အလုံးအရင်းဖြင့် ထိုးစစ် ဆင်ရန် စစ်ဗျူဟာမြေပုံ

"လူသားမျိုးနွယ်အပေါ် သစ္စာဖောက်တဲ့ အဲဒီမိစ္ဆာကောင်တွေကို အသေသတ်ရမယ်”

ဝေကျုံးယွမ်သည် ရာထူးအဆင့်အတန်း မြင့်မားလှသော ပုဂ္ဂိုလ်ကြီးများစွာ၏ ရှေ့မှောက်၌ ရောက်နေသည်ကိုပင် ဂရုမထားနိုင်တော့ဘဲ ဒေါသတကြီး ကျိန်ဆဲလိုက်

မိသည်။

ယခုမှပင် ဝေကျုံးယွမ်တစ်ယောက် ဤမျှလောက်သော အင်အားကြီးများကို ဘာကြောင့် စုစည်းထားရသလဲဆိုသည်ကို အပြည့်အဝ နားလည်သွားတော့သည်။

အခြားသူများနည်းတူ သူလည်းပဲ မိစ္ဆာကျင့်ကြံသူများအနေဖြင့် ဘာကြောင့် ထိုလုပ်ရပ်ကို လုပ်ရသည်ကို နားမလည်နိုင်အောင် ဖြစ်နေရသည်။

အကယ်၍ မိစ္ဆာကျင့်ကြံသူများသည် ဤသားရဲလှိုင်းလုံးကြီးကိုသာ ထပ်ပြီး ကူညီနေမည်ဆိုလျှင် စိုးရိမ်ရမှာက ကောင်းကင်အင်ပါယာ တစ်ခုတည်း မဟုတ်တော့ပေ။ ထိုမိစ္ဆာကျင့်ကြံသူများ ကိုယ်တိုင်ပင်လျှင် အန္တရာယ်နှင့် ရင်ဆိုင်ရလိမ့်မည် ဖြစ်သည်။

နောက်ဆုံးတော့ သူတို့သည်လည်း အများသူငါ မသိအောင် ပုန်းလျှိုးကွယ်လျှိုး နေထိုင်ကြရသည်မှလွဲ၍ ဤအင်ပါယာကြီးအတွင်းမှာပင် မှီတင်းနေထိုင်ကြသူများ မဟုတ်ပါလော။

ထို့ကြောင့် မိစ္ဆာကျင့်ကြံသူများသာ အဆင်အခြင်မဲ့ ရှေ့တိုးလာမည်ဆိုပါက ၎င်းသည် တရားသော ကျင့်ကြံသူများအတွက်သာ ပျက်သုဉ်းခြင်းဖြစ်မည်မဟုတ်ဘဲ သူတို့ကိုယ်တိုင်အတွက်လည်း သေတွင်းတူးခြင်းသာ ဖြစ်ပေလိမ့်မည်။

သို့သော်လည်း လူသားဆန်မှုကို စွန့်လွှတ်ခဲ့သည်မှာ ကြာပြီဖြစ်သော ထိုသူတို့၏ စဉ်းစားတွေးခေါ်ပုံကို နားလည်အောင် ကြိုးစားနေခြင်းက အပိုအလုပ်သာ ဖြစ်ပေသည်။

"အခြေအနေကို မင်းသိသွားပြီဆိုတော့... ငါတို့ရဲ့ အင်အားအားလုံးကို သားရဲလှိုင်းလုံးကြီးထဲ တိုက်ရိုက်ပုံအောပြီး မလွှတ်နိုင်ဘူးဆိုတာကိုလည်း မင်းနားလည်မှာပါ"

ရှုယုချန်းက ပြောလိုက်သည်။

ဝေကျုံးယွမ် ခေါင်းငြိမ့်လိုက်သည်။ အစကတော့ သူသည် ရှိသမျှလူအကုန်လုံးကိုသာ တစ်ပြိုင်နက်တည်း လွှတ်လိုက်လျှင် သားရဲလှိုင်းလုံးကြီးသည် ရက်ပိုင်းအတွင်းမှာပင် ပြီးဆုံးသွားလိမ့်မည်ဟု ထင်မှတ်ခဲ့ခြင်းဖြစ်သည်။

သို့သော် မိစ္ဆာကျင့်ကြံသူများ ပါဝင်ပတ်သက်နေပြီဆိုလျှင်မူ ထိုသို့လုပ်ရန်မှာ မဖြစ်နိုင်တော့ပေ။

သူတို့သည် မိစ္ဆာကျင့်ကြံသူများကို သတိထားစောင့်ကြည့်ရမည် ဖြစ်ပြီး အထူးသဖြင့် အင်မော်တယ်ရှိသူများကို ရင်ဆိုင်နိုင်ရန်အတွက် သူတို့၏ အင်အားအများစုကို အဆင်သင့် ပြင်ထားရမည်ဖြစ်သည်။

ယခုရောက်ရှိနေသော အင်အားစုတွင် အင်မော်တယ်အဆင့် ကျင့်ကြံသူ ၂၅ ဦး ပါဝင်ရာ အင်မော်တယ် တက်လှမ်းခြင်းအဆင့်၁၈ ဦးနှင့် မြေကမ္ဘာအင်မော်တယ်

အဆင့် ၇ ဦးတို့ ဖြစ်ကြသည်။

ထိုသူများသည် အင်မော်တယ်အဆင့် မိစ္ဆာသားရဲများ သို့မဟုတ် မိစ္ဆာကျင့်ကြံသူများ ကိုယ်တိုင် ပေါ်ထွက်လာသည်အထိ အရန်အင်အားအဖြစ် ထိန်းထားရမည့်သူများ ဖြစ်သည်။

မိစ္ဆာကျင့်ကြံသူများကို လျှော့တွက်၍ မရပေ။

အကယ်၍ သူတို့သည် တပ်ဖွဲ့အားလုံးကို သားရဲလှိုင်းလုံးထဲသို့သာ စေလွှတ်လိုက်မည်ဆိုပါက သားရဲများနှင့် လုံးထွေးနေချိန်ကို အခွင့်ကောင်းယူကာ မိစ္ဆာကျင့်ကြံသူများက ဝင်ရောက်တိုက်ခိုက်လာနိုင်သည့် အခွင့်အရေး အလွန်များနေသည်။

သို့သော်လည်း ဤမျှကြီးမားသော ပူးပေါင်းအင်အားစုကြီးကို စုစည်းထားနိုင်ပြီဖြစ်သဖြင့် ကြောက်ရွံ့ခြင်းဟူသည်မှာတော့ မည်သူ့စိတ်ထဲတွင်မှ မရှိတော့ပေ။

လူအများစုကမူ ဤအခြေအနေကို အင်ပါယာအတွင်းရှိ မိစ္ဆာကျင့်ကြံသူအားလုံးကို တစ်ပါတည်း အမြစ်ဖြတ်သုတ်သင်ပစ်ရန် အကောင်းဆုံးအခွင့်အရေးအဖြစ်ပင် ရှုမြင်နေကြသည်။

"ကဲ... ဒါဆိုရင် ငါတို့အင်ပါယာကို ခြိမ်းခြောက်နေတဲ့ အန္တရာယ်နှစ်ခုလုံးကို ဘယ်လိုရင်ဆိုင်မလဲဆိုတဲ့ ဗျူဟာကို စပြီး ဆွေးနွေးကြမလား" ရှုယုချန်းက ပြောလိုက်

သည်။

လူတိုင်းသည် ငြိမ်သက်နေကြပြီး မည်သူကမျှ ရှေ့ထွက်၍ အဖြေမပေးရဲကြပေ။ အကယ်၍သာ မိမိတင်ပြလိုက်သော ဗျူဟာသည် မပြည့်စုံဘဲ အလွဲအချော်ဖြစ်သွားခဲ့လျှင် ဤနေရာတွင် ရောက်ရှိနေသည့် ခေါင်းဆောင်ကြီးအားလုံး၏ ကဲ့ရဲ့ပြစ်တင်မှုကို ခံရနိုင်သောကြောင့်ဖြစ်သည်။

ဝေကျုံးယွမ်သည် အသက်ကို ဝဝရှူလိုက်ပြီးနောက် ခိုင်မာသောလေသံဖြင့် ပြောလိုက်

သည်။

"စစ်သူကြီး... ကျွန်တော့်မှာ အကြံပြုချက်တစ်ခု ရှိပါတယ်"

ရှုယုချန်းသည် သူ၏အကြည့်ကို ဝေကျုံးယွမ်ထံသို့ လွှဲလိုက်သည်။

ဘေးပတ်ဝန်းကျင်ရှိ မျိုးနွယ်စုခေါင်းဆောင်များ၊ ဂိုဏ်းချုပ်များနှင့် စစ်သူကြီးများအားလုံးလည်း တိတ်ဆိတ်သွားကြသည်။

ဝေကျုံးယွမ်သည် ဤရှေ့တန်းစစ်မျက်နှာကို ဆယ်ရက်တိုင်တိုင် ထိန်းထားနိုင်ခဲ့သူဖြစ်ရာ သူ၏အတွေ့အကြုံနှင့် အမြင်မှာ အလွန်

အရေးကြီးလှပေသည်။

ဝေကျုံးယွမ်သည် သူ၏ချပ်ဝတ်တန်ဆာကို တစ်ချက်ပြန်ပြင်လိုက်ရင်း ဆက်ပြောသည်။

"အခုအချိန်အထိတော့ ကျွန်တော်တို့က တိုက်ခိုက်ပြီး ဆုတ်ခွါတဲ့ ဗျူဟာကိုပဲ သုံးခဲ့ပါတယ်။ တိုက်လိုက်၊ ဆုတ်လိုက်၊ ပြီးရင် ပြန်ဝင်တိုက်လိုက်နဲ့ သားရဲလှိုင်းလုံးရဲ့ အင်အားကို တဖြည်းဖြည်းချင်း လျော့ပါးအောင် လုပ်ပြီး သူတို့ရဲ့ တက်လှမ်းမှုကို ထိန်းချုပ်ထားခဲ့တာပါ"

သူသည် စစ်မြေပြင်ဘက်သို့ လက်ညှိုးညွှန်ပြလိုက်သည်။

"ဒီနည်းလမ်းကပဲ ကျွန်တော်တို့ ဒီလောက်အထိ ကြာရှည်ခံအောင် လုပ်နိုင်ခဲ့တဲ့ တစ်ခုတည်းသော နည်းလမ်းပါ။ ထိပ်တိုက်ရင်ဆိုင်ခဲ့ရင် ကျွန်တော်တို့ အင်အားနဲ့ မခံနိုင်လောက်

ဘူး"

ဝေကျုံးယွမ်၏ မျက်ဝန်းများက စူးရှသွားသည်။

"အစကတော့ ကျွန်တော် ဒီနည်းလမ်းကိုပဲ ဆက်သုံးဖို့ ရည်ရွယ်ထားတာပါ။ မိစ္ဆာသားရဲတွေကို တစ်စစီ အင်အားလျှော့ရင်း သူတို့နောက်ကွယ်မှာ ပုန်းနေတဲ့ မိစ္ဆာကျင့်ကြံသူတွေကို မျှားခေါ်ဖို့ပေါ့" သူက လက်သီးကို တင်းတင်းဆုပ်လိုက်သည်။

"ဒါပေမဲ့ အခုတော့... ဒီလောက်ကြီးမားတဲ့ သင်္ဘောအုပ်စုကြီး ကောင်းကင်ကနေ ဆင်းသက်လာပြီဆိုတော့..."

ထောင်ပေါင်းများစွာသော ပျံသန်းရေးသင်္ဘောကြီးများ လင်းလက်နေသည့် ကောင်းကင်ယံသို့ သူ အမူအရာပြလိုက်သည်။

"...အဲဒီလို ဗျူဟာမျိုးကို သုံးနေဖို့ မလိုတော့ပါဘူး။ ဒီသင်္ဘောအုပ်စုကြီးတွေ ပေါ်လာတဲ့အချိန်မှာပဲ ကျွန်တော်တို့ရဲ့ လျှို့ဝှက်ချက်တွေ အားလုံးက ပျောက်ကွယ်သွားပါပြီ"

ရှုယုချန်းသည် တည်ငြိမ်စွာဖြင့် အလေးအနက် စဉ်းစားနေသည်။

"ကျွန်တော့်အမြင်အရတော့" ဝေကျုံးယွမ်က ဆက်လက်ပြောကြားသည်။ "ရန်သူတွေက ကျွန်တော်တို့ရဲ့ အင်အားအပြည့်အစုံကို မသိနိုင်သေးရင်တောင် သူတို့ကတော့ မျက်စိမကန်းပါဘူး။ ကျွန်တော်တို့ဆီ စစ်ကူတွေ အကြီးအကျယ် ရောက်လာပြီဆိုတာ သူတို့ သိနေပါပြီ"

သူဆိုလိုသည်မှာ မိစ္ဆာကျင့်ကြံသူများနှင့် မိစ္ဆာသားရဲ နှစ်ဖက်လုံးကို ရည်ညွှန်းခြင်း ဖြစ်ပေသည်။

"မိစ္ဆာသားရဲတွေကို ဦးဆောင်နေတဲ့သူမှာ အတိုင်းအတာတစ်ခုအထိ အသိဉာဏ်နဲ့ သတိရှိမှု ရှိနေမှာ အသေအချာပါပဲ"

"ဒါကြောင့် အချိန်ဆွဲပြီး အင်အားလျှော့နေမယ့်အစား... ဘာလို့ အားလုံးကို တစ်ချက်တည်းနဲ့ အပြတ်မတိုက်ထုတ်ပစ်တာလဲ?"

ရှုယုချန်း၏ မျက်ခုံးများ အနည်းငယ် မြင့်တက်သွားသည်။

"အို... ဆက်ပြောပါဦး။"

ဝေကျုံးယွမ်သည် အနည်းငယ် ဦးညွှတ်

လိုက်ပြီးနောက် ပြတ်သားစွာ ကြေညာလိုက်သည်။

"ကျွန်တော်တို့ အလုံးအရင်းနဲ့ ထိုးစစ်ဆင်ကြပါမယ် “

ဘေးပတ်ဝန်းကျင်ရှိ ခေါင်းဆောင်များအားလုံး စိတ်ဝင်တစား ရှေ့သို့ တိုးလာကြသည်။

"ကျွန်တော်တို့အနေနဲ့ အင်မော်တယ်အဆင့် ကျင့်ကြံသူတွေနဲ့ မိစ္ဆာကျင့်ကြံသူတွေကို ရင်ဆိုင်ဖို့ လိုအပ်တဲ့ တပ်ဖွဲ့အချို့ကိုပဲ အရန်အင်အားအဖြစ် ချန်ထားရပါမယ်။ ကျန်တဲ့သူတွေ အားလုံးကတော့ အင်အားနဲ့ သားရဲလှိုင်းလုံးကြီးထဲကို ထိုးဖောက်ဝင်ရောက် တိုက်ခိုက်ရမှာပါ"

သူသည် သားရဲလှိုင်းလုံးကြီးက သက်ရှိမုန်တိုင်းတစ်ခုကဲ့သို့ ဟိန်းဟောက်နေသည့် မြောက်ဘက်အရပ်ဆီသို့ ညွှန်ပြလိုက်သည်။

"ဒီသားရဲတွေက ကျွန်တော်တို့ရဲ့ နှေးကွေးပြီး သတိကြီးလွန်းတဲ့ တိုက်ခိုက်မှုတွေကို ယဉ်ပါးနေကြပါပြီ။ အခုလို ရုတ်တရက် အပြောင်းအလဲလုပ်ပြီး အင်အားအကုန်သုံးပြီး ထိုးစစ်ဆင်လိုက်မယ်ဆိုရင် သူတို့ လုံးဝ မျှော်လင့်ထားမှာ မဟုတ်ပါဘူး"

ဝေကျုံးယွမ်၏ လေသံက ပို၍ မာထန်လာသည်။

"အကောင်းဆုံးအခြေအနေမှာတော့ မိစ္ဆာကျင့်ကြံသူတွေ ဝင်မပါလာနိုင်ခင်မှာပဲ ကျွန်တော်တို့ မိစ္ဆာသားရဲတွေကို အမြစ်ပြတ် သုတ်သင်နိုင်ပါလိမ့်မယ်။ အဆိုးဆုံး အခြေအနေမှာတောင်မှ သူတို့ကို အကြီးအကျယ် ထိခိုက်အောင် လုပ်နိုင်ပါသေးတယ်"

ရှုယုချန်းသည် အလေးအနက် စဉ်းစားခန်း ဝင်သွားတော့သည်။

ဤမျှလောက်သော အင်အားစုကြီးကို စုစည်းထားသည့်အချိန်တွင် ရှုပ်ထွေးလှသော စစ်ဗျူဟာများမှာ မဖြစ်နိုင်တော့ပေ။

အင်အားကြီး အဖွဲ့အစည်းအသီးသီးမှ ထောင်ပေါင်းများစွာသော ထိပ်တန်းကျင့်ကြံသူများကို နူးညံ့သိမ်မွေ့သော စစ်ကစားကွက်များဖြင့် ပေါင်းစပ်ညှိနှိုင်းရန်မှာ ခက်ခဲလှသည်။ ရှင်းလင်းလွယ်ကူခြင်းကသာ အစွမ်းအထက်ဆုံး ဖြစ်ပေလိမ့်မည်။

ထို့အပြင် ဤအစီအစဉ်သည် ကျိုးကြောင်းဆီလျော်မှု ရှိသည်။ ပျံသန်းရေးသင်္ဘောအုပ်စုကြီးကို ရန်သူရော မဟာမိတ်ပါ မြင်တွေ့သွားကြပြီဖြစ်ရာ အင်အားကို ဖုံးကွယ်ထားရန် မဖြစ်နိုင်တော့ပေ။

ထို့ကြောင့် တစ်စုံတစ်ရာကို ဖုံးကွယ်ရန် ကြိုးစားမည့်အစား ရှိသမျှအင်အားအကုန်သုံး၍ တိုက်ခိုက်ခြင်းကသာ အကောင်းဆုံး ရလဒ်များကို ထွက်ပေါ်လာစေနိုင်သည်။

ထို့အပြင် အင်မော်တယ်အဆင့် အင်အားစုများကို အရန်အင်အားအဖြစ် ချန်လှပ်ထားခြင်းက မိစ္ဆာကျင့်ကြံသူများ၏ ရုတ်တရက် လှုပ်ရှားလာမှုမှန်သမျှကို ရင်ဆိုင်ဖြေရှင်းနိုင်မည် ဖြစ်သည်။

နောက်ဆုံးတွင် စစ်သူကြီးသည် သက်ပြင်းတစ်ချက်ကို မှုတ်ထုတ်လိုက်ရင်း ခေါင်းညိတ်ပြလိုက်၏။

"တပ်မှူးဝေ... တကယ့်ကို ထူးချွန်တဲ့ ဗျူဟာတစ်ခုပဲ။ ဒီအစီအစဉ်ကို ကန့်ကွက်မယ့်သူ ဒါမှမဟုတ် ဒီထက်ကောင်းတဲ့ အကြံပြုချက်ပေးနိုင်မယ့်သူ ရှိသေးလား?"

မည်သူမျှ စကားမဆိုကြပေ။

"ဒါဆိုရင်တော့ ဒီအတိုင်းပဲ ဆုံးဖြတ်လိုက်မယ်။"

ရှုယုချန်းက သူ၏လက်ကို ပြန်ချလိုက်ချိန်တွင် ကွပ်ကဲမှုစင်မြင့်ထက်၌ တိတ်ဆိတ်ငြိမ်သက်ခြင်းက လွှမ်းမိုးသွားသည်။

"ငါတို့ အလုံးအရင်းနဲ့ ထိုးစစ်ဆင်ကြမယ်။"

စုဝေးနေကြသော ခေါင်းဆောင်များနှင့် အရာရှိများကြားတွင် မျှော်လင့်ခြင်း၊ ကြောက်ရွံ့ခြင်းနှင့် စိတ်လှုပ်ရှားခြင်းများ ရောပြွမ်းနေသည့် လှိုင်းတံပိုးတစ်ခု ဖြတ်သန်းသွားတော့သည်။

သောင်းနှင့်ချီသော ကျင့်ကြံသူများ၊ ရေတွက်၍မရနိုင်သော သင်္ဘောကြီးများနှင့် အင်ပါယာ၏ ထိပ်တန်းအထူးတပ်ဖွဲ့များ အားလုံးသည် ယခုအခါ တစ်ခုတည်းသော ပူးပေါင်းထိုးစစ်ကြီးဆီသို့ အာရုံစိုက်လိုက်ကြပြီဖြစ်သည်။

ရှုယုချန်းသည် ဧရာမ စစ်ဗျူဟာဆောင်ကြီးဘက်သို့ လှည့်လိုက်သည်။

"နောက်တစ်ဆင့်အနေနဲ့... တပ်ဖွဲ့အားလုံးရဲ့ နေရာချထားမှုနဲ့ ခွဲဝေမှုတွေကို စီစဉ်ကြမယ်။"

စီရင်ထုံးတိုင်များမှတစ်ဆင့် ပြသထားသည့် ဧရာမ ကျောက်စိမ်းမြေပုံကြီးသည် လင်းထိန်လာပြီး သားရဲလှိုင်းလုံးများ၊ ခံစစ်ကြောင်းများနှင့် အင်အားကြီးအဖွဲ့အစည်းအသီးသီး၏ တပ်မများကို အမှတ်အသားပေါင်းများစွာဖြင့် ပြသလိုက်သည်။

ယခုတစ်ကြိမ်တွင်မူ ခေါင်းဆောင်များသည် ယခင်ကထက် ပို၍ တင်းမာသွားကြသည်။

ဘာကြောင့်လဲ?

အကြောင်းမှာ သူတို့၏ တပ်ဖွဲ့များကို မည်သည့်နေရာတွင် ထားရှိမည်ဆိုသည့် ဆုံးဖြတ်ချက်က သူတို့၏ မျိုးနွယ်စု သို့မဟုတ် ဂိုဏ်းသားများ အကျအဆုံး များခြင်း၊ နည်းခြင်းအပေါ် တိုက်ရိုက်သက်ရောက်နေသောကြောင့် ဖြစ်သည်။

ရှေ့ဆုံးတန်းမှနေ၍ ပထမဆုံး စတင်တိုက်ခိုက်ရမည့်သူများသည် မိစ္ဆာသားရဲများ၏ အပြင်းထန်ဆုံး တုံ့ပြန်မှုကို ရင်ဆိုင်ရမည်ဖြစ်ပြီး သေဆုံးနိုင်ခြေ အများဆုံးဖြစ်သည်ကို လူတိုင်း သိကြသည်။

ထို့ကြောင့် ဤနေရာတွင် ရှိနေသူတိုင်းသည် ဤထိုးစစ်ကြီး၏ ရှေ့ဆုံးတန်းတွင် နေရာမရအောင် ရှောင်လွှဲချင်နေကြတော့သည်။