မင်္ဂလာဦးည၊ မက်မွန်ပွင့်ဝိညာဉ်ခန္ဓာ(၂)။

အမှန်တကယ်တွင် အစကတည်းက သခင်မမက်မွန်ပွင့်၏ ခန္ဓာကိုယ် ထူးခြားနေကြောင်း၊ အခြားအမျိုးသမီးများနှင့် လုံးဝမတူညီကြောင်း သူ အာရုံခံမိခဲ့သည်။

မွေးရာပါ ဆွဲဆောင်မှုစွမ်းအား ပါလာသကဲ့သို့ပင်။

ယခု ကြည့်လိုက်သောအခါ အမှန်တကယ်ပင် အထူးဝိညာဉ်ခန္ဓာ ပိုင်ဆိုင်ထားခြင်း ဖြစ်သည်။

သခင်မမက်မွန်ပွင့်သည် အမြဲတမ်း မက်မွန်ပွင့်ကျွန်းပေါ်တွင် နေထိုင်ရခြင်းမှာ သူမ၏ မိခင်ကို ကျွန်းပေါ်တွင် မြှုပ်နှံထားသောကြောင့် ဖြစ်ရာ အံ့သြစရာ မဟုတ်တော့ပေ။

တစ်ချိန်တည်းမှာပင် သူမသည် မက်မွန်ပွင့်ဝိညာဉ်ခန္ဓာကြောင့် မိမိကိုယ်ကို ဒုက္ခပေးမိမည်ကို ရှောင်ရှားရန်လည်း ဖြစ်သည်။

ထို့ကြောင့် အခြားအမျိုးသားများနှင့် ထိတွေ့ဆက်ဆံရန် အမြဲငြင်းဆန်ခဲ့ခြင်း ဖြစ်သည်။

ဝမ်းနည်းစရာမှာ ယခုအခါ သူ၏လက်ထဲသို့ ကျရောက်လာခဲ့ချေပြီ။

"ဒါဆိုရင် ဘယ်အချိန်မှ ရမှာလဲ..."

ကျိုးစွေ့ မေးလိုက်သည်။

"နတ်ဘုရားအသွင်ပြောင်းအဆင့်ပါ... နတ်ဘုရားအသွင်ပြောင်းအဆင့် ရောက်မှသာ ကျွန်မရဲ့ ခန္ဓာကိုယ်ပြဿနာကို လုံးဝဖြေရှင်းနိုင်မှာ..."

"အဲဒီအချိန်ကျရင် ယောက်ျားကို ဒုက္ခပေးမိတော့မှာ မဟုတ်ဘူး..."

"တကယ်လို့ ယောက်ျား စိတ်မရှိဘူးဆိုရင်... ကျွန်မရဲ့ မက်မွန်ပွင့်ကျွန်းပေါ်မှာ လှပတဲ့ အမျိုးသမီးကျင့်ကြံသူ သုံးထောင် ရှိတယ်..."

"သူတို့အားလုံးကို ယောက်ျားရဲ့ ကိုယ်လုပ်တော်အဖြစ် ယူပြီး လိုအင်ဆန္ဒ ဖြည့်ဆည်းလို့ ရပါတယ်..."

သခင်မမက်မွန်ပွင့်သည် ကျိုးစွေ့ကို အားနာစွာ ကြည့်လိုက်သည်။

မည်သို့ပင်ဖြစ်စေ တာအိုလက်တွဲဖော် ဖြစ်ပါလျက် ယောက်ျားဖြစ်သူ၏ လိုအင်ဆန္ဒကို မဖြည့်ဆည်းပေးနိုင်ခြင်းသည် တာဝန်ပျက်ကွက်ခြင်းပင် ဖြစ်သည်။

သို့သော် ဤသည်မှာ မတတ်နိုင်ပေ။

သူမ၏ မက်မွန်ပွင့်ဝိညာဉ်ခန္ဓာသည် အမျိုးသားများအပေါ် အန္တရာယ် အလွန်ကြီးမားလွန်းသည်။

တကယ်တမ်း အတူနေမိပါက သူမ၏ အမျိုးသားဆီမှ အနှစ်သာရများကို ဝါးမြိုမိပေလိမ့်မည်။

ရေရှည်တွင် သေချာပေါက် ပြဿနာကြီးတစ်ခု ဖြစ်လာနိုင်သည်။

ဤကိစ္စအတွက် ဖြေရှင်းနည်းကိုလည်း သူမ ကြိုတင် စဉ်းစားထားပြီး ဖြစ်သည်၊ ၎င်းမှာ မက်မွန်ပွင့်ကျွန်းပေါ်ရှိ အမျိုးသမီးကျင့်ကြံသူများကို ကူညီခိုင်းရန် ဖြစ်သည်။ မည်သို့ပင်ဖြစ်စေ ဤအမျိုးသမီးများသည် သူမ ခေါ်ယူမွေးစားထားသူများ ဖြစ်ကြပြီး သူမအပေါ် သစ္စာရှိကြသည်။

သူမ ဘာပြောပြော သူတို့ လုပ်ဆောင်ကြမည် ဖြစ်သည်။

ထို့အပြင် သူမယောက်ျား၏ ကိုယ်လုပ်တော်အဖြစ် လက်ထပ်ရလျှင် သူတို့လည်း အလွန်ကျေနပ်ကြလိမ့်မည်ဟု ယုံကြည်သည်။

မည်သို့ပင်ဖြစ်စေ သူမ၏ ယောက်ျားသည် နတ်ဘုရားအသွင်ပြောင်းအဆင့် ပါရမီရှင် မဟုတ်ပါလော။

အနာဂတ်တွင် နတ်ဘုရားအသွင်ပြောင်းအဆင့် ကျင့်ကြံသူ အမှန်တကယ် ဖြစ်လာပါက ချန်လန်ပင်လယ်ဒေသ၏ အရှင်သခင် ဖြစ်လာပေလိမ့်မည်။

"မလိုပါဘူး..."

"လောကကြီးမှာ မင်းနဲ့ ယှဉ်နိုင်တဲ့ မိန်းမ ဘယ်မှာ ရှိလို့လဲ..."

"မင်းကလွဲရင် ဘယ်သူ့ကိုမှ မလိုချင်ဘူး..."

"တာအိုလက်တွဲဖော်ရဲ့ တာဝန်ကို ရှောင်လွှဲချင်နေတာလား... မင်း ကိုယ့်ကို ဒေါသထွက်အောင် လုပ်ချင်နေတာပဲ..."

ကျိုးစွေ့သည် သခင်မမက်မွန်ပွင့်ကို ကြည့်လိုက်သည်။

သူသည် ပါးစပ်နားရောက်နေသော အသားတုံးကို အလွတ်ခံမည် မဟုတ်ပေ၊ အိပ်မက်ထဲတွင်ပင် ဤသို့ ဖြစ်လာမည် မဟုတ်ချေ။

မှန်ပေသည်၊ အကယ်၍ သူသည် ဝိညာဉ်သန္ဓေသား အစောပိုင်း ပြီးပြည့်စုံခြင်းအဆင့်သို့ ရောက်ရှိနေပါက သခင်မမက်မွန်ပွင့်၏ ကြီးမားသော မူလယင်စွမ်းအားကို အသုံးပြုပြီး ပိတ်ဆို့မှုကို ချိုးဖျက်ကာ ဝိညာဉ်သန္ဓေသား အလယ်အလတ်အဆင့်သို့ တက်လှမ်းနိုင်ကောင်း တက်လှမ်းနိုင်ပေလိမ့်မည်။

သို့သော် သူသည် ဤမျှ ရှုပ်ထွေးသော ကိစ္စကို လုပ်ဆောင်ရန် မလိုအပ်ပေ။

တာအိုလက်တွဲဖော်၏ မူလယင်စွမ်းအားကို အသုံးမပြုဘဲနှင့်လည်း ပိတ်ဆို့မှုကို ချိုးဖျက်နိုင်စွမ်း ရှိသည်။

အင်မော်တယ်ကျင့်ကြံခြင်းတွင် အရေးကြီးဆုံးမှာ လက်ရှိအချိန်ကို ပျော်ရွှင်စွာ ဖြတ်သန်းပြီး စိတ်ဆန္ဒ ပြည့်ဝစေခြင်းသာ ဖြစ်သည်။

သို့သော် မက်မွန်ပွင့်ဝိညာဉ်ခန္ဓာသည် အမှန်တကယ်ပင် ဒုက္ခပေးတတ်သော ခန္ဓာကိုယ် ဖြစ်သည်။

အခြားအမျိုးသားကျင့်ကြံသူများအတွက် သခင်မမက်မွန်ပွင့်သည် မိစ္ဆာမတစ်ဦး ဖြစ်ပြီး တစ်ညတာ ပျော်ပါးပြီးနောက် သေချာပေါက် သေဆုံးသွားမည် ဖြစ်ကာ ခန္ဓာကိုယ်မှ အနှစ်သာရများ အစုပ်ယူခံလိုက်ရမည် ဖြစ်သည်။

ကျင့်ကြံမှု မြင့်မားသော အမျိုးသားကျင့်ကြံသူများကမူ အကြိမ်များစွာ ခုခံနိုင်မည် ဖြစ်သည်၊ ဥပမာအားဖြင့် ဝူကျိတာအိုအရှင် ဖြစ်သည်။

ထို့ကြောင့်သာ သခင်မမက်မွန်ပွင့်ကို မွေးဖွားလာနိုင်ခြင်း ဖြစ်သည်။

သို့သော် ကျိုးစွေ့ကမူ မက်မွန်ပွင့်ဝိညာဉ်ခန္ဓာကို လုံးဝ မကြောက်ရွံ့ပေ။

အဘယ်ကြောင့်ဆိုသော် သူ့တွင် 'နဂါးဆင်ခန္ဓာ' ရှိပြီး ခန္ဓာကိုယ်ထဲရှိ သွေးစွမ်းအင်သည် စိတ်ကူးယဉ်နိုင်စွမ်းထက် ကျော်လွန်အောင် သန်မာသောကြောင့် ဖြစ်သည်။ မက်မွန်ပွင့်ဝိညာဉ်ခန္ဓာ မည်မျှပင် စွမ်းအားကြီးစေကာမူ သူ့ခန္ဓာကိုယ်မှ အနှစ်သာရကို စုပ်ယူ၍ ကုန်ခမ်းသွားအောင် လုပ်ဆောင်နိုင်မည် မဟုတ်ပေ။

ပို၍ အရေးကြီးသည်မှာ 'ချစ်ခြင်းမေတ္တာကူ'၏ စွမ်းအားလည်း ရှိနေသေးသည်။

သခင်မမက်မွန်ပွင့် စိုးရိမ်နေသော ကိစ္စများမှာ အပိုပူပန်နေခြင်းသာ ဖြစ်သည်။

"ဟင့်အင်း... ကျွန်မ... ကျွန်မက..."

သခင်မမက်မွန်ပွင့် စကားပြောချင်သေးသော်လည်း၊ ကျိုးစွေ့က သူမကို စကားပြောခွင့် မပေးတော့ဘဲ ဖယောင်းတိုင်မီးကို ချက်ချင်းမှုတ်ပြီး ငြှိမ်းသတ်လိုက်ရာ အခန်းတစ်ခုလုံး အမှောင်ကျသွားတော့သည်။

မကြာမီ မှောင်မိုက်သော အခန်းထဲမှ တာအိုသံစဉ်များ စည်းချက်ကျကျ ထွက်ပေါ်လာတော့သည်။

…………

နောက်တစ်နေ့ နံနက်ခင်း…..။

နေမင်းသည် နှင်းဆီရောင်သမ်းနေကာ နေရောင်ခြည်သည် လင်းလက်စွာ တောက်ပနေ၏။

သခင်မမက်မွန်ပွင့်သည် ကျိုးစွေ့၏ ကိုယ်ပေါ်တွင် ပျင်းရိစွာ မှီတွယ်နေပြီး မျက်နှာလေး နီရဲနေကာ ကျိုးစွေ့ကို ချစ်စဖွယ် မျက်စောင်းလေး ထိုးနေချေသည်။

ဤအမျိုးသားက သူမကို ငြင်းဆန်ခွင့် မပေးဘဲ ဤမျှ အတင်းအကျပ် လုပ်ဆောင်လိမ့်မည်ဟု သူမ ထင်မှတ်မထားခဲ့ပေ။

သို့သော် ဤအမျိုးသား ပြောသည့်အတိုင်းပင် သူမ၏ မက်မွန်ပွင့်ဝိညာဉ်ခန္ဓာသည် ဤအမျိုးသားအပေါ် မည်သည့် ဘေးထွက်ဆိုးကျိုးမျှ မရှိခဲ့ပေ။

အကြောင်းမှာ ဤအမျိုးသား၏ အနှစ်သာရသည် စိတ်ကူးယဉ်နိုင်စွမ်းထက် ကျော်လွန်အောင် ကြီးမားလွန်းကြောင်း သူမ တွေ့ရှိလိုက်ရသောကြောင့် ဖြစ်၏။

အခြားအမျိုးသားကျင့်ကြံသူများ၏ အနှစ်သာရသည် ရေတွင်းတစ်တွင်းသာ ဖြစ်ပါက၊ ဤအမျိုးသား၏ သွေးစွမ်းအင်သည် မြစ်ကြီးတစ်စင်းကဲ့သို့ ကျယ်ပြောလှပြီး အဆုံးမရှိ ဖြစ်နေချေသည်။

ထို့ကြောင့် သူမ အဝစားလိုက်လျှင်ပင် ဤအမျိုးသား၏ အခြေခံအုတ်မြစ်ကို ထိခိုက်စေနိုင်ပုံ မရပေ။

ဒီလူဆိုးကောင်က နေ့တိုင်း ဘာလို့ ဒီလောက် အားအင်တွေ ပြည့်ဝနေရတာလဲ ဆိုတာ အံ့သြစရာ မဟုတ်တော့ဘူး… သွေးစွမ်းအင်တွေက ဒီလောက်တောင် အံ့သြစရာ ကောင်းနေတာကိုး….။

ဤသို့ဆိုပါက သူမနှင့် ဤအမျိုးသားသည် အမှန်တကယ်ကို ကောင်းကင်ဘုံက ဖန်ဆင်းပေးသော စုံတွဲပင်။

ခန္ဓာကိုယ်ချင်း အလွန်ပင် လိုက်ဖက်ညီလှ၏။

အဘယ်ကြောင့်ဆိုသော် မက်မွန်ပွင့်ဝိညာဉ်ခန္ဓာသည် အမျိုးသားများ၏ အနှစ်သာရကို စုပ်ယူရာတွင် အမျိုးသားတစ်ဦးတည်းမဟုတ်ပါက အနှစ်သာရများ ရှုပ်ထွေးသွားပြီး မသန့်စင်တော့ဘဲ ခန္ဓာကိုယ်တွင်းရှိ မှော်စွမ်းအားကို မသန့်စင်စေတော့သဖြင့် ကျင့်ကြံခြင်း အခြေခံအုတ်မြစ်ကို ထိခိုက်စေနိုင်သည်။

အတိတ်က သူမ၏ မိခင်သည် ထိုကဲ့သို့ ဖြစ်ခဲ့သည်။

သို့သော် ယခုမူ မတူညီတော့ပေ။

အမျိုးသားတစ်ဦးတည်း၏ အနှစ်သာရကိုသာ စုပ်ယူပါက အနှစ်သာရ ရှုပ်ထွေးခြင်း ပြဿနာ ရှိမည် မဟုတ်ပေ။

ဆန့်ကျင်ဘက်အားဖြင့် ဤစွမ်းရည်ကို အမှီပြု၍ မိမိ၏ ကျင့်ကြံခြင်းကို လျင်မြန်စွာ မြှင့်တင်နိုင်ပြီး ကျင့်ကြံခြင်းစွမ်းဆောင်ရည်ကိုပင် တိုးတက်စေနိုင်သည်။

အဓိကအချက်မှာ ထိုအမျိုးသား၏ အနှစ်သာရသည် အကန့်အသတ်မရှိ ဖြစ်ရမည် ဖြစ်ပြီး သူမက အကန့်အသတ်မရှိ စုပ်ယူနိုင်ရမည် ဖြစ်သည်။

လောကကြီးတွင် ထိုကဲ့သို့သော အမျိုးသားမျိုး မရှိဟု သူမ မူလက ထင်ခဲ့သည်။

သို့သော် ယခုတွင်မူ သူမသည် ကမ္ဘာလောကကြီး၏ အမျိုးသားများကို လျှော့တွက်မိနေသေးသည်။

အနည်းဆုံးတော့ သူမ၏ ယောက်ျားသည် ခန္ဓာကိုယ်ခွန်အား အကန့်အသတ်မရှိ၊ အားအင် အကန့်အသတ်မရှိသော မကောင်းဆိုးဝါးတစ်ကောင်ပင် ဖြစ်လေသည်။

တစ်ညလုံး အပြင်းအထန် ကျင့်ကြံခဲ့သော်လည်း သူမယောက်ျား၏ ခန္ဓာကိုယ်မှ အနှစ်သာရသည် အားနည်းသွားခြင်း မရှိဘဲ ပိုမို၍ပင် သန်မာလာခဲ့သည်။

မျက်မြင်ကိုယ်တွေ့ မဟုတ်လျှင် ဤကိစ္စကို မည်သူက ယုံကြည်နိုင်ပါမည်နည်း။

"မဆိုးဘူး..."

ယခုအချိန်တွင် ကျိုးစွေ့သည် သူ၏ ဝိညာဉ်သန္ဓေသား မှော်စွမ်းအားများ ထူထဲသိပ်သည်းလာသည်ကို ခံစားလိုက်ရသည်။

ဒန်တျန်ချီပင်လယ်ထဲရှိ ဝိညာဉ်သန္ဓေသားသည်လည်း ကြီးထွားလာခဲ့ပြီး မွေးကင်းစအရွယ်မှ တစ်နှစ်နှင့် ရှစ်လသားအရွယ်သို့ ကြီးထွားလာခဲ့ကာ၊ ကြီးမားသော ဝိညာဉ်သန္ဓေသား မှော်စွမ်းအားများ ထွက်ပေါ်နေချေသည်။

ကျယ်ပြောသော မြစ်တစ်စင်းကဲ့သို့ သူ၏ ခန္ဓာကိုယ် အစိတ်အပိုင်းတိုင်းတွင် စီးဆင်းနေသည်။

စွမ်းအားကြီးမားသော ဝိညာဉ်သန္ဓေသား ဥပဒေသနယ်ပယ်သည် ပတ်ဝန်းကျင်သို့ ပျံ့နှံ့သွားပြီး နေရာတိုင်းရှိ သဘာဝဝိညာဉ်စွမ်းအင်များကို ထိန်းချုပ်ထားလေသည်။

သခင်မမက်မွန်ပွင့်သည် ဝိညာဉ်သန္ဓေသား နှောင်းပိုင်းအဆင့် အမျိုးသမီးကျင့်ကြံသူ ဟူသောဂုဏ်ပုဒ်နှင့် ထိုက်တန်သည်ဟုသာ ပြောရပေမည်။ နှစ်ပေါင်းငါးရာကျော် တစ်ကိုယ်တည်း နေထိုင်ခဲ့သဖြင့် ခန္ဓာကိုယ်ထဲရှိ မူလယင်စွမ်းအားသည် စိတ်ကူးယဉ်နိုင်စွမ်းထက် ကျော်လွန်အောင်ပင် ထူထဲသိပ်သည်းလှသည်။

ဤစွမ်းအင်ကို ရရှိပြီးနောက် သူ၏ ကျင့်ကြံခြင်းကို ဝိညာဉ်သန္ဓေသား အစောပိုင်းအဆင့် (၇၀)ရာခိုင်နှုန်းအထိ တိုးတက်စေခဲ့သည်။

ဤကျင့်ကြံခြင်း တိုးတက်မှုနှုန်းသည် အလွန်တရာ ချဲ့ကားလွန်းလှသည်။ သူ့အတွက် နှစ်ပေါင်းတစ်ရာကျော် ကြိုးစားကျင့်ကြံရမည့်အချိန်ကို သက်သာစေခဲ့သည်။

အကယ်၍ သူ ဝိညာဉ်သန္ဓေသား အစောပိုင်း ပြီးပြည့်စုံခြင်းအဆင့်သို့ ရောက်ရှိချိန်တွင် ဤစွမ်းအင်ကို ရရှိခဲ့ပါက၊ ပိတ်ဆို့မှုကို ချိုးဖျက်ပြီး ဝိညာဉ်သန္ဓေသား အလယ်အလတ်အဆင့်သို့ ချောမွေ့စွာ တက်လှမ်းနိုင်ရန် သေချာပေါက် ကူညီပေးနိုင်မည် ဖြစ်သည်။

ဝမ်းနည်းစရာမှာ သူသည် ဤမျှ အချိန်အကြာကြီးအထိ မစောင့်နိုင်တော့ပေ။

အရသာရှိသော စားပွဲကြီးတစ်ခု မိမိရှေ့ရောက်နေပါလျက်၊ ယခု မစားဘဲ နောက်မှ စားမည်ဆိုခြင်းမှာ မိုက်မဲရာ ကျသည်မဟုတ်ပါလော။

ထို့အပြင် မိမိအတွက် နှစ်ပေါင်းတစ်ရာကျော် ကြိုးစားကျင့်ကြံရမည့်အချိန်ကို သက်သာစေခြင်းသည်လည်း တော်တော်လေး ကောင်းမွန်နေပြီ ဖြစ်သည်။

မည်သို့ပင်ဖြစ်စေ ဝိညာဉ်သန္ဓေသား အစောပိုင်းအဆင့် ပိတ်ဆို့မှုသည် သူ့ကို တားဆီးနိုင်မည်ဟု သူ မထင်ပေ။

သခင်မမက်မွန်ပွင့်၏ အကူအညီ မပါဘဲနှင့်လည်း သူသည် ပိတ်ဆို့မှုကို ချိုးဖျက်ပြီး ဝိညာဉ်သန္ဓေသား အလယ်အလတ်အဆင့်သို့ တက်လှမ်းနိုင်မည် ဖြစ်သည်။

အင်မော်တယ်ကျင့်ကြံခြင်းတွင် အရေးကြီးဆုံးမှာ လက်ရှိအချိန်ကို ပျော်ရွှင်စွာ ဖြတ်သန်းပြီး စိတ်ဆန္ဒ ပြည့်ဝစေခြင်းပင် မဟုတ်ပါလော။

"ဘယ်လိုလဲ... မင်းရဲ့ မက်မွန်ပွင့်ဝိညာဉ်ခန္ဓာက ကိုယ့်ကို ဘာမှဒုက္ခမပေးနိုင်ဘူးလို့ ကိုယ် ပြောသားပဲ..."

"အခုတော့ ယုံပြီမလား..."

ကျိုးစွေ့သည် သခင်မမက်မွန်ပွင့်ဟူသော ပြိုင်ဘက်ကင်းအလှပဂေးကို ပွေ့ဖက်လိုက်ပြီး အနည်းငယ်ပြုံးကာ ရင်ထဲတွင် ကျေနပ်မှုကို ခံစားလိုက်ရသည်။