသစ်နှစ်ယောက် ပေါ်လာသည်ကို သူတို့ ယခင်ကတည်းက သိထားကြသော်လည်း၊ ထိုအထဲမှ တစ်ယောက်သည် ဤမျှ ပါရမီထူးကဲပြီး အသက်တစ်ရာဖြင့် ဝိညာဉ်သန္ဓေသား ဖြစ်လာကာ နတ်ဘုရားအသွင်ပြောင်းအဆင့် ပါရမီ ရှိနေသည်ကို သူတို့ မသိခဲ့ကြပေ။

ကျိုးစွေ့၏ ခန္ဓာကိုယ်ပေါ်တွင် ကြီးမားသော ကံကောင်းခြင်းအထောက်အပံ့များ ရှိနေမည်မှာ သေချာကြောင်း သူတို့ သိကြ၏။ သို့မဟုတ်ပါက ဤမျှ ချောမွေ့စွာ ဝိညာဉ်သန္ဓေသား ဖွဲ့စည်းနိုင်မည် မဟုတ်ချေ။

သို့သော် ဘာများတတ်နိုင်ပါမည်နည်း။ ဝိညာဉ်သန္ဓေသား အစောပိုင်းအဆင့် ကျင့်ကြံသူတစ်ဦးအနေဖြင့် လုံလောက်သော ခြိမ်းခြောက်နိုင်စွမ်း ရှိနေပြီ ဖြစ်သည်။

အကယ်၍ ကလေးတစ်ယောက် ရွှေတုံးကို ကိုင်ထားပါက သဘာဝကျကျ သွားရည်ယိုစေပြီး လောဘစိတ်ကို ဖြစ်ပေါ်စေနိုင်သည်။ သို့သော် ရွှေတုံးကို ကိုင်ထားသူက ကျန်းဖေး၊ ကွမ်ယုကဲ့သို့သော စစ်သူကြီးများ ဖြစ်နေပါက အားလုံး နောက်ဆုတ်သွားကြပေလိမ့်မည်။ မည်သည့် အကြံအစည်မျှ ရှိရဲကြမည် မဟုတ်ချေ။ ယခုတွင်လည်း အလားတူပင် ဖြစ်သည်။

ကျိုးစွေ့၏ ခန္ဓာကိုယ်ပေါ်တွင် ကြီးမားသော ကံကောင်းခြင်းအထောက်အပံ့ ရှိကြောင်း သူတို့ သိကြသော်လည်း မည်သူမျှ မကြံစည်ရဲကြပေ။

မှန်ပေသည်၊ စိတ်ထဲတွင် မည်သို့ တွေးနေကြသည်ကို မသိနိုင်သော်လည်း၊ အနည်းဆုံးတော့ အပေါ်ယံတွင် သူတို့သည် မည်သည့် လှုပ်ရှားမှုမျှ ပြုလုပ်ကြမည်မဟုတ်ပေ။

"ဒါပေမဲ့ ဒီတာအိုရောင်းရင်းကျိုးက ဂိုဏ်းချုပ်ရဲ့ သမီးနဲ့ ရင်းနှီးတဲ့ ဆက်ဆံရေး ရှိတယ်လို့ ငါ ကြားတယ်..."

"ဂိုဏ်းချုပ်ရဲ့ သမီးတောင် ကြယ်သုံးပွင့်ကျွန်းစုကို ပြောင်းရွှေ့သွားတယ်ဆိုပဲ... မင်္ဂလာကိစ္စ နီးနေပြီ ထင်တယ်..."

ရွှီယွင်တာအိုအရှင်က အနည်းငယ် ပြုံးလိုက်ပြီး ဝူကျိတာအိုအရှင်ကို ကြည့်လိုက်သည်။

"ဘာ..."

ဤစကားကို ကြားသောအခါ ရောက်ရှိနေသော ဝိညာဉ်သန္ဓေသား ကျင့်ကြံသူများမှာ ချက်ချင်းဆိုသလို ကြောင်အသွားကြပြီး ရင်ထဲတွင် လှိုင်းတံပိုးများ ထန်သွားကြသည်။

အစောပိုင်းက အသက်တစ်ရာဖြင့် ဝိညာဉ်သန္ဓေသား ဖြစ်လာခြင်းနှင့် နှိုင်းယှဉ်လျှင် ယခုကိစ္စသည် ပိုမို တုန်လှုပ်စရာ ကောင်းနေသည်။ အဘယ်ကြောင့်ဆိုသော် သခင်မ မက်မွန်ပွင့်သည် ဝူကျိမဟာမိတ်အဖွဲ့၏ နံပါတ်တစ် အလှပဂေးဖြစ်သောကြောင့်ပင်။

ချန်လန်ပင်လယ်ဒေသ၏ နံပါတ်တစ် အလှပဂေးဟုပင် ကျော်ကြားလေသည်။ ဤကဲ့သို့သော တစ်ကိုယ်တည်းသမား အလှပဂေးကို မရေမတွက်နိုင်သော ကျင့်ကြံသူမည်မျှက လိုက်လံပိုးပန်းခဲ့ကြသနည်း ဆိုသည်ကို သိပင် မသိနိုင်ပေ။

သူမ၏ အနားတွင် ဝိုင်းရံနေသူများမှာ ရေတွက်၍ မကုန်နိုင်အောင်ပင်။

ရောက်ရှိနေသော ဝိညာဉ်သန္ဓေသား ကျင့်ကြံသူများထဲတွင်လည်း သခင်မ မက်မွန်ပွင့်ကို စိတ်ဝင်စားပြီး တာအိုလက်တွဲဖော်အဖြစ် ပေါင်းဖက်လိုသူ အချို့ ရှိကြသည်။ သို့သော် ယခုမူ သခင်မ မက်မွန်ပွင့်တွင် ပိုင်ရှင်ရှိသွားပြီဟူသော သတင်း ထွက်ပေါ်လာသည်။ အားလုံး ပါးစပ်အဟောင်းသားဖြင့် မယုံကြည်နိုင် ဖြစ်နေကြသည်။

"ဒီကိစ္စက...အင်း… တကယ်ပဲ ဒီလိုကိစ္စတော့လည်း ရှိတယ်..."

"ဒါပေမဲ့ လူငယ်တွေရဲ့ ကိစ္စလေ... လူကြီးတွေအနေနဲ့ ဝင်ပါဖို့ မကောင်းပါဘူး..."

ဤစကားကို ကြားသောအခါ ဝူကျိတာအိုအရှင် နှုတ်ခမ်းမဲ့လိုက်မိပြီး ဘာပြောရမှန်း မသိ ဖြစ်နေရသည်။

အမှန်အတိုင်း ဆိုရလျှင် ယခင်က သူ၏သမီးသည် ထိုအမျိုးသားကို ကြိုက်နှစ်သက်ကြောင်း သိလိုက်ရသောအခါ သူ အလွန် မကျေမနပ် ဖြစ်ခဲ့ရသည်။

ရွှေအမြုတေ အမျိုးသားကျင့်ကြံသူလေးတစ်ယောက်သာဖြစ်ပြီး သူ၏သမီးတော်နှင့် မည်သို့ ထိုက်တန်ပါမည်နည်း။

သို့သော် ယခုအခါ အခြေအနေက မတူတော့ပေ။ ဤကောင်လေး၏ ပါရမီသည် စိတ်ကူးယဉ်နိုင်စွမ်းထက် ကျော်လွန်နေပြီး အသက်တစ်ရာဖြင့် ဝိညာဉ်သန္ဓေသား ဖွဲ့စည်းနိုင်ခဲ့သည်။

ချန်လန်ပင်လယ်ဒေသတစ်ခုလုံးကို ကြည့်လိုက်လျှင်ပင် ဤကောင်လေး၏ ပါရမီကို ယှဉ်နိုင်သူမှာ လက်ချိုးရေလို့ ရသည်။ အချိန်တန်လျှင် နတ်ဘုရားအသွင်ပြောင်းအဆင့် ဖြစ်လာနိုင်ချေ ရှိသည်။

ဤကဲ့သို့သော ယောက်ျားမျိုးဆိုလျှင်ဖြင့် သူ၏သမီးနှင့် ထိုက်တန်သည်ဟု ဆိုနိုင်ပေသည်။

သို့သော် သူ့သမီးသည် တာအိုလက်တွဲဖော်အဖြစ် မပေါင်းဖက်ရသေးဘဲ၊ အမျိုးသားရှိရာနေရာသို့ တက်ကြွစွာ သွားရောက် နေထိုင်ပြီး မက်မွန်ပွင့်ကျွန်းသို့ပင် ပြန်မလာတော့ကြောင်း၊ အမြဲတမ်း နေထိုင်သွားမည့် အစီအစဉ် ရှိနေကြောင်း ကြားသိလိုက်ရသည်။

သူသည် ဒေါသထွက်လွန်း၍ သေလုနီးပါးပင် ဖြစ်သွားရသည်။ ထိုအမျိုးသားကို အမှန်တကယ် ကြိုက်နှစ်သက်လျှင်ပင်၊ အိမ်ထောင်မပြုရသေးသော အမျိုးသမီးတစ်ဦးက အမျိုးသားနှင့် သွားရောက် အတူနေထိုင်ခြင်းသည် ကိုယ့်တန်ဖိုးကို ကိုယ်ချခြင်းပင် မဟုတ်ပါလော။

အကယ်၍ ထိုအကောင်စုတ်က သူ့သမီးကို ကစားချင်ရုံသက်သက်ဆိုလျှင် မည်သို့လုပ်မည်နည်း။ သူ့သမီး၏ ဂုဏ်သိက္ခာ ပျက်စီးသွားမည် မဟုတ်ပေလော။

ထို့ကြောင့် ဤအစည်းအဝေးတွင် သူ့သမီးအတွက် တရားမျှတမှုကို တောင်းဆိုဖို့ရာ သူ စီစဉ်ထားသည်။

ဤစကား ထွက်ပေါ်လာသည်နှင့် ဝိညာဉ်သန္ဓေသား ကျင့်ကြံသူများ ချက်ချင်းဆိုသလို ဆူညံသွားကြသည်။ အဘယ်ကြောင့်ဆိုသော် ဤကဲ့သို့သော အဖြေသည် ဝူကျိတာအိုအရှင်၏ ဝန်ခံချက်ကို ရရှိလိုက်ခြင်းဖြစ်ပြီး ရွှီယွင်တာအိုအရှင်၏ စကားများ မှန်ကန်ကြောင်း သက်သေပြလိုက်ခြင်းပင် ဖြစ်သည်။

"ကျွတ်... ကျွတ်... မယုံနိုင်စရာပဲ... နှစ်ငါးရာကျော် တစ်ကိုယ်တည်း နေလာခဲ့တဲ့ သခင်မ မက်မွန်ပွင့်မှာ နောက်ဆုံးတော့ တာအိုလက်တွဲဖော် ရှိလာတော့မှာလား..."

"သခင်မ မက်မွန်ပွင့်က နွားအိုကြီးဖြစ်ပြီး မြက်နုစားချင်နေတာပဲ..."

"မဟုတ်လို့လား... အသက်အရွယ်အရ ပြောရရင် သခင်မ မက်မွန်ပွင့်က အဲဒီကောင်လေးရဲ့ အဘွားအရွယ် ဖြစ်နေပြီ..."

"ဒါက ပုံမှန်ပါပဲ... ငါတို့က ငယ်ရွယ်တဲ့ အမျိုးသမီးကျင့်ကြံသူတွေကို ကြိုက်သလို... သခင်မ မက်မွန်ပွင့်ကလည်း ငယ်ရွယ်တဲ့ အမျိုးသားကျင့်ကြံသူကို ကြိုက်တာပေါ့... အတူတူပဲလေ..."

"ငါ့ကိုကျတော့ ဘာလို့ မကြိုက်တာလဲ... ငါတို့က အရမ်း လိုက်ဖက်နေတာကို..."

"သခင်မ မက်မွန်ပွင့်က ဒီကျိုးစွေ့ကို စောစောစီးစီးကတည်းက မျက်စိကျနေတာလို့ ပြောကြတယ်... ဒီကျိုးစွေ့ ဝိညာဉ်သန္ဓေသား မဖြစ်ခင်၊ အခြေတည်အဆင့်တုန်းကတည်းက ကြိုက်နေတာတဲ့... တကယ်လို့ ဒီအမျိုးသားမှာ လက်တွဲဖော်တွေသာ မရှိရင်... အတင်းအဓမ္မတောင် သိမ်းပိုက်လောက်တယ်..."

"မဖြစ်နိုင်တာ... အဲဒီကောင်မှာ ကိုယ်လုပ်တော်တွေ ရှိနေပြီးသားလား... ဒါဆိုရင် သခင်မ မက်မွန်ပွင့်က အိမ်ထောင်သည်ယောက်ျားကို ကြိုက်နေတာပေါ့..."

"တကယ်ကို လွန်လွန်းတယ်... တကယ်လို့ သခင်မ မက်မွန်ပွင့်က အဲဒီကျိုးစွေ့ကို လက်ထပ်လိုက်ရင်... အဲဒီကျိုးစွေ့ရဲ့ တာအိုလက်တွဲဖော်တွေထဲက တစ်ယောက်ပဲ ဖြစ်လာမှာပေါ့... နာမည်ကျော်ကြားလှတဲ့ သခင်မ မက်မွန်ပွင့်က ဘယ်တုန်းကများ ဒီလောက်တောင် အောက်ကျို့ခံလိုက်ရတာလဲကွာ..."

"ပန်းပွင့်လေးတစ်ပွင့်က နွားချေးပုံပေါ် စိုက်လိုက်သလိုပဲ... ဘာလို့ အဲဒီမျက်နှာချောလေးက သခင်မ မက်မွန်ပွင့်ရဲ့ မျက်နှာသာပေးမှုကို ရသွားရတာလဲ..."

ဝိညာဉ်သန္ဓေသား အကြီးအကဲအများအပြားသည် နတ်ဘုရားအာရုံဖြင့် လျှို့ဝှက်ဆက်သွယ်ပြီး သူတို့ ရရှိထားသော သတင်းများကို ဖလှယ်နေကြသည်။

သခင်မ မက်မွန်ပွင့်ကို တိတ်တခိုး ကြိုက်နေကြသော ဝိညာဉ်သန္ဓေသားအချို့မူ အံကြိတ်လိုက်ကြပြီး မကျေနပ်နိုင်အောင် ဒေါသထွက်နေကြကာ မိဘအရင်းများ သေသွားသကဲ့သို့ ခံစားနေကြရလေသည်။