အခန်း (၂၃၇-၂၃၈)

အခန်း (၂၃၇) - ခြိမ်းခြောက်မှုများကို ဖယ်ရှားခြင်းနှင့် ဆဋ္ဌမအဆင့် အခွင့်အရေးကို ရရှိခြင်း။

"ဘာ..."

ကျန်းဖန် ရုတ်တရက် ပေါ်ထွက်လာသည်ကို မြင်လိုက်ရသောအခါ ကျားစွယ်ဂိုဏ်းမှ ကျင့်ကြံသူအားလုံးမှာ ချက်ချင်းပင် မှင်တက်သွားကြတော့သည်။ အထူးသဖြင့် ဂိုဏ်းချုပ် လီဟူ၏ ရင်ထဲ၌ မယုံနိုင်လောက်သော တုန်လှုပ်ချောက်ချားမှုများ ဖြစ်ပေါ်သွားရ၏။

အကြောင်းမှာ ဤနေရာသည် ကျားစွယ်ဂိုဏ်း၏ ဌာနချုပ်ဖြစ်ပြီး အစောင့်အကြပ်များ အလွန် ထူထပ်လှသောကြောင့်ပင်။

ဤစိမ်းသက်သော ကျင့်ကြံသူသည် မည်သို့သောနည်းဖြင့် ဤနေရာအတွင်းသို့ ဝင်ရောက်လာနိုင်သနည်း။ ထို့ပြင် ထိုသူ စကားမပြောမီအထိ သူတို့ မည်သူမျှ တစ်စုံတစ်ရာကိုမျှ အာရုံမခံမိခဲ့ကြပေ။

အကယ်၍ ထိုသူသာ လုပ်ကြံသတ်ဖြတ်သူ ဖြစ်ပါက သူတို့မှာ ဘာမှမသိလိုက်ဘဲ အသက်ပျောက်သွားရမည်မှာ အမှန်ပင်။

စင်စစ် ဤသည်မှာ ပြီးပြည့်စုံသောအဆင့် ရှိသည့် အရှိန်အဝါဖျောက်အင်း၏ စွမ်းအားပင် ဖြစ်သည်။

၎င်းက ကျန်းဖန်၏ အရှိန်အဝါကို လုံးဝ ပျောက်ကွယ်သွားစေပြီး လူအများ၏ အာရုံစိုက်မှုမှ ကင်းလွတ်စေကာ သဘာဝနှင့် တစ်သားတည်း ဖြစ်နေစေသည်။

ထို့ကြောင့် ကျင့်ကြံသူတစ်ဦး၏ ဝိညာဉ်အာရုံဖြင့်ပင် သူ၏တည်ရှိမှုကို မည်သို့မျှ မသိရှိနိုင်ဘဲ ကိုယ်ပျောက်နေသကဲ့သို့ ဖြစ်နေခြင်း ဖြစ်သည်။ ထိုစွမ်းအားကြောင့်ပင် ကျန်းဖန်သည် ကျားစွယ်ဂိုဏ်း ဌာနချုပ်အတွင်းသို့ မည်သူမျှ မသိအောင် တိတ်တဆိတ် ဝင်ရောက်လာနိုင်ခဲ့ခြင်းပင်။

လီဟူ၏ မျက်နှာမှာ အလွန်ပင် ခက်ထန်သွားပြီး ကျန်းဖန်ကို စူးစိုက်ကြည့်ကာ -

"မင်းက... ဘယ်သူလဲ" ဟု မေးလိုက်သည်။

လီဟူသည် စိတ်ထဲမှ အမျိုးမျိုး တွေးတောနေမိသည်။ ထိုလူငယ်မှာ သူ၏ ရန်ဘက်ဂိုဏ်းများမှ စေလွှတ်လိုက်သူဟု သူ ယူဆနေ၏။ မဟုတ်ပါက ဤမျှ သတ္တိရှိရန်မှာ မဖြစ်နိုင်ပေ။

'ချီ' ကျင့်ကြံခြင်း အဆင့် (၉) ရှိသော ကျင့်ကြံသူတစ်ဦး ဖြစ်နေလျှင်ပင် ကျားစွယ်ဂိုဏ်းသား အမြောက်အမြားနှင့် ရင်ဆိုင်ရပါက သေတွင်းထဲသို့ ဆင်းသည်နှင့် တူနေမည် မဟုတ်ပါလား။

"ဂိုဏ်းချုပ်... ဒီကောင်လေးက ဘယ်သူပဲဖြစ်ဖြစ် ငါတို့ ကျားစွယ်ဂိုဏ်းမှာ လာပြီး ပြဿနာရှာနေတာဆိုတော့ သူ သေရမှာပဲ"

"ဟုတ်တယ်... ဘယ်ကလာတဲ့ ခွေးလေခွေးလွင့်မှန်းမသိဘူး၊ သေချင်ဇောတက်နေတာပဲ"

"ဟွမ်နိုင်းတို့ကို သတ်ရဲတယ်ဆိုမှတော့ မင်းရဲ့ အသက်နဲ့ ပြန်ပေးဆပ်ရလိမ့်မယ်"

ကျားစွယ်ဂိုဏ်းသားများသည် သတ်ဖြတ်လိုသော အရှိန်အဝါများဖြင့် ပြည့်နှက်နေကြသည်။

သူတို့သည် မိမိတို့၏ တံခါးဝအထိ လာရောက်စိန်ခေါ်သူကို မည်သို့မျှ သည်းမခံနိုင်ကြပေ။ ထို့ကြောင့် တစ်ဦးပြီးတစ်ဦး ရှေ့သို့ ထွက်လာကာ ကျန်းဖန်ကို တိုက်ခိုက်ရန် ပြင်ဆင်လိုက်ကြတော့သည်။

"နားညည်းလိုက်တာ"

"ငါ့ကို ရန်မူဖို့ ဘယ်သူက ခွင့်ပြုထားလို့လဲ"

ကျန်းဖန်သည် ဂိုဏ်းချုပ် လီဟူ အပါအဝင် အမာခံဂိုဏ်းသား စုစုပေါင်း ၁၅ ဦးကို တည်ငြိမ်စွာ ကြည့်လိုက်သည်။

ကျားစွယ်ဂိုဏ်းတွင် ကျင့်ကြံသူ တစ်ရာကျော် ရှိသော်လည်း အများစုမှာ အခြားနေရာများသို့ ရောက်ရှိနေကြပြီး ဤ ၁၅ ဦးမှာ ဂိုဏ်း၏ အစွမ်းထက်ဆုံး အဆင့်နှောင်းပိုင်း ကျင့်ကြံသူများ ဖြစ်ကြသည်။ အကယ်၍ ဤလူအားလုံး သေဆုံးသွားပါက ကျားစွယ်ဂိုဏ်းမှာလည်း ပျက်စီးသွားသည်ဟု ဆိုရပေလိမ့်မည်။

ဝုန်း…

ထိုခဏတွင် ကျန်းဖန်သည် သူ၏ အသက်သွေးကြောအင်း ဖြစ်သော ကိုယ်ဟန်ချုပ်အင်းကို ချက်ချင်း နှိုးဆွလိုက်သည်။

မြင်နိုင်စွမ်းမရှိသော လေဓာတ် ဝိညာဉ်စွမ်းအားများသည် ကြိုးများအသွင်သို့ ပြောင်းလဲသွားပြီး ကျားစွယ်ဂိုဏ်းသားများဆီသို့ ချက်ချင်း တိုးဝင်သွားတော့သည်။

မျက်တောင်တစ်ခတ် အတွင်းမှာပင် ထိုကျင့်ကြံသူများမှာ ဘာမှမလုပ်နိုင်တော့ဘဲ တစ်ကိုယ်လုံး မလှုပ်နိုင်အောင် အချည်ခံလိုက်ရသကဲ့သို့ ဖြစ်သွားကြတော့၏။

"ဒါ... ဒါ ဘယ်လိုဖြစ်တာလဲ"

လီဟူနှင့် အခြားသူများမှာ အလွန်တရာ မှင်တက်သွားကြရသည်။ သူတို့သည် ဝိညာဉ်လက်နက်များကို အသုံးပြုကာ တိုက်ခိုက်ရန် ပြင်ဆင်နေကြသော်လည်း ရုတ်တရက် သူတို့၏ ခန္ဓာကိုယ်များမှာ ကျောက်ရုပ်ကဲ့သို့ ငြိမ်သက်သွားခဲ့ရသည်။ သူတို့ ကိုယ်တွင်းရှိ ဝိညာဉ်စွမ်းအားများကို မည်မျှပင် နှိုးဆွစေကာမူ ခန္ဓာကိုယ်မှာ လုံးဝ လှုပ်ရှား၍ မရတော့ပေ။

"ဒါက ကိုယ်ဟန်ချုပ်အင်း ရဲ့ စွမ်းအားပဲ"

"ဒါပေမဲ့ သာမန် ကိုယ်ဟန်ချုပ်အင်းက ဘယ်လိုလုပ် ဒီလောက်အစွမ်းထက်နိုင်ရတာလဲ" ဟု လီဟူ၏ မျက်နှာမှာ အလွန်ပင် ပျက်ယွင်းသွားတော့သည်။

ရန်သူမှာ တစ်ဦးတည်းသာ ဖြစ်သော်လည်း သူတို့အနေဖြင့် အဆင့် (၂) မိစ္ဆာသားရဲကြီး တစ်ကောင်နှင့် ရင်ဆိုင်နေရသကဲ့သို့ ခံစားနေရသည်။ ရန်သူမှာ အနည်းငယ်မျှ လှုပ်ရှားလိုက်ရုံဖြင့် သူတို့အားလုံးကို သတ်ဖြတ်နိုင်စွမ်း ရှိနေသည် မဟုတ်ပါလား။

"ခုနက မင်းတို့ ပြောနေတဲ့ 'လင်းရှီးလျှို့ဝှက်နယ်မြေ' အကြောင်းကို ငါ စိတ်ဝင်စားတယ်"

"အဲဒီအကြောင်းကို အသေးစိတ် ပြောပြစမ်း။ ငါ ကျေနပ်မယ်ဆိုရင် မင်းတို့ကို အသက်ချမ်းသာခွင့် ပေးကောင်း ပေးနိုင်လိမ့်မယ်" ဟု ကျန်းဖန်က တိုက်ရိုက်ပင် ပြောလိုက်သည်။

အကယ်၍ သူသာ ထိုလျှို့ဝှက်နယ်မြေ အတွင်းသို့ ဝင်ရောက်ကာ ရှာဖွေနိုင်မည်ဆိုလျှင် သူနှင့် စုဝေဝေတို့ နှစ်ဦးစလုံး၏ အုတ်မြစ်တည်ဆောက်ခြင်း အဆင့် အတွက် လိုအပ်သည့် အရင်းအမြစ်များမှာ တစ်ခါတည်း ပြည့်စုံသွားပေလိမ့်မည်။

ထိုအခါ လီဟူ၏ မျက်လုံးများမှာ တောက်ပလာပြီး အသက်ရှင်ရန် အခွင့်အရေး ရပြီဟု ယူဆကာ -

"ကျွန်တော် လင်းရှီးလျှို့ဝှက်နယ်မြေ အကြောင်းကို ပြောပြနိုင်ပါတယ်။ ဒါပေမဲ့ အရင်ဆုံး ကျွန်တော်တို့ရဲ့ အသက်ကို ချမ်းသာပေးမယ်လို့ အဓိဋ္ဌာန်ပြုပေးပါ၊ ဒါမှ ကျွန်တော် ပြောပြမယ်" ဟု ပြန်လည် စျေးဆစ်လာခဲ့သည်။

သူသည် မိမိထံ၌ အဖိုးတန်သတင်းအချက်အလက် ရှိနေသဖြင့် ရန်သူနှင့် စျေးဆစ်နိုင်မည်ဟု ထင်မှတ်နေခဲ့ခြင်း ဖြစ်သည်။ သို့သော် ကျန်းဖန်ကမူ -

"အဓိဋ္ဌာန်ပြုပေးရမယ် ဟုတ်လား"

"မင်းတို့ကိုယ်မင်းတို့ အထင်ကြီးလွန်းနေပြီပဲ"

"အခု ငါ အဲဒီလျှို့ဝှက်နယ်မြေ အကြောင်းကို စိတ်မဝင်စားတော့ဘူး"

"မင်းတို့ အားလုံး သေရတော့မယ်"

ကျန်းဖန်သည် အေးစက်စွာ ပြောဆိုလိုက်ရင်း သူ၏ မြွေပျံကျင့်စဉ်ကို လည်ပတ်စေလိုက်သည်။ သူ၏ ခန္ဓာကိုယ်ရှိ ကြွက်သားတိုင်းမှ မြွေပျံအင်းစာလုံးများမှာ တုန်ခါလာပြီး ကောင်းကင်နှင့် မြေကြီး၏ ဝိညာဉ်စွမ်းအားများနှင့် ပဲ့တင်ထပ်လာတော့သည်။

သူ၏ လက်ဝါးကို ရိုက်ချလိုက်သောအခါ လေထုအတွင်း၌ မြွေပျံကြီးတစ်ကောင် ပေါ်ထွက်လာသကဲ့သို့ ဝိညာဉ်စွမ်းအား လက်ဝါးကြီးတစ်ခုမှာ ပြင်းထန်သော ဖိအားများနှင့်အတူ ကျဆင်းလာခဲ့၏။

"မလုပ်ပါနဲ့..."

"အကြီးအကဲ... အဓိဋ္ဌာန်ပြုစရာ မလိုတော့ပါဘူး။ ကျွန်တော်တို့ အကုန်ပြောပြပါ့မယ်"

လီဟူနှင့် အခြားသူများမှာ အသက်အန္တရာယ်ကို အလွန်အမင်း ကြောက်ရွံ့သွားကြသဖြင့် အော်ဟစ်တောင်းပန်ကြတော့သည်။

ဤလျှို့ဝှက်ကျင့်ကြံသူသည် ဤမျှအထိ ရက်စက်လိမ့်မည်ဟု သူတို့ မထင်ထားခဲ့ပေ။ စျေးဆစ်သည်ကို လက်မခံရုံတင်မကဘဲ ချက်ချင်း သတ်ဖြတ်ရန် ကြိုးစားနေခြင်းပင်။ သို့သော် အရာအားလုံးမှာ နောက်ကျသွားခဲ့ပြီ ဖြစ်သည်။

ကျန်းဖန်သည် သူတို့အား အသက်ရှင်ရန် အခွင့်အရေးကို တစ်ကြိမ်သာ ပေးခဲ့ခြင်း ဖြစ်သည် မဟုတ်ပါလား။

……

အခန်း (၂၃၈) - ခြိမ်းခြောက်မှုများကို ဖယ်ရှားခြင်းနှင့် ဆဋ္ဌမအဆင့် အခွင့်အရေးကို ရရှိခြင်း (အပိုင်း ၂)

အကယ်၍ သူတို့သာ လင်းရှီးလျှို့ဝှက်နယ်မြေ အကြောင်းကို ရိုးရိုးသားသား ပြောပြခဲ့လျှင် အသက်ရှင်ရန် အခွင့်အရေး ရှိကောင်းရှိနိုင်ပါသေးသည်။ သို့သော် ယခုမူ သူတို့တွင် မည်သည့် အခွင့်အရေးမျှ မရှိတော့ပေ။

ဝုန်း…

လက်ဝါးတစ်ချက် ရိုက်ချလိုက်ရုံမျှဖြင့် ဟိန်းဟောက်သံနှင့်အတူ မြွေပျံတစ်ကောင် ပေါ်ထွက်လာပြီး ရှေးဟောင်းသားရဲကြီး တစ်ကောင်၏ ရက်စက်ကြမ်းကြုတ်မှုကို ထုတ်ဖော်ပြသလိုက်သည်။ ထိုအခါ မြင်နိုင်စွမ်းမရှိသော ဖိအားကြီးတစ်ခု ကျဆင်းလာကာ လီဟူနှင့် အခြားသူများကို ပြင်းထန်စွာ ရိုက်ခတ်သွားတော့၏။

နောက်တစ်စက္ကန့်တွင်တော့ သူတို့၏ ဦးခေါင်းနှင့် ခန္ဓာကိုယ်များသည် ထိုဖျက်ဆီးအားကို မခံနိုင်တော့ဘဲ တစ်စစီ ပေါက်ကွဲထွက်သွားကာ သွေးပုံ၊ အသားပုံများအဖြစ် ပြောင်းလဲသွားခဲ့ရသည်။ သူတို့သည် ရုန်းကန်ရန် အခွင့်အရေးပင် မရလိုက်ဘဲ ကျန်းဖန်၏ ရိုက်သတ်ခြင်းကို ခံလိုက်ရခြင်း ဖြစ်သည်။

ခန်းမဆောင် တစ်ခုလုံးမှာလည်း သွေးစွန်းမှုများဖြင့် ပြည့်နှက်သွားတော့၏။ ဂိုဏ်းချုပ် အပါအဝင် ကျားစွယ်ဂိုဏ်းမှ အမာခံ ၁၀ ဦးကျော်မှာ ကျန်းဖန်၏လက်ချက်ဖြင့် ရက်စက်စွာ အသတ်ခံလိုက်ရချေပြီ။

"ဒါက အဆင့် (၁) အထွတ်အထိပ် ကိုယ်ကာယကျင့်ကြံသူရဲ့ စွမ်းအားပဲ"

"လက်ဗလာနဲ့တင် သာမန်ကျင့်ကြံသူတွေကို အမှုန့်ကြိတ်လို့ရနေပြီ"

ကျန်းဖန်သည် သူ၏ လက်သီးကို ကျစ်ကျစ်ပါအောင် ဆုပ်လိုက်ရင်း မိမိကိုယ်တွင်းရှိ လွှမ်းမိုးနိုင်စွမ်းရှိသော စွမ်းအားများကို ခံစားလိုက်မိသည်။

ယခင်က သူသည် ရန်သူကို တိုက်ခိုက်ရန် အင်းများကိုသာ အားကိုးခဲ့ရသော်လည်း ယခုမူ အခြေအနေမှာ ကွဲပြားသွားခဲ့ပြီ။ မြွေပျံကျင့်စဉ်ကို အဆင့်မြှင့်တင်ပြီးနောက် သူ၏ ကိုယ်ကာယစွမ်းအားမှာ အဆမတန် တိုးတက်လာခဲ့ခြင်း ဖြစ်သည်။

ဤသည်မှာ သာမန် ကိုယ်ကာယကျင့်ကြံသူ တစ်ဦး၏ စွမ်းအားမျိုးတင် မဟုတ်ဘဲ မြွေပျံအင်းစာလုံးများကြောင့် ကောင်းကင်နှင့် မြေကြီး၏ ဝိညာဉ်စွမ်းအားများကိုပါ နှိုးဆွနိုင်ခြင်းကြောင့် ဖြစ်ကြောင်း သူ ရိပ်မိလိုက်သည်။

အကယ်၍ ဤကျင့်စဉ်ကို ဆက်လက် အားထုတ်ပါက နောင်တွင် 'သွေးသားထူးကဲစွမ်းရည်' များအဖြစ်သို့ပင် ပြောင်းလဲသွားနိုင်ပေလိမ့်မည်။

ကျန်းဖန်သည် အချိန်ဆွဲမနေတော့ဘဲ လီဟူနှင့် အခြားသူများ၏ ဝိညာဉ်သိုလှောင်အိတ်များကို သိမ်းဆည်းလိုက်သည်။

ကျားစွယ်ဂိုဏ်းမှာ လေလွင့်ဂိုဏ်းတစ်ခုမျှသာ ဖြစ်သဖြင့် သူတို့၏ ရတနာအားလုံးမှာ ထိုအိတ်များထဲ၌သာ ရှိနေတတ်ခြင်းက ကျန်းဖန်အတွက် ပို၍ အဆင်ပြေသွားစေသည်။ ကိစ္စများ အားလုံးပြီးစီးသောအခါ ကျန်းဖန်သည် ထိုနေရာမှ တိတ်တဆိတ် ထွက်ခွာခဲ့တော့သည်။

သိပ်မကြာမီမှာပင် အခြားသော ကျားစွယ်ဂိုဏ်းသားတစ်ဖွဲ့ ရောက်ရှိလာခဲ့သည်။

သူတို့သည် မိမိတို့ ရရှိထားသော အကျိုးအမြတ်များကို ဂိုဏ်းချုပ်အား သတင်းပို့ရန် စိတ်လှုပ်ရှားစွာ ဝင်ရောက်လာကြခြင်း ဖြစ်သော်လည်း ခန်းမအတွင်းရှိ မြင်ကွင်းကြောင့် မျက်နှာများမှာ ချက်ချင်း ပြာနှမ်းသွားကြ၏။

"ဘာတွေဖြစ်ကုန်တာလဲ။ ဂိုဏ်းချုပ်တို့ ဘယ်ရောက်ကုန်ပြီလဲ"

"မင်း မမြင်ဘူးလား။ သူတို့က သွေးပုံအသားပုံတွေ ဖြစ်ကုန်ပြီလေ"

"ဘယ်သူက ဂိုဏ်းချုပ်တို့ကို သတ်ရဲတာလဲ"

ဂိုဏ်းသားများမှာ ကြောက်ရွံ့စိတ်ဖြင့် ကျောရိုးထဲအထိ စိမ့်သွားကြတော့သည်။ ဂိုဏ်းချုပ်ကို အေးအေးဆေးဆေး သတ်ဖြတ်နိုင်သူမှာ အုတ်မြစ်တည်ဆောက်ခြင်း အဆင့် ကျင့်ကြံသူတစ်ဦး ဖြစ်ရမည်ဟု သူတို့ ယူဆလိုက်ကြ၏။

"သစ်ပင်လဲလျှင် မျောက်များ ပျံ့လွင့်ကုန်သည်" ဟူသော စကားအတိုင်း လီဟူ သေဆုံးသွားသည်နှင့် ကျားစွယ်ဂိုဏ်းသားများမှာလည်း ရန်သူ၏ သတ်ဖြတ်ခြင်းကို မခံရမီ အသက်လုကာ အသီးသီး ထွက်ပြေးသွားကြတော့သည်။

ဤသို့ဖြင့် ဆင်းရဲသားရပ်ကွက်ရှိ နာမည်ကြီး ဂိုဏ်းကြီးတစ်ခုမှာ လုံးဝ ကွယ်ပျောက်သွားခဲ့ရလေပြီ။

ကျန်းဖန် အိမ်သို့ ပြန်ရောက်သောအခါ သူ၏ အသိစိတ်အာရုံထဲသို့ သတင်းစကားတစ်ခု စီးဝင်လာပြန်သည်။

"သင်သည် လီဟူနှင့် အခြားသူများကို သတ်ဖြတ်ကာ ကျားစွယ်ဂိုဏ်းကို အမြစ်ပြတ် သုတ်သင်နိုင်ခဲ့သည်။ နောင်တွင် ကျရောက်လာမည့် ခြိမ်းခြောက်မှုကို ကြိုတင် ဖယ်ရှားနိုင်ခဲ့သည့် အတွက် သင်သည် ကံကောင်းခြင်းအမှတ် ခုနစ်ထောင်နှင့် ဆဋ္ဌမအဆင့် အခွင့်အရေးတစ်ခုကို ရရှိသည်။"

ကျန်းဖန်သည် သူ၏ ကံကြမ္မာအရှိန်အဝါများ သိသိသာသာ တိုးတက်လာသည်ကို ခံစားလိုက်ရသည်။ သူ၏ ကံကောင်းခြင်းအမှတ် စုစုပေါင်းမှာ ယခုအခါ နှစ်သောင်း (၂၀,၀၀၀) တိတိ ရှိသွားပြီဖြစ်ရာ သူသည် သူဌေးကြီးတစ်ဦး ဖြစ်သွားသကဲ့သို့ ခံစားလိုက်ရ၏။

"ဪ... ဆဋ္ဌမအဆင့် အခွင့်အရေးလည်း ပါသေးတာပဲ"

ကျန်းဖန်သည် ထိုအခွင့်အရေးကို စစ်ဆေးကြည့်လိုက်ရာ -

"ခုနစ်ရက်အကြာ နေဝင်ရီတရော အချိန်တွင် 'ဝိညာဉ်စမ်းချောင်းချိုင့်ဝှမ်း'၏ အရှေ့မြောက်ဘက် ၁၂ မိုင်အကွာ၌ သင်သည် ဆဋ္ဌမအဆင့် အခွင့်အရေး တစ်ခုကို ရရှိလိမ့်မည်" ဟု သိလိုက်ရသည်။

'ဝိညာဉ်စမ်းချောင်းချိုင့်ဝှမ်း' ဆိုသည်မှာ လင်းရှီးလျှို့ဝှက်နယ်မြေ နှင့် ဆက်စပ်နေနိုင်ကြောင်း သူ ရိပ်မိလိုက်သည်။

အစက ထိုနေရာသို့ မသွားရန် စဉ်းစားခဲ့သော်လည်း ၎င်းမှာ "ဆဋ္ဌမအဆင့် အခွင့်အရေး" ဖြစ်နေသဖြင့် အန္တရာယ်ရှိသော်လည်း ဘေးကင်းမည်မှာ သေချာလှသည်။ ထို့ကြောင့် သူ ပါဝင်ဆင်နွှဲရန် ဆုံးဖြတ်လိုက်တော့သည်။

ကျန်းဖန် အိမ်ထဲသို့ ပြန်ဝင်လာသောအခါ စုဝေဝေက ဝိုင်းစက်သော မျက်လုံးလေးများဖြင့် ကြည့်ကာ -

"ယောကျာ်း... ကိစ္စတွေ ပြီးသွားပြီလား" ဟု မေးလိုက်သည်။

"အင်း... အခုကစပြီး ကျားစွယ်ဂိုဏ်းဆိုတာ မရှိတော့ဘူး" ဟု ကျန်းဖန်က ခေါင်းညိတ်ပြလိုက်၏။

စုဝေဝေမှာ ပို၍ပင် အံ့အားသင့်သွားရသည်။

ကျားစွယ်ဂိုဏ်းကဲ့သို့သော အင်အားစုကြီးကို သူမခင်ပွန်းက ဤမျှတိုတောင်းလှသော အချိန်အတွင်း အပြတ်ရှင်းနိုင်လိမ့်မည်ဟု သူမ မထင်ထားခဲ့ပေ။ သူမသည် ကျန်းဖန်ကို အလွန်ပင် အထင်ကြီးလေးစားသွားကာ -

"ယောကျာ်းက တကယ်ကို တော်တာပဲနော်" ဟု ချီးကျူးလိုက်မိသည်။

"ဪ... ဒီလောက်ကြီးမားတဲ့ ပြဿနာကို ဖြေရှင်းပေးလိုက်တာဆိုတော့ ငါ့အတွက် ဆုလာဘ် တစ်ခုခု မရှိဘူးလား" ထိုသို့ ပြောဆိုကာ ကျန်းဖန်သည် စုဝေဝေ၏ သေးကျဉ်သော ခါးလေးကို ဆွဲဖက်လိုက်တော့သည်။

'ချီ' ကျင့်ကြံခြင်း အဆင့် (၆) သို့ ရောက်ရှိသွားသော စုဝေဝေမှာ ယခင်ကထက် ပိုမိုလှပကာ ဆွဲဆောင်မှု ရှိလာခဲ့ချေပြီ။ သူမ၏ ပြုံးယောင်သန်းနေသော မျက်နှာလေးနှင့် ဆွဲဆောင်မှုရှိသော ကိုယ်လုံးလေးမှာ ကျန်းဖန်ကို ကြည့်နေရင်းနှင့်ပင် ရင်ခုန်သွားစေ၏။

"ယောကျာ်း... ယောကျာ်း လုပ်ချင်တာ လုပ်နိုင်ပါတယ်" ဟု စုဝေဝေက မျက်တောင်လေးများ ပုတ်ခတ်ပုတ်ခတ် လုပ်ကာ တိုးတိုးလေး ပြောလိုက်သည်။

ထိုစကားကို ကြားသောအခါ ကျန်းဖန်သည် မအောင့်နိုင်တော့ဘဲ စုဝေဝေကို ပွေ့ချီကာ အိပ်ခန်းအတွင်းသို့ ဝင်ရောက်သွားလေတော့သည်။

မကြာမီမှာပင် အိပ်ခန်းအတွင်းမှ ကြည်နူးစရာ ကောင်းလှသော အသံများ ထွက်ပေါ်လာခဲ့တော့၏...။