ကြယ်ရောင်နှင့် ဆန်းကြယ်သော စွမ်းအား (၂)
Vol. 4 Ch. 32
လမင်းဖြူမြို့တော်၊၊
ငွေမြို့တော်နှင့် နီးစပ်သော နေရာတွင် လူဦးရေ တစ်သန်းခန့်ရှိသည့် တခြားသော မြို့အချို့ ရှိကြသော်လည်း ကီလိုမီတာ ၁၅၀ အကွာတွင်မူ လမင်းဖြူမြို့တော်ဟု ခေါ်သည့် မြို့ကြီးတစ်မြို့ ရှိလေသည်၊၊
ထိုမြို့မှာ သူတို့ ပြည်နယ်၏ မြို့တော်ဖြစ်သဖြင့် အထူးအဆင့်အတန်း ရှိသည်၊၊ သူတို့ ပြည်နယ်၏ အမည်မှာလည်း ‘ငွေလမင်း’ ပြည်နယ်ဟု အမည်တွင်ပြီး ၎င်းမှာ ငွေမြို့တော်နှင့် လမင်းဖြူမြို့တော်တို့၏ အမည်များကို ပေါင်းစပ်ထားခြင်း ဖြစ်သည်၊၊ ငွေမြို့တော်၏ အမည်ကိုပင် ရှေ့က ထားထားသေးသည်၊၊
သို့သော် ၎င်းမှာ လွန်ခဲ့သော နှစ်ပေါင်းများစွာက အခြေအနေ ဖြစ်သည်၊၊ အချိန်ကြာလာသည်နှင့်အမျှ ငွေမြို့တော်မှာ ပထဝီဝင်အနေအထားအရ အရေးမပါတော့ဘဲ လူဦးရေများလည်း အစုလိုက်အပြုံလိုက် ပြောင်းရွှေ့သွားခဲ့ကြသည်၊၊ ယနေ့ခေတ်တွင်မူ ငွေမြို့တော်မှာ ငွေလမင်းပြည်နယ်ရှိ မြို့ပေါင်း ၃၂ မြို့အနက် သာမန်မြို့တစ်မြို့သာ ဖြစ်တော့သည်၊၊
ပြည်နယ်အမည်ကို ‘ငွေလမင်း’ မှ ‘လမင်းတောက်ပ’ ပြည်နယ်ဟု ပြောင်းရန် အရာရှိများအကြား ဆွေးနွေးနေကြသည်ဟုလည်း သတင်းများ ထွက်နေသည်၊၊ အဘယ်ကြောင့်ဆိုသော် ယခုအခါ ပြည်နယ်အတွင်း ဒုတိယအကြီးဆုံးမြို့မှာ ‘တောက်ပမြို့တော်’ ဖြစ်နေပြီး ငွေမြို့တော်ထက် အဆပေါင်းများစွာ ပိုမို စည်ကားဝပြောသောကြောင့် ဖြစ်သည်၊၊
ငွေမြို့တော်ဘက်က ထိုအဆိုပြုချက်ကို အကြိမ်ကြိမ် ငြင်းဆန်နေသဖြင့် ယခုတိုင် ဆုံးဖြတ်ချက် မချနိုင်သေးပေ၊၊ ဘာပဲဖြစ်ဖြစ် ငွေမြို့တော်သည်လည်း တစ်ချိန်က အလွန် ထွန်းပြောင်ခဲ့ဖူးသည် မဟုတ်ပါလား၊၊
ထိုအတွေးများက လီဟောင်၏ ခေါင်းထဲတွင် လျှပ်ခနဲ ဖြတ်ပြေးသွား၏၊၊ မြို့တော်၏ စုံစမ်းစစ်ဆေးရေး အကယ်ဒမီက ကျောင်းဆင်းတစ်ယောက်က ဘာကြောင့် ဒီလိုနေရာမျိုးကို ရောက်လာရသနည်း၊၊ ထိုသူ၏ အမှတ်အသားက အစစ်အမှန်လော၊ အတုလော ဆိုသည်မှာလည်း စဉ်းစားစရာပင်၊၊ သူက ဝေးလံတဲ့ နေရာက လာတာဆိုရင် ငါ စုံစမ်းလို့ မရဘူးလို့ သူတို့ ထင်နေတာလား၊၊
ထိုစဉ်မှာပင် ချန်နာက အံ့အားသင့်စွာဖြင့် မေးလိုက်၏၊၊
“ဝမ်မင်... မင်း ဘာလို့ ဒီကို ရောက်လာတာလဲ”
လူငယ်လေးက တောက်ပစွာ ပြုံးလိုက်ပြီးနောက် -
“ငွေမြို့တော်က နေလို့ကောင်းလို့ပါဗျာ... တကယ်တော့ လမင်းဖြူမှာက ပြိုင်ဆိုင်မှုတွေ အရမ်းများလွန်းတယ်လေ... ရာထူးတက်ဖို့ကလည်း ခက်ခဲတယ်၊ အဲဒါကြောင့် ကျွန်တော့် မိသားစုက ဒီမှာလာလုပ်ဖို့ အကြံပေးလိုက်တာ... ငွေမြို့တော်မှာက ပြိုင်ဆိုင်မှု နည်းတယ်ဆိုတော့ ဒီမှာ ရာထူးတက်ပြီးမှ နေရပ်ကို ပြန်ပြောင်းဖို့ စဉ်းစားထားတာပါ”
နားလည်ပါပြီ၊၊
“ဒါက အကြံကောင်းပဲ”
ချန်နာက ခေါင်းညိတ်လက်ခံလိုက်၏၊၊
“ငွေမြို့တော်က သေးတယ်ဆိုပေမဲ့ ဝန်ထမ်းနည်းတော့ ငါတို့အတွက် အခွင့်အရေးတွေ ပိုများတာပေါ့... မြို့ကြီးတွေမှာက ပြိုင်ဆိုင်ရတာ အရမ်း ဖိအားများတယ်လေ... မင်း ရွေးချယ်မှု မှန်ပါတယ်”
“ကျွန်တော်လည်း အဲဒီလိုပဲ ထင်ပါတယ်”
ဝမ်မင်၏ အပြုံးက ပို၍ တောက်ပလာရာ ချန်နာပင်လျှင် သူ၏ ဆွဲဆောင်မှုအောက်တွင် ခေတ္တမျှ မိန်းမောသွားရသည်၊၊ သူမက အမြန်ပင် မျက်နှာလွှဲလိုက်ပြီး လီဟောင်ကို ပြန်ကြည့်လိုက်၏၊၊
လီဟောင်ကမူ စိတ်ပျက်လက်ပျက် ဖြစ်သွားရလေသည်၊၊ ဒါက ဘာသဘောလဲ၊၊ မင်းပဲ ငါ့ကို အမြဲတမ်း ချောတယ်လို့ ပြောခဲ့တာ မဟုတ်လား... မိန်းမတွေ... ဟင်း၊၊
လီဟောင်သည် စိတ်ကို ပြန်လည် ထိန်းချုပ်လိုက်သည်၊၊ ဒါတွေကို ငြင်းခုံနေရမယ့် အချိန် မဟုတ်ပေ၊၊ သူ ဘာကို ကြောက်နေရမှာလဲ၊၊ အခက်အခဲမှန်သမျှကို သူ ရင်ဆိုင်သွားမည်သာ ဖြစ်သည်၊၊ သူ့မှာ တခြားသူတွေထက် သာလွန်တဲ့ အချက်တစ်ခု ရှိသည်၊၊ ၎င်းမှာ လူတွေကို ချက်ချင်း ခွဲခြားနိုင်စွမ်း ရှိခြင်းပင်၊၊ ဘယ်သူပဲ ဖြစ်ဖြစ် ရောက်လာပြီဆိုတော့လည်း ဂရုစိုက်မနေတော့ပေ၊၊
လီဟောင်သည် ဝမ်မင်နှင့် ခေတ္တမျှ စကားပြောပြီးနောက် သူ၏ တာဝန်များကို လွှဲပြောင်းပေးလိုက်၏၊၊
“ချန်နာ... ဝမ်မင်ကို ခဏလောက် ကြည့်ပေးထားပါဦး... ငါ အပြင် ခဏ သွားစရာ ရှိလို့”
“ဘယ်သွားမလို့လဲ”
“ဥပဒေစိုးမိုးရေးဌာနကိုလေ”
“နောက်တစ်ခါလား”
“ငါက စာသင်ဝိုင်းကို လိုက်ပို့ရမယ့် တာဝန် ယူထားရတာလေ၊ မေ့သွားပြီလား”
လီဟောင်က ရယ်မောလျက် ဆိုလိုက်၏၊၊
“အမှားအယွင်း မရှိအောင် အလုပ်တွေ လွှဲခဲ့ရမယ်၊ ပြီးတော့ သင်တန်းလည်း တက်ရဦးမယ်လေ”
“ငါ ခိုင်းတုန်းကတော့ မသွားဘူး၊ အခုကျတော့မှ သွားနေတယ်”
ချန်နာက မျက်စောင်းတစ်ချက် ထိုးလိုက်ပြီးနောက် -
“အေးပါ... သွားလေ... ငါ ဝမ်မင်ကို လိုက်ပြထားလိုက်မယ်”
“မင်းဆီမှာ ဒီလောက်ချောတဲ့ လူသစ်လေး ထားခဲ့တာကို မင်းက ပျော်ရသင့်တာ မဟုတ်လား”
လီဟောင်က နောက်ပြောင်လိုက်ပြီးနောက် -
“ဝမ်မင်... ချန်နာ့ဆီကနေ သေသေချာချာ သင်ယူလိုက်ဦးနော်... အလုပ်တွေက ရိုးရှင်းပါတယ်၊ မင်းက ပညာတတ်ဆိုတော့ အမြန် တတ်မှာပါ”
ဝမ်မင်က ညင်သာစွာ ပြုံးလျက် ခေါင်းညိတ်ပြ၏၊၊
“အစ်ကိုဟောင်... ဒီနေ့ညကျရင် ကျွန်တော် ထမင်းကျွေးပါရစေ... ကျွန်တော်က အသစ်လည်း ဖြစ်၊ အစ်ကိုတို့ရဲ့ တပည့်လည်း ဖြစ်တယ်ဆိုတော့ ဂါရဝပြုချင်လို့ပါ”
“အေး... ရတာပေါ့”
ချန်နာက ချက်ချင်းပင် ခေါင်းညိတ် သဘောတူလိုက်လေသည်၊၊
လီဟောင်က ပထမတော့ ငြင်းချင်သော်လည်း တစ်စုံတစ်ခုကို တွေးမိသွားပြီးနောက် ခေါင်းညိတ်ပြလိုက်၏၊၊
“ရပါတယ်... ဒါဆိုရင် ကျေးဇူးတင်ပါတယ်ဗျာ”
ထို့နောက် သူသည် ဘာမှထပ်မပြောဘဲ ထွက်လာခဲ့လေသည်၊၊
မင်းက ကျွေးမယ် ဟုတ်လား၊၊
ကျွေးလိုက်စမ်းပါ၊၊
ဒီကောင်က ငါ့ဆီကို တမင် လာတာပဲ ဖြစ်ရမယ်၊၊ သူက အနီရောင်အရိပ်ဘက်က ဒါမှမဟုတ် ‘ညစောင့်တပ်ဖွဲ့’ က ဖြစ်ရမယ်၊၊ အကယ်၍ သူက ‘ညစောင့်တပ်ဖွဲ့’ ကဆိုရင် သူက ဘာလို့ ဒီလောက်အထိ လျှို့ဝှက်နေတာလဲ... ဪ... သူတို့က အနီရောင်အရိပ်အဖွဲ့ကို ထောင်ဖမ်းချင်နေတာကိုး၊၊ ဒီလူတွေက ငွေမြို့တော်ရဲ့ အခြေအနေကို သိနေပေမဲ့ အချိန်စောင့်နေကြတာပဲ၊၊
‘ညစောင့်တပ်ဖွဲ့’ က လီဟောင်သည် နောက်ထပ် ပစ်မှတ်ဖြစ်ကြောင်း သိထားသဖြင့် စောင့်ကြည့်သူတစ်ယောက် စေလွှတ်လိုက်ခြင်းလည်း ဖြစ်နိုင်သည်၊၊ သူတို့က မြို့တော်ကောင်စီကိုတောင် အသိမပေးဘဲ အခြေအနေကို လာကြည့်နေခြင်း ဖြစ်နိုင်ပေသည်၊၊
“စုံစမ်းစစ်ဆေးရေးဌာနထဲကို ဒီလောက် ရဲရဲတင်းတင်း ဝင်လာရဲတယ်ဆိုတော့... အနီရောင်အရိပ်ဘက်က စွမ်းအားရှင်ဆိုရင် ဒီလောက်အထိ သတ္တိရှိပါ့မလား... ဘာပဲဖြစ်ဖြစ် ဒါက ငွေမြို့တော်ရဲ့ အမြင့်ဆုံး ဥပဒေစိုးမိုးရေး အဖွဲ့အစည်းပဲလေ... ဒါကြောင့် သူက ‘ညစောင့်တပ်ဖွဲ့’ က ဖြစ်ဖို့ များတယ်”
လီဟောင်သည် သူ၏ ကောက်ချက်ကို ရာနှုန်းပြည့် မသေချာသော်လည်း ဝမ်မင်မှာ ‘ညစောင့်တပ်ဖွဲ့’ က ဖြစ်နိုင်ခြေ ၈၀ ရာနှုန်းခန့် ရှိသည်ဟု တွေးလိုက်မိသည်၊၊
ကြယ်ရောင်အဆင့် စွမ်းအားရှင် တစ်ယောက်၊ အဲဒါတောင် ဒီလောက် ငယ်သေးတယ်၊၊ ဟုတ်ပါတယ်၊ သူ့အသက်ကလည်း ဟန်ပြဖြစ်နိုင်တာပဲ၊၊
လီဟောင်၏ ဦးနှောက်ထဲတွင် အတွေးများစွာ လည်ပတ်နေ၏၊၊ ဒါက ကောင်းတဲ့ လက္ခဏာလား၊ ဆိုးတဲ့ လက္ခဏာလား၊၊ အကယ်၍ ထိုသူက ‘ညစောင့်တပ်ဖွဲ့’ ကသာ အမှန်ဆိုလျှင်... ဒါက ကောင်းတဲ့ အချက်ပင်၊၊
“အဖွဲ့မှူး လျူလုံတစ်ယောက်တည်း မနိုင်မှာကို စိုးရိမ်နေတာ... အခု ‘ညစောင့်တပ်ဖွဲ့’ ပါ ပါလာပြီဆိုတော့ အောင်မြင်ဖို့ အခွင့်အလမ်း ပိုများသွားပြီ”
ထိုသို့ တွေးတောရင်း လီဟောင်သည် ဥပဒေစိုးမိုးရေးအဖွဲ့၏ မြေအောက်ခန်းထဲသို့ ဝင်ရောက်လာခဲ့လေသည်၊၊
……
“ကျွန်တော် နည်းနည်း နောက်ကျသွားတယ်”
လီဟောင်သည် သူ့ကို စောင့်နေသော လျူလုံကို မြင်သော်လည်း မတုန်မလှုပ်ဘဲ ပြောလိုက်၏၊၊
“ဒီနေ့ ဌာနကို လူသစ်အချို့ ရောက်လာတယ်လေ... တစ်ယောက်က ကျွန်တော့်ဆီမှာ အလုပ်သင်ဖို့ ရောက်လာတာ၊ ကျွန်တော့်နေရာကို အစားဝင်မယ့်သူ ဖြစ်မှာပါ... သူက လမင်းဖြူမြို့တော်က လာတာဆိုတော့ အတော်လေး ပညာသားပါပါတယ်... အလုပ်တွေကို အမြန်ပဲ သင်ယူနိုင်တယ်”
လျူလုံက ထိုရှင်းပြချက်ကို သိပ်ပြီး ဂရုမစိုက်ဟန်ဖြင့် ခေါင်းညိတ်ပြလေသည်၊၊ လျူလုံက တကယ်ပဲ မသိတာလား၊ ဒါမှမဟုတ် သိလျက်နဲ့ ဖုံးကွယ်ထားတာလား ဆိုသည်ကို လီဟောင်က ခန့်မှန်း၍ မရနိုင်ပေ၊၊
“မနေ့ညက တစ်ခုခု ထူးခြားတာ ရှိလား အဖွဲ့မှူး... တစ်ယောက်ယောက် ကျွန်တော့်နောက် လိုက်နေတာမျိုးရော တွေ့လား”
“ပြောဖို့ ခက်တယ်... ရှိတော့ ရှိနိုင်တယ်၊ ဒါပေမဲ့ ငါ သွားတဲ့အချိန်မှာတော့ ဘာမှ မတွေ့ခဲ့ဘူး”
လီဟောင်သည် ဤကိစ္စကို အနီရောင်အရိပ်ကြောင့်သာမက အခြားသော အကြောင်းပြချက်ကြောင့်လည်း အလွန် စိတ်ဝင်စားနေမိသည်၊၊
“အဖွဲ့မှူး... ကျွန်တော်တို့လို သာမန်လူတွေက ‘ကြယ်ရောင်အဆင့်’ စွမ်းအားရှင်တွေကို ခွဲခြားနိုင်လားဟင်... သူတို့က ကျွန်တော်တို့နဲ့ ဘာများ ကွာခြားလို့လဲ”
“လျူယန်က မင်းကို မပြောပြဘူးလား”
လျူလုံက မျက်တောင်ခတ်ရင်း မေးလိုက်၏၊၊
“မပြောပြပါဘူး”
လျူလုံက ခေါင်းခါလိုက်သည်၊၊ ထိုအမျိုးသမီးက တကယ်ပဲ အားကိုးမရသူ ဖြစ်သည်ဟု သူ တွေးလိုက်မိ၏၊၊
“သာမန်အချိန်မှာတော့ ဘာမှ မကွာခြားပါဘူး... သူတို့လည်း လူ၊ ငါတို့လည်း လူပဲလေ... အဓိက ကွာခြားချက်ကတော့ သူတို့ရဲ့ စွမ်းရည်တွေကို သုံးလိုက်တဲ့ အချိန်မှာပဲ... သူတို့ စွမ်းအားကို သုံးလိုက်ရင် စွမ်းအင်လှိုင်းတွေ ထွက်လာတယ်... အဲဒါကို သာမန်လူတွေ မသိနိုင်ပေမဲ့ ငါတို့လို သိုင်းပညာရှင်တွေကတော့ ခံစားမိနိုင်တယ်... သိုင်းပညာရှင် မဟုတ်တဲ့သူတွေ ဆိုရင်တော့...”
အဖွဲ့မှူးက လီဟောင်ကို တစ်ချက်ကြည့်လိုက်ရင်း တစ်စုံတစ်ခုကို သတိရသွားပုံရသည်၊၊
“ငါတို့ဆီမှာ စွမ်းအင်လှိုင်းတွေကို ထောက်လှမ်းနိုင်တဲ့ ‘ဆန်းကြယ်စက်’ တစ်ခု ရှိတယ်... အဲဒါက သာမန်လူတွေ သုံးဖို့အတွက် ထုတ်ထားတာပဲ”
“ဆန်းကြယ်စက် ဟုတ်လား”
“ဟုတ်တယ်”
လျူလုံက ခေါင်းညိတ်ပြ၏၊၊
“အဲဒါက မင်းရဲ့ ပတ်ဝန်းကျင် မီတာ တစ်ရာအတွင်းမှာ တစ်ယောက်ယောက်က ဆန်းကြယ်တဲ့ စွမ်းအားတွေကို သုံးလိုက်ရင် ဖမ်းယူနိုင်တယ်”
မီတာ တစ်ရာပဲလား၊၊ ဒါဆိုရင် ဘာမှ အသုံးမဝင်ဘူးပဲ၊၊
လီဟောင်က မျက်မှောင်ကြုတ်လိုက်မိသည်၊၊
“အကွာအဝေးက အရမ်း နည်းလွန်းတယ်... စွမ်းအားရှင်တစ်ယောက်က ကျွန်တော့်ရဲ့ မီတာ တစ်ရာအတွင်းမှာ စွမ်းအား သုံးလိုက်ပြီဆိုရင် ကျွန်တော်က သေလူ ဖြစ်နေလောက်ပြီ မဟုတ်လား”
“ဒါကတော့ မတတ်နိုင်ဘူးလေ”
လျူလုံက ခေါင်းခါလိုက်၏၊၊
“ဆန်းကြယ်တဲ့ လောကကြီး ပေါ်လာတာ မကြာသေးဘူးလေ... ဒါကတောင် တော်တော်လေး တိုးတက်နေပြီလို့ ပြောရမယ်... ပြီးတော့ စွမ်းအားရှင်တွေကို ရင်ဆိုင်မယ့်သူတွေက သိုင်းပညာရှင်တွေ ဒါမှမဟုတ် စွမ်းအားရှင် အချင်းချင်းပဲ ဖြစ်မှာလေ... ထောက်လှမ်းစက်က သိပ်မလိုပါဘူး... ဒီလိုပစ္စည်းမျိုးကိုတော့ စွမ်းအားရှင်တွေ ခိုးဝင်မလာနိုင်အောင် တစ်နေရာရာမှာ တပ်ဆင်ထားဖို့ပဲ သုံးတာများတယ်”
“ဪ”
လီဟောင်၏ ခေါင်းထဲသို့ အတွေးသစ်တစ်ခု ဝင်လာ၏၊၊
“ဒါဆိုရင် စွမ်းအားရှင်တွေက သူတို့ရဲ့ စွမ်းအားကို မသုံးသရွေ့တော့ သူတို့က စွမ်းအားရှင်မှန်း ကျွန်တော်တို့ မသိနိုင်ဘူးပေါ့”
“အဲဒီလိုလည်း မဟုတ်ပါဘူး... အဆင့်မြင့် စွမ်းအားရှင်တွေ ဒါမှမဟုတ် သက်ဆိုင်ရာ စွမ်းရည် ရှိတဲ့သူတွေကတော့ တခြားသူတွေရဲ့ ခန္ဓာကိုယ်ထဲမှာ ရှိနေတဲ့ ကြယ်တာရာစွမ်းအားတွေကို ခံစားမိနိုင်ကြတယ်... ငါတို့ကတော့ အဲဒီအဆင့်ထိ ရောက်ဖို့ အများကြီး လိုသေးတာပေါ့”
“နားလည်ပါပြီ”
လီဟောင်က နှမြောတသဟန်ဖြင့် သက်ပြင်းချလိုက်၏၊၊
“ကျွန်တော်ကတော့ စွမ်းအားရှင်တွေဆိုရင် ကိုယ်ပေါ်မှာ အလင်းရောင်တွေဘာတွေ ထွက်နေပြီး တစ်ချက်ကြည့်လိုက်တာနဲ့ သိနိုင်မယ် ထင်နေတာ”
“မင်းကတော့ စိတ်ကူးယဉ်လွန်းနေပြီ”
လျူလုံက ရယ်မောလိုက်သည်၊၊
“ဒါက ဘယ်လိုလုပ် ဖြစ်နိုင်မှာလဲ... ဒါပေမဲ့ စွမ်းအားရှင်က အရမ်းအားနည်းနေတာမျိုး ဒါမှမဟုတ် လူသစ်ဖြစ်နေပြီး ကိုယ်ထဲမှာ စွမ်းအင်တွေ အများကြီး ရှိနေမယ်ဆိုရင်တော့... သူနဲ့ နီးနီးကပ်ကပ် ရှိနေတဲ့ သာမန်လူတွေတောင် တစ်ခုခု ထူးခြားနေတယ်ဆိုတာကို ခံစားမိနိုင်တယ်”
“သိပါပြီ”
လီဟောင်က ခေါင်းညိတ်ပြလိုက်၏၊၊
သိပြီ၊ မင်းတို့တွေက ကြယ်တာရာစွမ်းအားရဲ့ အလင်းရောင်ကို မမြင်နိုင်ကြဘူးပဲ၊၊ မင်းတို့က အားနည်းလွန်းလို့လား၊ ဒါမှမဟုတ် စွမ်းအားရှင် မဖြစ်သေးလို့လားတော့ ငါ မသိဘူး... ဒါပေမဲ့ တခြား စွမ်းအားရှင်တွေကရော မြင်နိုင်ပါ့မလား၊၊
ငါကတော့ နည်းနည်း... ထူးခြားနေပုံရတယ်၊၊
အနီရောင်အရိပ်ကို မြင်နိုင်တဲ့သူတွေ ဘာကြောင့် ပျောက်ကွယ်သွားရသလဲဆိုတာ မဆန်းတော့ပေ၊၊ အဲဒီ စွမ်းရည်နောက်မှာ တခြားသော အဓိပ္ပာယ်တွေ ရှိနေနိုင်သည်၊၊
“အဖွဲ့မှူး... ကျွန်တော့်ကို အဲဒီ ထောက်လှမ်းစက်လေး ပေးလို့ ရမလား”
“မင်းအတွက် ငါတို့ ပြင်ထားပြီးသားပါ”
လျူလုံက ခေါင်းညိတ်ပြ၏၊၊
“ဒါက ကာကွယ်ရေးအတွက် ဖြစ်ပေမဲ့ သိပ်တော့ အသုံးမဝင်လှဘူး”
လီဟောင်ကတော့ အသုံးဝင်သည်၊ မဝင်သည်ကို ဂရုမစိုက်ပေ၊၊ ထိုစက်ကို ရလျှင် သူက ဝမ်မင်ကို ထောင်ဖမ်းနိုင်မည် ဖြစ်သည်၊၊ အဖွဲ့မှူးကို အခုချက်ချင်း သွားပြောလျှင် သံသယ ဖြစ်စရာ ရှိသော်လည်း ထိုစက်ကို ရပြီးပါက ဝမ်မင်သည် စွမ်းအားသုံးသည်ဖြစ်စေ၊ မသုံးသည်ဖြစ်စေ သူက စွမ်းအားရှင် ဖြစ်ကြောင်း ဖော်ထုတ်ရန် နည်းလမ်း ရှာနိုင်ပေသည်၊၊
အနည်းဆုံးတော့ လျူလုံ၏ ရည်ရွယ်ချက်က သူ့ကို ကာကွယ်ပေးဖို့ ဖြစ်သည်၊၊ ‘ညစောင့်တပ်ဖွဲ့’ ကတော့ ဘယ်လိုလဲ မသိနိုင်ပေ၊၊ ဒါကြောင့် လျူလုံကို အခြေအနေတွေ သိအောင် လုပ်ပေးပြီး ကြိုတင်ပြင်ဆင်ထားခိုင်းရန် လိုအပ်သည်၊၊
ဒါတွေ အားလုံးကို သဘာဝကျကျ ဖြစ်အောင် လုပ်ရမည်၊၊
လီဟောင်က အစီအစဉ်များ ဆွဲနေစဉ်မှာပင် လျူလုံက ဘာမှထပ်မပြောတော့ဘဲ သူ့ကို မြေအောက်ခန်း၏ ပိုမိုနက်ရှိုင်းသော အပိုင်းသို့ ခေါ်ဆောင်သွားလေသည်၊၊ မြေအောက်ခန်းထဲတွင် မည်သူမျှ မရှိဘဲ အခန်းတစ်ခန်းထဲ၌ အလုပ်ရှုပ်နေသော ယွမ်ယောင်၏ ပုံရိပ်ကိုသာ မှိန်ဖျော့ဖျော့ မြင်ရလေသည်၊၊ လျူလုံသည် မြေအောက်ခန်း၏ အဆုံးရှိ သံတံခါးတစ်ခု ရှေ့သို့ ရောက်မှသာ ရပ်တန့်လိုက်၏၊၊
“ဒါက မိစ္ဆာအမဲလိုက်အဖွဲ့ရဲ့ ရတနာတိုက်ပဲ”
ထိုလူက အေးစက်စွာ ရှင်းပြလေသည်၊၊
“ဒီထဲမှာ ရှိသမျှ အရာအားလုံးက ငါတို့အဖွဲ့သားတွေ သွေး၊ ချွေး၊ မျက်ရည်တွေနဲ့ ရင်းပြီး ရလာတာတွေပဲ... မင်းက အသစ်ဖြစ်ပေမဲ့ မကြာခင်မှာ ငါးစာအဖြစ် လုပ်ပေးရတော့မှာဆိုတော့ ငါတို့က ခြွင်းချက်အနေနဲ့ ပေးမှာပါ... မင်းကို တခြားသူတွေ မရနိုင်တဲ့ အခွင့်အရေးတစ်ခု ပေးမယ်၊ အစစ်အမှန်ဖြစ်တဲ့ အဖိုးတန် ကြယ်တာရာစွမ်းအားဆိုတာ ဘယ်လိုမျိုးလဲဆိုတာ မင်း မြင်ရလိမ့်မယ်”
လျူလုံက အလေးအနက် ပြောဆိုနေခြင်း ဖြစ်သည်၊၊ ဤထဲရှိ ရတနာများမှာ အဖွဲ့သားများ အသက်နှင့်ရင်းပြီး ရရှိထားခြင်း ဖြစ်သောကြောင့်ပင်၊၊
လီဟောင်သည် ချက်ချင်းပင် စိတ်ဝင်စားသွားရ၏၊၊
ကြယ်တာရာစွမ်းအား၊၊
ဒါက ကျောက်ဓားလေးအပြင် သူ ပထမဆုံးအကြိမ် အစစ်အမှန် စွမ်းအားတွေနဲ့ ထိတွေ့ရမှာ ဖြစ်သည်၊၊ ကျောက်စိမ်းရုပ်လေးဆီက စွမ်းအားတွေနဲ့ တူမလား၊၊ ဆရာကြီးကတော့ ဆန်းကြယ်တဲ့ ပစ္စည်းတွေဆီက စွမ်းအားက အားနည်းတယ်လို့ ပြောဖူးသည်၊၊ အခုတော့ သူက အကန့်အသတ်မရှိတဲ့ စွမ်းအားတွေကို မြင်ရတော့မှာလား၊၊
လီဟောင်သည် ရင်ခုန်စိတ်လှုပ်ရှားစွာဖြင့် ရှေ့သို့ လှမ်းကြည့်လိုက်မိသည်၊၊ သူ၏ မျက်စိထဲတွင် ကြယ်ရောင်တွေ စီးဆင်းနေတဲ့ မြစ်ကြီးတစ်စင်းကို မြင်နေရသလိုပင်၊၊
ဒါက သူ၏ စိတ်ကူးယဉ်မှုဆိုတာ သိသော်လည်း သူက မထိန်းနိုင်ဘဲ ဖြစ်နေမိသည်၊၊
လျူလုံက လီဟောင်ကို ကြည့်ကာ မသိမသာ ပြုံးလိုက်၏၊၊ ဒါက သူ မျှော်လင့်ထားတဲ့ တုံ့ပြန်မှုမျိုးပင်၊၊
မင်း လီမိသားစုရဲ့ ဓားကနေ စွမ်းအားတွေကို သိခဲ့ရတယ်ဆိုရင်တောင်မှ အစစ်အမှန် ကြယ်တာရာစွမ်းအားနဲ့ ယှဉ်ရင်တော့ ဘာမှမဟုတ်ဘူးဆိုတာ မင်းကို သိစေချင်တယ်၊၊