နှောင်ကြိုးကို အားဖြည့်ခြင်း

ကျယ်ပြန့်သော နှင်းဖုံးတောင်တန်းကြီးများသည် အဖြူရောင်စောင်ကြီး လွှမ်းခြုံထားသကဲ့သို့ အဆုံးမရှိ တည်ရှိနေပြီး အလွန်အမင်း ခြောက်သွေ့ကာ အထီးကျန်ဆန်လှသည်။

အရိုးခိုက်မတတ် အေးစက်သော လေပြင်းများ တိုက်ခတ်နေပြီး နှင်းပွင့်များကို လေဝဲကဲ့သို့ ဖြစ်ပေါ်စေသည်။

ထိုအချိန်တွင် ကျောက်စိမ်းပြားတစ်ခုသည် တုဟောက်၏ခေါင်းထက်၌ ပျံဝဲနေသည်။

ထိုကျောက်စိမ်းပြားသည် ဖျော့တော့တော့အလင်းတန်းများကို ထုတ်လွှတ်ထားပြီး သူ၏ခန္ဓာကိုယ်ကို လွှမ်းခြုံထားပေ၏။

ဤသည်က ပတ်ဝန်းကျင်ရှိ လေဟာနယ်ကို ငြိမ်သက်သွားစေသည်။

လေနှင့်နှင်းများ မည်မျှထိ ပြင်းထန်စေကာမူ သူ၏အနီး သုံးပေအကွာအဝေးအတွင်းသို့ ထိုးဖောက်ဝင်ရောက်နိုင်ခြင်း မရှိချေ။

အားကောင်းသော စွမ်းအင်လှိုင်းတစ်ရပ်သည် ကျောက်စိမ်းပြားမှတဆင့် တုဟောက်၏ခန္ဓာကိုယ်ပေါ်သို့ စီးဆင်းလာသည်။

ဤကြီးမားသော စွမ်းအင်အောက်တွင် သူ၏ ခန္ဓာကိုယ်သည် ပြင်းထန်သော ပြောင်းလဲမှုကို ကြုံတွေ့နေရသည်။

တဖြည်းဖြည်းနှင့် ထိုစွမ်းအင်လှိုင်းသည် အနီရောင်မှ အနက်ရောင်သို့ ပြောင်းလဲသွား၏။

ထို့နောက် နက်မှောင်သော ရွှေနက်ရောင်သင်္ကေတများသည် သူ၏ခန္ဓာကိုယ်ကို ဖုံးလွှမ်းသွားတော့သည်။

ထို့နောက် ထိုသင်္ကေတများသည် သူ၏ ခြေလက်အင်္ဂါများနှင့်အရိုးများထဲသို့ ပေါင်းစပ်ဝင်ရောက်သွားကြသည်။

ဤသည်မှာ အုပ်စိုးသူအရှင်ရုပ်ခန္ဓာကိုယ်၏ အဓိက အနှစ်သာရပင်။

တုဟောက်သည် ပြီးပြည့်စုံသော အုပ်စိုးသူအရှင်ရုပ်ခန္ဓာကိုယ် အမွေအနှစ်ကို ရယူလိုက်သည်နှင့် ကျုံးချင်သည်လည်း ထူးခြားသော ဆုလာဘ်များကို ရရှိလိုက်သည်။

"ဂုဏ်ယူပါတယ် လက်ခံသူ.. အုပ်စိုးသူအရှင်ရုပ်ခန္ဓာကိုယ် နှောင်ကြိုးကို အောင်မြင်အောင် အသက်သွင်းနိုင်ပါပြီ..."

"အုပ်စိုးသူအရှင်ရုပ်ခန္ဓာကိုယ် နှောင်ကြိုး....လက်ခံသူ၏တပည့်သည် ဥပဒေသစည်းမျဉ်းများကို ခံနိုင်ရည်ရှိပြီး အဆတစ်ရာ ဒဏ်ရာပြန်လည်ကောင်းမွန်ခြင်းကို ရရှိပါမည်.....လက်ခံသူသည်လည်း ဥပဒေသစည်းမျဉ်းများကို ခံနိုင်ရည်ရှိခြင်းနှင့် အဆတစ်ရာ ဒဏ်ရာပြန်လည်ကောင်းမွန်ခြင်းကို တပြိုင်နက်တည်း ရရှိနိုင်သည်....ထို့ပြင် တပည့်၏ကျင့်ကြံမှုကို လက်ခံသူထံသို့ အဆတစ်သောင်းနှုန်းဖြင့် ပြန်လည်ပေးအပ်ပါမည်..."

"ဤနှောင်ကြိုးအာနိသင်ကို အိမ်ရှင်၏ဆန္ဒအတိုင်း အဖွင့်အပိတ် လုပ်နိုင်သည်..."

စနစ်၏အချက်ပြမှုက ကျုံးချင်၏စိတ်နှလုံးသားကို အနည်းငယ် လှုပ်ရှားသွားစေသည်။

သူ၏ ယခင်ခန့်မှန်းချက် မှန်ကန်ပုံရသည်။ သူ့တပည့်များအားလုံး၏ ကျင့်ကြံမှုကို သူ့ထံသို့ အဆတစ်သောင်းနှုန်းဖြင့် ပြန်လည်ပေးအပ်နိုင်ပေ၏။

ကွာခြားချက်မှာ နှောင်ကြိုးအမျိုးမျိုး၏ အာနိသင်များပင်။

ဥပမာအားဖြင့် အမှိုက်နှောင်ကြိုးသည် တပည့်များကို အဆတစ်ရာ သို့မဟုတ် အဆတစ်ထောင် ကျင့်ကြံဆင့်အမြန်နှုန်းဖြင့် ကျင့်ကြံနိုင်စေသည်။

အုပ်စိုးသူအရှင်ရုပ်ခန္ဓာကိုယ် နှောင်ကြိုးကမူ အဆတစ်ရာ ဒဏ်ရာပြန်လည်ကောင်းမွန်ခြင်းကို ပေးစွမ်းသည်။

ထိုအချိန်မှာပင် စနစ်၏အသံ ထပ်မံ၍ ထွက်ပေါ်လာသည်။

"လက်ခံသူသည် အုပ်စိုးသူအရှင်ရုပ်ခန္ဓာကိုယ် နှောင်ကြိုးကို ပထမဆုံးအကြိမ် အသက်သွင်းခြင်း ဖြစ်သည့်အတွက် နှောင်ကြိုးအားဖြည့်ခြင်းတစ်ကြိမ်ကို ဆုချမည်..."

"အိမ်ရှင်အနေဖြင့် နှောင်ကြိုးအားဖြည့်ခြင်း၏ အာနိသင်ကို တိုက်ရိုက်ခံစားနိုင်ရန်အတွက်... စနစ်က အုပ်စိုးသူအရှင်ရုပ်ခန္ဓာကိုယ် နှောင်ကြိုးပေါ်တွင် အားဖြည့်မှုကို တိုက်ရိုက်သက်ရောက်စေရန် ဆုံးဖြတ်လိုက်သည်..."

"အုပ်စိုးသူအရှင်ရုပ်ခန္ဓာကိုယ် နှောင်ကြိုးကို အားဖြည့်နေသည်..."

ဤစကားများက ကျုံးချင်၏မျက်လုံးများကို တောက်ပသွားစေသည်။

နှောင်ကြိုးအားဖြည့်ခြင်းဟု ဆိုသလော...

ဤသည်မှာ သူ တစ်ကြိမ်တစ်ခါမျှ မကြုံတွေ့ဖူးသော လုပ်ဆောင်ချက်အသစ်ပင်။

သူ မျှော်လင့်ထားသည့်အတိုင်း အုပ်စိုးသူအရှင်ရုပ်ခန္ဓာကိုယ်နှောင်ကြိုးကို အားဖြည့်ပြီးစီးသွားချိန်၌ စနစ်၏အသံ ထွက်ပေါ်လာသည်။

"အုပ်စိုးသူအရှင်ရုပ်ခန္ဓာကိုယ် နှောင်ကြိုး အားဖြည့်ခြင်း ပြီးဆုံးပါပြီ..."

"အားဖြည့်ထားသော အုပ်စိုးသူအရှင်ရုပ်ခန္ဓာကိုယ် နှောင်ကြိုး၏အာနိသင်...လက်ခံသူ၏တပည့်သည် ဥပဒေသစည်းမျဉ်းများကို ခံနိုင်ရည်ရှိပြီး အဆတစ်ထောင် ဒဏ်ရာပြန်လည်ကောင်းမွန်ခြင်းကို ရရှိမည်... ထပ်ဆောင်း နှောင်ကြိုးစွမ်းရည်တစ်ခုဖြစ်သော 'ထိုင်ထလေ့ကျင့်ခန်း' ကို အသက်သွင်းလိုက်ပါပြီ..."

"အုပ်စိုးသူအရှင်ရုပ်ခန္ဓာကိုယ် နှောင်ကြိုး၏ ထိုင်ထလေ့ကျင့်ခန်း အာနိသင်.... စွမ်းရည်အသုံးပြုသူသည် ဒဏ်ရာမည်မျှပင် ပြင်းထန်ပါစေ...နေရာတွင် ထိုင်ထလေ့ကျင့်ခန်း လုပ်လိုက်ရုံဖြင့် ပြန်လည်ကောင်းမွန်လာမည်..."

"စွမ်းရည်များနှင့်အာနိသင်များအားလုံးကို လက်ခံသူက တစ်ပြိုင်နက်တည်း ပိုင်ဆိုင်ထားသည်..."

"နှောင်ကြိုးစွမ်းရည် ဟုတ်လား..."

"ထိုင်ထလေ့ကျင့်ခန်း..."

ကျုံးချင်၏မျက်လုံးများ တောက်ပသွားသည်။

ဤစွမ်းရည်သည် မယုံနိုင်လောက်အောင် ပုံမှန်ထက် သာလွန်ထူးကဲနေသည်။

မည်သည့် ပြင်းထန်သော ဒဏ်ရာကိုမဆို ပြန်လည်ကောင်းမွန်စေနိုင်သည်ဟု ဆိုသလော....

ဤသည်က နတ်ဘုရားစွမ်းရည်နှင့် ကွာခြားခြင်းမရှိဘဲ နားထောင်ရသည်မှာ အနည်းငယ် ထူးဆန်းနေရုံသာ ရှိသည်။

အစစ်အမှန် တိုက်ပွဲအခြေအနေတွင် တိုက်ခိုက်နေရင်းတန်းလန်း မြေကြီးပေါ်တွင် ထိုင်ထလေ့ကျင့်ခန်းကို ရုတ်တရက် ပြုလုပ်ရမည်လော။

ထိုမြင်ကွင်းကို မြင်ယောင်ကြည့်လိုက်ရုံဖြင့်...

ထို့ပြင် ဤသောက်ကျိုးနည်း စနစ်သည် သူ၏ယခင်ဘဝမှ စစ်တုရင်ကစားပွဲတစ်ခုခုကို ကစားခဲ့ဖူးရမည်ဟု ကျုံးချင် အပြင်းအထန် သံသယဝင်မိသည်။

သို့သော် ယေဘုယျအားဖြင့်ကြည့်လျှင် ဤအားဖြည့်မှုသည် အမှန်တကယ်ကို ပြိုင်ဘက်ကင်းသည်။ ထိုင်ထလေ့ကျင့်ခန်း စွမ်းရည်ကို ဘေးဖယ်ထားလျှင်ပင် အဆတစ်ထောင် ဒဏ်ရာပြန်လည်ကောင်းမွန်ခြင်း တစ်ခုတည်းဖြင့် လုံလောက်အောင် သာလွန်ထူးကဲနေလေပြီ။

စဉ်းစားကြည့်ပါက...

အကယ်၍ အဆင့်တူလူနှစ်ဦး သေရေးရှင်ရေး တိုက်ပွဲ ဖြစ်ပွားကြလျှင်....

နှစ်ဖက်လုံး ပြင်းထန်စွာ ဒဏ်ရာရနေချိန်တွင် တစ်ဖက်က အဆတစ်ထောင် ပြန်လည်ကောင်းမွန်ခြင်းကို အသက်သွင်းလိုက်ပါက...

ဤသည်က သေချာပေါက် တစ်ဖက်သတ် အနိုင်ယူလိုက်ခြင်း မဟုတ်လော....

သို့သော် ထိုစွမ်းရည်၏တိကျသော အချက်အလက်များအတွက်မူ သူ၏တပည့် နိုးထလာပြီး စမ်းသပ်ကြည့်သည်အထိ စောင့်ဆိုင်းရပေမည်။

မည်သို့ပင်ဆိုစေကာမူ စွမ်းရည်တစ်ခုကို လက်တွေ့စမ်းသပ်ခြင်းသည်သာ အမှန်တရားကို စစ်ဆေးရန် တစ်ခုတည်းသော စံသတ်မှတ်ချက်ပင်။

ဤသည်ကို တွေးတောရင်း ကျုံးချင်၏မျက်လုံးများထဲတွင် စိတ်အားထက်သန်မှု အရိပ်အယောင်တစ်ရပ် ဖြတ်ပြေးသွားသည်။

ထို့ပြင် အုပ်စိုးသူအရှင်ရုပ်ခန္ဓာကိုယ် နှောင်ကြိုးကို အားဖြည့်နိုင်ပြီး ထိုင်ထလေ့ကျင့်ခန်း စွမ်းရည် ရရှိနိုင်လျှင် အမှိုက်နှောင်ကြိုးကိုလည်း အားဖြည့်ပြီး သီးသန့်စွမ်းရည် ရရှိနိုင်မည်လောဟု ကျုံးချင်က တွေးတောမိလိုက်သည်။

ဤသံသယနှင့်အတူ ကျုံးချင်က စနစ်ကို တိုက်ရိုက်မေးမြန်းလိုက်သည်။

စနစ်၏ ပြန်လည်ဖြေကြားချက်က ထိုအရာမှန်ကန်ကြောင်း အတည်ပြုပေးခဲ့သည်။

ဤအချက်က ကျုံးချင်ကို အနာဂတ်အတွက် ပို၍စိတ်လှုပ်ရှားသွားစေသည်။

အချိန်များ ဖြည်းညှင်းစွာ ကုန်ဆုံးသွားကာ....

တုဟောက်သည် အုပ်စိုးသူအရှင်ရုပ်ခန္ဓာကိုယ် အမွေအနှစ်ကို လက်ခံရယူရန် စုစုပေါင်း သုံးရက်ကြာမြင့်ခဲ့သည်။

အုပ်စိုးသူအရှင်ရုပ်ခန္ဓာကိုယ်အဖြစ် ပြောင်းလဲရန် ဤမျှထိ ကြာရှည်မည် မဟုတ်သော်လည်း ဤအမွေအနှစ်သည် ရုပ်ပိုင်းဆိုင်ရာ ပြောင်းလဲမှု သက်သက်မဟုတ်ဘဲ လိုက်ဖက်ညီသော ကျင့်စဉ်အမွေအနှစ်လည်း ပါဝင်နေသောကြောင့်ပင်။

ကျောက်စိမ်းပြား၏စွမ်းအင် လုံးဝကုန်ဆုံးသွားသည်နှင့် တုဟောက်က ဖြည်းညှင်းစွာ နိုးထလာခဲ့သည်။

သူ၏မျက်လုံးများ ပွင့်လာသည်နှင့် စူးရှသော အလင်းတန်းနှစ်တန်းက ရှေ့သို့ပျံ့လွင့်သွားသည်။

သူသည် သူ၏ခန္ဓာကိုယ်ကို တိတ်တဆိတ် အာရုံခံလိုက်ရာ မရေမတွက်နိုင်သော ထိုးထွင်းသိမြင်မှုများက သူ၏စိတ်ထဲတွင် ပြည့်နှက်သွားပေ၏။

သူ ရှေ့ဆက်ရမည့် လမ်းခရီးသည် ပို၍ပီပြင်ရှင်းလင်းလာခဲ့သည်။

ထို့ပြင် ယခုအချိန်တွင် သူ၏ခန္ဓာကိုယ်အတွင်း၌ အုပ်စိုးသူအရှင်ရုပ်ခန္ဓာကိုယ် အမွေအနှစ်မှ ပြောင်းလဲပေးလိုက်သော ကြီးမားသည့် စွမ်းအင်များကို သိုလှောင်ထားသည်။

နောင်လာမည့် အလွန်ကြာမြင့်သော အချိန်ကာလများအထိ သူ၏ကျင့်ကြံမှုလမ်းကြောင်းအတွက် စိတ်ပူရန် မလိုတော့ချေ။ သူ ဂရုစိုက်ရမည့် အချက်များများကို လိုက်နာသရွေ့ သူ၏ ကျင့်ကြံဆင့်သည် အချိန်တိုအတွင်း၌ မြင့်တက်သွားပေလိမ့်မည်။

တုဟောက်သည် ငယ်စဉ်ကတည်းက ကံကြမ္မာကောင်းများနှင့် မရေမတွက်နိုင်အောင် ကြုံတွေ့ခဲ့ရသော်လည်း တစ်စုံတစ်ခုကို သူ ဝန်ခံရပေမည်။

ဤအုပ်စိုးသူအရှင်ရုပ်ခန္ဓာကိုယ် အမွေအနှစ်သည် သူ ရရှိဖူးသမျှ အရာများအနက် ကောင်းကင်ဘုံကို အာခံနိုင်ဆုံးသော အခွင့်အရေးပင်။

ထို့ပြင် ဤအရာအားလုံးကို ကျုံးချင်က သူ့အား ပေးအပ်ခဲ့ခြင်း ဖြစ်ပေ၏။

ဤသည်ကို တွေးတောရင်း တုဟောက်သည် လျှင်မြန်စွာ မတ်တတ်ရပ်လိုက်ပြီး ကျုံးချင်ကို လေးလေးနက်နက် ဦးညွှတ်အရိုအသေပြုလိုက်သည်။

"တပည့်က ဆရာ့ကို ဂါရဝပြုပါတယ်..."

"အသစ်တဖန် ပြန်လည်မွေးဖွားပေးတဲ့ ကျေးဇူးအတွက် ဆရာ့ကို ကျေးဇူးတင်ပါတယ်..."

အုပ်စိုးသူအရှင်ရုပ်ခန္ဓာကိုယ် အမွေအနှစ်သည် သူ့အတွက် အသစ်တဖန် ပြန်လည်မွေးဖွားခြင်းနှင့် တူညီသော ကျေးဇူးတရားပင်။

နှင်းတောင်ပေါ်တွင် ကျုံးချင်သည် ကျယ်ပြန့်သော နှင်းပြင်ကြီးအလယ်၌ မတ်တတ်ရပ်နေသည်။

အားအင်များ စိတ်ဓာတ်တက်ကြွမှုများဖြင့် ပြည့်နှက်နေသော တုဟောက်ကို ကြည့်ရင်း သူ၏မျက်နှာပေါ်တွင် စိတ်ကျေနပ်အားရသော အမူအယာတစ်ရပ် ထင်ဟပ်လာသည်။

တုဟောက်သည် အသက်နှစ်ဆယ်သာ ရှိသေးသော်လည်း သူ၏ကျင့်ကြံဆင့်သည် ကောင်းကင်နက်နဲသိမ်မွေ့နယ်ပယ်သို့ ရောက်ရှိနေလေပြီ။

ဤပါရမီသည် အံ့အားသင့်ဖွယ်ကောင်းသော အဆင့်တစ်ခုသို့ ရောက်ရှိနေပြီဟု ဆိုရပေမည်။

အဆတစ်ရာ ကျင့်ကြံမှုနှုန်း မြှင့်တင်ခြင်းကို အသက်သွင်းထားသော သူ၏ ပထမတပည့်လင်းဖုန်းနှင့် ဒုတိယတပည့်စုယဲ့တို့နှင့် နှိုင်းယှဉ်လျှင်ပင် တုဟောက်၏ကျင့်ကြံဆင့်သည် နိမ့်ပါးခြင်း မရှိချေ။

ထို့ထက်ပို၍အရေးကြီးသည်မှာ ကောင်းကင်နက်နဲသိမ်မွေ့နယ်ပယ်မှ အဆတစ်သောင်း ကျင့်ကြံမှုကို ပြန်လည်ရရှိခြင်းနှင့်အတူ သူ၏စွမ်းအားသည် အချိန်တိုအတွင်း သိသိသာသာ တိုးတက်လာမည်ဟု သူ ယုံကြည်ထားခြင်းပင်။

သူသည် ဤတတိယတပည့်ကို တဖြည်းဖြည်း ပို၍သဘောကျလာမိသည်။

"အခမ်းအနားတွေ လုပ်နေစရာ မလိုပါဘူး... ထတော့..."

ကျုံးချင်က လက်ကာပြလိုက်သည်။

"အုပ်စိုးသူအရှင်ရုပ်ခန္ဓာ အမွေအနှစ်က ဆရာရဲ့ ကြိုဆိုတဲ့လက်ဆောင် သက်သက်ပဲ..."

"နောက်တစ်ဆင့်အနေနဲ့ ဆရာက ဂိုဏ်းရဲ့ အဓိကအနှစ်သာရကို မင်းဆီ လက်ဆင့်ကမ်းပေးမယ်..."

"မင်း သေချာနားထောင်..."

ဤစကားကို ကြားချိန်၌ တုဟောက်၏စိတ်နှလုံးသား လှုပ်ရှားသွားသည်။

ဤအုပ်စိုးသူအရှင်ရုပ်ခန္ဓာကိုယ် အမွေအနှစ်၏ တန်ဖိုးရှိမှုသည် လောကကြီးတွင် ရှားပါးလှ၏။

သူ၏ဆရာသည် ဤကဲ့သို့ ရတနာမျိုးကို မျက်တောင်မခတ်ဘဲ သူ့အား ပေးအပ်နိုင်ခြင်းက ဆရာ၏ သာမန်မဟုတ်သော ဇစ်မြစ်ကို ပြသနေသည်။

ထိုကြောင့် သူ၏ဆရာ ပြောဆိုသော အဓိကအနှစ်သာရအပေါ် သူ ပို၍ပင် မျှော်လင့်ချက်များ ပြည့်နှက်လာသည်။

ကျုံးချင်က အချိန်တခဏကြာမျှ စဉ်းစားလိုက်သည်။

"မင်းရဲ့ဆရာက မင်းကို မန္တန်တစ်ပုဒ်နဲ့ လှုပ်ရှားမှုတစ်ခု သင်ပေးမယ်...မင်း ဒဏ်ရာရတဲ့အချိန်တိုင်း ဒီနည်းစနစ်ကို လုပ်ဆောင်ပြီးတော့ မင်းရဲ့ ပင်မကျင့်စဉ်လှည့်ပတ်မှုနဲ့ ပေါင်းစပ်လိုက်တာနဲ့ မင်းရဲ့ဒဏ်ရာတွေ အလျင်အမြန် ပြန်ကောင်းလာမယ်လို့ ငါ အာမခံတယ်..."

"အလျင်အမြန် ပြန်ကောင်းလာမှာလား..."

တုဟောက်၏မျက်လုံးသူငယ်အိမ်များ ကျဉ်းမြောင်းသွားသည်။

သူ၏စိတ်နှလုံးသား တုန်ရီသွားပေ၏။

သူသည် တောင်ပိုင်းနှင့်မြောက်ပိုင်းတွင် နှစ်ပေါင်းများစွာ ပုန်းအောင်းနေခဲ့ဖူးသော်လည်း ဤကဲ့သို့ ကောင်းကင်ဘုံကို အာခံနိုင်သော အာနိသင်မျိုး ရရှိနိုင်သည့် လျှို့ဝှက်နည်းစနစ်မျိုးကို တစ်ကြိမ်တစ်ခါမျှ မကြားဖူးခဲ့ချေ။

ဤအရာသည် သူကဲ့သို့ သတိကြီးသော လူတစ်ယောက်အတွက် ကောင်းချီးမင်္ဂလာတစ်ပါးပင်။

ဤကဲ့သို့ အစွမ်းထက်သည့် အသက်ကယ် ဝှက်ဖဲမျိုးကို မည်သူက ငြင်းပယ်နိုင်မည်နည်း...

"ကျေးဇူးပြုပြီး နည်းစနစ်ကို သင်ကြားပေးပါ ဆရာ..."

ယခုအချိန်တွင် တုဟောက်သည် စိတ်လှုပ်ရှားလွန်းသဖြင့် သူ့ကိုယ်သူ မထိန်းချုပ်နိုင်တော့ချေ။

"အဟမ်း... အဟမ်း..."

ကျုံးချင်က ဟန်ရေးပြကာ ချောင်းနှစ်ချက်ခန့်ဟန့်ပြီးနောက် ပြောဆိုလိုက်၏။

"မင်း ဒဏ်ရာရပြီးတဲ့နောက်မှာ အုပ်စိုးသူအရှင် ကျင့်စဉ်ကို လှည့်ပတ်ပြီးတော့ နေရာမှာတင် ထိုင်ထလေ့ကျင့်ခန်း ဆက်တိုက်လုပ်ပြီး 'လုပ်လိုက်ကြစို့' လို့ အော်လိုက်ရုံပဲ... ဒါဆိုရင် မင်းရဲ့ ဒဏ်ရာတွေ ဘယ်လောက်ပဲ ပြင်းထန်ပါစေ ပြန်ကောင်းသွားလိမ့်မယ်..."

ဤစကားများ ထွက်ပေါ်လာသည်နှင့်...

မျှော်လင့်ချက်များ အပြည့်အဝ မြင့်တက်နေသော တုဟောက် ချက်ချင်းပြိုလဲသွားတော့သည်။

"ဆရာ... ဒါက ဆရာ သင်ပေးတဲ့ လျှို့ဝှက်နည်းစနစ် ဟုတ်ရဲ့လား..."

သူ၏မျက်နှာ နီမြန်းလာပြီး မယုံကြည်နိုင်သောလေသံဖြင့် ပြောဆိုလိုက်သည်။

သူ၏ဆရာက သူ့ကို စနောက်နေသည်ဟု တုဟောက် အလေးအနက် သံသယဝင်မိသည်။

သူသည် ရှေးဟောင်းသမိုင်းများနှင့် ဂန္ထဝင်စာပေများကို သေချာစွာဖတ်ရှုခဲ့ပြီး မရေမတွက်နိုင်သော ကျင့်စဉ်စာအုပ်များကို လေ့လာခဲ့သည်။

လျှို့ဝှက်နည်းစနစ်တစ်ခုကို ဤသို့ပုံစံမျိုးဖြင့် အသုံးပြုနိုင်သည်ဟု သူ တစ်ကြိမ်တစ်ခါမျှ မကြားဖူးခဲ့ချေ။

သံသယများ ပြည့်နှက်နေသော တုဟောက်၏ အသံကို ကြားချိန်၌ ကျုံးချင်၏မျက်နှာအမူအယာ ချက်ချင်းသုန်မှုန်သွားသည်။

သူသည် ဆရာသခင်တစ်ဦး၏ တည်ကြည်လေးနက်သော အမူအယာကို ပုံဖမ်းလိုက်သည်။

"မင်းက ဆရာကိုပြန်ပြီး မေးခွန်းထုတ်နေတာလား..."

"တပည့် မလုပ်ရဲပါဘူး..."

တုဟောက်က ကျုံးချင်ကို သတိထားပြီး ကြည့်လိုက်၏။

သို့သော် ထိုသို့ ပြောဆိုလိုက်သော်လည်း သူ၏ မျက်နှာပေါ်တွင် မယုံကြည်မှုများ အထင်းသား ထင်ဟပ်နေသည်။

ဤကဲ့သို့သော ပေါ့ပေါ့ပါးပါး လှုပ်ရှားမှုနှင့် မန္တန်သည် သုံးနှစ်သားကလေးကိုပင် လှည့်စား၍ရမည်မဟုတ်ဟု သူ ခံစားလိုက်ရသည်။

ဉာဏ်ပညာနှင့်ချောမောခန့်ညားမှု ပေါင်းစပ်ထားပြီး စွမ်းအားနှင့်ပါရမီ ပြည့်စုံသော သူကဲ့သို့ မွန်းစတားဆန်သည့် ပါရမီရှင်တစ်ယောက်ကမူ ဆိုဖွယ်ရာပင် မရှိတော့ချေ။

ကျုံးချင်က သူ၏လက်နှစ်ဖက်ကို နောက်ပစ်ကာ တင်းမာခက်ထန်သော မျက်နှာထားဖြင့် ပြောဆိုလိုက်၏။

"လက်တွေ့စမ်းသပ်တာက အမှန်တရားကို စစ်ဆေးဖို့ တစ်ခုတည်းသော စံသတ်မှတ်ချက်ပဲလို့ ဆိုကြတယ်...မင်း မယုံမှတော့ ဘာလို့ စမ်းမကြည့်ဘဲနဲ့ အာနိသင်ကိုပဲ စောင့်ကြည့်နေမှာလဲ..."

ကျုံးချင်၏တည်ကြည်လေးနက်သော အမူအယာကို ကြည့်ရင်း တုဟောက် အနည်းငယ် ဇဝေဇဝါ ဖြစ်သွားသည်။

ဆရာသည် သူ့ကို စနောက်နေခြင်း မဟုတ်ဘဲ အမှန်အတိုင်း ပြောဆိုနေခြင်း ဖြစ်နေသလော...

သို့သော် သူ ပြန်လည်၍ တွေးတောမိသည်။

မည်သို့ ဖြစ်နိုင်မည်နည်း....

မည်သည့် လျှို့ဝှက်နည်းစနစ်မျိုးက ဤမျှထိ ရယ်ရွှင်ဖွယ်ကောင်းပြီး ပေါ့ပျက်ပျက် နိုင်မည်နည်း...

သူက ဖျော့တော့တော့လေသံဖြင့် ပြောဆိုလိုက်သည်။

"ဆရာ... တပည့်က ဘယ်လိုမျိုး စမ်းသပ်ရမှာလဲ..."

ကျုံးချင်က သူ၏လက်နှစ်ဖက်ကို ပွတ်သပ်ပြီး တုဟောက်၏ရှေ့တည့်တည့်သို့ လျှောက်လှမ်းသွားသည်။

"မင်းကိုယ်မင်း ဒဏ်ရာရအောင်လုပ်ပြီး ကိုယ်တိုင် မခံစားကြည့်ချင်ဘူးလား..."

"ဒါက... မလိုဘူးထင်တယ်..."

အလွန်အမင်း သတိကြီးသူ တစ်ယောက်ဖြစ်သော သူ့အနေဖြင့် ကိုယ့်ကိုယ်ကိုယ် အမြဲတစေ အကောင်းဆုံး အခြေအနေတွင် ထားရှိရန်မှာ မရှိမဖြစ် လိုအပ်သည်။

"လိုတာပေါ့..."

"လက်တွေ့လေ့ကျင့်မှုမရှိရင် ပြောဆိုပိုင်ခွင့် မရှိဘူး..."

"ကိုယ်တိုင် မကြုံတွေ့ဖူးရင် ဆရာရဲ့လျှို့ဝှက်နည်းစနစ်က ဘယ်လောက်ထိ နက်နဲသိမ်မွေ့တယ်ဆိုတာ မင်း ဘယ်လိုလုပ်ပြီး သိနိုင်မှာလဲ..."

ကျုံးချင်က တောက်ပစွာ ပြုံးလိုက်သည်။

သူ့ထက်ပင် ပို၍စိတ်လှုပ်ရှားနေသော ဆရာဖြစ်သူ၏ စိတ်အားထက်သန်နေသည့် ပုံစံကို ကြည့်ပြီး ယနေ့ သူ သွေးထွက်သံယို ဖြစ်တော့မည်ဟု တုဟောက် ခံစားလိုက်ရသည်။