အခန်း (၁၅၀၉-၁၅၁၀)

အခန်း ၁၅၀၉ - တန်ပြန်တိုက်ခိုက်ရန် ပြင်ဆင်ခြင်း

လျိုစန်းသည် ယခုအချိန်တွင် တိတ်ဆိတ်ငြိမ်သက်သွားခဲ့သည်။ သူ၏ မျက်လုံးများက ဟောင်းနွမ်းနေသော ရေကြောင်းမြေပုံပေါ်၌ ပေါ်လာသည့် ထူးခြားမှုများကို စိုက်ကြည့်နေခဲ့သည်။

ဘယ်လိုပဲ ကြည့်ရှုပါစေ တစ္ဆေသင်္ဘော ပြန်လည်ပေါ်လာခြင်းမှာ အမှန်ပင် ဖြစ်သည်။ သူ့အခြေအနေ မကောင်း၍ မျက်စိမှားသွားခြင်း မဟုတ်ပေ။

"အခု တစ္ဆေသင်္ဘော ပေါ်လာတဲ့နေရာက ပင်လယ်ပြင်မှာပဲ ရှိသေးတယ်၊ တာဟိုင်မြို့ထဲ မရောက်သေးဘူး၊ ဒါပေမယ့် အကွာအဝေးက တော်တော် နီးကပ်နေပြီ၊ ဒါက ဘာအဓိပ္ပာယ်လဲဆိုတော့ နောက်တစ်ကြိမ် တစ္ဆေသင်္ဘော ပေါ်လာရင် အရင်ကလိုပဲ မြို့ထဲကို တိုက်ရိုက် ဝင်လာတော့မယ်... အရင် ခန့်မှန်းချက်တွေအရဆိုရင် အလွန်ဆုံး နာရီဝက်လောက်ပဲ ကြာတော့မယ်"

"ဒါပေမယ့် တစ္ဆေသင်္ဘောက တစ္ဆေဘတ်စ်ကားရဲ့ တိုက်ခိုက်မှုကို ခံလိုက်ရပြီးနောက် ပြဿနာ တက်သွားခဲ့တယ် ပြောင်းလဲမှုတချို့ ရှိကောင်း ရှိနိုင်တယ် ဘာပဲဖြစ်ဖြစ် ဒီကိစ္စက အရေးကြီးတယ်၊ ယန်ကျန့်ကို အကြောင်းကြားပြီး ဖြေရှင်းခိုင်းမှ ဖြစ်မယ် သူက ဥပဒေစိုးမိုးရေး ခေါင်းဆောင်လေ"

လျိုစန်းသည် စက္ကူရုပ်တစ်ရုပ်ကို အခန်းထဲမှ စေလွှတ်လိုက်သည်။

စက္ကူရုပ်၏ သဘာဝလွန် စွမ်းအားမှာ မသေးငယ်လှပေ။ ဘုရင်များနှင့် ခေါင်းဆောင်များကို ယှဉ်ပြိုင်ရန် မဖြစ်စလောက် ဖြစ်သော်လည်း သာမန် တစ္ဆေဆရာများ အတွက်မူ လျိုစန်း၏ စက္ကူရုပ်ကို ယှဉ်နိုင်ရန် မလွယ်ကူပေ။

စက္ကူရုပ်သည် တစ္ဆေနယ်မြေကို အသုံးပြုပြီး လျင်မြန်စွာ ပျောက်ကွယ်သွားခဲ့သည်။

ခဏအကြာတွင် တိုက်ခေါင်မိုးပေါ်၌ အနားယူနေသော ယန်ကျန့်သည် တစ်စုံတစ်ခုကို အာရုံခံမိလိုက်သည်။ တစ္ဆေမျက်လုံးက အရပ်မျက်နှာ တစ်ခုဆီသို့ လှည့်ကြည့်လိုက်ရာ မြို့ပြထဲတွင် အေးစက်ပြီး ထူးဆန်းသော လမ်းကြားလေး တစ်ခု ပေါ်လာသည်ကို တွေ့ရှိလိုက်ရသည်။ ထိုလမ်းကြားလေးသည် လက်တွေ့ဘဝတွင် မရှိပေ။ တစ္ဆေနယ်မြေ အနေဖြင့် ပေါ်လာခြင်း ဖြစ်သည်။ ထိုလမ်းကြားလေးပေါ်တွင် လျိုစန်း၏ စက္ကူရုပ်က ဒီဘက်သို့ ဦးတည်ပြီး လျင်မြန်စွာ လျှောက်လှမ်းလာနေသည်။

စက္ကူရုပ်သည် တိုက်နံရံများကို လစ်လျူရှုကာ ယန်ကျန့်ထံသို့ တည့်မတ်စွာ လျှောက်လှမ်းလာခဲ့သည်။ လမ်းလျှောက်နှုန်း မမြန်သော်လည်း တစ္ဆေနယ်မြေက လက်တွေ့ အကွာအဝေးကို ချုံ့လိုက်သဖြင့် ခြေလှမ်း အနည်းငယ် လှမ်းရုံဖြင့် ခေါင်မိုးပေါ်သို့ ရောက်ရှိလာခဲ့သည်။

"ဘာဖြစ်လို့လဲ"

ယန်ကျန့်က မျက်မှောင်ကြုတ်ကာ မေးမြန်းလိုက်သည်။

လျိုစန်း၏ စက္ကူရုပ်ကို မြင်လိုက်ရကတည်းက အရေးကြီးသော ကိစ္စတစ်ခုခု ဖြစ်ပျက်နေပြီဖြစ်ကြောင်း သူ ရိပ်မိလိုက်သည်။

သို့မဟုတ်ပါက စက္ကူရုပ် လွှတ်ပြီး သတင်းလာပို့စရာ အကြောင်းမရှိပေ။ သာမန်ကိစ္စဆိုလျှင် ဖုန်းဆက်လိုက်ရုံ၊ မက်ဆေ့ချ် ပို့လိုက်ရုံဖြင့် ပြီးပြည့်စုံနိုင်သည် မဟုတ်ပါလော။

လျိုစန်း၏ စက္ကူရုပ်က ချက်ချင်း ပြောကြားလိုက်သည်။

"ရေကြောင်းမြေပုံပေါ်မှာ တစ္ဆေသင်္ဘောရဲ့ ခြေရာ ပြန်ပေါ်လာတယ်၊ ပြီးတော့ တစ္ဆေသင်္ဘော ပေါ်လာတဲ့ နေရာက တာဟိုင်မြို့နဲ့ အရမ်း နီးကပ်နေပြီ၊ နောက်တစ်ခေါက် တစ္ဆေသင်္ဘော ပေါ်လာရင် ကမ်းကပ်လာမှာကို ငါ စိုးရိမ်တယ်"

ပြောပြီးသည်နှင့် စက္ကူရုပ်က အရပ်မျက်နှာ တစ်ခုဆီသို့ လက်ညှိုးထိုးပြလိုက်သည်။

ပင်လယ်ပြင်ဘက်သို့ ဖြစ်သည်။

ယန်ကျန့် တိတ်ဆိတ်သွားခဲ့သည်။ ထို့နောက် လေးလေးနက်နက် ပြောဆိုလိုက်သည်။

"ငါတို့ဆီမှာ လူ သိပ်မကျန်တော့ဘူး ထပ်တိုက်ရင် ဌာနချုပ် ပြိုလဲသွားလိမ့်မယ် တစ္ဆေသင်္ဘောကို နောက်တစ်ခေါက် ကမ်းကပ်ခွင့် လုံးဝ မပေးနိုင်ဘူး"

"ဟုတ်တယ် ဒါကြောင့် ဒီကိစ္စက အရေးကြီးနေတာ"

လျိုစန်း၏ စက္ကူရုပ်ကလည်း သက်ပြင်းချလိုက်မိသည်။

ယခုအခါ ခေါင်းဆောင်များ အများအပြား ဆုံးရှုံးထားရပြီ ဖြစ်သည်။ ဝမ်ချာလင်းက အနားယူသွားခဲ့ပြီ။ လျိုစန်း၊ လီလဲ့ဖိန်နှင့် လီယန်တို့ အဖွဲ့ကလည်း အခြေအနေ ဆိုးရွားနေသည်။ ဆက်လက် တိုက်ခိုက်နိုင်သူမှာ ယန်ကျန့်၊ ဟဲယင်အာနှင့် ဟယ်ယွဲ့လျန် သုံးယောက်သာ ကျန်ရှိတော့သည်။

သို့သော် ဒီလူအင်အား နည်းနည်းလေးဖြင့် တစ္ဆေသင်္ဘောကို ရင်ဆိုင်ရန် မဖြစ်နိုင်ပေ။

ထို့အပြင် ဒီလူများသည် ဌာနချုပ်၏ နောက်ဆုံး လက်ကျန် အားကိုးရာများ ဖြစ်သည်။ ဒီသုံးယောက်ထဲမှ တစ်ယောက် နှစ်ယောက်လောက် ထပ်မံ ဆုံးရှုံးသွားပါက ဌာနချုပ်ကို ဦးဆောင်မည့် ခေါင်းဆောင်တောင် ရှိတော့မည် မဟုတ်ပေ။ ခေါင်းဆောင် စီမံကိန်းလည်း ပျက်စီးသွားပေမည်။ ထိုအချိန်ရောက်လျှင် ဌာနချုပ် ဆိုသည်မှာ နာမည်သာ ကျန်ရှိတော့မည် ဖြစ်သည်။

"အရင်က အစ်မဟုန်နဲ့ ကျန်းရှန့်ကွမ်းကို ပြန်ခေါ်လို့ရရင်၊ ပြီးတော့ ရဲကျန့်ကို ပြန်ခေါ်နိုင်ရင် တောင့်ခံနိုင်လောက်တယ်၊ ဟဲယင်အာမှာ ဝိညာဉ်ခေါ်တဲ့ စွမ်းရည် ရှိသေးတယ်လေ..."

လျိုစန်း၏ စက္ကူရုပ်က ရုတ်တရက် အကြံပြုလိုက်သည်။

ယန်ကျန့် ခေါင်းခါလိုက်သည်။

"မျှော်လင့်မနေပါနဲ့တော့၊ အစ်မဟုန်က ဘုရင်တွေကို အပြတ်ရှင်းတဲ့ နည်းလမ်းကို အမြဲတမ်း သုံးနိုင်မယ် ထင်နေလား။ ကျန်းရှန့်ကွမ်းက ဘုရင်သုံးပါးကို သတ်ပြီးပြီ၊ သူ့အကြွေး သူ ဆပ်ပြီးပြီ၊ အခုလောက်ဆို တာဟိုင်မြို့ကနေ ထွက်ခွာသွားလောက်ပြီ၊ ဒီကိစ္စတွေမှာ ဝင်ပါတော့မှာ မဟုတ်ဘူး

ရဲကျန့်ကို ပြန်ခေါ်လာနိုင်ရင်တောင် အခြေအနေကို ပြောင်းလဲနိုင်မှာ မဟုတ်ဘူး။ ဟဲယင်အာရဲ့ ဝိညာဉ်ခေါ်တာက အခြေအနေကို ပြောင်းလဲနိုင်ပေမယ့် သူ့ရဲ့ ဝှက်ဖဲတွေကို တစ်ရက်တည်းနဲ့ သုံးကြိမ်တောင် သုံးလိုက်ပြီ။ ငါ့ကို တစ္ဆေဘတ်စ်ကားပေါ်က ကယ်တုန်းက တစ်ကြိမ်၊ သဘာဝလွန် ဖြစ်ရပ် ဖြေရှင်းတုန်းက တစ်ကြိမ်၊ ဘုရင်တွေနဲ့ တိုက်တုန်းက တစ်ကြိမ်၊ အခု သူ့လက်ထဲမှာ အမွေပစ္စည်း ကောင်းကောင်း တစ်ခုနှစ်ခုလောက်ပဲ ကျန်တော့မှာ၊ တိုက်ဖိန် ရှေးဟောင်းမြို့ရဲ့ ဝိညာဉ်ခေါ်သူ ဝှက်ဖဲတွေကို အကုန် ထုတ်သုံးခိုင်းလို့ မဖြစ်ဘူးလေ"

"လူစုလိုက်ရင်တော့ ခဏလောက် တောင့်ခံနိုင်ကောင်း တောင့်ခံနိုင်လိမ့်မယ် ဒါပေမယ့် ငါတို့မှာ ရင်းနှီးစရာ အရင်းအနှီး မရှိတော့ဘူး။ အရင်က ဘုရင်အဖွဲ့အစည်းက အဲဒီလို လုပ်ချင်ခဲ့တာ၊ တစ္ဆေသင်္ဘောကို တစ်ခေါက်ပြီးတစ်ခေါက် လွှတ်ပြီး ငါတို့ကို အင်အားကုန်ခမ်းအောင် လုပ်ချင်တာ ဒါပေမယ့် သူတို့ တွက်ကိန်းလွဲသွားတယ် ဘုရင်တွေနဲ့ တစ္ဆေသင်္ဘော ပူးပေါင်းပြီး ငါတို့ကို တစ်ချက်တည်းနဲ့ အပြတ်ရှင်းမယ်လို့ ထင်ခဲ့ပေမယ့် အစ်မဟုန်၊ ကျန်းရှန့်ကွမ်း၊ ဟဲယင်အာ တို့လို သာမန်ထက်ထူးကဲတဲ့ လူတွေနဲ့ တွေ့ပြီး အကြီးအကျယ် ခံလိုက်ရတာ၊ မဟုတ်ရင် ပထမအကျော့မှာတင် ငါတို့ ရှုံးသွားလောက်ပြီ"

လျိုစန်းသည် ယန်ကျန့်၏ ဆိုလိုရင်းကို သဘောပေါက်လိုက်သည်။

တစ္ဆေသင်္ဘော ဒုတိယအကြိမ် ကမ်းကပ်ခြင်းကို တောင့်ခံနိုင်ကောင်း တောင့်ခံနိုင်လိမ့်မည်၊ သို့သော် ဒါက နောက်ဆုံး လက်ကျန် အင်အားကို ပုံအောလိုက်ခြင်းပင် ဖြစ်သည်။ ရှုံးနိမ့်သွားပါက အရာအားလုံး ပြီးဆုံးသွားပြီ။ တစ္ဆေနိုးထမှုကို တားဆီးနိုင်တော့မည် မဟုတ်ပေ။ ဒါကြောင့် ဒီအင်အားကို ချန်ထားသည်က ပိုကောင်းသည်။ အနာဂတ်အတွက်လည်း ကြိုတင်ပြင်ဆင်ထားရမည် မဟုတ်ပါလော။

"ဒါပေမယ့် တစ္ဆေသင်္ဘော ပြန်ပေါ်လာတာကို လွှတ်ထားလို့ မရဘူး"

ယန်ကျန့် မတ်တပ်ရပ်လိုက်သည်။ မျက်မှောင်ကြုတ်ကာ အနီရောင် လှံရှည်ကို ကိုင်ဆောင်ပြီး အဝေးသို့ လှမ်းမျှော်ကြည့်လိုက်သည်။

"ယန်ကျန့် မင်း ဘာလုပ်မလို့လဲ"

လျိုစန်း၏ စက္ကူရုပ်က စပ်စုချင်စိတ်ဖြင့် မေးမြန်းလိုက်သည်။

"ငါက ထုန်ချန်၊ ဟယ်ယွဲ့လျန် တို့နဲ့ ပေါင်းပြီး တစ္ဆေသင်္ဘောကို တားဆီးဖို့ ကြိုးစားကြည့်မယ်"

"သုံးယောက်တည်းလား"

လျိုစန်း၏ စက္ကူရုပ် ကြောင်အမ်းသွားခဲ့သည်။

"ဟဲယင်အာကို မခေါ်တော့ဘူးလား သူ့ရဲ့ ဝိညာဉ်ခေါ်တာက အရေးကြီးတယ်လေ၊ အခု အချိန်ကျန်သေးတယ် ဌာနချုပ်က ခေါင်းဆောင်တွေရဲ့ အမွေပစ္စည်းတွေ ပြင်ဆင်ပေးရင် သေဆုံးသွားတဲ့ ခေါင်းဆောင်တွေကို ပြန်ခေါ်လို့ ရနိုင်တယ် ခေါင်းဆောင်တွေ စုစည်းလိုက်ရင် အခြေအနေ ပြောင်းလဲသွားနိုင်တယ်"

"သေဆုံးသွားတဲ့ ခေါင်းဆောင်တွေကို ပြန်ခေါ်ပြီး တစ္ဆေသင်္ဘောကို ရင်ဆိုင်ခိုင်းတာက သိပ်အဆင်မပြေဘူး ဘာလို့လဲဆိုတော့ သူတို့ ခဏလေးပဲ နေလို့ရတာ၊ ခဏလေး ပေါ်လာရုံနဲ့ အခြေအနေကို မပြောင်းလဲနိုင်ဘူး၊ ပြီးတော့ နောက်ဆုံး လက်ကျန် ဝှက်ဖဲတွေ ကုန်သွားလိမ့်မယ်။ အဲဒီအစား ဟဲယင်အာကို အင်အား ချန်ထားခိုင်းတာ ပိုကောင်းတယ်၊ သူ့အခြေအနေ တည်ငြိမ်တယ်၊ ဌာနချုပ် ပြန်လည် ထူထောင်ရေးအတွက် အထောက်အကူ ဖြစ်စေတယ်"

ယန်ကျန့် ခေါင်းခါလိုက်သည်။

"ဌာနချုပ် ပြန်လည် ထူထောင်ရေးအထိတောင် တွေးထားပြီလား"

လျိုစန်း၏ စက္ကူရုပ် လေသံထဲတွင် မတတ်သာမှုများ ပါဝင်နေသည်။

"တစ္ဆေတွေနဲ့ တိုက်ခိုက်တာက ရေရှည်ကိစ္စလေ လက်ရှိကိုပဲ ကြည့်လို့ မရဘူး၊ တစ်ခုခု ချန်ထားမှ ဖြစ်မယ် တကယ်လို့ သဘာဝလွန် အရာတွေ ထိန်းချုပ်မရ ဖြစ်သွားရင် အနည်းဆုံး ငါတို့မှာ မျှော်လင့်ချက် ရှိနေသေးတာပေါ့"

ယန်ကျန့်၏ အကြည့်များက တည်ငြိမ်နေခဲ့သည်။

လျိုစန်း၏ စက္ကူရုပ်က မေးမြန်းလိုက်သည်။

"ဒါဆို ယန်ကျန့် မင်းက တစ္ဆေသင်္ဘော ဒုတိယအကြိမ် ကမ်းကပ်တာကို တစ်ကိုယ်တည်း ရင်ဆိုင်မလို့လား"

"ဟယ်ယွဲ့လျန်က တာဟိုင်မြို့ကို ပိတ်ဆို့ထားမယ်၊ သဘာဝလွန် အရာတွေ မပျံ့နှံ့အောင် တားဆီးထားမယ်၊ သူက စပြီး မတိုက်ခိုက်ဘူး။ ငါ တစ်ယောက်တည်း တစ္ဆေသင်္ဘောကို သွားတားမယ်၊ ငါ မနိုင်ရင် ထုန်ချန် ဝင်တိုက်လိမ့်မယ်၊ သူ့မှာ အခြေအနေကို ပြောင်းလဲနိုင်တဲ့ အလားအလာ ရှိတယ်၊ ဒါပေမယ့် သူ့ရဲ့ ကန့်သတ်ချက်က အဲဒါကို လုပ်နိုင်မလားဆိုတာ ငါ မသေချာဘူး ဒါပေမယ့် ဒီအချိန်ရောက်မှတော့ စမ်းကြည့်ရုံပဲ ရှိတော့တာပေါ့"

ယန်ကျန့်၏ လေသံက အေးစက်နေခဲ့သည်။ ထုန်ချန်၏ အသက်အန္တရာယ်ကို ဂရုမစိုက်သကဲ့သို့ပင်။ သို့သော် သူကိုယ်တိုင်လည်း ပထမဆုံး အသက်စွန့်မည့်သူ ဖြစ်ရန် ဆန္ဒရှိနေပါသည်။

"ငါနဲ့ ထုန်ချန် နှစ်ယောက်စလုံး ရှုံးနိမ့်သွားရင် ဟယ်ယွဲ့လျန်ကို တာဟိုင်မြို့နဲ့ အနီးနား ဒေသတွေကို စွန့်လွှတ်ခိုင်းမယ်၊ လိုအပ်ရင် သဘာဝလွန် လွှမ်းမိုးထားတဲ့ ဧရိယာမှာ မက်မွန်ပွင့် ဥယျာဉ် စီမံကိန်းကို စတင်ခိုင်းမယ်။ သာမန်လူတွေကို တစ္ဆေလက်ချက်နဲ့ အသေခံခိုင်းတာထက် သဘာဝလွန် ကမ္ဘာထဲမှာ အသက်ရှင်ခိုင်းတာက ပိုကောင်းပါတယ်၊ ကျန်းရှန့်ကွမ်းရဲ့ စီမံကိန်းက လက်ခံနိုင်စရာ အကြောင်းရင်းတချို့ ရှိတယ် သူက အရမ်း အစွန်းရောက်သွားလို့သာ လူတိုင်းကို တစ္ဆေပန်းချီကားထဲ ဆွဲထည့်ပြီး သူက ကမ္ဘာ့အရှင်သခင် လုပ်ချင်နေတာ"

"လူတိုင်းရဲ့ အသက်ကို လူတစ်ယောက်တည်းအပေါ် ပုံအောထားတာက ကျန်းရှန့်ကွမ်း ထမ်းနိုင်တဲ့ ဝန် မဟုတ်ဘူး၊ ဒါကြောင့် ငါတို့ သူ့ကို တားဆီးခဲ့တာ ဟယ်ယွဲ့လျန်ကတော့ တစ္ဆေပန်းချီကားကို ယာယီ ခိုလှုံရာအဖြစ်ပဲ သုံးမှာ အန္တရာယ် ကင်းသွားရင် အရာအားလုံး လက်တွေ့ဘဝကို ပြန်ရောက်လာမှာပါ"

လျိုစန်း၏ စက္ကူရုပ် တိတ်ဆိတ်သွားခဲ့သည်။

ယန်ကျန့်၏ ဆုံးဖြတ်ချက်က ပြဿနာ မရှိပေ။ အခြေအနေ အရပ်ရပ်ကို ခြုံငုံသုံးသပ်ထားခြင်း ဖြစ်သည်။ တစ်ခဏတာ အနိုင်အရှုံးကို ကြည့်ခြင်း မဟုတ်ပေ။

ဒါကြောင့်လည်း ယန်ကျန့်က ဥပဒေစိုးမိုးရေး ခေါင်းဆောင် ဖြစ်လာခြင်း ဖြစ်ပေမည်။

"နောက်ဆက်တွဲ မင်း တစ္ဆေသင်္ဘောကို သေချာ စောင့်ကြည့်ထားပါ၊ တာဟိုင်မြို့မှာ မပေါ်ခင် ရေကြောင်းမြေပုံက ကြိုတင်သတိပေးလိမ့်မယ်၊ အဲဒီကျရင် ငါ့ကို အကြောင်းကြားပါ ငါ ချက်ချင်း လှုပ်ရှားမယ်"

ယန်ကျန့် ပြောကြားလိုက်သည်။

"ဒါက ပြဿနာ မရှိပါဘူး ငါ့စက္ကူရုပ်တွေ လှုပ်ရှားနိုင်သေးတယ် သေးဖွဲတဲ့ ကိစ္စတွေ လုပ်ဖို့က လွယ်ပါတယ်"

လျိုစန်း၏ စက္ကူရုပ်က ပြောဆိုလိုက်သည်။

ယန်ကျန့် ခေါင်းညိတ်လိုက်သည်။

"ကဲ ငါ သွားပြင်ဆင်လိုက်ဦးမယ်၊ တစ္ဆေသင်္ဘော ပေါ်လာပြီဆိုတော့ ဒုတိယအကြိမ် ကမ်းကပ်တာက ဒီနေ့မနက်ပိုင်း ဖြစ်လောက်တယ် အခုက ဆက်နားနေရမယ့် အချိန် မဟုတ်တော့ဘူး"

ပြောပြီးသည်နှင့် သူ လျိုစန်း၏ စက္ကူရုပ်ကို ဂရုမစိုက်တော့ဘဲ တစ္ဆေမျက်လုံးဖြင့် တာဟိုင်မြို့၏ အခြားတစ်ဖက်ကို လှမ်းကြည့်လိုက်သည်။ ထို့နောက် တစ္ဆေနယ်မြေ ဖြန့်ကျက်ပြီး နေရာမှ ချက်ချင်း ပျောက်ကွယ်သွားခဲ့သည်။

လျိုစန်း၏ စက္ကူရုပ်က လိုက်မသွားခဲ့ပေ။ သူ့တာဝန်က ဒီသတင်း အရေးကြီးကို လာပို့ရုံသာ ဖြစ်သည်။

ယန်ကျန့် ပြန်လည်ပေါ်လာသည့် အချိန်တွင် တာဟိုင်မြို့ရှိ လူမရှိသော ဂိုဒေါင်ကြီး တစ်ခုထဲသို့ ရောက်ရှိနေပြီ ဖြစ်သည်။

လီယန်၊ ကျန်းလေ၊ ဝမ်ကျုံး တို့ ပါဝင်သော အဖွဲ့က ဒီဂိုဒေါင်ထဲတွင် အနားယူနေကြသည်။

ယန်ကျန့် ရောက်ရှိလာခြင်းက သူတို့ကို အံ့အားသင့်သွားစေသည်။

"ခေါင်းဆောင် ဘာဖြစ်လို့လဲ"

လီယန်က အခြေအနေ မဟန်မှန်း ရိပ်မိပြီး ချက်ချင်း မတ်တပ်ရပ်ကာ မေးမြန်းလိုက်သည်။

ယန်ကျန့်သည် စကားတစ်ခွန်းမျှ မဆိုပေ။ သူ၏ အကြည့်ကို ဘေးနားရှိ ထုန်ချန်ထံသို့ ရွှေ့လိုက်သည်။

အခန်း ၁၅၁၀ - သုံးယောက်တစ်အုပ်

ယန်ကျန့်၏ ရောက်ရှိလာမှုသည် လီယန်တို့အဖွဲ့အား ဖိအားနှင့် စိုးရိမ်ပူပန်မှုများ ဖြစ်ပေါ်စေခဲ့သည်။

သူတို့သည် မိုက်မဲသောသူများ မဟုတ်ပေ။ တစ်ခုခု ဖြစ်ပျက်နေပြီဖြစ်ကြောင်း ရိပ်မိလိုက်ကြသည်။ သို့မဟုတ်ပါက ဤမျှ အရေးကြီးသော အချိန်တွင် ယန်ကျန့် အနေဖြင့် သူတို့ကို တကူးတက လာရောက်တွေ့ဆုံစရာ အကြောင်းမရှိပေ။

လေထုသည် ရုတ်တရက် တင်းမာလေးလံသွားခဲ့သည်။

ယန်ကျန့်သည် ဖုံးကွယ်မနေဘဲ တိုက်ရိုက်ပင် ပြောကြားလိုက်သည်။

"မွန်းတည့်ချိန် မရောက်ခင်မှာ ပျောက်ကွယ်သွားတဲ့ တစ္ဆေသင်္ဘော နောက်တစ်ခေါက် ကမ်းကပ်လာနိုင်ဖွယ် ရှိနေပြီ အရင်ကလိုပဲ တာဟိုင်မြို့ထဲကို တိုက်ရိုက် ဝင်ရောက်လာနိုင်တယ် ငါ အစီအစဉ် တစ်ခု ရေးဆွဲထားပြီးပြီ အဲဒီအတွက် ထုန်ချန် မင်းရဲ့ ပူးပေါင်းမှု လိုအပ်တယ်"

"ဘာ..."

တစ္ဆေသင်္ဘော ပြန်လည်ပေါ်လာပြီ ဖြစ်ကြောင်း ကြားလိုက်ရသောအခါ ဂိုဒေါင်ထဲတွင် နားနေကြသူ အားလုံး ထိတ်လန့်တုန်လှုပ်သွားကြသည်။

"ယန်ကျန့် ဘယ်လိုလုပ် ဒီလို ရုတ်တရက် ဖြစ်လာရတာလဲ ဘုရင်တွေ အကုန်လုံးနီးပါး အပြတ်ရှင်းခံလိုက်ရပြီ မဟုတ်လား တစ္ဆေသင်္ဘောက ဘယ်လိုလုပ် ပြန်ပေါ်လာနိုင်မှာလဲ"

ကျန်းလေက သံသယ ဝင်နေသော လေသံဖြင့် မေးလိုက်သည်။

"ဒီတခါ တစ္ဆေသင်္ဘောကို ထိန်းချုပ်နေတာ ဘုရင်တွေ မဟုတ်ဘဲ တစ္ဆေတွေ ဖြစ်လောက်မယ် ဒါပေမယ့် အသေးစိတ် အခြေအနေကိုတော့ ဘယ်သူမှ တပ်အပ် မပြောနိုင်ဘူး ဘာပဲဖြစ်ဖြစ် တစ္ဆေသင်္ဘော ပေါ်လာပြီဆိုတော့ ရင်ဆိုင်ရမှာပဲ မဟုတ်ရင် သင်္ဘောတစ်စင်းလုံး အပြည့်ပါလာတဲ့ တစ္ဆေတွေ လွတ်ထွက်လာလိမ့်မယ် အဲဒီကျရင် အခုမှ တည်ငြိမ်စ ပြုနေတဲ့ အခြေအနေတွေ အကုန် ပျက်စီးကုန်တော့မယ်"

ယန်ကျန့်က ပြန်လည်ဖြေကြားလိုက်သည်။

လီယန်က မေးမြန်းလိုက်သည်။

"ခေါင်းဆောင် ကျွန်တော်တို့ ဘာလုပ်ရမလဲ"

ယန်ကျန့် ခေါင်းခါလိုက်သည်။

"မင်းတို့ အခြေအနေက မကောင်းတော့ဘူး ဒီတခေါက် လှုပ်ရှားမှုမှာ ပါဝင်စရာ မလိုပါဘူး ငါ ထုန်ချန် တစ်ယောက်တည်းကိုပဲ ခေါ်သွားမှာ"

"ယန်ကျန့် အခု လူအင်အား မလောက်တော့ဘူးလေ ထုန်ချန် တစ်ယောက်တည်းနဲ့ ဖြစ်ပါ့မလား ငါ့ကိုပါ ခေါ်သွားပါ ငါ တိုက်နိုင်ပါသေးတယ် မင်းကို စိတ်ပျက်စေမှာ မဟုတ်ပါဘူး"

ဝမ်ကျုံး အမည်ရှိသော ခေါင်းဆောင်လောင်းက လျှောက်လာပြီး လေးလေးနက်နက် ပြောဆိုလိုက်သည်။

"မလိုပါဘူး မင်းတို့က ဌာနချုပ်ရဲ့ နောက်ဆုံး လက်ကျန် ထိပ်တန်း တစ္ဆေဆရာတွေပဲ တချက်တည်းနဲ့ အကုန် သေကုန်ရင် ဌာနချုပ် ပြိုလဲသွားလိမ့်မယ် ဒီတခေါက် မင်းတို့ကို ငြင်းပယ်တာတင် မကဘူး လျိုစန်း လီလဲ့ဖိန် ဟဲယင်အာ တို့လို ခေါင်းဆောင်တွေကိုပါ မပါဝင်ခိုင်းထားဘူး"

ယန်ကျန့်က ငြင်းပယ်လိုက်သည်။

ဝမ်ကျုံး မျက်မှောင်ကြုတ်လိုက်မိသည်။

"ကျန်နေတဲ့ ခေါင်းဆောင်တွေတောင် မပါဘူးဆိုရင် တစ္ဆေသင်္ဘောကို ဘယ်လို ရင်ဆိုင်မှာလဲ ဒါမှမဟုတ်..."

သူ တစ်ခုခုကို ရိပ်မိသွားပြီး ယန်ကျန့်ကို အံ့သြတကြီး ကြည့်လိုက်မိသည်။

ယန်ကျန့်သည် စကားတစ်ခွန်းမျှ မဆိုဘဲ တိတ်ဆိတ်နေခဲ့သည်။

ထုန်ချန်က လျှောက်လာပြီး ပြောကြားလိုက်သည်။

"ဒါက အကောင်းဆုံး ရွေးချယ်မှုပဲ တချို့ကိစ္စတွေက တစ်ယောက်ယောက်တော့ လုပ်မှ ဖြစ်မှာလေ ယန်ကျန့် မင်းရဲ့ ဆုံးဖြတ်ချက်က မှန်ကန်ပါတယ် လူအများကြီးကို စွန့်စားခိုင်းတာထက် လူနည်းနည်းပဲ ပေးဆပ်လိုက်တာ ပိုကောင်းပါတယ် နောက်ဆုံးအချိန်မှာ မင်း ငါ့ကို ရွေးချယ်ခဲ့တဲ့အတွက် ဝမ်းသာပါတယ်"

သူ့တာဝန်က ဘာလဲဆိုတာ သူ နားလည်သွားပြီ ဖြစ်သည်။ သို့သော် သူ မကြောက်ရွံ့ခဲ့ပေ။ ဆုံးဖြတ်ချက် ခိုင်မာနေခဲ့သည်။

"ခေါင်းဆောင် ဒီလောက်ထိ လုပ်စရာ မလိုပါဘူး အခြေအနေက အဲဒီလောက်ထိ မဆိုးရွားသေးပါဘူး ငါတို့ဆီမှာ လူအင်အား ရှိပါသေးတယ် စုစည်းလိုက်ရင် တစ္ဆေသင်္ဘောကို ရင်ဆိုင်နိုင်တဲ့ အင်အား ရှိပါသေးတယ် ဒီလို ရွေးချယ်မှုမျိုး လုပ်စရာ မလိုပါဘူး"

လီယန်က အလျင်စလို ပြောဆိုလိုက်သည်။

"လီယန် ယန်ကျန့်ရဲ့ ဆုံးဖြတ်ချက်က မှန်ကန်တယ် လက်ကျန် ခေါင်းဆောင်တွေ ထိပ်တန်း တစ္ဆေဆရာတွေ အကုန်လုံး စုစည်းလိုက်ရင် နောက်တစ်ခေါက် တစ္ဆေသင်္ဘော ကမ်းကပ်တာကို တားဆီးနိုင်ကောင်း တားဆီးနိုင်လိမ့်မယ် ဒါပေမယ့် ပေးဆပ်ရမယ့် တန်ဖိုးကတော့ လူအများစု သေဆုံးသွားမှာပဲ နောက်ဆုံး လက်ကျန် အင်အားကိုပါ သုံးလိုက်ရင် ဌာနချုပ် သွားပြီပဲ ဒီအချိန်မှာ ဌာနချုပ် တည်ငြိမ်ဖို့ လိုအပ်တယ် မဟုတ်ရင် သဘာဝလွန် အရာတွေ ထိန်းချုပ်မရ ဖြစ်ကုန်လိမ့်မယ်"

ဘေးနားရှိ စုဖန်က ဖြည်းညှင်းစွာ ဝင်ရောက်ပြောဆိုလိုက်သည်။

လီယန်က ပြန်လည်ငြင်းဆန်လိုက်သည်။

"ယန်ကျန့် ရှိနေသရွေ့ ဌာနချုပ် ပျက်စီးသွားရင်တောင် ပြန်ဆောက်လို့ ရနိုင်တာပဲ ထိပ်တန်း တစ္ဆေဆရာ တစ်ယောက်ရဲ့ သက်ရောက်မှုက သာမန် တစ္ဆေဆရာ အများကြီး ပေါင်းထားတာထက် ပိုပါတယ် ယန်ကျန့်နဲ့ ထုန်ချန်ရဲ့ အသက်ကို ငါတို့ အများကြီးရဲ့ အသက်နဲ့ လဲလိုက်တာက ရှုံးတဲ့ အရောင်းအဝယ်ပဲ"

"ဒီခေတ်ကြီးက အခြေအနေကို ပြောင်းလဲနိုင်တဲ့ အနာဂတ်ကို ပြောင်းလဲနိုင်တဲ့ လူတစ်ယောက် လိုအပ်တာ သာမန်လူ အများကြီး မလိုပါဘူး"

"မင်းပြောတာလည်း မမှားပါဘူး ဒါပေမယ့် ဘယ်ရွေးချယ်မှုမဆို ကောင်းကျိုး ဆိုးကျိုး ရှိစမြဲပါ"

စုဖန်က တုံ့ပြန်လိုက်သည်။

လီယန်က ဆက်လက်ပြောဆိုသည်။

"ငါ့အမြင်ကတော့ ဆိုးကျိုးက ပိုများနေတယ်"

စုဖန်က ဆက်ပြောသည်။

"တစ္ဆေသင်္ဘောပေါ်က ဆင်းလာတဲ့ တစ္ဆေတွေကို ငါတို့ ရင်ဆိုင်ဖူးတယ် နောက်ထပ် သင်္ဘောတစ်စင်းစာ ထပ်လာရင် ငါတို့အဖွဲ့ သေချာပေါက် အပြတ်ရှင်းခံရလိမ့်မယ် ခေါင်းဆောင်တွေရဲ့ အခြေအနေကလည်း ဆိုးရွားနေပြီ ဒီအချိန်မှာ အတင်းအဓမ္မ လှုပ်ရှားခိုင်းရင် အကူအညီ မဖြစ်တဲ့အပြင် ဝန်ထုပ်ဝန်ပိုး ဖြစ်သွားနိုင်တယ် လက်ကျန် အင်အားကို ပုံအောလိုက်ရင် နိုင်ရင်တောင် ရှုံးတာနဲ့ အတူတူပဲ ဆန့်ကျင်ဘက် အနေနဲ့ ယန်ကျန့်ရဲ့ နည်းလမ်းက အောင်မြင်ခဲ့ရင် အဲဒါမှ တကယ့် အနိုင်ပဲ"

"တစ္ဆေဆရာတိုင်းက တနေ့ကျရင် သေရမှာပဲ ဒီနေ့ အသက်ရှင်နေရင်ရော ဘာထူးမှာလဲ တစ္ဆေနိုးထမှု ပြဿနာကို မဖြေရှင်းနိုင်ရင် ငါတို့က စောစောသေမလား နောက်ကျမှ သေမလား ဆိုတာပဲ ကွာခြားမှာ မင်းကိုယ်မင်း ယန်ကျန့်လောက် အရေးပါတယ် ထင်နေသလား လက်ရှိ တစ္ဆေဆရာလောကမှာ ဒီကမ္ဘာကြီးရဲ့ သဘာဝလွန် ပြဿနာတွေကို အဆုံးသတ်ပေးနိုင်မယ့်သူ ဘယ်သူလဲလို့ မေးရင် ငါ ယန်ကျန့်လို့ပဲ ယုံကြည်ချက်ရှိရှိ ဖြေဆိုမယ် ခဏတာ အနိုင်အရှုံးကို ကြည့်ပြီး အသက်ရှင်နေရတာ ဘာအဓိပ္ပာယ်မှ မရှိဘူး"

လီယန်က စုဖန်ကို စိုက်ကြည့်ပြီး ပြောလိုက်သည်။

နှစ်ယောက်သား အနည်းငယ် အငြင်းပွားလာကြသည်။ တစ်ယောက်နှင့် တစ်ယောက် အမြင်မတူကြပေ။

ယန်ကျန့် ဝင်ရောက်တားမြစ်လိုက်သည်။

"တော်ကြပါတော့ ဒီအစီအစဉ်က အတည်ပြုပြီးသားပဲ ပြောင်းလဲမှာ မဟုတ်ဘူး လီယန် ကိစ္စက အဲဒီလောက် မဆိုးရွားဘူး ငါက အသက်စွန့် တိုက်ခိုက်မှာပဲ ရှိတာ သေကြောင်းကြံတာ မဟုတ်ဘူး တကယ်လို့ ဒီတခေါက် ငါ သေသွားခဲ့ရင် ငါ့ကံတရားပဲပေါ့ ဒါပေမယ့် ငါ အသက်ရှင်ခဲ့ရင် တစ္ဆေစွမ်းအားကို ထိန်းချုပ်တဲ့ နေရာမှာ ငါ ပိုပြီး တိုးတက်လာနိုင်တယ်"

"ကြီးထွားဖို့အတွက် ဖိအားနဲ့ ပွတ်တိုက်မှုတွေ လိုအပ်တယ် တစ္ဆေတွေနဲ့ အကြိမ်ကြိမ် မတိုက်ခိုက်ခဲ့ရင် ငါ ဒီအဆင့်ထိ ရောက်လာမှာ မဟုတ်ဘူး ငါသာ အလွယ်တကူ နောက်ဆုတ်ခဲ့ရင် တာချန်းမြို့မှာကတည်းက ငါ သေနေလောက်ပြီ အခုထိ အသက်ရှင်နေမှာ မဟုတ်ဘူး"

"ပြီးတော့ ဒီတခေါက် ငါ တစ်ယောက်တည်း မဟုတ်ဘူးလေ"

"ကဲ စကားပြောတာ ဒီလောက်ပဲ ထားလိုက်တော့ တစ္ဆေသင်္ဘော ကမ်းကပ်တဲ့ သတင်းက အချိန်မရွေး ရောက်လာနိုင်တယ် ငါ ပြင်ဆင်စရာ ရှိတာ ပြင်ဆင်ရမယ် ထုန်ချန် သွားကြစို့"

ထုန်ချန် ခေါင်းညိတ်လိုက်သည်။

"ငါ တာဟိုင်မြို့ကို မလာခင်ကတည်းက အရာအားလုံး ပြင်ဆင်ပြီးသားပါ"

"ကောင်းပြီ"

ယန်ကျန့် စကားဆက်မပြောတော့ဘဲ တစ္ဆေနယ်မြေကို ဖွင့်လိုက်သည်။

မကြာမီ နှစ်ယောက်စလုံး ဂိုဒေါင်ထဲမှ ပျောက်ကွယ်သွားပြီး တာဟိုင်မြို့၏ အခြားနေရာတစ်ခုတွင် ပြန်လည်ပေါ်လာခဲ့သည်။

ဒီနေရာက အနည်းငယ် ထူးခြားနေသည်။ ကမ္ဘာလောကကြီး တစ်ခုလုံးက မမှန်ကန်သလို ခံစားရသော်လည်း မည်သည့်နေရာက မတူညီသနည်း ဆိုသည်ကို ပြောမပြတတ်ပေ။

"ဒါက တစ္ဆေပန်းချီကား ကမ္ဘာပဲ"

ယန်ကျန့် ပြောကြားလိုက်သည်။

ထုန်ချန်က မေးမြန်းလိုက်သည်။

"ဒီတခေါက် တစ္ဆေသင်္ဘောကို တားဆီးတဲ့အထဲမှာ ဟယ်ယွဲ့လျန် ပါသေးလား"

"သူက သဘာဝလွန် အရာတွေ မပျံ့နှံ့အောင် တားဆီးပေးရုံပဲ တိုက်ရိုက် ဝင်မတိုက်ဘူး တကယ် တိုက်ခိုက်မှာက ငါတို့ပဲ ရှိတယ်"

ပြောပြီးသည်နှင့် ယန်ကျန့်က သူ့ကို တချက် ကြည့်လိုက်သည်။

ထုန်ချန် မျက်လုံးများ လှုပ်ရှားသွားပြီး အံ့သြသွားခဲ့သည်။

ဒီတခေါက် လှုပ်ရှားမှုတွင် လူနည်းမည် ဆိုသည်ကို သိသော်လည်း နှစ်ယောက်တည်း ဖြစ်နေမည်ဟု မထင်ထားခဲ့မိပေ။

"ဘာလဲ လူနည်းလို့ တစ္ဆေသင်္ဘောကို မတားနိုင်ဘူး ထင်နေတာလား"

ယန်ကျန့် မေးလိုက်သည်။

"မင်း ဒီလို ဆုံးဖြတ်တာ အကြောင်းရင်း ရှိမှာပါ အလကားသက်သက် အသေခံရုံပဲ ဆိုရင် မင်း လုပ်မှာ မဟုတ်ဘူး"

ထုန်ချန် ပြောလိုက်သည်။

ယန်ကျန့် ပြောကြားလိုက်သည်။

"ဒီတခေါက် မင်း အသက်ရှင်ကျန်ရစ်ပါစေလို့ မျှော်လင့်ပါတယ် ငါ သိတဲ့ တစ္ဆေဆရာတွေ သေကုန်ကြပြီ မင်းက လက်ကျန် အနည်းစုထဲက တစ်ယောက်ပဲ"

"မင်းရော"

ရုတ်တရက် ကြည်လင်ပြတ်သားသော အသံတစ်သံ ထွက်ပေါ်လာပြီး အနီရောင် မင်္ဂလာဝတ်စုံ ဝတ်ဆင်ထားကာ ခေါင်းကို ပုဝါအနီ အုပ်ထားသော အမျိုးသမီးတစ်ဦး ရုတ်တရက် ပေါ်လာခဲ့သည်။

သူမ ပေါ်လာခြင်းမှာ တိတ်တဆိတ်ပင် ဖြစ်သည်။ မူလကတည်းက ထိုနေရာတွင် ရှိနေသကဲ့သို့ပင် ဖြစ်သည်။

"တချို့ကိစ္စတွေက ငါပဲ လုပ်လို့ရတာလေ သေမလား ရှင်မလား ဆိုတာ ငါ မတွေးထားဘူး"

ယန်ကျန့် တည်ငြိမ်စွာ ပြောဆိုလိုက်သည်။

ဟယ်ယွဲ့လျန် ပြောလိုက်သည်။

"တကယ်တော့ မင်း ဒီကိစ္စကို ဂရုမစိုက်ဘဲ နေလည်း ရပါတယ် မင်းရဲ့ စွမ်းရည်နဲ့ဆိုရင် ကောင်းကောင်း အသက်ရှင်နိုင်ပါလိမ့်မယ် ဘယ်သူမှလည်း မင်းကို ဘာမှ မလုပ်ရဲဘူး ပြီးတော့ ငါ မင်းဘက်က ရပ်တည်ပေးမှာ"

လက်ရှိ ဌာနချုပ်မှ ခေါင်းဆောင်များ၏ အင်အားမှာ နည်းပါးနေပြီ ဖြစ်သည်။ သူမသာ ယန်ကျန့်ဘက်က ရပ်တည်ပေးလျှင် ယန်ကျန့် ဘာလုပ်လုပ် မှန်ကန်နေမည်သာ။ မည်သူမျှ ဝေဖန်ရဲမည် မဟုတ်ပေ။

တာဟိုင်မြို့ကို စွန့်ပစ်ပြီး တစ္ဆေသင်္ဘော ကမ်းကပ်ခြင်းကို လွှတ်ထားလိုက်လျှင်တောင် ဌာနချုပ် ဒုတိယဝန်ကြီး ချောင်ယန်ဟွာက ယန်ကျန့်ကို အပြစ်ပြောရဲမည် မဟုတ်ပေ။

"တစ္ဆေနိုးထလာရင် ဘယ်သူမှ မလွတ်နိုင်ဘူး"

ယန်ကျန့် မျက်နှာထား တင်းမာစွာ ပြောလိုက်သည်။

"ဒီကိစ္စကို တစ္ဆေက တမင်တကာ တွန်းအားပေးနေတာလို့ ငါ ထင်တယ် ဒီနေ့ ရှောင်လွှဲလိုက်ရုံနဲ့ ပြီးသွားမှာ မဟုတ်ဘူး အစီအစဉ်ကို စောစောက မင်း ကြားပြီးပြီပဲ နောက်ပိုင်း လှုပ်ရှားမှုတွေမှာ မင်း လုပ်သင့်တာကိုပဲ လုပ်ပါ ဒီအချိန်မှာ ဘာပြဿနာမှ မဖြစ်ပါစေနဲ့ မင်းရဲ့ စွမ်းရည်က ထူးခြားတယ် ဘုရင်အဖွဲ့အစည်းနဲ့ တိုက်တုန်းကလည်း မင်း အများကြီး ကူညီပေးခဲ့တယ် အဲဒါကြောင့် မင်းကို ထိခိုက်မှာ မလိုလားဘူး"

"ကောင်းပြီ ငါ မင်းစကား နားထောင်ပါ့မယ်"

ဟယ်ယွဲ့လျန်၏ အသံက ခေါင်းဆောင်းအောက်မှ ထွက်ပေါ်လာခဲ့သည်။

ဟယ်ယွဲ့လျန်က ဉာဏ်ကောင်းသော အမျိုးသမီး ဖြစ်သည်။ ယန်ကျန့်၏ ဆိုလိုရင်းကို နားလည်သလို သူမ၏ ရပ်တည်ချက်ကိုလည်း ပြသလိုက်ခြင်း ဖြစ်သည်။

ယန်ကျန့် အသက်ရှင်နေသရွေ့ သူ့အမိန့်ကို နာခံမည်။ ယန်ကျန့် သေဆုံးသွားလျှင်မူ မည်သူ့အမိန့်ကိုမှ နာခံတော့မည် မဟုတ်ပေ။

ဒီတိုက်ပွဲ ပြီးဆုံးသွားသောအခါ ဌာနချုပ်၏ အားနည်းချက်ကို ဟယ်ယွဲ့လျန် မြင်လိုက်ရပြီ ဖြစ်သည်။ ထို့အပြင် ကိုယ့်စွမ်းရည်ကိုလည်း ကိုယ် သိရှိနေပြီ ဖြစ်သည်။ ခေါင်းဆောင် အများအပြား သေဆုံးသွားသော အခြေအနေတွင် ယန်ကျန့်မှလွဲ၍ မည်သူမျှ သူမကို ထိန်းချုပ်နိုင်မည် မဟုတ်ပေ။

စောစောက ဂိုဒေါင်ထဲတွင် လီယန်လည်း ဒီအချက်ကို မြင်တွေ့၍ ယန်ကျန့် ရှိနေသရွေ့ ဌာနချုပ် ပျက်စီးသွားလျှင်တောင် ပြန်ဆောက်လို့ ရသည်ဟု ပြောခဲ့ခြင်း ဖြစ်သည်။

အဘယ်ကြောင့်ဆိုသော် ယန်ကျန့် တစ်ယောက်တည်းကသာ ဒီထိပ်တန်း တစ္ဆေဆရာများကို ထိန်းချုပ်နိုင်ပြီး တစ်စုတစ်ဝေးတည်း အမိန့်နာခံအောင် လုပ်ဆောင်နိုင်သောကြောင့် ဖြစ်သည်။

ယန်ကျန့်မှလွဲ၍ ပြည်တွင်း တစ္ဆေဆရာလောကတွင် ဒုတိယလူ ရှာဖွေတွေ့ရှိနိုင်တော့မည် မဟုတ်ပေ။

"အမိန့်နာခံမယ်လို့ ရွေးချယ်လိုက်မှတော့ အခု ငါနဲ့ လိုက်ခဲ့"

ယန်ကျန့်သည် အချိန်ဆွဲနေမည့်သူ မဟုတ်ပေ။

လူစုစည်းပြီးသည်နှင့် ချက်ချင်း လှုပ်ရှားလိုက်ပါတော့သည်။