ကုံးချန်ခြံဝင်းသို့ ဝင်ရောက်ခြင်း

ယနေ့က တပည့်အသစ်များအား ခြံဝင်းများသို့ ခွဲဝေပေးမည့် နေ့ဖြစ်သည်။

ထိပ်တန်း တပည့်အသစ် ငါးရာကျော်က အကြိတ်အနယ် ယှဉ်ပြိုင်ကြပြီးနောက် ကျီဝေခြံဝင်း သို့ တက်ရောက်ခွင့်ရမည့် တပည့် အယောက် ၃၀ နှင့် ကုံးချန်ခြံဝင်း သို့ တက်ရောက်ခွင့်ရမည့် တပည့် ၃ ဦးတို့ကို ရွေးချယ်ကြမည် ဖြစ်သည်။

ယခင်ထုံးစံများအရ ဆိုလျှင် ထိုအချိုးအစားမှာ ယခုထက် ပိုမိုများပြားသင့်သည်။

သို့သော် နဂါးတံခါး ပျက်စီး သွားခဲ့သဖြင့် ယခုနှစ် တပည့်များ၏ အရည်အသွေးမှာ အနည်းနှင့်အများ ဆိုသလို လျော့နည်းသွားခဲ့သည်။

ထို့ကြောင့် တက်ရောက်ခွင့် ရရှိမည့် အင်အားကိုလည်း သင့်တော်သလို လျှော့ချလိုက်ခြင်း ဖြစ်သည်။

ဤကိစ္စနှင့် ပတ်သက်၍ အံ့ဩစရာကောင်းသည်မှာ တပည့်တစ်ဦးတစ်ယောက်မျှ လူသိရှင်ကြား မကျေမနပ် ဖော်ပြခြင်း မရှိကြပေ။

သေချာပေါက် စိတ်ထဲတွင် ရှိနေသူများ ရှိနိုင်သော်လည်း မည်သူမျှ ထုတ်မပြောရဲကြခြင်းပင်။

အဘယ်ကြောင့်ဆိုသော် နဂါးတံခါး ပျက်စီး ရခြင်း၏ အရင်းခံမှာ ထန်ထျန်းဖြစ်ပြီး ထန်ထျန်းမှာ သူတို့ ယခုအချိန်တွင် မည်သူမျှ မစော်ကားရဲသော တည်ရှိမှုတစ်ခု ဖြစ်နေသောကြောင့် ဖြစ်သည်။

ထို့ကြောင့် ခြံဝင်းများ ခွဲဝေပေးမည့် ပြိုင်ပွဲမှာ ပုံမှန်အတိုင်းပင် စတင်ခဲ့သည်။

စီမံသူဟဲက ကိုယ်တိုင် ဦးစီးကျင်းပပြီး ထုန်းရှန့်တောင်၏ ဂုဏ်သရေရှိ အကြီးအကဲ အချို့ကလည်း စောင့်ကြည့်ရန် ရောက်ရှိလာကြသည်။

ထန်ထျန်းမှာလည်း သေချာပေါက် ရောက်ရှိလာခဲ့သည်။

သို့သော် သူက ပြိုင်ပွဲဝင် နားနေဆောင်သို့ သွားရန် ပြင်ဆင်နေစဉ် စီမံသူဟဲက ယဉ်ကျေးစွာဖြင့် သူ့ကို တားမြစ်လိုက်သည်။

"ထန်ထျန်း... မင်းကတော့ ဟိုဘက်ကို သွားဖို့ မလိုတော့ပါဘူး"

စီမံသူဟဲက ပြုံးရွှင်စွာဖြင့် ပြောလိုက်သည်။

ထန်ထျန်း ခဏမျှ ကြောင်သွားပြီး "ဘာဖြစ်လို့လဲ"

" ကျွန်တော့်မှာလည်း ခြံဝင်းခွဲဝေမှုမှာ ပါဝင်ခွင့် ရှိတယ် မဟုတ်လား"

သူက ထုန်းရှန့်တောင်သို့ "နှင်ထုတ်ခံရခြင်း" ပုံစံဖြင့် ဝင်လာရခြင်း ဖြစ်သော်လည်း အခြေခံ အခွင့်အရေး အားလုံးမှာမူ အပြည့်အဝ ရှိနေဆဲပင်။

စီမံသူဟဲက ဤကိစ္စအပေါ် တစ်ခုခု ကြံစည်နေသလားဟု သူ တွေးမိသွားသည်။

သို့သော် ယခုတစ်ကြိမ်တွင်မူ သူ အထင်မှားသွားခြင်း ဖြစ်သည်။

စီမံသူဟဲက ရယ်ရင်း "အဲဒါကတော့ သေချာတာပေါ့၊ မင်းရဲ့ အခွင့်အရေးကို ဘယ်သူမှ လုယူလို့ မရပါဘူး။"

" ဒါပေမဲ့ လွန်ခဲ့တဲ့ ရက်ပိုင်းက မင်းရဲ့ ခွန်အားကို မင်း သက်သေပြခဲ့ပြီးပြီလေ၊ အကြီးအကဲ အတော်များများကလည်း အဲဒါကို အသိအမှတ်ပြုထားကြတယ်။ "

"ဒါကြောင့် မင်းက ကုံးချန်ခြံဝင်းရဲ့ နေရာကို ကြိုတင်ပြီး ရရှိထားပြီးသား။ "

"ဒီပြိုင်ပွဲမှာ ထပ်ပြီး ပါဝင်ယှဉ်ပြိုင်နေဖို့က သိပ်ပြီး အဓိပ္ပာယ် မရှိတော့ဘူးလေ"

ထန်ထျန်း ချက်ချင်းပင် သဘောပေါက်သွားသည်။

သူက အလိုအလျောက် အဆင့်တက်သွားခြင်း ဖြစ်သည်။

၎င်းကလည်း ကောင်းလှပေသည်၊ အပိုကိစ္စများကို သက်သာစေသည်။

ယခုအချိန်တွင် သူက ဤတပည့်များနှင့် တိုက်ခိုက်ရန် လုံးဝ စိတ်မပါတော့ပေ။

"ဒီဘက်ကို လာခဲ့ပါ"

စီမံသူဟဲ၏ ဖိတ်ခေါ်မှုဖြင့် ထန်ထျန်းက သူ၏ ဘေးတွင် ထိုင်လိုက်ပြီး ထုန်းရှန့်တောင် အကြီးအကဲများနှင့်အတူ အောက်ဘက်ရှိ တပည့်များ၏ တိုက်ပွဲများကို ကြည့်နေတော့သည်။

အကြီးအကဲများမှာလည်း ဤကိစ္စအပေါ် ကန့်ကွက်ခြင်း မရှိသည့်အပြင် အလွန်ပင် ဝမ်းမြောက်ဝမ်းသာ ရှိနေကြပြီး အများစုက ထန်ထျန်းအပေါ် စေတနာ ထားကြသည်။

ကုံးချန်ခြံဝင်းမှ အကြီးအကဲ အချို့ဆိုလျှင် ထန်ထျန်းကို တရင်းတနှီးပင် စကားလာပြောကြသည်။

"ကျင့်ကြံမှုကို အားစိုက်ထား"

"နောင်တစ်ချိန် ကုံးချန်ခြံဝင်းကို ရောက်တဲ့အခါ မသိတာ၊ နားမလည်တာ ရှိရင် ငါ့ကို အချိန်မရွေး လာမေးလို့ ရတယ်"

ထန်ထျန်းက တစ်ဦးချင်းစီကို ယဉ်ကျေးစွာ ပြန်လည် ဖြေကြားခဲ့ပြီး တစ်ခုကိုလည်း ရိပ်မိသွားသည်။

ကုံးချန်ခြံဝင်း ဆိုသည်မှာ အမှန်တကယ်တွင် နာမည် တစ်ခုမျှသာ ဖြစ်ပြီး အားလုံး စုပေါင်း၍ သင်ရသော သင်တန်းကျောင်းမျိုး မဟုတ်ပေ။

၎င်းမှာ ဂုဏ်သိက္ခာနှင့် အဆင့်အတန်း၏ သင်္ကေတ တစ်ခုဖြစ်ပြီး အခွင့်အရေးနှင့် ခံစားခွင့် အမျိုးမျိုးကို ရရှိနိုင်ခြင်း ဖြစ်သည်။

ကုံးချန်ခြံဝင်းတွင် နေ့စဉ် မတူညီသော အကြီးအကဲများက တာအို များ ဟောပြော သင်ကြားပေးလေ့ ရှိသည်။

အကယ်၍ တပည့်တစ်ဦးက အကြီးအကဲ တစ်ဦး၏ သင်ကြားမှုမှ အကျိုးကျေးဇူးများစွာ ရရှိပြီး တိုးတက်မှု မြန်ဆန်လျှင် သို့မဟုတ် ကြိုတင် "ဘွဲ့ရ" သွားလျှင် ထိုအကြီးအကဲမှာလည်း ပိုမိုကောင်းမွန်သော "လုပ်ဆောင်ချက် မှတ်တမ်း" ကို ရရှိမည် ဖြစ်သည်။

ထို့ကြောင့် ထန်ထျန်းကဲ့သို့သော ထိပ်တန်းပါရမီရှင်မျိုးနှင့် ရင်းနှီးအောင် ထိုအကြီးအကဲများက ကြိုးစားကြခြင်း ဖြစ်သည်။

၎င်းမှာ နှစ်ဦးနှစ်ဖက် အကျိုးရှိသော ကိစ္စပင်။

အကြီးအကဲ အချို့နှင့် သိကျွမ်းပြီးနောက် ခြံဝင်းခွဲဝေမှု ပြိုင်ပွဲလည်း စတင်ခဲ့သည်။

ထန်ထျန်း မပါဝင်ကြောင်း သိလိုက်ရသောအခါ တပည့်များမှာ သက်ပြင်းကို အသာချလိုက်ကြသည်။

ဤကဲ့သို့ အရေးကြီးသော အချိန်တွင် ထန်ထျန်းကဲ့သို့သော "လူထူးလူဆန်း" နှင့် မည်သူမျှ မတွေ့ချင်ကြပေ။

စိတ်အေးသွားကြသဖြင့် သူတို့၏ စွမ်းဆောင်ရည်မှာ သိသိသာသာ ကောင်းမွန်လာသည်။

တိုက်ပွဲကောင်းများမှာ တစ်ပွဲပြီးတစ်ပွဲ ဆက်တိုက် ဖြစ်ပေါ်နေသဖြင့် မျက်စိမလွှဲနိုင်စရာပင်။

ထန်ထျန်း၏ ဘေးရှိ အကြီးအကဲ အချို့ကမူ ယခုတစ်ကြိမ် တပည့်ရွေးချယ်မှုမှာ နဂါးတံခါး စမ်းသပ်မှုကို မဖြတ်ကျော်ခဲ့ရသော်လည်း ကွာခြားချက်မှာ လူတို့ထင်သလောက် မကြီးမားကြောင်း ပြော နေကြသည်။

ထူးချွန်သော ပါရမီရှင်များစွာ ရှိနေဆဲပင်။

ဥပမာအားဖြင့် ထန်ထျန်းက အဝတ်အစားများ အားလုံး ချွတ်ခိုင်းခဲ့သော "မျိုးဆက်" တပည့်မှာ ပြန်လည် နာလန်ထူလာပြီးနောက် အကုန်လုံးကို အပြတ်အသတ် အနိုင်ယူနေသည်။

နောက်ဆုံးတွင် သူက ကျီဝေခြံဝင်းသို့ ဝင်ရောက်ခွင့်ကို ရရှိသွားသည်။

ဟန်မိသားစုမှ ဟန်ကျင်းနန်မှာမူ ထန်ထျန်း၏ ပြင်းထန်သော ဒဏ်ရာပေးမှုကြောင့် ယခုအချိန်အထိ အပြည့်အဝ မသက်သာသေးသော်လည်း အလွန် ကောင်းမွန်သော စွမ်းဆောင်ရည်ဖြင့် ကျီဝေခြံဝင်းသို့ အောင်မြင်စွာ ဝင်ရောက်နိုင်ခဲ့သည်။

ထို့အပြင် ထန်ထျန်း မမြင်ဖူးသော ပါရမီရှင် အချို့လည်း ရှိသေးသည်။ အချို့မှာ အထွတ်အထိပ် အခြေအနေရှိသော ဟန်ကျင်းနန်ထက်ပင် ပိုမို အစွမ်းထက်ကြသည်။

ထိုသူမှာ တည်ငြိမ် လေးနက်သော လူငယ်လေး တစ်ဦး ဖြစ်ပြီး ပျက်စီးနေသော အင်မော်တယ် ဓားတစ်လက်ကို ကိုင်ဆောင်ထားကာ သူ၏ ဓားစွမ်းအင်မှာ ကောင်းကင်သို့တိုင် ထိုးတက်နေသည်။

သူက တိုက်ပွဲ အတော်များများတွင် တစ်ပွဲမျှ မရှုံးဘဲ အပြတ်အသတ် အနိုင်ရရှိခဲ့ရာ ပြိုင်ဘက်ကင်းသော ခံစားချက်မျိုးကို ပေးစွမ်းနေသည်။

ဤလူငယ်မှာ ယခင်က တပည့်များ ချင်းရွှီခြံဝင်းကို ဝိုင်းစဉ်ကလည်း ပေါ်မလာခဲ့ပေ။

နောက်ဆုံးတွင် အကြီးအကဲများ၏ ဆွေးနွေးမှုအရ ထိုလူငယ်က ကုံးချန်ခြံဝင်းသို့ ဒုတိယမြောက် ဝင်ရောက်ခွင့် ရရှိသူ ဖြစ်လာခဲ့သည်။

"ထန်ထျန်း... သူ့ကို မင်း ဘယ်လို မြင်လဲ"

နေရာများ သတ်မှတ်ပြီးနောက် စီမံသူဟဲက ထန်ထျန်းကို မေးလိုက်သည်။

ထန်ထျန်းက ခေါင်းညိတ်လိုက်ပြီး "သူက တကယ်ကို သန်မာပါတယ်"

"သူ့ရဲ့ ဓားလမ်းစဉ်က အတော်လေးကို နက်ရှိုင်းတဲ့ အဆင့်ကို ရောက်နေပြီ။ "

"အဲဒါအပြင် သူ့ဆီမှာ ထူးခြားတဲ့ အော်ရာ တစ်ခု ရှိနေတယ်၊ တစ်ခုခု လိုအပ်နေသလိုမျိုး ခံစားရပေမဲ့ အဲဒီလို လိုအပ်နေတာကပဲ သူ့ကို ပိုပြီး ပြည့်စုံသွားစေသလိုမျိုးပဲ"

ဤကဲ့သို့သော ခံစားချက်မျိုးကို သူ ပထမဆုံးအကြိမ် မြင်ဖူးခြင်း ဖြစ်သည်။

စီမံသူဟဲက ပြုံး ရင်း "မင်းရဲ့ အမြင်က တကယ်ကို စူးရှတာပဲ"

"ဒီလူငယ်ရဲ့ နာမည်က ကောဟန့် တဲ့၊ သူက ချန်တာအိုခန်းမ ရဲ့ တပည့်ပဲ။"

" သူ့ဆီက အော်ရာ က ချန်တာအိုခန်းမ ရဲ့ ကျင့်စဉ်ကြောင့် ဖြစ်လာတာပဲ"

ထန်ထျန်း ချက်ချင်းပင် သဘောပေါက်သွားသည်။

သို့သော် စီမံသူဟဲ၏ စကားကြောင့် ထန်ထျန်းသည် အခြားကိစ္စတစ်ခုကို သတိရသွားသည်။

ယခင်က ဧကရာဇ်မြို့တွင် ရှိစဉ် ပုံရိပ်ယောင်ကမ္ဘာ သို့ ရောက် စဉ်က သူသည် ထျန်းဖူနန်းတော်၏ ချန်တာအိုခန်းမ နှင့် တစ်ကြိမ် ဆက်ဆံခဲ့ဖူးသည်။

သူ၏ နေရာလွတ် ထဲတွင် ချန်တာအိုခန်းမ ၏ ရွှေတိုကင် တစ်ခု ရှိနေသေးပြီး ၎င်းမှာ မည်သည့် ချန်တာအိုခန်းမ ခွဲကိုမဆို စိတ်ကြိုက် ဝင်ထွက်နိုင်သည်ဟု ဆိုထားသည်။

ထို့အပြင် ချန်တာအိုခန်းမ ၏ စီမံသူ တစ်ဦးဖြစ်သော စွေ့ရှစ်ရင် ၏ ဆက်သွယ်ရေး ကျောက်စိမ်းပြားလည်း ရှိနေသေးသည်။

အချိန်အတော်ကြာသွားသဖြင့် သူက ထိုကိစ္စကို မေ့နေခဲ့ခြင်း ဖြစ်သည်။

နောင် အခွင့်အရေး ရပါက သူတို့နှင့် ဆက်သွယ်ကြည့်ရပေမည်။ နိယာမ စွမ်းအားများ ကိန်းအောင်းနေသော ထိုလက်နက်ပျက်များကို ကြောင်လေးက အလွန်ပင် လိုချင်တပ်မက်နေသည် မဟုတ်ပါလား။

စကားပြောနေစဉ် အတွင်း အောက်ဘက်တွင် တိုက်ပွဲများ ဆက်လက် ဖြစ်နေသည်။

ငါးရာကျော် ဆိုသည်မှာ အများကြီး မဟုတ်သော်လည်း အနည်းငယ်တော့ မဟုတ်ပေ။

ကုံးချန်ခြံဝင်းသို့ ဝင်ရောက်ခွင့်ရမည့် တတိယမြောက် တပည့်ကိုလည်း နောက်ဆုံးတိုက်ပွဲ အပြီးတွင် သတ်မှတ်နိုင်ခဲ့သည်။

၎င်းမှာ အမျိုးသမီး တစ်ဦး ဖြစ်ပြီး ကောဟန့်ကဲ့သို့ပင် အဓိက တပည့်အဖြစ်မှ ခုမှ အဆင့်တက်လာသော တပည့်ဟောင်း တစ်ဦး ဖြစ်သည်။

သူမ၏ စွမ်းဆောင်ရည်မှာ ကောဟန့်ထက် အနည်းငယ် လျော့နည်းသော်လည်း သူမထက် သာလွန်သူ မရှိတော့သဖြင့် တတိယမြောက် နေရာမှာ သူမထံသို့ ရောက်ရှိသွားခြင်းပင်။

ဤတွင် တပည့်အသစ်များ အားလုံး၏ ခြံဝင်းခွဲဝေမှုမှာ ပြီးဆုံးသွားခဲ့ပြီ ဖြစ်သည်။

ဒိုင်လူကြီးများ အဖြစ် ဆောင်ရွက်သော အကြီးအကဲများ အားလုံး ထရပ်လိုက်ကြသည်။

သူတို့က ကျင်းချွဲခြံဝင်း၊ ကျီဝေခြံဝင်း နှင့် ကုံးချန်ခြံဝင်း တို့မှ အသီးသီး လာကြသူများ ဖြစ်သည်။

ထို့နောက် သူတို့က သူတို့ ခြံဝင်းအလိုက် တပည့်များကို ခေါ်ဆောင်သွားပြီး နောက်ထပ် အစီအစဉ်များအတွက် ပြင်ဆင်ကြတော့သည်။

ကုံးချန်ခြံဝင်း ဘက်တွင်မူ သုံးဦးသာ ရှိသည်။

"ထန်ထျန်း... ငါတို့ သွားကြမယ်"

အကြီးအကဲ တစ်ဦးက ပြုံးရွှင်စွာဖြင့် ပြောလိုက်သည်။

ကောဟန့်၏ စွမ်းဆောင်ရည်မှာ အလွန်ပင် ထူးချွန်သော်လည်း သူတို့၏ မျက်လုံးထဲတွင်မူ ထန်ထျန်း တစ်ဦးတည်းကိုသာ မြင်နေကြသည်။

ဘာပဲဖြစ်ဖြစ် ဤကောင်လေးက "လူထူးလူဆန်း" တစ်ဦး မဟုတ်ပါလား။

အကြီးအကဲများ၏ နောက်သို့ လိုက်ပါရင်း ထန်ထျန်းက အပေါ် သို့ ဆက်လက် လျှောက်လှမ်းခဲ့သည်။

မကြာမီတွင် အလွန် ကျယ်ပြန့်သော အင်မော်တယ် နယ်မြေတစ်ခုမှာ အားလုံး၏ ရှေ့မှောက်တွင် ပေါ်လာတော့သည်။

ဤနေရာမှာ ကုံးချန်ခြံဝင်း တည်ရှိရာ နေရာပင် ဖြစ်တော့သည်။