ဝှက်ဖဲ အသစ်

အချိန်အတော်ကြာသည်အထိ ဘာလှုပ်ရှားမှုမျှ မရှိသော ထန်ထျန်းကို ကြည့်ပြီး တပည့်အချို့မှာ အနည်းငယ် စိုးရိမ်လာကြသည်။

"စီနီယာအစ်ကိုဟန်... အခြေအနေ ဘယ်လိုရှိလဲ"

"တော်လောက်ပြီ ထင်တယ်၊ ငါတို့က ထန်ထျန်းကို ပညာပေးရုံတင် လာတာလေ၊ သေတဲ့အထိတော့ မလုပ်ပါနဲ့ဟ။"

"ဟုတ်တယ်၊ အကယ်၍ ထန်ထျန်းသာ ဒီမှာ သေသွားရင် ဒီမှာရှိတဲ့သူ အားလုံး အပြစ်ပေးခံရမှာပဲ"

တစ်စုံတစ်ယောက်က အလောတကြီး ပြောလိုက်သည်။

ထျန်းဖူနန်းတော်၏ စည်းကမ်းမှာ အလွန်တင်းကျပ်လှသည်။

အထူးသဖြင့် တပည့်များ၏ အသက်အန္တရာယ်ကို အလွန်အလေးထားသည်။

အထက် အကြီးအကဲ များက တပည့်အချင်းချင်း စိန်ခေါ်မှုကို အားပေးသော်လည်း အသက်အန္တရာယ် မထိခိုက်စေရဟူသော အနိမ့်ဆုံး စည်းကမ်းတစ်ခု ရှိသည်။

အသက်မသေမချင်း မည်မျှပင် ပြင်းထန်သော ဒဏ်ရာဖြစ်ပါစေ နန်းတော်က ပြန်လည်ကုသပေးနိုင်သည်။

သို့သော် လူသတ်မှုမှာမူ ကြီးလေးသော ပြစ်မှုဖြစ်သည်။

အကယ်၍ ထန်ထျန်းသာ ဟန်ကျင်းနန်၏ လက်ချက်ဖြင့် သေဆုံးသွားခဲ့လျှင် ယနေ့ ချင်းရွှီခြံဝင်းသို့ လာသမျှ တပည့်အားလုံး တာဝန်မကင်းဘဲ အပြစ်ပေးခံရမည်မှာ သေချာသည်။

၎င်းမှာ တောင်ထိပ်တပည့်အဖြစ် အဆင့်တက်ခါစ သူတို့အတွက် မကောင်းသော အချက်ပင်။

သို့သော် အချို့သော အကြံသမားများကမူ မီးလောင်ရာလေပင့်နေကြဆဲ ဖြစ်သည်။

"ဘာဖြစ်လဲ အပြင်က လာတဲ့ တပည့်တစ်ယောက်ပဲလေ။"

"စီနီယာအစ်ကိုဟန်... စိတ်ကြိုက်သာ လုပ်စမ်းပါ ဘာဖြစ်ဖြစ် ငါတို့အားလုံး တူတူ တာဝန်ယူမယ်"

"မှန်တယ်၊ လူအုပ်ကြီးကို အပြစ်ပေးလို့ မရပါဘူး၊ အလွန်ဆုံးရှိရင် ကျင့်ကြံခြင်း အရင်းအမြစ် အနည်းငယ် အဖြတ်ခံရရုံပါပဲ၊ ဘာမှ အရေးမကြီးဘူး"

ထိုလူများမှာ ကမ္ဘာပျက်လျှင် ဝမ်းသာမည့်သူများ ဖြစ်ကြပြီး ထန်ထျန်းကို သေတွင်းသို့ တွန်းပို့ချင်နေကြသည်မှာ သိသာလှသည်။

ထိုလူများ၏ အော်ဟစ်သံကို ကြားရသောအခါ စိတ်လှုပ်ရှားနေသော ဟန်ကျင်းနန်မှာ သက်ပြင်းတစ်ချက်ကို ခပ်ပြင်းပြင်း ရှိုက်လိုက်သည်။

ဟုတ်တယ် ဘာမှ အရေးမကြီးဘူး။

သူက ဟန်မိသားစု၏ တိုက်ရိုက်မျိုးဆက် ဖြစ်သည်၊ ထန်ထျန်းကို သတ်လိုက်လျှင်ပင် နန်းတော်က သူ့အခြေအနေကို ကြည့်ပြီး သက်ညှာစွာ စီရင်မည်သာ ဖြစ်သည်။

အရေးကြီးဆုံးအချက်ကမူ...

သူကိုယ်တိုင်လည်း တိုက်ပွဲကို ရပ်တန့်ရန် မတတ်နိုင်တော့ခြင်းပင်။

၎င်းမှာ အင်မော်တယ် အရှင်၏ လက်နက် ဖြစ်သည်၊ ရွှေ အင်မော်တယ်လေး တစ်ယောက်က မည်သို့ အပြည့်အဝ ထိန်းချုပ်နိုင်မည်နည်း

ထန်ထျန်း၏ စောစောက တိုက်ခိုက်မှုကြောင့် 'ဝိညာဉ်စားအလံ' ၏ အလိုအလျောက် တိုက်ခိုက်ရေး အစီအရင်မှာ ပွင့်သွားခဲ့ပြီ ဖြစ်သည်။ အခုအချိန်တွင် အလံကြီးမှာ သူ့အလိုလို အလုပ်လုပ်နေခြင်းဖြစ်ပြီး သူကိုယ်တိုင်ပင် ဝင်ရောက် စွက်ဖက်၍ မရတော့ပေ။

ရပ်ချင်သော်လည်း ရပ်၍ မရတော့။

အခုတော့ လူအများ၏ ထောက်ခံမှုကို ရထားပြီမို့ ဤအချက်ကိုပင် အသုံးချပြီး ဖုံးကွယ်ထားလိုက်တော့မည်။

ဘာပဲဖြစ်ဖြစ် ထန်ထျန်း သေသွားလျှင် ပြစ်ဒဏ်က အားလုံးအပေါ် ခွဲဝေကျရောက်သွားမည် ဖြစ်သည်။

ထန်ထျန်း အသက်ရှင်နိုင်ပါဦးမလား ဆိုသည့် အချက်နှင့် ပတ်သက်၍မူ...

ဟန်ကျင်းနန်၏ နှုတ်ခမ်းတွင် အေးစက်သော အပြုံးတစ်ခု ပေါ်လာသည်။

၎င်းမှာ လုံးဝ မဖြစ်နိုင်သောအရာပင်

ထန်ထျန်းတွင်လည်း 'ဝိညာဉ်စားအလံ' နှင့် အဆင့်တူသော အင်မော်တယ် အရှင်လက်နက်မျိုး ရှိမှသာ တစ်ခုနှင့်တစ်ခု အပြန်အလှန် ထိန်းညှိပြီး အသက်ရှင်ခွင့် ရနိုင်ပေလိမ့်မည်။

သို့သော် နိမ့်ပါးသော မျိုးဆက်မှ လာသည့် ထန်ထျန်းအနေဖြင့် ထိုကဲ့သို့ လက်နက်မျိုး ပိုင်ဆိုင်ထားမည် ဆိုသည်မှာ အိပ်မက်မက်နေခြင်းသာ ဖြစ်သည်။

ဟန်ကျင်းနန် ထိုသို့ တွေးနေမိသည်။

တကယ်တော့ သူတင်မကဘဲ လီဟုန်မှလွဲ၍ ကျန်ရှိနေသော လူအားလုံးကလည်း ထိုသို့ပင် ထင်နေကြသည်။

အကယ်၍ ဟန်ကျင်းနန်က လက်မလျှော့လျှင် ထန်ထျန်း သေမှာ သေချာသည်။

အချိန်များမှာ တစ်စက္ကန့်ချင်း ကုန်ဆုံးသွားသည်။

လူများ စိတ်မရှည်ဖြစ်လာချိန်တွင် ရုတ်တရက် ပြိုင် ကွင်းအတွင်း၌ လေပြင်းများ စတင် တိုက်ခတ်လာသည်။

ကြီးမားလှသော 'ဝိညာဉ်စားအလံ' ၏ မျက်နှာပြင်မှ မြူမည်းများမှာ ကောင်းကင်သို့ ထိုးတက်သွားပြီး တစ်ကိုယ်လုံး တုန်ခါလာသည်။

အားလုံးက စိုက်ကြည့်လိုက်ကြသည်။ နောက်ဆုံးတော့ ပြီးဆုံးတော့မှာလား

ထန်ထျန်း ဘယ်လို ဖြစ်သွားပြီလဲ

လူများ သတိမထားမိသည်မှာ ဟန်ကျင်းနန်၏ မျက်နှာပေါ်တွင် ထိတ်လန့်မှုများ ဖုံးလွှမ်းနေခြင်းပင် ဖြစ်သည်။

အဘယ်ကြောင့်ဆိုသော် သူက 'ဝိညာဉ်စားအလံ' ထံမှ ပေးပို့လာသော ခံစားချက်လေးတစ်ခုကို ရှင်းရှင်းလင်းလင်း ခံစားမိနေသောကြောင့် ဖြစ်သည်။

ထိုခံစားချက်မှာ... ကြောက်ရွံ့ခြင်းပင်

'ဝိညာဉ်စားအလံ' က ကြောက်ရွံ့နေသည်၊ မျှော်လင့်ချက် ကင်းမဲ့နေသည်

ဒါပေမဲ့ ဘာလို့လဲ

ဘာကြောင့်လဲ

ဟန်ကျင်းနန်မှာ အဖြေရှာမရပေ။

'ဝိညာဉ်စားအလံ' ၏ တုန်ခါမှုမှာ ပိုမို မြန်ဆန်လာပြီး မျှော်လင့်ချက် ကင်းမဲ့သော ခံစားချက်မှာလည်း ပိုမို ပြင်းထန်လာသည်။

ရုတ်တရက်... ကမ္ဘာပျက်တော့မည့်အလား ပြင်းထန်သော ပေါက်ကွဲသံကြီး ထွက်ပေါ်လာသည်။

အဆုံးမဲ့သော မြူမည်းများမှာ ကောင်းကင်သို့ ပျံတက်သွားပြီး တစ်ခဏချင်းမှာပင် ကောင်းကင်တစ်ခုလုံးကို ဖုံးလွှမ်းသွားသည်။

သို့သော် နောက်တစ်ခဏ၌ ၎င်းတို့မှာ ရုတ်တရက် ပြန်လည် ကျုံ့ဝင်သွားပြီး မူလပုံစံသို့ ပြန်ရောက်သွားသည်။

လူများ ကွင်းအတွင်းရှိ အခြေအနေကို ရှင်းရှင်းလင်းလင်း မြင်လိုက်ရသည့်အခါတွင်မူ မျက်လုံးများ ပြူးထွက်မတတ် အံ့ဩသွားကြသည်။

ထန်ထျန်းမှာ လူတိုင်း၏ မြင်ကွင်းထဲတွင် ဘာဒဏ်ရာမှ မရဘဲ အကောင်းတိုင်း ပေါ်လာခဲ့သည်။

ကြောက်မက်ဖွယ်ကောင်းလှသော 'ဝိညာဉ်စားအလံ'၊ ဟန်မိသားစု၏ အင်မော်တယ် အရှင်လက်နက်ကြီးမှာမူ ထန်ထျန်း၏ လက်ထဲသို့ ရောက်ရှိနေပြီး သူ၏ လက်ချောင်းများကြားတွင် လည်ပတ်နေသည်။

ကြည့်ရသည်မှာ ယဉ်ပါးသွားသော တိရစ္ဆာန်လေးတစ်ကောင်ကဲ့သို့ပင်။

"ဘုရား ရေ... ငါ သရဲမြင်နေတာလား"

တစ်စုံတစ်ယောက်က တုန်ရီနေသော အသံဖြင့် အော်ဟစ်လိုက်သည်။

ဆန်းကြယ် အင်မော်တယ် တစ်ယောက်က အင်မော်တယ် အရှင်လက်နက်၏ တိုက်ခိုက်မှုအောက်မှ အသက်ရှင်ရုံတင်မကဘဲ ၎င်းကို ယဉ်ပါးအောင်ပါ လုပ်နိုင်ခဲ့သည်

ဒါက ဘယ်လို အဓိပ္ပာယ်လဲ

ရှေးဟောင်းကျမ်းစာများထဲမှာတောင် ဤကဲ့သို့ ဖြစ်ရပ်မျိုး ရှိခဲ့ဖူးသည်ဟု မကြားဖူးပေ။

ဒါက ဘယ်လိုလုပ် ဖြစ်နိုင်မှာလဲ လုံးဝ ယုတ္တိမရှိ၊ အကြောင်းပြချက်မရှိသော ကိစ္စပင်

ကွင်းပြင် အတွင်းရှိ တပည့်များမှာ သူတို့၏ ခိုင်မာသော ကမ္ဘာ့အမြင်ကြီး တစ်ခုလုံး ပြိုလဲသွားသလို ခံစားနေကြရသည်။

ထန်ထျန်း၏ သန်မာမှုမှာ နက်နဲလွန်းလှပြီး သူတို့ လက်ခံနိုင်သည့် အတိုင်းအတာထက် ကျော်လွန်သွားခဲ့ပြီ ဖြစ်သည်။

လူတိုင်း၏ ဦးနှောက်မှာ ထူပူနေကြသည်။

ဆွံ့အနေကြသော တပည့်များကို ကြည့်ပြီး ထန်ထျန်းက သက်ပြင်းတစ်ချက်ကို အသာအယာ ချလိုက်သည်။

အင်မော်တယ် အရှင်၏ လက်နက်မှာ တကယ်ပင် ရင်ဆိုင်ရ ခက်ခဲလှသည်။

ထိုအင်မော်တယ် အရှင်ဝိညာဉ် ကိုးခုမှာ ထင်ထားသည်ထက် ပိုမို သန်မာသည်။

ထန်ထျန်းက သူတို့ကို 'အနန္တတာအိုနိယာမ နယ်ပယ်' ဖြင့် ပိတ်ဆို့ထားသော်လည်း ကြောင်လေးအတွက်မူ သူတို့ကို ဝါးမြိုရန် အတော်ပင် ခက်ခဲခဲ့သည်။

နှစ်ယောက်သား အပေးအယူမျှမျှဖြင့် အချိန်အတော်ကြာ ကြိုးစားပြီးမှသာ ဝိညာဉ်ကိုးခုလုံးကို ဖြေရှင်းနိုင်ခဲ့ခြင်း ဖြစ်သည်။

နောက်ဆုံး ကျန်ရစ်သော 'ဝိညာဉ်စားအလံ' ကိုယ်ထည်ကိုမူ ကြောင်လေးမှာ ဆက်မစားနိုင်တော့ပေ။

ထို့ကြောင့် 'ဝိညာဉ်စားအလံ' ၏ စိတ်ဆန္ဒကိုသာ ယာယီ ဝါးမြိုလိုက်ပြီး ကျန်ရှိနေသော အစိတ်အပိုင်းများကိုမူ နောက်မှ ဖြည်းဖြည်းချင်း စားရန် ဆုံးဖြတ်လိုက်သည်။

ထန်ထျန်းအနေဖြင့် ဤကဲ့သို့သော အရာကို ပေါ့ပေါ့ဆဆ သုံးမည်မဟုတ်ပေ၊ ၎င်းတို့အားလုံးမှာ ကြောင်လေး ကြီးထွားရန်အတွက် အစာများသာ ဖြစ်လာပေလိမ့်မည်။

သို့သော် ဤတိုက်ပွဲအတွင်း ထန်ထျန်းအနေဖြင့် မမျှော်လင့်ဘဲ အခြားသော သန်မာသည့် နည်းလမ်းတစ်ခုကို ဖော်ထုတ်နိုင်ခဲ့သည်။

'အနန္တတာအိုနိယာမ နယ်ပယ်' မှာ အလွန်ပင် ကောင်းကင်ဘုံကို ဆန့်ကျင်သော်လည်း တစ်ခုတည်းသော ပြဿနာမှာ အင်မော်တယ် အရှင်များ သို့မဟုတ် သန်မာသော အင်မော်တယ်ဘုရင်များကို ထန်ထျန်းအနေဖြင့် ပိတ်ဆို့ရုံသာ တတ်နိုင်ပြီး တကယ့် ခြိမ်းခြောက်မှုမျိုး မပေးနိုင်ခြင်းပင်။

သို့သော် ကြောင်လေးမှာမူ မတူပေ။

၎င်းမှာ ကမ္ဘာဦး ဝိညာဉ် တစ်ခုဖြစ်ပြီး ထန်ထျန်းနှင့်အတူ အစားကောင်းများ စားသောက်ပြီးနောက် ၎င်း၏ စွမ်းရည်မှာ အလွန် ကြောက်မက်ဖွယ်ကောင်းသော အဆင့်သို့ ရောက်ရှိနေပြီ ဖြစ်သည်။

နိယာမစွမ်းအားများကို စတင် နားလည်လာကြသည့် အင်မော်တယ်ဘုရင်၊ အင်မော်တယ် အရှင်များအတွက်မူ ကြောင်လေးမှာ မွေးရာပါ အပေါ်စီးမှ ဖိနှိပ်နိုင်သည့် အားသာချက် ရှိနေသည်။

ဒါကြောင့် ကြောင်လေး၏ တည်ရှိမှုက 'အနန္တတာအိုနိယာမ နယ်ပယ်' ၏ အားနည်းချက်ကို ကောင်းကောင်းကြီး ဖြည့်ဆည်းပေးနိုင်သည်။

ထန်ထျန်းက ထိန်းချုပ်မည်၊ ကြောင်လေးက အဆုံးသတ် တိုက်ခိုက်မည်။

နှစ်ယောက်သား၏ ပူးပေါင်းမှုမှာ အပြစ်ပြောစရာ မရှိပေ။

ထိုမြင်ကွင်းကို တွေးကြည့်ရုံနှင့်ပင် အလွန် လှပလှသည်။

ထန်ထျန်းအနေဖြင့် အင်မော်တယ်ဘုရင် အဆင့်သို့ မတက်လှမ်းနိုင်သေးမီအထိ ၎င်းမှာ သူ၏ အကြီးမားဆုံး "ဝှက်ဖဲ" ဖြစ်လာပေလိမ့်မည်။

'ဝိညာဉ်စားအလံ' ကို ခဏ ကစားပြီးနောက် ထန်ထျန်းက ၎င်းကို 'ထူးဆန်းသော ဥဟင်းလင်းပြင်' ထဲသို့ တိုက်ရိုက် ပစ်ထည့်လိုက်သည်။

မကြာမီတွင် ၎င်းမှာ ကြောင်လေး၏ ဗိုက်ထဲသို့ ရောက်ရှိသွားပြီး ဤကမ္ဘာပေါ်မှ ထာဝရ ပျောက်ကွယ်သွားပေလိမ့်မည်။

ထို့နောက် သူသည် ရှေ့တွင်ရှိသော ဟန်ကျင်းနန်ကို ကြည့်ကာ သူ၏ ရှေ့သို့ ခြေတစ်လှမ်းဖြင့် ရောက်ရှိသွားသည်။

"ထန်... ထန်ထျန်း။"

"မင်း ဘာလုပ်မလို့လဲ"

"ငါ ပြောမယ်၊ ငါက ဟန်မိသားစုရဲ့ တိုက်ရိုက်မျိုးဆက်ပဲ၊ မင်းသာ လွန်လွန်ကျွံကျွံ လုပ်ရင် ဟန်မိသားစုက မင်းကို လုံးဝ လွှတ်ထားမှာ မဟုတ်ဘူး"

"တကယ်ပြောတာ၊ ငါ မင်းကို မညာဘူး"

"ငါ့ကို လွှတ်ပေးပါ..."

'ဝိညာဉ်စားအလံ' ကို ဆုံးရှုံးလိုက်ရသော ဟန်ကျင်းနန်မှာ ကြောက်လန့်ပြီး အရူးတစ်ယောက်လို ဖြစ်နေသည်။

ထန်ထျန်း အနားသို့ ရောက်လာသည်ကို မြင်သောအခါ သူ၏ တစ်ကိုယ်လုံးမှာ တုန်ရီနေပြီး စကားပင် ကောင်းကောင်း မပြောနိုင်တော့ပေ။

သို့သော် ထန်ထျန်းမှာမူ အစမှအဆုံး တည်ငြိမ်နေဆဲပင်။

"ငါ ပြောခဲ့ပြီးပြီ။"

"ငါ့ရှေ့မှာ လာရပ်ဖို့ ရွေးချယ်ခဲ့ပြီဆိုရင်တော့ အကျိုးဆက်ကို ခံယူဖို့ ပြင်ဆင်ထားရမယ်။"

ပြောပြီးနောက် ထန်ထျန်းက သူ့ကို စကားဆက်ပြောခွင့် မပေးတော့ပေ။

လက်ညှိုးတစ်ချက် ထိုးလိုက်ရာ အလင်းတန်းတစ်ခုမှာ ဟန်ကျင်းနန်၏ ဒန်တျန် ကို ချက်ချင်း ဖောက်ထွက်သွားပြီး အတွင်းပိုင်းရှိ အင်မော်တယ် စွမ်းအားပင်လယ်ကိုပါ ဖျက်ဆီးပစ်လိုက်သည်။

ထို့နောက် ထန်ထျန်းက လက်သီးဖြင့် ထိုးလိုက်ရာ ဟန်ကျင်းနန်၏ ခန္ဓာကိုယ်မှာ ကြိုးပြတ်သွားသော စွန်တစ်ခုကဲ့သို့ အဝေးသို့ လွင့်စင်သွားတော့သည်။

အကြောများ ပြတ်တောက်သွားပြီး သွေးများက ကောင်းကင်တွင် စီးကျလာသည်။

သာမန် ကျင့်ကြံသူဆိုလျှင် ဤဘဝအတွက် လုံးဝ အသုံးမကျတော့သည့် လူဖျင်းတစ်ယောက် ဖြစ်သွားပေလိမ့်မည်။

သို့သော် ဟန်မိသားစု၏ အခြေခံ အုတ်မြစ်များဖြင့် ဟန်ကျင်းနန်ကို မူလအတိုင်း ပြန်ဖြစ်အောင် လုပ်ပေးနိုင်မည်ကို ထန်ထျန်း သိသည်။

သို့သော် ဤကဲ့သို့သော နာကျင်မှုနှင့် မျှော်လင့်ချက် ကင်းမဲ့မှုတို့မှာ သူ ခံယူရမည့် အကျိုးဆက်ပင် ဖြစ်သည်။

ဤအရာများကို လုပ်ပြီးနောက် ထန်ထျန်းက ကျန်ရှိနေသော တပည့်များကို ကြည့်လိုက်သည်။

"မင်းတို့ အလှည့် ရောက်ပြီ။"