အလကားရမည့် အခွင့်အရေး

အစီအစဉ် အမျိုးမျိုးကို လုပ်ပြီးနောက် ထန်ထျန်းက ကုံးချန်ခြံဝင်းသို့ ဝင်ရောက်ရန် လိုအပ်သော လုပ်ငန်းစဉ်များကို နောက်ဆုံးတွင် အချောသတ်နိုင်ခဲ့သည်။

ယနေ့မှစ၍ သူက စစ်မှန်သော ကုံးချန်ခြံဝင်း တပည့်တစ်ဦး ဖြစ်လာခဲ့ပြီ ဖြစ်သည်။

"ကျင့်စဉ်မျှော်စင် ၊ လက်နက်အဆောက်အဉီး ၊ကောင်းကင် ရတနာနန်းတော်၊ တာဝန်ခန်းမ၊ ကျင့်ကြံခြင်းကွင်းပြင်၊ ဆေးဖော်ခန်း၊ သင်ကြားခြင်း စင်မြင့်..."

"ဒါတွေအားလုံးက ကုံးချန်ခြံဝင်းရဲ့ အလွန်အရေးကြီးတဲ့ နေရာတွေပဲ"

"ကုံးချန်ခြံဝင်း တပည့်တစ်ယောက်အနေနဲ့ မင်းတို့က ဒီနေရာတွေကို စိတ်ကြိုက် ဝင်ထွက်နိုင်တယ်"

"အသစ်တက်လာတဲ့ တပည့်တိုင်းက ကျင့်စဉ်မျှော်စင် ၊ လက်နက်အဆောက်အဉီး နဲ့ ကောင်းကင် ရတနာနန်းတော်တို့ကနေ အဆင့်မြင့် အင်မော်တယ်အဆင့် အတွင်းမှာရှိတဲ့ ရတနာ တစ်ခုစီကို ရွေးချယ်ခွင့်ရှိတယ်။ "

"အဲဒါအပြင် မင်းတို့ရဲ့ လစဉ်ခံစားခွင့်ကတော့..."

အကြီးအကဲဖြစ်သူက ထန်ထျန်းတို့ တစ်စုကို ကုံးချန်ခြံဝင်း၏ အခြေခံ စည်းမျဉ်းများကို ဖတ်ပြနေသည်။

ယခုနှစ်တွင် သူတို့ သုံးဦးအပြင် ကျီဝေခြံဝင်းမှ ကုံးချန်ခြံဝင်းသို့ အသစ်ဝင်ရောက် လာသူ ၂၅ ဦးလည်း ရှိသေးသည်။

စုစုပေါင်း ၂၈ ဦး ဖြစ်သည်။

ယခင်နှစ်များကဆိုလျှင် အယောက် ၃၀ ကျော်ခန့် ရှိတတ်သည်။

ခြုံငုံကြည့်လျှင် ကုံးချန်ခြံဝင်းတစ်ခုလုံးတွင် တပည့်ပေါင်း ၄၀၀ ပင် မပြည့်ချေ။

သောင်းနှင့်ချီသော ထိပ်တန်းတပည့်များနှင့် ယှဉ်လျှင် ဤအရေအတွက်မှာ အလွန်ပင် နည်းပါးလှသည်။

"ထုန်းရှန့်တောင်က ကုံးချန်ခြံဝင်း တပည့်တွေအပေါ်မှာ အရမ်း လျှော့ပေါ့ပေးထားတယ်။ လျှို့ဝှက်နယ်မြေ အများစုကိုလည်း မင်းတို့အတွက် အခမဲ့ ဖွင့်လှစ်ပေးထားတယ်။"

" အကယ်၍ တစ်ခုခု အခက်အခဲရှိရင် ကြိုက်တဲ့ အကြီးအကဲကိုမဆို အကူအညီတောင်းလို့ ရတယ်၊ ငါတို့က အစွမ်းကုန် ကူညီပေးသွားမှာပါ"

အကြီးအကဲက နူးညံ့စွာ ပြောကြားခဲ့သည်။

ထန်ထျန်းက စိတ်ထဲမှ ခေါင်းညိတ်လိုက်မိသည်။

မိုရှောင်းရှောင်း ပြောခဲ့သည်မှာ မှန်ပေသည်။ ထျန်းဖူနန်းတော် ကဲ့သို့သော နေရာမျိုးတွင် အဆင့်အတန်း မြင့်မားလေလေ၊ ရရှိသော အရင်းအမြစ်နှင့် အခွင့်အရေးများမှာ ပိုမိုကောင်းမွန်လေလေ ဖြစ်သည်။

အလားအလာရှိသော တပည့်များအတွက် ထျန်းဖူနန်းတော်က အစွမ်းကုန် မြေတောင်မြှောက်ပေးထားခြင်းပင်။

"ကဲ... အခြေအနေတွေကို ရင်းနှီးသွားအောင် ငါ မင်းတို့ကို လိုက်ပြမယ်"

ထို့နောက် အကြီးအကဲက ထန်ထျန်းတို့ သုံးဦးကို ကုံးချန်ခြံဝင်း၏ အရေးကြီးသော နေရာများသို့ လိုက်လံပြသခဲ့သည်။

တစ်ပတ်ပတ်ပြီးနောက် ထန်ထျန်း ခံစားလိုက်ရသော တစ်ခုတည်းသော အရာမှာ "ခမ်းနားထည်ဝါမှု" ပင် ဖြစ်သည်။

ဤနေရာရှိ ပတ်ဝန်းကျင်နှင့် ယှဉ်လျှင် ချင်းယွဲ့ဂိုဏ်းကို ထားလိုက်ပါဦး၊ ဝမ့်ယွဲ့လှိုဏ်ဂူ ကဲ့သို့သော နေရာမျိုးပင်လျှင် ဝမ့်ယွဲ့တောင်ထိပ်မှလွဲ၍ ကျန်သည့်နေရာများမှာ ယှဉ်စရာပင် မရှိချေ။

ထျန်းဖူနန်းတော်က အရင်းအမြစ်များကို အစွမ်းကုန် အသုံးချ၍ ပါရမီရှင်များအတွက် ကောင်းကင်ဘုံနှင့်တူသော ကျင့်ကြံရေးနယ်မြေတစ်ခုကို တည်ဆောက်ပေးထားသည်။

တစ်ကိုယ်တော် ကျင့်ကြံသူကို ထားလိုက်ပါဦး၊ ဝက်တစ်ကောင်ကိုပင် ဤနေရာတွင် လာထားပါက မကြာမီတွင် မိစ္ဆာကြီး ဖြစ်လာနိုင်ပြီး အင်မော်တယ် မိစ္ဆာပင် ဖြစ်သွားနိုင်ပေသည်။

ထျန်းဖူနန်းတော် သို့ လာရန် ရွေးချယ်ခဲ့ခြင်းမှာ အလွန်မှန်ကန်သော ရွေးချယ်မှု ဖြစ်ကြောင်း ထန်ထျန်း သဘောပေါက်သွားသည်။

ဤကဲ့သို့သော နေရာတွင် ကျင့်ကြံရခြင်းက အနည်းငယ် အားစိုက်ရုံနှင့် များစွာ ထိရောက်ပေလိမ့်မည်။

လျှို့ဝှက်ဆန်းကြယ်သော ရှေးဟောင်းကျောက်စိမ်းနှင့် လအင်မော်တယ် ကျောက်စိမ်း မရှိလျှင်ပင် သူက ခြောက်လကျော်အတွင်း ရွှေအင်မော်တယ်ကို ကျော်ဖြတ်ကာ မြင့်မြတ်ရွှေအင်မော်တယ် အဆင့်သို့ တက်လှမ်းနိုင်မည်ဟု အပြည့်အဝ ယုံကြည်မှု ရှိနေသည်။

အားလုံးက အပေါ် သို့ ဆက်လက် တက်ခဲ့ကြသည်။

လမ်းတွင် ကုံးချန်ခြံဝင်းမှ တပည့်ဟောင်း အချို့ကိုလည်း တွေ့ရပြီး သူတို့က တပည့်အသစ်များကို စူးစမ်းသော အကြည့်များဖြင့် ကြည့်နေကြသည်။

လူသစ်များ ရောက်လာခြင်းက အမြဲတမ်း စိတ်ဝင်စားစရာ ကောင်းသည် မဟုတ်ပါလား။

ရုတ်တရက် ထန်ထျန်းက ခြေလှမ်းရပ်လိုက်ပြီး ဝေးလံသော နေရာသို့ လှမ်းကြည့်လိုက်သည်။

ထိုဘက်တွင် အင်မော်တယ် မြူခိုးများကြား၌ ကောင်းကင်သို့ ထိုးတက်နေသော ဧရာမ ရုပ်တုကြီး တစ်ခု ရှိနေသည်။

မြေပြင်ပေါ်တွင် မားမားမတ်မတ် ရပ်တည်နေသော ခန္ဓာကိုယ်၏ အစိတ်အပိုင်း အနည်းငယ်ကိုသာ ဝိုးတဝါး မြင်ရသည်။

"ချင်းယွဲ့ဂိုဏ်းမှာတုန်းကလည်း မင်း ဒါမျိုး မြင်ဖူးမှာပေါ့"

အကြီးအကဲ၏ အသံက ထန်ထျန်း၏ ဘေးမှ ထွက်ပေါ်လာသည်။

ထန်ထျန်းက ခပ်ဖွဖွ ခေါင်းညိတ်လိုက်သည်။

ထိုရုပ်တုက ချင်းယွဲ့ဂိုဏ်းရှိ ရုပ်တုထက် ပိုမို ခမ်းနားထည်ဝါသော်လည်း မှတ်မိနိုင်ပါသေးသည်။

၎င်းမှာ ကျင့်ကြံရေးကွင်းပြင် ပေါ်တွင် ရှိနေသော "တားမြစ်ရုပ်တု" ပင် ဖြစ်သည်။

"ကျွန်တော်... နည်းနည်းတော့ စိတ်ဝင်စားမိတယ်"

ထန်ထျန်းက အေးဆေးစွာ ပြောလိုက်သည်။

သို့သော် ယခင်က အလွန် သဘောကောင်းလှသော အကြီးအကဲမှာ ရုတ်တရက် တည်ကြည် လေးနက်သွားသည်။

"စိတ်မဝင်စားနဲ့"

သူက လေးနက်သော အသံဖြင့် ပြောလိုက်သည်။"ဒီလောကမှာ ငါတို့ နားမလည်နိုင်တဲ့၊ ထိတွေ့လို့ မရတဲ့ ကိစ္စတွေ အများကြီး ရှိတယ်။ "

"လုံလောက်တဲ့ ခွန်အား မရှိသေးခင်မှာ မင်းရဲ့ စိတ်ထဲမှာ ဘယ်လောက်ပဲ သံသယတွေ ရှိနေပါစေ၊ ကိုယ့်သဘောနဲ့ကိုယ် သွားပြီး မစပ်စုနဲ့။ "

"မဟုတ်ရင် ချောက်နက်ထဲကို ကျဆင်းသွားပြီး အလင်းရောင်ကို ဘယ်တော့မှ ပြန်မမြင်ရတော့တာမျိုး ဖြစ်တတ်တယ်"

ထန်ထျန်း အံ့ဩသွားမိသည်။

ထျန်းဖူနန်းတော်သို့ ရောက်လာလျှင်ပင် တားမြစ်ရုပ်တုအကြောင်းမှာ ဆွေးနွေး၍ မရသော အရာတစ်ခု ဖြစ်နေဆဲလား

အင်မော်တယ်ဘုရင် အဆင့်ရှိသော အကြီးအကဲပင်လျှင် ဤမျှအထိ လျှို့ဝှက်နေပါက ထိုရုပ်တုမှာ အမှန်တကယ် မည်သည့်အရာ ဖြစ်သနည်း

သို့သော် ထန်ထျန်းက သူ၏ စပ်စုလိုစိတ်ကို ပြန်လည် ထိန်းချုပ်လိုက်သည်။

သူက သူတစ်ပါး၏ အကြံပြုချက်ကို နားထောင်တတ်သူ ဖြစ်ပြီး အထူးသဖြင့် အသက်အန္တရာယ်နှင့် ပတ်သက်သော ကိစ္စမျိုးတွင် ပို၍ပင် ဂရုစိုက်တတ်သည်။

"အကြီးအကဲရဲ့ သတိပေးမှုအတွက် ကျေးဇူးတင်ပါတယ်"

ထန်ထျန်းက ရိုသေစွာ ပြောလိုက်သည်။

အကြီးအကဲက ခေါင်းညိတ်လိုက်ပြီး "အချို့ကိစ္စတွေက မင်း အဲဒီအမြင့်ကို ရောက်တဲ့အခါ အလိုလို သိလာလိမ့်မယ်။"

" မင်းရဲ့ ပါရမီနဲ့ဆိုရင် အဲဒီအချိန်က အနှေးနဲ့အမြန် ရောက်လာမှာပါလို့ ငါ ယုံကြည်တယ်"

ထန်ထျန်းက ခေါင်းညိတ်ကာ ကုံးချန်ခြံဝင်းကို ဆက်လက် လှည့်ပတ်ကြည့်ရှုခဲ့သည်။

ခဏအကြာတွင် သူတို့က ရှေးကျသော ရှစ်မြှောင့်ပုံစံ အဆောက်အဦးတစ်ခု ရှေ့သို့ ရောက်ရှိလာသည်။

"ဒါကတော့ ကျင့်စဉ်မျှော်စင် ပဲ"

အကြီးအကဲက မိတ်ဆက်ပေးသည်။ "ကျင့်စဉ်မျှော်စင် ထဲမှာ လောကထဲက ကျင့်စဉ်လမ်း အသွယ်သွယ် ပါဝင်ပြီး ကဏ္ဍစုံကို လွှမ်းခြုံထားတယ်။ "

"လူတိုင်းက ကိုယ့်နဲ့ သင့်တော်တဲ့ ကျင့်စဉ်ကို အဲဒီထဲမှာ ရှာဖွေနိုင်လိမ့်မယ်"

သူက လှည့်ကြည့်ကာ ပြုံးရင်း ဆက်ပြောသည်။ "နောက်ထပ် ရက်အနည်းငယ် ကြာရင် မင်းတို့က ဒီနှစ် ကုံးချန်ခြံဝင်းကို ဝင်ရောက် လာတဲ့ တပည့်တွေနဲ့အတူ ကျင့်စဉ် လာရွေးရလိမ့်မယ်။ "

"ငါ အရင်က ပြောခဲ့သလိုပဲ၊ လူတိုင်းက အဆင့်မြင့် အင်မော်တယ်အဆင့် အတွင်းမှာရှိတဲ့ ကျင့်စဉ် တစ်ခုကို ရွေးချယ်နိုင်တယ်။"

" ဒါပေမဲ့ အဲဒါအပြင် နောက်ထပ် စည်းမျဉ်းတစ်ခု ရှိသေးတယ်"

"မင်း ဘယ်လိုအဆင့်ရှိတဲ့ ကျင့်စဉ်ကိုပဲ ရွေးရွေး၊ အဲဒီကျင့်စဉ်ကို အမွှေးတိုင် တစ်တိုင်စာ အချိန်အတွင်းမှာ 'အသေးစား အောင်မြင်မှု' အထိ နားလည် သဘောပေါက်အောင် လုပ်နိုင်မယ်ဆိုရင် တူညီတဲ့အဆင့်ရှိတဲ့ နောက်ထပ် ကျင့်စဉ်တစ်ခုကို ထပ်ပြီး ရွေးချယ်ခွင့် ရဦးမှာပဲ"

"ဒါကြောင့် မင်းတို့ရဲ့ အခြေအနေအရ သေချာ ရွေးချယ်ကြပေါ့"

ထိုစကားကို ကြားပြီးနောက် ထန်ထျန်း မျက်ခုံးပင့်သွားမိသည်။

ဤစည်းမျဉ်းမှာ တပည့်များ၏ ဉာဏ်ရည် နှင့် ကျင့်စဉ်များကို ခွဲခြားသိမြင်နိုင်စွမ်းကို စမ်းသပ်ခြင်းပင် ဖြစ်သည်။ အကယ်၍ သူတို့နှင့် လုံးဝ ကိုက်ညီသော ကျင့်စဉ်ကို ရှာတွေ့ပါက အမွှေးတိုင် တစ်တိုင်စာ အချိန်အတွင်း အသေးစား အောင်မြင်မှု ရရှိရန်မှာ မဖြစ်နိုင်သည်တော့ မဟုတ်ပေ။

သို့သော် ကျင့်စဉ်အဆင့် မြင့်လေလေ၊ နားလည်ရန် ခက်ခဲလေလေ ဖြစ်သည်။

အဆင့်မြင့် အင်မော်တယ်ကျင့်စဉ်ကို ထိုမျှ မြန်မြန် နားလည်ရန်မှာ မဖြစ်နိုင်သလောက်ပင်။

၎င်းမှာ တပည့်များ၏ ရွေးချယ်မှုအပေါ်တွင်သာ မူတည်သည်။

သို့သော် ထန်ထျန်းအတွက်မူ ထိုကဲ့သို့ ခေါင်းစားစရာ မလိုပေ။

စနစ် ထဲတွင်ရှိသော သန်းနှင့်ချီသော သုံးစွဲမှုအမှတ်များကို ကြည့်ရင်း ထန်ထျန်းမှာ ချမ်းသာတော့မည့် ခံစားချက်မျိုးကို ရရှိလိုက်သည်။

သူ၏ "အနန္တတာအိုနိယာမ" ကို ပိုမို အားကောင်းအောင် လုပ်ရန်အတွက် အဆင့်မြင့် အင်မော်တယ်ကျင့်စဉ်များကို မည်သို့ ရှာရမည်နည်းဟု တွေးနေစဉ်တွင် ဤအခွင့်အရေးက ရောက်ရှိလာခြင်း ဖြစ်သည်။

ထန်ထျန်း၏ မျက်နှာတွင် မသိမသာ ပြုံးယောင်သန်းသွားသည်။

"သေချာ ကြည့်ပြီးမှ ဆုံးဖြတ်ပါ"

အကြီးအကဲက ပြုံး ရင်း ပြောလိုက်သည်။ "ငါတို့ ကုံးချန်ခြံဝင်း ရာဇဝင်မှာတော့ အဆင့်မြင့် အင်မော်တယ်ကျင့်စဉ် သုံးခုကို ဆက်တိုက် အသေးစား အောင်မြင်မှု ရယူနိုင်ခဲ့တဲ့ ပါရမီရှင်ကြီးတွေ ရှိခဲ့ဖူးတယ်။ "

"မင်းတို့လည်း အဲဒီလို အောင်မြင်မှုမျိုး ရနိုင်မလားဆိုတာ ငါ တကယ် မျှော်လင့်နေပါတယ်"

စကားပြောနေစဉ်တွင် အကြီးအကဲက ထန်ထျန်းကို အကြိမ်ကြိမ် ကြည့်နေသည်။

၎င်းမှာ အားပေးခြင်းလည်း ဖြစ်နိုင်သလို စိန်ခေါ်ခြင်းလည်း ဖြစ်နိုင်သည်။

ထန်ထျန်းကတော့ ထိုအရာကို ဂရုမစိုက်ပေ။

အကြောင်းမှာ သူက သူ၏ အိတ်ထဲတွင်ရှိသော သုံးစွဲမှုအမှတ်များဖြင့် အဆင့်မြင့် အင်မော်တယ်ကျင့်စဉ် မည်မျှအထိ "အလကား ရယူ" နိုင်မည်ကို တွက်ချက်နေသောကြောင့် ဖြစ်သည်။

ကျင့်စဉ်တစ်ခုကို အသေးစား အောင်မြင်မှု ရရှိရန်အတွက် အမှတ် ၄၀ ထရီလီယံ လိုအပ်သည်။

ဤအတိုင်း တွက်ချက်ကြည့်လျှင် ကျင့်စဉ်ပေါင်း ၃၀ ကျော်ခန့်ကို နားလည် သဘောပေါက်နိုင်ပေလိမ့်မည်။

ဒါလည်း သိပ်မများသေးပေ ။

ကြည့်ရတာ ထျန်းဖူနန်းတော်ကို အကြွေး ပြန်ဆပ်ဖို့ အချိန်တစ်ခု ထပ်ရှာရဦးမယ် ထင်တယ်...