အခန်း (၁၆၃-၁၆၄)

အခန်း (၁၆၃) ခန့်မှန်းချက်နှင့် အကူအညီ

လင်ချွမ်က ရှောင်တိမ်းခြင်းမပြုသည်ကို မြင်သောအခါ လင်ယန်ရွှယ်သည် အစပိုင်းတွင် အလွန်စိတ်လှုပ်ရှားသွားခဲ့သည်။

သို့သော် လင်ချွမ်က မသေမျိုးနတ်ဘုရားတို့၏ အကြွင်းအကျန်ပျက်စီးမှုများ အကြောင်းကို တစ်ဖန်ပြန်ပြောလာသောအခါ သူမ၏နှလုံးသားမှာ ချက်ချင်းပင် လေးလံသွားရ​၏။

သို့သော်လည်း အကြိမ်ကြိမ် ငြင်းပယ်ခံရပြီး ရှောင်ဖယ်ခြင်းခံခဲ့ရဖူးသဖြင့် လင်ယန်ရွှယ်၏ စိတ်နေစိတ်ထားမှာ တော်တော်လေး ရင့်ကျက်တည်ငြိမ်နေပြီပင်။

သူမသည် ခဏတာမျှသာ စိတ်ပျက်သွားပြီးနောက် အကောင်းဆုံးအခြေအနေသို့ ချက်ချင်းပြန်ရောက်လာခဲ့သည်။

"ဒီနားတစ်ဝိုက်မှာပဲ ဖြစ်ရမယ်၊ ကျွန်မ သေချာအောင် တစ်ခေါက်ပြန်စစ်ကြည့်ပါရစေဦး"

ပြန်ပြောပြီးနောက် လင်ယန်ရွှယ်သည် သူမ၏ရင်ဘတ်အတွင်းမှ မြေပုံတစ်ခုကို ထုတ်ယူကာ ကောက်ရိုးပုံပေါ်တွင် ဖြန့်ခင်းလိုက်ပြီး အမှတ်အသားများကို သေချာရှာဖွေကြည့်လေသည်။

ခဏအကြာတွင် လင်းယန်ရွှယ်က "တကယ်ပဲ ဒီအနီးအနားမှာပါပဲ၊ ဒါပေမဲ့ ဆယ်မိုင်ကျော်လောက်တော့ ဝေးသေးတယ်။ အဲဒီဒဏ္ဍာရီက အကြွင်းအကျန်ပျက်စီးမှုတွေရှိတယ်ဆိုတဲ့ သက်သေလို့ ရှင်ထင်လို့လား" ဟု ပြန်မေးသည်။

လင်ချွမ်က ခေါင်းညိတ်ကာ "မဖြစ်နိုင်တာတော့ မဟုတ်ဘူး"

"အသေးစိတ်ကို ငါသေချာစုံစမ်းကြည့်တော့ အဲဒါက သိုင်းပညာရှင်အချင်းချင်း ယှဉ်ပြိုင်ကြတာနဲ့ တူနေတယ်"

"တကယ်လို့ သူတို့က ဒဏ္ဍာရီထဲကလို နတ်ဘုရားတွေသာဆိုရင် ရှင်းပြလို့မရတဲ့ အချက်တွေ အများကြီးရှိနေလိမ့်မယ်"

"ဒါပေမဲ့ သိုင်းပညာရှင် ဒါမှမဟုတ် ကျင့်ကြံသူတွေသာဆိုရင်တော့ အားလုံးက ယုတ္တိရှိသွားပြီ" ဟု ဆိုသည်။

လင်ယန်ရွှယ်သည် ယွဲ့ချင်းရိုကဲ့သို့ မဟုတ်သည့်အတွက် လင်ချွမ် မပြောပြသော အသေးစိတ်အချက်အလက်များကို လိုက်လံစစ်မေးနေခြင်း မပြုပေ။

သူမ ခဏမျှ စဉ်းစားပြီးနောက် "တကယ်လို့ အဲဒါသာ အမှန်ဆိုရင် ဒါက နောက်ထပ် သတင်းအမှားတစ်ခု ဖြစ်နေဦးမှာလား" ဟု မေးလိုက်ရာ...

"သေချာတော့ မပြောနိုင်သေးဘူး၊ ရွှေကြောတွေကို ကိုယ်တိုင်မစစ်ဆေးဘဲနဲ့ တိုက်ပွဲဖြစ်ပွားခဲ့တဲ့နေရာတွေကို မရောက်ဘဲနဲ့တော့ ငါလည်း အတပ်မပြောနိုင်ဘူး"

ထိုသို့ပြောပြီးနောက် လင်ချွမ်သည် လင်ယန်ရွှယ်၏ အဖြေကို မစောင့်တော့ဘဲ မြက်မိုးတဲပေါ်မှ ခုန်ချလိုက်သည်။

"မိန်းကလေး ရှန်၊ အနာဂတ်အတွက် ဘာအစီအစဉ်ရှိလဲ"

လင်ချွမ်သည် ရှန်ယွီ ထံသို့ လျှောက်သွားရင်း မေးလိုက်ရာ သူ၏ပြုမူပုံကြောင့် ရှန်ယွီမှာ အမှန်တကယ်ပင် အံ့အားသင့်သွားရသည်။

သူမသည် ရှက်သွေးဖြန်းကာ ခဏကြာမှ ပြန်ဖြေနိုင်တော့သည်။

"သံဓားဂိုဏ်း မှာ ကျွန်မတစ်ယောက်ပဲ ကျန်တော့တာပါ"

"ကျွန်မရဲ့ အရည်အချင်းတွေ အားလုံး ဆုံးရှုံးသွားပေမဲ့ တပည့်တွေကို သင်ကြားပေးလို့ မရတာတော့ မဟုတ်ပါဘူး"

"အချိန်တစ်ခုပေးရင် သံဓားဂိုဏ်း ပြန်လည်ရှင်သန်လာဖို့ အခွင့်အရေးရှိကောင်းရှိပါလိမ့်မယ်"

လင်းချွမ်း စကားမပြောရသေးမီမှာပင် ယွဲ့ချင်းရိုက "ကောင်းတယ်"ဟု အော်ဟစ်လိုက်သည်။

"တကယ့် ဇွဲပဲ၊ မိန်းမသားတွေဟာ အမျိုးသားတွေလိုပဲ စွမ်းဆောင်နိုင်စွမ်း ရှိကြတာပဲ"

"သံဓားဂိုဏ်းဟာ တစ်နေ့မှာ အရင်လို ပြန်လည်တောက်ပလာမယ်လို့ ငါယုံကြည်တယ်"

ရှန်ယွီ ပြောသောအခါ လင်ယန်ရွှယ်သည်လည်း သူမကို လေးစားမိသည်မှာ အမှန်ပင်။

သို့သော် ယွဲ့ချင်းရိုက ချီးကျူးနေသည်ကို ကြားသောအခါ လင်ယန်ရွှယ်၏ စိတ်ထဲတွင် အမျိုးသမီးတို့၏ သဝန်တိုမှုလေးများ ပြန်လည်စိမ့်ဝင်လာပြန်သည်။

သူမသည် ရှန်ယွီ၏ အနားသို့ တိုးသွားကာ စိတ်ဓာတ်ကျစေမည့် စကားမျိုးကို သွယ်ဝိုက်၍ ပြောလိုက်သည်။

"အဲဒါက ဟုတ်ပါတယ်၊ ဒါပေမဲ့ မင်းက တစ်ယောက်တည်းပဲလေ"

"တပည့်တွေ လက်ခံချင်တယ်ဆိုရင်တောင် အဲဒါက မလွယ်ပါဘူး"

"ပြီးတော့ မင်းတစ်ယောက်တည်းနဲ့ ဂိုဏ်းကို ဘယ်လိုပြန်တည်ထောင်မှာလဲ"

"ငါ့အမြင်အရဆိုရင်တော့ အမြန်ဆုံး အိမ်ထောင်ပြုပြီး တည်ငြိမ်တဲ့ဘဝမှာ နေထိုင်တာက ပိုကောင်းမယ်"

"ပြီးမှ မင်းရဲ့ပညာတွေကို မင်းရဲ့သားသမီးတွေကို သင်ပေးပြီး သူတို့ကတစ်ဆင့် မင်းရဲ့ဆန္ဒတွေကို ဖြည့်ဆည်းခိုင်းတာက ပိုပြီးဘေးကင်းတဲ့ နည်းလမ်းဖြစ်လိမ့်မယ်"

ရှန်ယွီသည် သိုင်းပညာ သိပ်မတော်သော်လည်း အလွန်ထက်မြက်ပြီး အကဲခတ်ကောင်းသူပင်။

လင်ယန်ရွှယ်၏ စကားကို ကြားရုံနှင့် သူမ သဝန်တိုနေသည်ကို ချက်ချင်း သိလိုက်သည်။

ထို့ကြောင့် ရှန်ယွီက ပြုံးကာ "မိန်းကလေး လင်စိတ်ပူပေးတာ ကျေးဇူးတင်ပါတယ်"

"သံဓားဂိုဏ်းမှာ ကျွန်မတစ်ယောက်တည်း ကျန်တော့ရင်တောင် ဂိုဏ်းအတွက်နဲ့တော့ ကျွန်မကိုယ်ကျွန်မ အနစ်နာမခံနိုင်ပါဘူး"

"ကျွန်မ လက်ထပ်ချင်တဲ့လူကတော့ တုနှိုင်းမရတဲ့ သူရဲကောင်းတစ်ယောက်ပဲ ဖြစ်ရမယ်" ဟု ပြန်ပြောလိုက်သည်။

သူမ၏စကားမှာ လင်ယန်ရွှယ်၏ ချွမ်ရွှယ်ဂိုဏ်း ကို သွယ်ဝိုက်ရည်ညွှန်းနေခြင်းဖြစ်ပြီး၊ သူမ ခဏနေထိုင်စဉ်အတွင်း ယွဲ့ချင်းရိုက လင်ယန်ရွှယ်နှင့် လင်းချွမ်းတို့အကြောင်းကို ပြောပြထားပြီးဖြစ်ကြောင်း ပြသနေခြင်း။

ထိုသို့တွေးမိသောအခါ လင်ယန်ရွှယ်သည် ယွဲ့ချင်းရိုကို ဒေါသတကြီး စိုက်ကြည့်လိုက်သည်။

သို့သော် ယွဲ့ချင်းရိုက ဂရုမစိုက်သည့်အပြင် နောက်ထပ် စကားတစ်ခွန်းကိုပါ ခပ်ပေါ့ပေါ့ပင် ထပ်ဖြည့်လိုက်သေး​၏။

"သူတို့က တကယ့်ကို ဖြောင့်မတ်ပြီး ရည်မှန်းချက်ကြီးတဲ့သူတွေပဲ"

"ဂိုဏ်းခေါင်းဆောင်လို့သာ အမည်ခံထားပြီး တစ်ချိန်လုံး သူများနောက် တကောက်ကောက်လိုက်၊ အရိပ်တကြည့်ကြည့်လုပ်နေတဲ့ သူခိုးလေးတချို့နဲ့ မတူဘူး"

"အဲဒီလို လိုက်နေရုံတင်မကဘဲ ဂိုဏ်းအကျိုးအတွက်ဆိုပြီး ဆင်ခြေအမျိုးမျိုး ပေးနေသေးတယ်"

"လူရယ်စရာဖြစ်မှာကို မကြောက်ကြဘူးလားမသိဘူး"

လူစုမှာ အချင်းချင်း စကားများတော့မည့်အခြေအနေကို မြင်သောအခါ လင်ချွမ်မှာ ဝင်ရောက်ဖျန်ဖြေရန် စကားပြောလိုက်ရတော့​၏။

"ကဲ တော်ကြပါတော့၊ လူတစ်ယောက်ချင်းစီမှာ မတူညီတဲ့ အခြေအနေတွေ ရှိကြတာပဲ၊ စိတ်ကူးတွေ ကွဲပြားတာက သဘာဝပါ"

ထိုသို့ပြောပြီးနောက် သူသည် ရှန်ယွီဘက်သို့ လှည့်ကာ "မင်းက သံဓားဂိုဏ်းကို ပြန်လည်ထူထောင်ချင်တယ်ဆိုရင် ငါကူညီနိုင်ပါတယ်"

"ဒါပေမဲ့ သံဓားဂိုဏ်းကို ပြန်လည်ထူထောင်ဖို့အတွက် မင်း တခြားဂိုဏ်းတစ်ခုမှာ တပည့်အဖြစ် သွားမဝင်ချင်တာ တကယ်ပဲ သေချာလား" ဟု မေးလိုက်သည်။

လင်ချွမ်က ကူညီမည်ဟု ပြောသောအခါ ရှန်ယွီမှာ စိတ်လှုပ်ရှားမှုကို မထိန်းနိုင်တော့ပေ။

သို့သော် လင်ချွမ်ဆိုလိုသည့် "အကူအညီ" မှာ သူ၏ဩဇာအာဏာကို သုံး၍ တပည့်များရှာပေးခြင်း သို့မဟုတ် အဆက်အသွယ်များ လုပ်ပေးခြင်းဟု သူမ အထင်မှားသွားခဲ့သည်။

ခဏမျှ စဉ်းစားပြီးနောက် ရှန်ယွီက ငြင်းပယ်ရန် ဆုံးဖြတ်လိုက်သည်။

"သံဓားဂိုဏ်း ပြန်လည်ရှင်သန်ဖို့ ဆိုတာက ခက်ခဲလွန်းပါတယ်"

"ကျွန်မလို အသုံးမကျတဲ့သူက တခြားဂိုဏ်းကို သွားခွင့်ရရင်တောင် အောက်ခြေအဆင့်မှာပဲ ဝေ့လည်လည် ဖြစ်နေမှာပါ"

"ဒီမှာပဲ နေရတာက ပိုပြီး စိတ်အေးချမ်းရပါတယ်"

ထိုစကားကို ကြားသောအခါ သူမ အထင်မှားနေကြောင်း လင်ချွမ် နားလည်သွားသဖြင့် သူ၏အိတ်ကပ်ထဲမှ ဆေးလုံးနှစ်လုံးကို ထုတ်ယူလိုက်​၏။

ဆေးလုံးနှစ်လုံးကို မြင်သောအခါ ဓားနတ်ဘုရား ၏ မျက်နှာအမူအရာမှာ ပြောင်းလဲသွားသည်။

လင်ချွမ်​၏ လက်ထဲတွင် ရှိနေသည်မှာ အခြားမဟုတ်ဘဲ 'မြကျောက်စိမ်း နုပျိုဆေး' နှင့် 'ခရမ်းရောင် ကျောက်စိမ်းဆေးလုံး' တို့ ဖြစ်နေသောကြောင့်ပင်။

ထိုဆေးနှစ်မျိုး၏ အာနိသင်ကို ကိုယ်တိုင်မြင်တွေ့ဖူးထားသဖြင့် ၎င်းတို့ မည်မျှ ရှားပါးကြောင်း ဓားနတ်ဘုရားက အသိဆုံးဖြစ်သည်။

လင်ချွမ်​၏ အစောပိုင်းက မေးခွန်းကို ပြန်တွေးကြည့်လိုက်လျှင် လင်ချွမ်သည် ထိုဆေးနှစ်လုံးကို ရှန်ယွီအား ပေးကာ သူမ၏ ကျင့်ကြံမှုကို ပြန်လည်ရရှိအောင် ကူညီပေးချင်နေကြောင်း သူ နားလည်သွား​၏။

ခဏတာမျှ ဓားနတ်ဘုရားသည် ထူးထူးခြားခြားပင် မနာလိုစိတ် အနည်းငယ် ဖြစ်ပေါ်သွားခဲ့သည်။

ဆေးလုံးများကို မက်မော၍ မဟုတ်ဘဲ သူ၏တပည့်မိုက်အတွက် နောက်ထပ် "အချစ်ပြိုင်ဘက်" တစ်ယောက် တိုးလာဦးမည်ကို သိလိုက်သောကြောင့်ပင်။

"ဒါကို သောက်ပြီးရင် မင်းရဲ့ သွေးကြောတွေထဲကတစ်ဆင့် ကိုယ်တွင်းအားတွေကို လှည့်ပတ်ပေးဖို့ ငါကူညီမယ်"

"မင်း ပညာတွေ ပြန်သင်နိုင်မှာပါ"

"ဒါပေမဲ့ မင်းရဲ့ သွေးကြောတွေက ပျက်စီးသွားခဲ့တာဖြစ်သလို မင်းကလည်း အသက်ကြီးနေပြီ"

"ဆရာကောင်းတစ်ယောက်ရဲ့ လမ်းညွှန်မှုမပါရင်တော့ အနာဂတ်မှာ အောင်မြင်မှုကြီးကြီးမားမား ရဖို့ ခက်ခဲလိမ့်မယ်"

လမ်းညွှန်ချက်ပေးပြီးနောက် လင်ချွမ်သည် ရှန်ယွီ၏အဖြေကို မစောင့်ဘဲ တင်ပျဉ်ခွေထိုင်ကာ သွေးသားအင်အားများ လှည့်ပတ်ရန် စောင့်ဆိုင်းနေလိုက်​၏။

ရှန်ယွီသည် သူမ၏ဘဝကို အစကပြန်စနိုင်မည်ဟု တစ်ခါမျှ မတွေးခဲ့ဖူးပေ။

သို့သော် လင်ချွမ်​၏ခ ယုံကြည်ချက်ရှိပြီး တည်ကြည်သော စကားများကို မြင်သောအခါ သူ၏အကြံပြုချက်အတိုင်း ဆေးလုံးကို သောက်လိုက်ရတော့သည်။

"ကျင့်ကြံဖို့ အခွင့်အရေးရတာကိုက ကောင်းချီးတစ်ခုပါပဲ၊ အောင်မြင်မှုတွေအထိ ကျွန်မ မမျှော်လင့်ရဲပါဘူး"

"ဒါပေမဲ့ သခင်လေးရဲ့ ကျင့်စဉ်က သွေးအားဆုံးရှုံးမှု ရှိနိုင်တယ်လို့ သိရပါတယ်၊ ဒါက ကျွန်မလို သူစိမ်းတစ်ယောက်အတွက်တော့ အများကြီး ပေးဆပ်ရလွန်းပါတယ်"

"အဲဒီတော့ ဒါကို လက်လျှော့လိုက်ကြရင် မကောင်းဘူးလား"

လင်ချွမ် စကားပြောရန် ပြင်လိုက်စဉ်မှာပင် လင်ယန်ရွှယ်၏ သရော်သံကို ကြားလိုက်ရသည်။

"သူ့ကို သနားမနေပါနဲ့"

"သူက အတုမရှိ ကျင့်ကြံမှုတွေရှိတဲ့ မိစ္ဆာအိုကြီးပဲ"

"သူက မင်းကို အင်အားနဲ့ သွေးသားတွေ လွှဲပြောင်းပေးရုံတင်ပါ"

"သူ ဘာမှ ဆုံးရှုံးသွားမှာ မဟုတ်ဘူး"

ရှန်ယွီအတွက်မူ လင်ယန်ရွှယ်၏ စကားမှာ ကဲ့ရဲ့ခြင်းသက်သက်သာဖြစ်ပြီး လင်ချွမ်က မည်မျှအထိ စွမ်းဆောင်နိုင်သည်ကို သူမ မစဉ်းစားမိပေ။

သို့သော်လည်း အလျှော့မပေးလိုသော စိတ်ကြောင့် ရှန်ယွီက ပြန်လည်တုံ့ပြန်လိုက်သည်။

"မိစ္ဆာအိုကြီးပဲဖြစ်ဖြစ်၊ ရုပ်ချောတဲ့ သခင်လေးပဲဖြစ်ဖြစ်၊ သူတို့က ရှားပါးတဲ့ သူရဲကောင်းတွေပါပဲ"

"အနည်းငယ်မျှသော ဆုံးရှုံးမှု ဖြစ်မယ်ဆိုရင်တောင် ကျွန်မကတော့ အမြဲတမ်း ကျေးဇူးတင်နေမိမှာပါ"

ထိုစကားကို ကြားသောအခါ လင်ယန်ရွှယ်မှာ ပို၍ပင် ဒေါသထွက်သွားပြီး တစ်ခုခု ထပ်ပြောရန် ပြင်လိုက်စဉ် လင်ချွမ်က ကြားဖြတ်ပြောလိုက်ရ​၏။

"ကဲ တော်ကြတော့၊ မင်း ပညာသင်ချင်သေးတယ်ဆိုရင် မြန်မြန်ထိုင်၊ ငါ ခဏနေရင် လုပ်စရာ အရေးကြီးတဲ့ကိစ္စတွေ ရှိသေးတယ်"

ထိုစကားကို ကြားသောအခါ ရှန်ယွီသည် ကျေးဇူးတင်စကား အမြန်ပြောကာ တင်ပျဉ်ခွေ ထိုင်လိုက်သည်။

မျက်လုံးမမှိတ်မီ သူမသည် လင်ယန်ရွှယ်ကို အောင်နိုင်သူအမူအရာဖြင့် တစ်ချက်ကြည့်လိုက်သေးသည်။

ထိုအပြုအမူကို မြင်သောအခါ လင်ယန်ရွှယ်မှာ ဒေါသထွက်ရုံမှတစ်ပါး ဘာမျှ မတတ်နိုင်ခဲ့ပေ။

အခန်း (၁၆၄) သွေး၊ လေလှည့်ပတ်မှုကို လှုံ့ဆော်ပေးခြင်း

လင်ချွမ်သည် ရှန်ယွီ၏နောက်ကျောတွင် တင်ပလ္လင်ခွေထိုင်လိုက်ပြီး သူ၏ညာလက်ကို ဖြည်းညှင်းစွာဆန့်ထုတ်ကာ သူမ၏ကျောပြင်ပေါ်သို့ တင်လိုက်သည်။

သူ၏ခန္ဓာကိုယ်အတွင်းရှိ နက်ရှိုင်းလှသော အတွင်းအားများသည် စတင်လည်ပတ်လာပြီး ခန္ဓာကိုယ်အနှံ့အပြားမှ အင်အားစုများသည် လင်ချွမ်​၏ သွေးကြောမျှင်များအတွင်းသို့ စုစည်းရောက်ရှိလာကြ​၏။

ထိုသို့ အရှိန်အဟုန်ဖြင့် စီးဆင်းလာသော အတွင်းအားများသည် မြစ်ကြီးတစ်စင်းကဲ့သို့ တစ်ဖက်လူ၏ ခန္ဓာကိုယ်အတွင်းသို့ အဆက်မပြတ် စီးဝင်သွားတော့သည်။

သူမ၏ကျောပြင်ပေါ်သို့ အပူရှိန်များ စိမ့်ဝင်လာပြီး လင်ချွမ်​၏ နွေးထွေးသော လက်ဖဝါးကို ခံစားလိုက်ရချိန်တွင် ရှန်ယွီ၏ ခန္ဓာကိုယ်သည် အနည်းငယ် တုန်ရင်သွားကာ မျက်နှာတွင်လည်း ရှက်သွေးဖြန်းသွားလေ​၏။

ထို့နောက် အပူရှိန်သည် ခန္ဓာကိုယ်အတွင်းသို့ လျင်မြန်စွာ ဝင်ရောက်သွားပြီး ကျောပြင်မှတစ်ဆင့် အပြင်ဘက်သို့ ဖြာထွက်လာသည်။

ရေထဲသို့ ကျသွားသော မင်စက်ကဲ့သို့ပင် ထိုအပူရှိန်များသည် ကြွက်သားများနှင့် သွေးကြောများအတွင်းသို့ ပြင်းထန်စွာ ပျံ့နှံ့သွားလေ​၏။

စွမ်းအားများမှာ အတိုင်းအတာတစ်ခုအထိ သိပ်သည်းလာပြီးနောက်တွင် အရေအတွက်ပြောင်းလဲမှုမှသည် အရည်အသွေးပြောင်းလဲမှုအဖြစ်သို့ ကူးပြောင်းသွားသည်။

ဤစွမ်းအင်များသည် မြစ်တစ်စင်းအဖြစ် ပြန်လည်စုစည်းကာ သွေးကြောမျှင်များအတွင်း အရှိန်အဟုန်ဖြင့် စီးဆင်းသွားကြသည်။

ယခင်က ပိတ်ဆို့နေသော နေရာများသည်လည်း ဤစင်ကြယ်သော စွမ်းအားများရှေ့တွင် အရည်ပျော်စပြုလာ​၏။

မြစ်ကြမ်းပြင်ကို အဆက်မပြတ် ရိုက်ခတ်နေသော ရေလှိုင်းများကဲ့သို့ပင်၊ ၎င်းတို့သည် အတားအဆီးများကို နောက်ဆုံးတွင် ကျော်ဖြတ်နိုင်ခဲ့ပြီး အမှတ်အသားများကို ချန်ရစ်ခဲ့သည်။

"ဟူး..."

လေအေးတစ်ချက်သည် ရုတ်တရက် ပေါ်ထွက်လာပြီး သူတို့နှစ်ဦးကို ဝန်းရံကာ လှည့်ပတ်တိုက်ခတ်သွားပြီးနောက် ဝဲဂယက်တစ်ခုအဖြစ် အလိုအလျောက် ဖြစ်ပေါ်လာခဲ့​၏။

ထိုလေများသည် တစ်စုံတစ်ခုသော စွမ်းအားဖြင့် ဆွဲငင်ခံရခြင်းဟု ထင်ရသော်လည်း အမှန်တကယ်တွင်မူ ထိုသို့မဟုတ်ပေ။

၎င်းတို့သည် မမြင်နိုင်သော နိယာမတစ်ခုအရ အလိုအလျောက် လည်ပတ်နေကြခြင်းသာ။

လင်ချွမ်သည် ရှန်ယွီ၏ ပျက်စီးနေသော သွေးကြောမျှင်များကို ကုသပေးရန် စွမ်းအားများကို အသုံးပြုနေစဉ်၊ ရှန်ယွီ မြိုချထားသော 'မြကျောက်စိမ်း နုပျိုစေသော ဆေး' နှင့် 'ခရမ်းရောင် ကျောက်စိမ်းဆေးလုံး' တို့သည်လည်း စတင် အာနိသင်ပြလာသည်။

အဖိုးတန်ဆေးနှစ်မျိုးသည် ရှန်ယွီ၏ လည်ချောင်းအတွင်းသို့ ရောက်ရှိသွားသည်နှင့် တစ်ပြိုင်နက် နူးညံ့သော်လည်း အစွမ်းထက်သော ဆေးစွမ်းအင်များအဖြစ် ပြောင်းလဲသွားပြီး ခန္ဓာကိုယ်အတွင်း၌ လျင်မြန်စွာ ပေါက်ကွဲထွက်လာ​၏။

ထိုအချိန်တွင် သူမ၏ ခန္ဓာကိုယ်အပူချိန်သည် ရုတ်တရက် မြင့်တက်လာပြီး ဆေးအာနိသင် ပြင်းထန်လွန်းသောကြောင့် မျက်နှာမှာ နီမြန်းလာကာ သွေးကြောများပင် ထောင်တက်လာသည်။

ခဏတာမျှ ရှန်ယွီသည် လင်ချွမ်က သူမကို ကယ်တင်နေခြင်းလား သို့မဟုတ် ဒုက္ခပေးနေခြင်းလား ဆိုသည်ကိုပင် မဝေခွဲနိုင်ဖြစ်သွားရ​၏။

"အသက်ကို အောင့်ထားပြီး စိတ်ကိုစုစည်းပါ"

"မင်းတို့ သံဓားဂိုဏ်း ရဲ့ ကျင့်စဉ်အတိုင်း အတွင်းအားကို လှည့်ပတ်ကြည့်ပါ"

လင်ချွမ်​၏ အသံကို ကြားရသောအခါ ရှန်ယွီသည် မသိစိတ်ဖြင့် သူခိုင်းသည့်အတိုင်း လိုက်လုပ်မိသော်လည်း ရုတ်တရက် ကျောရိုးထဲမှ စိမ့်တက်သွားသော အအေးဓာတ်ကို ခံစားလိုက်ရသည်။

'ငါ့ရဲ့ သွေးကြောမျှင်တွေက အခု ပျက်စီးနေတာ။ ငါသာ အတွင်းအားကို အတင်းအဓမ္မ လှည့်ပတ်လိုက်ရင် သွေးကြောအားလုံး ပျက်စီးသွားလိမ့်မယ်။ ဒါက သိပ်ပြီး အန္တရာယ် မများလွန်းဘူးလား။'

ရှန်ယွီ တွေဝေနေစဉ်မှာပင် လင်ချွမ်​၏ အသံသည် ထပ်မံ ထွက်ပေါ်လာသည်။

"စိတ်ကို စုစည်းပါ"

"ဒီဆေးရဲ့ အာနိသင်က မင်းရဲ့ လက်ရှိခန္ဓာကိုယ်က ခံနိုင်ရည်ရှိတာထက် ပိုပါတယ်"

"ဒါကို ကျော်ဖြတ်ချင်ရင် စိတ်မလေပါနဲ့"

"ငါသာ မင်းကို ဒုက္ခပေးချင်ရင် ဒီလိုတွေ လုပ်နေဖို့ လိုဦးမလား"

ပြောနေစဉ်မှာပင် လင်ချွမ်သည် ဆေးအာနိသင်များကို သွေးကြောများ၏ အက်ကြောင်းများတွင် ကပ်ငြိစေရန် သူ၏ စွမ်းအားဖြင့် ကျွမ်းကျင်စွာ လမ်းညွှန်ပေးလိုက်သည်။

မကြာမီအချိန်အတွင်းမှာပင် ပျက်စီးနေသော သွေးကြောမျှင်များသည် အသက်ဓာတ် ပြန်လည်ရရှိလာပြီး တစ်ခုနှင့်တစ်ခု ပြန်လည်ဆက်စပ်ကာ ဆေးအာနိသင်ကြောင့် လျင်မြန်စွာ ကျန်းမာလာခဲ့​၏။

ဤကုသမှု၏ လမ်းညွှန်မှုကြောင့် ကျန်ရှိနေသော ဆေးအာနိသင်များသည်လည်း အလိုအလျောက် လည်ပတ်လာသည်။

၎င်းတို့သည် ပုံစံတစ်ခုအဖြစ် အလိုအလျောက် ဖြစ်ပေါ်လာပြီး လင်ချွမ်​၏ အကူအညီဖြင့် ရှန်ယွီ၏ သွေးကြောမျှင်များကို ပြုပြင်ပေးလိုက်သည်။

တစ်နာရီအတွင်း ရှန်ယွီ၏ အတွင်းဒဏ်ရာများမှာ အတော်အတန် သက်သာသွားပြီး လွန်ခဲ့သော နှစ်များက ကျန်ရှိနေခဲ့သော ဒဏ်ရာဟောင်းများပင် တိတ်တဆိတ် ပျောက်ကွယ်သွားခဲ့သည်။

လင်ချွမ်သည် အချိန်ကိုက် ရပ်တန့်လိုက်ပြီး သူမ၏ ခန္ဓာကိုယ်က ဆေးနှစ်လုံး၏ အာနိသင်ကို သူ့ဘာသာသူ စုပ်ယူနိုင်ရန် ခွင့်ပြုပေးလိုက်​၏။

မကြာမီ ရှန်ယွီ ထိုင်နေသော နေရာမှ စွမ်းအင်လှိုင်းတစ်ခု ရုတ်တရက် ထွက်ပေါ်လာသည်။

ထို့နောက် ပြင်းထန်လှသော ဓားဆန္ဒ များ ရုတ်တရက် ပေါက်ကွဲထွက်လာသည်။

သူမ၏အနားရှိ ခြောက်သွေ့နေသော သစ်သားခြံစည်းရိုးတိုင်အချို့မှာ တုန်ခါသွားပြီးနောက် ဓားဆန္ဒ၏ ရိုက်ခတ်မှုကြောင့် အမှုန့်အဖြစ် ကြေမွသွားတော့​၏။

မကြာခင်မှာပင် ရှန်ယွီသည် မျက်လုံးများကို ပြန်လည်ဖွင့်လိုက်ပြီး သူမ၏ မျက်ဝန်းများတွင် အံ့အားသင့်မှုများ ပြည့်နှက်နေသည်။

'သွေးလေကို လှုံ့ဆော်ပေးခြင်း' ဟု ခေါ်ဆိုသည့် ဤနည်းလမ်းသည် သွေးကြောများကို ပိတ်ဆို့မှုဖြေဖျောက်ပေးပြီး ကျင့်စဉ်လမ်းကြောင်းကို ပြန်လည်တည်ဆောက်ပေးခြင်းနှင့် ဆင်တူလေ​၏။

၎င်းမှာ လွယ်ကူသော အလုပ်မဟုတ်ဘဲ လူတိုင်းလည်း မလုပ်နိုင်ပေ။

အကြောင်းမှာ သွေးကြောမျှင်များသည် ကျင့်စဉ်အတွက်သာမက လူ့ခန္ဓာကိုယ်အတွက်ပါ အရေးကြီးသော အစိတ်အပိုင်းဖြစ်သောကြောင့်။

ကျင့်ကြံသူတွင် လုံလောက်သော အရည်အချင်းမရှိပါက ဒဏ်ရာမှာ ပိုမိုပြင်းထန်သွားနိုင်ပြီး ကျန်ရှိသော ဘဝတစ်လျှောက်လုံးတွင် ကိုယ်ခံပညာကို လေ့ကျင့်နိုင်တော့မည် မဟုတ်ပေ။

အဆိုးရွားဆုံး အခြေအနေတွင် သေဆုံးသည်အထိ ဖြစ်နိုင်သည်။

ထို့ကြောင့် ဤနည်းလမ်းကို အသုံးပြုနိုင်ရန် ကျင့်ကြံသူသည် အနည်းဆုံး 'အဆင့် ၃ ကျွမ်းကျင်သူ' အဆင့်ရှိရမည် ဖြစ်ပြီး စွမ်းအားကို ထိန်းချုပ်နိုင်စွမ်းမှာလည်း အလွန်ပင် သိမ်မွေ့ရမည်။

လင်ချွမ်သည် ထိုအချက်နှစ်ချက်လုံးနှင့် ပြည့်စုံသဖြင့် မောပန်းခြင်း လက္ခဏာပင် မပြဘဲ အလွန်လွယ်ကူစွာ လုပ်ဆောင်နိုင်ခဲ့ခြင်းပင်။

သူသည် သူမ၏ ကိုယ်တွင်းရှိ ဒဏ်ရာဟောင်းများကိုပင် ဖယ်ရှားပေးရန် ခွန်အားပိုရှိသေးသည်။

ဒဏ်ရာမရခင်က ရှန်ယွီသည် အဆင့် ၆ ကျွမ်းကျင်သူ တစ်ဦးဖြစ်သည်။

သူမ၏ ကျင့်စဉ်များ ပျက်စီးသွားပြီး သွေးကြောများ ပြတ်တောက်သွားသောကြောင့် နောင်တွင် ကျင့်ကြံရန် အခွင့်အရေး မရှိတော့ဟု သူမ ထင်ခဲ့သည်။

သူမ၏ မှတ်ဉာဏ်ထဲမှ နည်းစနစ်များဖြင့် တပည့်အချို့ကို သင်ကြားပေးပြီး သံဓားဂိုဏ်းကို ပြန်လည်ဖွင့်လှစ်နိုင်လျှင်ပင် ကြီးမားသော အောင်မြင်မှုဟု မှတ်ယူခဲ့​၏။

သို့သော် ယခုအခါ သူမ၏ ခန္ဓာကိုယ်အတွင်း၌ ကြီးမားသော ပြောင်းလဲမှုများ ဖြစ်ပေါ်ခဲ့သည်။

ပျက်စီးနေသော သွေးကြောမျှင်များမှာ ပြန်လည်ကောင်းမွန်လာရုံသာမက ယခင်ကထက်ပင် ပိုမိုကျယ်ဝန်းကာ ခိုင်ခံ့လာသည်။

ပို၍အရေးကြီးသည်မှာ သူမသည် ယခင်က အဆင့် ၆ ကျင့်ကြံသူသာ ဖြစ်သော်လည်း ယခုအခါ ဆေးအာနိသင်ကြောင့် အဆင့် ၄ ၏ အမြင့်ဆုံးအဆင့် သို့ ခုန်တက်ရောက်ရှိသွားခြင်ပင်။

နောက်တစ်ဆင့် တက်လှမ်းရုံဖြင့် သူမသည် အဆင့် ၃ ကျွမ်းကျင်သူ ဖြစ်လာတော့မည်။

၎င်းကို လုံးဝဥဿုံ ပြောင်းလဲသွားခြင်းဟု ဖော်ပြနိုင်သည်။

ရှန်ယွီသည် မိုက်မဲသူမဟုတ်ပေ။

ထိုဆေးနှစ်လုံး၏ အဖိုးတန်မှုကို သူမ ကြိုတင်မသိခဲ့သော်လည်း ယခု သူမ ခန္ဓာကိုယ်အတွင်းရှိ ပြောင်းလဲမှုများက ထိုဆေးများ၏ ထူးခြားမှုကို သက်သေပြနေသည်။

သူမသာ ဒဏ်ရာမပြင်းထန်ခဲ့ဘဲ ပါရမီ အနည်းငယ်ရှိပါက ထိုဆေးနှစ်လုံးတည်းနှင့်ပင် အဆင့် ၃ သို့မဟုတ် ထို့ထက်ပိုမြင့်သော အဆင့်သို့ တက်လှမ်းနိုင်မည်ကို သူမ သိရှိလိုက်သည်။

၎င်းမှာ အမှန်ပင်။

'ခရမ်းရောင် ကျောက်စိမ်းဆေးလုံး' တစ်လုံးတည်းဖြင့်ပင် ယွဲ့ချင်းရိုသည် အဆင့်နှစ်ဆင့်ကျော် တက်လှမ်းနိုင်ခဲ့သည်။

ယခုကဲ့သို့ 'မြ ကျောက်စိမ်း နုပျိုစေသော ဆေးဆီ' နှင့်သာ ပေါင်းစပ်လိုက်လျှင် အကျိုးကျေးဇူးမှာ ပြောနေစရာပင် မလိုတော့ပေ။

ဆေးအာနိသင် အများစုမှာ သွေးကြောများကို ကုသရန် အသုံးပြုခဲ့ရသော်လည်း အာနိသင် အတော်များများမှာ သူမ၏ ခန္ဓာကိုယ်ထဲတွင် ကျန်ရှိနေသေးသည်။

နောင်တွင် ရှန်ယွီ ဆက်လက်ကျင့်ကြံသည့်အခါ ဤစွမ်းအားများသည် သူမကို ပိုမိုမြင့်မားသော အဆင့်များသို့ ရောက်ရှိရန် ကူညီပေးလိမ့်မည်။

သို့သော် ၎င်းမှာ ရှန်ယွီ၏ အနာဂတ်ကိစ္စသာ။

လင်ချွမ်သည် ရှန်ယွီကို ပြောလိုက်သည်။

"ကဲ... အခု မင်းရဲ့ ဒဏ်ရာတွေ အတော်လေး သက်သာသွားပြီး လမ်းလျှောက်လို့ ရပြီဆိုတော့၊ ဒဏ္ဍာရီလာ နတ်ဘုရားတွေရဲ့ စစ်မြေပြင်နဲ့ ရွှေကြောတွေရှိတဲ့ နေရာကို ငါတို့ကို ခေါ်သွားပေးပါ"

ရှန်ယွီသည် တွန့်ဆုတ်နေခြင်းမရှိဘဲ ခေါင်းညိတ်ကာ ပြောလိုက်သည်။

"ကျွန်မနောက်ကို လိုက်ခဲ့ကြပါ ရှင်"

ရှန်ယွီ၏ နောက်သို့လိုက်ရင်း သူတို့အဖွဲ့သည် ရွှေကြောများရှိရာသို့ ဦးတည်သွားကြသည်။

အကွာအဝေးမှာ မဝေးသောကြောင့် သူတို့သည် ပျံသန်းမသွားဘဲ ခြေကျင်သာ သွားခဲ့ကြ​၏။

လမ်းခရီးတစ်လျှောက်တွင် ရှန်ယွီ ပြောခဲ့သည့်အတိုင်း ထိုဒေသမှာ အလွန်ပင် ခြောက်သွေ့ဖုန်းဆိုးနေပြီး စိုက်ပျိုးမြေ ရှားပါးလှသည်။

ရံဖန်ရံခါ မြင်တွေ့ရသော အပင်အနည်းငယ်မှာလည်း အရွက်များ ဝါနေကာ အချိန်မရွေး သေဆုံးသွားနိုင်သည့်ပုံစံမျိုးဖြင့် ညှိုးနွမ်းနေကြ​၏။

လင်ချွမ်​၏ အကြည့်ကို သတိပြုမိသွားဟန်ဖြင့် ရှန်ယွီ၏ မျက်ဝန်းများတွင် ရှုပ်ထွေးသော အရိပ်အယောင်များ ပေါ်လာကာ သူမက သက်ပြင်းသဲ့သဲ့ ချလိုက်သည်။

"ဒီနေရာက အမြဲတမ်း ဒီလိုပါပဲရှင်"