အခန်း (၁၅၀၃-၁၅၀၄)

အခန်း ၁၅၀၃ - ခေါင်းဆောင်တို့၏ ခေတ်

အစ်မဟုန် ထွက်ခွာသွားသည်နှင့်အမျှ လက်ကျန် ဘုရင်များ အပြတ်ရှင်းခံလိုက်ရသော သတင်းသည် အတည်ပြုချက် ရရှိသွားတော့သည်။

ဒါက ယန်ကျန့်နှင့် အခြား ခေါင်းဆောင်များကို စိတ်သက်သာရာ ရစေခဲ့သည်။ အဘယ်ကြောင့်ဆိုသော် ဘုရင်အဖွဲ့အစည်းမှ လက်ကျန်လူများသည် ခြိမ်းခြောက်မှု ကြီးမားဆဲ ဖြစ်သောကြောင့် ဖြစ်သည်။ သူတို့သာ ဒုတိယအကျော့ တိုက်ခိုက်မှု စတင်ခဲ့လျှင် ခေါင်းဆောင်များ အနေဖြင့် တောင့်ခံနိုင်တော့မည် မဟုတ်ပေ။ လက်ရှိ အခြေအနေတွင် ဆုံးရှုံးမှု များပြားသော်လည်း အခြေအနေသည် ပြန်လည် ကုစား၍ မရနိုင်လောက်အောင် ဆိုးရွားမသွားသေးပေ။

ယခု ယန်ကျန့်သည် လက်ကျန် ခေါင်းဆောင်များကို ဦးဆောင်ပြီး တာဟိုင်မြို့၏ သဘာဝလွန် ဖြစ်ရပ်များကို ဖြေရှင်းရန် အင်အား ရှိနေသေးသည်။

အစ်မဟုန် ထွက်ခွာသွားသည်နှင့်အမျှ ဘုရင်အဖွဲ့အစည်းနှင့် ပတ်သက်သော သတင်းများသည်လည်း တစ္ဆေဆရာလောကတွင် တဖြည်းဖြည်း ပျံ့နှံ့သွားသည်။

သတင်းကို အရင်ဆုံး လက်ခံရရှိသူမှာ ဌာနချုပ်မှ ဖြစ်သည်။

ဌာနချုပ်ရှိ ချောင်ယန်ဟွာသည် တညလုံး မအိပ်ရသေးပေ။ သူသည် ရုံးခန်းထဲတွင် ဆေးလိပ်ဖွာရင်း မျက်မှောင်ကြုတ်ကာ တိတ်ဆိတ်စွာ ထိုင်စောင့်နေသည်။ သူ့စားပွဲပေါ်တွင် တယ်လီဖုန်း အများအပြား တင်ထားသည်။ ဖုန်းမြည်သံ တစ်ခုချင်းစီသည် အရေးကြီးသော သတင်းတစ်ခု ရောက်လာခြင်းကို ကိုယ်စားပြုသည်။ အထူးသဖြင့် ဒီနေ့ သတင်းသည် ပို၍ အရေးကြီးသည်။

ထို့ကြောင့် ချောင်ယန်ဟွာ မအိပ်ရဲပေ။ အိပ်ချင်လွန်းသော်လည်း ကိုယ့်ပါးကိုယ် ပြင်းပြင်းထန်ထန် ရိုက်ပြီး အိပ်ချင်စိတ်ကို ဖြေဖျောက်ထားရသည်။

"တစ္ဆေဆရာလောကရဲ့ တိုက်ပွဲက အကြာကြီး မဖြစ်နိုင်ဘူး တွေ့တာနဲ့ တိုက်ကြမှာပဲ တိုက်ပြီဆိုတာနဲ့ မိနစ်ပိုင်းအတွင်း အနိုင်အရှုံး ပေါ်ပြီး သေရှင် ဆုံးဖြတ်ကြလိမ့်မယ် ပုံမှန် အခြေအနေအရ ခန့်မှန်းရရင် နောက်ထပ် နာရီဝက်လောက်ဆို အရေးကြီးတဲ့ သတင်း ရောက်လာတော့မယ် ဒီစစ်ပွဲရဲ့ ရလဒ်က ဘယ်လိုလဲဆိုတာ ငါ သိချင်နေပြီ ငါတို့ နိုင်မှာလား ဘုရင်အဖွဲ့အစည်း နိုင်မှာလား"

ချောင်ယန်ဟွာ၏ စိတ်ထဲတွင် ရုန်းကန်နေရပြီး စိုးရိမ်ပူပန်နေသည်။ တခါတရံ ဆေးလိပ်ကိုင်ထားသော လက်ချောင်းများပင် တုန်ခါနေသည်။

အဘယ်ကြောင့်ဆိုသော် ဒီလူအနည်းငယ်၏ တိုက်ပွဲသည် ကမ္ဘာ့အခင်းအကျင်းတစ်ခုလုံးကို သက်ရောက်မှု ရှိနိုင်သလို လူသန်းပေါင်းများစွာ၏ အသက်အန္တရာယ်နှင့်လည်း ဆက်စပ်နေသောကြောင့် ဖြစ်သည်။

"ယန်ကျန့် ရှိနေသရွေ့ ဒီစစ်ပွဲ ရှုံးမှာ မဟုတ်ဘူး"

ချောင်ယန်ဟွာ မျက်လုံးမှိတ်လိုက်ပြီး လူတစ်ယောက်ကို သတိရလိုက်သည်။

ကွယ်လွန်သွားပြီဖြစ်သော ပါမောက္ခဝမ် ဖြစ်သည်။

ယခင်က ချောင်ယန်ဟွာသည် ပါမောက္ခဝမ်ကို မေးခဲ့ဖူးသည်။ ဥပဒေစိုးမိုးရေး ခေါင်းဆောင်အဖြစ် ဘာကြောင့် ယန်ကျန့်ကို ရွေးချယ်ရသနည်း ဟူ၍။ ထိုအချိန်က အရည်အချင်း ပြည့်မီသူ အများအပြား ရှိခဲ့ပြီး ယန်ကျန့်သည် အကောင်းဆုံး ရွေးချယ်မှု မဟုတ်ခဲ့ပေ။

ထိုစဉ်က ပါမောက္ခဝမ် ပြောခဲ့သည်။

"လူ့အရေပြားကျမ်းပေါ်မှာ မသေချာမရေရာတဲ့ အနာဂတ်တစ်ခုကို မြင်ခဲ့ရတယ် ဒါတွေအားလုံးကို အဆုံးသတ်ပေးမယ့်သူက ယန်ကျန့် ဖြစ်ကောင်းဖြစ်လိမ့်မယ် ဒါကြောင့် သူ့အပေါ် လောင်းကြေးထပ်ချင်တယ်"

ဒီလိုနှင့် ပါမောက္ခဝမ်သည် ထိုသဘာဝလွန် သတင်းအချက်အလက်ကို ယုံကြည်ရန် ရွေးချယ်ခဲ့ပြီး အရာအားလုံးကို ယန်ကျန့်အပေါ် ပုံအောခဲ့သည်။

နောက်ပိုင်း ဖြစ်ရပ်များက ပါမောက္ခဝမ်၏ ရွေးချယ်မှု မှန်ကန်ကြောင်း သက်သေပြခဲ့သည်။

ယန်ကျန့် ဥပဒေစိုးမိုးရေး ခေါင်းဆောင် ဖြစ်လာပြီးနောက် ဌာနချုပ်သည် အကျပ်အတည်း အများအပြားကို ဖြေရှင်းနိုင်ခဲ့သည်။ ဒီတကြိမ်လည်း ချွင်းချက် မရှိနိုင်ဟု ချောင်ယန်ဟွာ ယုံကြည်သည်။ ဘယ်လိုပဲဖြစ်ဖြစ် ယန်ကျန့်၏ စွမ်းရည်ကို သူ အပြည့်အဝ အသိအမှတ်ပြုထားသည်။ အခြေအနေကို ပြောင်းလဲနိုင်စွမ်းရှိသော ပုဂ္ဂိုလ် ဖြစ်သည်။

ကလင် ကလင်

ချောင်ယန်ဟွာ တွေးတောနေစဉ် စားပွဲပေါ်မှ ဖုန်းတစ်လုံး ရုတ်တရက် မြည်လာသည်။

ချောင်ယန်ဟွာ ချက်ချင်း သတိဝင်လာသည်။ မျက်လုံးကို ဖွင့်ပြီး ဖုန်းကို အမြန်ဆုံး ကောက်ကိုင်လိုက်သည်။

"ချောင်ယန်ဟွာပါ"

မကြာမီ ဖုန်းထဲမှ အသံတစ်သံ ထွက်ပေါ်လာပြီး အခြေအနေကို သတင်းပို့နေသည်။

ချောင်ယန်ဟွာ အာရုံစိုက် နားထောင်နေသည်။ ရုံးခန်းတစ်ခုလုံး တိတ်ဆိတ်ငြိမ်သက်နေသည်။ သို့သော် အချိန်ကုန်လွန်လာသည်နှင့်အမျှ သူ၏ တင်းမာနေသော မျက်မှောင်များ ဖြည်းညှင်းစွာ ပြေလျော့လာပြီး မျက်နှာပေါ်တွင် ဝမ်းသာအားရ ဖြစ်မှုများ ပေါ်လာသည်။

ခဏအကြာတွင် ဖုန်းထဲမှ အသံ ပျောက်ကွယ်သွားသည်။

ချောင်ယန်ဟွာ ဖုန်းချလိုက်ပြီး စားပွဲကို ဘုန်းခနဲ ရိုက်ကာ မတ်တပ်ရပ်လိုက်သည်။ မျက်နှာပေါ်တွင် အလွန် ဝမ်းသာသော အမူအရာ ပေါ်လာသည်။

"ကောင်းတယ် ကောင်းတယ် ကောင်းတယ် ဘုရင်အဖွဲ့အစည်းက ဘုရင်တွေ အပြတ်ရှင်းခံလိုက်ရပြီ ဒီစစ်ပွဲကို ငါတို့ နိုင်ပြီ"

ယခုအချိန်တွင် သူသည် ပြောမပြတတ်အောင် စိတ်လှုပ်ရှားနေသည်။

အဘယ်ကြောင့်ဆိုသော် ဤသည်မှာ တစ္ဆေဆရာလောက၏ တိုက်ပွဲတစ်ခုတည်း မဟုတ်ဘဲ ကမ္ဘာ့အခင်းအကျင်းနှင့်လည်း သက်ဆိုင်နေသောကြောင့် ဖြစ်သည်။

ဒီစစ်ပွဲကို အနိုင်ရလိုက်ခြင်းဖြင့် ကမ္ဘာ့တစ္ဆေဆရာလောကသည် အာရှဌာနချုပ်ကို ဦးဆောင်သူအဖြစ် အသိအမှတ်ပြုကြရတော့မည်။ အဘယ်ကြောင့်ဆိုသော် မိမိတို့တွင် ယန်ကျန့်နှင့် လက်ကျန် ခေါင်းဆောင်များ ရှိနေသေးသလို ထိပ်တန်း တစ္ဆေဆရာ အများအပြားလည်း ရှိနေသေးသောကြောင့် ဖြစ်သည်။ အခြား နိုင်ငံများတွင်မူ ထိုသို့ မရှိပေ။ ကျွမ်းကျင်သူ အနည်းငယ် ရှိလျှင်တောင် ပြန့်ကျဲနေပြီး အင်အားစု တစ်ခုအဖြစ် မရပ်တည်နိုင်ကြပေ။

"အနာဂတ်က ငါတို့လက်ထဲ ရောက်ပြီ"

ချောင်ယန်ဟွာ လက်သီးကို ကျစ်ကျစ်ပါအောင် ဆုပ်ထားလိုက်သည်။ ရင်ထဲမှ ဝမ်းသာပီတိများကို ထုတ်ဖော်လိုက်ချင်သည်။ သို့သော် သူ ထိုသို့ မလုပ်ခဲ့ပေ။

သူ လျင်မြန်စွာ တည်ငြိမ်အောင် ထိန်းလိုက်ပြီး ဝမ်းသာမှုများကို ဖိနှိပ်ထားလိုက်သည်။

အဘယ်ကြောင့်ဆိုသော် ဒီစစ်ပွဲကို အနိုင်ရရန်အတွက် ဌာနချုပ်သည် ကြီးမားသော တန်ဖိုး ပေးဆပ်ခဲ့ရကြောင်း သူ သိသောကြောင့် ဖြစ်သည်။ ခေါင်းဆောင် အများအပြား သေဆုံးခဲ့ရသည်။ ရင်နာစရာ ကောင်းလောက်အောင် များပြားသည်။

လီကျွင်း၊ ချောင်ယန်၊ လုကျီဝမ်၊ ကျိုးဒန်၊ လင်းပေ... ပြီးတော့ အရင်က ကျန်းစွန်း…..ဒီလူတွေအားလုံးက ထောင်ပေါင်းများစွာထဲက ရွေးထုတ်ထားတဲ့ ထိပ်တန်း တစ္ဆေဆရာတွေ ဖြစ်ကြသည်။ တစ်ယောက်ချင်းစီက ဧရိယာတစ်ခုလုံးကို တည်ငြိမ်အောင် ထိန်းသိမ်းထားနိုင်သူများ ဖြစ်သည်။ အခု တိုက်ပွဲတစ်ခုတည်းကြောင့် အားလုံး ဆုံးရှုံးလိုက်ရသည်ကို တွေးပြီး ဒုတိယဝန်ကြီး တစ်ယောက်အနေဖြင့် ရင်ထဲတွင် သွေးထွက်ကျမတတ် ခံစားရသည်။

ကံကောင်းသည်မှာ နောက်ဆုံးတွင် အနိုင်ရလိုက်သည်။ လက်ကျန် ခေါင်းဆောင် အရေအတွက်လည်း မနည်းလှပေ။ နောက်ဆက်တွဲ အခြေအနေကို တည်ငြိမ်အောင် ထိန်းထားနိုင်သည်။ အခြေအနေ တည်ငြိမ်သွားသည့်အခါ လူသစ်များကို အားသွန်ခွန်စိုက် မွေးထုတ်ပေးရမည်။ မမျှော်လင့်သော ကိစ္စများ မဖြစ်ပေါ်လာပါက ခေါင်းဆောင် ၁၂ ဦး နေရာလွတ်ကို မကြာမီ ပြန်လည် ဖြည့်ဆည်းနိုင်လိမ့်မည်။

ဒီအချက်ကို တွေးမိလိုက်သောအခါ ချောင်ယန်ဟွာ၏ စိတ်ဖိစီးမှုများ လျော့နည်းသွားသည်။

ဒီအခက်အခဲကို ကျော်ဖြတ်နိုင်ခဲ့ပြီ ဖြစ်၍ ဌာနချုပ်အတွက် ကောင်းမွန်သော အနာဂတ်တစ်ခု ရရှိပြီဟု ဆိုနိုင်သည်။

တည်ငြိမ်သွားပြီးနောက်

ချောင်ယန်ဟွာသည် ဖုန်းကို ကောက်ကိုင်ကာ ဤအရေးကြီးသော သတင်းကို ဖြန့်ဝေလိုက်သည်။ ဒီတိုက်ပွဲကို ဌာနချုပ်က အနိုင်ရရှိခဲ့ကြောင်း လူအများအပြား သိစေချင်သည်။

လက်ရှိ အချိန်တွင် လူထုစိတ်ဓာတ် တက်ကြွစေရန်အတွက် ဤကဲ့သို့သော အောင်ပွဲတစ်ခု လိုအပ်နေသည်။

တစ္ဆေဆရာလောက၏ ဝက်ဘ်ဆိုက်တွင်လည်း ဘုရင်အဖွဲ့အစည်း အကြီးအကျယ် ရှုံးနိမ့်သွားသော သတင်းသည် ပျံ့နှံ့သွားပြီ ဖြစ်သည်။ ဝက်ဘ်ဆိုက်တစ်ခုလုံး ပွက်လောရိုက်သွားပြီး ငြိမ်သက်နေသော တစ္ဆေဆရာ အများအပြားသည်လည်း တက်ကြွလာကြသည်။

"ဘာ... ဘုရင်အဖွဲ့အစည်းက ရှုံးသွားပြီလား ဘုရင် အပါး ၂၀ နီးပါး အပြတ်ရှင်းခံလိုက်ရတယ် ဘုရားရေ သူတို့က တကယ်ပဲ အဲဒီလောက် အသုံးမကျတာလား ဌာနချုပ်က ခေါင်းဆောင်တွေနဲ့ တွေ့တော့ တစ်ရက်တောင် မခံဘူးလား"

"ငါ မယုံဘူး ဘုရင်အဖွဲ့အစည်းက ဒီလောက် အကြီးအကျယ် ရှုံးနိမ့်သွားတယ်ဆိုတာ လုံးဝ မယုံဘူး လူအရေအတွက်ရော စွမ်းရည်ရော ယှဉ်ကြည့်ရင် ဘုရင်အဖွဲ့အစည်းက ခေါင်းဆောင်တွေထက် သာနေတာပဲ ဘယ်လိုလုပ် အပြတ်အသတ် ရှုံးသွားရတာလဲ"

"ကြားတာတော့ ဌာနချုပ်က ပြင်ပအကူအညီ ခေါ်ထားတယ်တဲ့ တော်တော် ကြမ်းတဲ့ကောင်တွေ ခေါ်ထားတယ် ပြောတယ် ပြီးတော့ အရင်က ခေါင်းဆောင်တွေက စွမ်းရည်ကို ဖုံးကွယ်ထားကြတာ ဘုရင်အဖွဲ့အစည်းက အဲဒါကြောင့် ခံလိုက်ရတာ ဘုရင်အဖွဲ့အစည်းကလည်း ကိုယ့်ကိုယ်ကို အထင်ကြီးလွန်းတယ် ဌာနချုပ်ကို အပြတ်ရှင်းချင်နေတာ နောက်ဆုံးကျ အမှားတွေ ဆက်တိုက် ကျူးလွန်မိပြီး ဘုရင်အများအပြား ဆုံးရှုံးသွားရတာ ဌာနချုပ်ကလည်း အခွင့်အရေးရတုန်း ပြင်ဆင်မှုတွေ လုပ်လိုက်တော့ ရလဒ်က အခုလို ဖြစ်သွားတာပေါ့ နိုင်ငံခြားသားတွေက တရှိန်ထိုး တိုက်ခိုက်ရမယ်ဆိုတဲ့ သဘောတရားကို နားမလည်ကြပါဘူး"

ဆွေးနွေးငြင်းခုံမှုများကြားတွင် အံ့သြမှုများက ပိုများနေသည်။

အဘယ်ကြောင့်ဆိုသော် စွမ်းရည်ကွာခြားမှု ကြီးမားသော စစ်ပွဲဖြစ်သည်။ တစ္ဆေသင်္ဘော ကမ်းကပ်နိုင်ခဲ့သည့် အခြေအနေတွင် ဘုရင်အဖွဲ့အစည်း အနေဖြင့် အကြီးအကျယ် ရှုံးနိမ့်စရာ အကြောင်းမရှိပေ။ ခေါင်းဆောင်များက တစ္ဆေဘတ်စ်ကားဖြင့် တုံ့ပြန်ခဲ့သော်လည်း ရလဒ်မှာ သိပ်မထိရောက်ခဲ့ပေ။ ထို့ကြောင့် ဒါသည် စစ်ပွဲအဖြေကို အဆုံးအဖြတ်ပေးသော အချက် မဟုတ်ပေ။

စစ်ပွဲအဖြေကို အဆုံးအဖြတ်ပေးသော အချက်မှာ ဘုရင်အဖွဲ့အစည်းသည် ပထမအကျော့ တိုက်ခိုက်မှုတွင် ပြိုင်ဘက် ရွေးချယ်မှု မှားယွင်းသွားခြင်း ဖြစ်သည်။

သူတို့သည် ကျိုးဒန် ကာကွယ်ပေးထားသော ဟဲယင်အာကို ဦးစားပေး မတိုက်ခိုက်သင့်သလို ဝမ်မိသားစု တတိယမျိုးဆက် ဝမ်ချာလင်းကိုလည်း မတိုက်ခိုက်သင့်ပေ။ ဒီပြိုင်ဘက်နှစ်ဦးကို ရွေးချယ်မှု မှားယွင်းသွားခြင်းကြောင့် ပထမအကျော့ တိုက်ခိုက်မှု ရှုံးနိမ့်သွားခြင်း ဖြစ်သည်။

ထို့အပြင် ယန်ကျန့်ကိုလည်း ထိန်းချုပ်ထားနိုင်ခြင်း မရှိသဖြင့် သူသည် အောင်မြင်စွာ လိုက်လံကူညီပေးနိုင်ခဲ့သည်။

သို့သော် ဒီအကြောင်းရင်းများက စစ်ပွဲကို အဆုံးသတ်သွားစေရန် မလုံလောက်သေးပေ။

နောက်ဆုံး အဆုံးအဖြတ်ပေးပြီး အရာအားလုံးကို နိဂုံးချုပ်လိုက်သူမှာ အစ်မဟုန် ဖြစ်သည်။

သတင်း ဘယ်က ပေါက်ကြားသွားသည် မသိရသော်လည်း အစ်မဟုန်၏ သတင်းအချက်အလက်များ ထွက်ပေါ်လာသည်။

"ဘယ်သူက သတင်းအမှားတွေ လာလွှင့်နေတာလဲ တစ်ယောက်တည်းနဲ့ ခြောက်ယောက်ကို နိုင်တယ် ဟုတ်လား အစ်မဟုန်ဆိုတဲ့ တစ္ဆေဆရာက လက်ကျန် ဘုရင်တွေကို အပြတ်ရှင်းပြီး စစ်ပွဲကို အဆုံးသတ်လိုက်တယ် ဟုတ်လား"

"ကောလာဟလပါကွာ ဌာနချုပ်က ခေါင်းဆောင်တွေက လူငှားပြီး သတင်းလွှင့်ခိုင်းတာ နေမှာပါ တစ္ဆေဆရာလောကမှာ ဒီလောက် ကြောက်စရာကောင်းတဲ့လူ ဘယ်ရှိဦးမှာလဲ ဒီလောက် အကြီးအကျယ် ဖြစ်တာတောင် ဌာနချုပ်က အဖိုးကြီးချင် ထွက်မလာဘူး ဒီအစ်မဟုန်ဆိုတာက ဘယ်ချောင်က ထွက်လာတဲ့ အသေးအမွှားလေးလဲ"

လူအများစုက ဒီလို အတွင်းသတင်းကို လုံးဝ မယုံကြည်ကြပေ။

အဘယ်ကြောင့်ဆိုသော် ယုတ္တိမရှိလွန်းသောကြောင့် ဖြစ်သည်။

တစ်ယောက်တည်းနဲ့ ဘုရင် ခြောက်ပါးကို ရင်ဆိုင်ပြီး အပြတ်ရှင်းပစ်တယ် ဆိုတာ လူတစ်ယောက် လုပ်နိုင်တဲ့ ကိစ္စ မဟုတ်ဘူး။ ယန်ကျန့်တောင်မှ အလွန်ဆုံး တစ်ယောက်နဲ့ နှစ်ယောက်၊ သုံးယောက်လောက်ပဲ ယှဉ်နိုင်မှာ။

မည်သူက စွမ်းရည် ရှိသည်မသိ၊ အစ်မဟုန်၏ သတင်းအချက်အလက်များကို နက်နက်ရှိုင်းရှိုင်း တူးဖော်လိုက်သည်။

နောက်ဆုံးတွင် အစ်မဟုန်၏ သတင်းအချက်အလက်များ ပေါက်ကြားလာသည်။

သို့သော် ထိုအရာသည် အစ်မဟုန် မဟုတ်ဘဲ လျိုချင်းချင်း ဖြစ်နေသည်။

လျိုချင်းချင်းသည် တစ္ဆေဆရာလောကတွင် လှုပ်ရှားခဲ့ဖူးပြီး သတင်းအချက်အလက် အချို့ ကျန်ရစ်ခဲ့သဖြင့် သူမ၏ အကြောင်းများ ပေါ်ထွက်လာခြင်း ဖြစ်သည်။

သို့သော် လျိုချင်းချင်း၏ သတင်းအချက်အလက်များကို မြင်လိုက်ရသောအခါ လူတိုင်း ပို၍ မယုံကြည်နိုင် ဖြစ်သွားကြသည်။

သာမန် တစ္ဆေဆရာ တစ်ယောက်က ဘုရင်များဖြင့် ဖွဲ့စည်းထားသော အဖွဲ့ကို အပြတ်ရှင်းပစ်သည် ဆိုတာ ပို၍ မဖြစ်နိုင်ပေ။

မေးခွန်းထုတ်စရာတွေ ပြည့်နှက်နေသည်။

သို့သော် လက်တွေ့ဘဝသည် ထူးဆန်းအံ့သြဖွယ် ကောင်းလှသည်။ အစ်မဟုန်သည် အမှန်တကယ် လုပ်ဆောင်ခဲ့သည်။ သူတို့ ယုံသည်ဖြစ်စေ မယုံသည်ဖြစ်စေ။

"ငါ ဒီအစ်မဟုန်ကို မြင်ဖူးတယ် တခါတုန်းက တစ္ဆေဘတ်စ်ကားပေါ်မှာ ယန်ကျန့်နဲ့ အတူတူ တွေ့ဖူးတယ် လမ်းမှာ ကားပေါ်ကဆင်းပြီး ရန်တောင် ဖြစ်လိုက်ကြသေးတယ် ဒီမိန်းမက သေလောက်အောင် ကြောက်စရာကောင်းတယ် ပြီးတော့ အစ်မဟုန်ဆိုတာ လျိုချင်းချင်း မဟုတ်ဘူး တကယ့် အထောက်အထားက သမ္မတနိုင်ငံခေတ်က ထိပ်တန်း တစ္ဆေဆရာ တစ်ယောက် သဘာဝလွန် နည်းလမ်းနဲ့ ပြန်လည် အသက်ရှင်လာတာ သူ့နာမည်အရင်းက ကျန်းယို့ဟုန် တဲ့"

မျက်မြင်ကြုံတွေ့ခဲ့ဖူးသော တစ္ဆေဆရာ တစ်ဦးက ဝင်ပြောလိုက်ပြီး လျှို့ဝှက်ချက် အချို့ကို ဖွင့်ဟလိုက်သည်။

"သမ္မတနိုင်ငံခေတ်က လက်ကျန် တစ္ဆေဆရာ ဟုတ်လား ဒီလိုဆိုရင်တော့ မထူးဆန်းတော့ဘူး ငါ သမ္မတနိုင်ငံခေတ်က သဘာဝလွန် အရာတချို့နဲ့ ထိတွေ့ဖူးတယ် သတင်းအချက်အလက် တချို့လည်း သိထားတယ် အဲဒီခေတ်တုန်းကလည်း တစ္ဆေနိုးထမှုတွေ ဖြစ်ခဲ့ဖူးတယ် ထိပ်တန်း တစ္ဆေဆရာတွေလည်း ပေါ်ထွန်းခဲ့ဖူးတယ် အဲဒီတုန်းက တစ္ဆေဆရာတွေသာ အသက်ရှင်ကျန်ရစ်ပြီး အခုထိ ရှိနေသေးတယ်ဆိုရင် သေချာပေါက် အရမ်း ကြောက်စရာ ကောင်းမှာပဲ"

"သမ္မတနိုင်ငံခေတ် ဟုတ်လား အဲဒါက တားမြစ်ထားတဲ့ ခေတ်ကာလတစ်ခုပဲ ငါ ကြုံဖူးတဲ့ သဘာဝလွန် ဖြစ်ရပ်တွေရဲ့ နောက်ကွယ်မှာ သမ္မတနိုင်ငံခေတ်ရဲ့ အရိပ်အယောင်တွေ ရှိနေတယ်"

တခဏချင်းမှာပင် သမ္မတနိုင်ငံခေတ် တစ္ဆေဆရာများ အကြောင်းကို ဝက်ဘ်ဆိုက်တွင် အသည်းအသန် ဆွေးနွေးလာကြသည်။ တချိန်တည်းမှာပင် သမ္မတနိုင်ငံခေတ်နှင့် ပတ်သက်သော သဘာဝလွန် သတင်းအချက်အလက် အမျိုးမျိုးလည်း ထွက်ပေါ်လာသည်။

မဆွေးနွေးလို့ မရပေ။

အဘယ်ကြောင့်ဆိုသော် သမ္မတနိုင်ငံခေတ်မှ လက်ကျန်လူသား အစ်မဟုန် ပေါ်ထွက်လာပြီး ပေါ်လာလာချင်း ဒီခေတ်၏ ထိပ်တန်း ဘုရင်ခြောက်ပါးကို အပြတ်ရှင်းပစ်လိုက်သောကြောင့် ဖြစ်သည်။

အဲဒီခေတ်က တစ္ဆေဆရာတွေက ဒီလောက် ကြမ်းရင် ဘယ်လွယ်မလဲ။

ထို့ကြောင့် သူတို့သည် သမ္မတနိုင်ငံခေတ်၏ သဘာဝလွန် အကြောင်းအရာများကို ပိုမို တူးဖော်ချင်နေကြပြီး ထိုခေတ်က တစ္ဆေဆရာများကို ထပ်မံ ရှာဖွေတွေ့ရှိရန် မျှော်လင့်နေကြသည်။

လူအများစုကမူ ထိတ်လန့်တုန်လှုပ်နေကြသည်။

အဘယ်ကြောင့်ဆိုသော် တစ္ဆေဆရာလောကသည် လွန်ခဲ့သော နှစ်အနည်းငယ်ကမှ ပေါ်ပေါက်လာခြင်း မဟုတ်ဘဲ လွန်ခဲ့သော နှစ် ၁၀၀ ကတည်းက ရှိနေခဲ့ကြောင်း သိလိုက်ရသောကြောင့် ဖြစ်သည်။ ဒီလိုဆိုရင် တစ္ဆေဆရာလောက၏ ရေအနက်သည် ထင်ထားတာထက် ပိုနက်ရှိုင်းနေသည်။ ယခုလို သမ္မတနိုင်ငံခေတ် အကြောင်းများကို တူးဖော်နေလျှင် နောက်ထပ် ကြောက်မက်ဖွယ်ကောင်းသော သဘာဝလွန် ပုဂ္ဂိုလ်များ ပေါ်ထွက်လာမည်ကို မည်သူ အာမခံနိုင်မည်နည်း။

သို့သော် ဤဆွေးနွေးမှုများသည် ရေပန်းစားမှု တစ်ခုသာ ဖြစ်သည်။

လူအချို့ကမူ လက်ရှိတွင် ဘုရင်များ အပြတ်ရှင်းခံလိုက်ရပြီး ယန်ကျန့် ဦးဆောင်သော ခေါင်းဆောင်များ အနိုင်ရရှိသွားသည့်အတွက် ကမ္ဘာ့အခင်းအကျင်း မည်သို့ ပြောင်းလဲသွားမည်ကို ပိုမို စိတ်ဝင်စားနေကြသည်။

"ဘုရင်အဖွဲ့အစည်းဆိုတဲ့ ခြိမ်းခြောက်မှု မရှိတော့ဘူးဆိုတော့ ခေါင်းဆောင်တွေရဲ့ ခေတ် ရောက်လာပြီ ဒီနေ့ကစပြီး ဒီကမ္ဘာကြီးက ယန်ကျန့် လက်ထဲ ရောက်သွားပြီ"

တချို့က သက်ပြင်းချရင်း ပြောလိုက်ကြသည်။ ဌာနချုပ်မှ ခေါင်းဆောင်များသည် ကမ္ဘာအနှံ့ လွတ်လပ်စွာ ခြယ်လှယ်မင်းမူတော့မည့် မြင်ကွင်းကို မြင်ယောင်နေကြသည်။

နောက်ကွယ်မှာ သမ္မတနိုင်ငံခေတ်က ပုဂ္ဂိုလ်တွေ၊ ဖုံးကွယ်နေတဲ့ တစ္ဆေဆရာတွေ ရှိရှိ မရှိရှိ လူသိရှင်ကြား အနေအထားမှာတော့ ဒီအချိန်ကစပြီး ဌာနချုပ်၏ ဥပဒေစိုးမိုးရေး ခေါင်းဆောင် ယန်ကျန့်သည် တစ္ဆေဆရာလောက တစ်ခုလုံး၏ အိပ်မက်ဆိုး ဖြစ်လာတော့မည်။

အခန်း ၁၅၀၄ - ဝမ်မိသားစု၏ မျိုးဆက်

မနက်ခင်း တာဟိုင်မြို့သည် ပုံမှန် အခြေအနေသို့ ပြန်လည် ရောက်ရှိနေပြီ ဖြစ်သည်။ လမ်းမများပေါ်တွင် လူသွားလူလာများ ရှိလာပြီး ကားများလည်း သွားလာနေကြသည်။ မနေ့က အဖြစ်အပျက်များသည် လုံးဝ မဖြစ်ပျက်ခဲ့သကဲ့သို့ အနည်းငယ်မျှပင် အရိပ်အယောင် ကျန်မနေပေ။

သို့သော် တာဟိုင်မြို့၏ နေရာအချို့သည် ပိတ်ဆို့ခံထားရဆဲ ဖြစ်သည်။ ထို့အပြင် သဘာဝလွန် အရာများသည်လည်း မြို့ပြထဲသို့ စိမ့်ဝင်နေကြပြီ ဖြစ်သည်။

တည်ငြိမ်နေသည်ဟု ထင်ရသော မျက်နှာပြင်အောက်တွင် အန္တရာယ်များသည် တိတ်တဆိတ် ပျံ့နှံ့နေသည်။

ဒီအချိန်ကစပြီး တာဟိုင်မြို့တွင် အချိန်မရွေး သဘာဝလွန် ဖြစ်ရပ်များ ဖြစ်ပေါ်လာနိုင်သည်။ ထို့ကြောင့် အခြေအနေ ဆိုးရွားမသွားခင် ဌာနချုပ်မှ လက်ကျန် ခေါင်းဆောင်များသည် ဒီပြဿနာများကို အမြန်ဆုံး ဖြေရှင်းပေးရမည်။

နောက်ဆက်တွဲ ရှင်းလင်းရေး လုပ်ငန်းများသည် လွယ်ကူသော ကိစ္စ မဟုတ်ပေ။ ကြီးမားသော အန္တရာယ်များ ရှိနေနိုင်သည်။

သို့သော် ဒီကိစ္စများသည် ဝမ်ချာလင်းနှင့် မသက်ဆိုင်တော့ပေ။

စောစောစီးစီး အနားယူသွားသော ဝမ်ချာလင်းသည် ယခုအချိန်တွင် တာတုန်းမြို့သို့ ပြန်ရောက်နေပြီ ဖြစ်သည်။ သူသည် သာမန်လူဘဝကို စွန့်လွှတ်ပြီး တစ္ဆေဆရာ ဖြစ်လာခဲ့သဖြင့် ယခုအခါ ကြီးမားသော ပြဿနာတစ်ခုနှင့် ရင်ဆိုင်နေရသည်။ ထိုအရာမှာ တစ္ဆေနိုးထမှုပင် ဖြစ်သည်။

"ငါ တစ္ဆေဆရာ ဖြစ်တာ သိပ်မကြာသေးဘူး ဘုရင်သုံးပါးနဲ့ တစ်ခေါက် တိုက်လိုက်တာနဲ့တင် ငါ့အခြေအနေက ဒီလောက်အထိ ဆိုးရွားသွားပြီ အရင်က ငါ သာမန်လူဘဝနဲ့ နေခဲ့တာ မှန်ကန်တဲ့ ရွေးချယ်မှုပါပဲ ဒါပေမယ့် အခြေအနေအရ တစ္ဆေဆရာလမ်းကို မရွေးလို့ မရခဲ့ဘူး"

ဝမ်ချာလင်း၏ မျက်နှာသည် ယခုအချိန်တွင် သွေးမရှိသကဲ့သို့ ဖြူဖပ်ဖြူရော် ဖြစ်နေသည်။ ထို့အပြင် ခန္ဓာကိုယ်မှ အပုပ်နံ့များ ထွက်နေပြီး ပုပ်ပွနေသော အလောင်းကောင် တစ်လောင်းကဲ့သို့ ဖြစ်နေသည်။

သူ ခြေလှမ်း အနည်းငယ် လှမ်းလိုက်သည်နှင့် ခန္ဓာကိုယ်ပေါ်မှ အသားစများ ကွာကျလာနိုင်သည်။

သို့သော် ဒဏ်ရာများသည် လျင်မြန်စွာ ပြန်လည် ကောင်းမွန်လာသည်။ အဘယ်ကြောင့်ဆိုသော် သူသည် အလောင်းကောင်မွေးမြူသူ တစ္ဆေကို ထိန်းချုပ်ထားသောကြောင့် ဖြစ်သည်။

ခန္ဓာကိုယ် ထိခိုက်ပျက်စီးသွားပါက ခဏလောက် အနားယူလိုက်လျှင် မူလအတိုင်း ပြန်ဖြစ်လာတတ်သည်။ သို့သော် ယခု ဝမ်ချာလင်းသည် အနားယူစရာ မလိုဘဲ အလောင်းကောင် မွေးမြူသူ တစ္ဆေ၏ စွမ်းအားဖြင့် ပျက်စီးသွားသော ခန္ဓာကိုယ်ကို ချက်ချင်း ပြန်လည် ပြုပြင်ပေးနေသည်။ ဤအချက်က ပြသနေသည်မှာ သဘာဝလွန် စွမ်းအားသည် သူ၏ ထိန်းချုပ်မှုအောက်တွင် မရှိတော့ကြောင်းပင် ဖြစ်သည်။

ဒါက တစ္ဆေနိုးထမှု၏ ရှေ့ပြေးနိမိတ် ဖြစ်သည်။

"ငါ အခု သေလို့မဖြစ်သေးဘူး အနည်းဆုံး တစ်နှစ်လောက်တော့ တောင့်ခံထားရဦးမယ် ဒါပေမယ့် သဘာဝလွန်ကိစ္စဆိုတာ ဘယ်သူမှ ကြိုမပြောနိုင်ဘူး ငါ ကြိုတင်ပြင်ဆင်မှုတချို့ လုပ်ထားမှ ဖြစ်မယ်"

ဝမ်ချာလင်း စိတ်ထဲတွင် ဆုံးဖြတ်ချက် ခိုင်မာစွာ ချလိုက်သည်။

ပုပ်ပွနေသော ခန္ဓာကိုယ်ကို ဆွဲကာ တာတုန်းမြို့ရှိ နင်းအန်း အဆောက်အအုံသို့ ရောက်ရှိလာသည်။

ဒီနေရာတွင် လူသူကင်းမဲ့နေပြီ ဖြစ်သည်။ အဆောက်အအုံ တစ်ခုလုံးကို ပိတ်ဆို့ထားပြီး ခေါင်းဆောင်များနှင့် ဌာနချုပ်မှ လူများသာ ဝင်ထွက်ခွင့် ရှိသည်။

ဝမ်ချာလင်းသည် သူနှင့် ရင်းနှီးသော ရုံးခန်းသို့ ရောက်ရှိလာပြီး ကုလားထိုင်ပေါ်တွင် ထိုင်ကာ စားပွဲပေါ်မှ ဖုန်းကို ကောက်ကိုင်ပြီး နံပါတ်တစ်ခုကို ခေါ်ဆိုလိုက်သည်။

မကြာမီ တဖက်မှ ဖုန်းကိုင်လိုက်ပြီး အမျိုးသမီး အသံတစ်သံ ထွက်ပေါ်လာသည်။

"အာကျိန်း ကုမ္ပဏီကို ခဏလာခဲ့ ငါ မင်းကို ပြောစရာ ရှိတယ်"

ဝမ်ချာလင်း၏ လေသံသည် အေးစက်နေပြီး အမိန့်ပေးသံ ပါဝင်နေသည်။

သူသည် တာတုန်းမြို့၏ တာဝန်ခံ ဖြစ်သလို ဌာနချုပ်၏ ခေါင်းဆောင်တစ်ဦးလည်း ဖြစ်သည်။ ဌာနချုပ်တွင် သိပ်ပြီး ပြောရေးဆိုခွင့် မရှိသော်လည်း ဒီမြို့တွင်တော့ သူ ပြောသမျှ အမိန့်ဖြစ်သည်။ မည်သူမျှ သူ့ကို အာခံရဲခြင်း မရှိပေ။

ခဏအကြာတွင် စကတ်ဝတ်ထားသော ဆွဲဆောင်မှုရှိသည့် အမျိုးသမီးတစ်ဦး နင်းအန်း အဆောက်အအုံထဲသို့ ဝင်ရောက်လာပြီး ဒီရုံးခန်းသို့ ကျွမ်းကျင်စွာ ရောက်ရှိလာသည်။

သူမနာမည်က အာကျိန်း ဖြစ်သည်။ ယခင်က ဝမ်ချာလင်း၏ အတွင်းရေးမှူး လုပ်ခဲ့ဖူးသည်။ သူတို့နှစ်ဦးကြားတွင် ရင်းနှီးသော ဆက်ဆံရေး ရှိခဲ့ဖူးသည်။ သို့သော် နောက်ပိုင်းတွင် အကြောင်းအမျိုးမျိုးကြောင့် အာကျိန်းသည် နင်းအန်း အဆောက်အအုံမှ ပြောင်းရွှေ့ခံလိုက်ရသည်။

"သူဌေးဝမ်"

အာကျိန်း၏ လေသံသည် နူးညံ့ပြီး လေးစားမှုများ ပါဝင်နေသည်။

ဝမ်ချာလင်း သူမကို စိုက်ကြည့်လိုက်သည်။ ထို့နောက် သူမ၏ ဗိုက်ကို ကြည့်လိုက်သည်။ စကတ်ဖြင့် ဖုံးကွယ်ထားသော်လည်း အာကျိန်း၏ ဗိုက်သည် အနည်းငယ် ပူထွက်နေသည်ကို မြင်နေရသည်။

"သုံးလလောက် ရှိပြီထင်တယ် သားယောက်ျားလေး"

အာကျိန်း ဒီစကား ကြားလိုက်ရသည့်အခါ ချက်ချင်း ထိတ်လန့်သွားသည်။

"သူ... သူဌေးဝမ် ဘယ်လိုလုပ် သိတာလဲ"

"ခေါင်းဆောင်တစ်ယောက်ရဲ့ သတင်းအချက်အလက် ကွန်ရက်ကို အထင်မသေးပါနဲ့ ငါ သိချင်ရင် တာတုန်းမြို့မှာ ငါ မသိနိုင်တဲ့ကိစ္စ မရှိဘူး ငါ မင်းကို အရင်က သတိပေးခဲ့ဖူးတယ် ကလေး မယူရဘူးလို့ မဟုတ်ရင် ငါ မင်းကို ဒီကမ္ဘာလောကထဲကနေ အပြီးတိုင် ပျောက်ကွယ်သွားအောင် လုပ်ပစ်မယ်လို့ ပြောခဲ့ဖူးတယ် ကြည့်ရတာ မင်းက ငါ့စကားကို နားမထောင်ဘူးပဲ"

ဝမ်ချာလင်း အေးစက်စွာ ပြောလိုက်သည်။

"သူဌေးဝမ်... ကျွန်မ... ကျွန်မ... ဒါက မတော်တဆ ဖြစ်သွားတာပါ ကျွန်မ တမင်လုပ်တာ မဟုတ်ပါဘူး"

အာကျိန်း ထိတ်လန့်တုန်လှုပ်နေသည်။

အဘယ်ကြောင့်ဆိုသော် ဝမ်ချာလင်း၏ လုပ်ရပ်များကို သူမ သိသည်။ လူတစ်ယောက်ကို ပျောက်ကွယ်သွားအောင် လုပ်ဖို့ဆိုတာ သူ့အတွက် အလွန် လွယ်ကူသော ကိစ္စတစ်ခု ဖြစ်ကြောင်း သူမ သိသည်။

ဝမ်ချာလင်း မတ်တပ်ရပ်လိုက်ပြီး သူမကို စိုက်ကြည့်ကာ ပြောလိုက်သည်။

"မင်း ဘာတွေ တွေးနေလဲဆိုတာ ငါ မသိဘူး မထင်နဲ့ မင်းက မင်းအသက်နဲ့ရင်းပြီး ငါနဲ့ လောင်းကစား လုပ်နေတာ ငါ ဒီလောက်ထိ ရက်စက်မှာ မဟုတ်ဘူးလို့ မင်း ထင်နေတာ ကလေး မွေးလာတာနဲ့ ငွေအများကြီး ရမယ် ပြီးတော့ မင်း လိုချင်တဲ့ အဆင့်အတန်းနဲ့ နေရာကို ရမယ်လို့ တွေးနေတာမလား"

"ဒါပေမယ့် ငါ ပြောဖူးတယ် လူတစ်ယောက် အနေနဲ့ လောင်းကစား မလုပ်တာ အကောင်းဆုံးပဲ ဘာလို့လဲဆိုတော့ လောင်းကစား မလုပ်ရင် ဘယ်တော့မှ ရှုံးမှာ မဟုတ်ဘူး"

သူ အာကျိန်း၏ ဘေးနားသို့ ရောက်လာပြီး လက်တစ်ဖက် ဆန့်ထုတ်ကာ သူမ၏ သေးသွယ်သော လည်ပင်းကို ညှစ်လိုက်သည်။

အာကျိန်း တကိုယ်လုံး တုန်ယင်သွားပြီး မျက်လုံးပြူးကာ ကြောက်ရွံ့နေသည်။ အနည်းငယ်မျှပင် ပြန်လည် ခုခံရန် မဝံ့ရဲပေ။

"ငါ မင်းကို မေးချင်တယ် မင်း နိုင်မယ် ထင်လား ရှုံးမယ် ထင်လား"

ဝမ်ချာလင်း လက်ကို အနည်းငယ် အားထည့်လိုက်ရာ အာကျိန်း၏ မျက်နှာသည် ချက်ချင်း နီရဲလာသည်။

ပြင်းထန်သော အသက်ရှူကျပ်မှုနှင့် မူးဝေမှုများ ဝင်ရောက်လာသည်။

သူမ အလိုအလျောက် ရုန်းကန်သော်လည်း ဝမ်ချာလင်းက လက်တစ်ဖက်တည်းဖြင့် သူမကို မြှောက်ထားလိုက်ပြီ ဖြစ်သည်။ ခြေထောက်က မြေကြီးနှင့် လွတ်နေသဖြင့် အားပြုစရာ နေရာမရှိဘဲ ဝမ်ချာလင်းကို ပြန်လည် ခုခံရန် မဖြစ်နိုင်တော့ပေ။

"ကျွန်မ... ကျွန်မ လောင်းကစား လုပ်တာ မဟုတ်ပါဘူး သူဌေးဝမ်... တကယ် မတော်တဆ ဖြစ်သွားတာပါ ယုံပေးပါ... အဟွတ် အဟွတ်"

အာကျိန်း တောင်းပန်နေသည်။ ဝမ်ချာလင်း သူမကို လွှတ်ပေးရန် မျှော်လင့်နေသည်။

ဝမ်ချာလင်း၏ မျက်နှာထားသည် တည်ငြိမ်အေးစက်နေသည်။

"မင်း ကတိဖျက်တယ် ယုံကြည်မှုကို ဖျက်ဆီးတယ် ငါ မင်းကို ဆက်ယုံမယ် ထင်နေလား"

အာကျိန်းသည် ဝမ်ချာလင်း၏ လက်ကို ဆွဲခွာရန် ကြိုးစားသည်။ သို့သော် သူမ အနည်းငယ် အားစိုက်လိုက်သည်နှင့် ဝမ်ချာလင်း၏ လက်မောင်းမှ အသားစများ ကွာကျလာသည်။ ပျစ်ချွဲမည်းနက်သော သွေးများ စီးကျလာပြီး အပုပ်နံ့များ ပိုမို ပြင်းထန်လာသည်။ သို့သော် မကြာမီ ထိုဒဏ်ရာများသည် လျင်မြန်စွာ ပြန်လည် ကောင်းမွန်သွားသည်။ အာကျိန်းသည် မျက်စိမှားသွားသည်ဟုပင် ထင်မှတ်လိုက်သည်။

"သူဌေးဝမ်... ကျွန်မကို မယုံရင် နေပါ... အဟွတ်... ဒါပေမယ့်... ကလေးက အပြစ်မရှိပါဘူး... သူ့ကိုတော့ လွှတ်ပေးပါနော်"

အာကျိန်း တောင်းပန်နေဆဲ ဖြစ်သော်လည်း ဦးနှောက်ထဲတွင် အောက်ဆီဂျင် ပြတ်တောက်လာပြီး သတိလစ်လုနီးပါး ဖြစ်နေပြီ ဖြစ်သည်။

ထိုအခိုက်အတန့်တွင် အာကျိန်း သေခြင်းတရား၏ အနံ့အသက်ကို ရလိုက်သည်။

သူမ ရုန်းကန်ခြင်းကို လျှော့ချလိုက်ပြီး ဤနေရာတွင် သေဆုံးရတော့မည်ဟု လက်ခံလိုက်သည်။

သို့သော် ထိုအချိန်တွင် ဝမ်ချာလင်း၏ လက် ရုတ်တရက် လျော့သွားသည်။ အသက်ရှူကျပ်ပြီး သေလုနီးပါး ဖြစ်နေသော အာကျိန်းသည် ချုပ်နှောင်မှုမှ လွတ်မြောက်သွားပြီး မြေကြီးပေါ်သို့ ဘုန်းခနဲ ပြုတ်ကျသွားသည်။

လေအများအပြား ဝင်ရောက်လာသဖြင့် အာကျိန်းသည် ပြင်းပြင်းထန်ထန် အသက်ရှူရင်း သတိပြန်ဝင်လာသည်။

"အဟွတ် အဟွတ်"

အာကျိန်းသည် သေမင်းလက်တွင်းမှ လွတ်မြောက်လာသဖြင့် ထိတ်လန့်တုန်လှုပ်နေသည်။ ဝမ်ချာလင်းကို ကြည့်လိုက်သောအခါ ကြောက်ရွံ့မှုများ ပြည့်နှက်နေသည်။

အဘယ်ကြောင့်ဆိုသော် ဒီလူယောကျ်ားအတွက် သူမ၏ အသက်ကို ယူရသည်မှာ ကြက်တစ်ကောင် သတ်ရသည်ထက်ပင် လွယ်ကူနေသောကြောင့် ဖြစ်သည်။

ဝမ်ချာလင်းသည် ထိုင်ခုံတွင် ပြန်ထိုင်လိုက်ပြီး မျက်နှာသေဖြင့် ပြောလိုက်သည်။

"ငါ မင်းကို အသက်ရှင်ခွင့် ပေးမယ် ဒီနေ့ညနေကျရင် လူလွှတ်ပြီး မင်းကို တာတုန်းမြို့ကနေ ပို့ပေးမယ် ဘယ်နေရာလဲဆိုတာ မင်း သိစရာ မလိုဘူး အဲဒီနေရာ ရောက်ရင် မင်း တစ်နှစ်ပြည့်အောင် နေရမယ် ကလေး မွေးပြီးသွားရင် မင်း လက်ဆောင်တစ်ခု ရလိမ့်မယ် အဲဒီအချိန်ကျရင် မင်းလိုချင်တဲ့ လျော်ကြေးကို ရလိမ့်မယ်"

"ဒါပေမယ့် အဲဒီကာလအတွင်း မင်းသာ ကတိဖျက်ရင် ဒီကမ္ဘာလောကထဲကနေ မင်းကို အပြီးတိုင် ပျောက်ကွယ်သွားအောင် လုပ်ပစ်မယ် မင်းဆိုတဲ့လူ ဒီလောကထဲမှာ မရှိခဲ့ဖူးသလိုမျိုး ဖြစ်သွားစေရမယ်"

"သွားတော့ မင်းရဲ့ မိသားစုနဲ့ သူငယ်ချင်းတွေကို နှုတ်ဆက်ဖို့ အချိန်ကျန်သေးတယ်"

ထို့နောက် ဝမ်ချာလင်းသည် အာကျိန်းကို ထွက်ခွာခိုင်းလိုက်သည်။

အာကျိန်း မငြင်းဆန်ရဲပေ။ သူမတွင် ရွေးချယ်စရာ မရှိပေ။ ဝမ်ချာလင်း၏ အမိန့်ကို နာခံရုံမှတစ်ပါး အခြား မရှိပေ။

အာကျိန်း ထွက်သွားပြီးနောက် ဝမ်ချာလင်း၏ ဖြူဖပ်ဖြူရော် မျက်နှာပေါ်တွင် စိတ်သက်သာရာ ရသွားသော အမူအရာ ပေါ်လာသည်။

"အာကျိန်း ငါ့ကို အပြစ်မတင်ပါနဲ့ ဝမ်မိသားစုရဲ့ စတုတ္ထမျိုးဆက်ကို မင်း ကိုယ်ဝန်ဆောင်လိုက်ကတည်းက မင်း တစ္ဆေဆရာလောကထဲကို ရောက်လာခဲ့ပြီ တာတုန်းမြို့က အန္တရာယ်များတဲ့ နေရာပဲ မင်း ဒီမှာ နေလို့ မဖြစ်ဘူး မဟုတ်ရင် တခြားလူတွေ မင်းရဲ့ အထောက်အထားကို သိသွားရင် မင်း အသေဆိုးနဲ့ သေရလိမ့်မယ် လူအတော်များများက ဝမ်မိသားစု စတုတ္ထမျိုးဆက် မွေးဖွားလာမှာကို မလိုလားကြဘူး အဲဒီကလေးက လူအများကြီးအတွက် ခြိမ်းခြောက်မှု တစ်ခုပဲ ပြီးတော့ ငါက အကြာကြီး မခံနိုင်တော့ဘူး ဒါကြောင့် မင်း ထွက်သွားမှ ရမယ်"

သူ့လက်ဖဝါးကို ကြည့်လိုက်ရာ အသားစများ တဖန် ကွာကျလာပြန်သည်။ အရိုးများပင် ပေါ်နေပြီ ဖြစ်သည်။

နည်းလမ်းတစ်ခုခု မစဉ်းစားလျှင် သူ၏ ခန္ဓာကိုယ် တစ်ခုလုံး ပြိုကွဲသွားတော့မည်။

အဲဒီအချိန်ကျရင် အလောင်းကောင်မွေးမြူသူ တစ္ဆေက ခန္ဓာကိုယ်ကို ပြန်လည် ပြုပြင်ပေးနိုင်ရင်တောင် ဝမ်ချာလင်းက သေဆုံးသွားလောက်ပြီ။

အဲဒီအချိန်ကျမှ ဝမ်မိသားစု စတုတ္ထမျိုးဆက် မမွေးဖွားလာသေးရင် သူ့အဘိုးအဘွား၊ မိဘတွေနဲ့ သူကိုယ်တိုင်ပါ ထိန်းချုပ်မရတဲ့ တစ္ဆေဆိုးတွေ ဖြစ်သွားကြလိမ့်မယ်။

"ဝမ်မိသားစုရဲ့ တစ္ဆေတွေ ထိန်းချုပ်မှု လွတ်သွားလို့ မဖြစ်ဘူး... ဝမ်မိသားစု စတုတ္ထမျိုးဆက် မွေးဖွားလာတဲ့ အချိန်အထိ ငါ တောင့်ခံထားရမယ်"

ဝမ်ချာလင်း မတ်တပ်ရပ်လိုက်သည်။ ယိုင်နဲ့နေသော ခန္ဓာကိုယ်ဖြင့် နင်းအန်း အဆောက်အအုံမှ ထွက်ခွာသွားသည်။

သူ့ကိုယ်ပိုင် တစ္ဆေနိုးထမှု ပြဿနာကို သွားရောက် ဖြေရှင်းရမည်။

ဘယ်နည်းလမ်းပဲ သုံးရ သုံးရ အနည်းဆုံး ခြောက်လလောက်တော့ အသက်ရှင်ရမည်။

ထို့ကြောင့် ထွက်ခွာသွားသော အာကျိန်းသည် ဝမ်ချာလင်းကို ထပ်မံ တွေ့ဆုံခွင့် ရတော့မည် မဟုတ်ပေ။ နောက်တစ်ကြိမ် ပြန်တွေ့သည့်အချိန်တွင် ဝမ်ချာလင်းသည် လူရှင် မဟုတ်တော့ဘဲ ဝမ်မိသားစု စတုတ္ထမျိုးဆက်၏ ဘေးနားတွင် လှည့်လည်သွားလာနေသော တစ္ဆေတစ်ကောင် ဖြစ်နေပေလိမ့်မည်။

တသက်လုံး ဝမ်မိသားစု၏ ကံကြမ္မာမှ ရုန်းထွက်ရန် ကြိုးစားခဲ့သော ဝမ်ချာလင်းသည် နောက်ဆုံးတွင် ဝမ်မိသားစု၏ ကံကြမ္မာကို ဆက်လက် သယ်ပိုးရန် ရွေးချယ်လိုက်သည်။

ဒါက သူ့အတွက် အလွန် နာကျင်စရာကောင်းသော ကိစ္စဖြစ်သည်။

ဒါပေမယ့် ဒါက တစ္ဆေဆရာလောကပဲလေ။

လူတိုင်း နာကျင်စွာ အသက်ရှင်နေကြရသည်။ မျှော်လင့်ချက် ဆိုတာ မရှိသလောက်ပါပဲ။

ရှေ့ခရီးလမ်းတွင် အမှောင်ထုသာ ရှိသည်။