ဘယ်ဝိညာဉ်သန္ဓေသားဘိုးဘေးက မယားပြိုင်မထားဘဲ နေလို့လဲ၊ သခင်မမက်မွန်ပွင့်ကို လက်ထပ်ခြင်း(၂)။

"ကဲ ..ကဲ ... နေရာယူကြပါ..."

"နောက်တစ်ဆင့်ကတော့ ကမ္ဘာပေါင်းစည်းခြင်းကိစ္စပဲ..."

"ဒီကိစ္စက အရမ်း အရေးကြီးပြီး... ငါတို့ ဝူကျိမဟာမိတ်အဖွဲ့သာမက ချန်လန်ပင်လယ်ဒေသ လူသားမျိုးနွယ်စုတစ်ခုလုံးရဲ့ အနာဂတ်နဲ့ သက်ဆိုင်နေတယ်..."

ဝူကျိတာအိုအရှင်သည် သမီးဖြစ်သူ၏ ကိစ္စကို ဖြေရှင်းပြီးနောက် အလွန် ကျေနပ်သွားပုံရသည်။

ထို့နောက် သူသည် ကျိုးစွေ့နှင့် အခြားသူများကို အမြန် နေရာယူခိုင်းပြီး အဓိကအကြောင်းအရာကို စတင် ပြောဆိုလေသည်။ ဤစကားကို ကြားသောအခါ ဝိညာဉ်သန္ဓေသားကျင့်ကြံသူအများအပြားမှာ ချက်ချင်းဆိုသလို လေးနက်သွားကြသည်။

မည်သို့ပင်ဖြစ်စေ သူတို့သည် ဤကိစ္စကို အစိုးရိမ်ဆုံးဖြစ်ပြီး သူတို့၏ အနာဂတ်နှင့်လည်း သက်ဆိုင်နေသည်။ အကယ်၍ ရှေးဟောင်းမိစ္ဆာကမ္ဘာမှ မိစ္ဆာကျင့်ကြံသူများ အမှန်တကယ် ကျူးကျော်လာပါက သူတို့ ကြိုတင် ပြင်ဆင်ထားရန် လိုအပ်သည်။

"မဟာမိတ်ခေါင်းဆောင်... ကျုပ်တို့ ဝူကျိမဟာမိတ်အဖွဲ့အပြင် တခြား ဝိညာဉ်သန္ဓေသားအင်အားစုတွေကရော ဘယ်လို စီစဉ်ထားကြလဲ..."

လူတစ်ယောက်က မေးမြန်းလိုက်သည်။

"အခုအချိန်ကစပြီး ချန်လန်ပင်လယ်ဒေသတစ်ခုလုံးမှာ... ဖြောင့်မတ်ဂိုဏ်းဖြစ်စေ၊ မိစ္ဆာဂိုဏ်းဖြစ်စေ “ယာယီစစ်ပြေငြိမ်းရေးအမိန့်” ကို စတင် အကောင်အထည်ဖော်မယ်..."

"ဘယ်ဝိညာဉ်သန္ဓေသား၊ ရွှေအမြုတေကျင့်ကြံသူမှ အချင်းချင်း တိုက်ခိုက်သတ်ဖြတ်ခွင့် မရှိဘူး..."

"အင်အားစုအသီးသီးလည်း နယ်မြေ ထပ်ပြီး မချဲ့ထွင်၊ မကျူးကျော်ရဘူး..."

"တကယ်လို့ တစ်ယောက်ယောက်က ချိုးဖောက်ခဲ့ရင်... ဝိညာဉ်သန္ဓေသားဂိုဏ်းကြီးအားလုံးရဲ့ ရန်သူ ဖြစ်လာလိမ့်မယ်... တစ်လောကလုံးက ဘုံရန်သူအဖြစ် ဝိုင်းဝန်း သတ်ဖြတ်ကြလိမ့်မယ်..."

ဝူကျိတာအိုအရှင်၏ လေသံမှာ အလွန် လေးနက်နေသည်။

ထင်ရှားသည်မှာ ယခုတစ်ကြိမ်တွင် ဖြောင့်မတ်ဂိုဏ်းကြီးငါးဂိုဏ်းနှင့် မိစ္ဆာဂိုဏ်းကြီး သုံးဂိုဏ်းတို့သည် ဘုံသဘောတူညီချက် ရရှိထားကြခြင်း ဖြစ်သည်။

မည်သို့ပင်ဖြစ်စေ ဖြောင့်မတ်ဂိုဏ်းဖြစ်စေ၊ မိစ္ဆာဂိုဏ်းဖြစ်စေ လူသားမျိုးနွယ်စုဝင်များသာ ဖြစ်ကြသည်။ အကယ်၍ အချင်းချင်း သတ်ဖြတ်နေကြပါက မိစ္ဆာမျိုးနွယ်စုကိုသာ အကျိုးရှိစေလိမ့်မည်။

ထို့ကြောင့် သူတို့သည် “ယာယီစစ်ပြေငြိမ်းရေးအမိန့်” ကို ပူးပေါင်း ထုတ်ပြန်လိုက်ပြီး ဝိညာဉ်သန္ဓေသားနှင့် ရွှေအမြုတေကျင့်ကြံသူများ အချင်းချင်း သတ်ဖြတ်ခြင်းကို တားမြစ်လိုက်ခြင်း ဖြစ်သည်။ လူသားမျိုးနွယ်စု၏ အင်အားဆုံးရှုံးမှုကို ရှောင်ရှားရန် ဖြစ်သည်။ ကမ္ဘာပေါင်းစည်းခြင်းဖြစ်စဉ် ပြီးဆုံးမှသာ “ယာယီစစ်ပြေငြိမ်းရေးအမိန့်” ရပ်တန့်သွားမည် ဖြစ်သည်။

"မဟာမိတ်ခေါင်းဆောင်... ကျုပ်တို့ ကျင့်ကြံခြင်းကမ္ဘာနဲ့ ရှေးဟောင်းမိစ္ဆာကမ္ဘာ တကယ် ပေါင်းစည်းသွားရင်တောင်မှ..."

"ရှေးဟောင်းမိစ္ဆာကမ္ဘာက မိစ္ဆာကျင့်ကြံသူတွေ ငါတို့ ကျင့်ကြံခြင်းကမ္ဘာကို ကျူးကျော်တိုက်ခိုက်မယ်လို့ မဆိုလိုပါဘူး..."

"လူတိုင်းက ဝိညာဉ်သန္ဓေသားအဆင့် ရောက်ဖို့ မလွယ်ကူကြဘူး... ဘာကိစ္စကြောင့် သေချာပေါက် တိုက်ခိုက်ကြရမှာလဲ..."

လူတစ်ယောက်က နားမလည်နိုင်စွာ မေးလိုက်သည်။

သူသည် ရှေးဟောင်းမိစ္ဆာကမ္ဘာမှ စတုတ္ထအဆင့် မိစ္ဆာကျင့်ကြံသူများသည်လည်း ကျင့်ကြံခြင်းကမ္ဘာကို မဖြစ်မနေ ကျူးကျော်ချင်မှ ကျူးကျော်မည်ဟု ထင်မြင်မိသည်။

မည်သို့ပင်ဖြစ်စေ မိစ္ဆာကျင့်ကြံသူများ စတုတ္ထအဆင့်သို့ ရောက်ရှိရန်အတွက် ရှည်လျားသော အချိန်ကာလကို ဖြတ်သန်းရပြီး မရေမတွက်နိုင်သော အခက်အခဲများကို ကျော်ဖြတ်ရသည်။

သူတို့သည်လည်း နှစ်ပေါင်းများစွာ ကြိုးစားကျင့်ကြံခဲ့ရသမျှအား တစ်ခဏချင်း ပျက်စီးသွားမည်ကို လိုလားကြမည် မဟုတ်ပေ။ မလိုအပ်ဘဲနှင့် စစ်ပွဲဆင်နွှဲစရာ အကြောင်းမရှိချေ။ ဤသည်မှာ နှစ်ဦးနှစ်ဖက်စလုံးအတွက် အကျိုးမရှိပေ။

"ရှင်းရှင်းလေးပါပဲ... လူသားမျိုးနွယ်နဲ့ မိစ္ဆာမျိုးနွယ်က အတူယှဉ်တွဲ နေထိုင်ဖို့ မဖြစ်နိုင်သလောက်ပဲ..."

"အဲဒီ မိစ္ဆာကျင့်ကြံသူတွေအတွက် ငါတို့ လူသားတွေက အားဆေးကြီးတွေ ဖြစ်နေတာကိုး..."

"လူသားပုံသဏ္ဌာန် ဝိညာဉ်ဆေးမြစ်တွေလို့တောင် ပြောလို့ရတယ်..."

"လူသားကျင့်ကြံသူ တစ်ယောက်ကို စားလိုက်ရင် ဆယ်စုနှစ်ပေါင်းများစွာ ဒါမှမဟုတ် နှစ်ရာချီ ကြိုးစားကျင့်ကြံရမယ့် အချိန်ကို သက်သာစေတယ်..."

"သိထားရမှာက မိစ္ဆာကျင့်ကြံသူတွေရဲ့ သက်တမ်းက ရှည်လျားပေမယ့် သူတို့ရဲ့ ကျင့်ကြံခြင်း အရှိန်အဟုန်က နှေးကွေးတယ်... ငါတို့ လူသားတွေကို မမီဘူး..."

"အခု လူသားကျင့်ကြံသူကို စားလိုက်ရုံနဲ့ ကျင့်ကြံခြင်းအချိန်ကို အများကြီး လျှော့ချနိုင်မယ်ဆိုရင်... သူတို့က ဘယ်လိုလုပ်ပြီး ဥပုဒ်စောင့်နေနိုင်မှာလဲ..."

ဝူကျိတာအိုအရှင်က သက်ပြင်းချကာ ပြောပြလိုက်သည်။

"ဒါက..."

ဝိညာဉ်သန္ဓေသားကျင့်ကြံသူအများအပြားမှာ ပြောစရာစကားမရှိ ဖြစ်သွားကြသည်။ အမှန်အတိုင်း ဆိုရလျှင် သူတို့သာ စတုတ္ထအဆင့် မိစ္ဆာကျင့်ကြံသူများ၏ နေရာတွင် ရှိနေပါက ဤကဲ့သို့သော ဆွဲဆောင်မှုကို တွန်းလှန်နိုင်မည် မဟုတ်ချေ။ နေရာတိုင်းတွင် လူသားပုံသဏ္ဌာန် ဝိညာဉ်ဆေးမြစ်များ ရှိနေပါက မည်သူက သည်းခံနိုင်ပါမည်နည်း။

"ဒါပေါ့... မိစ္ဆာမျိုးနွယ်စုတွေ လက်မတွန့်ဘဲ တိုက်ခိုက်ရတဲ့ အကြောင်းရင်းက ဒီလောက် ရိုးရှင်းတာ မဟုတ်ဘူး..."

"အရေးကြီးတဲ့ အကြောင်းရင်းတစ်ခုကတော့ သူတို့က ငါတို့လူသားတွေကို အားနည်းတယ်၊ မိစ္ဆာမျိုးနွယ်နဲ့ ငြိမ်းချမ်းစွာ အတူယှဉ်တွဲနေထိုင်ဖို့ မတန်ဘူးလို့ မြင်နေကြတာပဲ..."

"ရှေးဟောင်းခေတ်တုန်းက ငါတို့ ကျင့်ကြံခြင်းကမ္ဘာနဲ့ ရှေးဟောင်းမိစ္ဆာကမ္ဘာ တွေ့ဆုံတုန်းက... အဲဒီ မိစ္ဆာကျင့်ကြံသူတွေ ကျင့်ကြံခြင်းကမ္ဘာထဲ ဝင်လာပြီး လူသားကျင့်ကြံသူတွေကို အစုလိုက်အပြုံလိုက် သတ်ဖြတ်ခဲ့ကြတယ်... လူသား ဘယ်လောက်များများ အသတ်ခံခဲ့ရလဲဆိုတာ သိတောင် မသိနိုင်ဘူး..."

"ဒါကြောင့် အစကတည်းက သူတို့က ငါတို့လူသားတွေကို တန်းတူအနေအထားနဲ့ ဆွေးနွေးဖို့ မစဉ်းစားကြဘူး... ငါတို့လူသားတွေကို အားနည်းတဲ့ မျိုးနွယ်စုလို့ပဲ သတ်မှတ်ထားကြတာ... သဘာဝကျကျပဲ ငါတို့နဲ့ ဆွေးနွေးပြီး ငြိမ်းချမ်းစွာ အတူနေထိုင်ဖို့ဆိုတာ မဖြစ်နိုင်ဘူး..."

"တကယ်လို့ ငါတို့မှာ လုံလောက်တဲ့ အင်အားရှိခဲ့ရင် ရှေးဟောင်းမိစ္ဆာကမ္ဘာက ငါတို့ ကျင့်ကြံခြင်းကမ္ဘာကို ကျူးကျော်တာ မဟုတ်ဘဲ... ငါတို့ ကျင့်ကြံခြင်းကမ္ဘာက ရှေးဟောင်းမိစ္ဆာကမ္ဘာကို ကျူးကျော်မှာဖြစ်ပြီး စစ်ပွဲက ရှောင်လွှဲလို့မရနိုင်ဘူး..."

"ငါတို့ ကံကောင်းမှာပါလို့ မမျှော်လင့်ဘဲ စစ်ပွဲအတွက် တက်တက်ကြွကြွ ပြင်ဆင်ကြရမယ်..."

"ဒါက မျိုးနွယ်စုစစ်ပွဲပဲ... သူမသေရင် ကိုယ်သေပဲ..."

ဝူကျိတာအိုအရှင်က လူတိုင်းကို ဝေ့ကြည့်လိုက်ပြီး လေးနက်သောလေသံဖြင့် ပြောလိုက်သည်။

ဝိညာဉ်သန္ဓေသားကျင့်ကြံသူအချို့သည် အခြေအနေကို သဘောမပေါက်သေးဘဲ စစ်ပွဲကို ရှောင်လွှဲနိုင်မည်ဟု ထင်နေကြကြောင်း သူ သိထားသည်။ သို့သော် ၎င်းသည် မဖြစ်နိုင်ကြောင်းကိုလည်း သူ သိပေသည်။

မိစ္ဆာမျိုးနွယ်စု အကြီးအကျယ် ထိခိုက်နစ်နာပြီး ဆုံးရှုံးမှု ကြီးမားသွားမှသာ ဖြစ်နိုင်ပေသည်။ သို့မဟုတ်ပါက မိစ္ဆာမျိုးနွယ်စု၏ ကျူးကျော်မှုကို တားဆီးနိုင်မည် မဟုတ်ပေ။

"မဟာမိတ်ခေါင်းဆောင်... ကျွန်တော်တို့ နားလည်ပါပြီ... ဒါဆို နောက်တစ်ဆင့် ဘာဆက်လုပ်ကြမလဲ..."

လူတစ်ယောက်က မေးလိုက်သည်။

"လောလောဆယ် ချန်လန်ပင်လယ်ဒေသတစ်ခုလုံးမှာ ရှာဖွေတွေ့ရှိထားတဲ့ ဟင်းလင်းပြင်နိမိတ်လက္ခဏာ နေရာစုစုပေါင်း (၃၆)ခု ရှိတယ်..."

"မတွေ့သေးတာ ဘယ်လောက်ရှိလဲဆိုတာ လောလောဆယ် မသိရသေးဘူး..."

"ဒီနေရာ (၃၆)ခုလုံးမှာ မြို့တော်တွေ တည်ဆောက်ပြီး မိစ္ဆာမျိုးနွယ်ကို ခုခံမယ့် ပထမခံတပ်စည်းအဖြစ် ထားရှိမယ်..."

"အဲဒီအချိန်ကျရင် ငါတို့ လူသားမျိုးနွယ်စု ဝိညာဉ်သန္ဓေသားဂိုဏ်းကြီး(၈)ဂိုဏ်းက ဝိညာဉ်သန္ဓေသားကျင့်ကြံသူတွေ စေလွှတ်ပြီး ဒီမြို့တော်တွေမှာ တပ်စွဲထားရမယ်..."

"ဒီနေရာတွေက ကမ္ဘာ့တံခါးပေါက်တွေကို (၂၄) နာရီ စောင့်ကြည့်ရမယ်..."

"မိစ္ဆာကျင့်ကြံသူတွေ ကျူးကျော်ဝင်ရောက်လာတာနဲ့ ချက်ချင်း သတ်ဖြတ်ရမယ်..."

ဝူကျိတာအိုအရှင်သည် နောက်တစ်ဆင့် အစီအစဉ်များကို စတင် ချမှတ်လိုက်သည်။

ဤစကားကို ကြားသောအခါ ကျိုးစွေ့သည် စိတ်လှုပ်ရှားခြင်းမရှိဘဲ တည်ငြိမ်အေးဆေးစွာ ရှိနေသည်။

အကယ်၍ တာဝန်ခွဲဝေပြီးနောက် သူ့ကို ထိုမြို့တော်တွေ၌ သွားရောက်စောင့်ကြပ်ခိုင်းလျှင်တောင်မှ ကိုယ်ပွားတစ်ခုကို စေလွှတ်လိုက်ရုံဖြင့် လုံလောက်ပြီး မူလခန္ဓာကိုယ်မှာ သွားစရာမလိုပေ။ မတော်တဆမှု တစ်ခုခုဖြစ်ခဲ့လျှင်ပင် မူလခန္ဓာကိုယ်ကို ထိခိုက်စေမည် မဟုတ်ချေ။

"မဟာမိတ်ခေါင်းဆောင်... မတွေ့သေးတဲ့ ကမ္ဘာ့တံခါးပေါက်တွေကျတော့ ဘယ်လိုလုပ်မလဲ... ဒီကမ္ဘာ့တံခါးပေါက်တွေကို တကယ် ပိတ်ဆို့ထားရင်တောင်မှ မိစ္ဆာကျင့်ကြံသူတွေ ဆင်းသက်လာတာကို တားဆီးနိုင်ပါ့မလား..."

လူတစ်ယောက်က မျက်မှောင်ကြုတ်လိုက်ပြီး ဤအစီအစဉ်သည် ရာနှုန်းပြည့် စိတ်ချရခြင်းမဟုတ်ဘဲ ဟာကွက်များ ရှိနေသေးသည်ဟု ခံစားလိုက်ရသည်။

"ဒါကိုတော့ မတတ်နိုင်ဘူးလေ... ငါတို့ အခု လုပ်နိုင်တာက ကိုယ်လုပ်နိုင်တာလုပ်ပြီး ကံတရားကို ပုံချရုံပဲ..."

"ဒါပေါ့... မင်းတို့လည်း သိပ်ပြီး စိုးရိမ်စရာမလိုပါဘူး..."

"ရှေးဟောင်းမိစ္ဆာကမ္ဘာက စွမ်းအားကြီးပြီး အင်အားတောင့်တင်းပေမယ့်... ငါတို့ ကျင့်ကြံခြင်းကမ္ဘာထဲကို အမှန်တကယ် ဝင်ရောက်တိုက်ခိုက်မယ့် မိစ္ဆာကျင့်ကြံသူတွေက တစ်စိတ်တစ်ပိုင်းလောက်ပဲ ရှိမှာပါ... ငါတို့ လူသားကျင့်ကြံသူတွေကို စိတ်မဝင်စားတဲ့ မိစ္ဆာကျင့်ကြံသူတွေလည်း အများကြီး ရှိပါတယ်..."

"ပြီးတော့ အစပိုင်းမှာ ကမ္ဘာ့တံခါးပေါက်က သိပ်မတည်ငြိမ်သေးလို့ နတ်ဘုရားအသွင်ပြောင်းအဆင့် မိစ္ဆာတွေ ဝင်လာနိုင်မှာ မဟုတ်ဘူး..."

"အများဆုံး ဝိညာဉ်သန္ဓေသားအဆင့် မိစ္ဆာတွေပဲ ဝင်လာနိုင်မှာ..."

"ငါတို့ရဲ့ အင်အားနဲ့ဆိုရင် ဒီစတုတ္ထအဆင့် မိစ္ဆာတွေကို တားဆီးနိုင်ပါသေးတယ်..."

ဝူကျိတာအိုအရှင်က လေးနက်စွာ ပြောလိုက်သည်။

အခြေအနေသည် ထိုမျှအထိ ဆိုးရွားနေသည် မဟုတ်ဟု သူ ထင်မြင်သည်။ ကမ္ဘာ့တံခါးပေါက်များ အမှန်တကယ် ပေါ်လာပြီး ကမ္ဘာနှစ်ခု ဆက်သွယ်သွားလျှင်တောင်မှ အဆန်းမဟုတ်ပေ။ လက်ရှိ ဝူကျိမဟာမိတ်အဖွဲ့၏အင်အားနှင့်ဆိုပါက ဒေသတစ်ခုကို ဘေးကင်းအောင် ကာကွယ်နိုင်လောက်ပေသည်။

"ဒါ့အပြင် ဒီစစ်ပွဲက ငါတို့အတွက် အန္တရာယ်ချည်းပဲလည်း မဟုတ်ဘူး..."

"သိထားရမှာက ဒီမိစ္ဆာသားရဲတွေရဲ့ ခန္ဓာကိုယ်ပေါ်က ပစ္စည်းအမျိုးမျိုးက ငါတို့ ကျင့်ကြံသူတွေအတွက် အကျိုးကျေးဇူး အများကြီး ရှိတယ်..."

"အဲဒီ မိစ္ဆာသားရဲတွေရဲ့ ခန္ဓာကိုယ်ပေါ်က ပစ္စည်းတွေကို အဆောင်ရေးဆွဲတာ၊ ဝိညာဉ်ရတနာ သွန်းလုပ်တာ၊ ဆေးဖော်စပ်တာတွေမှာ သုံးလို့ရတယ်..."

"တကယ့်ကို အသုံးဝင်မှုတွေ အများကြီးပဲ..."

"တကယ်လို့ တတိယအဆင့်၊ စတုတ္ထအဆင့်၊ ပဉ္စမအဆင့် မိစ္ဆာအမြုတေတွေကို ရခဲ့မယ်ဆိုရင်... ငါတို့ရဲ့ ကျင့်ကြံခြင်းကို နောက်တစ်ဆင့် တက်လှမ်းစေနိုင်တယ်... တကယ်လို့ အင်အားလုံလောက်အောင် ကောင်းမယ်ဆိုရင် ဒီစစ်ပွဲကနေ အကျိုးကျေးဇူးအများကြီး ရယူနိုင်ပြီး ကျင့်ကြံခြင်းကို မြှင့်တင်နိုင်တယ်..."

"ဒီစစ်ပွဲကြောင့်ပဲ ဝိညာဉ်သန္ဓေသားကျင့်ကြံသူတချို့ အဆင့်တက်လှမ်းပြီး နတ်ဘုရားအသွင်ပြောင်းအဆင့် အရှင်သခင်တွေ ဖြစ်လာနိုင်တယ်..."

ဝူကျိတာအိုအရှင်က မျက်လုံးများကို မှေးစင်းလိုက်ရာ၊ မျက်ဝန်းနက်နက်ထဲတွင် အဆုံးမဲ့သော ရည်မှန်းချက်ကြီးမှုများ ပေါ်လွင်နေချေတော့သည်။