အခန်း (၁၄၉၉-၁၅၀၀)

အခန်း ၁၄၉၉ - ပထမအကျော့ ပြီးဆုံးခြင်း

လျိုစန်း၏ စက္ကူရုပ်များသည် တာဟိုင်မြို့တွင် ပြန်လည် လှုပ်ရှားလာသည်နှင့်အမျှ သတင်းအချက်အလက် အမျိုးမျိုးကို တရစပ် ပေးပို့လာကြသည်။

လက်ကျန် ခေါင်းဆောင်များကို စုစည်းရန် ယန်ကျန့်၏ အမိန့်သည်လည်း လူတိုင်း၏ နားထဲသို့ လျင်မြန်စွာ ရောက်ရှိသွားသည်။

"ကြည့်ရတာ ဘုရင်အဖွဲ့အစည်းရဲ့ ပထမအကျော့ တိုက်ခိုက်မှု ပြီးဆုံးသွားပြီ ထင်တယ် ဒီအချိန်မှာ စုစည်းခိုင်းတာက တန်ပြန်တိုက်ခိုက်ဖို့ ကြံစည်နေတာလား ထားလိုက်ပါတော့ ဘာပဲဖြစ်ဖြစ် ယန်ကျန့်က ဒီလို ဆုံးဖြတ်လိုက်မှတော့ ငါ့လက်ထဲက အလုပ်တွေကို ခဏ ဘေးဖယ်ထားရတော့မှာပေါ့ ဒီတခါ လှုပ်ရှားမှုက အရမ်းကြီး ဆူညံမသွားရင် ကောင်းမယ်"

လီလဲ့ဖိန်သည် စက္ကူရုပ် ပေးပို့လာသော သတင်းကို လက်ခံရရှိလိုက်သည်။ သူသည် အခြားသူများ၏ မေ့လျော့ခြင်းကို ခံလိုက်ရသည်လား သို့မဟုတ် ကံကောင်းနေသည်လား မသိပေ။ ဘုရင်အဖွဲ့အစည်း၏ ပစ်မှတ်ထားခြင်းကို မခံခဲ့ရပေ။ ဒီအတောအတွင်း သူသည် သဘာဝလွန် ဖြစ်ရပ်များကို ဖြေရှင်းပေးနေခြင်းဖြင့်သာ အချိန်ကုန်ဆုံးခဲ့သည်။

ဘုရင်အဖွဲ့အစည်းက သူ့ကို မတိုက်ခိုက်ချင်၍ မဟုတ်ဘဲ လီလဲ့ဖိန်ဆိုသော လူတစ်ယောက် ရှိနေသည်ကို မမှတ်မိကြသောကြောင့် ဖြစ်ကောင်းဖြစ်နိုင်သည်။

အခြားတစ်ဖက်တွင် ဟယ်ယွဲ့လျန်သည်လည်း စက္ကူရုပ်၏ သတင်းကို လက်ခံရရှိလိုက်သည်။ သူမ ဘာမှမပြောဘဲ သတ်မှတ်ထားသော နေရာသို့ သွားရောက် စုစည်းရန် ချက်ချင်း ပြင်ဆင်လိုက်သည်။ သူမသည် လုကျီဝမ်အတွက် လက်စားချေချင်ပြီး ထိုဘုရင်များကို သတ်ဖြတ်ချင်နေသည်။ သို့သော် အကြောင်းပြချက် တစ်စုံတစ်ရာကြောင့် ပျောက်ဆုံးသွားသော ထိုဘုရင်များသည် ယခုထိ သူမ၏ ပုံရိပ်ကို ပြန်လည် အမှတ်မရကြသေးပေ။

ထို့ကြောင့် ဟယ်ယွဲ့လျန်သည် သူတို့ရှိရာသို့ ကျူးကျော်ဝင်ရောက်၍ မရနိုင်သေးပေ။

"ယန်ကျန့်ရဲ့ အမိန့်က ပိုအရေးကြီးတယ် ဘုရင်အဖွဲ့အစည်း ကိစ္စက နောက်မှ ရှင်းလို့ရတယ်"

ဟယ်ယွဲ့လျန် စိတ်ထဲမှ တွေးလိုက်သည်။

ထို့အပြင် လီယန်ဘက်ကလည်း သတင်းရရှိထားပြီး ဖြစ်သလို ဟဲယင်အာလည်း စတင် လှုပ်ရှားနေပြီ ဖြစ်သည်။

မကြာမီ လက်ကျန် ခေါင်းဆောင်များသည် တစ္ဆေရေကန်ရှိရာသို့ ဦးတည် စုစည်းလာကြသည်။

ခဏလေးအတွင်းမှာပင် သူတို့အားလုံးနီးပါး ရောက်ရှိလာကြသည်။

"ဒီလောက်ပဲ ကျန်တော့တာလား"

တစ္ဆေရေကန်ပေါ်တွင် ရပ်နေသော ယန်ကျန့်သည် တစ်ချက် ဝေ့ဝဲကြည့်လိုက်ပြီး ဒီဘက်သို့ ရောက်လာသော ခေါင်းဆောင်များကို သတိထားမိလိုက်သည်။ လက်ရှိ လူအရေအတွက်ကို ကြည့်ပြီး သူ အံ့အားသင့်သွားသည်။

သူ တစ်ယောက်တည်း အံ့အားသင့်နေခြင်း မဟုတ်၊ အခြားသူများလည်း အနည်းငယ် ထိတ်လန့်သွားကြသည်။

အဘယ်ကြောင့်ဆိုသော် ဒီတကြိမ် စုစည်းမှုတွင် လူအများအပြား လျော့နည်းသွားသောကြောင့် ဖြစ်သည်။

"ကျိုးဒန်၊ လုကျီဝမ်၊ လင်းပေ၊ ပြီးတော့ ဝမ်ချာလင်း တချက်တည်းနဲ့ ခေါင်းဆောင်လေးယောက်တောင် လျော့သွားတာလား"

လီလဲ့ဖိန် ရင်ထဲထိတ်ခနဲ ဖြစ်သွားပြီး မနေနိုင်ဘဲ မေးလိုက်သည်။

ယန်ကျန့် ရှင်းပြလိုက်သည်။

"ဝမ်ချာလင်း မသေသေးဘူး သူက ဒဏ်ရာအပြင်းအထန် ရထားလို့ ယာယီ ဆုတ်ခွာသွားရတာ ဒါပေမယ့် သေချာတာတစ်ခုကတော့ ကျိုးဒန်၊ လုကျီဝမ် နဲ့ လင်းပေ သုံးယောက်စလုံး အသတ်ခံလိုက်ရပြီ"

"ကျိုးဒန်က ငါ့ကို ကာကွယ်ပေးရင်း ကျဆုံးသွားတာ"

ဟဲယင်အာ၏ မျက်နှာထား ညှိုးငယ်နေပြီး လေးလံသော လေသံဖြင့် ပြောလိုက်သည်။

"တစ်ဖက်လူရဲ့ ပထမအကျော့ တိုက်ခိုက်မှုမှာတင် ငါတို့ဘက်က ခေါင်းဆောင်သုံးယောက် သေဆုံးသွားတယ် ဝမ်မိသားစု တတိယမျိုးဆက်တောင် စောစောစီးစီး ဆုတ်ခွာလိုက်ရတယ် နောက်တစ်ကျော့သာ ထပ်တိုက်ခိုက်ရင် ငါတို့ ဌာနချုပ်တစ်ခုလုံး ပျက်စီးသွားလိမ့်မယ်"

လီယန်၏ အဖွဲ့ထဲမှ ဝမ်ကျုံးက ပြောလိုက်သည်။ သူ၏ စကားထဲတွင် စိုးရိမ်မှုများ ပါဝင်နေသည်။

လျိုစန်း ဝင်ပြောလိုက်သည်။

"တစ်ဖက်လူက ဒုတိယအကျော့ တိုက်ခိုက်မှုကို စတင်နိုင်မှာ မဟုတ်ဘူး ငါတို့ဘက်က အခြေအနေဆိုးပေမယ့် သူတို့ဘက်က ငါတို့ထက် ပိုဆိုးတယ် ဆုံးရှုံးသွားတဲ့ ဘုရင်အရေအတွက်က ပိုများတယ်

စောစောက ငါနဲ့ ယန်ကျန့် အကြမ်းဖျင်း စာရင်းကောက်ကြည့်တာ ရုပ်ရှင်ပြသူ၊ လူပြက်၊ သင်္ဘောသားဘုရင်၊ သာသနာပြုဆရာ၊ အိမ်ရှင်၊ စန္ဒရားဆရာနဲ့ သားသတ်သမား စုစုပေါင်း ဘုရင် ၇ ပါး ဒီတိုက်ပွဲမှာ သေဆုံးသွားတယ်

အရင်က ရဲကျန့် သတ်လိုက်တဲ့ လူသတ်သမားကိုပါ ထည့်တွက်ရင် စုစုပေါင်း ၈ ပါး ရှိသွားပြီ ဘုရင်အဖွဲ့အစည်းရဲ့ လူအရေအတွက်က ငါတို့ထက် များတယ်ဆိုပေမယ့် ဒီလို သေဆုံးမှုမျိုးကိုတော့ သူတို့လည်း ခံနိုင်ရည်ရှိမှာ မဟုတ်ဘူး"

"ဒါပေမယ့် အခုထိ ပေါ့ဆလို့ မရသေးဘူး တစ်ဖက်မှာ ကျန်နေတဲ့ ဘုရင်တွေလည်း မနည်းဘူး ဒါပေမယ့် ငါတို့ကို အပြတ်ရှင်းချင်တယ်ဆိုရင်တော့ အိပ်မက်မက်နေတာပဲ ငါတို့ရဲ့ အမာခံ အင်အားစုတွေ ရှိနေသေးတယ်"

သူ ပြောသော အမာခံ အင်အားစုဆိုသည်မှာ ယန်ကျန့်၊ ဟယ်ယွဲ့လျန်၊ ဟဲယင်အာ စသည့် အခြေအနေကို ပြောင်းလဲနိုင်စွမ်းရှိသော ခေါင်းဆောင်များကို ဆိုလိုသည်။ ထို့အပြင် ကျန်းရှန့်ကွမ်းလည်း တက်ကြွစွာ လှုပ်ရှားနေဆဲ ဖြစ်သည်။

ဒီအချိန်မှာ ရဲကျန့် ဘယ်ရောက်သွားမှန်း မသိရပေ။ စောစောက လျိုစန်း၏ စက္ကူရုပ် မြင်တွေ့လိုက်ရသည်မှာ သူသည် တာဟိုင်မြို့၏ တစ်နေရာတွင် အလွန် အစွမ်းထက်သော ဘုရင်တစ်ပါးနှင့် တိုက်ခိုက်နေသည်။ သို့သော် တိုက်ခိုက်ရင်း နှစ်ယောက်စလုံး ပျောက်ကွယ်သွားပြီး ယခုထိ ပြန်မလာသေးပေ။

ယန်ကျန့်က ဖြတ်ပြောလိုက်သည်။

"ငါ ဒီနေရာမှာ တစ်ချက် ပြင်ဆင်ချင်တယ် သင်္ဘောသားဘုရင်ဆိုတဲ့ ဘုရင်က အသတ်ခံလိုက်ရပြီဆိုပေမယ့် တကယ့် သင်္ဘောသားဘုရင် အစစ်က အသက်ရှင်နေသေးတယ် အဲဒီကောင်က တစ္ဆေသင်္ဘောပေါ်မှာ ရှိနေတယ် ပြီးတော့ သူက လူရှင် မဟုတ်ဘူး သင်္ဘောဝမ်းဗိုက် အနက်ရှိုင်းဆုံးနေရာမှာ ပုန်းအောင်းနေတဲ့ ကြောက်မက်ဖွယ် တစ္ဆေဆိုးတစ်ကောင်ပဲ ဒါကြောင့် အဲဒီ သင်္ဘောသားဘုရင်က နောက်ပိုင်းကျရင် ပြန်ပေါ်လာနိုင်တယ်"

"ပြီးတော့ ဂျပန်က တစ္ဆေရှင်းလင်းရေးအသင်းက ဒီစစ်ပွဲမှာ မပါဝင်သေးဘူး တကယ်လို့ သူတို့သာ ဒီအချိန်မှာ ဝင်ပါလာရင် ငါတို့အတွက် သေရေးရှင်ရေး ဖြစ်သွားနိုင်တယ်"

ပြောပြီးသည်နှင့် လူတိုင်း တိတ်ဆိတ်သွားကြသည်။

ဟုတ်ပါသည်။

ရန်သူက ဘုရင်အဖွဲ့အစည်း တစ်ခုတည်း မဟုတ်ပေ။ တစ္ဆေရှင်းလင်းရေးအသင်းလည်း ရှိသေးသည်။ တစ္ဆေရှင်းလင်းရေးအသင်းတွင် ထုတ်သုံးနိုင်သော လူအင်အား သိပ်မများသော်လည်း သူတို့တွင် ဝှက်ဖဲ မရှိဘူးဟု မည်သူ အာမခံနိုင်မည်နည်း။

"ယန်ကျန့် နောက်ဆက်တွဲ မင်း ဘယ်လို စီစဉ်ထားလဲ"

လျိုစန်း မေးလိုက်သည်။

ယန်ကျန့် ပြောလိုက်သည်။

"ရိုးရိုးလေးပါပဲ လက်ကျန် အင်အားအားလုံးကို စုစည်းပြီး တန်ပြန်တိုက်ခိုက်မယ် ဒုတိယအကျော့ တိုက်ခိုက်မှုကို ငါတို့ဘက်က အရင် စတင်မယ် ဘုရင်အဖွဲ့အစည်းရဲ့ လက်ကျန်လူတွေကို တာဟိုင်မြို့မှာပဲ အသေဖြတ်မယ် ဖြစ်နိုင်ရင် သူတို့ကို အကုန်ရှင်းပစ်မယ် ပြန်လှန်ဖို့ အခွင့်အရေး လုံးဝ မပေးဘူး"

"အဲဒီလိုပဲ လုပ်သင့်တယ်"

ဟဲယင်အာ ချက်ချင်း ထောက်ခံလိုက်သည်။

"ဒီအခြေအနေထိ ရောက်နေမှတော့ ဘာပြောစရာ ရှိတော့မှာလဲ သူတို့နဲ့ အသေအလဲ တိုက်ရုံပဲ ရှိတော့တာပေါ့ သူတို့ မသေရင် ငါတို့ ဘယ်တော့မှ အေးချမ်းမှာ မဟုတ်ဘူး"

လီယန်လည်း အံကြိတ်ပြီး ပြောလိုက်သည်။

သူတို့အဖွဲ့သည် ဘုရင်၏ တိုက်ခိုက်ခြင်းကို မခံရသော်လည်း သဘာဝလွန် ဖြစ်ရပ်များကို ရှင်းလင်းရာတွင် အန္တရာယ်များစွာ ကြုံတွေ့ခဲ့ရပြီး အထိအခိုက် အကျအဆုံး ဖြစ်လုနီးပါး ဖြစ်ခဲ့သည်။ ဒီကိစ္စတွေအားလုံးက တစ္ဆေသင်္ဘောကြောင့် ဖြစ်ရတာမို့ ဒီစာရင်းကို မရှင်းလို့ မဖြစ်ပေ။

"ငါတို့ လူနည်းစုလေးနဲ့ တစ်ဖက်လူကို နိုင်ပါ့မလား"

လီလဲ့ဖိန် မေးလိုက်သည်။

ယန်ကျန့်၏ ဆုံးဖြတ်ချက် မှန်ကန်သော်လည်း ယခုအချိန်တွင် နှစ်ဖက် အင်အားကို နှိုင်းယှဉ် သုံးသပ်ကြည့်ရန် လိုအပ်သည်။

"ငါ ယုံကြည်တယ် တစ်ဖက်မှာ ကျန်တဲ့ ဘုရင်အရေအတွက် မများတော့ဘူး ပြီးတော့ အခု တာဟိုင်မြို့မှာ သဘာဝလွန် ဖြစ်ရပ်တွေက ထိန်းချုပ်မရ ဖြစ်လာတဲ့ လက္ခဏာတွေ ပြနေပြီ ငါတို့မှာ စောင့်နေဖို့ အချိန်မရှိဘူး နောက်ပြီး ခင်ဗျားတို့ မမေ့ပါနဲ့ တစ္ဆေသင်္ဘောက စောစောက ထွက်ခွာသွားပြီ ဘယ်အချိန် ပြန်ကွေ့လာမလဲဆိုတာ ဘယ်သူမှ အာမခံနိုင်ဘူး ငါတို့က တစ်ဖက်လူ အရင် တိုက်ခိုက်လာမှာကို ထိုင်စောင့်နေရင် သွားပြီပဲ"

ယန်ကျန့် တိုက်ရိုက် ပြောလိုက်ပြီး သူ၏ စိုးရိမ်ပူပန်မှုကိုပါ ဖွင့်ဟလိုက်သည်။

လီလဲ့ဖိန် ပြောလိုက်သည်။

"ဟုတ်သားပဲ တစ္ဆေသင်္ဘောသာ နောက်တစ်ခေါက် ထပ်လာရင် ငါတို့ တကယ် တောင့်ခံနိုင်မှာ မဟုတ်တော့ဘူး ဒီလိုဆိုရင်တော့ အခုပဲ လှုပ်ရှားကြတာပေါ့ အရာအားလုံးကို အပြီးသတ်လိုက်ကြမယ်"

"လျိုစန်း မင်းရဲ့ စက္ကူရုပ်တွေ အကုန်သုံးပြီး တစ်ဖက်က ဘုရင်တွေရဲ့ တည်နေရာကို ရှာဖွေပေးပါ"

ယန်ကျန့် ချက်ချင်း အမိန့်ပေးလိုက်သည်။

"ငါ့စက္ကူရုပ်တွေ ဖြန့်ကျက်ထားပြီးသားပါ ဒါပေမယ့် အချိန်နည်းနည်း လိုမယ်"

လျိုစန်း ပြောလိုက်သည်။

ယန်ကျန့် ဆက်ပြောသည်။

"စောင့်နေတဲ့ အချိန်အတွင်းမှာ ငါတို့ အချိန်ဖြုန်းလို့ မဖြစ်ဘူး အနီးနားက သဘာဝလွန် ဖြစ်ရပ်တွေကို ရှင်းလင်းထားလို့ ရတယ်"

"မျက်နှာမဲ့လူက သွားရှင်းလင်းနေပြီ သူက တောက်လျှောက် ကူညီပေးနေတာ စောစောက သူသာ မအားမလပ် ဖြစ်မနေရင် ကျိုးဒန် သေမှာ မဟုတ်ဘူး"

ဟဲယင်အာ ပြောလိုက်သည်။

ယန်ကျန့် ပြောလိုက်သည်။

"ကျိုးဒန် သေဆုံးသွားတဲ့အတွက် မင်း ကိုယ့်ကိုယ်ကို အပြစ်တင်နေမှန်း ငါ သိပါတယ် ဒါပေမယ့် အခုက ဝမ်းနည်းနေရမယ့်အချိန် မဟုတ်ဘူး မင်းက ဝိညာဉ်ခေါ်သူလေ နောက်ကျရင် ဌာနချုပ်ကို သူ့ရဲ့ အမွေပစ္စည်းတွေ ရှာခိုင်းလိုက် မင်း ဆန္ဒရှိရင် ကျိုးဒန်ကိုရော တခြား သေဆုံးသွားတဲ့ ခေါင်းဆောင်တွေကိုရော ပြန်လည် ခေါ်ယူလို့ ရတာပဲ ဒါကြောင့် မင်း အသက်ရှင်နေသရွေ့ ငါတို့ ဌာနချုပ်ရဲ့ ခေါင်းဆောင်တွေ ဘယ်တော့မှ မျိုးတုံးသွားမှာ မဟုတ်ဘူး"

ဒီစကား ကြားလိုက်ရသည့်အခါ ဟဲယင်အာ၏ မျက်လုံးများ အရောင်လက်သွားသည်။

ဟုတ်သားပဲ။

သူမ ဝိညာဉ်ခေါ်လို့ ရသေးတာပဲ။

ပြီးတော့ ကျိုးဒန်ပဲဖြစ်ဖြစ် တခြား ခေါင်းဆောင်တွေပဲဖြစ်ဖြစ် သေဆုံးသွားတဲ့အခါ ကျန်ရစ်ခဲ့တဲ့ ပစ္စည်းတွေ အများကြီး ရှိမှာပဲ။ လက်ထဲ ရောက်တာနဲ့ ချက်ချင်း ဝိညာဉ်ခေါ်လို့ ရပြီ။ ဝိညာဉ်ခေါ်တဲ့ အကြိမ်ရေ များလာတာနဲ့အမျှ လူအတော်များများက တကယ်တမ်း သေဆုံးသွားတယ်လို့ သတ်မှတ်လို့ မရတော့ဘူး။ တနေ့ကျရင် သူတို့က ဒီကမ္ဘာလောကကြီးထဲမှာ ပြန်ပေါ်လာကြဦးမှာပဲ။

တခြားသူများလည်း ခေါင်းညိတ်ကြပြီး ဒါက ကောင်းမွန်တဲ့ နည်းလမ်းတစ်ခုဟု ထင်မြင်ကြသည်။

ဒီမြင်ကွင်းကို ကြည့်ပြီး ယန်ကျန့် အကြောင်းပြချက်မရှိဘဲ အစ်မဟုန်ကို သတိရလိုက်သည်။ အစ်မဟုန်သည်လည်း ဟဲယင်အာနှင့် ဆင်တူသော ကံကြမ္မာကို သယ်ပိုးထားသူ ဖြစ်သည်။ အစ်မဟုန် ရှိနေသရွေ့ သူမသည် သစ်သားရုပ်များမှတစ်ဆင့် သေဆုံးသွားသော အဖွဲ့ဝင်များကို တုပ ဖန်တီးနိုင်သည်။ ထိုသစ်သားရုပ်များသည် သေဆုံးသွားသော အဖွဲ့ဝင်များ၏ မူလစွမ်းရည် ၆၀ ရာခိုင်နှုန်းကို ပိုင်ဆိုင်ကြသည်။

ထို့ကြောင့် အစ်မဟုန်၏ သဘာဝလွန်စွမ်းအားသာ ပြဿနာမရှိလျှင် ထိုသမ္မတနိုင်ငံခေတ် အဖွဲ့သည် အချိန်မရွေး ဒီကမ္ဘာကြီးထဲမှာ ပြန်လည် ပေါ်ထွန်းလာနိုင်သည်။

လတ်တလောတွင် ဝိညာဉ်ခေါ်သူ ဟဲယင်အာသည်လည်း ဒီလမ်းကြောင်းပေါ်သို့ ရောက်ရှိသွားပြီ ဖြစ်သည်။

ဆယ်စုနှစ်အနည်းငယ် ကြာပြီးနောက် ခေါင်းဆောင်အများအပြား သေဆုံးကုန်ကြသည့်အခါ ဟဲယင်အာသည် ဖြေရှင်း၍မရသော သဘာဝလွန် ဖြစ်ရပ်များကို ကိုင်တွယ်ရန်အတွက် သူတို့ကို ရံဖန်ရံခါ ပြန်လည် နှိုးထစေမည်လော မသိနိုင်ပေ။

ယန်ကျန့် ဆက်မတွေးတော့ဘဲ ပြောလိုက်သည်။

"ကဲ အချိန်မဖြုန်းကြနဲ့တော့ လှုပ်ရှားကြစို့"

ချက်ချင်းပင် သူသည် အဖွဲ့ကို ဦးဆောင်ကာ ထွက်ခွာလိုက်ပြီး ကျန်ရှိသော အင်အားဖြင့် ဘုရင်အဖွဲ့အစည်း၏ လက်ကျန်လူများကို ချေမှုန်းရန် ဆုံးဖြတ်လိုက်သည်။

တချိန်တည်းမှာပင် တာဟိုင်မြို့၏ လူသူကင်းမဲ့သော ထောင့်တစ်နေရာတွင်

ဒီနေရာသည် မည်သူမျှ ခြေမချသလို မည်သူမျှ သတိမထားမိသော နေရာဖြစ်သည်။ သို့သော် ဤမထင်ရှားသော ထောင့်နေရာသည် ဘုရင်အဖွဲ့အစည်း၏ လက်ရှိ စုရပ်ဖြစ်သည်။

ခြံဝန်းပိုင်ရှင်၏ မျက်နှာထားသည် ယခုအချိန်တွင် ကြောက်မက်ဖွယ်ကောင်းအောင် မဲမှောင်နေသည်။ ခန္ဓာကိုယ်ပေါ်တွင် ခွေးကိုက်ရာများ ကျန်ရှိနေသေးသည်။ ကံကောင်းစွာဖြင့် သူသည် အိပ်မက်ဆိုး၏ ကျူးကျော်မှုကို ခုခံနိုင်ခဲ့သည်။ မဟုတ်လျှင် ထိုခွေးဆိုးကြီး၏ ပါးစပ်ထဲတွင် သေဆုံးသွားနိုင်သည်။

အသက်အန္တရာယ် မရှိသော်လည်း ထိုခွေးဆိုးကြီးနှင့် အချိန်ကြာမြင့်စွာ ရင်ဆိုင်နေရသဖြင့် ယန်ကျန့်ကို တားဆီးရန် အချိန်မရလိုက်ပေ။ ထိုအချက်ကြောင့် လုပ်ဆောင်ချက် အများအပြားတွင် ပြဿနာများ ဖြစ်ပေါ်ခဲ့သည်။ ဟဲယင်အာနှင့် ဝမ်ချာလင်းတို့ ကယ်တင်ခံလိုက်ရခြင်း၊ သင်္ဘောသားဘုရင်နှင့် သာသနာပြုဆရာ အသတ်ခံလိုက်ရခြင်း စသည့် မမျှော်လင့်ထားသော ကိစ္စများကြောင့် သူတို့ဘက်မှ အကြီးအကျယ် ဆုံးရှုံးခဲ့ရသည်။

ပိုဆိုးသည်မှာ ယခု တာဟိုင်မြို့တွင် ကျန်းရှန့်ကွမ်း အမည်ရှိသော တစ္ဆေဆရာ တစ်ဦး ပုန်းအောင်းနေပြီး ဘုရင်များကို တရစပ် လိုက်လံ သတ်ဖြတ်နေသည်။ သူ၏ စွမ်းရည်မှာ အလွန် ကြောက်မက်ဖွယ် ကောင်းသည်။

"အခု ငါတို့ ဒီလောက်ပဲ ကျန်တော့တာလား ဒီလို ဆုံးရှုံးမှုမျိုးက လက်ခံဖို့ နည်းနည်း ခက်ခဲတယ်"

ခြံဝန်းပိုင်ရှင် တချက် ဝေ့ဝဲကြည့်လိုက်သည်။

လက်ကျန် ဘုရင်များ အတော်အသင့် ရှိသေးသော်လည်း ယခင်ကနှင့် ယှဉ်လျှင် အများကြီး ကွာခြားသွားပြီ ဖြစ်သည်။

"တစ်ဖက်လူက အသင့်ပြင်ထားတယ် ပြီးတော့ အသေအလဲ တိုက်ခိုက်တဲ့အခါ ထုတ်ပြလာတဲ့ စွမ်းရည်က အရမ်း ကြောက်စရာကောင်းတယ် အဲဒါကြောင့် အစီအစဉ်မှာ လွဲချော်မှုတွေ အများကြီး ဖြစ်ကုန်တာ ကြည့်ရတာ အရင်က ချမှတ်ထားတဲ့ အစီအစဉ်က သိပ်ပြီး ရှေးရိုးစွဲလွန်းတယ် ထင်တယ် ဘာပဲဖြစ်ဖြစ် သူတို့က ခေါင်းဆောင်တွေလေ လျှော့တွက်လို့ မရဘူး"

ပန်းချီဆရာ ကုဒ်နာမည်ရှိသော ဘုရင်က ခေါင်းကို အနည်းငယ် ခါရင်း ပြောလိုက်သည်။

"အရင် အစီအစဉ်အရဆိုရင် ပထမအကျော့ တိုက်ခိုက်မှုမှာ အနည်းဆုံး တစ်ဖက်လူ လေးယောက်လောက် လျော့သွားရမယ် ငါတို့ဘက်က အထိအခိုက် မရှိရဘူး အခု ကျိုးဒန်၊ လုကျီဝမ်၊ လင်းပေ ခေါင်းဆောင်သုံးယောက်ကို သတ်နိုင်ခဲ့လို့ အောင်မြင်မှုတချို့ ရခဲ့ပေမယ့် ငါတို့ ပေးဆပ်လိုက်ရတဲ့ တန်ဖိုးက ကြီးမားလွန်းတယ်"

ဘေးနားရှိ သင်္ချိုင်းတူးသူ ကုဒ်နာမည်ရှိသော ဘုရင်က လေးလံသော အသံဖြင့် ပြောလိုက်သည်။

"ခြံဝန်းပိုင်ရှင် မင်းမှာ အဓိက တာဝန်ရှိတယ် တကယ်လို့ ယန်ကျန့်သာ ပေါ်မလာရင် ဝမ်ချာလင်း သေသွားလောက်ပြီ ငါတို့လည်း သာသနာပြုဆရာကို ဆုံးရှုံးရမှာ မဟုတ်ဘူး"

ထို့နောက် သင်္ချိုင်းတူးသူသည် ခြံဝန်းပိုင်ရှင်၏ ကျရှုံးမှုကို ပြစ်တင်ဝေဖန်လိုက်သည်။

ခြံဝန်းပိုင်ရှင်၏ မျက်လုံးများ မဲမှောင်သွားသည်။

"ငါက အခက်ခဲဆုံး တာဝန်ကို ယူထားတာ မင်း ငါ့ကို အပြစ်တင်ပိုင်ခွင့် မရှိဘူး ယန်ကျန့်က အနေတာ မဟုတ်ဘူး ငါ့ဆီမှာ လိုလိုလားလား အဆွဲခံမယ့်ကောင် မဟုတ်ဘူး သူ့မှာ ကိုယ်ပိုင် အကြံအစည် ရှိတယ် ပြီးတော့ မင်းတို့ လှုပ်ရှားတဲ့အချိန်မှာ တစ်ဖက်လူ ကူညီမယ့်ဟာကို ကြိုတင်ကာကွယ်ထားသင့်တယ်လေ တစ်ဖက်က ခေါင်းဆောင်တချို့က ငါတို့ တိုက်ခိုက်တဲ့ စာရင်းထဲမှာ မပါဘူးဆိုတာ မင်းတို့ သိသားပဲ"

"အခုက အပြန်အလှန် အပြစ်တင်နေရမယ့်အချိန် မဟုတ်ဘူး ထင်တယ် နောက်တစ်ဆင့် ဘာလုပ်မလဲဆိုတာ စဉ်းစားကြတာ ပိုကောင်းမယ်"

ပန်းချီဆရာက ပြောလိုက်သည်။

"ဒုတိယအကျော့ တိုက်ခိုက်မှုကို အမြန်ဆုံး စတင်ရမယ် တစ္ဆေသင်္ဘောကို တာဟိုင်မြို့မှာ နောက်တစ်ခေါက် ထပ်ပြီး ကမ်းကပ်ခိုင်းရမယ်"

အေးစက်သော အသံတစ်သံ ထွက်ပေါ်လာပြီး သူစိမ်း ဘုရင်တစ်ပါးက အကြံပြုလိုက်သည်။

ခြံဝန်းပိုင်ရှင် ချက်ချင်း ငြင်းပယ်လိုက်သည်။

"မဖြစ်ဘူး အခု အစီအစဉ်အတိုင်း ဒုတိယအကျော့ တိုက်ခိုက်မှုကို စတင်လိုက်ရင် ငါတို့ဘက်က အပြတ်ရှင်းခံရမယ့် အခွင့်အလမ်း ရှိနေတယ် တစ်ဖက်က အစွမ်းထက်တဲ့ ကောင်တွေ အကုန်ရှိနေသေးတယ် ငါတို့ နိုင်မယ်ဆိုတဲ့ အာမခံချက် မရှိဘူး မူလက ဒုတိယအကျော့ တိုက်ခိုက်မှုမှာ အဲဒီ အစွမ်းထက်တဲ့ ခေါင်းဆောင်တွေကို လူအင်အား အသာစီးယူပြီး သတ်ပစ်ဖို့ ရည်ရွယ်ထားတာ အခု လူအင်အား မလောက်တော့ဘူးဆိုတော့ အဲဒီ အစီအစဉ်က အလုပ်ဖြစ်မှာ မဟုတ်တော့ဘူး"

အခန်း ၁၅၀၀ - အစ်မဟုန်၏ အဖွဲ့

ဘုရင်အဖွဲ့အစည်းမှ လက်ကျန်လူများသည် ယခုအချိန်တွင် ဒုတိယအကျော့ တိုက်ခိုက်မှု ပြုလုပ်ရန် သတ္တိမရှိကြတော့ပေ။ ဘုရင် တစ်ပါးနှစ်ပါးလောက်သာ ဆက်လက် တိုက်ခိုက်ရန် ဆန္ဒရှိကြသည်။

သို့သော် ခြံဝန်းပိုင်ရှင်သည် ပြင်းပြင်းထန်ထန် ကန့်ကွက်နေဆဲ ဖြစ်သည်။ ယခင်က တစ္ဆေသင်္ဘော ကမ်းကပ်နိုင်ခဲ့ပြီး ဘုရင်များ စုစည်းကာ လူအင်အား အသာစီးရထားသည့် အချိန်တွင်ပင် တစ်ဖက်လူကို အနိုင်မတိုက်နိုင်ခဲ့ပေ။ ယခု အခြေအနေတွင် အနိုင်ရရန် ပို၍ မဖြစ်နိုင်ပေ။ အကောင်းဆုံး ရလဒ်မှာ တစ်ဖက်မှ ခေါင်းဆောင်အနည်းငယ်ကို ထပ်မံ သတ်ဖြတ်နိုင်ခြင်းသာ ဖြစ်ပြီး ထိုအတွက် ပေးဆပ်ရမည့် တန်ဖိုးမှာ မိမိတို့ဘက်မှ အပြတ်ရှင်းခံရခြင်း ဖြစ်နိုင်သည်။

"တစ္ဆေသင်္ဘော နောက်တစ်ခေါက် ကမ်းကပ်လာတဲ့အထိ စောင့်ပြီးမှ ဒုတိယအကျော့ တိုက်ခိုက်မှုကို စတင်မယ် အဲဒီအချိန်ကျရင် အဲဒီခေါင်းဆောင်တွေကို အပြီးတိုင် ရှင်းပစ်မယ် ဒါက တစ်ခုတည်းသော အခွင့်အရေးပဲ လက်လျှော့လိုက်ရင် တစ်ဖက်လူက လက်စားချေလိမ့်မယ် ငါတို့ရဲ့ ဇာတ်သိမ်းက မလှမပ ဖြစ်သွားလိမ့်မယ် ဒါကြောင့် အခု ငါတို့မှာ ဆုတ်လမ်း မရှိတော့ဘူး"

စကားပြောသူမှာ ပိန်လှီသော အဖိုးအိုတစ်ဦး ဖြစ်သည်။ သူ၏ ကုဒ်နာမည်မှာ ခေါင်းတလားထမ်းသူ ဖြစ်ပြီး ယခုအချိန်တွင် သူက ဒုတိယအကျော့ တိုက်ခိုက်မှုကို ထောက်ခံနေခြင်း ဖြစ်သည်။

သူ၏ အမြင်မှာလည်း မှားယွင်းခြင်း မရှိပေ။

ဒီအခြေအနေထိ ရောက်လာမှတော့ ဆုတ်ချင်တိုင်း ဆုတ်လို့ရတာ မဟုတ်တော့ဘူး။ အမုန်းတရားတွေ၊ သွေးကြွေးတွေကို တစ်ခုချင်းစီ ရှင်းရတော့မည်။ ဘုရင်အဖွဲ့အစည်းက ထွက်သွားချင်ရင်တောင် ဌာနချုပ်က ခေါင်းဆောင်တွေ သဘောတူမတူ ကြည့်ရဦးမည်။

"တစ္ဆေသင်္ဘောနဲ့ ထပ်ပြီး ပူးပေါင်းမလို့လား"

ခြံဝန်းပိုင်ရှင်လည်း ယခုအချိန်တွင် လေးလေးနက်နက် စဉ်းစားလိုက်သည်။

"ဒါပေမယ့် အနိုင်ရနိုင်ချေက သိပ်မများဘူး ငါတို့ဘက်က လူအင်အား နည်းသွားပြီ"

သူ ဘေးပတ်ဝန်းကျင်ကို တစ်ချက် ဝေ့ဝဲကြည့်လိုက်သည်။

လက်ရှိ ကျန်ရှိနေသော ဘုရင်များမှာ ပန်းချီဆရာ၊ သင်္ချိုင်းတူးသူ၊ ခေါင်းတလားထမ်းသူ၊ ဘဏ်လုပ်ငန်းရှင်နှင့် ထောင်မှူး တို့ ဖြစ်ကြသည်။

ခြံဝန်းပိုင်ရှင် ကိုယ်တိုင်ပါ ထည့်တွက်လျှင် စုစုပေါင်း ဘုရင် ခြောက်ပါးသာ ရှိတော့သည်။ လူကြီးလူကောင်းမှာလည်း အဆက်အသွယ် ပြတ်တောက်နေပြီး သေရှင် မကွဲပြားပေ။ သို့သော် မပျောက်ဆုံးမီ သင်္ချိုင်းတူးသူ ပြောပြချက်အရ သူသည် ကျန်းရှန့်ကွမ်း၏ ပစ်မှတ်ထားခြင်းကို ခံခဲ့ရသည်။ လက်ရှိ အခြေအနေအရ သေဆုံးသွားနိုင်ချေ များသည်။

"တစ်ဖက်က ခေါင်းဆောင်တွေလည်း သိပ်မကျန်တော့ပါဘူး ပြီးတော့ နောက်တစ်ကျော့ တိုက်ခိုက်မှုကျရင် ငါတို့ ပိုပြီး စိတ်ရှည်ရမယ် သူတို့က တစ္ဆေဘတ်စ်ကား ဆုံးရှုံးသွားပြီ တစ္ဆေသင်္ဘောကို တားဆီးနိုင်စွမ်း မရှိတော့ဘူး တစ္ဆေသင်္ဘောသာ နောက်တစ်ခေါက် ထပ်လာရင် တစ်ဖက်လူ သေချာပေါက် ပြိုလဲသွားလိမ့်မယ်"

ခေါင်းတလားထမ်းသူက ပြောလိုက်သည်။

"ပြီးတော့ ငါတို့ လှုပ်ရှားမှုက မြန်ဆန်ရမယ် တစ်ဖက်လူက ဒီအချိန်မှာ စတင် လှုပ်ရှားနေလောက်ပြီ သူတို့က ငါတို့ကို တာဟိုင်မြို့ကနေ အရှင်ထွက်ခွာခွင့် ပေးမှာ မဟုတ်ဘူး"

ခြံဝန်းပိုင်ရှင်၏ တွန့်လိမ်နေသော မျက်နှာပေါ်တွင် လေးနက်သော အမူအရာ ပေါ်လာသည်။

ဒီစကားက မမှားပေ။ ယန်ကျန့် ဦးဆောင်သော ခေါင်းဆောင်များသည် မိမိတို့ကို လွှတ်ပေးမည် မဟုတ်ပေ။ ယန်ကျန့်၏ စရိုက်က ထင်ရှားသည်။ လက်စားချေလိုစိတ် ပြင်းပြသူ ဖြစ်သည်။

ခေတ္တမျှ စဉ်းစားပြီးနောက် ခြံဝန်းပိုင်ရှင်က လေးလံသော အသံဖြင့် ပြောလိုက်သည်။

"သင်္ဘောသားဘုရင်နဲ့ ရေကြောင်းမြေပုံ ဆုံးရှုံးသွားပြီဆိုတော့ နောက်တစ်ခေါက် တစ္ဆေသင်္ဘော ဘယ်အချိန် ကမ်းကပ်မလဲဆိုတာ ငါတို့ မသိနိုင်တော့ဘူး တာဟိုင်မြို့မှာ ဆက်နေရင် မကြာခင် တစ်ဖက်လူရဲ့ ရှာတွေ့တာ ခံရလိမ့်မယ် တိုက်ပွဲဖြစ်လာရင် ငါတို့ဘက်က အသာစီးရမှာ မဟုတ်ဘူး"

"ဒါကြောင့် အခု ဆုတ်ခွာမယ်ဆိုရင် အချိန်မီသေးတယ် ရွေးချယ်မှု မှားသွားရင် ငါတို့ရဲ့ ဇာတ်သိမ်းက အရမ်း ဆိုးရွားသွားလိမ့်မယ်"

သင်္ချိုင်းတူးသူက ပြောလိုက်သည်။

"လူအများစုက တာဟိုင်မြို့ကနေ အရင် ဆုတ်ခွာလို့ ရတယ် တစ်ယောက်လောက် ကျန်ခဲ့ပြီး တစ္ဆေသင်္ဘောကို စောင့်ကြည့်ရမယ် တစ္ဆေသင်္ဘော တာဟိုင်မြို့မှာ ပြန်ပေါ်လာရင် ငါတို့ ပြန်လာပြီး ဒုတိယအကျော့ တိုက်ခိုက်မှုကို စတင်ကြမယ်"

"ဒီလိုဆိုရင်တော့ ငါ သဘောတူတယ်"

ခြံဝန်းပိုင်ရှင် စဉ်းစားပြီးနောက် ပြောလိုက်သည်။

ခေါင်းတလားထမ်းသူက ပြောလိုက်သည်။

"ဘယ်သူက အသက်အန္တရာယ် စွန့်ပြီး တာဟိုင်မြို့မှာ ကျန်ခဲ့ချင်မှာလဲ"

အားလုံး တိတ်ဆိတ်သွားကြသည်။

ယခု တာဟိုင်မြို့သည် သူတို့၏ ပိုင်နက် မဟုတ်တော့ဘဲ ခေါင်းဆောင်များ၏ နယ်မြေ ဖြစ်သွားပြီ။ ကျန်ရစ်ခဲ့သူသည် တွေ့ရှိခံရပါက ခေါင်းဆောင် အများအပြား၏ ဝိုင်းဝန်းတိုက်ခိုက်ခြင်းကို ခံရမည်ဖြစ်ပြီး အသက်ရှင်လျက် လွတ်မြောက်ရန် မဖြစ်နိုင်သလောက်ပင်။

သို့သော် ထိုအချိန်တွင် ရုတ်တရက် လူရိပ်တစ်ခု အနီးနား၌ ပေါ်လာသည်။

အနီရောင် တရုတ်ရိုးရာ ဝတ်စုံ ဝတ်ဆင်ထားသော အမျိုးသမီးတစ်ဦး ဖြစ်သည်။ ကိုယ်လုံးကိုယ်ပေါက် သွယ်လျပြီး အလွန် လှပသည်။ ဖြူဝင်းသော မျက်နှာပေါ်တွင် တောက်ပသော နှုတ်ခမ်းနီ ဆိုးထားသဖြင့် ပိုမို ဆွဲဆောင်မှု ရှိနေသည်။

"တောင်းပန်ပါတယ် ရှေ့က လူကြီးမင်းတို့ ကျွန်မကို ကူညီပါဦး ကျွန်မ လမ်းပျောက်နေလို့ပါ ဒါ ဘယ်နေရာလဲ ဟင်"

ဒီ အနီရောင် တရုတ်ရိုးရာဝတ် အမျိုးသမီးသည် လမ်းပျောက်နေသော ခရီးသွားတစ်ဦးကဲ့သို့ စပ်စုကြည့်ရှုနေသည်။

တခဏချင်းမှာပင်ဘုရင်အားလုံးသည် ထို အမျိုးသမီးကို ပြိုင်တူ လှည့်ကြည့်လိုက်ကြပြီး ချက်ချင်း သတိထားလိုက်ကြကာ မျက်လုံးများတွင် သတ်ဖြတ်လိုသော အရိပ်အယောင်များ ပေါ်လာသည်။

"လမ်းမေးတာ ဟုတ်လား ဒီမှာ လာမညာနဲ့ အဝေးကြီးကနေတောင် မင်းဆီက အေးစက်တဲ့ သဘာဝလွန် အငွေ့အသက်ကို ရနေတယ် မင်းက တစ္ဆေဆရာပဲ ဒီနေ့ ဒီနေရာမှာ ပေါ်လာမှတော့ ဘယ်သူပဲဖြစ်ဖြစ် သေရမယ်"

ခြံဝန်းပိုင်ရှင်က အေးစက်စွာ ပြောလိုက်သည်။

"ဒီမိန်းမ ပုံစံမမှန်ဘူး ဝိုင်းသတ်ပစ်လိုက်"

သင်္ချိုင်းတူးသူလည်း ထူးခြားမှုကို ခံစားလိုက်ရပြီး သတိထားကာ ပြောလိုက်သည်။

"အယ် ဘာလို့ ဒီလောက် ရက်စက်ရတာလဲ ကျွန်မက နှုတ်ဆက်ပြီး လမ်းမေးရုံလေးပါ ရှင်တို့က သတ်မယ်ဖြတ်မယ် လုပ်နေကြတယ် ဒါ သက်သက်မဲ့ အနိုင်ကျင့်တာပဲ"

အစ်မဟုန်သည် ရင်ဘတ်ကို ဖိကာ ကြောက်လန့်သွားသကဲ့သို့ ဟန်ဆောင်လိုက်သည်။

သို့သော် ဤဘုရင်များသည် အစ်မဟုန်နှင့် စကားများမနေတော့ပေ။ ဤရုတ်တရက် ပေါ်လာသော အမျိုးသမီးကို ချက်ချင်း သတ်ဖြတ်ချင်နေကြသည်။ မိမိတို့၏ တည်နေရာ ပေါက်ကြားသွားပြီး ဌာနချုပ်မှ ခေါင်းဆောင်များ ရောက်လာမည်ကို စိုးရိမ်သောကြောင့် ဖြစ်သည်။

သို့သော် ထိုအချိန်တွင် လှုပ်ရှားရန် ပြင်ဆင်နေသော ဘုရင်များသည် ခြေလှမ်း ရပ်တန့်လိုက်ကြသည်။

ပြင်းထန်သော အန္တရာယ် အငွေ့အသက်တစ်ခု ရုတ်တရက် ပေါ်ပေါက်လာသည်။ ထိုအန္တရာယ် အငွေ့အသက်သည် ကြက်သီးမွှေးညှင်း ထစေလောက်အောင် ပြင်းထန်ပြီး ခြေတစ်လှမ်း ထပ်တိုးလိုက်သည်နှင့် သေချာပေါက် သေဆုံးသွားမည့် ခံစားချက်မျိုး ပေးစွမ်းနေသည်။

"စိတ်ထင်တာလား တစ်ဖက်က တစ်ယောက်တည်းပါ ဒါပေမယ့် ငါ့ကို ဒီလောက် အန္တရာယ်ကြီးတဲ့ ခံစားချက် ပေးနိုင်တယ် ယန်ကျန့်တောင် ငါ့ကို ဒီလို မခံစားရစေဘူး"

ခြံဝန်းပိုင်ရှင်၏ မျက်နှာထား အလွန် လေးနက်သွားသည်။ သူ ခြေလှမ်း ရပ်တန့်လိုက်ပြီး အလွယ်တကူ မလှုပ်ရှားရဲတော့ပေ။

သို့သော် မကြာမီ ခြံဝန်းပိုင်ရှင် သိလိုက်ရသည်မှာ စောစောက ခံစားချက်သည် စိတ်ထင်တာ မဟုတ်ကြောင်း၊ အန္တရာယ် အငွေ့အသက်သည် အစစ်အမှန် ဖြစ်ကြောင်း ဖြစ်၏။

ယခုအချိန်တွင် အနီရောင်ဝတ် အမျိုးသမီး၏ အနောက်ဘက်တွင် အေးစက်သော ပုံရိပ်အချို့ ရုတ်တရက် ပေါ်လာသည်ကို သူတို့ တွေ့လိုက်ရသည်။ ထိုပုံရိပ်များသည် အနောက်ဘက်မှ ဖြည်းညှင်းစွာ လျှောက်ထွက်လာပြီး ဘုရင်များ၏ ရှေ့မှောက်တွင် တဖြည်းဖြည်း ပေါ်လာကြသည်။

မျက်နှာတစ်ပြင်လုံး အလောင်းကောင် အစက်အပြောက်များဖြင့် ဖုံးလွှမ်းနေပြီး သေမင်းတမန် အငွေ့အသက်များ ပြည့်နှက်နေသော အမျိုးသားတစ်ဦး၊ သင်္ချိုင်းမြေကြီးထဲမှ တူးဖော်ထားသော အလောင်းကောင်ကဲ့သို့ ပုပ်ပွနေသော အမျိုးသားတစ်ဦး၊ တောင်းတစ်လုံးကို ဆွဲထားသော ကျေးလက်အမျိုးသမီး တစ်ဦးနှင့် အရိပ်တစ်ခု လွှမ်းခြုံထားသော အရပ်ရှည်ရှည် ထွားကျိုင်းကျိုင်း အမျိုးသားတစ်ဦး... ဒီလူလေးယောက်နှင့် အစ်မဟုန်သည် တန်းစီရပ်လိုက်ရာ ထိပ်တန်း တစ္ဆေဆရာ အဖွဲ့တစ်ဖွဲ့ကဲ့သို့ ဖြစ်သွားသည်။

"ကံကောင်းလို့ ကျွန်မမှာ အဖွဲ့သားတွေ မနည်းဘူး မဟုတ်ရင် ရှင်တို့ အနိုင်ကျင့်တာ ခံရတော့မှာ"

အစ်မဟုန်၏ မျက်နှာပေါ်တွင် ဆွဲဆောင်မှုရှိသော အပြုံးတစ်ခု ပေါ်လာသည်။

"ဒီလူတွေက လူရှင် မဟုတ်ဘူး အရမ်း ကြောက်စရာကောင်းတဲ့ သဘာဝလွန် အရာတွေပဲ"

သင်္ချိုင်းတူးသူ၏ မျက်နှာထား ချက်ချင်း ပြောင်းလဲသွားသည်။ ဒီလူလေးယောက်ဆီမှ အသက်ရှူရပ်မတတ် ပြင်းထန်သော သဘာဝလွန် အငွေ့အသက်ကို သူ ခံစားလိုက်ရသည်။

လက်ရှိ တစ္ဆေဆရာလောကတွင် မည်သည့် လူရှင်၌မျှ ဤမျှ ကြောက်မက်ဖွယ်ကောင်းသော သဘာဝလွန် စွမ်းအား ရှိသည်ကို သူ မမြင်ဖူးပေ။

"ဒီအချိန်မှာ ဒီအဖွဲ့နဲ့ တိုက်ခိုက်တာ ကောင်းတဲ့ အကြံဉာဏ် မဟုတ်ဘူး"

ခြံဝန်းပိုင်ရှင် ယခုအချိန်တွင် မလှုပ်ရှားရဲတော့ပေ။ တိုက်ပွဲဖြစ်ပါက ခေါင်းဆောင်များကို ဆွဲဆောင်မိပြီး အခြေအနေ ဆိုးရွားသွားမည်ကို စိုးရိမ်နေသည်။

ဘေးနားရှိ ပန်းချီဆရာသည်လည်း မျက်နှာထား တင်းမာနေပြီး စကားတစ်ခွန်းမျှ မပြောပေ။ အသင့်ပြင်ဆင်ထားသော ဆီဆေးပန်းချီကား တစ်ချပ်ကိုသာ လက်ထဲတွင် ဆုပ်ကိုင်ထားပြီး အချိန်မရွေး အသုံးပြုရန် ပြင်ဆင်ထားသည်။

အစ်မဟုန် မျက်လုံးကို ကစားလိုက်ပြီး ဆက်ပြောသည်။

"ကျွန်မမှာ အကူအညီ ရှိပေမယ့် ရှင်တို့ လူအရေအတွက်က ပိုများနေသလိုပဲ ၅ ယောက် နဲ့ ၆ ယောက် ဆိုတော့ တိုက်ရင် ကျွန်မဘက်က နာမှာပေါ့ ကျွန်မက အနိုင်ကျင့်မခံချင်ဘူး ဒါကြောင့် ၉ ယောက် နဲ့ ၆ ယောက် ဆိုရင် ပိုကောင်းမယ်"

စကားဆုံးသည်နှင့် အစ်မဟုန် ဘေးနားရှိ လူလေးယောက်၏ အနောက်ဘက်တွင် လူရိပ်တစ်ခု ထပ်မံ ပေါ်လာပြန်သည်။

နောက်ထပ် လူလေးယောက် အနောက်ဘက်မှ လျှောက်ထွက်လာသည်။

ဒီလူလေးယောက်သည် စောစောက လူလေးယောက်နှင့် ရုပ်ရည်၊ ကိုယ်လုံးကိုယ်ပေါက် တစ်ပုံစံတည်း ဖြစ်သည်။ ပုံစံခွက်တစ်ခုတည်းမှ ထွက်လာသကဲ့သို့ပင်။ သို့သော် ဒါက အရေးကြီးသော အချက် မဟုတ်ပေ။ တကယ် အရေးကြီးသည်မှာ ဒီလူလေးယောက်ဆီမှ ထွက်ပေါ်လာသော ကြောက်မက်ဖွယ် သဘာဝလွန် အငွေ့အသက်သည်လည်း တစ်ပုံစံတည်း ဖြစ်နေခြင်းပင်။

လေးယောက် နှင့် လေးယောက် ပေါင်း၊ အစ်မဟုန်ပါ ထည့်တွက်လျှင် ကိုးယောက်တိတိ ဖြစ်သွားသည်။

"သောက်ကျိုးနည်း"

ခြံဝန်းပိုင်ရှင် မနေနိုင်ဘဲ ဆဲရေးလိုက်သည်။ ခန္ဓာကိုယ်သည်လည်း အနောက်သို့ ခြေလှမ်းအနည်းငယ် ဆုတ်သွားသည်။

စောစောက တိုက်ခိုက်လိုစိတ် အနည်းငယ် ရှိသေးသော်လည်း တစ်ဖက်လူ အရေအတွက် ထပ်မံ တိုးလာသည့်အခါ သူ လုံးဝ တိုက်ခိုက်လိုစိတ် မရှိတော့ပေ။ ယခုအချိန်တွင် ဤနေရာမှ ထွက်ပြေးချင်စိတ်သာ ရှိတော့သည်။

"ကိုးယောက်ဆိုတာလည်း သိပ်မများသေးပါဘူး တော်ကြာ ရှင်တို့က တခြား အကူအညီတွေ ထပ်ခေါ်လာရင် ဘယ်လိုလုပ်မလဲ"

အစ်မဟုန် မေးစေ့ကို ကိုင်ကာ စဉ်းစားဟန် ပြုလိုက်သည်။

"နောက်ထပ် လူနည်းနည်း ထပ်ထည့်တာ ပိုစိတ်ချရမယ်"

ထို့နောက် ထိုလူရှစ်ယောက်၏ အနောက်ဘက်တွင် လူရိပ်များ ထပ်မံ ပေါ်လာပြန်သည်။

ထိုလူရိပ်များ ထွက်လာသည်နှင့်အမျှ မူလက ရှစ်ယောက်သည် ရုတ်တရက် ၁၆ ယောက် ဖြစ်သွားသည်။ အစ်မဟုန်ပါ ပေါင်းလျှင် ၁၇ ယောက် ဖြစ်သွားသည်။

ဒီလူအရေအတွက်သည် လက်ကျန် ဘုရင်များကို စိတ်ပျက်အားငယ်သွားစေရန် လုံလောက်သည်။

"ဆုတ်မယ်"

ခြံဝန်းပိုင်ရှင် ထိတ်လန့်တုန်လှုပ်သွားသည်။ ဒီအချိန်မှာ ဝက်တစ်ကောင်လောက် ဉာဏ်ရှိရင်တောင် သိနိုင်သည်။ တစ်ဖက်လူ၏ လူအရေအတွက် တိုးပွားစေသော သဘာဝလွန်စွမ်းအားသည် အကန့်အသတ် မရှိပုံရသည်။ ဆက်တိုက်ခိုက်လျှင် မိမိတို့ဘက်မှ အပြတ်ရှင်းခံရမည်မှာ သေချာသည်။ နိုင်လျှင်တောင် အဓိပ္ပာယ် မရှိပေ။ အဘယ်ကြောင့်ဆိုသော် ဌာနချုပ်မှ ခေါင်းဆောင်များ မရောက်လာသေးသောကြောင့် ဖြစ်သည်။

အနည်းငယ်မျှ တွေဝေခြင်းမရှိဘဲ သူ ချက်ချင်း လှည့်ပြေးသည်။

သင်္ချိုင်းတူးသူလည်း စကားတစ်ခွန်းမျှ မပြောဘဲ ခြေရင်းရှိ နက်ရှိုင်းသော တွင်းနက်ကြီးထဲသို့ ခုန်ဆင်းသွားသည်။

အခြား ဘုရင်များသည်လည်း သဘာဝလွန် နည်းလမ်းအမျိုးမျိုးကို အသုံးပြုကာ လျင်မြန်စွာ ဆုတ်ခွာကြသည်။

"အခုမှ သွားချင်လို့ နောက်ကျသွားပြီ"

အစ်မဟုန်၏ မျက်နှာပေါ်မှ အပြုံး ရုတ်တရက် ပျောက်ကွယ်သွားပြီး အလွန်အမင်း အေးစက်သွားသည်။

သူမ နောက်ကျမှ ရောက်လာသော်လည်း သမ္မတနိုင်ငံခေတ်၏ ထိပ်တန်း တစ္ဆေဆရာ တစ်ဦးအနေဖြင့် ဒီခေတ်သစ် စစ်မြေပြင်တွင် ဘာမှမလုပ်ဘဲ ခေတ်နောက်ကျ ကျန်ရစ်ခဲ့မည့် အဖြစ်မျိုးကို မလိုလားပေ။

ချက်ချင်းပင်

သစ်သားရုပ် ၁၆ ရုပ် ချက်ချင်း လှုပ်ရှားလိုက်သည်။

သမ္မတနိုင်ငံခေတ်၏ ကြောက်မက်ဖွယ် သဘာဝလွန်စွမ်းအား ရောက်ရှိလာပြီ ဖြစ်သည်။

လက်ကျန် ဘုရင်များသည် ခေါင်းဆောင်များ၏ တိုက်ခိုက်ခြင်းကို မခံရဘဲ သမ္မတနိုင်ငံခေတ် ထိပ်တန်း တစ္ဆေဆရာ အဖွဲ့တစ်ဖွဲ့၏ တိုက်ခိုက်ခြင်းကို ခံရလိမ့်မည်ဟု အိပ်မက်ထဲတွင်ပင် ထင်မှတ်မထားခဲ့ကြပေ။