အခန်း (၁၅၀၇-၁၅၀၈)

အခန်း ၁၅၀၇ - ချိတ်ဆွဲအရုပ်

ယန်ကျန့်သည် တစ္ဆေ၏ သတ်ဖြတ်ခြင်း စည်းမျဉ်းကို နားလည်လိုက်သလို တစ္ဆေကို အဘယ်ကြောင့် ဖမ်းချုပ်၍ မရနိုင်သနည်း ဆိုသည်ကိုလည်း ရိပ်မိလိုက်သည်။

အဘယ်ကြောင့်ဆိုသော် တိုက်တစ်ခုလုံးကို သဘာဝလွန် အရာများ လွှမ်းခြုံထားသောကြောင့် ဖြစ်သည်။ တစ်နည်းအားဖြင့် ပြောရလျှင် တစ္ဆေသည် တိုက်ကြီးထဲတွင် ကပ်တွယ်နေပြီး ဤတိုက်ကြီးသည် တစ္ဆေတိုက် ဖြစ်နေပြီ ဖြစ်သည်။ တစ္ဆေကို ဖမ်းချုပ်လိုလျှင် တိုက်တစ်ခုလုံးကိုပါ ဖမ်းချုပ်မှ ရမည်။ မဟုတ်လျှင် တစ္ဆေကို ဘယ်နှခါ သတ်သတ် တိုက်ထဲတွင် တစ္ဆေအသစ် ထပ်ပေါ်လာဦးမည် ဖြစ်သည်။

ဤကဲ့သို့သော အခြေအနေသည် ကိုင်တွယ်ရ အလွန် ခက်ခဲသည်။

သာမန် တစ္ဆေဆရာ တစ်ယောက်သာ ဤတိုက်ထဲသို့ ဝင်ရောက်လာပြီး ဒီအချက်ကို သတိမပြုမိဘဲ တစ္ဆေ၏ ပစ်မှတ်ထားခြင်း ခံရပါက သေချာပေါက် အသေဆိုးဖြင့် သေဆုံးရမည် ဖြစ်သည်။ အဘယ်ကြောင့်ဆိုသော် တစ္ဆေကို ဖမ်းချုပ်၍ မရနိုင်ခြင်းသည် တစ္ဆေက ထိုသူ သေဆုံးသည်အထိ ဆက်တိုက် တိုက်ခိုက်နေမည် ဟူသော အဓိပ္ပာယ် ဖြစ်သည်။

ဒီအချက်ကို သိလိုက်ရပြီးနောက် ယန်ကျန့် ချက်ချင်း လှည့်ထွက်လိုက်သည်။

"ကျွန်မ... ကျွန်မကိုပါ ခေါ်သွားပေးလို့ ရမလားဟင်"

ထိုအချိန်တွင် ကယ်တင်ခံလိုက်ရသော အမျိုးသမီးသည် ယန်ကျန့် ထွက်သွားတော့မည်ကို မြင်လိုက်ရသဖြင့် စိုးရိမ်တကြီး မေးလိုက်သည်။ ဘာဖြစ်နေမှန်း သေချာ မသိသော်လည်း စောစောက အခြေအနေအရ မျက်စိရှေ့မှ အမျိုးသားက တစ္ဆေကို ရှင်းလင်းပြီး သူမကို ကယ်တင်လိုက်ခြင်း ဖြစ်ကြောင်း သူမ သိသည်။

အခု အခွင့်အရေးကို လက်လွတ်ခံလိုက်ရင် ဒီနေရာကနေ ဘယ်တော့မှ ထွက်ခွာနိုင်တော့မှာ မဟုတ်ဘူးလို့ သူမ ခံစားလိုက်ရသည်။

ယန်ကျန့် သူမ၏ စကားကို ကြားသော်လည်း ခြေလှမ်းမရပ်ဘဲ ဆက်လက် ထွက်ခွာနေသည်။

"မင်း တစ္ဆေရဲ့ ပစ်မှတ်ထားခြင်းကို ခံနေရပြီ မင်း အသက်ရှင်ဖို့ အချိန် သိပ်မကျန်တော့ဘူး ငါ့နောက်ကို မီအောင် လိုက်နိုင်ရင် ငါ မင်းကို ဆွဲခေါ်သွားပေးမယ် မလိုက်နိုင်ရင်တော့ ဒီတိုက်ထဲမှာပဲ နေခဲ့ရလိမ့်မယ် ငါက လူတစ်ယောက်အတွက် အချိန်အကြာကြီး ဖြုန်းနေမှာ မဟုတ်ဘူး"

သူ၏ အသံသည် အေးစက်နေသော်လည်း ဒီအမျိုးသမီးကို အသက်ရှင်ခွင့် ပေးလိုက်ခြင်း ဖြစ်သည်။

ဒီစကား ကြားလိုက်ရသည့်အခါ အမျိုးသမီးသည် ဘယ်က အားအင်တွေ ရောက်လာမှန်းမသိ ရုတ်တရက် မတ်တပ်ရပ်လိုက်ပြီး ယန်ကျန့် ရှိရာသို့ အပြေး လိုက်သွားသည်။

သူမ ဖိနပ်မစီးထားသဖြင့် ခြေဖဝါးနှင့် ကြမ်းပြင် ထိတွေ့ကာ တစ္ဆေ၏ သတ်ဖြတ်ခြင်း စည်းမျဉ်းကို ချိုးဖောက်မိနေသည်။

သို့သော် လောလောဆယ် ကိစ္စမရှိပေ။

တစ္ဆေကို ယန်ကျန့်က ယာယီ မောင်းထုတ်လိုက်ပြီ ဖြစ်သည်။ တစ္ဆေအသစ် ပြန်ပေါ်လာရန် အချိန်အနည်းငယ် လိုဦးမည်။ ထို့ကြောင့် ဒီအတောအတွင်း အမျိုးသမီးသည် ဘေးကင်းနေမည် ဖြစ်သည်။

ယန်ကျန့် လျင်မြန်စွာ လှုပ်ရှားလိုက်သည်။ လှေကားအတိုင်း ဆင်းပြီး ဒီနေရာမှ ထွက်ခွာရန် ပြင်ဆင်လိုက်သည်။

အနောက်မှ အမျိုးသမီးသည် ကြောက်ရွံ့နေသော်လည်း အကွာအဝေး သိပ်မကွာစေဘဲ ထပ်ကြပ်မကွာ လိုက်ပါလာသည်။

ထင်တဲ့အတိုင်းပါပဲ။

လူတွေက ဒီလို အကြပ်အတည်းမျိုး ကြုံလာရင် ရွေးချယ်စရာ နှစ်လမ်းပဲ ရှိတယ်။ စိတ်ဓာတ်ကျပြီး သေမယ့်နေ့ကို စောင့်မလား၊ အသက်ရှင်ဖို့ အသေအလဲ ရုန်းကန်မလား။

သိသာတာက ဒီအမျိုးသမီးဟာ ကြောက်မက်ဖွယ် အကောင်းဆုံး အချိန်ကာလကို ကျော်ဖြတ်နိုင်ခဲ့ပြီး သေဘေးကနေ လွတ်မြောက်လာပြီးနောက် ဒီလို ဆိုးရွားတဲ့ ပတ်ဝန်းကျင်နဲ့ အသားကျလာကာ အသက်ရှင်ဖို့ ကြိုးစားနေတာပါပဲ။

ယန်ကျန့် ဂရုမစိုက်ပါဘူး။ သာမန်လူတစ်ယောက် ရှိနေလို့ဆိုပြီး သူ့လှုပ်ရှားမှုကို ရပ်တန့်မှာ မဟုတ်ပါဘူး။

မကြာမီ သူ အပေါ်ထပ်ကနေ မြေညီထပ်ကို ရောက်လာသည်။

အနောက်က အမျိုးသမီးကတော့ သိသိသာသာ နောက်ကျကျန်ရစ်ခဲ့ပြီး အမောဖောက်ကာ အသက်ကို ပြင်းပြင်းထန်ထန် ရှူနေရသည်။

"ဒီလောက် မြန်မြန် ပြန်ရောက်လာတာလား"

ယန်ကျန့် ခြေလှမ်း ရပ်တန့်လိုက်ပြီး မျက်မှောင်ကြုတ်လိုက်သည်။

ရင်းနှီးပြီး အေးစက်တဲ့ ပုံရိပ်တစ်ခု ပြန်ပေါ်လာလေသည်။

ယန်ကျန့် မျက်စိရှေ့က မြင်ကွင်းတွေ ပြောင်းလဲသွားကာ ၇၀၊ ၈၀ ခုနှစ်တွေက ဟောင်းနွမ်းနေတဲ့ အခန်းတစ်ခု လေထဲမှာ ပေါ်လာပြီး လျင်မြန်စွာ ပုံဖော်လာသည်။ စက္ကန့်ပိုင်းအတွင်းမှာပဲ ရင်းနှီးနေတဲ့ အရာအားလုံး ပြန်ရောက်လာပြီး သူ ရောက်နေတဲ့ နေရာက ဧည့်ခန်းထဲ ဖြစ်နေပြီ။

"ဘုန်း"

ဟောင်းနွမ်းနေတဲ့ သံတံခါးကြီး ပြန်ပိတ်သွားသည်။

နေရာမှာတင် မလှုပ်မယှက် ရပ်နေတာတောင် ယန်ကျန့်နဲ့ အနောက်က အမျိုးသမီးဟာ ကြောက်မက်ဖွယ်ကောင်းပြီး ရင်းနှီးနေတဲ့ နေရာတစ်ခုဆီ ပြန်ဆွဲခေါ်ခံလိုက်ရတယ်။

အခုအချိန်မှာ နံရံပေါ်ကနေ ထူးဆန်းတဲ့ မည်းနက်တဲ့ အရည်တွေ ပြန်စိမ့်ထွက်လာပြီး အိပ်ခန်းထဲကနေလည်း ထူးဆန်းတဲ့ အသံတွေ ထွက်ပေါ်လာသည်။

"ငါ့ရဲ့ ဒီဓားချက်က အခန်းထဲက တစ္ဆေကို သေချာပေါက် တစ်စစီ ဖြစ်သွားစေရမယ်"

ယန်ကျန့်က အနီရောင် လှံရှည်ကို ကိုင်ထားပြီး တိုးတိုးလေး ရေရွတ်ကာ ဆုတောင်းလိုက်သည်။

ဒီအချိန်မှာ သူ အချိန်မဖြုန်းချင်တော့ပါဘူး။ အပြင်းထန်ဆုံး သဘာဝလွန် နည်းလမ်းကို သုံးပြီး ဒီတစ္ဆေကို ထပ်မံ ချေမှုန်းဖို့ ပြင်လိုက်တယ်။

မကြာမီ တစ္ဆေအသစ် ပြန်ပေါ်လာဦးမယ် ဆိုရင်တောင် ယန်ကျန့်ရဲ့ လှုပ်ရှားမှုကို နှောင့်ယှက်လို့ မရတော့ပါဘူး။

ဆုတောင်းပြည့်တစ္ဆေရဲ့ စွမ်းအား သက်ရောက်မှုကြောင့် တစ္ဆေရဲ့ ကြားခံနယ်က မျက်စိရှေ့မှာတင် ပေါ်လာတယ်။

ယန်ကျန့်ရဲ့ ထင်းခုတ်ဓား ကျဆင်းလာပြီး ကျိန်စာတွေ ပေါက်ကွဲထွက်လာတယ်။

ဟောင်းနွမ်းနေတဲ့ အခန်းထဲမှာ ထူးဆန်းပြီး ကြောက်မက်ဖွယ် ကောင်းတဲ့ အော်သံတစ်သံ ပဲ့တင်ထပ်လာတယ်။ ပြီးတော့ သဘာဝလွန် စွမ်းအားနဲ့ ဖန်တီးထားတဲ့ ဒီအခန်းဟောင်းကြီးဟာ လျင်မြန်စွာ ပျောက်ကွယ်သွားပြီး ပတ်ဝန်းကျင်က အရာအားလုံးဟာ အချိန်တိုအတွင်း ပုံမှန် အခြေအနေကို ပြန်ရောက်သွားတယ်။

သဘာဝလွန် အတားအဆီးတွေ မရှိတော့တာကြောင့် ယန်ကျန့် ရှေ့ဆက်လျှောက်သွားလေသည်။

အနောက်က အမျိုးသမီးက ဒီမြင်ကွင်းကို ကြည့်ပြီး အံ့သြမှင်သက်သွားတယ်။ ဘာလို့လဲဆိုတော့ ဒီမိနစ်ပိုင်းအတွင်း ကြုံတွေ့ခဲ့ရသမျှက သူမရဲ့ အသိအမြင်တွေကို လုံးဝ ဖျက်ဆီးပစ်လိုက်လို့ပါ။

တစ္ဆေ ပေါ်လာတာက ယုံနိုင်စရာ မရှိလောက်အောင် ထူးဆန်းနေရုံသာမက မျက်စိရှေ့က အမျိုးသားက တစ္ဆေကို ရင်ဆိုင်နိုင်တဲ့ စွမ်းရည် ပိုင်ဆိုင်ထားတာကလည်း ယုံနိုင်စရာ မရှိလောက်အောင် ထူးဆန်းနေပါတယ်။

ဒီကမ္ဘာလောကကြီးထဲမှာ လူတွေ မသိနိုင်တဲ့ လျှို့ဝှက်ချက်တွေ အများကြီး ရှိနေတာပဲ။

ယခုအချိန်တွင် ယန်ကျန့်သည် မြေညီထပ်သို့ ရောက်ရှိနေပြီဖြစ်ပြီး တိုက်ခန်း အပြင်ဘက်သို့ ထွက်ခွာရန် ပြင်ဆင်နေသည်။

"နေပါဦး ဒီ... ဒီတိုက်ကနေ ထွက်လို့ မရဘူး တိုက်ထဲကနေ ထွက်ဖို့ ကြိုးစားတဲ့သူတွေ အကုန်လုံး မှောင်မိုက်နေတဲ့ ကမ္ဘာကြီးထဲမှာ ပျောက်ဆုံးသွားကြတယ် တစ်ယောက်မှ ပြန်မလာကြဘူး တခြားလူတွေကတော့ ထွက်သွားတဲ့သူတွေ အကုန် သေကုန်ကြပြီလို့ ထင်နေကြတယ်"

ရုတ်တရက် ထိုအမျိုးသမီးက ကြောက်ရွံ့စွာ ပြောလိုက်သည်။ တိုက်ခန်းမှ ထွက်ခွာရန် သူမ တွန့်ဆုတ်နေသည်။

"သူတို့ မသေပါဘူး တစ္ဆေနယ်မြေထဲမှာ လမ်းပျောက်နေကြတာပါ အချိန်ကြာရင်တော့ သေကောင်း သေနိုင်တယ်"

ယန်ကျန့် ဘာမှမပြောဘဲ ရှေ့ကို မော့ကြည့်လိုက်သည်။

တောက်လောင်နေသော တစ္ဆေမီးများ တဖန် ပေါ်လာပြီး ရှေ့မှ အရာအားလုံးကို လောင်ကျွမ်းစေကာ အပြင်ဘက်အထိ ပေါက်သော လမ်းတစ်လမ်း ဖောက်လုပ်လိုက်သည်။

မီးတောက်များဖြင့် ဖောက်လုပ်ထားသော လမ်း၏ အဆုံးတွင် နေရောင်ခြည် တောက်ပနေသော တာဟိုင်မြို့ကို မြင်နေရသည်။

ယန်ကျန့်သည် တစ္ဆေမီး ခင်းထားသော လမ်းပေါ်တွင် နင်းလျောက်ကာ ရှေ့ဆက်သွားသည်။

"ဒါ အစတုန်းက တိုက်ထဲမှာ ပေါ်လာတဲ့ မီးပဲ"

အမျိုးသမီးသည် ထူးဆန်းသော စိမ်းဖန့်ဖန့် မီးရောင်ကို မှတ်မိလိုက်သည်။

အစတုန်းက သူမ မီးလောင်ပြီဟု ထင်မှတ်ခဲ့သော်လည်း တကယ်တမ်း ထိတွေ့ကြည့်သောအခါ ဒီမီးသည် မပူဘဲ အလွန် အေးစက်နေကြောင်း၊ ထိတွေ့မိလျှင်လည်း အန္တရာယ် မရှိကြောင်း သိလိုက်ရသည်။

ဒီမီးက အလင်းရောင်ပေးရုံကလွဲပြီး ဘာမှ မသုံးဝင်ဘူးလို့ ထင်ခဲ့ပေမယ့် အခုမှ ဒီမီးရဲ့ အသုံးဝင်ပုံကို နားလည်သွားပါတယ်။

မူလက ဒီမီးဟာ လူတွေကို တိုက်ခိုက်ဖို့ မဟုတ်ဘဲ တစ္ဆေတွေကို တိုက်ခိုက်ဖို့ပါပဲ။

ငရဲပြည်မှာ တစ္ဆေတွေကို လောင်ကျွမ်းစေတဲ့ ငရဲမီးလိုပါပဲ။

အမျိုးသမီးက အမြန် လိုက်သွားပြီး တစ္ဆေမီး ခင်းထားတဲ့ လမ်းပေါ်မှာ နင်းလျောက်ကာ ရှေ့ဆက်သွားတယ်။

တဖြည်းဖြည်းနဲ့ အနောက်က တိုက်ခန်းကြီး ပျောက်ကွယ်သွားပြီး တာဟိုင်မြို့ရဲ့ ပုံရိပ်တွေ မျက်စိရှေ့မှာ ပေါ်လာတယ်။

တစ္ဆေမီး လုံးဝ ပျောက်ကွယ်သွားတဲ့အချိန်မှာ အမျိုးသမီးက သူမကိုယ်သူမ တာဟိုင်မြို့ လမ်းမပေါ်မှာ ရောက်နေတာကို တွေ့လိုက်ရတယ်။ နွေးထွေးတဲ့ နေရောင်ခြည်က သူမအပေါ် ကျရောက်လာပြီး အလွန် နွေးထွေးမှုကို ခံစားလိုက်ရတယ်။

"ငါ... ငါ လွတ်လာပြီ"

ယန်ကျန့်ကတော့ ဂရုမစိုက်ပါဘူး။ သူက တခြားဘက်ကို ဦးတည်သွားနေပြီး ပုံရိပ်က ဝါးတားတား ဖြစ်လာကာ မျက်စိရှေ့ကနေ ပျောက်ကွယ်စ ပြုနေပြီ။

"ရှင်... ရှင့်နာမည် ဘယ်လိုခေါ်လဲ ကျွန်မ နောက်ကျရင် ဘယ်လို ကျေးဇူးဆပ်ရမလဲ"

သတိဝင်လာတဲ့ အမျိုးသမီးက နောက်ဆုံး အခွင့်အရေး အနေနဲ့ ယန်ကျန့် ပျောက်ကွယ်သွားတဲ့ ဘက်ကို လှမ်းအော်မေးလိုက်တယ်။

"ငါ့နာမည်က ယန်ကျန့်ပါ ကျေးဇူးဆပ်စရာ မလိုပါဘူး"

ယန်ကျန့်ရဲ့ အသံ ပျံ့လွင့်လာပေမယ့် လူကတော့ လုံးဝ ပျောက်ကွယ်သွားပါပြီ။

ယန်ကျန့် ဟုတ်လား။

အမျိုးသမီး ကြောင်အမ်းသွားတယ်။ ဒါ လူနာမည် ဟုတ်ရဲ့လား။

ဒါမှမဟုတ် ငါ နားကြားမှားတာများလား။

ယန်ကျန့်သည် ယခုအချိန်တွင် အနီးနားရှိ တိုက်မြင့်တစ်လုံး၏ ခေါင်မိုးပေါ်သို့ ရောက်ရှိနေပြီ ဖြစ်သည်။ သူသည် မျက်စိရှေ့မှ မြေကွက်လပ်တစ်ခုကို စိုက်ကြည့်နေသည်။

ထိုမြေကွက်လပ်သည် တစ္ဆေနယ်မြေထဲသို့ ဆွဲသွင်းခံထားရသော တိုက်ခန်း ရှိနေသည့် နေရာဖြစ်သည်။

ယခု ယန်ကျန့်သည် ထိုတိုက်ခန်းကို တစ္ဆေနယ်မြေထဲမှ ပြန်ဆွဲထုတ်ပြီး တစ္ဆေကို အပြီးတိုင် ဖမ်းချုပ်တော့မည် ဖြစ်သည်။

တစ္ဆေမျက်လုံး ပွင့်လာပြီး ငါးလွှာမြောက် တစ္ဆေနယ်မြေ ပွင့်သွားသည်။ ကောင်းကင်နှင့် မြေကြီးသည် သွေးရောင်လွှမ်းသော အလင်းတန်းများဖြင့် ဖုံးလွှမ်းသွားသည်။

လေးလွှာမြောက် တစ္ဆေနယ်မြေ အောက်တွင် တစ္ဆေမီးများ လောင်ကျွမ်းနေပြီး ငါးလွှာမြောက်သို့ ရောက်သောအခါ တစ္ဆေမျက်လုံး၏ တစ္ဆေနယ်မြေ ဖြစ်သွားသည်။

ငါးလွှာမြောက် တစ္ဆေနယ်မြေ ပွင့်လာသည်နှင့် မျက်စိရှေ့မှ မြေကွက်လပ်တွင် လူနေတိုက်ခန်း တစ်လုံး ပေါ်လာသည်။

ထို့နောက်

ကြောက်မက်ဖွယ် တစ္ဆေမီးများ တောက်လောင်လာပြီး တိုက်ခန်းတစ်ခုလုံးကို မီးရှို့လိုက်သည်။

အေးစက်သော တစ္ဆေမီးသည် တိုက်ခန်းအတွင်းမှ သဘာဝလွန် အရာများကို မောင်းထုတ်လိုက်သည်။

မည်းနက်သော အရည်များ တိုက်ခန်း၏ အလွှာအသီးသီးနှင့် နံရံအနှံ့မှ စိမ့်ထွက်လာသည်။

ထိုမည်းနက်သော အရည်များသည် နေရာတစ်ခုသို့ စုဝေးလာပြီး အမျိုးသမီး တစ်ဦး၏ ပုံသဏ္ဌာန် ဖြစ်ပေါ်လာသည်။ ထို့နောက် ပုံသဏ္ဌာန် ပိုမို ထင်ရှားလာပြီး တိုက်ခန်းအတွင်း ပုန်းအောင်းနေသော မည်းနက်သည့် အရည်များ ကုန်သွားသည့်အချိန်တွင် တကယ့် မူလဇာစ်မြစ် တစ္ဆေ ပေါ်ထွက်လာသည်။

တစ္ဆေ ပေါ်လာပြီးနောက် မြေကြီးထဲသို့ ပြန်လည် ဝင်ရောက်ရန် ကြိုးစားသည်။

သို့သော် မြေပြင်သည် ရေများဖြင့် ဖုံးလွှမ်းနေပြီ ဖြစ်သည်။

တစ္ဆေရေကန်၏ စွမ်းအားသည် တစ္ဆေ၏ ဆုတ်လမ်းကို ပိတ်ဆို့လိုက်ပြီး ကပ်တွယ်စရာ နေရာမရှိအောင် ပြုလုပ်လိုက်သည်။ ထို့ကြောင့် တစ္ဆေသည် လက်တွေ့ကမ္ဘာတွင် မဖြစ်မနေ ပေါ်လာရတော့သည်။

ယန်ကျန့် ဒါကိုမြင်တော့ ခဏလောက် စဉ်းစားလိုက်သည်။ ပြီးတော့ ဘေးပတ်ဝန်းကျင်ကို တစ်ချက် ဝေ့ဝဲကြည့်လိုက်ပြီး အနီးနားက ဆိုင်တစ်ဆိုင်ထဲကနေ ပစ္စည်းတစ်ခုကို ကောက်ယူလိုက်သည်။ ယုန်ရုပ် ချိတ်ဆွဲအရုပ်လေး တစ်ခုပါ။

ဒီယုန်ရုပ် ချိတ်ဆွဲအရုပ်လေးကို တစ္ဆေဆီ ပစ်ပေးလိုက်သည်။

ယုန်ရုပ် ချိတ်ဆွဲအရုပ်လေး တစ္ဆေနဲ့ ထိတွေ့လိုက်တာနဲ့ တစ္ဆေက အရည်ပျော်သွားပြီး မည်းနက်တဲ့ အရည်တွေအဖြစ် ပြောင်းလဲကာ ယုန်ရုပ် ချိတ်ဆွဲအရုပ်လေးထဲကို စိမ့်ဝင်သွားတယ်။

မူလက အဖြူရောင် ယုန်ရုပ် ချိတ်ဆွဲအရုပ်လေးဟာ မည်းနက်ပြီး ဟောင်းနွမ်းသွားတယ်။ အရုပ်ပေါ်က ဆေးတွေ ကွာကျလာပြီး ယုန်ရုပ်ရဲ့ မျက်လုံးတွေကလည်း အသက်ဝင်လာသလို ထူးဆန်းစွာ လှုပ်ရှားနေတယ်။ ကြည့်ရတာ ကြက်သီးထစရာ ကောင်းပြီး ကြောက်စရာ ကောင်းလာတယ်။

တစ္ဆေ ကပ်ငြိနေတဲ့ ယုန်ရုပ် ချိတ်ဆွဲအရုပ်လေးဟာ သဘာဝလွန် ပစ္စည်းတစ်ခု ဖြစ်သွားပါပြီ။

ပြီးတော့ ဒါက ထိန်းချုပ်ရခက်တဲ့ သဘာဝလွန် ပစ္စည်းတစ်ခုပါ။ ဘာလို့လဲဆိုတော့ ဒီယုန်ရုပ် ချိတ်ဆွဲအရုပ်လေးကို ထိတွေ့မိတဲ့ ဘယ်သူမဆို တစ္ဆေရဲ့ တိုက်ခိုက်ခြင်းကို ခံရမှာမို့လို့ပါ။

"တစ္ဆေရဲ့ သတ်ဖြတ်ခြင်း စည်းမျဉ်းနဲ့ ဂုဏ်သတ္တိကို သိသွားရင် တစ္ဆေကို ဖမ်းချုပ်ရတာ လွယ်ကူသွားပြီ ဒီဂုဏ်သတ္တိကို အသုံးချပြီး သဘာဝလွန် ပစ္စည်းတောင် လုပ်လို့ရသေးတယ်"

ယန်ကျန့် လျှောက်သွားပြီး ရွှေလက်အိတ် စွပ်ကာ မြေကြီးပေါ်က ဟောင်းနွမ်းနေတဲ့ ယုန်ရုပ် ချိတ်ဆွဲအရုပ်လေးကို ကောက်ယူလိုက်တယ်။

သူ သိမ်းမထားပါဘူး။ အနီရောင် လှံရှည်မှာ ချိတ်လိုက်တယ်။

မထိတွေ့ရင် ကိစ္စမရှိဘူးဆိုတော့ လှံရှည်မှာ ယာယီ ချိတ်ထားတာ ဘေးကင်းပါတယ်။ တာချန်းမြို့ ပြန်ရောက်မှ လုံခြုံရေးအခန်းထဲ သွားသိမ်းရမယ်။

"နောက်တနေရာ သွားရအောင်"

ဒါတွေ လုပ်ပြီးတာနဲ့ ယန်ကျန့်က သဘာဝလွန် ဖြစ်ရပ် ဖြစ်ပွားနေတဲ့ နောက်တနေရာကို ဆက်သွားသည်။

ဒီကိစ္စ ကြုံပြီးတဲ့နောက် သူ ရှာဖွေရတာ ပိုစေ့စပ်လာတယ်။

ဘာလို့လဲဆိုတော့ သဘာဝလွန် အရာ တော်တော်များများက ပုန်းအောင်းနေကြလို့ ရှာရခက်လာပြီ။

ဒါပေမယ့် ယန်ကျန့် စိတ်ထဲမှာ မေးခွန်းတစ်ခု ပေါ်လာသည်။

ရဲကျန့် ဘယ်ရောက်သွားတာလဲ။

ဘုရင်နဲ့ တိုက်ခိုက်နေရင်း ဒီကောင် ပျောက်သွားတာ။

အသတ်ခံလိုက်ရတာများလား။

မဖြစ်နိုင်လောက်ပါဘူး။ အစားထိုးအရုပ်ရဲ့ စွမ်းအားကို ယန်ကျန့် သိလေသည်။ ရဲကျန့်ကို သတ်ဖို့ဆိုတာ အရမ်း ခက်ခဲတဲ့ ကိစ္စ ဖြစ်သည်။ ဒါပေမယ့် ရဲကျန့်လို ကြွားဝါတတ်တဲ့ စရိုက်နဲ့ဆိုရင် အရေးကြီးတဲ့ အဆုံးအဖြတ် တိုက်ပွဲမှာ တိတ်ဆိတ်နေစရာ အကြောင်းမရှိဘူး။ သူ သေချာပေါက် ပြဿနာကြီးကြီးမားမား ရှာမှာ။

"ထားလိုက်ပါတော့ ဘုရင်တွေလည်း အပြတ်ရှင်းခံလိုက်ရပြီပဲ ရဲကျန့်ကလည်း လူသတ်သမား ကုဒ်နာမည်ရှိတဲ့ ဘုရင်တစ်ပါးကို သတ်ခဲ့တာဆိုတော့ ငါ သူ့ကို အပြစ်တင်စရာ အကြောင်းမရှိပါဘူး ဒီတခေါက် သူလည်း အများကြီး ဆုံးရှုံးလိုက်ရတယ် သဘာဝလွန် ဖိုရမ်က အဖွဲ့ဝင် အများအပြား အသတ်ခံလိုက်ရတာကိုး"

ယန်ကျန့် စိတ်ထဲကနေ တွေးလိုက်သည်။

အခန်း ၁၅၀၈ - အန္တရာယ်သစ်

"ဒီနေ့ ငါ ရဲကျန့် လာတာ ကိစ္စတစ်ခုတည်း အတွက်ပဲ၊ အဲဒါက လက်စားချေဖို့၊ မဆိုင်တဲ့လူတွေ ထွက်သွားကြ"

ပြည်ပနိုင်ငံတစ်ခုရှိ မိုးမျှော်တိုက်ကြီး တစ်ခုထဲမှ ရဲကျန့်၏ ဒေါသတကြီး အော်သံ ထွက်ပေါ်လာခဲ့သည်။

သူသည် တာဟိုင်မြို့၌ နေထိုင်ကာ ဘုရင်များနှင့် တိုက်ခိုက်မနေခဲ့ပေ။ တိုက်ပွဲ အလယ်တွင် ရုတ်တရက် အသိဉာဏ် ပွင့်လင်းလာပြီး တာဟိုင်မြို့ စစ်မြေပြင်ကို စွန့်ခွာကာ တစ်ဖက်လူ၏ အသိုက်အမြုံဆီသို့ တည့်တည့် ဝင်ရောက် တိုက်ခိုက်ရန် ဆုံးဖြတ်လိုက်ခြင်း ဖြစ်သည်။ ဘုရင်အဖွဲ့အစည်း၏ စခန်းများကို တစ်ခုပြီးတစ်ခု အမြစ်ပြတ် ချေမှုန်းပစ်ရန် ရည်ရွယ်ထားသည်။

ဘယ်သူက သူတို့ကို ကျင့်ဝတ်မဲ့စွာ သဘာဝလွန် ဖိုရမ်ကို ခိုးကြောင်ခိုးဝှက် တိုက်ခိုက်ခိုင်းသနည်း။ သဘာဝလွန် ဖိုရမ်တစ်ခုလုံး ပျက်စီးလုနီးပါး ဖြစ်သွားခဲ့ရသည်။

ရဲကျန့်သည် ဒီအမုန်းတရားကို မဖြေဖျောက်နိုင်ခဲ့ပေ။ ဘုရင် တစ်ပါး နှစ်ပါး သတ်ရုံဖြင့် ဒေါသပြေမည် မဟုတ်ချေ။ ဒီဘုရင်အဖွဲ့အစည်း တစ်ခုလုံးကို ရှင်းလင်းပစ်မှသာ ကျေနပ်နိုင်မည် ဖြစ်သည်။

ထို့အပြင် သူနှင့် သူ့ကျောပေါ်မှ အရုပ်မလေးလည်း တိုင်ပင်ပြီး ဖြစ်သည်။ အရုပ်မလေးကလည်း ကောင်းမွန်သော အကြံဉာဏ်ဟု ထောက်ခံပေးခဲ့သည်။

ထူးဆန်းသော အရုပ်မလေးသည် ပါးစပ်ဟပြီး စကားပြောနေသကဲ့သို့ ပြုမူသော်လည်း အသံကား ထွက်မလာခဲ့ပေ။ သို့သော် ရဲကျန့်မှာမူ အရေးကြီးသော သတင်းအချက်အလက်များကို ကြားနေရသည်။ ထို့ကြောင့် ဘုရင်အဖွဲ့အစည်း၏ တည်နေရာ အတိအကျနှင့် ဘုရင်အဖွဲ့အစည်း၏ အဖွဲ့ဝင်များက ဘယ်သူတွေလဲဆိုတာ သူ သိရှိနေသည်။

တစ္ဆေက လမ်းပြပေးနေခြင်း ဖြစ်သည်။

ရဲကျန့်သည် ဘုရင်အဖွဲ့အစည်း၏ စခန်းများကို တိတိကျကျ ရှာဖွေတွေ့ရှိနေသည်။

ဒါက သူ ရှင်းလင်းလိုက်သော ၈ ခုမြောက် စခန်း ဖြစ်နေပြီ။

ရဲကျန့်၏ ဒေါသတကြီး အော်သံကြောင့် နိုင်ငံခြားသား အများစုက နားမလည်ကြသော်လည်း တစ္ဆေဆရာ တချို့ကမူ နားလည်ပြီး ရဲကျန့်ကို မှတ်မိသွားကြသည်။

"သောက်ကျိုးနည်း ဒါ တာဟိုင်မြို့က သဘာဝလွန် ဖိုရမ် အက်ဒမင် ရဲကျန့်ပဲ သူ ဘယ်လိုလုပ် ဒီရောက်နေတာလဲ ဒီအချိန်မှာ သူက တာဟိုင်မြို့မှာ ငါတို့ ဘုရင်တွေနဲ့ တိုက်ခိုက်နေရမှာ မဟုတ်ဘူးလား"

ဘုရင်အဖွဲ့အစည်းဝင် အချို့ ထိတ်လန့်တုန်လှုပ်သွားကြသည်။

"ငါ သိပြီ သူက ဘုရင်တွေနဲ့ မတိုက်ခိုက်ချင်လို့ ဒီအချိန်မှာ အခွင့်ကောင်းယူပြီး ငါတို့ကို လာသတ်တာ"

"ဘယ်လိုလုပ် ဖြစ်နိုင်မှာလဲ ဒီရဲကျန့်က ဘယ်တုန်းက ဒီလောက် ကောက်ကျစ်သွားတာလဲ"

အဆောက်အအုံထဲတွင် အသံမျိုးစုံ ထွက်ပေါ်လာပြီးနောက် ထိတ်လန့်တုန်လှုပ်မှုများ ဖြစ်ပေါ်လာခဲ့သည်။

ခေါင်းဆောင်အဆင့် တစ္ဆေဆရာ တစ်ဦး ရောက်ရှိလာခြင်းသည် သူတို့အတွက် အိပ်မက်ဆိုးပင် ဖြစ်သည်။ အဘယ်ကြောင့်ဆိုသော် သူတို့ဆီတွင် ခေါင်းဆောင်အဆင့်ကို ယှဉ်ပြိုင်နိုင်သော ဘုရင် မရှိသောကြောင့် ဖြစ်သည်။ ထို့အပြင် ဒီနေရာသည် ဘုရင်အဖွဲ့အစည်း၏ စခန်းခွဲ တစ်ခုသာ ဖြစ်သဖြင့် တစ္ဆေဆရာ အများအပြားလည်း ရှိမနေပေ။

ထို့ကြောင့် ရဲကျန့်ကို ရင်ဆိုင်ရန် နည်းလမ်း မရှိဘဲ ထွက်ပြေးရန်သာ ကြိုးစားကြရသည်။

သို့သော် ယခုအခါ ထွက်ပြေးရန်ပင် ခက်ခဲနေပြီ ဖြစ်သည်။

အဘယ်ကြောင့်ဆိုသော် ရဲကျန့်၏ တစ္ဆေနယ်မြေက ဒီအဆောက်အအုံ တစ်ခုလုံးကို ပိတ်ဆို့ထားလိုက်သောကြောင့် ဖြစ်သည်။ မဆိုင်သောသူများကို ဖယ်ရှားပြီးသည်နှင့် ရဲကျန့်သည် မစောင့်ဆိုင်းတော့ဘဲ စတင် လှုပ်ရှားလိုက်ပါတော့သည်။

သူသည် အစားထိုးအရုပ်၏ စွမ်းအားကို အသုံးပြုပြီး ရန်သူကို လိုက်လံရှာဖွေနေရန် မလိုအပ်ပေ။ အဆောက်အအုံ အလယ်တွင် ရပ်ပြီး ကိုယ့်ကိုယ်ကို နာကျင်အောင် လုပ်လိုက်ရုံသာ ဖြစ်သည်။ အနီးနားရှိ ရန်သူများသည် တစ်ယောက်ပြီးတစ်ယောက် သေဆုံးကုန်ကြသည်။ ပြီးတော့ ဒီသဘာဝလွန် တိုက်ခိုက်မှုကို ရှောင်လွှဲ၍ မရနိုင်ပေ။ ကိုယ့်ခန္ဓာကိုယ်ဖြင့်သာ ခံနိုင်ရည် ရှိအောင် ကြိုးစားရမည် ဖြစ်သည်။

ဘုရင်များ အနေဖြင့် ရဲကျန့်၏ အစားထိုးအရုပ် စွမ်းအားကို ခံနိုင်ရည် ရှိကောင်း ရှိနိုင်သော်လည်း သာမန် တစ္ဆေဆရာများ အနေဖြင့်မူ မည်သို့မျှ မဖြစ်နိုင်ပေ။

ရဲကျန့် စတင် လှုပ်ရှားလိုက်သည်နှင့် နာကျင်စွာ အော်ဟစ်သံများ အဆောက်အအုံထဲတွင် ပဲ့တင်ထပ်လာခဲ့သည်။

တစ္ဆေဆရာများသည် တစ်ယောက်ပြီးတစ်ယောက် အကြောင်းမဲ့ သေဆုံးကုန်ကြသည်။

ရဲကျန့်မှာမူ မျက်နှာသေဖြင့်သာ ရှိနေပြီး ဂရုမစိုက်ပေ။

သူ့ သဘာဝလွန် ဖိုရမ်မှ အဖွဲ့ဝင်များ သေဆုံးရခြင်းက ဒီထက် အများကြီး ပိုများခဲ့သည် မဟုတ်ပါလော။

မကြာမီ အော်ဟစ်သံများ တဖြည်းဖြည်း လျော့နည်းလာပြီး နောက်ဆုံးတွင် ဘာသံမျှ မကြားရတော့ပေ။ အဆောက်အအုံ တစ်ခုလုံး တိတ်ဆိတ်ငြိမ်သက်သွားခဲ့သည်။

"နောက်တနေရာ သွားမယ်"

ရဲကျန့် တွန့်ဆုတ်မနေဘဲ လှည့်ထွက်သွားခဲ့သည်။

သူ့ကျောပေါ်တွင် ထူးဆန်းသော အရုပ်မလေး ကပ်နေသည်။ ယခု ထိုအရုပ်မလေးက ပါးစပ်ဟပြီး တစ်ခုခု ပြောနေပြန်ပြီ။

သိသာလှသည်။

တစ္ဆေက ရဲကျန့်ကို နောက်တနေရာ သွားရန် လမ်းညွှန်နေခြင်း ဖြစ်သည်။

ရဲကျန့်၏ ဒီလုပ်ရပ်သည် လူတိုင်း မျှော်လင့်ထားသည်နှင့် ကွဲလွဲနေခဲ့သည်။ ထို့အပြင် လှုပ်ရှားမှုကလည်း လျင်မြန်လွန်းသဖြင့် ဘုရင်အဖွဲ့အစည်းမှ သာမန် အဖွဲ့ဝင်များ အနေဖြင့် ကာကွယ်ချိန် မရလိုက်ကြပေ။ တစ္ဆေကလည်း လမ်းပြပေးနေသည် ဖြစ်ရာ မမျှော်လင့်ထားသော ကိစ္စများ မရှိပါက ဒီဘုရင်အဖွဲ့အစည်းကို သူတစ်ယောက်တည်းနှင့် အမြစ်ပြတ် ရှင်းလင်းပစ်နိုင်မည့်ပုံ ပေါက်နေသည်။

အချိန်ကုန်လွန်လာသည်နှင့်အမျှ တာဟိုင်မြို့၏ အခြေအနေကလည်း တဖြည်းဖြည်း ကောင်းမွန်လာခဲ့သည်။

ခေါင်းဆောင်များသည် တာဟိုင်မြို့ထဲတွင် သဘာဝလွန် အရာများ၏ ခြေရာကို လိုက်လံရှာဖွေနေကြသည်။ တွေ့ရှိသည်နှင့် ဖြေရှင်းကြသည်။ တစ်ယောက်တည်း မနိုင်ပါက သတင်းပို့လိုက်သည်နှင့် အခြား ခေါင်းဆောင်များ ချက်ချင်း ရောက်ရှိလာပြီး ကူညီပေးကြသည်။

ပူးပေါင်းဆောင်ရွက်မှု အောက်တွင် သဘာဝလွန် ဖြစ်ရပ် အားလုံးနီးပါးကို ဖြေရှင်းနိုင်ခဲ့ကြသည်။

ခေါင်းကိုက်စရာ တစ်ခုတည်းမှာ တချို့တစ္ဆေများသည် အတော်ပင် ပုန်းအောင်းတတ်ခြင်း ဖြစ်သည်။ ရှာဖွေရန် ခက်ခဲလှသည်။ တစ္ဆေတိုင်းက လူသတ်သည် မဟုတ်ပေ။ တချို့တစ္ဆေများသည် ပုန်းအောင်းနေပြီး ပျောက်ကွယ်သွားတတ်သည်။ ပြန်ပေါ်မလာတော့ပေ။ ဒီလိုဆိုလျှင် ခေါင်းဆောင်များလည်း ဘာမှ မတတ်နိုင်ပေ။

သူတို့သည် လတ်တလော ခေါင်းကိုက်စရာ ဖြစ်နေသော သဘာဝလွန် ဖြစ်ရပ်များကိုသာ ဖြေရှင်းပေးနိုင်ခြင်း ဖြစ်သည်။

"ဒီနေ့ လုပ်စရာတွေ တော်တော် များနေပြီ။ ခင်ဗျားတို့ မောရင် နားလိုက်ကြပါဦး။ တာဟိုင်မြို့ရဲ့ အခြေအနေက တစ်ရက်တည်းနဲ့ ပြီးမှာ မဟုတ်ဘူး။ ငါတို့ ဒီမှာ ရက်နည်းနည်းလောက် ဆက်နေရဦးမယ်"

ယန်ကျန့်သည် ယခု တိုက်တစ်လုံး၏ ခေါင်မိုးပေါ်တွင် ထိုင်ပြီး အနားယူနေသည်။ သူ့ဘေးနားတွင် အနီရောင် လှံရှည်တစ်ချောင်း ထောင်ထားသည်။

လှံရှည်ပေါ်တွင် ချိတ်ဆွဲအရုပ်လေး တစ်ခု ရှိနေသည်။ အရောင်လွင့်ပြီး မည်းနက်နေသော ယုန်ရုပ်လေး ဖြစ်သည်။ ယခု ထိုယုန်ရုပ်၏ မျက်လုံးများသည် ယန်ကျန့်ကို ထူးဆန်းစွာ စိုက်ကြည့်နေသည်။

ဒါပေမယ့် ယန်ကျန့်မှာမူ ဂရုမစိုက်ပေ။

"နားသင့်ပြီ၊ ဒီအတိုင်း ဆက်သွားရင် ငါ တစ္ဆေနိုးထလာမှာ ကြောက်ရတယ်"

လီလဲ့ဖိန်က ပြန်ပြောသည်။ သူလည်း လှုပ်ရှားမှုကို ရပ်တန့်ပြီး နားရန် နေရာရှာနေပြီ ဖြစ်သည်။

"နင်တို့ နားကြပါ၊ ငါ ဆက်လုပ်နိုင်သေးတယ်"

ဟဲယင်အာမှာမူ အခြေအနေ ကောင်းမွန်နေဆဲ ဖြစ်သည်။ သူက ဝိညာဉ်ခေါ်သူ ဖြစ်သဖြင့် ဝိညာဉ်ခေါ်လိုက်ရုံသာ ဖြစ်သည်။ ကိုယ်တိုင် တစ္ဆေနှင့် တိုက်ခိုက်စရာ မလိုပေ။

"ငါလည်း အဆင်ပြေပါတယ်"

ဟယ်ယွဲ့လျန်ကလည်း ဆက်လက် လှုပ်ရှားနိုင်ကြောင်း ပြောလာသည်။

လျိုစန်းက ပြန်ပြောသည်။

"ငါလည်း ကန့်သတ်ချက် ရောက်တော့မယ်၊ နားမှ ဖြစ်မယ်။ စောစောက ဘုရင်နဲ့ တိုက်တုန်းက အများကြီး သုံးလိုက်ရတယ်။ ပြီးတော့ အခုလည်း သဘာဝလွန် ဖြစ်ရပ် နှစ်ခု ဖြေရှင်းလိုက်ရသေးတယ် ဒီတိုင်း ဆက်သွားရင် ငါလည်း အန္တရာယ် ရှိတယ်"

"ခေါင်းဆောင် ကျွန်တော်တို့ဘက်ကလည်း နားဖို့ လိုတယ် စုဖန်ရဲ့ အခြေအနေ နည်းနည်း ဆိုးနေတယ်။ ကျန်းလေလည်း စောစောက စားလိုက်တဲ့ တစ္ဆေကို ချေဖျက်ဖို့ အချိန်လိုနေတယ်"

လီယန်ကလည်း သူတို့အဖွဲ့ နားရန် လိုအပ်ကြောင်း ပြောလာသည်။

ယန်ကျန့်က ပြန်ပြောသည်။

"အခု အခြေအနေ ကောင်းမွန်ဖို့က အရေးကြီးတယ်။ မနိုင်တော့ဘူး ထင်ရင် ချက်ချင်း ရပ်နားလိုက်ပါ။ ဒီတိုက်ပွဲမှာ အသက်ရှင်ကျန်ရစ်ခဲ့တာ မလွယ်ကူဘူး နောက်ဆက်တွဲ သဘာဝလွန် ဖြစ်ရပ်တွေကြောင့် မသေစေနဲ့"

ထင်ထားသည့်အတိုင်းပင် လူအများစုက ကန့်သတ်ချက် ရောက်ရှိနေကြပြီ ဖြစ်သည်။ ဒီအတိုင်း ဆက်သွားလျှင် လူအများအပြား စောစောစီးစီး အနားယူလိုက်ရလိမ့်မည်။

ဒါက လက်ကျန် ဘုရင်များကို အစ်မဟုန် ရှင်းပစ်လိုက်၍သာ အဆင်ပြေနေခြင်း ဖြစ်သည်။

တကယ်လို့ တစ်ဖက်က ဘုရင်များသာ ထပ်မံ လှုပ်ရှားလာပါက နောက်ဆုံး အသက်ရှင်ကျန်ရစ်မည့်သူ လက်ချိုးရေလို့ ရလောက်အောင် နည်းပါးသွားပေလိမ့်မည်။

"နောက်ဆက်တွဲ ဘာပြဿနာမှ မရှိဘဲ အဆင်ပြေပါစေလို့ မျှော်လင့်ရတာပဲ"

ယန်ကျန့် စိတ်ထဲတွင် အကြောင်းပြချက်မရှိ စိုးရိမ်ပူပန်မှုများ ဖြစ်ပေါ်နေသည်။

ဒီစိုးရိမ်မှုက သင်္ဘောသားဘုရင် ကုဒ်နာမည်ရှိသော ဘုရင်ဆီမှ လာခြင်း ဖြစ်သည်။

အဘယ်ကြောင့်ဆိုသော် ထိုသင်္ဘောသားဘုရင်၏ အထောက်အထားကို ကြည့်လျှင် ဒီစစ်ပွဲ၏ နောက်ကွယ်က အခြေအနေက ရိုးရှင်းမည် မဟုတ်ပေ။ တစ္ဆေများ၏ အရိပ်အယောင်များ ရှိနေသည်။ ထို့ကြောင့် သူ စိုးရိမ်နေသည်မှာ နှစ်ဖက်စလုံး ဘုရင်များ၊ ခေါင်းဆောင်များနှင့် ထိပ်တန်း တစ္ဆေဆရာများ အများအပြား ဆုံးရှုံးလိုက်ရသော အချိန်တွင် သဘာဝလွန် ဖြစ်ရပ်များ ပေါက်ကွဲထွက်လာမည်ကို ဖြစ်သည်။

ပြီးတော့ ဒါက သဘာဝအလျောက် ထိန်းချုပ်မရ ဖြစ်ခြင်း မဟုတ်ဘဲ တစ္ဆေက တမင်တကာ ဖန်တီးလိုက်တာမျိုး ဖြစ်မည်ကို စိုးရိမ်နေမိသည်။

တာဟိုင်မြို့၏ ထောင့်တစ်နေရာတွင် လျိုစန်းသည် စက္ကူရုပ် အများအပြားနှင့်အတူ လူမနေသော အခန်းတစ်ခန်းထဲတွင် စုဝေးနေကြသည်။ သူ့အခြေအနေက တကယ် မကောင်းလှပေ။ မျက်နှာပေါ်မှ အဝါရောင် စက္ကူများသည် ကော်မကပ်တော့သလို ကွာကျလာနေသည်။ ဒီအတိုင်း ဆက်သွားလျှင် စက္ကူရုပ်ထဲတွင် အိပ်ပျော်နေသော ကြောက်မက်ဖွယ် အလောင်းကောင်ကြီး နိုးထလာပေလိမ့်မည်။

ထိုအချိန်ရောက်လျှင် လျိုစန်း သေဆုံးပြီ ဖြစ်သည်။

ဒါကြောင့် နားနေသော လျိုစန်းသည် သဘာဝလွန် စွမ်းအားကို အသုံးပြုပြီး ပျက်စီးနေသော နေရာများကို ပြန်လည် ပြုပြင်နေသည်။ ကွာကျနေသော အဝါရောင် စက္ကူများကို ပြန်ကပ်ပြီး စက္ကူရုပ်ထဲမှ အလောင်းကောင်ကြီးကို ထပ်မံ ချိပ်ပိတ်နေသည်။ တစ္ဆေ နိုးမလာအောင် ကာကွယ်နေခြင်း ဖြစ်သည်။

ဒါပေမယ့် လျိုစန်း နားနေသည့်အချိန်တွင် သူ့စက္ကူရုပ်များကမူ အားမနေပေ။ လှုပ်ရှားနေကြဆဲ ဖြစ်သည်။

ရုတ်တရက် အဝါရောင် စက္ကူ ကပ်နေသော လျိုစန်း၏ မျက်နှာထား ရုတ်တရက် ပြောင်းလဲသွားပြီး ဘေးနားမှ စက္ကူရုပ် တစ်ရုပ်ကို လှမ်းကြည့်လိုက်သည်။

ထိုစက္ကူရုပ်က ဒီနေရာတွင် ရှိနေသည်မှာ ကြာပြီ ဖြစ်သည်။ ဒီအခန်းထဲမှ ဘယ်တော့မှ မထွက်ပေ။

အဘယ်ကြောင့်ဆိုသော် ဒီစက္ကူရုပ်က အလုပ်တစ်ခုတည်းကိုသာ လုပ်ဆောင်နေသောကြောင့် ဖြစ်သည်။ အဲဒါက ဟောင်းနွမ်းနေသော ရေကြောင်းမြေပုံကို စောင့်ကြည့်နေခြင်း ဖြစ်သည်။

ရေကြောင်းမြေပုံပေါ်တွင် တစ္ဆေသင်္ဘော၏ တည်နေရာ အတိအကျကို ပြသနေသည်။

ပြီးခဲ့သော တာတုန်းမြို့ အစည်းအဝေး ပြီးကတည်းက ဒီရေကြောင်းမြေပုံကို လျိုစန်းကပင် ထိန်းသိမ်းထားခြင်း ဖြစ်သည်။ အဘယ်ကြောင့်ဆိုသော် သူ့မှာ စက္ကူရုပ်များ အများအပြား ရှိသဖြင့် လူခွဲပြီး ရေကြောင်းမြေပုံ၏ လှုပ်ရှားမှုကို အချိန်ပြည့် စောင့်ကြည့်နိုင်သောကြောင့် ဖြစ်သည်။ အခြား ခေါင်းဆောင်များကမူ အခြားအလုပ်များ လုပ်ရမည်ဖြစ်၍ ဒီမြေပုံကိုချည်း ထိုင်ကြည့်နေ၍ မရနိုင်ပေ။

သို့သော် စောစောက တစ္ဆေသင်္ဘော၏ တည်နေရာက ရေကြောင်းမြေပုံပေါ်တွင် ပြန်ပေါ်လာခဲ့သည်။

"နောက်နေတာလား တစ္ဆေသင်္ဘောက ပြန်လာနေပြီ အခု တာဟိုင်မြို့ အနား ရောက်နေပြီ ဟုတ်လား"

လျိုစန်း ရေကြောင်းမြေပုံကို စိုက်ကြည့်နေသည်။ သူ ကြည့်မမှားပေ။

တစ္ဆေသင်္ဘောက ရေကြောင်းမြေပုံပေါ်တွင် ပြန်ပေါ်လာသည်။ ပြီးတော့ တာဟိုင်မြို့နှင့် အလွန် နီးကပ်နေပြီ ဖြစ်သည်။ ဒီဘက်ကို ဦးတည် မောင်းနှင်လာနေပုံရသည်။

ဒုတိယအကျော့ တိုက်ခိုက်မှုလား။

"မဖြစ်နိုင်တာ ဘုရင်တွေ အကုန်လုံးနီးပါး သေကုန်ကြပြီပဲ တစ္ဆေသင်္ဘောကို လမ်းညွှန်မယ့်သူ မရှိတော့ဘူး ဒီသင်္ဘောက ထိန်းချုပ်မှု လွတ်သွားပြီ အခု ပင်လယ်ပြင်မှာ ရည်ရွယ်ချက်မရှိ လှည့်လည်သွားလာနေရမှာ ဒီနေရာကို ရောက်လာစရာ အကြောင်းမရှိဘူး တိုက်ဆိုင်မှုများလား"

လျိုစန်း၏ မျက်လုံးများ အရောင်လက်သွားပြီး ရင်ထဲတွင် ပြင်းထန်သော စိုးရိမ်ပူပန်မှုများ ဖြစ်ပေါ်လာခဲ့သည်။

အဘယ်ကြောင့်ဆိုသော် တစ္ဆေသင်္ဘောသာ နောက်တစ်ခေါက် ထပ်လာခဲ့လျှင် လက်ရှိ ခေါင်းဆောင်များ၏ အင်အားနှင့် မည်သို့မျှ ခုခံနိုင်မည် မဟုတ်ကြောင်း သူ သိသောကြောင့် ဖြစ်သည်။